 |
منتديات قصايد ليل
(http://www.gsaidlil.com/vb/index.php)
- …»●[دواويــن الشعــراء والشاعرات المقرؤهـ المسموعهــ]●«…
(http://www.gsaidlil.com/vb/forumdisplay.php?f=37)
- - ديوان الشاعره النادره
(http://www.gsaidlil.com/vb/showthread.php?t=24165)
ديوان الشاعره النادره
الشاعرة النادرة هي شاعره سعوديه مميزه بقصائدها ولها اسلوب رائع ،،، قرأت لها كثيرآ و اعجبني اسلوبها ،، يالهاجري ياهاجسي هات القوافي المراديف وهات البيوت النادرات الاصليه وهات الجزاله خل عنك التخاريف من عادتي لاماعرفت الهزيله يامرحبا ترحيبة الناس للضيف عدة رقاب للولي تنحني له وعد الجبال العاليات المشاريف واعداد مالاحت بروق المخليه يا مرحبا بك يا بعيد المشاويف شوق الهنوف اللي تفل الجديله شاعر جزل لاما تبي زود تعريف من لابة الامجاد واهل الفضيله اولاد هاجر هم زبون المضاعيف وفعولهم بالطيب دايم جليله اللي لهم يوم الصعايب مواقيف وحريبهم شاف العناء والفشيله صارت عظامه من خطرهم محاذيف يردون حوض الموت لاحان ويله تشكي علي هم الليالي العواصييف ونفسك من الاحزان صارت عليله ياعايض المنعور لا تشكي الحيف خلك جبل ثقل الزمن ترتكيله لاتشتكي فابكي تراها على طريف ! من واقع خلا دموعي هميله! ياما شكينا في زمنا التصاريف وياما بكينا فالليال الطويله نضحك نبي نلطف الجو تلطيف ! والهم ساكن فالضلوع النحيله ! نجحد عبايرنا دون الملاقيف ونخشى حكي اهل النفوس الذليله! اما الذي من خلقته ما بعد شيف ؟ ولاضاقت الايام ماحد يجيله ؟!! فهذا على ماقيل في وقتنا عيف ودرب الرخامه صار مجرا سبيله امهايطي يصفف الهرج تصفيف ونفسه من الاحقاد دايم غليله ماله مع الشجعان اسم وتصنيف من لحيته تكرم نفوس نبيله يالهاجري هذا الزمن كله مخيف ماعاد ميزنا محيطه ونيله !! ولابد من يوم تزول المشاعيف والهم يرحل والسعاده بديله وهذي تدابيره عليم التصاريف الواحد اللي كلنا نلتجي له وياعايض المنعورلاتشكي الحيف خلك جبل ثقل الزمن ترتكيله |
ياسعود
ياسعود لاتنشد عن الحال ياسعود مابه جديد ياعضيدي اقوله الحال دوم ابنقص ما يمها زود والحظ نوخ يالسنافي ذلوله اجامل الاصحاب و القلب ملهود والجرح في عوج المحاني اعوله منهو سألني قلت انا سهود ومهود اخاف لاتشمت قلوب غلوله !! ياسعود حالي من عناء الوقت مضهود والعين صارت من كراها ملوله ياوجد حالي وجد من عاش مفرود اعلن قصاصه وصار موعد حلوله ولاغريق عايش ايامه السود عينه تشوف الجال وعيا يطوله ! من واقع خلا الامل في مفقود شيب عيوني من زمان الطفوله ! ماهو غرام احباب وفراق وصدود الا زمان اتعبتني حموله اشوف بعض الناس ماتوفي عهود قول على الفاضي بليا فعوله! واشوف ناس لاحكت دبلة اكبود تظهر فضايحها بحكي تقوله واشوف منهم حطو الشعر منقود وقالو بأنه محتكر للرجوله! اقوال نسمعها لها الف مقصود ماتصدر الا من عقول مهبوله!! شعر المره من ماضي الوقت موجود مافيه منهو ينكره بالسهوله فان كان قافي ماغدا كنه النود ؟ يبري جروح بالحنايا علوله؟ والبسه من هاجسي عقد منضود وجزالته منها عيون ذهوله! يحرم علي ولد المناعير والجود ان كان ماأسست فالشعر دوله!! |
ياخوي
هات القلم ياخوي في خاطري بوح ودي اترجم لي طواري وهوجاس واخذ من الابيات سجه مع الروح في معزل مافيه ما يزعج الراس هذي ثمان سنين والقلب مجروح والفكر شارد والمعاليق يباس ويفوح في صدري هموم كما فوح صفر الدلال اللي لها الناس جلاس امشي على درب المقادير وانوح ويهيض وجداني ليا هب نسناس سبة ظروف تجهد الحال وتروح وتترك مواجعها على القلب حراس تعبت وانا اشيل والوقت مشفوح يطوي سنيني دون رحمه ولا احساس كني غريق شاف موته على لوح !! تلعب به الامواج ما صابه الياس ابني من الاحلام بنيان وصروح احلام ورديه غدت مالها ساس ! واطرد سراب اللال واخيلها دوح! مثل الذي فالدهر للسيل عساس ! وازيف الفرحه سواليف وامزوح وامني الخاطر بلا باس.. لا باس تدري وش اللي يقهر القلب والروح ؟؟ انك تعيش العمر محتاج للناس !! |
مران بن قويد - شيخ المروات
بسم الله ابدا وابتدي نظم الأبيات واكتب جزيل القاف واترك هزيله واغوص في بحور القصيد العميقات واخذ معاني مالها من مثيله من عادتي بدع البيوت الجزيلات ماقول بيت فيه نقص وميله وجزل القوافي نلت فيها الشهادات لي الفخر لاقيل مالي عديله يا راكب اللي لامشا في المسافات يشفي جراح القلب يبرد غليله يقصر دروب البعد في ظرف ساعات هي منوته مسك الدروب الطويله شراه منهو ما حسب للخسارات توه جديد في معارض وكيله فالفين وسته نازل في الوكالات فنس الخشوم موردين موديله لامن مشا بتقول خيل السباقات تسبق هبوب الريح خيل اصيله عليه قرم حاضر في المهمات صليب راس في المصاعب دليله من لابتي اللي رقو في الطويلات (دواسر ) افخربهم لي قبيله اللي لهم في ساحة المجد صولات عز الدخيل اللي حياته عليله واعطيه خط به من الطيب نفحات ومن القوافي صغت فيه الجزيله والا استدار وقام يعطيه نمرات بعد الظهر من بعد مانهى مقيله فوله بنزين من أدنى المحطات ونصاه لديار الوفاء والفضيله أهل الشجاعه والكرم والشكالات ( وادي الدواسر ) عز منهو يجي له هو موقع الأحرار وأهل الطناخات فزاعة للجار في ضيق ليله تاريخهم شامخ يرفرف برايات اللي فعايلهم عظيمه جليله وينصا عريب الجد شيخ المروات فكاك عسرات الامور الثقيله شيخ على طيبه تدون سجلات نسيانها عبر الزمن مستحيله هو شيخنا (مران) رجل الصعيبات ستر العذارى لارمو له بشيله شيخ رقا في عالي المجد قمات من وقفته ياكم هم يزيله له في طريق الخير فزعه وقفات فعول خيره مثل وبل المخيله سقم العدو لا اسقاه مر الأهانات ولاذوقه مر الغبن والفشيله ربعه هل الطالات واهل الشجاعات اهل الزعامه والسيوف الصقيله (الآد مسعر) طوعت كل عيلات كعام منهم يشعلون الفتيله سلم عليه إعداد وبل المخيلات واعداد كيف فاح بنه وهيله هو السند يوم الزمن فيه ضيقات ويوم قنب جرحي وزاد بعويله والا أقبلت شهب السنين المغيرات ولامن عناء وقتي سقاني بويله فيه أنتخي واثني عليه الندايات ( مران ) ياسيف الكرم ياسليله (مران) ياستر العذارى العفيفات لامنها ضاقت بهم كل حيله بشكي عليك اليوم بعض الخفيات يوم انها ضاقت علي الوسيله من جور وقتي صابني اليوم طعنات حتى السعاده في حياتي بخيله وقلبي تجرع هم دنياه حسرات من مات ابوي وصار همه يشيله اخفي همومي دون قوم الوشايات اهل الحسد واهل النفوس الذليله شذابة المقفين واهل العداوات جارو علي يوم الزمن جار ميله جنبتهم ولا سلمت الأذيات والشر منهم قام يجرف بسيله هو عيدهم لامن لقو بي هفوات لكنها بعد عليهم طويله ! ياليت فرقاهم تجي بالسهالات واشد وارحل في ديار بديله باح العزاء مني وجاذبت ونات وين السند اللي اجي واشتكي له ؟! ماغيره (ابن قويد ) ريف الضعيفات اللي ليا ضاقت علينا نجي له يالله عسى اسنين عمره مديدات وعسى حياته بالسعاده جميله ويبقى ذخرنا بالليال الشديدات الله يمتع به سنين طويله |
