منتديات قصايد ليل

منتديات قصايد ليل (http://www.gsaidlil.com/vb/index.php)
-   …»●[دواويــن الشعــراء والشاعرات المقرؤهـ المسموعهــ]●«… (http://www.gsaidlil.com/vb/forumdisplay.php?f=37)
-   -   ديوان الشاعرة عبير بنت احمد (http://www.gsaidlil.com/vb/showthread.php?t=105763)

طهر الغيم 08-23-2016 03:05 AM
ديوان الشاعرة عبير بنت احمد
 






نبذه عن الشاعره عبير ... .


هي الشاعره / عبير بنت احمد التويجري




عبير بنت أحمد التويجري
شاعره سعودية من مواليد وسكان الرياض - 22/12/1982م
بكالوريوس علوم الحاسب والمعلومات - جامعة الملك سعود 2005م


تحقيق المركز الرابع ضمن مسابقة أفضل قصيدة مشاركة في نادي المواهب بجامعة الملك سعود بقصيدة " قلب الحدث " 1424ه
أمسية شعرية في مهرجان صيف بريدة الترويحي المقام في مركز الملك خالد الحضاري 1424ه
أمسية شعرية في فعاليات إحتفالات أمانة مدينة الرياض بعيد الفطر المقام
في مركز الأمير سلمان الاجتماعي1425ه
أصبوحة شعرية في برنامج "امن يا وطن" كلية الإقتصاد والتربية الفنية 1426ه
أمسية شعرية في افتتاح مهرجان التراث والحرف اليدوية المقام بمركز الملك عبدالعزيز التاريخي تحت رعاية الأميرة حصة بنت سلمان 1427ه
أمسية شعرية ضمن مهرجان التراث والحرف اليدوية (نماء وإنتماء) 1428ه
أمسية في مهرجان صيف الرياض (الأسرة والطفل) 1429ه
أمسية في اختتام مهرجان القرية التراثية السادس بمركز الملك فهد لرعاية المعوقين 1430 ه










طهر الغيم 08-23-2016 03:06 AM


قصيدة كلك ذوق - عبير بنت احمد



معودني على الغيبة..ولا يخفاك .. كلك ذوق
حضورك حلم ..ما بأقبل غنيمه غير تحقيقه

هلا بك.. قد ما عنك خيالي ما يعيقه عوق
هلا بك قد ما طبع التغلي منك ماطيقه

أحبك.. ايه أحبك قلتها لك وارتفعنا فوق
حشا ما ننزل وربي رفعنا عن مخاليقه

كفانا من ورى الدنيا هوانا والأمل والشوق
حريقة تحرق الباقي ولا تجتاحك الضيقه

ولا قبلك خلق ربي حبيب ولانخلق مخلوق ..
.. يفرقنا .. مدام الله مجمعنا بتوفيقه

ومهما قيل عنك من حكايا مصدر موثوق
أنا بيت نيات التخلي عن مواثيقه

عساني من سبات اخر عهد لي بالهوى مافوق
وتاخذ خافقي واخذ خفوقك من معاليقه

نخلي حظنا غصب عليه يطيعنا ويروق
نعيش فحلمنا مابين تكذيبه و تصديقه ؟!

