 |
منتديات قصايد ليل
(http://www.gsaidlil.com/vb/index.php)
- …»●[دواويــن الشعــراء والشاعرات المقرؤهـ المسموعهــ]●«…
(http://www.gsaidlil.com/vb/forumdisplay.php?f=37)
- - ديوان الشاعر / عبدالله البكر
(http://www.gsaidlil.com/vb/showthread.php?t=41145)
ديوان الشاعر / عبدالله البكر
يطيب الملام .. ويسكن الصمت بين أحشاي !
.............. تغورق عيونـي والجسـد ضايـق بثوبـه يارب إمتلى جوفي ذنوب .. وثقـل ممشـاي .............. وأنا الخايف اللـي يرجـي العفـو والتوبـة حداني على سود الليـال .. النـدم وبكـاي .............. وصوت الضمير وضعف الإنسان وعيوبـه ! عساي إن رحلت .. أرحل وانا ساجد لمولاي .............. شهيـد ٍ تطهـر مـن خطايـاه وذنوبـه .. غرست السنين برمل الأحلام .. واللي جـاي .............. جراد ٍ محى خضـر المحاصيـل بدروبـه ! أدوج الحيـاة .. وسكتـي تمتلـي بخطـاي .............. وانا اللي طعنه الحـظ وأدمـى لـه جنوبـه سبقت الزمان .. وجيت مالي سوى رجـواي .............. فقيـر ٍ عـزاه إن كـل الأرزاق مكتوبـه .. بيوم الحساب .. اظهر بمـا قدمـت يمنـاي .............. هنيّ اللي اخفى فـي محاسنـه عذروبـه ! يمـر البـراد بتالـي الليـل مـن جـواي .............. كأن النسيـم يلاطـف الضيـق وكروبـه .. يارب المدى .. أضيق من مشاهـدة دنيـاي .............. طريقي طويل .. وخطوة العبـد محسوبـة . تزاول لي الجنة .. وانـا التايـب الخطـاي .............. وأجر نفسي لا شفـت لـي نـار مشبوبـة وجيت اطلبك .. في ركعة الوتر يـا مـولاي .............. كبير ٍ تصاغره الزمان .. وبغـى التوبـة ! . |
. ما يسمع المقفيـن صـوت البـاب ................ ومـا ينفـع الباقـيـن مـزلاجـه وما يرجع اللي غاب .. لأنه غـاب ................ ومـا باقـي بصـدره ولا حاجـه ! غير القصيـد .. الصـادق الكـذاب ................ اللـي بحـوره عـذر لأمـواجـه بأسباب .. أو حتى بـدون أسبـاب ................ يكفينـي مـن القلـب مـا لاجـه يشفق علي .. لا عشت بين أغراب ................ ويضـوي علـي الليـل بسراجـه بأشتاق لـك يـا سيـد الأحبـاب ! ................ ياللـي مقلـدك الحسـن تـاجـه يـا ناسـي ٍ خـلانـك الأقــراب ................ يـا نايـم ٍ مـا ودي إزعـاجـه .. راحـل بعيـد بسكـة الغـيـاب ! ................ درب ٍ طويل .. وشمـس وهاجـه شايل عنـاي وكـم جـرح ٍ طـاب ................ وجرحك .. عساي ألقى له علاجه .. بتمر ضيقـات السنيـن .. أسـراب ................ ومصيرنـا فـي يـوم نتـواجـه ! أناظـرك .. ودموعنـا تنـسـاب ................ والله يجـازي الدمـع وإحراجـه .. يفضـح خفايـا الصـدر للأجنـاب ................ كنـه سجيـن ٍ قــرب إفـراجـه قلـب ٍ يفـز ومبسـم ٍ مـرتـاب ................ وذهـن ٍ شـرد بأفكـار دواجــه وأمرّ .. كني مـا حسبـت حسـاب ................ وأقول لـك مـا كنـت محتاجـه .. أبطـى حنينـي فـي حشـاي وذاب ................ وليتك تعاونـي علـى إخراجـه !! إن قلت لك راجع .. فأنـا كـذاب ! ................ لكن .. عسى فـي يـوم نتواجـه . . |
http://www.alriyadh.com/2008/01/06/img/071678.jpg
ياسر القحطاني . تزيد الجماهيـر ويقـول المـدرّج .. ظقـت .............. ولا قـرّب إعـلان النتيجـة يـجـي دوره ! وتمـر الدقايـق والحكـم منتبـه للـوقـت .............. وعينـه تراقـب كـل مـن يقطـع الكـوره فريقيـن طاقتهـم كبيـرة وانـا مـا طقـت .............. من إحساس جمهور الهلال ومـن شعـوره على أعصابي من أول دقيقة .. إلين أحرقـت .............. من أعصابي الثلثيـن .. والنـاس مذعـورة إلين إنطلق بين الوسط ( سهم نار ) ورقـت .............. دريـت إن بآخرهـا جماهيـر مـسـرورة عليه السكينـة والثقـة وإنـت لا برّقـت !! .............. عرفت البطل في وسـط أرضـه وجمهـوره تعلىّ ووجّه صوب خصمه .. وقال أشرقت !! .............. أنا الشمس .. والشمس إن تعلّت سطع نوره خطف كورته كنّه مثـل حلـم منّـه فقـت .. .............. بصوت الهدف .. والصوت ما يسبق الصوره ومن غير ( ياسر ) بأطري إن قلت أو علّقت .............. وهو لا حضر .. يستبشـر الكـل بحضـوره إلا جيت لدْفاع الخصم يـا بحـر .. أغرقـت .............. مجاديفهـم .. ونفوسهـم منـك مقـهـوره محبـة بمرماهـم .. تحاتيـه لامـن وِقـت .............. تعرف إنـه إشتـاق لسواليـف هالكـوره ! مدام الخصم مرماه صوّت وقال : إشتقـت !! .............. فـمن غير ( ياسر ) يرفع أصوات جمهوره ؟ |
مثل البحر ..
ماضاق من بوح وعتب ! صدري بحر ! وطعونك بصدري عتب وفراقنا ماهو سؤال تجاوبه ! إنت السبب !! يا عمري السهل الصعب . يا الحلم الأول والأخير الله معك ! وخفوقك الميت معك .. وقصيدي الصادق معك .. والذكريات اللي إجمعتنا والسنين الماضية راحت معك !! وإنت الخضار بانت لك عيوني ندى .. وحجاجك بداية عمر .. وقذلتك ظلمى ونور خدودك حكاية نهار ! إنت السبب .. يوم الشعر ينحاز للحزن ويصيح من الوجع ! كنت أسألك : من يرحم الشعر ويروف بشاعر ٍ ذاق الوجع ؟ وتقول : يا شاعر بكل الناس .. إرحم حالتك ! ما حس فيك الناس والدمعة تدلى مثل عنقود العنب ! حزن وعتب .. والناس تضحك في وجيه الناس من صدق وكذب ليه العتب وإنت الوحيد اللي يشيل هموم كل الناس طيب .. إنت الحبيب .. اللي رضا يفرش طريقي ورد لين أمشي وأغيب .. جايز تشوف إني حبيب بس الغريب .. إنك نسيت إن الزمن ظالم وهالدنيا تدور .. أنا الحبيب وأنا اللي أهديتك من عذوق العمر أكبر نصيب وأنا اللي أغرقت الوجيه العابسة ضحك وسرور أنا الغيور .. وأنا رضيت أفرش طريقك ورد .. وإنت اللي بتغيب .. وأنا الوحيد اللي بيبقى طول عمر الحب وإحساسه ذهب ! وكل الحنين اللي بصدره عاش هالمره ذهب .. وإنت السبب . يا حلمي السهل الصعب يا العمر الأول والأخير .. الله معك .. وقصيدي الصادق معك ! والذكريات اللي جمعتنا .. والسنين الماضية خذها معك ! |
http://imagecache.te3p.com/imgcache/...2d829adf76.jpg