فسحة الايام
من دنيتي ياكثر درس تعلمت قسم المواجع صار هذا اختصاصي!! حزني كما الكشكول واقراه في صمت واخط من ذكره بمرسم رصاصي اسهر واذاكر ليل الاحزان مانمت واسرح مع طعوني ولايفوت باصي لبست مريول الشقا ماتنعمت الضيق شنطه والطواري شباصي وعن فسحة الايام وافراحها صمت وابغي اجازه عن همومن عواصي سياحتي غربه وفبحورها عمت ماهي سياحه في ربوع النماصي العام راح وفي طعوني تألمت الناس نجحو ماهناني خلاصي!! |
عزي جبل .. تبطي عظم ماتنوله
يالله يامعبود ياهادي الضال اعالم بالكون عرضه وطوله يامهئ الارزاق علام الاجال يامنزل كتابه وباعث رسوله اطلبك تغفرلي وتلطف بالأحوال وتجيرني من شر دنيا ذهوله وتزيل هم ماهدا منه البال يمضي زماني وانهكتني حموله الناس في وادي وانا اهيم فجبال بوديان حزن جرفتني سيوله !! القلب فيه من المعاناه ولوال والعين تبكي والسعاده جفوله! اخايل الفرحه ولا شفت همال متى تشوف العين لحظة هطوله ؟؟ لا ياقصيدي هات لي عذب وزلال من القوافي بين ال واوله جزالتك ماناشها نقص واشكال ياكيف تنقص (نادره) من تقوله ؟! جهز سهومك واعيره تشعل اشعال واطلق عنان القاف واسرج خيوله صوب الذي رجولته كلها اقوال هي جعجعه من غير تظهر فعوله !! ياهيه يامخطي المراجل وياضال عن دربها مثلك تخونه رجوله ترسل سهامك ذاه شاربك ماطال ؟ ! تعجز وانا اسمي فوق لا ماتطوله ! ياناكر المعروف ياخايب الفال ياواطي لا ماعرفت الرجوله المرجله عندك شماغ مع اعقال ثوب مفصل بس يحشاه زوله !! وقفت لك بالعز والجاه والمال وعلمتك الاكرام وشهي اصوله شبيت ضوك بعد ماعشت باذلال واطلقت وجهك ياصغير الحموله ! من قيض وقتك صرت لك في وظلال فرش خضر والكل يرغب نزوله ياما انصحوني قلت ماغير عذال واهم ماقالو يخون بسهوله !! رميت كلمتهم على يابس الجال واغلقت يمك كل درب سعوله بانت علومك لي قصيرات وطوال وستار عرفك حان موعد سدوله !! ماهمني قولك وانا بنت رجال عزي جبل تبطي عظم ماتنوله ارقا سنود وانت مافيك تحتال ! وعلى القمم كسبت صوله وجوله الفخر لي دله لها العز فنجال وطيب المبادي نلت فيها البطوله عرضي نزيه وسمعتي فخر الاجيال وابوي شيخ وانت تفداء نعوله !! ذكره بياض الوجه لوغاب فرمال ولا انت حي ماوصلت لوصوله ! ذكري ينومس كل ذربين الافعال وتغتاض منه كل كبد غلوله عسى حياتك كلها بارذل الحال وحظك تعيس منوخ لك ذلوله !! واشوف عينك تذرف الدمع همال ومن عز نومك ياعساها ملوله واشوف بقعا عامله فيك الاهوال والوقت يعلن في حياتك ميوله ! وبين المشافي علك اقفاي واقبال شر يصيبك حيرتهم حلوله والله يحرمك كل تحقيق الامال وتبقى عيونك فالزمان امعلوله اكبر خطا صرت اصفق يمين بشمال درس تعلمته واراجع فصوله !! ظنيت في شخصك تواصيف رجال ! ولانت لاش جاهلتك الرجوله !! |
خل العواذل
لا ياضياء عمري وروحي ودنياي خل الزعل عنك وخل النكايد وخل العواذل لاتبدي لهم راي ترى الشماته للعواذل عوايد !! غاية هدفهم صار بعدي وفرقاي عن دنيتك يبون فرقا وكايد رح قلهم مما كتبته على آي هذا الصدر والعجز ينهى باأيد أنك وداد القلب حبي ورجواي وغلاك وسط القلب ماهو ببايد وأني أشوفك غاية العمر ودواي لا منها دارت علي الشدايد ماغيرك اللي جال باأقصاي وأدناي وهبت لك قلبي وحبي وسايد و أهديت لك عمري على كف يمناي ومن الهديه ما رجيت الفوايد ! يكفي أشوفك بهجة الشوف ومناي وأني على حبك بدعت القصايد ويكفيني أنك دايم تطلب رضاي وغاية أمالك عيشتي في سعايد وان جيتني عزفت من فرحتي ناي وأن رحت عني صار وقتي زهايد صرت السفينه وأنت بالحب مرساي لا منها ضاعت بريح و رعايد !! مالي غناة عنك يا مبعد شقاي يامن لجرحي صرت مثل الضمايد وخلك على العذال مثلي و شرواي حقرتهم وأشعلت فيهم وقايد ! وتبقى مناة الروح حبي و سلواي مهما أبعدتنا بالحياة البعايد وهذا كلام الصدق والصدق مبداي ماهي بقصه أنشرتها الجرايد !! |
حناء فداء نبينا
يالله يارحمن ياعالم الغيب ياباسط أرضه ومرسي الجبالي ياناصر المظلوم لاصابه الخيب ولك التجي يارب ياذو الجلالي انصف لنا مما جرا من هل العيب اللي على محمد اشاعو الضلالي بانت نواياهم بكل الاساليب وشرورهم زادت عن الإحتمالي ! غزو عروبتنا بحقد وتخاريب وغاية مناهم وضعنا با انحلالي! حنا فداء نبينا ياهل الريب نرخص عشانه كل كايد وغالي ونفديه والله ماخشينا عواقيب رخيص لأجله دمنا لو يسالي! يارب تشعل في بلدهم لواهيب بزلزال يخلط بين طامن وعالي وشر العلل باجسادهم علها تصيب مايفيدها طب وكثر السؤالي! وانزل بهم بطشك الآهي لنا تجيب وانصر نبيك ياعظيم الجلالي |
جيت المطار
جيت المطار ودمعتي تكسي العين وهمي تزاحم بين عوج الحنايا ضاقت علي فجوج وأرض و ميادين بساعة فراق ذقت فيها عنايا يوم إن غيري في حراء ناس غالين انا اوادع من سكن في حشايا اللي خذا قلبي و فكري من سنين وسقت الغلا يمه سرايا سرايا ودونت انا وياه عهد ومضامين على المحبه وأتضاح النوايا غلاه فيني مستقر في البطينين ! في داخلي حبه تكون خلايا ! صرنا جسد واحد سكن فيه روحين غلاء سيامي فاق كل المزايا ! وضربت انا وياه روعة مثالين هو الغلا و انا مثالي و فايا في شوفته عيني تشوف البساتين واشوف ما يسقي عناي و ظمايا وان راح عني عشت وضع اليتيمين اللي سكنهم صار دار الرعايا ! غلاه كفه راجحه بالموازين ابيع ناسي بس يبقى معايا ! قرب وداعه غايتي عصر الاثنين ودموع عيني بيحن الخفايا أحس في قلبي من اللوع نارين نار الفراق اللي كوتني كوايا حاولت أخفي دمعتي بين جفنين لين لمحت عيني دموعه جرايا قال الوداع وقلت لحظه على وين؟! من أرتباكي ضاع قاسي قوايا !! قال احفظي لعهودنا اليوم تكفين جاوبت هذا مايبي له وصايا وقال اعرفي انك على طول تبقين وسط الفؤاد وغير كل الصبايا ونادى المنادي موعد الرحله الحين وقفا وانا وصلت لأخر مدايا ماكنت أصدق ويل فرقا المحبين ليما ان قلبي صار ضمن الضحايا !! سافر حبيبي والله ف بعده يعين ومهما يطول البعد يبقى غلايا ومهما تطول أيام وشهور وسنين يبقى الوحيد اللي سكن في الحنايا!! |
