 |
منتديات قصايد ليل
(http://www.gsaidlil.com/vb/index.php)
- …»●[الرويات والقصص المنقوله]●«…
(http://www.gsaidlil.com/vb/forumdisplay.php?f=12)
- - رواية ياعيونه بس يكفيني عذاب كامله
(http://www.gsaidlil.com/vb/showthread.php?t=33242)
.....((الجزء السادس عشر))..... كانت في هذيك الليله قاعده شذى ومها في الصاله ببيت أبو محمد ومعهم مريم قاعده...أما ام محمد فدخلت غرفتها ترتاح شوي... مها بابتسامه:أقول شذى كبر بطنك...لا يكون معك توأم؟؟؟... شذى تضحك:لا يا شيخه...أنا مسويه اشعه بس معي واحد... مها:مشالله شكله بيطلع دب...وش كبره... شذى بمزح:قولي مشالله...ألحين بينخفس ولدي... مها تضحك:مشالله...ولا تزعلين يا الحلوه... شذى:مها وش اخبار عمي من زمان عنه والله... مها: أبوي بخير..ودايم يسأل عنكم... مريم دق جوالها إلا تناظر بالشاشه طلع محمد زوجها.. مريم و تتنهد:وأخيرا دق...من العصر ادق عليه وهو ما يرد... مها:طيب ردي قبل لا يهون... شذى:وشوفي بالله وش عندهم بالرياض... مريم هي قايمه وعلى وجهها ابتسامه:افا عليك يا شذى لا توصين حريص.. وقامت وردت على محمد وبعدت عن الأنظار... مها تضحك بصوت واطي:شذى توصين مريم بشغلها..مايصير... شذى:بس تدرين مهاوي..والله من جيت ما عمرها جرحتني بكلمه ولا أذتني... مها:هذي مريم ما يدوم لها حال...حتى أنا مره معي عسل...ومره بصل.. شذى تضحك:خلينا من مريم أستغفر الله الحين تعتبر غيبه..وش فيك هاليومين منتي صاير تزورينا؟؟؟... مها:شغالتي سافرت..وشغل البيت كله علي...والشغل ما يخلص... شذى بنبرة مواسيه:الله يعينك...عاد خالد مره دقيق...ينرفز... مها:هو من ناحية ينرفز من جد ينرفز(تقلده)ليش التلفزيون عليه غبار... ليش القلاص باقي مبلل...ليش مفرش الطاوله عليه اثر فراوله...اخوك لوع كبدي... قعدت تضحك شذى من كلام مها... وما قعدوا شوي إلا تجيهم مريم وبوجهها علامات أخبار مو زينه... مريم بخوف وهي تقعد:تدرون ليش سعود ومحمد سافروا الرياض؟؟؟... مها وشذى: ليش؟؟؟... مريم:والله الخبر ما راح يفرحك يا شذى... شذى والخوف بادي على ملامح وجهها:بسرعه قولي..والله قلبي طاح ببطني.. مريم بقلة حيله:أخوك سعود...طلق بشاير مرته.... شذى بصوت عالي وبإستنكار:إيش تقولين؟؟؟؟... مريم تكمل بنفس المظهر:اخوك طلقها نكايه برجلك تركي...عشان يقول محمد يطلقك... شذى بعصبيه وهي توقف:ومن قال إن هذا حل؟؟؟... مريم ومها:........ شذى تكمل بعصبيه مبالغ فيها:كم مره قلت لسعود..بشاير مالها دخل ما يفهمون...وبعدين كيف يعاقب بشاير على ذنب أخوها... مريم ومها:.......... شذى بعصبيه أكبر:أبله بصراحه سعود...و محمد وهو الكبير يسوي كذا.. . ليش؟؟؟... وما زال الصمت هو جواب مها ومريم..... شذى بعصبيه وخوف:يا ناس انا وتركي مالنا دخل ببشاير وسعود... كم مره لا زم أقول هالكلام...ألحين وش بيصير ببشاير؟؟؟.... مريم بصوت واطي:بس هم سووا كذا عشانك...عشان تتطلقين... شذى عصبت و عقدت حواجبها:ومن طلبهم إنهم يسوون كذا....هذا ماهو حل ليش كذا..ليش..والله حرام...بشاير مالها ذنب..ألحين على بالهم حلوا المشاكل بالعكس زادوها زياده... وبعدها هدت عصبيتها..وبقلة حيله قعدت...وفجأه بدت ملامحها تميل للبكاء والحزن...وبدى صوتها يتهدج بالبكاء... شذى وهي تصيح:حرااام كذا...ليش...بشاير والله لتتحطم..هي مسكينه مالها ذنب... وبعدها قعدت تصيح وتبكي...لمن شافوها مريم ومها هدت...راحوا جنبها يكلمونها ويحاولون يواسونها... على صوت شذى وصراخه جات أم محمد...اللي عرفت السالفه من شذى شخصيا..كانت تقولها ودموعها تسبقها وتقطع صوتها...اللي انصدمت منه ام محمد... وحست بأنه جالب للمشاكل أكثر مما هو بيحلها... بس هذا تهور محمد...أكيد هو الرأس المدبر...الله يهداك يا محمد... |
.....((الجزء السادس عشر))..... بالليل بالفندق في الرياض..كان محمد وسعود ماخذين لهم غرفه... سعود بتفكير:ياربي وش هالنكبه مع اخت سلطان؟؟؟... محمد يضحك:بس والله خويك هذا...رهيب.... سعود بقهر:تضحك طبعا وش عليك...ياخي هذا سلطان ما يفهم..قلت له ما أبي اخته بوجهه بس أبد اكلم جدار انا... محمد يضحك:والأحلى لو تطلع تشبهه هههههههههههههه.... سعود يناظره بحنق زايد...خاصه إن سلطان مافيه من الجمال نقطه... سعود:أقول محمد يا تسكت ولا ترى والله حرة اليوم أطلعها فيك.... محمد فقع ضحك وقاله:ياخي وش فيك زعلان كذا...هذي البديله وصلت وبنفسها بعد... سعود بغيظ:محمد خلاص... محمد وهو يلف ظهره يبي ينام:طيب خلاص بنام...بس أحسن لك تستخير وبعدها يفرجها ربك... سكت سعود وظل يفرك يدينه بعض بعصبيه... محمد يكمل:وبعدين أنت وخشتك لا تنسى إني اخوك الكبير يعني لا عاد ترفع صوتك علي... سعود بخوف و غيظ:ألحين ملزم علي إن بكره نتغدى عنده ولا...ويبيني بعد أمر بكره أشوفها... محمد يثاوب يبي ينام:ربك كريم يا خوي...يالله تصبح على خير... بعد ما نام محمد...ما جا لسعود نوم قعد يفكر بأحداث اليوم اللي جرت بسرعه وتلاحق مجرياتها بسرعه...فراقه لبشاير...وأميره اللي طلعت له بالطريق...بعدها توضا وفرش السجاده..وصلى إستخاره وقيام لله العلي العظيم...عسى اللي بقلبه يخف...وعسى الرحمن ينور له طريقه... خصوصا إن اللي سواه يشوف عن وراه فايده بالنسبه لتركي عشان يتأدب و لأهله بعد...بس شكل محد بياكلها غير بشاير...على طريقة الأباء ياكلون الحصرم والأبناء يضرسون... *** من الصعب أوصف حالة بيت أبو بندر اللي انقلب فوق تحت...كان حزن وبنفس الوقت يحسون بالمهانه...كيف بنتهم تنرفض...وهي الكل يتمناها.. ماتوقعوا هذا الشي...خصوصا بشاير...حمامة السلام بينهم... أبو بندر مع أم بندر بغرفتهم... أبو بندر بعصبيه:الجبان...كيف يرفض بنتي بشاير كيف يتجرأ ويقول ما عاد يبيها... ام بندر كانت تكفكف دموعها على حال بنتها وسمعتها أكيد الحين بيقولون الناس إنه شاف فيها بلى...ولا وش يخليه يتركها هو بنفسه.... أبو بندر معصب بغرفته ويدور كأسد جريح فيها:من جد حقير... ألحين وش بيقول الناس عن بنتنا...وهي مشالله كامله وما الكامل إلا وجهه سبحانه... ام بندر وهي تصيح:يا قلبي عليك يا بشاير...وش حالها وحال قلبها الصغير ألحين؟؟؟..وش بيقولون الناس عنها...حسبي الله عليك يا سعود... ابو بندر بعصبيه :وأنتي ليش قاعده هنا..ما تروحين لبنتك وتهدينها؟؟؟... ام بندر تصيح:من عرفت دخلت غرفتها وهي حابسه على نفسها... وماتبي تفتح لأحد الباب... ابو بندر:طيب لا تسوي بعمرها شي.... ام بندر سكتت وظلت تصيح على حالها.... * * سارا بشهقه وهي تحط يدها على فمها:حسبي الله عليك يا سعود بشاير ما تستاهل... متعب وهو يتمدد:الخسيس النذل...تخيلي يقولها بكل برود..والله ما يستاهل إلا الذبح... سارا بخوف:طيب وبشاير وش صار فيها لمن ردت؟؟؟... متعب وهو يتذكر شكل بشاير بأسى:المسيكينه كانت نازله وهي لابسه ومتكشخه وفرحانه...ولمن قلت لها الخبر...انصدمت بس بدون ما تنزل ولا دمعه وطلعت تركض لغرفتها... سارا:حرام كذا...بس هو كان يحبها..بشاير قالت لي كذا... متعب بصراخ:كذااااااااااب... ما يحبها بس كان يلعب بعواطفها الحقير... سارا:طيب إنت اهدى شوي... متعب:كيف تبيني اهدى بعد اللي صار...تدرين إن بشاير الحين تعتبر مطلقه... سارا بصوت هامس:مطلقه...يا حسرتي عليك يا بشاير... متعب:والله لولا أبوي ولا كان سويت فيهم اليوم جريمه... سكتت سارا..وبدت تتجمع في محاجر عيونها دموع...صدق الطيب ماله نصيب بهالدنيا... |
.....((الجزء السادس عشر))..... فاطمه اللي من درت بالخبر..وهي بس قاعده تسب وتشتم وتلعن في سعود واخته شذى...وتنعتهم بأفظع و أقذر الألفاظ.... فاطمه بعصبيه:أنا كنت الداريه إن هذا الحيوان مامنه خير..بس محد صدقني...ولمن درى إن بشاير ما راح يستفيد من وراها طلقها... ناصر زوجها كان يبي يهديها:فاطمه أهدي الحين انتي وبيصير خير... فاطمه:بس مقهوره يا ناصر...هي كيف تقبل فيه من البدايه ياما حذرتها منه بس إذن من طين وإذن من عجين... ناصر: ما توقعت بصير كذا... فاطمه بقهر:بس أنا متوقعه هالشي..مستحيل هالزواج بيتم...لأن اساسه على طمع...وبعدين حتى اخته شذى مرة تركي تبي تتطلق..لأنها بعد ما استفادت شي.... ناصر: لا حول ولا قوة إلا بالله...وش هالكلام من جدك تتكلمين؟؟؟... فاطمه بغيض لا يطاق:إيه والله من جدي أتكلم...وبعدين أكيد هذي فكرة شذى اللعينه...هي قالت طلق بشاير عشان تركي ينقهر ويطلقها..أعرفها أم اربعه واربعين..محد مثلي كاشفها ولا الباقين مخدوعين فيها واولهم بشاير.. سكت ناصر وهو مستغرب من اللي يسمعه...وحزين لأخت مرته... * * بندر وهي يجلس بحمق: سعود...بعد ما فتحنا له بابنا وقبلنا فيه وبحالته الزريه..يجي يطلق أختي...والله لو كنت موجود كان ذبحته الواطي... عايشه كعادتها تزيد النار حطب: حسبي الله عليك يا سعود...من جد هذي شي ما ينسكت عنه... بندر مقهور:عايشه احس ودي انفجر..والله لو اروح بسعود اعدام ما اهتميت...أبي ابرد حرتي... عايشه:اصلا هالعائله حقيره...حتى اخته ما عاد تبي تركي... بندر بعصبيه:قلعت أخته...وهي من متى همتني...بس القهر اختي... عايشه:حرق قلبكم على اختكم الله يحرق قلبه إنشالله... بندر بعصبيه:تركي لمن يجي من السفر لازم...يطلق اخت الجربان هذا... عايشه:طبعا لازم يطلقها وهو باقي فيها كلام... وبهاللحظه يدخل فارس من برى بهدوء...كانت الساعه تقريبا 12 منتصف الليل... بندر بعصبيه:فارس..توك راجع وين كنت؟؟؟.. فارس اخترع لمن سمع صارخ أبوه...أول مره يصرخ بوجهه.. أول مره؟؟.. فارس يبلع ريقه:هاه..كنت عند خويي... بندر:للحين؟؟؟... فارس يدافع عن نفسه:طيب يباه لا تصرخ علي... بندر بعصبيه:جاوب عن سؤالي بالأول؟؟؟... فارس وهو يطلع فوق يركض:إيه للحين طيب.... بغى يلحقه بندر..بس مسكته عايشه... عايشه تهديه:الله يهداك يا بندر...تحط حرتك بالولد...ما يصير كل هذا عشان السافل سعود...شوف كيف هرب منك... سكت بندر وما علق لأنه يحس إن راسه مشوش... بعد ما طلع فارس فوق...شاف اخوه فواز واقف عند الدرج... فارس بعصبيه:وش فيه ابوك معصب كذا؟؟؟... فواز وهو يفتح عيونه ع الآخر:ما دريت بآخر الآخبار مصيبه صارت؟؟.. * * أبو بندر يدق الباب على غرفة بشاير بس ما فيه رد...وكانت معه أم بندر.. أبو بندر بعصبيه وخوف:بشاير افتحي وانا ابوك.... ما فيه رد...... أم بندر:أخاف صار بالبنت شي؟؟؟... أبو بندر يناظرها بعصبيه وبعدها يدق بأقوى من قبل... أبو بندر:بشاير...افتحي الباب...ولا ترى والله لأكسره عليك.... وبعدها بفتره بسيطه... بشاير فتحت الباب.... بشاير ببرود:نعم يباه؟؟؟... ناظر فيها ابو بندر بتفحص...ما كان فيها أي آثار لبكاء...أو أي شي غريب غير شكلها إنها مصدومه... أبو بندر:وش فيك يابوك أدق عليك ولا تردين؟؟؟... بشاير:مافيني شي...بس إنتوا إيش فيكم؟؟؟... قالتها ببرود وعيونها شبه ناعسه... أبوبندر إستغرب وقعد يناظر بأم بندر اللي هي بعد مستغربه أكثر توقعوا ألحين يلقونها منهاره... أبوبندر بإستغراب:طيب واللي صار من سعود ما زعلك؟؟؟... بشاير بغير مبالاه:اللي ما يبيني..ما أبيه... وبعدها دخلت وصكرت الباب..مو مستوعب ابوبندر وام بندر اللي صار لبشاير..عكس التوقعات...توقعوا إنها منهاره..بس مادروا إنها صدمه قويه لعاشقه من حبيبها..من قوتها ما قدرت تذرف دموعها... |