وتطلع بنتنا تشبه أبوها بالدلع والموق
ويطلع إبننا نسخه من امه دون تخويقه

حبيبي لا تطول غيبتك يكفي / عطشتك شوق
وحلمي/ من زمن ادم/ ويبطي/ ما نشف ريقه



طهر الغيم 08-23-2016 03:07 AM


قصيدة لا يغرك - عبير بنت أحمد


~ لا يغرك ~



لا يغرك زينك اللي في عيونك
ربي اللي زينك خالق سواك

ولا يغرك مدح من هم يمدحونك
كل مدح فيك بالذم اشتهاك

ولا يغرك قولهم : ( لا يحسدونك )
الحسد يا صاح منشاه بحشاك

يوم شفت الطيرمبعد عن غصونك
رحت يم الشمس في عن لظاك

دوك ثوب الخير ما غطى متونك
والفساد أردى خلاقينه كساك

يا مريض الحال قل لي ويش لونك؟
جب طبيب الكذب يصرف لك دواك

من يقول: (الصدق لا يمكن يخونك)
وش يقول فكلمة الصدق بهواك؟

تحسب إنك بالشعر عززت كونك؟
شعرك المكسور يالجاهل هجاك

لا تغررني بدمع في جفونك
ذاك أول يوم أنا أنشد رضاك

أتعس الصبار مسقيته مزونك
( يتفل ) أمطار تقطر من سماك

يا غشيم شلون تترك من يبونك
وترمي بنفسك على هذا و ذاك؟

لو سمعت الشور ما طعته جنونك
يستوي عنده نجاتك والهلاك

أعرف ان الطيب لا صنته يصونك
أنت من طيبك .. تبيع اللي شراك !!

عش قرير العين وانساني بهونك
يا حلاة العيش.. دام إنه بلاك

رح لمن غروك وازهلها ظنونك
كود تلقى لك خبل يركض وراك

طهر الغيم 08-23-2016 03:09 AM


قصيدة طيف السراب - عبير بنت أحمد


~ طيف السراب ~


طرى في البال هوجاس شعور خفت تفسيره
شعور يوم لاقيتك .. نسى باله و هوجاسه

تقوله : نفترق لازم عسى يا علها خيره
واقول إن كانها فرقا ؟؟ عساها ضعف مقياسه

خبرتك ما تقول إلا كلام دون تبريره
علامه هالحكي كله لسانك يومها داسه ؟

سكنت الروح في روحي بنى لك خافقي ديره
تطاول في مبانيها و لكن إنهدم ساسه

حسبت ان الفؤاد بطلعتك بيطير مع طيره
و اثر طيري بجنحانه غدى عباس فرناسه

كسرت من الغلا قلبي بعد ما طاب تجبيره
شربت من العطش دمعي بعدما إمتلى كاسه

تصور هالعقل طيف السراب و زان تصويره
ألا وش حيلته عقل ضرب باخماسه اسداسه

يعانق هالألم روحي.. عرف للطيب تقديره
حلف في داخلي هالجرح لاماينحني راسه

خطاي إني عطيت الود منهو (لا) حسن سيره
مثيل الخل في السكر إلى من إختلط .. حاسه

حبيبي وش لنا والحب دام الحب تصبيره !!
بعيد الفرق .. وش جاب اسود الكربون ... لألماسه

حبيبي للأسف ما عاد قلبي ينتفض غيره
تريح من جميع احساس قلب مات بإحساسه

حبيبي و الوداع الحل كانه ما بقى غيره
أمانه بس لا تنسى تشيل الحب فأكياسه

طرى في البال هوجاس شعور ( صح ) تفسيره
شعور يومي اطريته .. رميت البال .. بأنجاسه

طهر الغيم 08-23-2016 03:11 AM
[ALIGN=CENTER][TABLETEXT="width:80%;background-color:darkred;"][CELL="filter:;"][ALIGN=center]
[ALIGN=CENTER]

قصيدة زمن قاسي - عبير بنت أحمد


من قصائد الفراق....

~ زمن قاسي ~




ماهي غريبه يا زمن .. قاسي
عاداتك.. الله لا يغيرها

مادام حظي طاح متواسي
نشوف وش بيصير اخرها

قلبي كبير .. ومعدني ماسي
والناس تصقل في مظاهرها

ياللي قطعت امالي بفاسي
وش حاجتك في كسر خاطرها؟

وبعض الكسور..ابني بها ساسي
أقلها .. ممكن نجبرها !

ولو ذقت مما ذقت في كاسي؟
عينك بتبكي دم .. وأعذرها

ودي أوري دنيتك .. باسي
واخاف لا أجرح مشاعرها !!

هجرت لجلك موطني وناسي
وأمنت روحي عند هاجرها

ناديت حتى بحت اجراسي
وتسمع ولا حتى تعبرها !

وماطعت فيك الصاحب الراسي
حتى اطيع انذال تحقرها

وأدري بصدق الحاسد الخاسي
وأكذب على نفسي بأسايرها

لوهي على همي وهوجاسي؟
هانت على نفسي عبايرها

بس كيف يعجب عينك لباسي
وانا .. منيب اللي تناظرها؟!