يضحك الناس من عرض السواليف ................ وآتبسـم وأنـا مشغـول بـالـي كل صاحب تعزوا لي .. مطر صيف ................ الله يثـبـت أقـدامـي لـحـالـي تو تظهر وجيـه الكـذب والزيـف ................ يوم شـق الدجـى ستـر الليالـي فزعة الرجل لأهل الطيب تشريـف ................ علـم اللـي يقاسمنـي ظـلالـي جاك لا إخضرت من الماء كرانيـف ................ وغاب يوم الجـراد أفنـى حلالـي القصايد لها وسـط الحشـا ريـف ................ سعـد عينـي وأنـا أهيـل دلالـي لا إحتمى الراس تسبق شذرة السيف ................ وتهتني فـي ذرى عمـي وخالـي تسبر أرضي مثل شوح المزاغيـف ................ لين تملى الـورق ويطيـب فالـي كم خطب من بنات أفكاري الضيـف ................ خابر النـاس تحفـظ لـي مقالـي ياقف الشعر في عسـر المواقيـف ................ وإيتهـزع علـى البحـر الهلالـي وما يحفـظ القصيـد الا مواليـف ................ حبهـم فـي حشـاي أول وتالـي لي حبيب ٍ غرس بيـن المهاديـف ................ عـود نعناعـة يكـبـر بـدالـي له رموش ٍ رقاق وقلـب ٍ رهيـف ................ وله عيون ٍ تصيـب ومـا تبالـي لا ضحك يظهر اللولو على السيـف ................ وإن غشـاه الحيـا بيـن هبالـي ناحل الخصر لكن ماهـو ضعيـف ................ يرتـوي عـوده إن وقـف قبالـي يثمر التوت في حسـن التواصيـف ................ ليـن يقطـر نـدى بـارد وحالـي لا يسولف ترى دمعي على جريـف ................ ما بقى غيره مـن النـاس غالـي كل وجـه ٍ عرفتـه مرنـي طيـف ................ إيتلاشـى وأنـا أحـرك شمـالـي البحر ما خـدش وجهـه مجاديـف ................ لو حكى الملح صوت الموج عالـي لي قصيد ٍ مخيف وماهـو مخيـف ................ نـق مـا يعجبـك يرتـاح بالـي |
تنام الذكريـات الموجعـة فـي صـدري الليلـة ...................... و تصحى ذكريات الماضي اللي راح .. وأحبابـي كثر ما بي من طعون الحبيب إشتقت أحكـي لـه ...................... عن ( الماء ) في يديه و ( وردة الأشواق ) بترابي عسى باقي حبيبـي يمسـح الدمعـة بمنديلـه !! ...................... أخبره لا بكى .. يطـري عليـه شكثـر سوابـي على باب الرجا كنـت أنتظـر رحمـة مراسيلـه ...................... إلين الله رحمني من قسـاه .. ومـوت أعصابـي تحملـت الحيـاة البـاردة مـن قلـة الحيـلـة ...................... وأنا أدري هالغياب اللي حصل كله مـن أسبابـي عطيته كل ما يطـري عليـه .. وزاد حبـي لـه ...................... إلين إتساهل دروب الجفـا وإتساهـل غيابـي !! يقول إن الظروف اللـي بـدت تاكـل محاصيلـه ...................... وأنا أشوف الظروف اللي يقـول تـزود أتعابـي أنـا كنـت أكرمـه بمحبتـي وأرضـى بتقليلـه ...................... وهو يقسى كثير .. ويرضي غروره على حسابي ولكنـي أحبـه .. لـو بـدت تطفـى قناديلـة !! ...................... شعلت النار بالصدر وبقى .. لو شبـت ثيابـي .. لقيتـه بعـد مـا صـك القـدر آخـر مداهيلـة ...................... ولا ظني غلطـت بعشقـي اللـي راح وعتابـي على ذكـراه كانـت ليلـة البـارح .. وهالليلـة ...................... ولا أدري لو بعد طول غيابه ويـش يجرابـي !؟ |
يا مهاجر . عن حدود إسمي وماضي ذكرياتي .. يا حياتي ! إنت كل الناس في عيني وأغلا امنياتي .. لو أنا في عينك الظالم !! دخيلك لا تحاتي .. البكى يغسل سواد العين من كل الملامح . وقلت لك لا طاح بشت الليل بتصدق كلامي ! لا تسامح .. خل دمع العين يجتاح المحاجر . وإنت هاجر ! يا شمس لا تضحكين بوجـه ليـل ٍ عبـوس ............ بكـره يجيـك الظـلام وتختفـي ضحكتـك . وإنتي رموشك " لهب " وحجاجك أشباه قوس ............ يتواكـل الجمـر بشفاهـك جـزا قسوتـك بخـدودك النـور والبـدر إن تجـرا يبـوس ............ بانت تجاعيـد وجهـه وإنعكـس صورتـك هب الشمال .. وظهرتي للخلايـق عـروس ............ وهب الجنوب .. وحرق وجه البدو غِّرتـك ! سموك فرحة هل الدنيا وشمـس الشمـوس ............ وسميتك بدفتري " شمس " وبدت قصتـك .. حان الرحيل .. وغدا هم الفراق امحسـوس ............ وإستبشـر الليـل بقدومـي بعـد غيبتـك .. وأضماني الشوق .. وأتعبني المشي والجلوس ............ وإحترقت أغصانـي اليبّـاس مـن نظرتـك يا بهجـة الجاهـل اللـي مـا تعلـم دروس ............ ويا غبنـة العاقـل اللـي حاشـم محبتـك لا تدعيـن الوفـا يالتـرف يالعيطـمـوس ............ والصدق حدّر من لسانـك .. مـع دمعتـك . الصدر موحش .. بليـا ذكريـات وهجـوس ............ والقلب ( بابه من أيامـك علـى صكتـك ) ! وسنين الأحباب .. ما تسوى تراب الفلـوس ............ عطيتـك العمـر وأحلامـه .. ولا كفّتـك . تلّيت من ريع قلبي كـل شـوق امغـروس ............ وخليتك بصـدري الممحـل علـى راحتـك . بكره يعـود الظـلام .. وتستريـح النفـوس ............ ويصير باقي من الذكرى .. صدى ضحكتـك ! |
.
من وثق بالهبايب .. يطلق الطيـر ............... الفضاء .. ياسع الطرقي وطيـره ما يزيد الحمول .. إلا المشاويـر ............... يا عسى سكة الغالـي قصيـرة ! ضاق صدري عليه بحزة عصيـر ............... قلت يا الله عسى بالأمـر خيـرة من سمـع للنسايـم والعصافيـر ............... ذاق طعم الحيـاة ومـات غيـرة كن نبض الخفوق إبـل ٍ مغاتيـر ............... هيجن البـال و تسـاوى مسيـره ضاع كل الكلام ومـا بقـى غيـر ............... مقطع ٍ من " قصايدنا الأخيـرة " كان عنـدي سواليـف ومعاذيـر ............... خفت أسولف ..و يسمعني هجيره ! لو يهـز المحانـي يبشـر بخيـر ............... بإتساقـط مشـاريـه ٍ كثـيـرة ليت عيني تخـف مـن التعابيـر ............... دام دمعي عجـز يحيـي ضميـره وإن نسى إني أحبه خير يـا طيـر ............... مات قلب وحيـا عشريـن غيـره قد نشف ريقي البارح وأنا أسيـر ............... وإدعى بالعطـش والمـاء ببيـره ياهبوب الشمـال أحلامـي تطيـر ............... وإنتي اللي نقـل ريحـة عبيـره ما نبت في وسط صدري نواويـر ............... لأجل أبـوح بسواليـف السريـرة رفقة الهـم رفقـة نافـخ الكيـر ............... لا حضر ذاقت ضلوعـي سعيـره لا تخيلت بكره وش يبـي يصيـر ............... قلت ربي عسـى يعطيـه خيـره جاء لقلبي وهو شيـخ الغناديـر ............... وغاب عني وهو عيني البصيـرة البقى بـراس الأوراق المساهيـر ............... والبكى ما تـرك للشعـر سيـره ما كتبت القصايد يومـي صغيـر ............... مدخرهـا .. للأيـام العسيـرة !! وقت ما ألقى مكاني وأطلق الطيـر ............... والفضاء ياسع الشاعـر وطيـره |
وإنتهينا !