.....((تابع الجزء السادس عشر))..... محمد يناظر بسعود بإستغراب.... مو معقوله... ما أسرع ما يتأثر... وما أسرع ما يتراجع.... محمد:سعود من جدك تتكلم؟؟؟... سعود وهو يقعد على الكنبه بالفندق:إيه من جدي أتكلم... هذا حياتي يا محمد... مستحيل اخلي احد يتحكم فيها او يفرض رايه علي... محمد بعصبيه:توك تتكلم؟؟؟...وألحين؟؟؟... سعود:صح أنا غلطان إني توني أتكلم ألحين...بس أنا أبي أصلح غلطتي.. ما أبي أستمر بهالخطأ.... محمد:بس أنت طلقتها خلاص... سعود بإبتسامه يحاول يرسمها:لأ باقي ما طلقتها.... محمد بعصبيه:واللي صار أمس ببيت ابوبندر والكلام اللي قلته لهم... سعود:قصدك قلناه...لا تطلع نفسك برا السالفه... محمد:سعود من جدك والله تتكلم...والله ماني قادر أستوعب... سعود يناظره:أقولك وللمره الأخيره...بشاير ما راح اطلقها لو تكون حياتي له ثمن.... بشاير ما صدقت القاها تبني أتركها مستحيل... أصلا انا ما أدري كيف طعتك يا محمد... وين كان عقلي ما أدري.. وين كنت أنا نفسي ما أدري... يمكن تكون غلطه صح..بس والله كبيره... بس أنا فكرت بكلامك امس..ورحت إستخرت ربي وقعدت أصلي وادعي إن الله يفتح لي وينور لي بصيرتي...لقيت نفسي انفر من أخت سلطان ما أبيها... ولقيت نفسي أميل لبشاير اكثر واكثر واكثر...لقيت فكرة انفصالي عنها مجنونه.. شفت نفسي مره صغير... ومره نذل لمن قلت لهم ما ابي بنتكم وهي اللي وقفت في وجه اخوها وزاعلته لمن تزوج على شذى... ماحضرت ملكة اخوها على بنت عمها عشان شذى يا محمد...عشان شذى اللي سويت لها هالشي...وهي اكيد اكثر وحده بترفض وتعارض هالشي...وبعدين بشاير وتركي مستحيل تجمعهم وتحطهم بنفس وحده...ولا تزر وازره وزر اخرى... تركي بحال...و بشاير بحال... وبعدين لاحظ كيف إن تركي مامنع أخته إنها تكلمني او تقاطعني لأن أختي شذى ماعاد تبيه وتبي الطلاق مع إني كنت ضده وقلت له ما عاد نبيك...بس عمره ما دخل هالشي بيني وبين أخته... ليش هو كبير بأخلاقه..وإحنا لأ؟؟؟... مع إن أبوي ربانا ضد اللي نسويه ألحين... محمد بعد فترة صمت طويله وبهدوء واضح بنبرة صوته بس مايدل على الرضا... محمد:ليش ما قلت هالكلام وعاد إحنا بالشرقيه؟؟؟... سعود بندم واضح:محمد ما ادري...بس إنت قلت لي...وما اعطيتني فرصه إني اتناقش معك... وطول ما احنا مسافرين قعدت تذكر لي...حسنات هالطلاق...وكيف إنه تركي بينكسر خشمه...وكيف إن شذى بتطلع من هالظلم اللي هي فيه...ومن اللي أنا شفته من تركي لشذى اقتنعت ولو بجزء من كلامك... محمد:يعني أنا السبب الرئيسي في اللي صار؟؟؟؟.... سعود:كنت احد الأسباب واقواها...ما راح اقول إنت السبب الرئيسي... لأن غبائي وسلبيتي معك هي السبب الرئيسي... محمد:وبعدين؟؟؟... سعود:يمكن طعتك لأنك اخوي الكبير وكنت دايم معي... تعلمت كيف احترمك واقدرك...لأنك ساعدتني لمن أقنعت الوالد إني اسافر برى أدرس واقنعته بعدم زواجي من منال بنت عمي...اشيا كثير مستحيل انساها لك... محمد عصب:سعود.... سعود وقف بعصبيه:محمد خلاص...خل عنك هالديكتاتوريه... لا تصير حجر...وبعدين هذي حياتي الخاصه...يعني لي أولا و أخيراً... وبعدها قعد محمد يتنافش مع سعود برايه المفاجيء هذا... امس كان وش حلوه مقتنع...واليوم ما اسرع ما تغير...كانوا ناويين يروحون المحكمه اليوم الصباح ويطلق سعود بشاير...بس شكل عقل سعود رجع له...وفكر بس وش بيسوون مع اخت سلطان...والأكبر من هذا كله.. كيف ترجع بشاير...اللي يشوفه محمد من سابع المستحيلات... بس سعود يشوف إن هناك بصيص أمل بعيد... * |
.....((تابع الجزء السادس عشر))..... بالغداء راحوا لسلطان كان عازمهم...وبنفس الوقت لقاها سعود فرصه إنه يكلمه إنه بيفصخ الخطوبه من أخته اللي اصلا ما خطبها؟؟؟.... راح محمد وهو معصب من سعود ومن بشاير اللي شكلها ماتبي تفارق قلب اخوه سعود أبد...محمد قال إنه ماعاد له دخل ابد بحياة سعود...وسعود رضا بهالشي.. وقاله خل الامور اللي خربتها انا وانت اصلحها بحالي... وصل سعود ومحمد عند سلطان اللي استقبلهم بحراره وبعد ما قعدوا وتقهووا قعد سعود يتحين الفرصه المناسبه إنه يكلمه عن أخته من دون ما يجرحه... ومحمد ماخذ موقف المتفرج الصامت... وفتح سعود الموضوع مع سلطان اللي تفاجأ من كلام سعود اللي حس إنه صاحب انحس حظ بالعالم... يفسخ خطبيتين له على يومين على التوالي كان كذا يقول لنفسه بسخريه...يشوف نفسه زير للنساء ومحطم لقلوب البنات... بدون ماتكون نياته بالأصل كذا... سلطان:من جدك تتكلم يا سعود.... سعود بحرج بس بثقه من جد مايبي يخسر بشاير: سلطان والله إنكم نسب ماينرد... ولو ماكنت خاطب كان خذيت أختك بس مثل ماقلت لك أمس باقي قلبي معلق ببنت أبو بندر... سلطان من دون ما يستوعب:بس طلقتها انت... سعود:شرعيا باقي هي زوجتي..لأني ماقلت لها إنتي طالق..ولا طلقتها.. كل اللي قلته لهم أمس إني ماعاد أبي بنتكم...بس قانونيا هي زوجتي.. سلطان:يعني؟؟؟... كان يقولها سلطان وهو مبهوت...يحس بإراقة ماء وجهه...وسعود كان حاس فيه...ومتعاطف معه بنفس الوقت...بس من ألحين مستحيل يخلي أحد يأثر بحياته الخاصه وبالأخص بالإنسانه اللي ملكت قلبه وعقله وروحه... سعود يحلف:والله إن اختك يا سلطان من اطيب بيوت الرياض هذا إذا ما كانت السعوديه بكبرها...بس مثل ما قلت لك أمس مافيه نصيب بيني وبينها وقعد سعود يتكلم معه إلين ما اقنعه...بس سلطان من نفسه حس إنه تسرع وهذا جزاته...خصوصا إن أميره اخته عصبت وبينت له مستحيل تاخذ واحد هي معروضه له لأنه بيحس برخصها... وبعد الكلام مع سعود...رضى سلطان وبين لسعود إنه بيعتبر إنه ماصار بينهم أي شي من هالكلام...وسعود وضح له إنه مستحيل يأثر هالشي بصداقته...وبعدها تغدوا عنده...وقبل لا يطلعون... سعود:هالله هالله في نفسك يا سلطان وفي اهلك..وإنشالله يعوض اختك باللي هو احسن مني بألف مره... سلطان:ولا اوصيك إنت بعد في نفسك...وإنشالله بنت ابوبندر ترجع لك يا الغالي...ولا وين بتحصل مثل سعود؟؟؟... ابتسم سعود لرفيقه وخوي دربه...وسلم عليه وطلع بعدها هو ومحمد على الشرقيه راجعين لأنه حس من التهور إنه يروح يكلم ابوبندر اليوم لأنه أضعف الإيمان الشي اللي بيسويه إنه يشوته(يطرده) مع الباب... رجع وهو يفكر بردة فعل أمه...وأخته...وتركي...وبالأخص قلبه النابض بشاير.... *** بعد صلاة العصر... كانت فاطمه و عايشه جايين لأم بندر عشان اللي صار لبشاير... المفروض يجون يهدونها هي وبشاير...بس كعادتهم الذميمه يزيدون الطين بله... فاطمه:ياما قلت لكم وياما حذرتكم من هالسعود..بس ماتسمعون... عايشه وكأنها منقهره:حسبي الله عليك يا سعود...ولا وين بيلقى مثل بشاير... أم بندر والحزن مرسوم بعيونها:ما احد حاس ببشاير.... فاطمه:كلنا حاسين فيها...بس تذكرين لمن خطبها وجيت أحذركم منه..بس بشاير عصبت وقالت مالكم دخل... أم بندر:هالكلام مامنه فايده ألحين... عايشه بإستفسار:وين بشاير يا عمتي؟؟؟.... ام بندر:فوق بغرفتها..لا تبي أحد يكلمها..ولا تبي تكلم أحد..ولا تبي تنزل.. فاطمه:بأطلع لها؟؟؟... وقامت وطلعت فاطمه لبشاير.... بعد ما طلعت قالت عايشه لأم بندر:والله امس يا عمتي إن بندر عصب مره بالحيل؟؟؟.. أم بندر:ومن ماعصب؟؟؟.... عايشه:طيب وش ردة فعل تركي لمن درى؟؟؟... ام بندر بحزن:للحين ما درى؟؟؟...بس هو بكره بيرجع... عايشه:ما كلمتيه وقلتي له؟؟؟.... ام بندر:إلا كلم ابوه امس..بس ما قاله..بيقوله لمن يرجع.... عايشه:والله عندي إحساس يا خالتي يقولي إن شذى لها يد بالسالفه... سكتت أم بندر...وهي باقي قلبها مشغول على بشاير... بعدها بفتره بسيطه جاتهم فاطمه... أم بندر:هاه يا فاطمه...كلمتيها؟؟؟... فاطمه وهي تلتقط انفاسها:يمه...بصراحه أحس بشاير ماهيب صاحيه... خافت ام بندر من كلام فاطمه..وعلامات الإهتمام بدت على وجه عايشه.. فاطمه تكمل:لمن دقيت عليها ماردت..وبعد مافتحت لي كلمتني ببرود وكأنه عادي عندها اللي صار..وبعدها دخلت تقول تبي تذاكر... ام بندر:يا ويل حالي على بنتي... عايشه:أقول فاطمه..ماتحسين إن شذى لها يد بالسالفه... فاطمه بغيظ:مو احس إلا متأكده...أكيد هي تبي تحر تركي قامت و خلت أخوها يطلق بشاير...تبي تقهرنا وتبرد حرتها... أم بندر:وش دخل تركي ببشاير؟؟؟... عايشه:ما يبيلها تفكير يا الغاليه..لأنه لمن تركي خطب سلمى اختي تبي تقهره خلت اخوها يطلق بشاير اللي تصير اخت تركي لأنها تبي تقهرنا كلنا.. فاطمه:ولأن تركي بعد ما يبي يطلقها..وهي ماعاد تبيه...لأنه مثل ما قلت لكم لمن شافوا إنهم ما إستفادوا مننا...قالوا خلاص خل نفتك منهم... أم بندر وهي مستغربه من هالكلام:معقوله شذى تفكر كذا؟؟؟... عايشه بمكر:ياما تحت السواهي دواهي..بس إنتي الطيبه بزياده يا أم بندر.. وبعدها قعدت فاطمه وعايشه على راس أم بندر..يملونها بأكاذيبهم الباطله وتوقعاتهم الخاطئه...إلين ما اقتنعت ام بندر بكلامهم..وراحوا من عندها وهي قلبها..مليان بالكره لشذى والحقد... |