أبوي وينه يا30 شعبان؟ ابوي وينه ياثلاثين شعبان ؟ ابسألك وشفيك عني خذيتيه ؟ خذاه ليل لوع القلب حرمان راح وقعدت ابكي مع الوقت وارثيه ضاقت عليك إلا خذيتي كحيلان ؟ اللي على كل المراجل مباديه زعيم ربعه بالوفاء طير حوران يشهد بطيبه ياملا فعل اياديه نزيه عرض مامشاء درب نقصان ماقد شكو شينه محارم عوانيه تشهد على طيبه عواني وجيران وتشهد له الشافه ومنهو مخاويه للضيف والخطار ماصك بيبان يحق لي ياليل يوم افتخر فيه خذاه عود كم خذا روس شجعان! اخذه وعني غيبه في نواحيه ذقت الزهد في غيبته ذقت الأحزان وقلبي عطيب صالي الهم كاويه اصبحت انا ويا المعاناه خلان نمشي على درب المقادير نطويه نشكي بعضنا نكتب الحزن قيفان نبكي زمان الويل نشكي بلاويه في وحدتي عانيت من جور الازمان اضحك واجامل واجحد الضيق واخفيه حزني سكني صرت له ارض واوطان وصدري بحر وهموم قلبي موانيه! وجروح قلبي ناجت الذيب سرحان يشكي عواها جوف صدر ومحانيه! ياليل قلبي تشتعل فيه نيران لامن خطر بالبال ذكره وطاريه ذكر العضيد اللي تحاشاه عدوان عزي وتاجي كان قمت اعتزي فيه ياليل تكفا جاوب القلب وجعان ابنشدك ياليل وشهي مواريه ؟! اسمع بصيته مالمحته بالأعيان وسط المهد راح وتركني اناديه اقول يابابا من اعماق ولسان عندي امل يرجع واشوفه والاقيه ! لكن عزاي انه كما حر شيهان ذكره فخرنا عزنا في مماشيه عسى منازيله بروح وريحان عند الولي من صالي النار ينجيه والعذر منك ياثلاثين شعبان ليلك حزين ونكرهه ماندانيه !! |
النادره في صفاتي صديقيتي مانيب انا الف وادور كلي وضوح بين فكري وذاتي وأصل الوفاء فيني ترى حيل مبذور اوفي لغيري مانتظرت لجزاتي ما العب على الحبلين في طيش وغرور وطبع الخيانه ماتعرفه سماتي ! ومابحث عن الاضواء في شعر منشور أنا احمدالله شامخه لي غناتي اكتب من الابيات واغوص في بحور واعد شعري ماسح لعبراتي ولاحارت دموع وغدا القلب مكسور الجاء لربي وابتهل في صلاتي وماهين راسي في تفاهات وامور فيني شموخ وتاج راسي عباتي! وماعزني جاه ولاعيش في قصور عزيت نفسي لين تأتي وفاتي ! كانك جهلتي .. جهلك اليوم معذور انا تراي النادره في صفاتي !! |
جيب فكسار!! ياراكب من عندنا جيب فكسار تو الوكاله نوعه موردينه توه جديد ولوحته كلها أصفار فالفين وخمسه توهم عارضينه من صنعته غطا على أبوابه غبار لاشافه الفقري دعا الله يعينه عليه ( تويوتا ) و مختوم باإشعار جيب أصيل ياكثر راغبينه إلا لزم خطه كشح عال الأنوار يكاد يعمي منهم امناطحينه ! شراه منهو ماحسب مال وأخسار اللي على الطالات جادت يمينه صليب راس همه الطيب والكار وعلى المواقف دايم عارفينه لادق سلفه توه الجو باأسفار عقب الفجر من بعد مادفاء المكينه روح يقزالدرب والحوطه يسار من سرعته قام يتزايد حنينه روح عسى الرحمن يكفيه الأخطار وعطاه نمره يومنا مرسلينه عطاه ولا قرت بشوفه أنظار خلا النبير يعد مافي كنينه ينصاء ديار العز وديار الأخيار دار مع الأمجاد دايم قرينه دار الصباح الفخر وافين الأشبار صار الوفاء شعب وهم حاكمينه اللي لهم في الطيب صولات وأدوار وكل الثناء من طيبهم كاسبينه من بعدها منصاه شيخ ومغوار كن المراجل قبضة في يدينه (رباح ...) اللي حكيم بالأشوار زبن الدخيل اللي حياته غبينه عريب جد له مع الطيب معبار عز الذي خلاه يوم عوينه عون الضعيف اللي عليه الزمن جار من ضيقته قام يتجاذب ونينه عزيز نفس يكرم الضيف والجار وكل النشامى مجلسه داهلينه حر تسلسل من شياهين وأحرار عدوهم بالضيق هم لاطمينه (عتيبه ) اهل الفخر بالطيب شطار حريبهم يوم اللقاء هازمينه أفعالهم يشهد لها أصغار وأكبار و المجد برجه بالوفاء رافعينه سلم عليه إعداد همال الأمطار وإعداد منهم للحرم زايرينه وإعداد منهو قام صلى بالأسحار يطلب الآه دايم عابدينه هو السند لاشفتنا الحظ منهار ولاضاقت الدنيا وحالي حزينه لاشفت من دنياي حسرات واضرار ماغير (أبوناصر) لها ذاخرينه تم الكلام اللي نظمته على ( آر ) يشرح جروح بالحشاء مستكينه وختامها مني تحيات وأعذار إن جاء قصور علكم دامحينه وصلاة ربي عد ماساير سار على نبي بالهدى تابعينه |
عقدين مرت .. صدى حيه جواب لفا من زاهي الخدي يا مرحبا فيه واهلين و ترحابه قاف وصلني وله جهزتنا ردي هيض فؤادي حسين أرسل اجوابه النادره تشتكي من وضع متردي تشكي زمان عليها فاتح بابه أبواب هم تضيم الحال وتضدي تتعب فؤاد و زهر العمر تقفابه وتشكي وفاء في زمنا صار ينعدي ولاخير في قلب ينسى عشرة أصحابه ياعزوة اللي عليه الخصم متعدي تشفي غليل الكبد لطمات مخلابه خلي هموم الزمن لابد بتعدي يفرج همومك ولي نزل كتابه يفديك حالي ومالي وكل ما عندي ولا أعيش يوم دموعك فيه سكابه وهذي تحيه وسلام جاك في ردي ياغلى القرايب لقلبي وأصدق أحبابه |
النهايه
