عابرة ...

اهلي يدرون اني شاعره
بس مايدرون في جرح الليال

يمنعوني من كتابة خاطرة
مادروا اني من زمان بهالمجال

آه لويدرون اني ((عابره))
عندهم بتصير موتتنا حلال

http://forum.hwaml.com/imgcache2/hwa...243986_285.gif

بطاقة شخصية ...

انا عجوز مطلقة وام ورعان
وايضا مدام وبنت وانس وعانس

انا بدوية وعايشه عند حضران
وبنت البحر وابوي زارع وغارس

امية ماتعرف حروف والوان
وتلميذة دشت جميع المدارس

ظفره وخبله وعاقله في نقصان
شرود وانطح لي ثمانين فارس

خلوني اعيش العابره دون عنوان
طيف يمر بلا رقابه وحارس

أعيش حرة

في ضامرى عنون حرة تحدي
أبا أكسر الأغلا و أعيش حرة

بأصنع قراري وكل شي بيدي
مليت من صبر عطاني مضره

أعيش في عصر لجدان جدي
عادتهم متمر كزه مستقره

أسوار خلف أسوار ودي اعدي
ودي أفسر ضجة الناس بره

الناس حولي للقمر تستعدي
وأنا أحسبه موجود وصف لغره

قررت اوقف ثورة العرف ضدي
وأحررك يا نفس و أعيش حرة

http://forum.hwaml.com/imgcache2/hwa...243986_285.gif

ضايقه

ضايقه بالحيل محتاجه أشكي
لولا طبع في يمديني شكيت

بس ادور عذر من شان ابكي
لو يدوسون بطرف ثوبي بكينت

كل ماجيت أتريح و ارتكي
يزدحم في خاطري ألفين بيت

ويش بيدي افعله غير الحكي
قاصرة خطوات رجلي لو مشيت

أسرعي يانفس موتي و اهلكي
صرتي همي يوم في الدنيا شقيت

http://forum.hwaml.com/imgcache2/hwa...243986_285.gif

لا تسافر

لاتسافر و تتركني أجاهد غلاك
كل شي يهون الاجهاد الغرام


اماتبقى معايا او اسافر معك
لا تخليني لطول الليالي طعام


خوفي البعد لامنه خذاك و طواك
مثل قصر تولاه الزمن و الهدام


هاجس النفس هو بلوى أبوك و بلاك
من يحب الضمان اللي وراه التزام


لاتسافر وانا اللي في رجاء الله و رجاك
لا تسافر و تلقاني بقاي حطام

وصيتها لزوجها قبل وفاتها ..