البارح اهديتك من احساسي
واليوم اشوفك صرت .. شاعرها !!!

وانت أقرب ا من النفس لأنفاسي
وأقرب من الدبله لبنصرها !!!

وياهونها لاشفت كراسي
مصيبته وشلون يصبرها

ماجيت اعزز بالأمل ياسي
جيتك بأعزي فيك.. وأشكرها

واذكرك بالبعد يا ناسي
والا المحبه ؟.. لا تذكرها

ومادام طاح الحب من راسي؟؟
ماهين نفسي وانت خابرها

من عادتك .. يا قلبك القاسي
خطيبتك .. دايم تغيرها





طهر الغيم 08-23-2016 03:13 AM


قصيدة وأطري عليك - عبير بنت أحمد


~ وأطري عليك ~




اسفه .. كنت احسب انك ( قد ما احبك ) تبيني
قلت يمكن تشفق الدنيا علي .. و اطري عليك ؟

ما هقيت انك ولا مرة .... كذا ..... فكرت فيني
يوم انا مالي وجود إلا إذا فكرت فيك

كل ما شفت الشروق.. اقول..هذا انت ابتجيني
لين ما ذابت شموس الكون من شوقي إليك

وكل ما حسيت في قلب عروقه تحتويني
صوره عندي خيالي (لك).... وأتلهف و اجيك!

واتوهم قبل ما .... أوصل ...... بأنك تحتريني
واتساءل .. ويش بتسوي .. لو إني ما أبيك ...؟؟

وإقتناعي ....... إن ذا مكتوب مبطي في جبيني
وإنني ماني سوى لعبه .. وطاحت في يديك

يا خسارة كل احاسيس الغلا لك في سنيني
يا خسارة عمري اللي راح عمره يحتريك

يا خسارة كل زين ما قدر يوصل لعيني
يومني ارويت عيني بك..ولا ارضى لك شريك

اسفه ..... لا والله الا اسفه بيني وبيني
كنت احسب انك كفو هالقلب يومه محتويك

كيف أنا قارنت أصلا (حب غيري) مع (حنيني) ؟؟!!!
لكن الشرهه علي والا انت .. ما يشره عليك

طهر الغيم 08-23-2016 03:15 AM


قصيدة راحت عليك - عبير بنت أحمد


من قصائد الفراق....

~ راحت عليك ~





خلاص راحت عليك .. وراحت أيامك
والحب راحت به الأيام من دونك

يا قلب صحصح.. زمن وابشرك .. ضامك
إلحق جروحك قبل تستفحل طعونك

لو ما ظلام الليالي حس بالامك
ما كان شفناه صابغ وجهه ب لونك

حذرتك امن المسا .. واهديته احلامك ...؟
أو تحسب انه سهر لك لأسود عيونك ؟؟!!

وقت يخونك به الرجال قدامك
ظنك سفيهه .. إلى قفيت بيصونك ؟

اللي حكى لك .. بيحكي فيك لأقلامك
حتى اقرب الحبر يا مسكين بيخونك !!

ما يكفي امن الحبايب جفت عظامك...
للحين ترجي من الحساد يسقونك ...؟!

الطيب ذنبك .. وعيبك طاهر اسلامك
ومع كل هذا.. تبي بالخير يطرونك !!

يا قلب يكفي حرام تقطع ابهامك
كل له الله .. و كان الله في عونك

اليوم ميلاد موتك.. وفر اعوامك
وان شاع ذكرك مصير الناس ينسونك

خلاص راحت عليك .. وراحت أيامك
والحب راح ورجع لي بس .. من دونك

طهر الغيم 08-23-2016 03:16 AM


قصيدة دبلة الماس - عبير بنت احمد



من قلت أحبك..ضاع الاحساس كله
ومن شفتك أصلا..ضعت انا قبل الاحساس !!

غلاك في قلبي كذا .... جا من الله
سبحان من خص الغلا ناس عن ناس !!