والزمن يضحك علينا لا بكينا ! والوداع اللي دريت إنه نصيبي .. ياحبيبي .. مو بيدينا !! ماعلينا .. أدري ظروفك قوية ياحبيبي . يا حبيبي . يا حبيبي . وأكثر اللي بأفقده كلمة حبيبي !! كانت شفاهك تهجاها علي كنها قصيدة مب جديدة بس مامرت علينا الغدير مصدر هدير الماء .. نشف الزفير .. صوتي وأنا أتنفس .. وقف وضاعت أنفاسي مابين الريح واللي صار فينا صرت قاسي صرت أصب أحلامي الحلوة بكاسي .. وأكسره ! صرت أخاف أتذكره وقبل ميلاد الظروف اللي احصلت لك بعت ناسي ! صرت مثلك صرت قاسي ! ما أحس برقة القمرا وهي تضوي جبينك أو أحس برقة القمرا ولا أدري إنت وينك ! ياحبيبي . ظنك الدنيا تنسينا بعضنا ! لك معي بأكثر تفاصيلي ملامح إمسح أبياتي من الدنيا وأنا والله مسامح ! من زمان أتخيل إحساسي وأنا أودعك راحل للحنين .. لآخر حدود المدينة والسواحل للسنين .. اللي مثل جسمي وأنا ناحل حبيبي . يا حبيبي ! يا حبيبي ! يا أعز انسان يطعني وأنا راضي عليه يا أحن أحضان ضمتني وأنا غارق بعيبي ! قول ليه .. ليه أحس إنك تحاول من زمان وآخر أيامك قدرت لين بان ! نظرة الواقع بعينك صورتي وآنا أدور عنك وينك ! قللي بس وش صار فينا وين كل وعودنا ! وين آثار البكى بخدودنا وين حلفك لي إذا طاري على الهجران على طاري ما تصد ! تحكي أعذارك .. وانا والله مسامح ! ما علينا .. يمكن العشق القديم يظل فينا أو يموت إليا بكينا ! المهم . إنا إنتهينا ! والزمن يضحك على باقي حكينا ! والوداع اللي دريت إنه نصيبي يا حبيبي مو بيدينا ! |
ذعاذيـع الشمـال بعـز ليلـي هــزت الشـبـاك
................ تبـي تطـرد هواجيـس الغيـاب وتقطـع أحـلامـي برد صدري وأنا " أشهق " من لقاك و " أزفر " بفرقاك ................ ترى ما أقسى من غياب الحبايـب .. غيـر أوهامـي نبت بأرض السنين المجدبة حبك .. وصـرت أهـواك ................ رضيـت أعيـش بآجمـل ذكرياتـك باقـي أيـامـي حبيبي لو لقيت اللـي تبـي مـن هالحيـاة .. هنـاك ................ أنـا باقـي ( هنـا ) ليـن الليالـي تزهـق آلامـي على بابك وقفت أمـس أبتسـم لـك كنـي أترجـاك ................ تعيد اللـي سرقتـه مـن هنـاي إن كنـت قدامـي مشينا مـن زمـان .. وقـدر الله ينتهـي ممشـاك ................ على درب الغياب .. وخطوتك أسـرع مـن أقدامـي تجاهلت الوداع .. وقلت لك : ياصاحبي وش جـاك ؟! ................ ترش الماء على رمضى الطريق .. وصاحبك ضامي !! حنين اللي نقش إسمك على صـدري وخـلا شفـاك ................ تهجـا مـا يـدور بداخلـي مـن جرحـي الـدامـي جمعني بالورق قصة وفاء .. عاشـت علـى ذكـراك ................ طمست إسمك من أوراق القصيد .. وصرت بإبهامي ! أنا الوافي علـى كثـر الذنـوب اللـي تبـي أنسـاك ................ تحزمـت الـوداع .. وشلـت لـك تذكـار بحزامـي فمـان الله .. رح فـج الغيـاب ولــوح بيمـنـاك ................ أبرسـم صورتـك فـي داخلـي وأحييـك بإلهامـي جمعنا ماضي الحـب الحقيقـي يـا عسـاي أفـداك ................ أبيـك تطمـن رمـوش السهـر وتقـولـه نـامـي فزع بعض القصيـد بهاجسـي مـن هـزت الشبـاك ................ كتبـت آخـر تفاصيـل اللقـا .. وإنقطعـت أحلامـي |
تلاحقنـي ذنوبـي فـي طريـق العمـر
............ ولا آعـرف السنيـن اللـي بتبقالـي !! يدينـي غارقـة بأشيـاء غيـر الحبـر ............ وأبأكتب .. عل يبقى لـي صـدر خالـي كأن الأرض تحتي من لضاها .. جمـر ! ............ عجزت أوقف أشوف شصار فـي حالـي وأنا .. عبد ٍ ضعيف إحتاج يبكي .. كثـر ............ هواجيـس الغيـاب لصاحـب ٍ غالـي ! ولا اجمل من حنين القلب .. غير الصبـر ............ يعيشنـي " أمـل " لـو مـا تهيـالـي يحاصرني الشتاء .. وأرجي بصيص الفجر ............ أبطرد وحدتـي .. وأبقـى مـع ظلالـي تذكرت الحنين .. وفاض صدري شعـر !! ............ تفقـدت المكـان .. إلا أنــا لحـالـي بقى عندي " قلم " .. بيني وبينـه شبـر ............ وأنا عم المسافـة وقـت يطـرى لـي ! تجر إيدي قصيدة .. ليـن بـاب السطـر ............ وأنا أوراقـي قصـور ٍ صرحهـا عالـي وأهيجن .. بالزمـان الممتلـي بالطهـر ............ وأسمّـع صوتـي المبحـوح .. عذالـي على .. من ودعتني .. وإتركت لي عطر ! ............ أشمّـه لا طـرى موتـي علـى بالـي يخالفها " الهواء " وتطير خصلة شعـر .. ............ تقـل يـد ٍ .. تودعنـي علـى فالـي ! خطاويها يقين إن ( الجفا لـه عـذر ) ! ............ وهـي بنـت الوطـن ورمالهـا رمالـي وأراقبها .. تراعـي للسمـاء والبـدر .. ............ وعلى قد الحزن .. كانت تحالـى لـي ! يبس غصن المـلام .. ولا تجـرّا ثغـر ! ............ يتمتـم بالظـنـون وخيـبـة آمـالـي وراحـت .. لليـال المجهمـات السمـر ............ ورى ظـروف ٍ كثيـرة مالهـا والـي .. مع إني بأفتقدهـا .. بـس تامـر أمـر ............ لـو إنهـا طالبتنـي روحـي أشـوالـي وش الأرض اليباس .. إلا حـدود البحـر ............ وش البحر الغزير .. إلا ( صدر غالـي )! وأنا ما ادري .. لو أهرب من ذنوب العمر ............ أبهرب مـن طواريهـا علـى بالـي ؟! |
ما بين مفرق جدايلها يهـب النسيـم
................. عسلوجة ٍ حسنهـا مـزروع بعيالهـا امجاد أهلهـا تناقلهـا ديـار القصيـم ................. في كل طاري على النوماس تطرى لها بترابها الخير ويضج بسماها الهزيـم ................. ينزل لها الغيث والدعوات ترقـى لهـا يا ديرة الطيب يا فخر التـراث القديـم ................. يا نخلـة دوبحـت بالمجـد لرجالهـا شفتك ورثتي من التاريخ سيف ٍ صريم ................. قلت أبشري يا محاجر نجـد بأقعالهـا سميت بالله وأنا داخل عسى الله يديـم ................. صوت المساجد وبيض وجيه من جالها إنتي من عيال منصور وأنا من تميـم ................. جيتك وأنا تارك أشعاري علـى فالهـا |
على بابك !