ترى الذبايح وأهلها ماتسليني
أنا أدري إن المرض لا يمكن علاجه

أدري تبي راحتي لا يابعد عيني
حرام ما قصرت يديك في حاجه

أخذ وصاتي وأمانه لاتبكيني
لو كان لك خاطر ما ودي أزعاجه

أبيك في يديك تشهدني وتسقيني
أمانتك لا يجي جسمي بثلاجه

لف الكفن في يديك وضف رجليني
ما غيرك أحد كشف حسناه واحراجه

أبيك بالخير تذكرني وتطريني
يجيرني خالقي من نار وهاجه

سامح على اللي جرى ما بينك وبيني
أيام نمشي عدل وأيام منعاجه

همي عيالي وأنا اللي في كافيني
علمهم الدين تفسيره ومنهاجه

أُمّــي

يمه يا يمه فديتك لاتخليني
بعثرني الهم وابغى يديك تجمعني

يمه افهميني تراك ان مافهمتيني
مافي شخص بهالدنيا بيسمعني

ماعدت انا طفلتك كبرت شوفيني
خليك يمي ترى الاطماع تتبعني

لاتدلليني ابي منك تدليني
وابي يدينك تداعبني وتصفعيني

لانهد حيلي ابي عطفك يقويني
ياما كلامك على الشدات شجعني

وان جيتك ابكي ابي منك اتهديني
مابيك تبكين ابغى العقل ينفعني

يامملكة عطف ياعطر الرياحيني
براثن الهم والهوجاس تلسعني

بسمتك عندي الى من ضقت تكفيني
وارضاك عني عن الاحزان يرفعني

اسمى العلاقات تربط بينك وبيني
ياللي احضانك ان ضاق الكون تاسعني

لك احترامي وحبي والوفا فيني
وفيك اروع الحب مايخطي ويخدعني

رساله من بدوية

تعال بشرح لك أنا كل مغلوق
تعال شاهدني مع ذكرياتي


لا لا يغرك لبس موضة ومسحوق
انفض غبار الوقت تلقي صفاتي


قرب وطالع معن الشوف يحدوق
وزيف التطور جرده من حياتي


بتشوف في وجهي من الماضي اطروق
أخذت من بطن الصحاري صفاتي


طفلة بثوب مخيطينه ومفتوق
تنطر جديد الثوب بالعيد ياتي


سمعت طرف اخبار عن كلمة السوق
وتاخذ وتسأل هو وجوده ثباتي


طفله سحبها الوقت للهم برفوق
حتي انها صارت من العاشقاتي


وجار الزمن وعرض الحب للعوق
شرق ركايبها وهم مشملاتي


واتلا عهدها فيه يركض ورا توق
مسرود جيب وفي يدينه عصاتي


ويصد لكن يلتفت لي من الشوق
عجلان يلخصني بعين تحاتي


وقفي وخطواته يتلن معلوق
وخلاني ماتنقل عظامي عباتي


ودار الزمان ولا مشي الحظ بوفوق
ومازلت أخفي بالظلام اعبراتي

ولا زلت أنا العب له علي كل طاروق
حتي يجيب الله موعد وفاتي

http://forum.hwaml.com/imgcache2/hwa...243986_285.gif

بريال عارضته

بريال عارضته على السوق بريال
من باعني برخيص والله لأبيعه

من يشتري رجال قصر بالافعال
باع العهود الماضيه للخديعه

رجال يسوى له ثمانين رجال
كل الصفات اللي ملكها فضيعه

له ضحكة تشبه لضحكات الأطفال
ذيب ونظراته حنونه وديعه

وله فزعة منها المجانين عقال
وفجوج لا ضاقت علي الوسيعه

ياما عدل عوجا ثقيلات وطوال
وأنامعاقبته غيور صريعه

والله يسوى له ثمانين رجال
والخبل مثلي لا زعل يب يبيعه

http://forum.hwaml.com/imgcache2/hwa...243986_285.gif

يسألوني عابره وين الجديد
والاجابه ضايقه فيني ملل

راحت ايام السعاده والقصيد
عشتها بين التكانه والجهل

كنت اروض شارد الحرف العنيد
ماعسرني لو بغيته في عجل

فيه اصور لوعة الحب الاكيد
ومنه(اشكل) ماحوى قلبي غزل

ومعه (اسافر) عن معاناتي بعيد
ولأجل حبه ماشحني من زعل

احضنه (فرحة) طفل في يوم عيد
واسكنه (روض) الخزاما والنفل

واحتويته ليت لي (قلب ) بليد
ماعرف (فرق) الجزاله والهزل

والنهايه مابقى عندي جديد
واعذروني صارت ايامي ملل

http://forum.hwaml.com/imgcache2/hwa...243986_285.gif

العيد باكر

العيد باكر أسعد الله ممساك
والله مدري وين خد جلسته

وين انت ياللي عيدنا في محياك
كف القدر من ضيقة الخلق بسته

من يوم ما لوحت لي كف يمناك
لليوم دمعي بالخفا ما حبسته

ومن يوم ماذوقتني حر فرقاك
والياس زرعه في حياتي غرسته

شريت لي ثوب علي شان لقياك
والثوب راحت موضته مالبسته

وشريت عطر ما زهاني يلياك
أربع سنين بعلبته مالمسته

ودفتر قصيد كل يوم يترجاك
مافيه يوم ماسهرت ودرسته

حان الوداع

حان الفراق .. وتم توديع غالين
قسوة زمن وظروف ماهي رحومه

وحاولت ابدل موقف العسر باللين