أول هوانا .......... ما نوينا انتوله
والحين ما به للوله حد ينقاس

نشفت ريقي وانت ناوي تبله؟!
أشربك .. واظمى.. واسكبك وأكسر الكاس

وإذا جنوني عاجبك ؟؟ .... لا تذله
كافي على عقلي – من اذكرك - ينداس

مايكفي انك كل شي مستحله
تجي تقول : أما أنا ...... وإلا .. الأنفاس!!

لولا وجودك .. كان هالقلب من له؟
ولولا وجودي .. من بها ترفع الراس ؟

واللي لحقه الشك فالحب قل له :
تبطي ولانتب جايب للردى ساس

ومسكين منهو ما يسميك خله
من وين له يربح وهو شاري إفلاس؟

إن كان فيني من ورى الحب عله
حبك طهور ..... ولا على العاشقة باس !

وإذا بغيت تزود الطين بله ؟؟
غافل يدي .. وازرع بها .. دبلة ألماس

طهر الغيم 08-23-2016 03:19 AM


قصيدة لهفة عاشقة - عبير بنت أحمد



للوطن أرسل من الخافق سلام
فيه لهفة عاشقة عيت تتوب

للسعودية مدار الإهتمام
شمسنا اللي ما لها يوم غروب

قلت احبك قبل ما اعرف الكلام
ومع حليب امي لك الود امحسوب

ومن حوالي أربع وعشرين عام
كانت أول خطوة ف أرضك تجوب

يكفي انك موطن البيت الحرام
كم يحسدونا على هذي شعوب

وفيك مسجد للنبي سيد الأنام
إنخلق معصوم من كل الذنوب

وما ملك مستعمر لأمرك زمام
يومك انتي مالكة كل القلوب

ومهما قالوا فيك عذالك ملام
لا حشا ما اشوف في داري عيوب

من يلوم اللي زرعتي به هيام
شعبك اللي هام في حبك يذوب

إنتسابه لك على صدره وسام
يفتديك ان كان في سلم أو حروب

الغلا للشرق وللغرب إحترام
من شمالك نعشقك لين الجنوب

الله يديمك لنا عز و سلام
والله ينور لنا فيك الدروب

وبصلاة الله على أحمد ختام
عد ماهبت على الصحرا هبوب

طهر الغيم 08-23-2016 03:21 AM


قصيدة زمان الكبرياء - عبير بنت أحمد


من قصائد الفراق ...

~ زمان الكبرياء ~





يا رفيق الجرح الأول .. جرحك التالي بيا
مدمي باقي عروق باديات الإحتضار

ما ذبحنا غير قولة : ( كبريانا ) .. كبريا
من عرفنا كبريانا كل شي فانحدار

لا تحسب الشمع نوره يكفي العالم ضيا
كل ليل بالخطايا تكشفه شمس النهار

الحقيقة في وضوحي ... لا غرور و لا ريا
البلا إن الخطا شيد على عينك جدار

كان صغر السن ظنك في عذاريبي حيا
كيف ظنيتك تخلي للعقل أدنى اعتبار

يا بدايات الهموم و يا بداياتي و يا...
.. اخر أحزاني ويا أكبر أحاسيسي الصغار

يا جميع الجرح الأول .... يا زمان الكبريا
يا وداع الحب كله .. يا وفاتي باختصار

طهر الغيم 08-23-2016 03:22 AM


قصيدة حطني تلقاني - عبير بنت أحمد



النوم له كم من شهر ما جاني
والهم من كثر العنا.. هميته

بأسباب من عقب اللقا .. خلاني
مالي حد غير الفراق ا لقيته

الفكر يمه .. جابني ووداني
ما عنه يتخلى و لو خليته

من دونه.. احيا .. والبشر تنعاني
وكل من ضحك لي ؟.. في انا عزيته

قبل اعرفه .. كم كان ليلي هاني
ان كان جاني نوم والا جيته ..
.
.
ذي دعوتي: " يارب لا تبلاني !...
... بالحب ".. مير ان البلا حبيته

كان ا يتشكى عيشته وحداني
وانا .. على نياتي وحييته !