قضى هذا القمر .. " ليلة " على بابك .. تخيل نفسه " الليلة " من أحبابك ! وجا لمك .. ولا همك .. على بابك ! قضى قلبي أنا " عمره " على بابك .. تخيل نفسه إنه أقرب أحبابك .. وأخذ همك .. ولا همك ! على بابك .. أنا ! ونور القمر .. وأطول حكايات العمر .. وكل ما طرى .. ذاك الزمان إنه يمر .. وحزني أنا ! وإحساسي بكبر العنا .. وإنها نهاية حبنا .. وإن الليالي تعتذر ! عن سرقت أوقات الهنـــا .. وخايف أقول إن كل شيء ! وقف على بابك .. ولا همك .. ولاهمك .. على بابك ! تذكرت البراد وريحة ثيابك .. تذكرت الحكي والهمس تذكرت الكلام اللي عن إسم الشمس ! هنا من أمس .. أنا واقف على بابك .. وأنا أدري ! ما ورى بابك فرح .. يا وردة أصحابك ! ولكن .. لي أمل بإن الخفوق اللي إنجرح .. يقسى ! ولا ينسى .. لأنك أجمل اللي صار لي في عمري الماضي .. أنا واقف .. على بابك هنا ! أبكي على غيابك .. أنا واقف .. على قلبي أنا ! كله من أسبابك .. أنا واقف .. أقول إ إني : " أحبك " لو بليا صوت .. عيوني تكفي عن كل الكلام .. اللي أبآقوله .. ولا أدري .. لو إنك شايفه كل السوالف والغرام اللي على بابك .. يبي يهمك ؟ ولا همك ! |
من يامن الليل ما يامن هبوب الشمـال
................... بعض الشجر حتت أوراقه وغصنه خضر الشمس حنت على الطرقي بوقت الزوال ................... أبطت تبي مخطي القبلـة يـدور عـذر يا ضايع الدرب لا تقرب خشوم الجبـال ................... العمر واحد وراح من الرجـال شكثـر حقك علي إني أدعي لك على كل حـال ................... جايز دعاء صافي النيـة يـرد القـدر الشعر شيخ الكلام إن ثمنـوه الرجـال ................... وأوراقي اللي تشوف أثمن من أثمن درر دام التميمي عطـاه الله سحـر المقـال ................... بأسند قصيدي على ربعي تميـم بفخـر يا عزوتي ياذهاب أعداي وقـت القتـال ................... يا راس مالي بهالدنيـا عساكـم ذخـر قبل آتفزع عمامـي فـار دم الخـوال ................... جولي جيـوش ٍ نهايتهـا لحـد النظـر أصغرهم يشيط لا ميل براسـي عقـال ................... وأكبرهم ينهض عزومي بوقت الشـرر ورثت حلم النفوس وخوف رب الجـلال ................... وأخذت من جدي رميزان سيف وصبـر وناديت يوم الفجر بيـن عليـه الكمـال ................... وأنتم هل العرف ما يخفى عليكم خبـر صبح ٍ من الزعفران اللي بصفر الـدلال ................... وأوراق شالت نـدى بتشيـل دم حمـر والضايع اللي تذرى في ظـلام الليـال ................... شرف على النور والمنجاة فرصة عمر |
ليت نار المحبـة .. بالمحانـي تشـب
........... دام حزني نسيـم .. وذكرياتـي جمـر وليت كل الخلايق لا تمـادت .. تحـب ........... كان شفت المساء ساجد سجود الشكـر وليت نور المدينـة مـا درى وإكتـأب ........... وما طفى .. يوم قرب موعدك يالسفـر كن الأيـام طفلـة .. تستحـق العتـب ........... تركض ولا درت باللـي وقـف منقهـر غابت من السماء شمس .. وبدا ينكتب ........... عالصدر .. وش كثر حبيتها .. وش كثر داخل القلب بنـت ٍ .. غارقـة بـالأدب ........... ما تساوت مـع باقـي بنـات البشـر طيبـة .. ماتعـرف إن المحبـة تعـب ........... ناعمة .. ما تعرف إن الغصن ينكسـر تلمس الأرض .. تتحول مناجـم ذهـب ........... تدعي الغيم .. يحضر في يديهـا البحـر تبتسم .. تضحـك الدنيـا بليـا سبـب ........... كنهـا مابغـت تلقـى وسيعـة صـدر غيـرت طعـم هالدنيـا بطعـم العنـب ........... صار كل الكلام اللـي تقولـه .. عِبـر كل الأسماء .. وكل ما سمّي و ما إنكتب ........... زخرفه .. لإسمها الجالس بعرش السطر كنت أحبه وأحب الماء وأحـب السحـب ........... وصرت احبه وأحب إسمه وأحب السهر لي متى ..والزمن قاسي وطبعه صعـب ........... لي متى .. والفراق أردى رفيق ٍ حضـر لي متى .. أنتظر ريـح التلاقـي تهـب ........... وتنقشع غيمة الغيبة .. وبـرد السفـر |
أحيان أحس إني وسط خافقك ذبت !
............... وأحيان أجي بالبال لاصرت فاضـي يا صاحبي ليه أكره النـاس لاغبـت ............... وأقول خذ قلبي معك .. منت راضي كم ضاقـت الدنيـا علـي وتعذبـت ............... وكم جيت لك قاضي وعوّدت قاضـي لا إنت الذي قـدرت حالـي وقربـت ............... ولاإنت الـذي خليتنـي لإفتراضـي داخل عليك إن شفتني ليلة السبـت ............... خلك عن الوجه العبوس امتغاضـي ولاتسأل شلوني .. ترانـي تقلبـت ............... حتى بياض الوجه ماهـو بياضـي لاتلومني .. كم شفت ناس وتغربـت ............... وكم دست بإحساسي ديار وأراضـي وإن كان حسيت إنك بوصلك أذنبـت ............... فالله .. ولا حب ٍ شقوقـه عراضـي ولو أسألوك أهل الشماته .. وجاوبت ............... قيل : سيرته مايسمعه غير واضـي بآغيب أحبك وأذكرك .. وإنت لاغبت ............... غيب بسلامـة رب العبـاد راضـي |
أرض الأحلام و أشجـار الأمانـي يبـاس
............... و إنـت ظالـم .. ولكنـي أحبـك كثيـر ! واضح إني خسرتك للأبـد و إنـت حـاس ............... خلك أقوى شـوي و إعتـرف بالمصيـر رحت .. يوم إرتوت فيني عذوق الحماس !! ............... مثل من ياخذ اللقمـة مـن أفـم الفقيـر عندي إحساس وشوية رجاوي .. و يـاس ............... وما بغيت أزعجـك مـدام وقتـك قصيـر قلت أبنسـاك يمكـن هالمسافـة تقـاس ............... بين ذاك الزمان اللي مضـى .. والأخيـر صاحبي مارضيت أنساك مـن قـو بـاس ............... يوم أبنساك .. كنت أبغى يمـوت الضميـر الغرابيل تلحقنـي وأنـا ( بـدون نـاس ) ............... عفت ناسي .. عشان أبقى بعينـك كبيـر يوم كـان الوفـا تحـت الخديعـة يـداس ............... والغـرام آخـر حلـول الوسـط للعشيـر كنت غالي وكان النـاس حولـك نحـاس ............... كنت صادق وكـان الكـل حولـي يغيـر ليت الأيـام ثلجـه ذابـت بوسـط كـاس ............... كان عـودت مـع بـرد العلاقـة صغيـر كنت أنا و إنت في ذيـك المحـلات مـاس ............... و إسرقتك الحياة الهاديـة وصـرت غيـر بس كانك تبي فرقـى مثـل منـت حـاس ............... خل ( ليل الخبر ) يذكـر همومـي بخيـر |
الشفق .. جرح السماء .. بإيد الغروب
............. والسحب .. منديل .. طيـره الهـوى والشجر .. حارس على كل الـدروب ............. ماسمح للريـح .. والنسمـة سـوى والذنـوب .. اللـي نسميهـا ذنـوب ............. ضحكة الساقـي .. علـى ورد ٍ ذوى وأنت .. شمعة .. عاهدتني ماتـذوب ............. لين ما آحس العمـر كنـه .. نـوى إلمس بيدك على صدري .. ب..صوب ............. حس .. في صوت الفـؤاد اللـي دوى ليت لي كلمـة علـى كـل القلـوب ............. كـان ماخليـت قـلـب ٍ مـاهـوى وليت لي قدرة علـى نفسـي وأتـوب ............. كان ماقلبـي .. علـى بعـدك قـوى كل مافي الكون .. خاشـره الهبـوب ............. غير صدر ٍ ضـم حبـك .. وإنـزوى كنت اخاف .. إليا طرى ذيب الهـروب ............. يفلـت بفكـري .. وإلا أبعـد عـوى ويزعج النايم علـى رجـل العيـوب ............. وأمسكـك .. وآحـس ثالثنـا غـوى وأتركك .. وإبليس في وجهه شحـوب ............. لأنك أطهر .. من بالإخـلاق إرتـوى قلت لك ... سبحـان عـلام الغيـوب ............. كل هذا الكون .. شفتـه بـك ضـوى الشفق خـدك .. وسجداتـك غـروب ............. والسحاب جـلال .. بالليـل إنطـوى |
وش بي تخيلت السماء رجلن سمعني يوم بحت
.............. بإن الغيوم أطفال نفـرح لا تغشاهـا العـرق يشغلني الهاجس وإذا زاد التعب بي إسترحـت .............. ودي لذيـذ النـوم لا حـس بغرابيلـي يـرق أنا حزين أو إني أتضايـق إلا منـي سرحـت .............. آصك بابي وأشغل البـال بسواليـف الـورق كنت أكتب شكثر البكى هاين علي من يوم رحت .............. ومن التعب نامت أحاسيسـي وصحاهـا الأرق جالس أعد بآخر الأيـام كـم مـره إنجرحـت .............. وإذا عرفت .. أسأل ثمين الوقت كم منه إنسرق وأضحك أبي كل البشر تدري وإذا صديت صحت .............. ماودي العذال تشمت بـي وأنـا ميـت غـرق وأنا وقفت لضيقة الفرقا وضاقت بـي وطحـت .............. إلين قلت بصوتك المبحوح " مابـي نفتـرق " حبيبي إن كان الفرح صادق فأنا والله فرحـت .............. كنك رجعت تعلم الأيـام ويـش اللـي فـرق أمس أكتب أحزاني من الحسرة ولا مره مسحت .............. واليوم آشب بدفتر الذكرى وأشوفـه يحتـرق الليلة البدر يحكي لـك كيـف بالهـم إنذبحـت .............. كني سجينن كل ما يحكي عن عيالـه شـرق اليوم بتعرف شكثر تطري علي لامن سرحـت .............. وتشوف كيف أشغل طواريك بسواليف الـورق |
تخطي وأقول .. إن أنا المخطي ولا أتشرّه !