تكفيني اللوعه و ترديد الاعذار خلاص يكفي ما اتحمل كفايه ماينفعك عذر ولا عذب الاشعار مهما كتبته لي بحب وعنايه مهما تقدم لي من عطور وازهار مهما سكبت الدمع ترجي رضايه هذاك الاول نخفي الويل بستار وادمح لك الزله واخفي عنايه أغيض عذالي كبيرين واصغار واقول يالحساد خلو منايه ينقال مخطي بس انا اقول وش صار؟ خلوه يخطي يكفي انه هوايه !! اشرد بذهني بينهم هو والافكار ياكيف لك ياشوق اوضح غلايه ! حكي العواذل يعتبرعندي أصفار على الشمال وماستمعت الوشايه ! اشري رضاك ولو تغلا بالأسعار ادفع حلالي لك وغالي عطايه احفظك في عيني ولو طالت أسفار و افرح ليا شفتك واعلل ضمايه اشعل شموع الحب / اعطر لك الدار اكتب من الابيات واضوي سمايه اهدم حواجز وانت تبني لك اسوار ! افرح لفرحك مايهمك عنايه واضيق يوم القاك ضايق ومحتار اشيل همك فالضلوع وحشايه أسست لك في القلب مرسى للإبحار وكونت لك في روحي اعظم ولايه! اعلمك ترمي تراديد وامرار وبعده قوا حالك عكست الرمايه ! هذا جزاي أجنيه واقطف له اثمار؟ أجني الغدر واجني فداحة غبايه! اخلصت لك حبي واثاريك مختار!! غيري تبادلها الموده ورايه !؟ والحين ساس الحب من بيننا انهار قصة غلانا شارفت للنهايه ! ودور البطوله فيه جسدت الادوار خيانتك دورك ودوري وفايه ! يقرابها اللي جاهل حب غدار تنبه افكاره يعيد القرايه! تحكي لواقع غيرنا ناس اكثار اللي سبق مرو بنفس الحكايه باخذ جروح حاميه كنها نار وسط الحشا ياوين بلقاء دوايه ؟ بقفي وباخذ طعنة الغدر تذكار تذكار حب كان قمة خطايه ! وبمسح على الماضي بتصميم وأصرار وانساء طعونك واستعيد لقوايه لي عزة تشمخ مثل روس الأشجار اموت ما جيت إلك ابين رجايه باعذبك واهدي لك الثأر بالثار بعاملك باسلوبك اللي معايه برضاء بغيرك دون تفكير واشوار بسكنه قلبي ويصبح منايه ! بعطيه قلبي بعد جازيته إنكار وبمشي معه درب الغلا بالبدايه بقولها لك كان طالت بك اقدار والله ماتلقى وفيه سوايه اسمي ترى يشرونه الناس الأحرار هو منية اللي له مع الطيب رايه ولا انت قدرك حفنه تراب واغبار شفها تحت ماطاي هذي النهايه!! |
ياإنكسارات
جرحي سطا في داخلي يا ( أنكسارات ) في داخل أعماقي سنين خفيته جرح السنين الماضيات القديمات يهل دمعي لاذكرت و طريته من جورها شوفي جروحي عطيبات شوفي عناها ماخذ القلب بيته شوفي عيوني تذرف الدمع حسرات من حزنها نوم الليالي جفيته عايشت أنا دنياي باأحزان وآهات واللي تبي دنياي طوعن مشيته وعانيت من درب العناء والمسافات دربن طويلن في حياتي طويته وتعبت أمني خاطري باحتمالات وارجي زماني ليتني مارجيته وتعبت في رسم امنيات وطموحات واشوف حظي طايحن يانعيته ! وقتن حكمنا دون عدل ومساوات ياخذ ولا يوفي بشي عطيته اشوفه لغيري يجي بالسهالات وانا العناء من حكم وقتي خذيته وقتن يعز اللي همومه تجارات ومن كثرة امواله يشيع بصيته ويهين راع الطيب راع المروات اللي لياضاقت عليك انتخيته يقطعك ياوقت العجب والغرابات ياكم من سبتك حالن فنيته وانا تراي ( النادره ) كل الأوقات اعز نفسي والوفاء مانسيته ماني من اللي همها زيف موضات ! ولا انتقد باسباب هرجن حكيته ولاجيت في دربن تخالطه زلات نفسي عزيزه كل عالي رقيته اقدم المعروف واعطي جمالات والقاه يجحد كل طيبن سعيته وأدمح خطاء المخطين دون أعتذارات من طيبتي مع سلمي اللي ربيته وارجي الفرج من عند رب السموات ويعوضني عن كل همن شكيته هذي علومي جاتك اليوم باأبيات نظمتها مابين (( أت وأيته)) وهذا وتمت واسلمي يا ( انكسارات ) وعلى النقاء والعز عرفك شريته |
الدواسر عزوتي
ياناشد عني فانا بنت رجال فعله سطع مابين قاصي وداني راع الوفاء والمرجله طيب الفال رجل المواقف لاحداك الزماني زبن الضعيف اللي حداه أشهب اللال وضدوه حيه من حياته يعاني ستر العذارى لارمو ضافي الشال لامن براء منهم قريب وعواني وعون الذي دمعه على الخد همال أيه أفتخر لاحل ذكره وحاني أيه أفتخر به ماتبي لوم وجدال أنا أحمد الله يوم صيته عطاني من غيره اللي لأجله المدح يختال يفز له قافي ويطرب لساني صحيح ميت بس مازال مازال صيته مشيد مثل روس المباني كانت وصاته جنبي درب الأنذال وأسجد لربي وأشكره ماحياني وابعد عن اللي همهم كثر الأقوال وأعز نفسي عن دروب الطماني أبوي راع الطيب مضرب للأمثال أفخر بذكره ياعساه الجناني وفي لابتي بكتب من المدح ماجال في بحر فكري من جزال المعاني (( اولاد زايد))هم عما كل من عال كسابه الناموس خطل اليماني أهل الوفاء والطيب في كل الأحوال مهما كتبت بطيبهم ما مداني فزاعه للجار يوم الزمن مال في ساعه عليه ضاق المكاني تاريخهم تفخر به أجيال وأجيال اللي لهم في قمه المجد شاني ربعي هل الطالات لا ضاق بي حال لامن على جهدي زماني حداني لاشفت من وقتي تعاسه وغربال لازادت احزاني وقتي جفاني أنخاء ((الدواسر)) عزوتي لاأحتما الجال اللي لهم وقفه تعزز كياني أطوح النخوه على أسود وأشبال صغيرهم يفزع بليا تواني يوم اللقاء و افعالهم نعم الافعال يردون حوض الموت عزم وتفاني يوم الوغاء يوم الخطر يوم الأهوال عدوهم ضاقت عليه المحاني تشهد فعايلهم ميادين وجبال تاريخهم شامخ عليه الضماني يالايمي في حبهم جعلك أهبال يلعب براسك لين تقعد تعاني !! |
موج الغلا
متى على الله يطرب العمر وياك ؟ متى نعيش أحلامنا في سعاده ؟ ومتى عيوني تهتني يوم رؤياك وأنسى انتظارك والسهر وأجتلاده ياصاحبي يالعبنو من تجافاك حبك في قلبي قابلن للزياده أغليك حيل وكل مافيني أغلاك أنت غلا قلبي وخفقه فؤاده العين شاطي واصبح القلب مرساك وموج الغلا فيني تصافق مداده أنت الوحيد اللي أحبك وأهواك في داخلي حققت كل الرياده مالي بغيرك يالغلا غير لاماك مهما قسا وقتي وزود عناده ومهما منعونا وازرعو دربنا اشواك تبقى غلا قلبي وتبقى وداده وتبقى شجوني تنتظر يوم لقياك هذا منى عمري وغايه مراده ومتى على الله يطرب العمر وياك ونشكي عذابن للمحبين عاده !! |
وين الفهد ؟؟؟
لاوالله اللي راح منا فقيده فهد السياسه والفخر فهد الأسلام فهد العروبه فهد دين وعقيده فهد الوطن فهد الشريعه والأحكام ذاعو خبرك وحلت أزمه شديده على فهدنا عز من كان منضام ياللي تذيع إلنا الخبر لاتعيده بالهون حالي صابها حزن وأحطام القلب مذهول ويشكي وريده من هول علم صبح قلوب الأنام شفت الحزن في عين شيخ وحفيده وشفت الأراضي نكست كل الأعلام شفت الوفاء يبكي وينعاء عميده وشفت السياسه ترتجي عود ضرغام وشفت الصخاء يبكي علاقه وطيده ياما جمعت من بينهم مر الأعوام لايا زمن عندي علوم عديده وأبغاء اسألك فتش كشوفات الأيام أنا أسألك وأبغا اجابه مفيده تعبت من مسك القلم تحت الابهام وين الزعيم اللي علومه مجيده وين العطوف اللي مسح دمع الايتام وين الفهد لطام منهو ضديده وين الشجاع اللي تحاشاه الاخصام وين السند عز لمنهو عضيده وين الكريم اللي سقاء كل من ظام وين الزعيم اللي سترنا من أيده وينه عريب الجد والخال وأعمام وين العديم اللي وصوفه فريده راع الفعول اللي جسيمات وعظام ادري أجاباتك ماهي لي سديده مهما تقول وتعتذر مانت منلام كيف الاجابه تختصر في القصيده ولاسطور تخطها روس الاقلام واللي رحل تبكيه ارضن مديده اسمع نحيب اهل اليمن رده الشام تبكي على فقده جموعن حشيده ومكه وطيبه هزها موت خدام يالله ياللي كلنا من عبيده ياعالم بالغيب واسرار الأجسام يامسقي بالغيث الأرض الهميده ومنشي خيال به مزابير وأغيام أرحم فهدنا اللي خصاله حميده برحمتك يامنزل تبارك والانعام واكتب له الجنه حياة سعيده يارب كرم فهدنا نسل الاكرام وأجبر عزانا والقلوب الزهيده على فراقه صابها حزن وأسقام |