.....((تابع الجزء السادس عشر))..... مع غربة الشمس...واختفاء خيوط ضؤها...الحمره فاصل بين الليل وآخر النهار...وصل محمد وسعود للبيت... محمد وسعود اللي كانوا قافلين جوالاتهم...لأنهم عارفين وش ينتظرهم...اكيد سيل من الإنتقادات... والإتهامات... أم محمد بسخريه:هلا والله بعيالي...هلا باصحاب الشغل المهم والسري... محمد:هلا يمه... سعود:هلا مامي... ام محمد:مامي في عينك انت وياه...وش اللي سويتوه بالرياض؟؟؟.. سودتوا وجهينا سودا الله وجيهكم... سعود:لا تدعين علينا يمه لا يوافق دعائك وقت استجابه الحين... أم محمد بعصبيه:إنت بالذات يا سعود لا تكلمني... سعود:افا...ليش يمه؟؟؟... ام محمد باستغراب مع عصبيه:ويسوي نفسه مهوب عارف ليه... واللي سويته مع بشاير؟؟؟... سعود:وش سويت انا؟؟؟... ام محمد:مارحت لأهلها وقلت إنك ماعاد تبيها وطلقتها...وليش تقفلون جوالاتكم يا جعلكم اللي مانيب قايله... سعود:اول راح اجاوب على سؤالك الثاني..جوالي(يكذب) قفل مافيه شحن وبعدين شركة الجوال الله يهداهم مهوب حاطين لنا بث... أم محمد:وجاوبني على باقي السؤال لو سمحت؟؟؟... سعود:هو نصه صح والباقي غلط...اولا انا صدق قلت لابو بندر ماابي بنتك...بس إني ماطلقتها باقي ومستحيل اطلقها... ام محمد:ما تتكلم يا العاقل يا البكر يا الكبير؟؟؟... ناظرها محمد وهو يبتسم بسخريه لأنه عرف إنه هو المقصود:وش اقول؟؟؟... ام محمد:على هالهبال اللي مايرضاه لا مسلم ولا كافر في بنت ابو بندر وانا متأكده مثل ما انت ولدي إنك صاحب هالفكره... محمد:صدق إني صاحب الفكره...بس الحين طلع الامر من يدي... ام محمد:يعني انت راضي يا محمد؟؟؟... محمد بعناد:إيه انا صاحب الفكره...انا ابي احرق قلب تركي على اخته واخذت سعود على هالاساس...سعود راح معي وكنا بنطلقها خلاص بس للأسف ولدك غير رايه بالصبح لمن بغينا نروح المحكمه عشان نبتدي إجراءات الطلاق و... ام محمد تقاطعه بعصبيه:إسكت ولا كلمه...أفا عليك يا محمد...أفا عليك يا ولدي...أفا عليك يا ولد فيصل... محمد بعصبيه:والله اتوقع إني ماسويت شي غلط... ام محمد:محمد؟؟؟...كل اللي سويته وللحين ما انت راضي إن الغلط راكبك من راسك لأساسك... محمد:وين الغلط يمه؟؟؟...بغيت تركي إنه يعرف إن إحنا مهوب هينين... وأخته ما نبيها... سعود:لحظه يمه...اقول يا اخ محمد إنشالله هي زوجتك وإحنا ماندري... ترى بشاير زوجتي أنا... يعني القرار لي انا وبس... محمد:سعود... سعود بضيق:سعود وسعود..نعم وش تبي..لا يكون قلت شي خطأ في لحضرة جنابك... سكت محمد وقعد يخز سعود... ام محمد:والله يا سعود إنك باللي سويته جنيت على نفسك وعلى أختك بعد إذا كنت تظن إنك ساعدتها.. وإذا تتوقع هي بتشكرك بالعكس زعلانه بالحيل عليك... سكت سعود و محمد اللي كل واحد تفكيره رايح بجهه ثانيه محمد مقهور على نص خطته خربت...و سعود مشغول بكيفية تكفير خطايا الأمس... لأن اللي سواه مهوب من اطباعه... *** هل من الممكن أن اوصف لكم جرح بشاير صعب الإلتأام...كانت طول اللي صار أمس واليوم وهي مهوب مصدقه سعود يسوي فيني كذا مستحيل؟؟... طيب أنا وش سويت له؟؟؟... ما بينا حب؟؟؟... مابينا عشق؟؟؟... ما فيه أي روابط تجمعنا؟؟؟... وين أيامنا اللي راحت؟؟؟...يمسيني بحب...ويصبحني بحب أكبر... عيشني بعالم وردي...وشكلي بأنتقل لعالم رمادي... ما كانت مصدقه تحس اللي صار اكبر من إنها تستوعبه... كانت تحس بجفاف دموعها...تحس بالعبره خانقتها طول ماهي عارفه من دون ماتقدر تطلعها... معقوله سعود هذا... اللي حبيته...وعزيته...طيب ليه يسوي فيني كذا؟؟؟...لا يكون بس عشان تركي اخوي؟؟؟...لا لا لا مستحيل...سعود طول عمره يحرص علي إني ما أتدخل بينهم...ولا هو يتدخل...وبعدين ليش يتركني؟؟؟... ليش يرفضني ...ليش وش اللي فيني؟؟؟...الحين أنا بشاير بنت عبدالله انرفض؟؟؟... وهو اللي يقول ما يبيني....الناس وش بتقول...وش راح تحكي فيني...سعود جرحها بدل الجرح جرحين...حست بأن الهوا ما عاد يكفيها حست بالإختناق...راحت تسحب لها نفس عميق واحد ورى الثاني... كان ودها تصيح بس ما فيه دموع...تبي تفرغ بركان من الأحزان والغضب من داخلها...حست بالحزن...لأن اللي توقعت إنه بيكون سبب سعادتها... صار سبب لتعاستها وجرحها بأكثر من جرح...صعب إنها تطيب... جرحها بقلبها في الصميم لمن تركها فجأه ومن دون أي مقدمات... وجرحها في كرامتها لمن رفضها...وهي اللي كثير يتمنون قربها...هو اللي رفضها مهوب هي...تحس بالمهانه الشديده كأي أنثى تنرفض وتنرد... وبتنجرح أكثر من كلام الناس...ليه إنرفضت؟؟؟....وإيش شاف فيها؟؟؟... وليه هو اللي تركها و مو هي اللي تركته؟؟؟...وكلام كثير..هذا غير الشائعات اللي بتنطلق من هنا وهناك....عمر بشاير ما توقعت إنها تصير بهالموقف... وصدق كلام فاطمه إنه طمعان فيني؟؟؟... وإنه قطني لأنه ما إستفاد مني شي؟؟؟....الحين أكيد بتتشمت فيني هي وكلهم لأنهم حذروني منه.... حست بالدوخه والتوتر من كثر هالأفكار اللي تدور براسها.... |
.....((تابع الجزء السادس عشر))..... وصل تركي من سفرته...وهو حاس إنه صاير وراه شي...من نبرة أبوه معه... خاصه وهو يعجل عليه بالرجعه...كان مخطط إنه أول ما يرجع.. يروح يزور شذى وما يرجع إلا معها...راح لأبوه وأمه وبعد ما سلم عليهم وقعد معهم لأنه جاهم بالاول قبل لا يروح حتى بيته...بعدها سمع من امه وأبوه كل اللي صار...انصدم من اللي قاعد يسمعه...مو معقول؟؟؟... بعد ما خلص ابو بندر من كلامه... تركي وهو باقي مهوب مصدق:ماني مصدق عن سعود سوى كذا ببشاير وهو يحبها... أم بندر بعصبيه:ما يحبها...قصدك يحب فلوسها... ناظر تركي امه بإستغراب.... تركي:وش يحب فلوسها الله يهداك يمه؟؟؟... أم بندر بعصبيه:قليل الخاتمه...كذا يسوي باختك...اكيد محد حرضه على هالشي إلا مرتك السوسه شذى...هي اللي قعدت وراه إلين ما طلقها يا جعلها الماحي... تركي بتعجب:وش دخل شذى ألحين يمه؟؟؟... ام بندر:كيف مالها دخل... ابو بندر يتكلم:بصراحه يا تركي اللي صار ما ينسكت عليه أبد... تركي يناظر ابوه بإهتمام... ابو بندر يكمل:يعني سعود جا وقال إنه مايبي اختك وطلقها من دون سبب الحين وين اودي وجهي قدام الناس لمن يعرفون عن بنتي مرفوضه ومطلقه.. تركي وهو يفتح عيونه بعصبيه:يعني خلاص طلقها... ابوبندر: إيه بيطلقها خلاص...جاء بقواة عين وقال ماعاد يبيها وش تبي دليل اكثر من كذا؟؟؟... تركي:طيب وش سوت بشاير لمن عرفت؟؟؟... ام بندر:مصكره على عمرها الباب...وما تتكلم مع احد....وحزينه بالحيل يا تركي... إنقهر تركي وارتعف ضغطه من حركتهم...كفايه هم شيون معه عشان شذى...ألحين دخلوا بشاير بالسالفه... تركي بعصبيه:سعود النذل...كيف يسوي في اختي كذا؟؟؟...والله ما اخليها له...وراح يعرف دواه عندي... ابو بندر:يعني وش راح تسوي؟؟؟... تركي بعصبيه وبقهر واضح ومتجلي على ملامح وجهه:أوريه...وباخليه يعرف كيف يرفض بشاير... |
.....((تابع الجزء السادس عشر))..... دخل سعود غرفته وهو تعبان وراجع من برا...كان يحاول يطلع من دائرة الحزن وعقدة الذنب اللي هو فيها...بالطلعه مع اخوياه...راح وخذا له شاور وبعدها طلع...وراح يتمدد على فراشه يبي ينام...أول ما غمض عيونه دق باب غرفته... سعود:مين؟؟؟... سمع صوت شذى...خلاها تدخل... شذى واقفه عند الباب باين عليها إنها كانت تنتظره:ممكن أدخل واقعد معك شوي؟؟؟... سعود يناظرها:وإذا قلت لأ؟؟؟.... شذى تناظره بعصبيه...دخلت وصكرت الباب وراحت قعدت على كرسي طاولة الكمبيوتر.... شذى بعصبيه:لأ مو على كيفك...أنا من متى وأنا قاعده انتظرك... لازم اتكلم معك.... سعود كان تعبان...إكتفى إنه يناظرها وهو منسدح... شذى إنقهرت منه: سعود...قوم كلمني واقعد لا تكلمني وانت منسدح.... قام سعود وقعد وهو يتأفف.... سعود بتأفف:والله إنك رايقه..جايه آخر الليل وتبيني اتناقش معك... الصراحه مافيني شده على الحوار معك...عشان كذا تعالي بكره الصباح و نتكلم بكل شي تبينه... شذى:عشان تقعد تضحك علي وأقوم والقاك طالع...ولا نايم...لا ما فيه انا أشوفه إنه الحين الوقت المناسب... سعود:امري لله قولي وش عندك؟؟؟.... قامت شذى وراحت جلست متربعه على السرير بجنبه.... شذى:الحين ممكن اعرف وش السبب اللي خلاك تطلق بشاير؟؟؟... سعود:يعني للحين ماتعرفين ليش؟؟؟... شذى:للحين ما اعرف...قولي انت؟؟؟... سعود:عشانك إنتي طال عمرك....عشان يطلقك رجلك ونفتك منه... شذى بإنفعال وعصبيه:كيف تسوون هذا كله من وراي... سعود:والله آسف إني ما خذيت الأذن منك طال عمرك قبل لا نروح مهوب انتي الكبيره.... شذى تناظره:لا تقعد تتطنز انت وخشتك...قولي الحين ليش إنت سويت كذا مع بشاير؟؟؟.... سكت سعود ومالقى رد... مسكت شذى يده وخلته يلف إتجاهها ويتربع قبالها على السرير... شذى بهدوء:سعود تكلم...عمري ما شفتك سلبي كذا؟؟؟... سعود:يعني انا الحين تتوقعين سلبي؟؟؟... شذى:سلبي إذا كان ماعندك سبب للي سويته غير طاعتك لمحمد لمن قالك كذا... سعود:شذى...عمري ماكنت ضعيف مثل ألحين... شذى:طيب قولي وجاوب على سؤالي...وش الأسباب اللي كانت عندك خلتك تطلق بشاير... سعود بإنفعال:أنا ما طلقت بشاير...بس قلت لهم ماعاد أبي بنتكم... شذى:مسوي لي فيها بريء...المهم قولي ألحين عندك أسباب خلتك تسوي كذا؟؟؟... أومأ رأسه سعود بالإيجاب...كان مثل يفكر يبي يرتب ويحضر افكاره عشان يقولها... أما شذى سكتت وقعدت تناظره بترقب و إنتظار لسماع تبريراته... سعود يتكلم:الصراحه يا شذى بأقولك الأسباب واتمنى إنك ماتقاطعيني بكلامي أبد... شذى وهي تحط يدها على فمها:اوعدك ما أتكلم إلا إذا طلبتني... سعود تعب من التفكير وقرر إنه ما يرتب كلامه يقوله كذا بدون تنسيق أو تنميق... سعود وهو يناظر بعيون شذى والألم مبين في عيونهم الإثنين: بصراحه يا شذى...أنا كنت مقهور من تركي إلى حد كبير...كان يقهرني ليش يتركك هنا لشهور وهو هناك يسرح ويمرح في الرياض...ومع من؟؟؟...مع الحبيبه بنت عمه سلمى...كانت بشاير من سوالفها تقولي عن هذا كله... تقول إن تركي بإستمرار يزور بنت عمه... هذا غير المكالمات اللي توصل بينهم الإثنين بأنصاف الليالي...طبعا بنت عمه سلمى هذي...كانت تتبجح بهالمكالمات بإجتماعات العائله...كان يقهرني بهالشي... عشانك اختي وحرمته وحامل..ما يسأل عنك كثير...أنا كنت انقهر وأفور... غير هذا كله كانت تقولي بشاير لازم إن شذى ترجع...وبأسرع ما يمكن... لأن العائله هناك كلها...كانت تطالب تركي إنهم يطلقونك...إذا كنتي ما تبين ترجعين.. غير هذا كله... كانت العائله مقرره إنه يكون زواج تركي من سلمى بعد عيد الفطر بأسبوع....او اكثر المهم إنه يكون بعد زواجي... وقالت لي بشاير إنه بكذا لازم ترجعين.... سكت سعود...سحب له نفس...حس إن الكلام اللي قاله أخذ منه طاقه... وطاقه كبيره بعد... شذى اللي كان كلام سعود لها مثل اللي ينكأ جرحها...إكتفت فقط بالنظر لأخوها عشان يكمل... سعود يكمل بنفس ما إبتدى:تعرفيني...الحميه قامت عندي...كان الدم يفور بعروقي من القهر...مقهور من كل شي حولي... بصراحه يا شذى ومن دون زعل...انا كنت في قرارة نفسي ما ابيك تطلقين... وكنت اخاف أقولك هالكلام...تظنين إني أقوله عشان إني أبي الفكه منك وإنك مضايقتنا... وأنا والله ما كنت بأقوله إلا لسببين...لأن ابوي كان رافض رفض قاطع طلاقك من ملك تركي عليك...وكان رافض حتى إنه ينفتح هالموضوع قدامه... والسبب الثاني واللي أنا متاكد منه إنك تحبينه...بس مع هذا كنت لمن اشوف إصرارك على الطلاق أصر معك...لأن الإنسان الشريف مهما يحب و مهما يعشق...كرامته عنده فوق كل شي...محمد لمن عرض علي الفكره إني اطلق بشاير...إستغربت...إلا انصدمت...وقلت أكيد محمد انهبل... بس بعد ما تناقشت معه شوي وبين لي بعض الحسنات إذا سويت اللي قال لي عليه من إن تركي بينقهر وبيحس باخته مثل ماحسينا فيك لأنك أختنا... وأنا كنت أبي العائله هناك بعد تنقهر وتعصب وتحس بعقدة الذنب اللي كانوا سبب في اللي إنتي فيه...وصار ببنتهم...كلهم...مقهور...ليش يطالبون بطلاق اختي....ولو كان هذا بطلبك...بس ابغض الحلال عند الله الطلاق... فكرت وقلت ليش ما أسوي اللي قاللي عليه محمد...بس من دون ما اطلقها طلاق رسمي...يعني ما اروح المحكمه واطلقها. |