.............. وتخطي بعد .. وأعذرك وآقـول مايـدري وفي كل طاري .. يمر تخطي كـذا مـرّه ! .............. وأخاف حملي يزيد .. وينكسـر ظهـري ! جايز .. اكون الحليم اللـي ظهـر شـرّه .............. وجايز يكون الغلط منـي .. وذا عـذري . يا صاحبـي كنـت أحبـك حيـل بالمـره .............. ولازلت أحبـك .. ولكـن العتـب يطـري أحيان أشوفك " بعيـد وخايـف آضـره " .............. وأحيان أشوفك قريب .. إرتاح في صدري ليه أسألك عن جروح القلـب .. والحـرّه .............. وانت أبخص الناس في جرحي وفي حـري يا صاحبي .. لو مسك كل ٍ علـى سـرّه ! .............. ما كان الأحباب .. سموا حبهم " عذري " وأنا تعبـت أسحـب الأحـزان .. وآجـره .............. وأحفر بأثر جرتي .. قبـر يغـدي قبـري إما تكـون الحبيـب اللـي قـرب مـرّه .............. ولا عسـى الله يقدرنـي علـى صبـري وأنـا أحبـك .. ولا بـآعـاود الـكـرّه .............. حتى ولـو كبريائـك .. صـار يستجـري مإخترتـك تـذوق حلـو بكـاي أو مـرّه .............. إخترتك .. تحس بأحلى شي فـي عمـري فـلا تكابـر .. وأنـا ماعـاد بأتشـره ! .............. وإنت وضميرك .. وفكر قبـل لا تسـري |
سجيـت رجلـك .. و النوايـا طليقـه
.............. والله يسهلهـا عـلـى مــا بغيـنـا عندي حكي .. إصبـر بأقولـه دقيقـة .............. وش معجلك .. دامه خـلاص إنتهينـا ليه الحـزن غطـا عيـون الحقيقـة ! .............. وصـرت أتخيلنـا .. مثـل مابديـنـا شاعر .. وبنت .. ونظرتين .. وحديقة .............. وإحساس ينبـت فـي مصافـح يدينـا وأغصان مالت .. لي كتـوف الخليقـة .............. قالت : حبايب وإجلسوا .. وش علينا ؟ كانت هنا ذكـرى .. مشاعـر عميقـة .............. ( كانت ) .. وكل شي إنتهى .. مادرينا تدري .. أحس إن آخر العمر .. ضيقة ! .............. وإنـي بأضـل أذكـر تفاصيـل فينـا تكفى .. الجـروح النايمـة لا تفيقـه .............. أخاف أصارخ .. وأزعج اللـي نسينـا وداعـة الله .. ياليـديـن الرقيـقـة .............. والله مادري .. تذكـر اللـي حكينـا !! سجيـت رجلـك .. والثوانـي طليقـة .............. والبـعـد .. سهلهاعـلـى مابغيـنـا |
ودي أقول حكايـة النـاس والبيـر
................ وكيف إتعبوا .. لأجل إيتهنون بالمي وودي أشبهها بنفسي وأنـا آغيـر ................ وأفهمك .. كيف السحب تقتل الضـي ( ودي ) .. وخايف يسمعن العصافير ................ وتقوم .. وتصحي معاها هل الحـي نم يا قمر دنياي .. تصبح على خير ................ خل النهار يحس بإنـه بقـى حـي كل يوم أحبك غير .. والبارحة غيـر ................ بديت أحس إن الخلايـق ولا شـي ! إفرح .. إذا طالت علينـا المشاويـر ................ يمكن يزيد الشوق في داخلي شـوي مدام حبـك .. قسمتـي بالمقاديـر ................ بأصبر .. وكن حر القوايل معك فـي والله .. أحس ان لي جناحين وآطير ................ لامن ذكرت .. إنك ذخرت الغلا .. لي خلك وسط قلبي .. لو يصير مايصير ................ كل الخلايق في وجودك .. ولا شي .. |
تكتب الريح إسمي .. وسط كف السحـاب
........... كنها تقول : شوف .. إنك وصلت الجدي ! تدري إن أناظر فـوق .. وقـت الغيـاب ........... قالت : أحسن أنسيه الحـزن .. ويغـدي حسّت الريح فيني .. من كبر هالعـذاب ! ........... وأنت ماتدري حتى إن لك رفيق أجـودي ! ليه أحس إن لك بوقت الفرح ألف بـاب .. ........... وكل ماجيـت بـاب أتعـب أفـك بيـدي طحت من طولي .. ومار حان وقت الذهاب ........... أنتظر منـك ( يَـد ) .. تجرنـي لسعـدي طوّل الوقت .. لين إن أصغر إحساس شاب ........... وأنت تدري .. ومع هـذا رحلـت تعـدي كانت الناس تنصحنـي .. وتبـدا العتـاب ........... وكنت أسج وأفكر .. كيـف معـك أبتـدي لين رحت .. وانا في فمّـي الصـوت ذاب ........... وصار كل شـي إيتذكـر غلاتـك .. ردي لو تخاف البراري .. مـن قـدوم الذيـاب ........... كان خاف الصدر .. يوم ٍ لمست جسـدي ولو تعرف النفوس الطاهرة .. بالصـواب ........... كان عيّت أواصـل .. وإفرشـت مرقـدي وكان كلمة ( أحبك ) فتّقت جـرح طـاب ........... يا كثر ما إنفتق من جرح لي .. يابعـدي ناظر الريح .. خطـت قصتـي بالسحـاب ........... كنها تقول : صدق إنـك رفيـق أجـودي |
القلوب مسكرة والنـاس ماحسـوا بـي
............ والوجيـه الزايفـة ماتستحـق الجيـة والوداع اللي تحضن ضيقتـي وكروبـي ............ مادرى بـأن النفـوس الطيبـة مبليـة ياعسى ذاك الرفيق اللي يضد أسلوبـي ............ يكتشف سم الكلام اللي من أفـم الحيـة صابني ماصابني من صوب ماهو صوبي ............ صوب دون ٍ للدِنا يدنـي علـى رجليـة كل حرف ٍ مسني من هرجته محسوبـي ............ ماتنازل عن حقوق من الكرامـة ليّـه والله إن يندم على وضع الحصى بدروبي ............ والعلوم اللي تبيـن لـي ردى ماضيـة يوم كان أول رخيص من الذي طاحوا بي ............ بعـد ماذاقـوا مـذاق الميتـه والحيـة أصطنع شكل الصديق/ الطيب / المحبوبي ............ واستمال صويحبي بأحزانـه الشخصيـة وحل قيد ٍ من ثمـان سنيننـا مكروبـي ............ حسبي الخالق عليه ومـن تقبـل غيـة الوجع مامل من كبدي وحـرق جنوبـي ............ والوداع إحتل من حزني طريـق السيـة ومالقيت من القهر غير أبتدي مكتوبـي ............ عل ذيك النفس تفهـم جملـة ٍ مخفيـة يانفوس الطيب توبي عن رداهم توبـي ............ النفوس الزايفـة .. ماتستحـق الجيـه |
يا عنك الهوى ما يدخل قلوبنـا بوضـوح .