شفته حزين .. وكان يترجاني
ياليتني من يومها رديته

لا جا يسولف لي .. يضيع لساني !
وانسى كلامي وين انا حطيته

حتى سكوته يستفز ألحاني
على مقامات الغلا غنيته

يضحك ؟.. ولا اذكر عقبها عنواني !
يرفع حجاجه ؟.. وانشده عن بيته

به طيبة تشبه بياض ألواني
وله هيبة ما تشبه الا صيته

واموووت به لاقام يتحداني !
ويموت بي لا قمت وتحديته

يدري بحالي.. " حطني .. تلقاني !! "
وش كان ماكان الطلب لبيته

وبين الرجاجيل ان طرى لي ثاني ؟
ما اعده الا ( بنت ) .. لو عديته !

ولا قد ملى عينه سوى قيفاني
رغم انني بالشعر ما وفيته

من بن سبيل / لينما / الجزلاني
محد وصف حس معه حسيته !

ورغم انني " رمز الوفا الإنساني"
خليت لجله كل من أغليته !!!

وانا اشهد انه من نوى يهواني
يتعب .. م غيره: متعبي .. سميته

متمكن مني و من وجداني
ليته درى عن حالتي يا ليته

صحيح بإنه عمري و خلاني
مير ان طرت له " ثانية " .. وريته !

وان فكر ف غيبته يتناساني ؟؟
ما ينفعه لا جا .. وانا ناسيته

طهر الغيم 08-23-2016 03:24 AM


قصيدة عسى ما تكلفت - عبير بنت أحمد



~ عسى ما تكلفت ~




عقب الثمان دهور مريتني اليوم
جايب تحياتك .. عسى ما تكلفت !!

ما كنك اللي قلت (انا فيك مصدوم)
عيني بعينك .. تنكر انك تحسفت ؟!