شيخ المعالي
ابداء بذكر الله والي التدابير إلهنا المعبود عالي الجلالي ادعيه سبحانه عليم المقادير يفرج لحالي وكل همن مضالي وارجيه يغفر كل زله و تقصير وارجيه يرحمني ويرأف بحالي وارجيه لطفه يوم كشف المساتير في يوم لاينفع عيال ومالي ومن بعدها بهدي سلام وتقدير لشيخ الوفاء والطيب شيخ المعالي شيخ الكرامه والعطاء والتباشير شيخ بطيبه يضربون المثالي شيخ بذكره يطرب الشعر ويصير في زينته وأفضل معاني الجمالي (( محمد الراشد )) زعيم المناعير له هيبه تهتز منها جبالي شيخ على حبه ربينا مصاغير نسمع بذكره يوم كنا جهالي سقم العدو يوم اللقاء والمخاطير لاثار بارود الفزع والقتالي يفوق في وقت الوغاء (( سالم الزير)) يضيم خصمه فاللقا مايبالي هو مزبن المسكين لاعاش بالضير لا لوعه حظه وسود الليالي وعز الدخيل اللي عليه المداوير دارت ولا له من عضيد موالي وهو مغني المحتاج وقت المعاسير اللي حياته كلبوها سؤالي له وقفه تشبه لغيث المزابير يسقي ديار فوقها الدهر طالي وله مده تنعش نفوس مكاسير وتعيش منها أمنيات وأمالي ياكثر ماتنفق يمينه من الخير وياما مسح دمع على الخد سالي وياما وياما عمر الكون تعمير وخيره شمل للي جنوب وشمالي يحتار في وصفك نشيد وتعابير ياكثرها ياشيخ لاجاء مجالي شيخ الكرم والجود ستر الغنادير طير الهدد دايم كريم السبالي غيث اليتامى هو زبون المخاسير عون الضعيف وهو عريب الخوالي شيخ السياسه والوفا والتفاكير نسل الرجال الشامخين العوالي سعد الحزين اللي حياته تحاسير اللي عليه الحظ والوقت مالي في شوفته تلقاء الفرح والتياسير وتنسى زمان راح كله نكالي حر جمع بين العلوم المسافير بالطيب مامثله شبيه ومثالي ياسيدي عبرت بالصدق تعبير قاف نظمته بين (( أير والي )) وختامها مني تحيه وتقدير تنصاك ياشيخ الوفاء والمعالي |
يمه علام الدمع ؟؟ يمه علام الدمع يكسي عيونك ؟ وشفي الحزن يكسيك ياتاج راسي يفداك حالي بس هاتي حزونك تريحي وأنا أشيل المآسي هاتي عناء قلبك وهاتي طعونك أعيشها بدلك ياأهلي وناسي أشرب شقاء أيامك وأنا أقول عونك والله لا اشربها ولا اهز كاسي تفداك انا روحي وقلبي يصونك لاشفت زولك طار عني العماسي ولامن هدا خاطرك وارتاح لونك انسى شقاء عمري وحزني وباسي يمه أنا برجاك لايتعبونك خلي القلوب الحاقده والنجاسي خلي العناء والهم هم يجهلونك ماعايشو طيب بليا قياسي هم مادرو باللي تخفي شجونك الطيبه اللي فيك شئ أساسي أماه أنا بطلبك خلي جفونك تنسا الدمع وتذوق طعم النعاسي |
يابحر جيتك !
يابحرانا جيتك وأنا اخفي همومي جيتك وجوفي هم وأحزان والام جيتك وأنا دمعي يغطي كمومي وأخفي جروح رافقتني با الأيام جيتك وفي صدري همومي تحومي وأكتم عباير سببت كثر الأسقام أخفيتها حيث إن طبعي كتومي من خوف يشمت بي عدو ولوام يفرح بهمي وانكسارة عزومي وده حياتي كلها ذل وأحطام جيتك وافضفض لك عناي وغمومي جيتك أبين لك معاناه الأقلام برمي عناها فيك وارتاح يومي تعبت انا أحملها شهور مع اعوام لياطرت لي عفت زادي ونومي ويسري معي همي وخلق الله نيام من نار وقتي صاب قلبي وسومي شوف الطعون وشوف نكبات الإجرام شوف العذاب وطالع أثر السهومي ياما وياما حطمت فيني أحلام يابحر بشكي لك زمان ظلومي اللي على فرحي حكم ظلم وأعدام وغيري يعيش بفرحة له تدومي وانا هناء عمري ولا ساعة دام وياما أرتجيت الحظ مره يقومي ياللاسف طايح ولامرة قام تعبت انا حالي وضاعت حلومي وقلبي تجرع هم دنياه وأنضام ولايابحر هذي ترى هي علومي لك أختصرها دون نظرات الانام جيتك وبرمي فيك سلة همومي وعساك تقدر حملها اعوام وأعوام |
العاثرة يامل قلب كل ما روح الليل تسري عليه هموم وقت عديده وتطري عليه هموم ويا غرابيل مضت مع الأيام ذكرى زهيده أبكي حياتي وألحق الويل بالويل على زماني والليالي العنيده على الحظوظ العاثرة والبهاذيل وعلى جروح كل يوم جديدة على حياه شفت منها التهاويل فيها الفرح وايا السعادة فقيده على حمول كلها تنهك الحيل حملتها ضمن الظروف الشديده على شباب راح كله غرابيل مني رحل مثل الليالي السعيده على الطعون اللي بقلبي مداهيل من حرها قلبي تشكي وريده على الوجية الغابرة والمظاليل و على نوايا ترتوي بالمكيده على رفيق صك باب المواصيل سافر وخلاني بدار بعيده على الزمان اللي بمداته بخيل ياخذ ولا يعطيني اللي أريده لاواعذابي من هموم المقابيل يا خوفي الماضي علية تعيده ورجواي في منزل تبارك مع الفيل الواحد اللي كلنا من عبيده يبدل الأحوال لي خير تبديل ويجبر عزاء قلب همومه عتيده |
المعاقين
مني رساله صادقه (( للمعاقين )) أهم لبنه في بناء مجتمعنا اللي على قلبي على طول غالين ويشهد بحبي ربي اللي خلقنا أنتم غلاكم مايبي زود تبيين أنتم غلاكم مبطي قد سكنا رمز البرأه في قسا وقتنا الشين فيكم طهر ماقط مثله عرفنا أنتم عواطف صادقه كلها زين أنتم مشاعر صافيه ياأملنا نشعربكم وأن كان عنا بعيدين ومن أجلكم جات الدموع و ذرفنا كذاب منهو قال عنكم معاقين!! يكفي العزيمه عندكم مذهلتنا !! كافحتو الأقدار عبر الميادين وحققتو اللي عنه حنا عجزنا واصلتوا الهمه بفعل وبراهين ومسحتوا اسم اليأس عنكم وعنا قلوبنا معكم من الحين للحين وبحزنكم ولا فرحكم شعرنا واختامها مني ورود ورياحين ارفق بها فيكم نشيد يغنا |
خيبت ظني