وأبين قدامه جسور ظلومه

و أعاتبه وأنقد على دمعة العين
وانا - حشا لله - ماني ألومه

و أقول هذا حال كل المحبين
وهذا الفراق اللي تجينا علومه

ومسكت نفسي كن ماصاير شين
أخشى على خلي يشقق هدومه

ثم قلت وش تنطر حبيبي لهالحين؟
أثر ايديني ماسكات كمومه ؟؟؟؟

سنين

سنين مامرت علومه عليه
لا علم لا طاري ولا من مكاتيب

سنين في صبري وحالي رديه
بين المحاتى وانتظاري وتعذيب

لا ليل .... لا فرحه.... لادنيا هنيه
يعلم بحالي واحد يعلم الغيب

انا ان تحريت اتصاله عليه
دقات قلبي ضربها ينفض الجيب

ولو دندنت أساوري في يديه
اضم انا الهاتف واهل التراحيب

ابا انطره وابقى بعده وفيه
وارفض على شانه جميع الخواطيب

شعري.. جنوني.. آرائي

مسافرة مسافرة وجمعت أنا أشيائي
بروح أدور لي أرض غير مأهوله

أفكاري مبعثرة والمشي عشوائي
والدرب مخطور والأحلام مشلوله

بروح أمارس جنوني واقتل أعبائي
مابي خوي يخاويني بهالجوله

بحمل معايه صراحه وقول تلقائي
وقصة موادع وقطعة قلب منزوله

وشعري وجنوني وفلسفتي مع آرائي
بطلق لها عنانها وتقول منقوله

في رحتي مستعده أفقد أعضائي
دامني أمنت فيها صرت مسؤوله

مليت وأنا أنظعن بالظهر واستائي
ماقلت لو مرة هالطعن وشهوله

مليت أكفر أخطاء ماهي أخطائي
وادري براع الخطا وأقول منهوله

في رقبتي قلادة وهي سبة إيذائي
من قبل لا ولد وهي بالعنق مغلوله

محتاجه للنفس من ضيقة أحشائي
واشوف مفتاح قيدي مقدر أطوله

يا دنياي

جيت بكتب عن شقا عمري قصيده
مير عيا القول لا ياقف معي

شاف همي والمعاناة الشديده
أكبر من القول وحروف النعي

هاك يا دنياي عمري ما أريده
إضربيني واقسميني واجمعي

أي نعم ماني بهالدنيا سعيده
من نهار ولادتي وهمي معي

عشت محزونه وملتاعه وشريده
وياكبر شي تخبيه اضلعي

مابي بين الناس تبكين و وحيده
وان هجع طرف البشر ماتهجعي

إما موتة حق أو إيدي بأيده
هيه..يارحمة إلهي..أسرعي

الصدفه

مشيت بالزحمه مع الناس بالسوق
ولا ادري من اللي طق كتفي بمسباح

أدرج النظرات من تحت لافوق
وشهقت مثل اللي تواجه بالأشباح

غايب ثمان سنين والقلب محروق
أتلى العهد به تو ماشاربه لاح

واليوم عندي ناحل بين عروق
وعوارض على اصفر الوجه واجراح

والله يا دمع تحدر من الموق
إنه على الموطى من العين لا طاح

يقولون لاتزعل من البعد ياشوق
وانا كما اللي قاضي من جراح

في مفرق الدربين

قال الوداع وقلت لالاولالا
أنا معك في عهد الإخلاص مابقت

دنق علي وقال مامن مجالا
وقنعت يوم إني بالأسباب حققت

وسكت ماعندي نقاش وجدالا
ذقت العذاب اللي له العام ماذقت

سكت ما املك حيلة واحتيالا
إلا ليا منه بكى حيل..دنقت

ولكن عطا خله بقايا حلاله
وفي مفرق الدربين غرب وشرقت

ومن الله الوالي طلبت الدخاله
دخيلة الله كان للبعد ما طقت

http://forum.hwaml.com/imgcache2/hwa...243986_285.gif

مهرة الشوق

جيتك من الفرحة على مهرة الشوق
تسبقني الخطوة على الدرب قدام

جيتك ولا ابالي ولو يطلع العوق
جيتك وانا شوقي موزعني اقسام

لا..لاتهمك ناس ماتعرف الذوق
يسرون تال الليل والصبح صيام

ياعم لا منطق ولافيه منطوق
بعها تراني..بايعتها للاعدام

إخذ الرطب قول النخل يثمر عذوق
خيب رجا اللي يرتجونه من العام

واضرب على الكايد ان ماجات برفوق
مليت انا وياك من عد الأيام

سنين ليه بالنوايا..مبيت
وانا معاك امشي برهن الإشارة

ويوم ان ضربتك القوية تهيت
ماخفت ربك بالفجيعه تمارا

وشلون أسامح عيت النفس..عيت
مازال في جوفي بقايا مراره

نفسي على فرقاك هلت وحيت
وقلبي تحطم وانت سبة دماره

واليوم لو قالوا الناس..ميت
يجوز..من قاله ينال البشاره

عـواذل

وانا توني في مسلك الحب منجره
قالوا عواذل:خلك لغيرك موالف

وقالوا وحطوا به وانا فيه منغره
وذولا شهود وذاك عارف وذا حالف

وقطيت له جملة رسايله وصوره
لين ربي بين الحق والتالف

ورجعنا عقب معايش الغربة المره
رجعنا على صد العواذيل نتحالف

وانا اليوم لا من العواذل حكوا سره
يقولون قول شين واقول:ميخالف!