لو تمهلك دنياك ما تمهلك دوم
هذا.. لو انك للغلا قد تعرفت

أجل أنا يا صاحبي ما علي لوم
لو عن رجاي وحسن ظني توقفت

وكانك تعاف امن الوله لذة النوم؟؟
أنا لهالدنيا بلذاتها عفت

ياما سهرت وصحبتي ليل ونجوم
وياما على روح المجرات سولفت

وياما رحم حالي يتيم ومظلوم
والجن احس اني معاهم توالفت

لين الشقى خلى من عزومي..عزوم
وعن ركب تباع الهزايم تخلفت

ما شفت قبلك داخله ( أمة ) رخوم
ومثلك(قبيلة) في الردى..مابعد شفت

القلب لولا نبضته ؟؟ ماله لزوم
والدم لولا حرمته ؟؟ ما تكتفت

محروم عشت .. وخلك تموت محروم
يكفيك بإنك في صدودي تشرفت

ولا تحسب اني ارتجف خوف وهموم
لولا الحساب وشدته.. ما تراجفت

ولا يقبل الله لي صلاة ولا صوم
إن كانني من غير رب الملا خفت

لو بس تفهم ليه انا أستر علوم
ما كان عني هالحكايات ألفت

خطاك سهم صايب الروح مسموم
ماعاد يشفع لك أسف لو تأسفت

وبهالبساطة جيتني شاري اليوم
وتبيعني بكره ؟؟ عسى ما تكلفت

طهر الغيم 08-23-2016 03:25 AM


قصيدة خمسين غيمة - عبير بنت أحمد



قالت الشاعره القصيده
في ذكرى زواج والدايها الخمسيني عام 1432ه أمد الله في أعمارهما
على طاعته ومتعهما بالصحة والعافية
~~~~~~~~~~~~~

خمسين غيمة هالسنة جت تعايد
رسيلها ديم الفؤاد ووتينه

وثامر شجرنا بالأمل له عوايد
والبدر خالد في سما هالمدينه

واذا ذكرنا كم لنا من ولايد
لمى وأسامة ملحهم خابرينه

وعبدالله يقري عمر فالجرايد
وعزيز يعطي عبدالرحمن زينه

ومحمد اللي صار له حب زايد
سمي خالي بالوفا ذاكرينه

واحمد على أحمد مزيل الشدايد
أبوي يا شيخ العقول الرزينه

اذا ابتسم يزهل معه كل كايد
والشمس تبدا يومها من جبينه

واعمارنا لوتنهدى كالقصايد
كل قسمها بين أمي وبينه

ونوره على نوره بها الطيب سايد
من طيبها طيب البشر ماخذينه

في حضنها يغفى المسا والوسايد
ومن لينها غطت على الياسمينه

وفعشقها مابه خفوق محايد
تطغي سماحتها على من تدينه

خمسين شمعة في هواهم وقايد
وعسى الرخا وقاد باقي سنينه

ذكرى زواج النجمتين الفرايد
نشرب بها طعم الفرح من يدينه

لكم نرابي حبكم بالفوايد
يا راسمال الكون واول حنينه

كل عام وانتم للرقاب القلايد
كل عام وانتم للبحار السفينة

كل عام واحنا في غلاكم نزايد
وكل عام واحنا في رغد عايشينه


16-10-2011 الأحد

طهر الغيم 08-23-2016 03:27 AM


قصيدة لا تحداني - عبير بنت أحمد



الشرهه اللي تعاندني واعاندها
من وين ماروح عنها غصب تلقاني

على حبيب نوى روحي وواعدها
وخلوني بدون روح ودون خلاني

ما شفت فيه المزايا .. شفت سيدها
وما ينقصه شي .. دامي نصفه الثاني

أعذره لا غاب عني.. مير زودها؟!
ولا جيت ب اشره / لقيت العذر ف لساني

يقول للناس : ( أنا موتي على يدها )
واقول : يستاهل أكثر .. ليه يهواني ؟!

العشق عشقي .. حبيبي لا تعقدها
لا تضيع أحلى سنيني .. والعمر فاني

ما اقصر ليال الجفا .. لولاي اعددها
وما اطول ثوان اللقا .. لولاك تجفاني !

سيد الدواهي .. تراني أسيد وأدهى
إثبت لي انك إلى هالحين تقواني

غيبتك ..

لو كنت أهمك ؟؟

لا تعودها

والا تراني بغيب .. ولا تحداني !!

والشرهه اللي تعاندني .. بعاندها
واصير من وين ما رحت انت .. تلقاني .

طهر الغيم 08-23-2016 03:28 AM


قصيدة تسعه وعشرين- عبير بنت أحمد



الله يسامح صبح سبعة ثلاثة ~
قبل انتبه تميت تسعه وعشرين

البارحة كانت سنيني دماثة~
واليوم جيتي بالخطا يالثلاثين

دورتني بين الشعر وانبعاثه ~