.....((تابع الجزء السادس عشر))..... قلت لا بس أسوي تمثيليه قدامهم كلهم...بس في الاخير بعلق بشاير كم شهر...واراجعها... وكنت واثق إنها بترجع لأنها تحبني وأحبها...وخصوصا إذا عرفت الدوافع والأسباب اللي خلتني اسوي كذا...بس لمن وصلنا بيت أبو بندر... خفت ورجفت...وقلت بنفسي...لا يصير كل شي واقع يعني صدق بغيت أتراجع عن كل شي بس محمد سحبني معه...كنت مثل المنوم مغناطيسيا... أو خلينا نقول مسطول....لأني من جد كنت مسطول لأني سمعت كلامه... بعد ما دخلنا مجلس ابوبندر حسيت بالخوف اللي بدى يرعد بكل أوصالي... خفت...ما خفت من أحد...بس خفت إن الطلاق يتحول لواقع... وبالفعل تكلمنا...أحس كأنه كابوس....تلاسن محمد مع متعب اخو تركي... تقريبا كنت ساكت...ومحمد اللي يتكلم عني...حسيت إني بترك بشاير صدق مع إن كل اللي أسويه تمثيليه...يعني إستحاله أطلق بشاير...بس هذيك اللحظات قلت بنفسي خلاص أنا طلقت بشاير...خلاص بشاير ماعادت لي...وطلعت من عندهم وانا ابكي يا شذى...ولا تستغربين إذا دريتي...بكيت لأني حسيت إنها خلاص ضاعت من يدي...ورحنا لسلطان خويي....و بغى يسوي لي فيها فزعه..وقال لي لك أختي...انتفضت وخفت...بعد ما رحنا الفندق كنت محتار أكمل اللي سويته واطلق بشاير وبعدها آخذ اخت خويي ولا أرد أخت سلطان...واراجع بشاير...فكرت وتعبت...بالنهايه إستخرت... ماخاب من استخار....ارتحت للقرار الثاني...واعتذرت لسلطان عن اخته... وقررت إني اكمل مشواري...إني أراجع بشاير...بس لعل وعسى إن تركي واهله يتأدبون....عن اللي كانوا يفعلونه فيك....لأني مره كنت راجع متأخر ولمن دخلت وقبل لا انام رحت المطبخ أبي مويه وسمعتك تكلمين تركي وكنتي بالصاله تحت...سمعتك تكلمينه وأنتي تبكين...تشكين وتشتكين... تعاتبينه على افعاله السابقه معك...وإنه بنت عمه ماخذه كل تفكيره..وإنتي بالظل.. وانا ماحبيت لك الظل يا شذى... ناظرت شذى أخوها بنظره حنان:كل هذا عشاني يا سعود... هز راسه سعود بنعم.... شذى:بصراحه يا سعود ما أدري وش اقولك...بس بصراحك... أحس من الصعب إلا المستحيل إن بشاير ترجع لك... سعود:بس أنا أشوف إنه باقي فيه أمل....ولو ضعيف... إبتسمت شذى لأخوها وقامت تبي تطلع لأنها حست إنه تعب وهو يتكلم... تبيه يرتاح...وهي بعد تبي ترتاح... شذى:إنشالله ترجع... راحت شذى من عند اخوها...وهي تفكر بكلام سعود عن تركي وسلمى ومكالماتهم وزياراته لها...حست بالعذاب اللي يكتوي بقلبها.... حست بالحزن...أكيد إنه الحين المتيم في هواها...تارك العالم لعيونها... أما سعود حس بالراحه شوي لمن فضفض عن اللي بقلبه...حط راسه على المخده...نام وبشاير تسبح وسط أحلامه... باليوم الثاني...سوى ابو بندر إستدعاء طارئ للعائله كلها...عشان يشوفون حل باللي صار مع بشاير...خصوصا إنه كان ينتظر حضور تركي...مو هو النسيب...والقريب جدا لعائلة ابو محمد لأنه ماخذ بنتهم... |
.....((تابع الجزء السادس عشر))..... متعب بعصبيه:طبعا يا تركي بتطلق بنت ابو محمد؟؟؟.... ابو فارس بندر:اكيد..مثل ما سوى بأختنا...نسوي باخته... متعب:الحقير.... خل يشوف من إحنا... تركي يناظرهم بتحدي:مستحيل أطلق شذى... أبو بندر:وإذا قلت لك طلقها يا تركي... تركي يناظرهم بحيره مع إنه حاقد على شذى...بس ما ينكر حبه الجنوني لها... تركي:يباه الله يهداك وش دخل هذا فيذا؟؟؟... ابو بندر:مثل ما قالوا اخوانك...وهو كما تدين تدان... تركي:شذى لا تدخلونها بالموضوع...إنتوا بس عليكم بسعود... متعب عصب:يعني كيف يا تركي؟؟؟...طلق اخته وفكنا ياخي... بندر:بصراحه يا تركي...مو حلوه بحقنا إنهم يهينوننا بأختنا... وإحنا بنرد لهم فعلتهم باختهم...وش تبي الناس تقول عنا... متعب معقد حواجبه:تركي بالأول كنت ما أدخل بينك وبين مرتك بمشاكلكم بس لمن وصل الأمر لبشاير...ماراح أسكت...وما برضى المذله على أختي إذا كنت ترضاها... تركي عصب:متعب...حتى أنا ما أرضى المذله على أي واحد من اهل بيتي سواء اختي او غيرها...بس شذى مالها دخل... أبو بندر:تركي...بعدين معك؟؟؟... تركي حس إنه لازم يساير اهله...بس من دون ما يخسر شذى مع إنه حاقد عليها بقوه... تركي بدهاء:طيب يباه إنت قلت لي...إن سعود لمن جا شكله متردد... أبوبندر:وش دخل هذا هاللحين؟؟؟... تركي:و محمد اللي كان واثق وجاي يتكلم عن سعود مع إن سعود قاعد... متعب:أنا كنت موجود...وكلامك صح يا تركي بس وش تقصد؟؟؟... تركي بثقه واضحه في كلامه:أنا كنت متأكد عن محمد ورى السالفه..وهو كان يبيني أطلق أخته بس أنا أرفض... سكت تركي وقعد يناظر بوجوه اخوانه وابوه اللي كانوا منتبهين لكلامه... تركي:هو عاد لقاها فرصه إنه يجيني عن طريق بشاير وسعود..عشانه يبيني أنقهر وأرجع واطلق اختهم...بس معصي أطلقها... متعب بضيق:ياخي طلقها وفكنا... بندر:طلقها يا تركي واترك هالعايله عنك...والله ماوراهم إلا المشاكل... تركي يناظرهم وبإصرار أكبر:يا جماعه أنتوا تفهمون عربي... قلت لكم والله ما بطلقها...(وبعصبيه)والحين صايره المسأله عناد عندي... متعب عصب:عناد لمن يا تركي؟؟؟... |
.....((تابع الجزء السادس عشر))..... تركي عصب بعد هو:عناد لكم...وعناد لأهلها...انا أكره ما يجيني إن أحد يتدخل في حياتي الشخصيه...فرجاء لا تتدخلون... أبوبندر بهدوء:خلاص بنشوف وش بتسوي يا تركي... تركي:بتشوف اللي يعجبك يابو بندر..إنشالله.. *** كانت أم محمد قاعده مع محمد ولدها... ام محمد:ممكن اعرف ليش سويت كذا يا محمد؟؟؟... سكت محمد وما رد.... أم محمد:ليش ما ترد يا محمد؟؟؟... محمد:لأني عارف إن ردي ما بيعجبك... أم محمد:بس أبي أسمع تبريرك...انا انتظرتك كم يوم عشان تهدى وبعدها بأشوف وش بخاطرك... محمد:بصراحه تركي قاهرني..وقلت لازم أعلمه الصح...وبعدين فكرت كيف نفتك منه..وهو ما يبي يطلق شذى...وهي اصلا تبي الفكه منه ومسوي لها أزمه... وبعدين مالقيت غير هالحل قدامي... ام محمد:وش خلاك تفكر بسعود وبشاير؟؟؟... محمد:أجرحه بنفس المكان اللي جرحني فيه... أم محمد بحسره:ألحين هذي تربيتي فيك يا محمد؟؟؟... محمد بتفكير:يمه...انتي اكثر وحده تعرفيني يجن جنوني لمن أحد يغلط علي انا او احد من اخواني...وتركي ياما غلط على اختي بس الحين لازم ياخذ جزاه هو... ام محمد بانفعال:إنت عليك بتركي...بس بشاير ابعدها عنه... مسكينه وش السبب اللي سوته غير إنها أخته... محمد:بس يمه أنا ماعاد قدرت أتحمل أشوف دموع اختي... ما عاد قدرت أشوف نظرة الحزن اللي ساكنه بعيونها... ام محمد وهي تربت على كتفه:أنا اكثر ما يعجبني فيك يا محمد حميتك على خوانك وإنك ماترضى عليهم...بس ما يعجبني فيك تهورك ياولدي... محمد:ألحين لمن بغيت افك شذى من المشاكل اللي هي فيها صرت متهور؟؟؟... أم محمد:الله يهداك بس يا محمد... محمد:طيب ألحين شذى زعلانه؟؟؟... أم محمد:هي زعلانه على بشاير....تقول مالها ذنب ومحد كان موقف معها وهي بالرياض غير بشاير..محد كان يزاعل تركي على افعاله غيرها... محمد:يعني مهيب راضيه؟؟؟... أم محمد:أبد مهوب راضيه... سكت محمد وقعد يناظر بوجه أمه..وهو يحس من الداخل بكبر غلطته بس غروره واعتداده بنفسه رفض إنه يفصح هالشي....غلطته كانت بالنسبه له إنه ما إستشارهم...بس اما عن طلاق بشاير وسعود فكان مقتنع مئه بالمئه إنه مهوب غلطان...بالعكس فكره روعه وخطيره جدا جدا... * * راح محمد و نادى شذى اللي كانت قاعده مع بناته تلعب معهم بالمكعبات... محمد وهو يجلس على الكنبه بالصاله اللي كانوا قاعدين فيها:شذى... شذى وهي تناظر فيه:هلا... محمد: تعالي اقعدي أبيك بسالفه.. شذى وهي تترك اللي بيدها وتقوم:هلا يا محمد بغيت شي؟؟؟... محمد يبتسم لها:لا بس حبيت ادردش معك شوي... راحت شذى وجلست قباله... محمد يناظر ببناته اللي يلعبون:شذى إنتي باقي زعلانه من اللي صار مني؟؟؟... سكتت شذى وماقدرت ترد...لأنها من جد باقي زعلانه... محمد:يعني افهم إنك باقي زعلانه...شذى ترى كل اللي سويته عشانك... شذى بإنفعال تلقائي:بس يا محمد طريقة علاجك للمشكله خطأ...خطأ إنك تدخل عناصر مالها دخل ولا غلطت بالمشكله... سكت محمد وقعد يناظرها...بهاللحظه حس إن طريقة علاجه للمشكله خطأ بقوه... محمد:يعني الغلط راكبني من ساسي لراسي؟؟؟... صعب على شذى إنها تقول لأخوها اللي يكبرها 14 سنه إنك غلطان... شذى تناظره بأسى:محمد أنا مقدره شهامتك وموقفك من مشكلتي...بس بشاير مالها دخل... محمد بضيق:خلاض يا شذى إذا إنتي وسعود ماعاد تبوني أتدخل بمشاكلكم اوعدك من هاللحظه ماعاد أتدخل أبد... شذى وهي تشد على يده:محمد لااا...لا تقول كذا...انا وسعود من لنا غيرك بعد الوالد الله يرحمه...إنت أخوي و ابوي و عزوتي كلها يا محمد... محمد إبتسم بحنان لشذى...عرف إنه تعجل شوي...بس هذا لا يحول بينه وبين أخوانه...اللي ما عاد لهم غير بعض... *** ببيت أبو بندر...كان تركي جاي عشان يشوف بشاير اللي من جا ما شافها ..ورفضت هي إنها تنزل...بس هالمره ما جا إلا عشانها هي...هي وبس بعد ما سلم على أمه وقعد معها 5 دقايق طلع لبشاير...أبوه كان بالمكتب.. طلع لها فوق لغرفتها...دق الباب مافيه رد.... رجع ودق الباب مره ثانيه عليها... فتحت الباب وناظرته إستغربت إن تركي يطلع لها... بس اكيد عشان اللي صار... بشاير بإبتسامه بارده:هلا تركي... تركي يبتسم لها وهو مشتاق لها وقلقان عليها بالحيل:هلا ببشوره اخبارك؟؟.. بشاير تبتسم:تمام... تركي يناظرها بمزح:وراك ما تسلمين على خوك وهو توه جاي من السفر؟؟؟... إبتسمت بشاير وسلمت على اخوها...وقالت له إنها نست... تركي:بشاير يعني بنقعد نسولف كذا وانا عند الباب..ماتبيني ادخل؟؟؟... (يغمز لها) لا تكون غرفتك معفوسه؟؟؟... ضحكت بشاير:لا ادخل...مرتبه الغرفه... بعدها دخل تركي وبشاير وقعد مقابلها هي على السرير وهو سحب كرسي التسريحه وقعد قبالها... تركي بجديه:ألحين ممكن أعرف وش سبب هالحداد والإنعزال عن أهلي؟؟؟... بشاير بالنسبه لها كان كلام تركي مثل اللي يرش العطر على الجرح.. الالم والحرقه تتضاعف عندها وبداخلها... بشاير بإبتسامه سخريه:يعني انت للحين ماتدري وش السبب؟؟؟... تركي بجديه وبقهر ماحب يبينه لبشاير:بس لا تخلينه يدمر حياتك... إنتي باقي صغيره والف واحد يتمناك..والعمر اقي قدامك... واللي يبيعك برخيص بيعيه بتراب... بشاير بهاللحظه حست إن دموعها بدت تتجمع بعيونها..دموعها اللي كانت رافضه النزول...ألحين بتنزل و بشجون ايضا.... بشاير بدى فكها يرجف:تركي...إني انرفض..ويقول ما يبيني أحس إني مجروحه إلا مطعونه...أحس بالإهانه القويه...وبالصميم... والمشكله اللي توقعته إنه بيبع الدنيا عشاني...هو اللي باعني ومن دون أي سبب... ألحين اللي يسوى واللي ما يسوى بيلوك بسيرتي... تركي تأثر بكلام أخته اللي يعزف على الوتر الحساس بقلبه.... تركي:بشاير...صدقيني محد بيتكلم فيك إلا اللي في قلبه مرض أو حاقد... و اللي عطاك سعود...بيعطيك غيره... بس إنتي لا تخلين هالشي نهاية العالم والدنيا بالنسبه لك...وصدقيني بيجي اليوم اللي سعود بيندم فيه أشد الندم عليك... بشاير بقهر:والله لو يجيني من الشرقيه زحف...ما أرجع له... بس خليه يرسل لي ورقتي... بعدها قعد تركي يهدي من بشاير اللي كانت انخرطت في بكاء مرير و حزين...أفرغت آلآم أيام كانت كابتتها على قلبها...تركي بالبدايه خلاها تبكي...لأنه أكيد بيخفف عن اللي بقلبها...بس بعدين قعد يلاطفها ويهديها.. وقبل ما يطلع تركي... بشاير وهي تمسح دموعها:مشكور يا تركي على هالزياره... إبتسم تركي:لا يا شيخه عادي بس إضحكي... ضحكت بشاير مجامله لأخوها...وتركي كان عارف من هالشي... تركي:أجل يالله مع السلامه تراني بكره مسافر للشرقيه... بشاير:ليه عشان شذى؟؟؟... تركي يعقد حواجبه:عشان شذى....و سعود ومحمد... بشاير:بس أنا ماعاد ابيه... |