فلا عاد في حبي عواذيل..بالمره
أنا اخذت لي عبره من الموقف السالف

أثر يديني

حان الفراق وتم توديع غالين
قسوة زمن وظروف ماهي رحومه

وحاولت ابدل موقف العسر باللين
وابين قدامه جسور ظلومه

واعاتبه وانقد على دمعة العين
وهذا الفراق اللي تجينا علومه

ومسكت نفسي كن ما صاير شين
أخشى على خلي يشقق هدومه

ثم قلت وش تنطر حبيبي لهالحين؟
أثر يديني ما سكات كمومه

حــيرة

لا..قال ردي لي ولا..قال روحي
لا..هو مريحني ولاهوب مرتاح

يغيب ويعود يفتق جروحي
واذا استجد الجرح لوح لي وراح

واضحك واجامل وادعي بالفروحي
وبداخلي نار...وتجاريح وصياح

واحاول اخفي جروحي بروحي
واخيط جرح تنفتق عدة اجراح

وان قربت دمعات عيني تفوحي
الله أكبر صار لي قلب مزاح

عقارب الساعة

وقف وانا ساعتي وقفت عقاربها
ثم دار ظهره ودارت دنيتي فيني

تنوف روحي وأمر الله قاضبها
مامت لكن رأيت الموت في عيني

يقفي وانا اطالع الخطوات واحسبها
وعديت لين العد ماعاد يكفيني

أمج ايدي للترايب مع هضايبها
أبا اخفض اي شيء يزمي بينه وبيني

حدقت لين احتضن رمشي حواجبها
لين السما حدرت للقاع في عيني

وغديت أنا البوصلة للي يراقبها
والبوصلة ثابتة فوق اتجاهيني

شمالها والجنوب عيون صاحبها
واليا اتجه..اتجه ماشي يثنيني

مشاعر داخلي أزريت لا اكتبها
أكبر من أنه حبيب ويب يخليني

وأكبر من الحب والحاجة وراغبها
ما كنه الا مخلفني وناسيني

مقــدار

مقدار حبي عالم فيه ربي
والا الموازين لغرامي ظلومه

لا..لاتقارن حب أمك بحبي
أخاف من عينك تطيح الأمومه

أخشى يقولوا عنك ماهو متربي
مابي أشارك في عقوق الرحومه

ياغايتي ماعاد فيني أغبي
حبك تعدى حدود نفس كتومه

مابيك تسأل عن مقادير حبي
بكره مع الأيام تطلع علومه

الهموم الكثيرة

كل مزاد همي...شان حالي ونقصت
والهموم الكثيرة تبري حالي بري

وكل ماجيت بارقد لو دقيقة قحصت
كن رقط الحيايا يندسن اظهري

وكل ماقلت طبت ومن عذابي خلصت
عود القلب للي فت يرجع قري

اه ياللي لغيره لا حشا ما حرصت
مودع وسط كبدي من غيابه فري

ومن نهار الموادع بالفرح مارقصت
ولا كحلت العيون ولا لبست الزري

هبيل بلاه الله

أنا لي ثمان سنين متولعه واغليه

وعلى جملة اهل الحقد والعذل محتجه

كتبت القصايد كلها يا جماعه كلها فيه
عليه الحشا مثل القراطيس بالعجه

عقب هالعمر يسأل قصايدك من هو فيه؟
ياويل قلبي كان نشدته من الصجه

أنا ودي أطقه وأخاف اتوثم فيه
هبيل بلاه الله في بنت مرتجه

http://forum.hwaml.com/imgcache2/hwa...243986_285.gif

ريجـيم

دوم يعيرني يقول : انتى متين
حلجك المفتوح لازم نغلقه

هيه يا دبه لزوم تخففين
والا أثور فيك عشرين فشقه

وفي رجيمي استمريت سنتين
جدي اللي مات بغيت ألحقه

ويش رايك؟..قلتها بصوت حزين
قال دبه..وانقلبتي لي اسلقه

العـنز

تطورت العنز مع من تطور
ولاهوب مقصور التطور على الناس

عقب الربيع الزيد والخد الأخضر
قامت تعلك بالمدينه بقرطاس

ترضع صخلها من حليب مبستر
تخشى رشاقتها مع الوقت تنداس

باقي قليل ويشرب التيس منكر
ويروج الهروين راعي وعساس

ياخبلي الغايب متى ترد للعين
متى أشوفك أوتجيني رساله

صحيح بالدنيا خبول كثيرين
لكن خبالك يا حياتي لحاله

ياناس..وين اسبنش باباي
باعطيه خل نقل همي

حتى يصارع جميع اعداي
واول مايذبح ولد عمي..!!