وضيعتني داخل سجون الدواوين

وماكل صرخة في المدى إستغاثة ~
وما كل وردة تنهدى للمحبين

والما اذا تراب الأحاسيس عاثه~
يصبح كما الانسان مرده لطين

وأنا وشعري مالنا بالحداثة~
إحساسنا شفاف مافيه تضمين

والطيب لا صنعة ولا هو وراثة ~
الطيب طيبي وانشره فالميادين

وكان الهوى بيحدني للخباثة ~
عز الله اني ماتربيت للحين

ظامي الرجا كلما يطول لهاثه~
يعميه طعم الياس عن مورد العين

ولوكنت أصلا حاظيه باكتراثه~
مايؤمن بغيري ويكفر بهالدين

هذا زمن صار الوفا به غثاثة~
والعقل صاير يحتكم للمجانين

ولوهو على قلبي نويت اجتثاثه~
ولا أسلم طيبته للسكاكين

وعلى كثر ما خنت سبعة ثلاثة ~
الله يسامح جيتك يالثلاثين

طهر الغيم 08-23-2016 03:30 AM


قصيدة هرج ليل - عبير بنت احمد



الحب ماهو هرج ليل، ول اصبح الصبح انفقد
الحب شمعة لجل تضوي دربنا لازم تذوب

صعبة نكون لبعضنا قلبين من دون الجسد
واصعب نكون لغيرنا أجساد من دون القلوب!

ان كنت تتحمل ، فأنا مالي على الفرقا جلد
وما فيني اتحمل لقا بيزيد ل ذنوبي ذنوب

وانا ادري ان ظرفك شديد، وتدري ان ظرفي أشد
بس ليتنا ندري متى تجري على الكيف الهبوب

وإن ماكتب ربي شبيه لي يشيل اسمك ولد
ابطلب الله ينزع الإحساس من قلبي واتوب

أضحك واعلل بالأمل نفسي واتفاءل بعد
بس الحواس الخمس متفقين في حس الشحوب!

واجامل العالم واعمر بإبتساماتي بلد
ومن شافني ماكن للأحزان في صدري شعوب!

تعبت كني رابطة فالجيد حبل من مسد
ماغير اشيل ف حيرتي واشيل وياي الدروب

أهرب من الواقع ومهما قام حظي أو قعد
مالي عن اللي قدره ربي على روحي هروب

يارب انا كلي رجا.. ياواحد فرد صمد
ألقى مفاتيح الفرج واعتق مساجين الكروب

انا احترقت ووهج شمعة عيني البارح جمد
من وين اجيب لدمعي الجامد دفا حتى يذوب

طهر الغيم 08-23-2016 03:31 AM


قصيدة لا يجي للحب - عبير بنت احمد



لا يجي للحب يالأشعار طاري
إدحري شيطاننا والا رجمته

والدموع اللي بها طفيت ناري
ليتها مأستعجلت باللي كتمته

الحزن قبل الهوى فالدم جاري
ماحرمني من وفاه ولا حرمته

وش بأقول ووش بأخلي وش بأداري؟
حلم عمري .. راح عمري .. ماحلمته!

من فقد ظلما .. لقاها في نهاري!
والوجود أمسى يواسيني ب صمته

ويوم جيت اخذ من الفرقى ب ثاري
جابت الأشواق طيفك .. لا عدمته

عقلك اللي شال من راسي وقاري
طبعك اللي لو فهمته .. ما فهمته

عطرك اللي كان بأنفاسي يماري..
.. كل بيت في قصيدي بك نظمته

كل صورة عذبت جدران داري
كل جرح حز فيني .. وابتسمته

يمكن ايكون الشعر بايع و شاري
بس ابفهم حبنا وشلون سمته ؟

لو وفاي الحين عندك صار عاري؟؟
بأفتخر في عاري اللي لك وصمته

طيبتي ما تشفع لرد اعتباري
والخفوق ابيض ولكنك ظلمته

من تحبك .. ما تذمك وانت داري
ما خبرنا لي عدو قد شتمته

إسترح .. ما جبت للأشعار طاري
ولو يخيب الحب .. بأبقى محترمته


٢٠٠٣

طهر الغيم 08-23-2016 03:32 AM


قصيدة في حضرة الجنون - عبير بنت أحمد


من قصائدها الفصيحه ....

في حضرة الجنون ! ~




أسرت عيون العاقلين ومن سرى

وبقت عيون للجنون ( فهل ترى ؟ ...

.

.

...جفن تثاقل أن يرد بطرفه

خشي انغلاقا دائما فتحدرا )


ما كنت أطمع في وصالك إنما

طمعي لنيل وداعك المتأخرا


كيف السبيل ولي فؤاد حاذق

يزداد من ذاك الذكاء تعثرا


كيف السبيل وسوء حظي سيد

كسرى بحزني والمتاعب قيصرا


ماء الغيوم كما البحار ملوحة

تنهال في حلل الحياة فتقفرا