.....((تابع الجزء السادس عشر))..... تركي:ولا انا...بس لازم يعرف إن وراك رجال.... طلع تركي من عندها...وهي حزينه... باكيه على فقد الأحبه...بقرارة نفسها حست إن شذى لها دخل بالسالفه...كان هذا من تأثير كلام فاطمه عليها... اللي زارتها بعد آخر مره..وجلست معها قرابه الثلاث ساعات... أكدت لها فاطمه فيها..إن شذى ورى السالفه...لأنها أكيد تبي تقهر تركي مثل ما أخذ عليها سلمى...ولأن سعود حتى ما إستفاد من فلوسها ومركزها الإجتماعي ...بشاير آمنت بجزء من الفكره...لأن كل اللي صار مافيه دليل يثبت براءة سعود واخته شذى من اتهامات فاطمه...بالعكس كل الدلائل تشير إلى صدق تنبؤاتها و توقعاتها....واللي اكد لها هالكلام...إن شذى ما دقت عليها أبد بعد اللي صار...ما يؤكد لبشاير توطئها مع سعود اخوها؟؟؟؟.... *** باليوم التالي سافر تركي للشرقيه....هو بالمطار ينتظر إقلاع الطائره دق جواله....اللي قطع عليه أفكاره...وهو يفكر بشذى ونهاية هالعلاقه المهترئه معها....يعني معقوله ألحين إنها ماعادت تبادله نفس الحب اللي يبادلها... معقوله تكون شذى نفس ماقالت أمه وفاطمه له باليوم اللي قبله بعد ما طلع من عند بشاير ولقى فاطمه جايه ببيت اهلها...فاطمه وام بندر قعدوا يقنعون تركي إنه يطلق شذى...اللي اكيد هي الجندي المجهول اللي كان السبب بكل اللي صار...وإنها تبي تنتقم من تركي... ومنهم كلهم... بسبب زواجه عليها من سلمى... تركي أنكر هذا وبشده...بس هذا ما منعه إنه يفكر بكلامهم... ناظر الجوال شاف سلمى داقه...ماكان رايق إنه يكلمها...بس ضغظ على نفسه ورد... تركي:هلا سلمى... سلمى:هلا تركي...وينك مامريت علي بعد مارجعت؟؟؟... تركي:والله مشغول يا سلمى... سلمى:مشغول عني يا تركي؟؟؟... تركي بضيق:والله مشغول يا سلمى...وأنا الحين بالمطار مسافر للشرقيه... سلمى:مسافر؟؟؟...توك راجع...بس عارفه هذا كله من العقربه شذى... تركي:وش دخل شذى ألحين؟؟؟... سلمى:كل اللي صار فيك وباختك...هي السبب فيه ولا تقولي ليش تقولين كذا لأن العائله كلها تقول نفس كلامي... انقهر تركي...ما رضى على شذى يحس إنهم يسبونه بدل مايسبونه... ويتهمونه قبل لا يتهمونها.... تركي بضيق:كل هالكلام كذب...وبعدين أنا رايح أشوف السالفه منهم... سلمى مقهوره:إنت ليش ما ترضى عليها مع إنها غلطانه والكل عارف... تركي:كل هذا كلام... سلمى إنقهرت زياده:اوكيه يله ما اطول عليك... تركي:يله مع السلامه... صكر منها وقعد يفكر...ألحين الكل يتهمك يا شذى...بس معقوله تكون لها يد بالسالفه....ما أتوقع...خصوصا إن بشاير أحب اهلي لها ولا ترضى عليها والدليل إنها اختارتها لأخوها.... بعد كذا أعلن بالمطار عن موعد إقلاع الطائره...سافر تركي وبباله ألف سؤال..وامنيه وحده اللي هي إنه مايبي يكون لشذى دخل باللي صار... أما سلمى إنقهرت بقوه...وقعدت تسب وتلعن بشذى...وحاقده على تركي لأنها لمن زعلت ما راضها...بس يصير خير كذا كانت تقول في نفسها... |
.....((تابع الجزء السادس عشر))..... حزن بشاير المصطير عليها....والالام اللي متغلغله بحناياها...ماكانت تحس فيها لوحدها...بالعكس كان الكل متعاطف معها...و خصوصا ابو وام بندر كل ما حاولوا إنهم يطلعونها من اللي هي فيه كانت تتكوم على أحزانها أكثر... الليله راحت مع أختها فاطمه و نوف بنت فاطمه...لأحد المجمعات التجاريه المنتشره بالرياض.... راحت معهم بعد ما طلبها أبوها وترجاها إنها تطلع منهم...راحت وهي مخنوقه لبست وطلعت مثل الرجل الآلي.... بالمجمع قعدت على أحد طاولات الكوفي شوب وقعدت تتأمل بالناس الرايحه والجايه....تشوف الإبتسامه مرسومه على وجيههم... تشوف السعاده تحيط بوجه بعض البشر اللي موجودين بالمكان... حاولت معها اختها فاطمه ونوف إنهم يطلعونها بالسوالف من اللي هي فيه... بس كل محاولاتهم باءت بالفشل....والفشل الذريع جدا... بعدها رجعوا...وفاطمه حاقده على شذى أكثر واخوها سعود... وماقدرت إلا تلعن وتسب فيهم قدام بشاير...وإنهم سبب ضياع مستقبل اختها الصغيره؟؟؟.... *** بالصباح.... كان ببيت أبو محمد بالمجلس محمد وسعود... وخالد... خالد:ياخي أنتوا ما تستحون على وجيهكم في اللي سويتوه ببنت أبو بندر... سعود:وإنت وش تبي...لا يكون شايل هم الأمه العربيه وبناتها على راسك؟؟؟... خالد بعصبيه:أقول انثبر أنت بالذات... من جد يا سعود اللي سويته ما يدل على إنك...ولا خلني ساكت أحسن... سعود وهو يناظره وعيونه ضاقت بإستفسار:لا قول ليش سكت... خالد:والله مقهور يا جماعه....ليه كذا والله لو أبوي عايش...ما كان رضى باللي سويتوه.... محمد:أنتوا وش فيكم محد راضي باللي سويته ليش؟؟؟... بس يا خالد ترى سعود ما طلق مرته ولا راح يطلقها... خالد بسخريه:وإنشالله متأمل إنها بتسامحك هي واهلها على اللي سويته معها... سكت سعود.... ومحمد كان ينتظر رد سعود... خالد يكمل:أنا عني لو كنت مكانهم...مستحيل أرجع بنتي لواحد قال مايبيها عندي تموت ولا أردها له...لأنه المسأله وصلت للكرامه... سعود ومحمد:........... خالد:أصلا كيف طرت لكم هالفكره ما أدري...وبعدين من متى انت يا سعود صاير إمعه تمشي ورى كلام أي احد يقولك راي... محمد:خالد.... خالد:محمد اسكت واللي يرحم والديك...سعود اثبت بهالشي خبثه وأنانيته... سكت محمد... أما سعود غرق بحزنه...وهو يفكر ليش صرت إمعه مع محمد؟؟؟... صادق خالد..أنا غلطت وغلطتي كبيره...أنا أموت على بشاير... كيف تخليت عنها بهالسهوله...وهل اللي سويته يعتبر تخلي عنها... أنا بس حبيت أقهر تركي... مستحيل اتخلى عن بشاير إلا باليوم اللي ياخذ فيه ربي امانته فيني؟؟؟... *** بنفس الصباح...إلتقت سلمى و سارا باحد المجمعات التجاريه.. التقوا على فطور عازمه فيه سلمى سارا صديقة الطفوله والصبا... وبعدا يبون يطلعون بجوله تسوق مع بعض...قد نسوا عنها...من أيام الثانويه ما قد طلعوا مع بعض... يمكن لهم 9 سنين؟؟؟... وهم يفطرون... سلمى:اخبارك سارا؟؟؟... سارا:تمام....بس والله مفاجأه هالعزيمه الصباحيه معك... سلمى تضحك:لأني قد نسيتها...من متى ماقد طلعنا مع بعض... سارا تبتسم:صح من زمان عنها.... سلمى:شفتي وش صار ببشاير؟؟؟... سارا بحقد:حسبي الله عليه....من جد حقير سعود... سلمى:كله من السوسه شذى... سارا:من قال؟؟؟... سلمى:الكل يقووول.... سارا:أشك في هالكلام....لأن شذى تحب بشاير مره... سلمى: كل هالحب تمثيل بتمثيل... سارا:لأ ما أصدق...بس اللي صار لبشاير يثبت لي إن الرجال طلع ما فيهم خير...وإنهم مال الوحده معهم أمان...يمكن بأي لحظه إنهم يتركونا... سكتت سلمى...أما سارا قعد مسترسله بكلامها عن الرجال وإنه مالهم أمان مهما يبدي محبه وعشق.... |
.....((تابع الجزء السادس عشر))..... كان الجو متوتر ببيت أبو محمد بوجود تركي... تركي يكلم محمد وخالد اللي كانوا موجودين:أتوقع كفايه لحد ألحين إن شذى قاعده هنا...خلوها تستعد لأني بكره بمر وآخذها... محمد:وإذا قلت لك لأ... تركي بتحدي:ما تقدر يا محمد...ومادامني قلت بآخذها يعني بآخذها... محمد عصب:وإنت بعد... قاطعه خالد:محمد خلاص إهدى... تركي:أصلا كيف لك وجه تتكلم يا محمد بعد اللي سويته بالرياض؟؟؟... محمد:وش سويت يا تركي؟؟؟...هذا جزء من اللي انت تسويه... تركي يعقد حواجبه:وش تقصد؟؟؟.... سعود اللي كان توه داخل...وقف وشاف تركي...ناظروا الأثنين بعض لفتره بسيطه...سعود حاس بمثل الذنب إتجاه تركي...يمكن لأنه يشوف تركي هاللحظه إنه اخو بشاير...الحبيبه... سعود:هلا تركي... تركي يناظره بإستحقار:هلا...هلا بطليق أختي... بحلق سعود فيه...وقاله:بس أنا للحين ما طلقتها.... تركي بإصرار:بس بتطلقها وترسل لها ورقتها...واتركها يا سعود... مو إنت اللي قلت إنها ماتناسبك... سعود يناظر تركي بكبر يبي يقهره على نظراته:أفكر إني أطلقها أو لأ... تركي انقهر:سعود بتطلقها ورجلك فوق رقبتك... سعود يرفع صوته:تركي لا تنسى إنك ببيتنا...وانا للحين محترمك لسببين إنك رجل اختي...وأنا رجل أختك... تركي:ما يشرفني يا سعود إنك تكون نسيبي بكلا الحالتين... سعود:طيب ليش انت ألحين جاي؟؟؟...عشان تسمعني هالكلام؟؟؟... خالد:تركي يبي يراجع مرته... سعود:الراي لشذى..إذا تبي ترجع ترجع... تركي:الراي مهوب لحد ألحين...انا تركتها فتره طويله...قلت أنتظر... بش شكلها...ما عقلت وما تبي ترجع... محمد:احترم نفسك يا تركي.... تركي:انا محترم نفسي من البدايه...بس إنتوا اللي تطلعون الواحد من طوره... خالد:تركي...ألحين وش تبي أنت؟؟؟... تركي:ابي أراجع مرتي وولدي؟؟؟... خالد:بس لا تقعد تتأمر كذا...هذا مهوب اسلوب... حس تركي إنه المفروض ما يتعرض لخالد...لنه أكثر اخوان شذى إحترام وأخلاق وثقل وعقل... تركي:آسف يا خالد إن غلطت عليك...بس أخوانك... محمد:اختي مالها رجعه معك... تركي:بترجع...وتقعد عندي إلين ماتولد..ولمن تولد...تعالوا خذوها... سعود بتلقائيه:وولدها؟؟؟... تركي:هذا ولدي...وبيعيش مع ولده..واختكم مصيرها ترجع لكم... محمد:خلاص خلها هنا إلين ماتولد...ولمن تولد تعال خذ ولدك... تركي:لأ تولد عندي...عشان لا تجي بعدين وترفض تعطيني إياه... طلع تركي وحدد لهم إنه بكره جاي وبياخذها... * * ....:ماني شغالة أبوه عشان يقول كذا... أم محمد:بس إنتي هدي بالك... شذى:لأ....ليش على باله إني جاريه عنده... أم محمد:روحي معه يا شذى... شذى تناظر بأمها:زهقتي مني يماه؟؟؟.... أم محمد:أزهق من هالدنيا إلا إنتي... بعدها طلعت أمها من عندها وقعدت تفكر...بالنهايه هي مصيرها الطلاق... بس تخاف تركي إنه يطلقها ويقطها من دون ولدها....قعدت تفكر... وين تروح هو بيطلقها سواء رجعت معه أو قعدت عند اهلها..بكت لمن عرفت بهالشي...إستخارت الله سبحانه وتعالى...مالت لراي إنها تروح معاه... عشان حتى تشوف بشاير وتشرح لها موقف أخوها...لأنها مره متفشله من إنها تدق عليها....عشان لا تظن بشاير...إنها شمتانه فيها... *** كانت حصه بزياره لبيت أخوها أبوبندر... حصه:ياويلي عليك يا بشاير... أم بندر:حسبي الله عليه هو و أخته اللي كانوا السبب في ضياع حياة بنتي... حصه:ألحين شذى لها دخل بالسالفه؟؟؟.... ام بندر:هي السبب...وعلى قولة بنتي فاطمه...الراس المدبر... حصه:ما اتوقع يطلع من شذى...أحس إنها حبيبه وعلى نياتها... ام بندر:إلا ساحره هالمره...وهي السبب بكل شي حسبي الله عليها... حصه:طيب تركي وش راح يسوي بالشرقيه؟؟؟.... ام بندر:والله ما أدري عنه هالمسكين..هو يلقاها من مرته الساحره ولا أخوها الطماع... حصه:سعود طماع؟؟؟؟.... ام بندر بتبرم وضيق:اووووووووه يا حصه من دخلتي وأنتي كله تسألين... إيه كان طامع في بنتي... حصه:أحس إنك خرفتي يا أم بندر...وش هالكلام..مسلسل إحنا؟؟؟.... ام بندر:محد بيخرف قبلي إلا إنتي...ولا إنتي ناسيه إنك أكبر مني.... بعدها قعدوا الثنتين مناقر....وبعد كذا رجعوا يسولفون...وام بندر تندب حظ عيالها العاثر اللي خلاهم ياخذون سعود وشذى...أما حصه كانت تهديها.. وبعدها نادت حصه بشاير اللي نزلت تقديرا لعمتها... قعدت معهم خمس دقايق كانت صامته فيها...وبعدها رجعت لغرفتها...أما حصه فأثر منظر بنت اخوها الحزين عليها بشكل كبير.... |