http://forum.hwaml.com/imgcache2/hwa...243986_285.gif

صوت السهارى

طلال تكفى تراي دخيلتك كافي
لا تطري البعد والتوديع والفرقا

الليل..صوت السهارى حسك الدافي
يزيد من لوعتي والضيق والحرقا

إن لامس الجرح قولك انسف الحافي
وافتح زراير هدومي لضيقة ترقا

وينلاف قلبي بتال الليل ينلافي
ثم تنقلب دمعتي تنهيدة شرقا

http://forum.hwaml.com/imgcache2/hwa...243986_285.gif

كلمة طلال

باعلن على كلمة طلال احتجاجي
طلال يكفينا تجاريح يا خي

ما انته بلاجي لا ما انته بلاجي
تكفى تراها كلمة تذبح الحي

قل ضيف قل زاير لناس هجاجي
وبركه نرد وكن ماصار به شي

خلك على ماقيل في برج عاجي
لو تحترق كل البشر في داخلي في

شفني وشف حالي وقل ابتهاجي
عقب انقلاب الحال وش صارير في

من أول كيفي وحره ومزاجي
واليوم ماعندي من اللي مضى شي

مديت كفي للعطا وطاح تاجي
وبعض المبادي دستها تحت رجلي

مشية العسكري

تل قلبي وقاسه وافحصه واسطره
ثم قطه على حافة جليب طويل

المحبه بعينه..مسخره بمسخره
والمحبه بعيني دبلتين وكليل

اتعيل إلى منه عطاني اظهره
وان نظرني غديت صغير مايعيل

وصار قلبي مكينة وقرقعة منجره
وحس طقاقة تضرب وناس تشيل

هب ياذاك الاسمر..ما اشجعه ما اظفره
فيه ضحكة طفوق وفيه هرجة ثقيل

مشية العسكري قدام جمع اومرا
في كبود العذارى منه حب وغليل

سكبة التاجر اللي فيه عرق افقرا
لا تكبر ولابذر ولاهو بخيل

شاربه ورمش عينه عينه وحاجبه واشعره
ليلة خرمسية..لاقمر ولافتيل

جاه قلبي صغير يرتجي وانهره
وجاه قلبي شجاع ورد يمي ذليل

ضلع وراه بكبره يدمره لا خزره
كيف اجل يا جماعة ان خز عابر سبيل؟

نون

ليه سموا صبي العين نون؟!!
لن نونك يعيش بنونها

اه يانون..يانور العيون
يابعد نونها وعيونها

لك غرام محشم ومحزون
هو سبب عابرة وفنونها

ولك مكانة تعلت بالمزون
جملة الناس طاحت دونها

مال الأيام في غيبتك لون
إنت نكهة حياتي ولونها

الأسمر

الاسمر اللي زارني في محلي
الله يجيره من جميع الصواديف

عيا على قطع المواصيل خلي
يومه درى في علتي زارني ضيف

جلس يسليني بهرج يسلي
صادق لو ان الهرج بدعه وتأليف

إليا ضحك جيته من الضحك كلي
واليا سكت ضاعت جميع السواليف

قال التغلي؟قلت مامن تغلي
قلت الفراق؟وقال مامن تكاليف

وقال أبروح وقلت واكبر غلي
وقامت تدق طبول قلبي تحاسيف

ليال عمري كلبوها غدن لي
عداك..ياليلة رجوع المواليف

http://forum.hwaml.com/imgcache2/hwa...243986_285.gif

الله اكبر

لي صاحب هو الطرب والذاذا
زبنته الله عن جميع الحواديث

ماهمني هذا ولا اريد هذا
كنه مورثني الملايين توريث

الله واكبر ميتين استعاده
ماكنه الا نازل لي من الغيث

لا مر..كن القلب يطلب انقاذه
كنه برازي والمشاعر مغاليث

ان جيت ابا ارقد كن بالعين ماذه
فرقاه نار وذكرياته محاريث

واصبري اللي مقترب من نفاذه
باسباب من بيني وبينه مواريث

أحــلام

ياما على نفسي بالأحلام كذبت

وياما صبرت وصبرنا مانفعنا

وياما..وياما من وداعه تعذبت
وياما نحاول نفترق ما استطعنا

كم مرة ودع وكم مرة غبت
وكم مرة عقب الوداع اجتمعنا

ياما توادعنا وشرق وغربت
ويوم إلتفتنا في بعضنا رجعنا

لاقادرة أنساه مهما تهربت
ولا معترف في حبنا مجتمعنا