أين الضياء ؟ وأين فجرا باسما ؟

أين الربيع وأين حقلا أخضرا


قد كان لي قلب بلون دمائه

أنى يعود من الذبول فيزهرا ؟


ماكنت في أمسي أوفر فرحة

ما بال فرحي لا يعود فيشكرا ؟


يجتاحني شوق لحضنك يرتمي

فيحيد عني حضنك المتكبرا


أبكي ، فليس يسيل دمعي إنما

عاث الجمود بمقلتي تحجرا


ولى الحنين كما تولى غيره

وبقيت وحدي كالحطام مبعثرا


أحرى بقلبي أن يعاود عيشه

بين القبور ، فلا يباع ويشترى


حضر الجنون فراح ينشر حوله

عطري ، فلم يزل الخيال معطرا


قلمي يروق له الجنون بحبره

أواه لو كان الجنون مصورا !


ولقد ظننت بطول صبري إنما

من ذا يطيق عن الجنون فيصبرا


أهل التخلف بالعقول سواسية

لكن من وهب الجنون تحضرا

طهر الغيم 08-23-2016 03:34 AM


قصيدة التوبه - عبير بنت أحمد



جيت النسايم لها ذعذاع
والمسك عطرت له ثوبه

لا قلب لي فاتح مصراع
ولا طهر يشكي من ا ذنوبه !!

يوم القدر للفرح منصاع
جوني حشودك وراحوا به !!

يا سيدي والوصل قطاع
والهجر عتب على دروبه

كانك تقول البحر بك ضاع
دوك السما بي مصلوبه !!

ما دام ذا في الهوى لك باع
عينك عن الحب معصوبه !!

خنت الرعابيب باستمتاع
ياليت ماني برعبوبه !!

لا تنشد الوافي الخداع
ليه المحاظير مرغوبه !!

سر المولع اذا ما شاع؟؟
تصبح نواياه مقلوبه !!

لاصبحت جا خافقي ملتاع
ولامسيت رددت والكوبه !!

خل التجهم ولا ترتاع
مثلك انا كنت مغصوبه !!

تدري أنا خافقي لا باع
مأهتم شاريه كم هوبه

كان الهوى واعدك بالقاع ؟
قدر الهواوي ومحبوبه !!!

ماعاد لي في هواك اطماع
التوبه التوبه التوبه


طهر الغيم 08-23-2016 03:35 AM


قصيدة قوة عين - عبير بنت أحمد



يا سرع ما جاني الإثنين
ليته من ايامنا منسي

وفي رهبتي م اختلف شخصين
كني مساقة إلى عرسي

قابلت ذاك اللي لين الحين
أصبح على طيفه وأمسي

عرف بنفسه وسولف لين
طاحت يديني عن الكرسي

غافلني و قال : تب تنسين!
ليت الزمن وقف ف أمسي

صار اللي صار.. أبروح لوين
وكل عرف حالي و نحسي

ما ينفع لهالألم تخمين
وليت الندم ينفع لطمسي

كلش غدا في مذاقه شين
والغيم الأسود على شمسي

والدم سال.. وتركني بين
فم عجز يفتح لهمسي ..

.. وموعد طلبني بعد شهرين
واثق.. وانا اشتمه في نفسي

ودي أقول وبقوة عين :
بشتاق لك حييييل يا ضرسي!

طهر الغيم 08-23-2016 03:36 AM


قصيدة حلول الغاز - عبير بنت احمد


حلول الغاز



يامعجب تقول انك لشعر النسا منحاز
ياليتك توفر هالمشاعر ورايك .. لك

مرزز مية صورة تقل صالح العزاز !!
تبينا ندقق في كلامك أو ف شكلك ؟

على بالك ا عيونك معاها حلول ألغاز
تحسب ان ازارير العذارى تفكك لك !!

ترى لي حمية شيخ .. ولي فالشرف مركاز
وحجة محبتك الشعر.. ما تملك لك

تحديتني يمكن .. ولكن من اللي فاز
على الرغم من ألفين مبدع مشارك لك

اذا انك وصلت ل وزن مطلع ؟.. وصلت انجاز
وعشرة كسور في القصيدة تضاحكلك

تبي تفهم المغزى : عط الخبز للخباز
فلاحد ( سمع بالذائقة ) .. يشتهي أكلك

وانا عادتي ما احط بالي للإستفزاز
بس اني أبيك اتشوف غيره يشبك لك

وخذها من العطر.. الصراحة بكل إيجاز
لوإنك تخلي النت كله .. ترى ابرك لك


الساعة الآن 01:01 PM

Powered by vBulletin® Copyright ©2000 - 2025, Jelsoft Enterprises Ltd. TranZ By Almuhajir
HêĽм √ 3.1 BY: ! ωαнαм ! © 2010
new notificatio by 9adq_ala7sas
جميع حقوق النشر لشعارنا و كتابنا ومسميات الموقع خاصة و محفوظة لدى منتديات قصايد ليل الأدبية