.....((تابع الجزء السادس عشر))..... بعد دعاء الله سبحانه....وإستخاره...قررت شذى إنها ترجع مع تركي الرياض...كان قرار صعب...الحين عارفه إن النفسيات هناك زفت... والكل أكيد حاقد عليها...إذا كان تركي شاك إن لها يد باللي صار... كانت خايفه أكثر شي من بشاير إنها زعلانه منها..وإنها سبب لتدمير حياتها خصوصا إن بشاير عمرها ماتخلت عنها لحظه...وكانت دائما معها وما راح تنسى لها أبد وقفاتها معها... مر عليها تركي وخذاها على طول للمطار...وسط دموع امها... وحزن اخوانها عليها...ومريم اللي بتفارقها هي وبناتها... شذى بكت وهي تودع بيتهم اللي حست فيه بالراحه طول الشهور اللي راحت... أول ماركبت السياره مع تركي كانت مشاعرها مليانه خوف وحزن و غضب وفوق هذا كله ظلم....لأنها مظلومه بسالفة بشاير اللي ماعرفت إلا بعد ما قضى أخوها...بس الكل يظن إنها هي المتسببه باللي صار واللي بيصير لبنتهم....تركي بعد مطنشها و لا كأنها موجوده...طول الوقت بالمطار...بالطياره...والسياره... * * * أول ما وصلت البيت مع صلاة العشاء حست بالماضي بأيام زواجها الأولى والجميله...وبأيام العناء و الحزن... تركي اللي تركها وسط معمعة الحزن المسيطره عليها ببيتها و طلع... وهو حاس بمثل الإنتصار...إنه قدر يخليها ترجع معه... بس يا ترى مثل ما قدر يرجعها...بيقدر يرجع أيام السعاده والحب؟؟؟...اللي عاشوها بلحظه من اللحظات؟؟؟....طبعا لأ...لأنها بمجرد إنها تولد بيرجعها بيت اهلها... هذا قرار تأديبي لهم كلهم....يبي يحرق قلوبهم كلهم وأولهم شذى وسعود؟؟؟.... الجزء السادس عشر كانت هذي الليله غير عند سلمى من يوم رجعت الرياض... كان تحترق شوقا لليوم هذا...اليوم بتشوف الحبيب...بتشوف عادل...آه اشكثر اشتقت لك يا عادل...قعدت تفكر من زماااااان ما شافته ومن جد اشتاقت له... أحبك مووووت...لازم يشوفني اليوم قمر...أطيح الطير من السما؟؟؟.. قعدت تفكر وش تلبس اليوم خصوصا إنه مواعدها في مطعم من أرقى مطاعم الرياض...وهو جاي للرياض خصيصا لها...لها هي وبس... خطر على بال سلمى تركي...وش راح يكون موقفه لو يدري... تخيلته مثل الغول بيذبحها لو يعرف شي عن علاقتها بعادل...خصوصا إنه لاحظ في مكالماته معها تحررها وفكرها الإنفتاحي زياده عن اللزوم...على طول طردت من بالها تركي اللي تحبه وظل في بالها عادل الحبيب...حاولت تلقى لها عذر على اللي تسويه وخيانتها لتركي مع عادل...بس على طول عذرت نفسها بعذر وهمي وهو ما دام تركي يحب شذى وما يقدر يستغني عنها وبالدليل إنه جابها من الشرقيه أمس...وما دام يشاركها بتركي شذى... اجل بيشارك تركي عادل...واليوم اللي بيترك تركي فيه شذى..بأترك فيه عادل؟؟؟... حست بالإنتصار لنفسها وإنها معذورة باللي تسويه؟؟؟... راحت لدولا بها وقعدت تناظر بملابسها...ياربيه وش ألبس؟؟؟...خصوصا إن عادل موووت مشتاق لها... |
.....((تابع الجزء السادس عشر))..... من وصلت شذى...وهي حزينه ومكبوته...ودها تروح لبشاير...بس خايفه من الكل...من أم بندر..وابو بندر...وبالأخص بشاير اللي تموووت فيها.. تحس بالوقت نفسه إنها ظالمه ومظلومه...ظالمه لأنها كانت السبب الغير مباشر باللي صار وهي اللي اختارت بشاير لأخوها... وبنفس الوقت مظلومه لأنها والله كانت نيتها صافيه من ناحية بشاير وعمرها ماتبي لها المشاكل...وتذكرت تركي اللي من الشرقيه لليوم ما تلكم معها بكلمه وحده بس.... اخذت الجوال شذى وكلمت خويتها ريم اللي مره محتاجه تكلم أحد لأنها تحس إنها بتنجن لو ما لقت أحد تكلمه... ريم:شذى يا الخايسه يا القرده...كيف ترجعين للرياض من دون ماتقولين لي... شذى:أنا ألحين قرده؟؟؟... ريم:وحماره بعد... شذى تمزح:انثبري بس...والله لو كنت جنبك كان اعطيك كف ماشي ميتين..وش قرده وحماره...هذا جزاتي إني الحين داقه عليك وابي اشوف اخبارك... ريم بجديه:المهم ما علينا انا مستغربه وش اللي حول رايك وغيره ورجعتي الرياض...مع إنك كنت مصممه على الطلاق و تركي ذا من قالك مشينا على طول تبخر كلامك وعنادك(بهمس) لا يكون الشوق ذابحك... شذى بعصبيه:الشوق؟؟؟...الشوق بعينه إنشالله... ريم:أجل ليه رجعتي يا شذى...أكيد في سبب يخليك ترجعين... شذى بحزن:ما راح تصدقين لو قلت لك بشاير أكبر الأسباب اللي رجعتني يا ريم... ريم بحزن:من جد أخوك قليل خاتمه معها... شذى:يقول ما يبي يطلقها...بس يمثل أو يهدد كذا...عشان اللي سواه تركي فيني....يسويه باخته...ولا تنسين اخوي محمد وتأثيره الكبير على سعود اخوي...وحالة سعود النفسيه السيئه من بعد وفاة أبوي...وفوق هذا كله سعود حساس وبسرعه يتأثر...يعني تجمعت من كل النواحي عليه... ريم:بس إذا كانت السالفه على بشاير كان تقدرين تكلمينها تليفون... شذى:صح...بس خاطري أشوفها وجه لوجه...وبعد أم بندر أكيد ألحين كارهتني...ولا تنسين إن غيابي راح يخلي فاطمه وعايشه يطلعون علي كلام ما ادري من وين جايبينه... ريم:شذى موقفك من جد صعب...بس يعني خلاص بترجع حياتك مع تركي؟؟؟... شذى بإصرار:مستحيل... ريم:كيف مستحيل وإنتي رجعتي له؟؟؟؟... شذى تحاول تتماسك عشان لا تصيح:تخيلي يا ريم حتى هو يقول ما يبيني وبمجرد إني أولد...راح ياخذ ولدي ويقطني.... ريم بإستغراب:وش يقطك؟؟؟... شذى:يقول إنه يبيني أولد عنده عشان ياخذ ولدي وعقبها يطلقني... وعشان يظمن إنه ياخذ ولده... ريم خايفه:طيب ليه رجعتي ما دامه بياخذ ولدك؟؟؟.... شذى بتحدي:مستحيل ياخذه...تخيلي يقطني وياخذ ولدي ويخلي سلمى تربيه؟؟؟... ريم:يعني أكيد بتتطلقين.... شذى:هو يقول إنه ما يبيني...وحتى أنا ما أبيه...كل واحد ما يبي الثاني... ريم:مستحيل يقولك تركي كذا؟؟؟.... شذى:وليه مستحيل عيوني؟؟؟؟.... ريم:لأنه أكيد يبي يقهرك ويقهر أخوانك...مثل ما صار مع بشاير... شذى:بس أنا مالي ذنب... ريم:وهو وش يدريه يا الخبله... شذى:بالطقاق مو لازم يدري أهم شي بشاير... ريم:بس هذي حياتك... لازم تبيني له... شذى سكتت وقالت بهمس:بس أنا محتاره...محتاره بالحيل يا ريم... |
.....((تابع الجزء السادس عشر))..... نزلت سلمى من السياره..وتلفتت يمين ويسار تبي تشوف أحد يناظرها أو ينتظرها...كانت تشع جمالا...فاتنه إلى حد الربكه...كانت حاطه غطى شيفون مره تقاطيع وجهها مبينه ومبين مكياجها...كان الغطى والعدم واحد يعني مثل قلّته...دخلت المطعم ودقت جوال على عادل وحدد لها موقعه وهو اللي ينتظرها من ساعه...جات وهو وقف من الشوق ووقف قلبه وهو يشوف حبيبته قدامه...ناظرت سلمى حبيبها صاحب البشره البيضاء كانت ملامحه تميل إلى ملامح أهل الشام...وكان لابس بدله رماديه بس من دون ربطة عنق شبيهه بالبدلات الإيطاليه...ابتسمت له سلمى وصافحته وقعدت هي قباله... وبعد السلام... عادل بإبتسامه واسعه:إيش الحلاوه هادي يا سلمى...بتجنني... ضحكت سلمى وشالت الغطى عن وجهها:لا تناظرني كذا ترى أرتبك... عادل:من كم ما شفنا بعض؟؟؟...بصراحه لازم أعوض الوقت اللي ما شفتك فيه يا حبيبتي... سلمى:عادل.. حتى أنا ما تدري وش كثر مشتاقه لك... عادل:بس مو كثر شوقي لك... سلمى:أصلا إنت ما تفارقني لحظه... عادل بخبث:بس إنتي ساكنه جوى قلبي أحس فيكي مع كل دقه... سلمى:عادل...أنا يقاطعها:سلمى...أنا متل ما وعدتك جيتك من جده للرياض..بس عشان اشوفك... سلمى:يعني قاطع كل هالمسافه عشاني؟؟؟... عادل يبتسم:إيه عشانك... سلمى:بس إنت جاي بطياره...يعني وين العنا؟؟؟... عادل:ولا يهمك يا حبيبتي...المره الجايه أجي على رجلي... سلمى تمزح:لأني احبك وما أبيك تتعب...تعال بسيكل... وبعدها قعدوا ضحك وسوالف...يتغزلون فيها ببعض...ويتذكرون ايام الدراسه...وبعد إنقضاء السهره وقبل لا تمشي سلمى قدم عادل لها هديه عباره عن ساعة ماركة (أوميقا) ذات سوار جلدي أسود ومرصعه بالإلماس من على الاطراف مربعة الشكل...راحت سلمى وهي تحس بالفرح والطرب و الحب...الحب اللي جمعها بعادل...أحسن رجل بالعالم كله؟؟؟... *** بعد ما صكرت شذى من ريم...قعدت تفكر ما تدري وش تسوي مثلا لو راحت لبشاير...تعتذر لها...أو تقولها الحقيقه كامله..من وين تبتدي... ومن وين تنهي كلامها...وبشاير هل راح تسامحها...أو لأ؟؟؟... دخل تركي اللي كان توه راجع من برى...شافها تركي... وهو حاس مثل الإزدواجيه بشخصيته...يحبها ويعشقها موووت...وبنفس الوقت وده يصطرها على اللي صار لبشاير اخته...يحس إن لها يد ومالها يد...وحاقد عليها بعد بتمنعها من الرجعه معه....خاطره يكلمها يفتح معها أي موضوع حتى لو يكون هواش؟؟؟... أما شذى لمن شافته وهي كانت قاعده تقرى جرايد قديمه بالبيت قطتها وطلعت تبي تروح للغرفه الثانيه...اللي صارت مقرها من رجعت وخلت الشغالات ينقلون كل ملابسها واغراضها لهالغرفه..بعيد عن تركي حتى ماعاد تدخل عليه او تدخل هالغرفه مره ثانيه... عصب تركي من حركتها...قالها وهي تبي تطلع الدرج... تركي:شذى...وش اللي سويته لبشاير أختي؟؟؟.... سكتت شذى ووقفت وتحاول تتماسك.... انقهر تركي زياده منها وقالها يبيها ترد:بصراحه ما توقعتك يا شذى كذا حقوده تخربين على أختي حياتها و تخلين اخوك يطلقها...وهي المسيكينه مالها دخل باللي صار وهي اللي دايم واقفه معك... كان كلام تركي لشذى مثل الطعنات اللي بقلبها....أنا حقوده؟؟؟... أنا السبب باللي صار؟؟؟... لفت شذى عليه وقعدت تناظره يعني حتى إنت يا تركي... شذى بقهر:وش تبي يا تركي؟؟؟؟... تركي:إنتي ليش سويتي كذا مع بشاير؟؟؟؟...لأني اخذت سلمى عليك؟؟؟.. سكتت شذى وما عرفت ترد تحس بالحزن من الداخل تحس بجروح قلبها تنزف من الداخل... شذى:........... تركي بعصبيه:طبعا ما عندك رد...مافيه شي تدافعين عن نفسك فيه... شذى ما قدرت تسكت:تركي...إنت وش تقول؟؟؟... تركي يعقد حواجبه:وش قاعد أقول؟؟..تساليني وانت السبب في كل اللي صار واللي بيصير لأختي... شذى:بس والله انا مالي دخل باللي صار...وما تهون أبد على بشاير... تركي يناظرها بإستغراب مع عصبيه متأججه من الداخل:شذى لا تمثلين علي...وش اللي مالك دخل...يعني على بالك بتعدي علي حركاتك هذي... شذى بدت تصيح لأنها ماتقدر تقط السالفه على أخوها سعود...وتقول مالي دخل وهو مسوي هالشي عشانها...صدق طريقته غلط بس وش تسوي ما تبي تسب اخوها...عشان تركي يرضى...أو يمكن وهو الاكيد ما يرضى.. تركي بسخريه:إنتي دموعك ما تخلص...بس تصيحين... لفت شذى وعطته ظهرها وطلعت فوق بخطى سريعه... تركي ما ترك فرصة إنها تصعد الدرج...إلا وقط عليها كلام يبي يجرحها بأي وسيله.. تركي بصوت عالي:شذى.. إنت ما عاد لك مكان هنا بينا...بس اولدي وارجعي بيت اهلك... سمعت شذى كلامه وبدت انهار من الدموع تنزل...حست بالمهانه تعيش مع واحد ما يبيها...خلاص هو ما عاد يبيني...أجل ليش رجعني ليش؟؟؟... |