توك تجيني تعتذر تطلب رضاي تبيني أنسى لك جروح قديمه ماتدري انك بالعناء مصدر شقاي والنفس من كثر الخطايا سقيمه منهو رفع قدرك على عداك وعداي ؟ من الذي خلا حياتك كريمه؟ من الذي عزك وخلا لك الراي ؟ تامر وتنهى في حياة اليتيمه منهو رسم حزني على وجة دنياي ؟ من الذي خلا الأماني عديمه ؟ من الذي غيرك وصلني أقصاي ؟ من الذي خلا حياتي نديمه؟ وأنامعك بالطيب مديت يمناي مديتها يوم النوايا سليمه كنت أحسبك ليه عضيدي ومشكاي لاقام ويل الوقت يصلى جحيمه ولاجارت الأيام عزي ومنصاي لاشفت من وقتي وبال وظليمه خيبت ظني بك وخيبت رجواي وأخطيت في حقي خطايا جسيمه وممشاك بالدنيا ترى غير ممشاي ممشاك في كل الامور الذميمه أنا الوفاء والطيب والحلم مبداي أصبر على الشده بنفس حليمه وأنا الأصاله والنقاء عز مجناي وأنا الكرم والطيب جدي زعيمه أنا الكواكب وأنت فالقاع ماطاي وأصل المبادي لي معزة وشيمه رح بشر اللي ينتظر يوم فرقاي و زف الخبر اللي عليهم غنيمه وأبعد تراني ذقت موتي بدنياي وشلون أداوي هالجروح الأليمه وأسمك غدالي مثل همي وبلواي بلواي في ماض الليالي العتيمه |
حبنا غير لاتعتذر أرجوك خل المعاذير مافيه عذر بين غالي وغالي ومال الملامه بيننا أي تبرير دام الروابط بيننا في تعالي ودام القلوب تكن حب وتقدير ودام الوفاء يعني لنا راس مالي خل العتب ياشوق هو و التحاسير واوعدك لأنسى كل ماهو جرالي بنساء الغياب ومبعدات المشاوير وبنسا القطعية هي و قل السؤالي بنساء انتظارك فا لليال المعاسير وبنسا غيابن فيه عذبت حالي هذا دليل إنا نفوق المعايير في حبنا واخلاصنا ياحلالي نمسح على الماضي وننسى اي تقصير ونرسم أمل في مقبلات الليالي ونقول للي غيرنا(( حبنا غير)) حتى بغلانا يضربون المثالي ولاتعتذر ارجوك خل المعاذير مافيه عذر بين غالي وغالي |
يابوي وينك؟ يابوي وينك عذبتني الليالي ؟؟ ليتك تشوف الحال وشلون منصاب ليتك تشوف الهم وأوضاع حالي ليتك تشوف الدمع وشلون سكاب ليتك تشوف اللي بعدكم جرالي حتى الفرح يابوي وياك قد غاب أمشي و أنا يابوي همي ظلالي وأخفيت جرح يايبه مابعد طاب جرحن مع الايام لامن طرالي سالت دموع العين من بين الاهداب ساعة رحيلك يابعد كل غالي انهار حلمي وانكسر قلب معطاب خاوتني الحسره وحزني غدالي اوفا صديقن لي من دون الاصحاب واوفت لي العبره وضيقي وفالي وعايشتهم يابوي في ديرة أغراب يابوي شفت الويل وانا لحالي تركتني للوقت ولضيم الاقراب العيش دونك والزمن ماهنالي موحش بدونك يابعد كل الاحباب واجهت انا الدنيا بكل أحتمالي أسد باب وتنفتح بعده أبواب أعيش في حزني وهم ارتحالي أشيل حمل جبال يابوي وهضاب مالي عضيد في حياتي موالي أنخاه لاضاقت معي كل الأسباب آخذ برايه لا تسكر مجالي وفيه أعتزي كان الزمن كشر الناب مالي سند غيرك ولا لي ولا لي غيره سواء المعبود هو رب الارباب أرجيه سبحانه عظيم الجلالي يرحمك ياعرب السلاله والأنساب وينزل على قبرك حقوق الخيالي ويجعل عليه الخير والوبل ينساب ويجعل مقامك في جنان معالي وينجيك من شر الهوايل والاصعاب |
مسافير
يقول أنا برحل وأخليك وأنساك وأقول أنا يالله عساها (( مسافير )) قلبي سعيد ويبغي اليوم فرقاك كم أنتظرها في سنين معاسير أرحل وأنا بمسح من البال ذكراك وابغا اشطب اسمك دون رحمه وتفكير وأنسا سنين ماضيه كنت وياك أوفا حبيبه لك وأقرب من الغير كنت الظلال اللي من الشمس يحماك وكنت القنوف المقبلات المزابير كنت السند في يوم كلن تبراك مديت لك كفي وأنا نيتي خير كنت السعد يوم السعد حيل جافاك وكنت الخزامى والنفل والنواوير كنت العطايا والوفاء كنت مركاك كنت الدلال الزاهيات المباهير كنت الأمان اللي على الوقت خاواك يوم أظلم الواقع وعشت التحاسير رسمت لك لوحه أمل عبر دنياك وسطرتها بالطيب والصدق تسطير خليت لك قيمه وتقدير وادراك والكل ينظر لك بحشمه وتقدير وصلتك اللي قاصره عنه يمناك وكبرت في عين البشر وأنته صغير مانيب ندمانه على كل ما جاك أنا أحمد الله عيشتي طيب وبخير وأنا أحمد الله يوم بانت نواياك ويوم أنكشف لي ماتوقعت بيصير واليوم أنا مليت عطني مقفاك أرحل وفارق ماأبي زود تبرير |
وقتي القاسي
ولا ياوقتي القاسي ولا ياقلبي المهموم ولا ياصبري الطايل ولا ياغربه سنيني ولا ياحظي العاثر ولا يافرحي المعدوم ولا ياجرحي اللي ساكن(ن) داخل شرايني ترافقنا على الدنيا تعاهدنا على المقسوم تخاوينا على درب(ن) عليه اليوم ماشيني تعايشنا على الحسرة تعودنا على المشئوم تمنينا ولو مرة نحس إنا سعيديني تساهرنا على ليل الشقاء الي دايم(ن)مغموم ونسأل ليش دايم ياملا حنا حزينيني ؟؟ زماني صار لي ظالم وانا حالي كما المظلوم يعاملني بقسوة تجرح احساسي وتبكيني يفرحني مدى ساعة ويحزني طوال اليوم يشرقبي يغربني يضايقني يجافيني يسهر عيني اللي صار تجفاها طراة النوم يحير فكري اللي منشغل لأجله ومشقيني وانا ماني كما منهي تعيش بحلمها الموهوم ولاطاوع هوى نفس(ن) هي أول من يعاديني تطاوعها وتعرضها علىاقشر درب وادنا سوم تلاعب في مشاعرها ومغويها ردييني انا والله عزيزة نفس حره بنت قوم قروم تفاخر بي رجال(ن) بالوفا و الطيب ماضيني ولي مبدأ ولي عزه ولي نظرة ولي مفهوم ولي فكر يميزني مع شموخ مخاويني ولا ضاقت معي ناديت بأسم الواحدالقيوم عظيم الشان رب الكون خالقني ومحييني هوالخالق عظيم الشان اصلي للولي واصوم موكلته على امري خالقي ذكره يداويني يفرج همي وصبري ويسعد قلبي المحروم ويعوضني على ماراح لي في ماضي سنيني |
جايرات الليالي يمه تعبت من الزمن والغرابيل يمه تعبت اشيل همي لحالي البال ضاق وباد من حملي الحيل هدت عزومي جايرات الليالي شوفي جروحي بالحنايا مداهيل وشوفي شقاي اليوم صاير ظلالي اشرب همومي مثل شرب الفناجيل الحزن كيفي والمواجع دلالي ! سنين تمضي كلها ويل في ويل وشهو بقى ماشاف قلبي وبالي ؟ جداي دمعي والقلم والتماثيل ضايق فؤادي والزمن ما صفالي ارسم أماني العمر لاطرف الليل وأصبح وحلمي مات قبل الزوالي ! وحظي تردا صايبن سيره الميل انخاه ولكن ما يجيب الندا لي !! الصدر ضاق وفاض من صبري الكيل لا الهم زال ولا تحقق منالي واصحابي اللي هملوني بها الويل راحوا وانا موتي ينادي تعالي ! يوم انهدم قصري ولابه تساهيل شرهة يميني تاصلك يا شمالي !! من بعد ما كانت يميني مناديل لدموعهم وافنيت حالي ومالي !! وارسم لهم خط الامل بالتفاصيل واشيل حملن ماتشيله جبالي !! قفوا بلا اسباب من غير تعليل لاصوت يسمع ولاجواب لسؤالي؟! الله يعوض خاطري فالمقابيل ويعوضني عن كل شي جرالي يمه انا برجاك يا قبلة الجيل مافيه غيرك من يحاتي لحالي لاتسأليني ليه ماعاد بي حيل ؟ هدت عزومي جايرات الليالي ! |
ياكويت يابختك سكن فيك غالي !!