................. تـرك فـي عـروق أيامنـا مـا يكفيهـا سقى الله ليالي قد مضت طربتن ومـزوح ! ................. ليالـي يفـز القلـب لا مـر طاريـهـا .. مضت وإنتهت .. والقلب لي وقتها مجروح ! ................. تقل ماضـي الذكـرى حلـف مـا يخليهـا سقى الله غـلا إنسانـة ٍ ساكنـه بالـروح ................. غلاي إنحبس مـا بيـن رقـة محانيهـا ! وحجره قديمـة تاركـه بابهـا مفتـوح ! ................. تبـي تجمـع أرواح المحبـيـن بإيديـهـا سقى الله حياة ٍ هادية ما تعـرف النـوح ! ................. هذاك أول اللـي كنـت أنـا ميـت ٍ فيهـا الين إفترقنا والعشـق هدنـا .. مسمـوح ................. عسى اللي حداها عـن طريقـي يداريهـا هذيك أول اللي لا إذنبت .. ذنبها مدمـوح ! ................. مضت .. كم سنة من يـوم أودع طواريهـا هذانـا كبرنـا .. والعمـر عننـا بيـروح ................. ولا باقـي الا ذكريـات ألتـهـي فيـهـا وآنا أسج كل ما يطري الماضي المجـروح ................. تقـل ماضـي الذكـرى تعلـق برجليهـا |
لا لا تعـذر.. تـرى مـا للعـذر داعـي
............... السـر ذاع .. وتسنـى للبشـر كشـفـه كم من رخيص ٍ يكب الصـدق بأسماعـي ............... وآكذبه .. وأطرده .. وألعنه في وصفـه ! وأقسم وآنا بالغبا .. (مفتون .. ملتاعي ) ............... بإنـي أصـون المـودة وألغـي الكلفـه والله لو أدري عن اللي بالخفـى ذاعـي ! ............... ماكنت أوصل مواصيلـي .. بـلا وقفـة هذه حياتك .. وأنـا مـا أغيـر أطباعـي ............... وهذه حياتي .. وخل القلـب فـي نزفـه قدمت لك مايغيـض البيـض بذراعـي !! ............... قلبي .. وأنا آشوف في كفة يـدك رجفـة شكيـت لكـن نسيـم العشـق ذعذاعـي ............... ولا هدني ليـن جتنـي ريحـه الصلفـة ماكنـت أظـن بغديـر الدمـع مرباعـي ............... وإن الغلى داخلـي ينسـاق لـي حتفـه قبل أمس واعي .. وأظنك بي بعد واعي ..! ............... والليل جالس وانـا راسـي علـى كتفـه وأبوحلـه عـن رفيـق ٍ للعمـر باعـي ............... ماقـدر اللـي شـراه وسلمـه عطـفـه بانت عذاريـب حبـه وأعلـن الساعـي ............... بانه تسلم رسالـة ( غـدر ) مـن كفـه ياويل قلب ٍ غـرق .. والسبـة شراعـي ............... يوم إيتمايـل فـرح .. والحـزن بالدفـة ياسيد البيض .. لا تضغط على اوجاعـي ............... وأنت إتظاهر .. ودمعات النساء حرفـه !! يكفـي مـدام الكنيـن اليـوم ماطاعـي ............... وقام ايتذكـر صـدى صدفـات منكسفـة صدفة عشقتك .. وصدفة تطلب وداعي !!! ............... ياشين صدفة .. على ملعون ابو صدفـه أمسح دموعـك تـرى ماللبكـى داعـي ............... السر ذايع .. ودمعـات النسـاء حرفـه |
الشمس .. غطا ضياها شرشف المغـرب
.............. والغيم .. سولـف عليهـا ليـن نوّمهـا والكون .. أسبل ببشت الليـل وأستغـرب .............. ( علم الفلك ) من ذنوب الكون ماأعظمها وأنـا وفِكـري ومبـريّ القلـم نقـرب .............. ودْنا نغيـض القمـر باللـي بنرسمهـا بين العسل والقـراح بزعمهـا تشـرب .............. ماكنهم يشربـون الشهـد مـن فمهـا سلسالها قـد عثـا بالنحـر وإستـذرب .............. يوم ٍ لمس قاعـة الرمـان .. لاعْدَمهـا قامت تكـد الظـلام .. تخـاف لايخـرب .............. مظهر دجى ضم عنق الشمس وأعتمهـا وضاعت يديها مابين خْصَلَّهَـا وأعـرب .............. نور الفجر عن حسـده لنـور معصمهـا وأرخت جسدها بلا إستئـذان وإتعـذرب .............. جاهـل جلـس جنبهـا لأجـل إيتعلمهـا من أبجدية سجون الرمـش .. للمهـرب .............. لخدودها الحمر .. لشفاها .. ولا همها ؟! تلحفـت ... و إتركتنـي حـزة المغـرب .............. جالس اسولـف عليهـا لأجـل أنومهـا |
ليت الهوى .. خاف من ربـه ولا جانـي
................ ماكان أحس بهمـوم النـاس مجتمعـة ! أقيد شمعة سنة .. مـن عمـر احزانـي ................ وأعيش عمري .. تشب وتنطفـي شمعـة لا صوت قـادر يـدف الحكـي للسانـي ................ ولانيب أعرف أحرم إذني لا حكوا .. سمعه كم لي وأنا لا أذكـروه أعـض بأسنانـي ................ ماودي اللغـز الأول .. تكشفـه رمعـة!! كنا هنـا .. ليلـة الجمعـة .. و خلانـي ................ واليوم أنا .. والفراق .. وليلـة الجمعـة كلن جلس .. وإبتدا يكـذب علـى الثانـي ................ لين أكشفتني وانا أضحك (كذب) .. دمعـة وأسكت .. أخـاف إيتنبـه مـن تبلانـي ................ وأمسح أثرها .. ويبقى بأصبعي .. لمعـة وآلوم نفسي .. وأنا آشوف إصبع الجاني ................ اللي جمع رفقته .. ثم صافحـوا جَمعـه يامكرهه مـن هـوى .. ليتـه تعدانـي ................ ما كان قمت أشتكي .. والناس مجتمعـة |
ليلة السبت يا نايـف تجـر الكـلام !
............... ما كأني حلفت أنسى الورق والقصيـد الله الله على جرحي .. وخـل السـلام ............... ودي آحس بأحزان الهوى من جديـد داخلي سر ضايقنـي قبـل لا أنـام .. ............... يمكن إن بحت به أرجع " كأني سعيد " راحت اللي تخايل لي حمامة سـلام ! ............... داست أحلامي البيضاء بقلـب ٍ حديـد |
المسافة وضيق الوقت .. وأشواقنا !
................. والكلام .. ووجيه المقبلين السمـر والسؤال الوحيد اللي من أعماقنـا .. ................. ودي أسأله قبـل إن الدقايـق تمـر القدر أو ظروفك .. أيهـم عاقنـا ؟! ................. قللي إن كان باقي لي بعذقـك تمـر حسبي الله على اللي سبـب فراقنـا ................. ما رحم وقفة الذل وعيوني الحمـر كل ساعة تعدي تخنـق أعناقنـا .. ................. كن حروفي حفاة وأرض وقتي جمر تدري اليوم .. جالس احسب أوراقنا ! ................. من يصدق تفارقنا بعـد هالعمـر !! تذكر آخر لقاء والدمع .. وعناقنـا ................. كيف كان المكان بشوقنـا منغمـر خايف إن الزمان اللي قبـل ساقنـا ................. للجفا .. يعجبه ما صار ثم يستمـر وإنت روحي وأنا من ليلة فراقنـا ! ................. أنتظر في مكانـي كـل ليلـة تمـر |
أرجوك .. كل الحكي معروف .. من بدري
............. مافيه داعي تعيده .. شـوف لـك غيـره تدري ..! أبآشاركك .. باللي شغل فكـري ............. وخل السوالف .. ( رحى ).. وقلوبنا تديره سنتين مرت وأشـوف الثالثـة .. تجـري ............. وحنـا نجامـل .. وكـل ٍ بـان تقصيـره قد قلت لك من زمان .. إن غبت من عذري ............. ما قوى علـى الهـم والغربـال والغيـره وشلـون أبقـوى .. ودم فراقنـا يسـري ............. بعروق الأيام .. من كان الصدر .. ( ديرة ) لين أثقل الهـم كتفـي .. وإنحنـا ظهـري ............. ودنقّت .. والبال .. طـاح بكفـة الحيـرة وماشفت . بعيونك النعّاس .. مـن قـدري ............. غير إني اللـي كِسـر خَاطـر مشاويـره تذكر .. قبل كم سنة يوم الجفـا يطـري ! ............. وتقول لي : بس عـاد .. وفضهـا سيـرة كنت إنت ..؟ ولا أظن إني أنـا آهـذري ؟ ............. أو هو حلم .. يشتكي من كِـذب تفسيـره بالحالتين .. الحبر جَف ْ.. بـورق عمـري ............. ولا عاد ينفع نعيد ..اللـي قِضـى خيـره يا أعز من ب..أتركه للبُعـد .. وأستَـذري ............. تحت ( إني الطهر .. وإنه درب ما آسيره ) خلاص .. كل ٍ يدور له طريـق .. أدري .! ............. ما نيب أبشكي .. جعـل بفراقنـا خيـرة ! من كم سنة كنت أعز إحساس في صـدري ............. واليوم دار الزمان .. و ( فضهـا سيـرة ) |
على غفلة وانا آراقب مدى وادي الظـلام بصمـت
.............. تسلل بالخفـى ظـل الخيانـة مـن ورى ظهـري وأنا في كل عزي فـوق صخـرة قصتـي ماقمـت .............. دريـت أنـه وراي ولابغيتـه لا قــرب يــدري لعلـي أكسـره بـأول كلامـي لامـن إتكلـمـت .............. وأنا أخاطب ضميره وآتشكى مـن وجـع كسـري عمدت أكتب ( أحبك ) عـالتراب بلا ( ألف ) مادمت .............. أعرف إن ( الألف ) تعني ( أنا ) وتطيح من قـدري بديت أهمس بإذن جوفي نسيـم يصيبنـي لاهمـت .............. تناهيد ٍ بـدت تحبـي ألـم ليـن أصبحـت تجـري على كبـر الخيانـة والتناسـي والكـذب قاومـت .............. ثمـان شهـور لا طـب ٍ يعيـن ولا دوا يـبـري أجـل أتـرك مكانـي للغيـاب وهقوتـي أجرمـت .............. وأجي وألقى الجريمة من يدين أجناب في صـدري وانا ياويل حالـي قبـل أغـادر دنيتـك صممـت .............. أعـود بـلا عتـاب ولا مـلام وخافـق ٍٍ عـذري من اول ما عرفت إن البحر دمعة قهر بـه عمـت .............. إلين أصبحت في جوف الورق غرقان في سطـري أتمتـم بالكـلام اللـي كتبتـه وأمسحـه لانمـت .............. أخاف أحلـم وأكمـل ماكتبـت وينفضـح سـري ويدرون الملا عن ماحبستـه بالحشـى وأقسمـت .............. أخبيـه لذبـول آخـر ورود الحـب فـي حجـري ومر الوقت وإحساسي مابين آلمـت / مـا آلمـت .............. وظهـري يرقبـه عيـن ٍ تلـد تشـوف مايجـري وفجأة .. خالط الموقف شهيق المذنب اللـي لمـت .............. ونبظاته بـدت تزعـج حشـاي وتقتـرب حـدري مسك كتفي وهو يهمس ( تراني في غيابك صمت ) .............. وحظني وأنفتح دفتر دمـوع ٍ مـن شهـر مقـري نزعت إيده ونفضت اللي بلبسي من غبـار وقمـت .............. وخليت الذي يبكي ورى ظهـري .. ورى ظهـري |
وط صوتك حبيبـي .. السمـاء تسمعـك !