.....((تابع الجزء السادس عشر))..... بعد هالسالفه بيومين... راح تركي لأبوه يسلم عليه ولقى عنده أخوه متعب... سلم عليهم..وقعد معهم سوالف... متعب:رجعت مرتك يا تركي؟؟؟؟... تركي وهو مايبي أحد يسأله هذا السؤال:إيه رجعتها... ابو بندر:ورى ما طلقتها؟؟؟... متعب:بعد اللي صار لأختك ترجعها.... تركي:رجاء يابو بندر مرتي شذى لا تدخلونها يعني تكفون... متعب:وشلون ما ندخلها وهي السبب باللي صار... تركي بإصرار:أخوها...أخوها يا متعب مو هي... متعب:والله عاد كلهم واحد..فكنا ياخوي منهم.... ابو بندر كان ما يبي يتدخل بحياة تركي أكثر...لأنه حس إن تركي هو اكثر واحد تدخل بحياته من اولاده عكس الباقين اللي عمره ما تدخل بموضوع شخصي لهم من غير ما يطلبون هم منه شخصيا إنه يتدخل...لذلك آثر ابو بندر الصمت... دخل رمضان...والحال باقي على حاله...ما تغير شي...غير إن تركي ما صار أبدا يتعرض لشذى من الحادثه اللي صارت بينهم من قبل أسبوعين...شذى حاولت إنها تروح بيت ابو بندر بس تركي حذرها من هالشي إنها تروح...خصوصا إن الاجواء هناك بتتكهرب لو تجيهم شذى راح تعلن من بيت ابو بندر حرب عالميه جديده؟؟؟... أول يوم برمضان قعدت شذى تتذكر رمضان العام الماضي أول ماتزوجت تركي....كانت طقوس العائله إنه بأول يوم يفطرون في بيت ابو بندر... فكرت واحتارت هل تروح او لأ.... تركي الثاني بعد هو شاغله هالموضوع...يا ترى ياخذ شذى أو لأ؟؟؟... بس قعد يفكر إنه رمضان شهر خير وحب والفه وصلة رحم ليه ما تتحسن العلاقات فيه؟؟؟......استبعد فكرة تتحسن العلاقات بعد اللي صار... لمن جا العصر كان تركي...قاعد بالصاله تحت يقرى قرآن اما شذى فوق قاعده حست بالحزن...يالله يا تركي لهالدرجه ما انت طايقني... حتى كل عام وإنتي بخير ثقلت على لسانك وما قلتها لي؟؟؟...بعدين قالت لنفسها تواسيها وأنا وش ابي بتركي أصلا انا ما عاد ابي أشوفه و لا اناظره... |
.....((تابع الجزء السادس عشر))..... جا لتركي اتصال من ابوه يعزمه على الفطور...إنه يجي وما ينسى... تركي:إنشالله يباه جاي... أبو بندر:حبيت اذكرك عشان لا تنسى بس.... تركي بتردد:طيب وشذى تجي أو؟؟؟... سكتت ابو بندر وهو محتار وش يقول؟؟؟؟... ابو بندر على مضض:براحتك أنت...يالله توصي على شي... تركي:سلامتك... وبعد ما صكر أبو بندر...حس تركي إن ابوه لا هو اللي وافق ولا اللي رفض...أحتار وش يسوي....بس أبوه قاله براحتك.... بعد ربع ساعه تقريبا طلع لشذى و قرر إنها تروح معه...ما يدري ليش اشتاقلها خاطره يكلمها بأي موضوع...طلع ودق عليها الباب...فتحت الباب على بالها الشغاله...ولمن شافت وجهه عقدت حواجبها.... تركي من غير ابتسامه:رمضان كريم.... شذى بسخريه:تو الناس...أجلها لبكره... تركي:ما راح ارد عليك...بس حبيت اقولك جهزي عمرك لأنك بتروحين معي لبيت ابوي نفطر هناك... استغربت شذى من تركي إنه هو يقولها تروح...بس حبت تعاند... شذى بعناد:ماني رايحه... تركي:وليه ما تروحين إنشالله؟؟؟... شذى:والله عاد حريه شخصيه...بكيفي مابي اروح.... تركي بعناد:لأ يا شذى بتروحين.... شذى عصبيه:والله ذيك الساعه اللي باشتغل فيها عند ابوك تعال تأمر علي يا تركي... تركي بضيق:خلي عنك هالطنازة وامشي...وبلا هالحركات يا آنسه شذى.. شذى تناظره ببرود:ما راح أروح.... تركي:لأ بتروحين...على الأقل شوفي بشاير وش صار لها....روحي بيني لها ليه سويتي كذا فيها... سكتت شذى وقعدت تناظره بعصبيه.... تركي:ليه ما تردين؟؟..(بسخريه)قولي لها والله ما لقيت غيرك يا بشاير احط حرتي فيه... شذى من القهر اعطته ظهرها وقعدت تقول وهي تتماسك عشان لا تنفجر... شذى:اللهم إني صائم...تركي رجاء خلني بحالي... تركي وهو طالع:على العموم قبل الآذان بعشر دقايق أبيك تزهبين نفسك عشان تروحين... وطلع قبل لا يسمع ردها... قعدت شذى تفكر تروح ولا لأ؟؟؟... ماتدري وش تختار...محتاره تروح ولا لأ....خصوصا إن هذي فرصتها...والناس صايمه يعني كلن بيحاول إنه ما يغلط بهذا الشهر الفضيل...واكيد بشاير بتكون نفسيتها هدت كثير خصوصا إنه مر على هذي السالفه فتره...وبعدين تركي فارض عليها حصار إنها ما تروح لهم وهي مالها وجه تدق تليفون عليهم... قعدت شذى تفكر إنه يمكن تركي يبي يسوي عليها حصار إلين تولد وبعدين يرجعها لأهلها....احتارت وش تسوي....وش تختار؟؟؟....تروح أو تقعد... |
.....((تابع الجزء السادس عشر))..... قبل الآذان بعشر دقايق... ناظر تركي نفسه بالمرآيه كان لابس وكاشخ...ناظر ساعته وشاف خلاص ما بقى شي ويأذن..راح لها وهو يتمنى من كل قلبه إنها تروح...عشان تغير جو...وعشان بعد تلقى بشاير..يحس إن شذى مالها دخل..ومتأكد في قرارة نفسه إنها فكرة محمد..هو اللي مأثر عليهم الإثنين سعود وشذى.. تركي كان منقهر مره من سعود وحركته مع بشاير...ومتحسف عليه بنفس الوقت لأنه كان رجال ما يتفوت...بس شكل تأثير محمد كبير عليه... لمن وصل لعند باب غرفتها...انقهر...(قاعدين احنا بفندق كل واحد بغرفه لحاله)... دق الباب...محد رد..دق مره ثانيه...بعد محد يرد... بالأخير راحت شذى تفتح له الباب كان ودها إنها ترفع ضغطه شوي مثل ما يسوي فيها... شذى:نعم... تركي ناظرها كانت متجهزه شكلها بتروح...كانت لابسه فستان لونه سكري جبنيز وطوله لنص الساق...كان شكلها مره كيوت وأنوثه خصوصا مع الحمل... تركي:خلصتي؟؟؟... شذى:لحظه شوي باقي ما خلصت... تركي قعد يتأملها...من زمان ما شافها...ما شاف مالكة قلبه وحبه... تركي:طيب أنا ألحين نازل...اخلصي وانزلي بسرعه... نزل تركي ودخلت وهي صكت الباب عليها...قعدت محتاره مرره تروح ولا لأ؟؟؟...للحين تحس لو تقعد أفضل لأن بتجي فاطمه و عايشه وأكيد سلمى بتجي...يعني انواع النحاسه..تحس إنها راح تتعرض هناك لمضايقات كثيره منهم..هذا إذا ما سوو معها هوشه...بس تذكرت بشاير أكيد الحين هي زعلانه منها...وحزينه لأنها تظن إن هي السبب بكل اللي صار لها وتتهمها بقلة الخاتمه ونكران معروفها لمن وقفت معها...دقت على خويتها ريم هي الوحيده المنجده لها...ما ردت ريم...تأففت شذى يعني وين تروح.. دقت عليها مره ثانيه ردت عليها... شذى:ريموه وينك؟؟؟... ريم:أفطر بعد وين اروح... شذى كأنها تذكرت:إيه صح أنتوا بالشرقيه يأذن عندكم قبلنا بالرياض... ريم تحرها:ياحليلك للحين مافطرتي... شذى:ريم المهم بغيتك في استشاره سريعه... ريم:افا عليك بس..ريم بالخدمه 24ساعه.. قالت لها شذى عن العزيمه وعن مخاوفها على السريع... شذى:هاه وش رايك اروح ولا أقعد؟؟؟... ريم:طبعا تروحين..لازم تروحين عشان بشاير والباقين عاد قوليلهم إذا بغوا يسون مشكله إحنا برمضان ورمضان كريم قابلوني بشوال... شذى:كذا رايك؟؟؟... ريم بجديه:فرصتك يا شذى..وحتى بعدين لازم تبينين لأم بندر إنك ما انتي زعلانه منهم..ومالك ذنب باللي صار...وهو تهور من أخوك... سمعت شذى تركي يناديها... شذى:طيب ريم باااي انا الحين مستعجله... ريم:بتروحين؟؟؟.... شذى:شورك وهداية الله...بس دعواتك... ريم تضحك:طيب الله يوفقك في مهمتك الصعبه هذي... صكت شذى وأخذت عبايتها ونزلت... شذى معقده حواجبها تكلم تركي:ليش تصرخ؟؟؟... تركي بعصبيه:خلاص الحين بيأذن بعد..وأنتي سنه قاعده فوق... شذى:هذا انا خلصت...بس لا تقعد تصرخ كذا وتزعجني... تركي:اللهم طولك ياروح...أقول امشي شكلك تبين هوشه... شذى وهي تنزل الدرج:اللهم إني صائم... تركي:اللهم إني صائم... بعدها نزلت شذى ولبست العبايه تحت وراحت للسياره اللي كان تركي ينتظرها...وأول ما صكت الباب مشى بسرعه... شذى تناظره بعصبيه:وش فيك انت مسرع كذا انتظرني طيب اصك الباب.. تركي معصب:ماتفهمين الحين خلاص بيأذن...اخرتينا... شذى:والله عاد تبيني أطلع قبل لا اخلص... ما رد عليها تركي وكان ماشي بسرعه..بيت ابو بندر قريب..وما أخذ وقت طويل بالمشوار...اول ما وصلوا ووقفوا بالباركات داخل بيت ابو بندر إلا يأذن...كانت سيارات العائله كلها موجوده دليل إنهم قد وصلوا... تركي بضيق شديد:شفتي يا عمتي اذن... ما ردت شذى عليه ونزلت... كانت خايفه وقلبها يقرع قرع الطبول من الخوف...خايفه مره تحسفت إنها جات...يا ويل حالي وش بألقى الحين داخل...ناظرت تركي اللي راح عنها و ما عبرها... راحت وهي تحس ركبها ماهي قادره تشيلها تتخيل الحين شكل فاطمه وهي تتهاوش معها...قعدت تدعي الله مع الأذآن إنه يخلي الأمور تسير على خير خصوصا مع هالشهر الفضيل... أول ما دخلت بيت ابو بندر تحس إن قلبها بيوقف بس لمن تتخليهم وهم بيشوفونها ويكشرون بوجهها...بس لمن دخلت ما كان فيه احد بالصاله..و بس شافت الشغاله...اللي اخذت منها العبايه... شذى تسألها:وين ام بندر... الشغاله تأشر على جهة البلكونه:هناك...فيه فطور بالحديقه... وراحت الشغاله... خافت شذى تروح ولا لأ؟؟؟...للحين حاسه بالتوتر..وبمثل الرعشه بجميع أطرفها... توكلت على الله وجمعت بقايا قوتها المفقوده...وراحت لهم... . . كانت العائله كلها مجتمعه على الفطور..وكان فطور الحريم بالحديقه برى كتغيير جو...الكل حاظر...العمه حصه و فاطمه وبنتها نوف وعايشه وسلمى اللي أكدت عليها فاطمه وام بندر إنها تجي..وأكيد بعد كان من الموجودين سارا مرة متعب...كانوا قاعدين يفطرون وهم مستانسين وسوالف بإستثناء بشاير اللي كانت قاعده معهم ببيجامتها كانت تحس إن الدنيا ضايقه فيها...بالموت وبعد ما أقنعتها امها إنها تنزل نزلت.. . . على الفطورعند الرجال... متعب:تو الناس تجي يا تركي... فارس:كل عام وانت بخير يا عمي تركي... تركي:كل عام وإنت بخير يا فارس وينك ماعاد تبان لك فتره... فواز:مشغول بالدراسه تعرف الجامعه... انقهر فارس من فواز اللي كان يتطنز عليه بس ما كان مبين... ابو بندر:اقول يا فارس ورى ما تداوم بالمساء معي انا وابوك مو احسن... متعب:لا يباه الله يهداك تو ما انشد عوده وبعدين عاد صغير... ابو بندر:وين صغير مشالله اطول مني صاير... بندر:إيه والله فارس باقي صغير وبعدين خلوه بالجامعه والدراسه احسن اخاف اثقل عليه ولا ينجح بالجامعه وهي الاهم عندي... فواز قعد يضحك... أما فارس فحمد ربه إنه اعمامه وابوه شافهم يدافعون عنه كذا... ابو بندر:اقول بسرعه عجلوا خلونا نلحق على الصلاه... |