ياكويت يابختك سكن فيك غالي الصاحب اللي منوة العين شوفه ! رفيق دربي بالحياة ومنالي الحان عشقه بالضلوع امعزوفه يفز قلبي لاذكرت وطرالي واسج من هم الزمان وظروفه دايم معي في غربتي وارتحالي مافارقت عيني دقيقه طيوفه لا دق رقمه كل شئ صفالي واطرب على صوته وروعة حروفه عديل روحي بالغرام وحلالي حبه ملكني واذهلتني وصوفه فريد في طبعه ولا له مثالي ونفسي على غيره تراها عيوفه ماغيره اللي بالمحبه وفالي كل الثواني في غيابه حسوفه يعتب على بعدي ويطلب وصالي ونفسي على لاماه تبقا شغوفه يالله عساني في قريب الليالي اجيه ويديني تلامس كفوفه |
يالنادره ماعاد فيها سواليف
يالنادره ماعاد فيها سواليف الليل موحش والمسافه طويله وأنا غزيت الشعر بدع وتواصيف وأخذ من ابيات النقا والنفيله أن كان ماجات القصيده على الكيف يحرم علي مانيب ولد القبيله ماني ولد هاجر زبون الصواديف ولاني عشيرن للهنوف الجميله صحيح انا شاعر ومبدع وحريف وأصد هجمات الرجال الثقيله واللعب اجيبه صح ماهوب تحريف اليا غزاني بين ليله وليله والبارحه ماغير افل المضاريف وأقول ماعندي وأمد الجزيله الهم ضيف القلب ياشين ذا الضيف قدم قدوعه قبل ياصل حصيله يالنادره والعلم ماهوب فجنيف لا والله الا وسط قلبي واشيله ماهيب لحية كيف حال المواليف ولاهو خبر بين العميل وعميله نارن من الضيقه غدة فالسراجيف وأضمها ضم الخليل ال خليله وقتي لعبي مثل لعب العواصيف ومن شاف حالي قال ياعزتيله حسبي على الذكرى ليا مرت الطيف وياعزتي للرجل لا هد حيله معاد تنفع شرهته والمواقيف وكثيره اللي مايوافق قليله حنا خذينا الوقت مزح وعجاريف واثر الليالي كلبوها ثقيله وش رايتس برجال فالوقت ماشيف من غير عرف وفكر وراي ودليله ياحيف من ذا النوع فالناس ياحيف الموت لامن جاه فاأحسن وسيله هذا كلام الحق مافيه تزييف وتبطل يدين اهل اليدين البخيله واشهد شهادة حق فالبرد والصيف يا شاعرة شعار وقتي وجيله ان عودت للبدع والشعر والسيف تصبح بيوتك كالسيوف الصقيله لاجيت اوصف فيك واقول واضيف خيالة اللي يعتزي فوق خيله يالنادره معاد فيها سواليف الليل موحش والمسافه طويله |
فوع قلبي
فوع قلبي لا طراء يوم الوداع فوع منهو قاسي الوقت ايحديه شاف موته ونامو اعياله جياع!! سبة الفقر الذي لاوي يديه !! من سبايب يا ملا خطل الذراع جعل تفدا صاحبي سود الوجيه يوم قفا ضاقت بعيني الوساع راح عني وكل وجداني يبيه صاحبن حبه ملكني باقتناع ريف عمري ليتني اقدر اجيه اعشقه واموت به حد النخاع يكفي ان قلبي خذاه ابراحتيه !! مركبه قلبي وله عيني شراع وله خفوقي ديرتن توله عليه في غيابه عشت في دنيا الضياع كني اللي راح عنه والديه بين فكري وبين وجداني صراع وكل عرقن في خفوقي يرتجيه شفت في بعده دروس الالتياع واصعب دروب الوله مريت فيه اذكره لا شافت عيوني شعاع واذكره لاطرو الحب النزيه واذكره لاعشت في وقتي نزاع واذكره لاصاح قلبن مهتويه حاكمن قلبي وكل امره مطاع لو طلب عمري عطيته كل ابيه!! |
فاقد لشوفه
تعال يا أغلا من سكن داخل الروح يا أجمل تعابير القصيد وحروفه يامشيد فالقلب ابراج وصروح يازهر عمري بالحياة وريوفه تعال وانعش خاطر منك مجروح من غيبتك الله عليم بظروفه شوف الفؤاد اللي من البعد مذبوح وشوف العذاب أشهر عليه سيوفه!! ارأف بقلبي ياحبيبي ولا تروح دنياي بعدك كلبوها حسوفه احبس من اللوعات واصيغها بوح واصبر على نار حشايه تلوفه!! واخفي من الاشواق اهات وانوح واحن للماضي وذكرى طيوفه حب وغلا من دون زيف ومصلوح فيه الوفاء والصدق ابرز وصوفه كله عشان اللي له القلب مفتوح اللي سلب فكري بليا مروفه!! اسهر ولاشفته غدا البال مشروح وانسى همومي حين مالمس كفوفه!! بهجة حياتي لو خذا القلب مسموح هو الوحيد اللي سكن وسط جوفه قولو له ان الحال من بعد مايروح؟؟ مثل الذي بالضبط فاقد لشوفه!! |
سموك يازايد
سموك يازايد على راعي الطيب رجل الوفا والجود رجل المهابه رجل المكارم والصخا والتراحيب دون المسير مابعد صك بابه اللي رقا بالعز روس المراقيب وعلى النوايب دايمن يعتزابه حرن على الصيدات عطب المضاريب كل اللحا لابد تحسب حسابه!! ستر العذارى المترفات الرعابيب لاضدهن ويل الزمن والقرابه يشهد على فعله اقارب واجانيب عز الخوي لاضاق كل الفضابه لو كل حرمه لاحملت مثله تجيب ؟؟ ماشفت لاشن يسترنه ثيابه !! عساك مثله عارفن للمواجيب وتصبح رجل كل المجالس تهابه وتمشي على وضح النقا وتترك العيب وتمشي على هدي الرسل والصحابه |
ياقلب لاتحزن لاواهني منهو جهل طبع الايام يجهل عناها جاهل في غثاها ماحار فكره في زمانه ولاحام داخل فؤاده علة كم خفاها ! ((ياقلب لاتحزن )) على مر الاعوام ولايتعبك ماضي السنين وعناها انسى المصاعب واجعل الفكر قدام بد الليالي تسعدك في ضياها خل الدموع وخل تفتيش الآلام يمكن مع الايام تلقى دواها !؟ ولا لا يصيبك من عنا وقتك احطام ارض بنصيبك والحياة وقساها مانت الوحيد اللي شكا ويل واسقام دنيا على غيرك تطاحن رحاها ياكم منها حال اليوم منضام وياكم من عين تزايد بكاها وياكم فيها من مساكين وايتام ذاقو عناها ماهتنو في حلاها! وياكم فيها ضاعت احلام واحلام مسكين ياللي عايش في رجاها وياقلب لاتحزن على مر الاعوام ولايتعبك ماضي السنين وعناها |