............. ليه تفضـح زعلنـا البارحـة لـالمطـر . ماتخاف إن لمحك تصيح .. جـاء يتبعـك ............. وتغرق هالمدينـة .. مـن سبايـب قهـر صب كـل الحكـي بإذنـي ترانـي معـك ............. وإن سكرت .. إعرف إن عيني تحسبك خمر ولا تقول الهبـوب اللـي مسـح مدمعـك ............. والله أن أربط يديـه .. بيديـن الشجـر .. ما يمسّح دموعك .. غيـر مـن يمنعـك ............. ومن يبي يمنعك غيري .. مدامك سحر .. ! خلني بيـن قلبـك وبيـن نحـف أضلعـك ............. يمكن إن شافني قلبـك .. يـدور عـذر . كنـك الرجـم .. وإيدينـي تبـي تطلعـك ............. وآتمايل وأصيـر .. معلـق ٍ فـي حجـر لا وصلت لغـلاك .. ولا قـدرت أجمعـك ............. ولا بقى بيـن هالثنتيـن .. غيـر الصبـر يا كبر قـدرك بقلبـي .. ويـا مسرعـك ! ............. لا تمشيت مـع دمـي .. وأشوفـك تمـر يوم كنت تحكي لي .. كنت أبوس إصبعك .. ............. ويوم طال الكلام .. شـوي قلـت : أنتظـر لا رقيت لخدودك .. مـن يبـي ينفعـك !! ............. مـا يـرد الظـلام .. الا طلـوع الفـجـر وط صوتك حبيبي .. لـو أنـا ماأسمعـك ............. مابي أحـد ٍ يشاركنـي .. بصـوت القمـر |
غابت سماء زرقا .. وشمس .. وهبايب
.............. ولا بقى لي غير .. ليل وبعض هَـمّ . ! يسألني العالـم عـن إنسـان غايـب .............. وعجزت من حزني عليـه .. آتكلـم ! إن كان باقـي لـي دعـاء وطلايـب .............. فالله .. يعيد شفاهـي اللـي تِبسّـم .. مريت بـدروب ٍ قديمـة .. عجايـب ؟ .............. حتى المكـان اللـي تركتـه .. تألّـم ! بيـت ٍ قديـم وبـاب مبلـي وذايــب .............. وجدار .. من خـوف الملامـة تهـدّم وماضي وعشـق وذكريـات وحبايـب .............. وكلمات .. مكتوبة على غصن أبكَـم ! بس التـراب اللـي وفـا .. للخرايـب .............. وغطا شوارعها .. لأجل يحجـب الغَـم كن داخلي طفل ٍ لـه إحسـاس شايـب .............. وإتركتـه الدنيـا .. إلـيـن إيتعـلّـم وكن الشجر .. رجل ٍ يعـرف السبايـب .............. ومات .. وترك كل الحيـاة .. إتنـدّم !! دام العشق خايب .. والإحساس خايـب .............. و ش لي .. أمر بصوب بيته وأسلـم ؟! ذكرنـي ( ترابـه ) بإنسـان غـايـب .............. وعجزت .. من حزني عليـه آتكلـم !! |
في جنون ٍ يَصفـع العقـل .. ويبـادر بالوعيـد!!
............... ويتمـادى ليـن يفـرض سَطوتـه .. بالإرتجـال ويتحكم بالجِسـد .. كـن الخلايـا لـه عبيـد .. ............... يعرفون السمع .. والطاعة .. وحاضر .. وإمتثال ! إستغلـت حالتـي ((بنـت ٍ)) تِفاخـر بالقِصـيـد ............... لاتِعـزوى كـل بيـت ٍ فيـه بأوصـاف الجمـال وأسردتلي مـن تِفاصيـل الغـزل مَوقـف فريـد ............... شاعـر ٍ ... يوصـف خطاهـا لاتِثنّـت بإختيـال تعرف إني .. مارضيـت بغير(شاعرهـا الوحيـد) ............... وماولِد من قـال أنـا لـك نِـد بأوقـات النِـزال ومن سِوايا غيرتي ..!! قلت : الجرايـد ماتفيـد؟ ............... (( يحسب إني ماأعرف إنه سرقها من مقـال )).!! وأضحكت كن الصيـاح بثغرهـا .. أمـر ٍ شديـد ............... يِلزم الليـل إيتنـازل عـن ( مفاتيـح ) الوصـال وأمسكت يـدي .. وتابـع صبعهـا خـط الوريـد ............... لين قاده للصـدر وأشّـر علـى قلبـي وقـال : بإسم مولاتي ... أهنـي الـروح بالنصـر الأكيـد ............... يوم فازت بإستثـارت ( غيرتـك ) بيـن الرجـال وصدّ عني .. فارس ٍ ماشاف بـي خصـم ٍ عنيـد ............... شـاف شخـص ٍرافـع ٍ رايـة قـدوم الإحتـلال بعض يـدي يرتجـف والبعـض يطمـع بالمزيـد ............... وشـوف عينـي ماكِفـاه لسـد بـاب الإحتمـال قلت أنا مانـي بوعـي ٍ قابـل إن الإيـد إيـد ..!! ............... هي أنامل كفها ..؟ ولا حريـر ٍ خِيـط شـال ..؟ إسحرتنـي بالجمـال الـلـي خـذانـي للبعـيـد ............... للسحاب اللـي يـداري بالحضـن روس الجبـال وإجبرتنـي أرتكـز .. قالـت : تِأمـل يـا وِليـد ............... قِس مِسافات الغـرام إن كِنـت راضـي بالخيـال قلت شوفيلي طِريق ٍ صِنـع مـن عـذب الجليـد ............... جابني من مِظلمـات الأمـس وبليّـا سـؤال ...! جيت أقايـس هالمسافة.!وأكتشفـت إنـي بليـد!! ............... دام عقلي من جنون الحـب والعشـق إستقـال .. |
شعشع النور وتلاشـت ظلمـت الليـل الكئيـب
................ وأستلـذت عينـي بتلويـن فستـان الحـيـاة وأطلق الخافق تناهيـت .. اللقـا بعـد المغيـب ................ وأعلن أسرار المدينة وسـط مملكـة الشتـات ويوم قرّب يكشف الخافي ويرضى بالنصيـب !! ................ وينشـد اللـي ماتقـول ومايقـال إبهـا ردات إرتبك .. وأتعثرت كلماته ب (( لفـظ الحبيـب )) ................ والخجل .. قـام إيتباهـا بالخـدود المزهـرات قال : انا فاقد كلامي !! وأرتجي شوف الطبيب ؟ ................ آتكلم .. وآتكلـم .. وآتكلـم .. فـي سِكـات ؟ سِل مني سيف سلطان اللسـان اللـي يصيـب ................ وإنعطـى بنـت ٍ تشيّـد بالوفـا مستعـمـرات من قرب منها بعيد .. ومن بعـد عنهـا قريـب ................ تفهم أسرار النفوس .. وتحكم أطـواق الثبـات جندت جنـد ٍ تجيـد البـوح بالـراي الصويـب ................ حِنجرة .. ولسان .. وأسلوب .. وجميل المفردات الطفل لاجاع يقصـد بالبكـا .. شـرب الحليـب ................ والرجل لاحب يقصد بالسهـر .. كثـر الغـلات كم من إنسان ٍ تسمى في ضواحيهـا غريـب ؟ ................ هـدّه الحـب وتـرك لـه صفحـة ٍ للذكريـات لبستني ثوب عشق .. ورشته مسـك ٍ وطيـب ................ وإجلست قدام عينـي تنتظـر منـي سِـوات ؟ جيت أبوصف حسنها .. قالت : تمهل يالبيب !!! ................ ماتعـرف إن النجـوم أوصافهـا متقلـبـات ؟ قلت : وش جاب القمر .. للي تحلـى باللهيـب ................ ومن يقول إن الجواهر والحصـى متشابهـات ؟ تسمعين اللي يقـول : إن المرايـا تستجيـب ؟ ................ ماإستجابت لين شافت صورتـك بيـن البنـات ثم حلت بي طلاسم شـوق وإحسـاس ٍ عجيـب ................ في هدوء ٍ صافح كفوف الخجل .. وقت السبـات وإبتـدا جـو إرتباكـي بآخـر القصـة يطيـب ................ وإنجلت كل الغيـوم .. وواجـه النـور النبـات إجتمعت من الشتات وقلت : يا (( لفظ الحبيب )) ................ إنتمي للـي تحبـه .. لييـن ياصلـك الممـات |