ياديرتي يا ديرتي حبك لجا في الشراين في داخل اعماقي تجاذب لحونه اغليك يا دار الوفاء والسلاطين وغلاك في قلبي ترست ركونه غلا مع الايام ماله موازين صعب على القيفان لو يوصفونه !! اعشق ترابك يا ديار المسمين اللي الكرم والطيب هم يحكمونه ( ال السعود ) اللي على المجد عالين زبن الدخيل اللي حصله مهونه زيزومهم منهو يعز الضعيفين لا منها ضاقت عليهم يجونه ! (عبدالله )الشيهان سقم المعادين رجل السياسه والوفاء والمعونه اكاد اجزم ما خلق مثله اثنين نادر زمانه و الملا يعرفونه كم عان مسكين وكم فك من دين وكم من ضعيف صار عزه وعونه وكم من يتيم دمعته فوق خدين من وقفته نساه قاسي طعونه هو ذخرنا لا كشر الوقت نابين وعن شيل حمله ما توانا متونه ولاضاقت الحيلات بافكار ويدين ما غيره اللي ما تخيب زبونه له هيبة ما شاهدت مثلها العين زعيم يقصر زايد الحكي دونه غلاه فطره ساكنه تحت ضلعين في قلوبنا كل العرب يا جدونه ! وعضيده اللي بارز في الميادين وخيره كما غيث تزبر مزونه زعيمنا ( سلطان ) ريف المساكين له وقفتة معهم بيمنا حنونه شيخ على مدحه تدون دواوين وكل العرب من سيرته يمدحونه شيخ الاصاله و العطاء والوفيين وكل المكارم شيخنا يتبعونه ! ليا احتما الموقف يضيم العدوين خصمه تشوف الموت نظرة عيونه!! يشهد على فعله يتامى فقيرين و تشهد قلوب فالزمان مغبونه وعتق الرقاب..وحل عسرات لاجين هو رجلها (سلطان)ما تجهلونه ! يالله ياقابل صلاة المصلين تحفظ بلدنا كل وقت وتصونه |
على الاطلال حبيبي ضاقت الدنيا بعيني على فرقاك ضاقتبي الجهاتي ! اجاذب ونتي واصفق يديني وهموم البعد فيني جايراتي اذوق الويل واقاوم سنيني اسلي خاطري في ذكرياتي زمان فات يجذبني حنيني على ذكراه راحت بي وجاتي اقلب صفحته واخفي انيني واهل دموع شوق فاضحاتي اخاف هروج ناس عاذليني وبهتة لاش مايسوى وطاتي ! وتقاليد ومن خوف يجيني من اسبابك لا تشرع في وفاتي ! ( ونصبح قصة للعاشقيني ) ( وقصة حب تنقلها الرواتي ! ) (وتؤيدها عقول الفاهميني ) ( ومن ذاق الهوى ) سوا سواتي وتستهزى عيون اللايميني وبنات في غرامي جاهلاتي حبيب القلب شفها دمعتيني على الخدين دايم ذارفاتي ( تناجي الليل توقظ نائميني ) (تجاوبها رياح عاتياتي ) ! (جروح البعد فيني تستكيني ) عباة الهم والوحده غطاتي ! (على الاطلال ) بيحت لكنيني تعال ارجوك نسيني عناتي (سئمت البعد ) ياليتك تجيني اعيش بفرحة تضوي حياتي ( إليك ابعث بشوقي والحنيني ) عساك اليوم تسمع لي نداتي امانه ياعيوني ريحيني (دعي عنك القلق نامي وباتي) وخل في عذابك يستهيني يجيك بيوم يرجع لك وياتي !! |
زهرة غلا !!
وينه حبيبي فرحة القلب والروح؟ اللي تغيب و المشاعر جرحها اصفق على فراقه بكفين وانوح وعيني تهل دموع شوقن فضحها على الذي حبه غدا برج وصروح في داخلي حتى الاراضي منحها!! حبه رسى فيني بترسيخ وضوح واصبح مناة الروح غاية فرحها غلاه عندي ما يبي وصف وشروح يصعب على شعري و لوهو شرحها أهديت له زهرة غلا عطرها يفوح وفي غيبته اهداء لروحي ترحها ! ليته يجي ويشوف في قلبي جروح في غيبته حتى السعاده مسحها!! |
محاوره بين النادره و الشاعره حنان آل فاضل....
النادره مني سلام وطيب وازكى تحيه للي لها فالطيب قدر ومقامه هي شاعره وافخر بها لي خويه تفداء مواطيها بنات الرخامه حنان ال فاضل يا مرحبا يا بنت يا أغلا بنيه ياللي لها بالقلب وسطه علامه جتني بيوت الشعر تمضي سويه واحتار شعري كيف يبدا كلامه النادره حياك ربي دوك هالشاذليه فنجالها للراس يبعد منامه ومن بعدها بفتح ملف القضيه للي علينا اليوم يرسل سهامه حنان ال فاضل من يد ما عد مها فديتك هنيه والهيل ريحه طق راسي غرامه هات العلوم اللي بصدرك خفيه أنا فداك وكل كلي شهامه النادرة علام ساحتنا بها فوضويه وكلن تسيد وادعا له زعامه وهذاك ينكر للمره شاعريه وهذاك شاعر قدمته الوسامه حنان ال فاضل لا تشتكي فبكي تراها خطيه أصل المرض متفشي في عظامه الشاعر اللي بين هذا وذيه خله يدور فوق راسه عمامه النادرة وهذاك يكتب باسم هند وصفيه الظاهر انه فاقدن للشهامه وهذا صحافي ظنون فكره رديه يترك مبادي .. بس يوصل مرامه حنان ال فاضل يالنادره شاعر مضيع هويه من ضيقته عود يجاكر حمامه والبعض منهم حار في لبس زيه لكن هنا معروف لبس الغمامه النادره ياليت في ايدينا نشكل سريه ونهاجم اللي يختلف في نظامه وتسمح لنا باللي نبا الداخليه ونزيل منهم يدعون الفهامه حنان ال فاضل الشاعر اللي طاح فيها يديه يبشر ترى روح القصايد همامه أنا بنيه شاعره ما عليه وجيش النسا بكره يحيي سلامه النادرة لكن عزاي اهل الجهود السويه واللي بجهده يستحق أحترامه نرسل لهم باقة شكر مكرميه والله يكرمهم بيوم القيامه حنان ال فاضل البعض والله شاعر ذو حميه يستاهل نقلد حروفه زعامه نشمي سنافي ما تشوفين زيه مترفع بالنفس عنده كرامه النادرة حنان يابنت الوفاء ياأبيه فكري تعب والليل مقبل ظلامه أوضاع ساحتنا بها مأسويه والحين راسي حان موعد منامه حنان ال فاضل يا لله عساها نومة لك هنيه بسري أنا والقول وفى تمامه والحال واضح عند رب البريه عسى لقانا با لمحبه ختامه |
خدم عروبتنا هذه القصيده شاركت بها ضمن مسابقة صاحب السمو الامير عبدالعزيز بن سعود السامر وذلك عبر مجلة فواصل والتي كانت عن مناقب واعمال خادم الحرمين الشريفين الملك فهد رحمه الله واكمالا على هذين البيتين : طباعة السنه على بيض الاوراق الله لايحرم فهد من اجرها مكارمه غطت على كل الافاق وسع حرمنا والمساجد عمرها فاكملت بهذه الابيات انشا مراكزها على كل الاطواق خدم لدينه والمصاحف نشرها عانق بنا الامجاد.. للعز تواق عشنا الامان ببرها مع بحرها خلا علمنا بين الاوطان براق عزز مكانتنا وعلا قدرها مزبن للجار يوم الزمن ضاق في ساعة كل تعايش خطرها حشد جيوشه فهدنا ساقها ساق ارض الكويت بفضل ربي نصرها تشهد على فعله فلسطين وعراق وحجاج بيت الله بخيره غمرها يوم الفصايل بينهم دمهم راق منهم وطن لبنان يشكي ضررها ! فالطايف اصلحهم بتوفيق وفاق رايه حكيم والمخاطر دحرها خدم عروبتنا وللخير سباق حاله وماله للعروبه نذرها يارب جعله يوم نشفات الارياق في جنة الفردوس يورد نهرها |
| الساعة الآن 08:39 PM |
Powered by vBulletin® Copyright ©2000 - 2024, Jelsoft Enterprises Ltd. TranZ By
Almuhajir
HêĽм √ 3.1 BY: ! ωαнαм ! © 2010
new notificatio by 9adq_ala7sas
جميع حقوق النشر لشعارنا و كتابنا ومسميات الموقع خاصة و محفوظة لدى منتديات قصايد ليل الأدبية