تطيح من السماء حزمة خيوط تكسر الديجـور
................ ويجمعهـا الفجـر ويخيـط منهـا أول ثيابـه وتبدا ضحكة الأرض إتجلى في ثغـر عصفـور ................ نفض عنه غبار الأمس وأكمل مـا تعنـا بـه وتطرق نسمة الصبح البهي شباكي المكسـور ................ تبي تبدا طقوس من الكـلام بجـو يتشابـه ! تحسب إن الجميع إن قابله بيقابلـه مسـرور ................ ولا تدري عن اللي خافـي ٍ بالقلـب وأسبابـه على العادة حبيس بغرفتـي أرتـب المستـور ................ وفرشي ما وعيت الا بوقع أقدام تاطـى بـه .. أثاريه الفجر يسبر مكـان ٍ مظلـم ٍ مهجـور ................ بوقت إن السواد أخفى ملامـح زخرفـة بابـه يلامس ركني الغايب عن الوعي لثلاث شهـور ................ يريد يفتش أدراج الزمـان ويعـرف مصابـه بغيت أخبره بـإن الوسـاوس تستحـل الـدور ................ ونسمات الهواء راحت تسد الديـن لأصحابـه هناك هناك في صحراء المواجع طبق الدستور ................ على قلب إنجرح وأطلق سراح العين واهدابـه حسافة يالصحيح اللي بدا يشفق عليـك النـور ................ رهنت إسمك لأجل تكفي الغرام بكامل حسابـه وردت من الغضب لين استباحك والسبب مغرور ................ فلت حبل الوصـال وكسـر المجـداف بغيابـه تذكر .. كم تحملت الثقـال الموجعـة مجبـور ................ عشان العشق ورياح الغرام اللـي تهـزا بـه يقولون الأسى يوم ايتسلـل للـورق معـذور ................ لقى حبر العمر مقدي بنفـخ الكيـر وأطيابـه تلفت لي وفي كفه رسايل من زمـان الجـور ................ تبيح من الكنين اللي يهـز القلـب وأطنابـه ! رسالة من سطر واحد عليها من التعجب سور ................ تعبر عن مدى كـره القلـم لمـوادع أحبابـه تذكرنـي إذا تـاه البيـاض بزحمـة الديجـور ................ تذكرني .. إذا شفت النهـار انشقـت ثيابـه ! |
ينام الصوت في حضن المكان .. وهاجسي يفطن
.................. وتطفى شمعة ٍ كانت تسولف لي .. عن أوراقي وأحس إن المساء .. وصّى النجوم بسجتي يطفن .................. لأجل أبقى أنا .. والذاكره .. والجرح .. وأعماقي هنا .. في هالمكان اللي جمعنا من سنين أقفـن .................. على مشهد صبية .. خِيّرت وإختـارت إفراقـي وأنا داري بألاعيب المساء لا شافنـي بأحـزن .................. يرتبلـي مكـان لدمعتيـن .. ويتـرك الباقـي يعرف إني كذا .. ماعادني في هالمكان أصـلا ً .................. أنا راجع .. لـذيك اللحظة اللي جمـدت ساقـي أناظر بالوداع .. ولا معي غير القهـر والـون .................. وكف ٍ لوحتلي من بعيـد .. وخافـق ٍ شاقـي أنا أذكر .. كنت ساكت وقتها لين الهبايب جـن .................. تفتن عن حكي خطواتهـا .. وتضيـق أخلاقـي إلين أثقل على كتفي همومي .. وإرتكيت الظـن .................. لعل اللي وطت ورد الغرام .. تـروف بالساقـي ولا بانت علـى ذيـك الملامـح باينـة أبـدا ً .................. سرت مني هناك وجفّلـت مـن كـان يشتاقـي وهذاني .. بعد مامرت سنين أتذكره .. وأغبـن .................. كأن الجرح أمس .. وملمسـه مـازال حراقـي وكأن الصوت فارقني هنا .. كل مابغيت أحـزن .................. وخلالي مساء وصّى المكـان يفتـش اعماقـي |
توقعت البكى: دمع ٍ يغطـي عورتـه منديـل
.............. وأثاري لمسة المنديل تنقص من علو شانـه تأملت المسار اللي بدت فيه الدمـوع تسيـل .............. إلين إن زلزلت حصن الجفن من ركل بيبانـه دريت إن الحزن قام يتنكر فـي عبـاة الليـل .............. على هيئة عجوز ٍ من بنات الفكر .. غيرانـه تريد من الحشى : بيت المواجع والقهر والويل .............. ولاتملك سوى ترديد جملة (( راحت فلانة )) وأنا ماكان لي حيلة ولا لي بالخفـى تأويـل .............. مغير اغير الموضوع وأستفسر عن إمكانـه تقول إن الغرض ترتيب حفل ٍ صاخب ٍ بالحيل .............. على ذكرى وفاة القلب فجأة في يـد إنسانـة أنا ادري يالعجوز إن الجنازة إطلبـت تأجيـل .............. عساها تلتقي خطـوات بنـت ٍ جِـد شفقانـه لقتني عاشق ٍ كان إيتمنـى للحشـى قنديـل .............. وراحت ... خلفت طفل ٍ يصارع ظلمة أحزانه تسمت قسوة الهجران فيها (( معتقل تكبيل )) .............. تجور ولا نطق عرق ٍ بجسمي قصة لسانـه تقول إن السهم بالمسرحية لاطعن .... تمثيل .............. وهي تمسح بلاط الصدر من قطـرات دمانـه الا يابنت وش جابك على درب الخطا والميـل .............. اكيد إن العجوز اللي (( بنتني )) أهدتك خانـه اجل وش جاب منديل الطهارة ساعة التنكيـل .............. لرجل ٍ ماعرف معنى السعادة وسـط خلانـه يحسب إن البكى : دمع ٍ يغطي عورته منديـل .............. وأثاريه السكون اللي يردد (( راحت فلانـة )) |
يا ليل .. وش حببك فينـي ؟
........ لايغـرك انـي معـك هـادي مابـان لـك رعشـة يدينـي ........ ولا شفت وش بالصدر غـادي وإن كان شد نظـرك عينـي ؟ ........ ومسابـق الـدمـع لـلـوادي لا تخاف .. هذا قضـى دينـي ........ للملح .. يوم أونـس فـوادي أيـام مـا كـانـت سنيـنـي ........ تضحك علـى كثـرة عنـادي كنت أحسـب الغيـم يبكينـي ........ وكل ما إنكسر خاطري .. زادي وكنت أحسب النـاس تغلينـي ........ وتحس .. في كثـرة سهـادي وكنت أحسبك .. ماأنت ناسيني ........ ياليل .. لا عافنـي .. رقـادي أمسي .. وبالظهـر سكينـي ........ وأصبح وأنا جروحي جـدادي ما أقوى على شيـل رجلينـي ........ والناس .. تركض علـى زادي والصاحب اللـي .. يواسينـي ........ صار أول .. ثيـاب الحـدادي كنـا علـى الـدرب ماشينـي ........ ومادري من اللي بدى ينـادي ! لدْ .. وحسبتـه .. يحاكينـي ........ وأثره يقـول : الجفـا بـادي لـي صـوت أظنـه ينادينـي ........ وانت أبخص النـاس ببعـادي ومن ذيـك الأيـام .. يكفينـي ........ أحـزن علـى يـوم ميـلادي حتـى الـسـواد بشرايـنـي ........ والله حسيـت بـه .. عـادي والحين وش حببـك فينـي ؟ ........ مابان لك .. ليه انـا هـادي ؟ |
| الساعة الآن 12:57 AM |
Powered by vBulletin® Copyright ©2000 - 2024, Jelsoft Enterprises Ltd. TranZ By
Almuhajir
HêĽм √ 3.1 BY: ! ωαнαм ! © 2010
new notificatio by 9adq_ala7sas
جميع حقوق النشر لشعارنا و كتابنا ومسميات الموقع خاصة و محفوظة لدى منتديات قصايد ليل الأدبية