.....((تابع الجزء السادس عشر))..... لمن جاتهم شذى...استغرب الكل..إلا تفاجأو..ما توقعوا ابد إنها تجي.. كانوا يدرون إنها موجوده بالرياض..بس ماتخيلوا إنها تجي... شذى: السلام عليكم.. ناظرتهم بربكه مبينه عليها...كأنها اول مره تشوفهم...قعدت تناظرهم وهم كيف يناظرونها بإستغراب... ام بندر استغربت من حظور شذى بعد كل اللي سوته؟؟؟...وبنفس الوقت احتارت تهاوشها وتصفي حساباتها معها..ولا تعاملها ببرود خصوصا إنها في بيتها...ورمضان شهر تصفد فيه الشياطين.. حصه اللي لاحظت طول وقوف شذى...وإنه محد رد عليها السلام... حبت إنها تتدراك الموقف... حصه بإبتسامه:وعليكم السلام...تفضلي يا شذى... ابتسمت شذى للعمه حصه...اللي حست بالمهانه وهي واقفه ولا حد رد عليها السلام..راحت شذى وقعدت...حست إن عيون فاطمه وعايشه بياكلونها.... عايشه بهمس لفاطمه:من دعاها هذي السوسه؟؟؟... فاطمه هزت كتفها بالنفي وقالت:وش يدريني...بس اكيد جايه تتمييلح وتسوي نفسها بريئه من فعلة اخوها... عايشه:الله ياخذها ام اربع واربعين..ما تدري إن احنا كشفنا حركاتها ذي.. فاطمه:شكلها يبيلها هوشه تعلمها مقامها هالخايسه... سلمى ناظرتها بكبر وغرور..كانت مقهوره منها وغيرانه من جات وتركي ما دق عليها إلا مره وحده بس...كانت الغيره ماكلتها..خصوصا لمن شافتها حامل..يعني بتولد وتجيب ولد وتتوطد العلاقات بينها هي وتركي... سارا سكتت كاسره خاطرها شذى وبنفس الوقت كلام العائله عنها تصير تقهرها...هي ونوف بنت فاطمه... أما بشاير..فقد كانت خليط من المشاعر من بغض وكره وحقد لشذى دمرتها حتى اخر نفس...كلام بنات الجامعه عنها سبب لها مأساه كبيره في كل يوم جامعي تداوم فيه..كيف ما يبيها وهي الكل يتمناها أكيد شاف عليها شي... خصوصا إن أبوها من كبار رجال الأعمال بالرياض...ناظرت بشاير شذى ومع هذا كله مستحيل تنسى الأيام الحلوه اللي عاشتها معها وصداقتها واخوتها مع شذى...عمرها ما شافت منها شي شين من قبل... قامت بشاير وراحت تبي تطلع فوق... ام بندر:بشاير وين رايحه؟؟؟...ما افطرتي... بشاير:الحمدلله شبعت... وطلعت بشاير وشذى تناظرها بحزن...كان خاطرها تمسكها وتحلف لها بالله إنه مالها دخل...كانت كاسره خاطرها بشاير وحقدت من الداخل على اخوها وتتمنى لو يشوفها بهالحاله ويعرف كيف دمرها... قعدوا يفطرون بهدوء...شذى بس اكلت لها كم تمره وشربت كاس ماي.. كانت نفسها مسدوده.. هي تبي تكلم بشاير وبشاير طلعت فوق... صح هي أول كانت تطلع وتنزل على كيفها..بس الحين الوضع غير..كأنها اول مره تدخل بيت ابو بندر...تحس إن الكل يراقبها... قامت سلمى:الحمدلله أنا شبعت... فاطمه:بس ما اكلتي كثير... سلمى تعلي صوتها عشان تسمع شذى:والله تركي ما يبيني أسمن عاجبه جسمي... انقهرت شذى من الداخل ودها تقوم تصطرها...بس سوت نفسها ما سمعت لأن الحقران يقطع المصران... فاطمه ضحكت عشان تقهر شذى:أجل خلاص مالي دخل بين العشاق... شذى تدعي الله إن يمدها بالصبر أكثر لأنها تحس إنها بتبكي..تخاف ترد تصير هوشه ولا احد بيوقف معها...حتى تركي نفسه...ومازالت شذى ما كأنها تسمع... راحت سلمى وقامت عقبها اختها عايشه... فاطمه:بعد شبعتي انتي؟؟؟... عايشه وهي تروح:والله إذا حظرت الشياطين ذهبت الملائكه... تقصد شذى...شذى خلاص تحس الضغظ عندها وصل اتش...تبي تصيح قامت شذى تناظر عايشه بإستحقار من فوق لتحت...من غير ما تشيل عينها عايشه ما انتبهت بس فاطمه لاحظت...وما قدرت تقول شي...بس انقهرت وقعدت تقول بخاطرها(شين وقوي عين)... حصه ما عجبها كلام بنات اخوانها..ابد مو حلوه بحقها...أما ام بندر سكتت بصراحه هي عجبها كلامهم لأنها من جد مقهوره من شذى...تستاهل؟؟؟... *** بعد الفطور...قاموا يصلون المغرب..وبعد ما صلوا اجتمع الكل بالصاله يشربون شاي...طبعا بإستثناء بشاير اللي ما عاد بانت من الفطور... كانت شذى قاعده معهم بس ولا احد معبرها ما كانت موجوده...بإستثناء قطات عايشه واختها سلمى وفاطمه...كانت ماتسمعها زين..لأنهم كانوا شوي جالسين بعيد عنها...قعدت تتحمد الله من الداخل صدق اكبر منها بس عقولهم اصغر منها...أما سارا و نوف بنت فاطمه كانوا قاعدين سوالف مع بعض...وطبعا العجاجيز مع بعض ام بندر وحصه... كانت شذى تحس بالملل..ما احد معطيها وجه...وكانت بعض الوقت تخاف من نظرات ام بندر الحارقه لها(أكيد الحين بتهاوشني؟؟؟...).... بعد ما مر الوقت...قامت الجلسه تتشتت...سلمى وفاطمه قاموا يجلسون بالصاله اللي فوق سوالف مع بعض...أما حصه فراحت تنام نص ساعه بغرفة نوم للضيوف(تحب تتمدد بعد الفطور خخخ)...أما سارا ونوف وعايشه راحوا يقعدون على التلفزيون يتابعون مسلسلات رمضان... وام بندر راحت تقعد مع الرجال بمجلس بالأخير صفت شذى بحالها بالصاله ...حست بالطفش...بعد ما حست إنها مستحيل تكلم بشاير اللي ماعاد بانت..دقت على تركي يوديها البيت.. تركي:نعم... شذى بدون نفس:تقدر الحين توديني البيت... تركي:والله الحين انا مشغول ما اقدر... شذى بقهر:وين مشغول وانت متكي قاعد تسولف مع اهلك... تركي حب يقهرها:والله ما اقدر افوت هالجلسه... وصك الجوال...انقهرت منه..رجعت دقت وكل شوي يعطيها رفض انقهرت منه مره...بالأخير حطت الجهاز معاودة الإتصال آليا... بخاطرها(أحسن يستاهل)...بس كان تركي اذكى منها وقفل الجوال... انقهرت وقعدت زهقانه بالصاله... قعدت تفكر..وش تسوي؟؟...بالاخير قررت إنها تطلع بنفسها لبشاير فوق وتكلمها...ما يصير...بالنهايه قامت وراحت تطلع فوق...كانت تتمنى إنه محد يشوفها وهي طالعه خصوصا ام بندر...طلعت وهي رايحه لغرفة بشاير شافتها فاطمه وسلمى...استغربوا مره... فاطمه بعصبيه:إنت هيه وين رايحه؟؟؟... اما سلمى تمت تناظرها بغرور... شذى انقهرت:مالك شغل... وراحت لغرفة بشاير... سلمى:من جد ماتستحي هذا...لها وجه تجي... فاطمه:قلتيها...ما تستحي... راحت شذى ودقت على بشاير..كانت خايفه ومتوتره...واللي وترها زياده شوفة فاطمه وسلمى.... كانت بشاير مره متضايقه..وشوفة شذى فتحت عليها جروح كثيره..لمن سمعت دق الباب توقعت إن امها أرسلت الشغاله جايبه لها فطور لأنها ما أفطرت زين.... بشاير بضجر:مابي فطور..خلاص روحي.... سكتت شذى لمن سمعت هالكلام...ماعرفت وش ترد...بس رجعت دقت الباب...قامت بشاير وراحت تشوف من علي الباب لا تكون بس نوف تستهبل....لمن فتحت الباب استغربت إلا انصدمت شذى؟؟؟... وش عندها وش تبي؟؟؟....أما شذى كانت متفشله وخايفه من إن بشاير تطردها... بشاير من دون ما تناظرها:وش تبين جايه؟؟؟... شذى بتردد:ممكن أكلمك شوي... ناظرتها بشاير وهي معقده حواجبها...تطردها او تخليها تتكلم؟؟؟.... بشاير وهي تدخل وتخلي الباب وراها مفتوح:قولي وش عندك... دخلت شذى وصكت الباب وراها...وقعدت تناظر بشاير(سبحان الله على كل اللي صار باقي أخلاق معي مو مثل اختها فاطمه)... بشاير من جد حست بالتوتر والغصه ومن دون ما تناظر شذى:وش تبين جايه الحين؟؟؟... شذى جلست جنب بشاير على طرف السرير..كانت بشاير ماتناظرها تناظر الجهه الثانيه... شذى:طيب ناظريني...بشاير والله تراني ماني راضيه باللي صار.... بشاير بدت تصيح عرفت شذى إنها مره متوتره...حتى شذى لمن شافتها كذا جاتها الصيحه... بشاير تكتم صياحها:لا تضحكين علي يا شذى إنتي اللي دبرتي لهالشيء... انصدمت شذى من كلامها..بس كانت متوقعته... شذى:بشاير احلف لك برب الكعبه إني ماكنت ادري بنية سعود ولا انا راضيه باللي صار... بشاير تصيح من قلب:طيب ممكن تقولين لي وش اللي انا سويته مع اخوك حتى إنه يرفضني... شذى:والله ماني راضيه و ماتدرين كيف هذا الشي أثر علي... بشاير انا على مشاكلي مع اخوك...عمري ماحبيتك انتي وسعود تتدخلون... بشاير تناظرها وبعيونها دموع:شفتي...بسببك انتي ومشاكلك هذا كله صار لي ولا تظنين لمن اقولك هالكلام متحسفه على اخوك بالعكس انا متحسفه على مشاعري اللي اهديتها لإنسان مايستاهلها... شذى:بسببي انا يا بشاير؟؟؟...يعني إنتي ماتعرفين اطباعي... بشاير وهي تمسح دموعها: كنت مخدوعه فيك...أصلا إنتي مثل ماقالت اختي فاطمه أنانيه وماتفكرين إلا بنفسك وإنتي كنتي تستغليني لأنك لقيتيني أنا الهطفا الوحيده قدامك...((هطفا يعني مثل الخبل اللي على نياته))... بشاير كانت تقول هالكلام لأنها تبي تقهرها..تبي تجرحها...مع إن هالكلام ماكانت بشاير متأكده منه لأنها من جد قد عاشت مع شذى وشافت أخلاقها وطباعها مستحيل تكون أنانيه ولا وصوليه لهالدرجه... شذى تطالع بشاير بحزن:يعني أنا الحين السبب باللي صار؟؟؟... بشاير:وبكل اللي بيصير بعد...شذى بس عاد حرام عليك اللي تسوينه فيني يعني بعد كل اللي صار تجين تعتذرين؟؟؟... كانت لهجة بشاير مره جافه مع شذى..وشذى ماتحب احد يكلمها بهالطريقه.. شذى معقده حواجبها:بشاير انا قلت لك والله مالي دخل باللي صار وماني راضيه فيه..وأنا جايه اقولك هالكلام عشان ابين لك موقفي... بشاير بدت تلين...هي للحين ماقدرت تمسك سبب للي صار... وكل الأسباب اللي حطتها ومنها شذى بس توقعات... بشاير وهي ترجع مره ثانيه تصيح:هذا كثير علي والله ما أقدر.. البنات بالجامعه يناظروني وبعيونهم ألف سؤال...الكل يظن فيني السوء وانا عمري ما قربت منه(تصيح وهي منهاره) انا وش سويت؟؟؟.. دايم يقولون لي هذي غلطة اختياري... شذى بدت دموعها تنزل ما قدرت كانت تظن إنها تحس بالهم وحدها..أثر بشاير تحمل على قلبها مثلها ويمكن أكثر... |
.....((تابع الجزء السادس عشر))..... شذى:أدري والله إنك مظلومه يا بشاير..بس والله لو بيدي شي كان سويته.. تدرين وش كبر محبتك وغلاتك بقلبي..والله إني اعتبرك مثل اختي واكثر.. بشاير ماردت..بس قعدت تصيح صياح يقطع القلب اليوم رجعت عليها أحزانها و اوجاعها... فجأة انفتح الباب ودخلت ام بندر ومعها فاطمه..وواقفه عند الباب من برى سلمى تناظر بلقافه... ام بندر بعصبيه:شذى...وش تسوين هنا؟؟؟... فاطمه:ما تردين...وش تسوين..أكيد قاعده تلعبين علي بشاير وتكذبين عليها... ام بندر معصبه حدها:ما تستحين بعد اللي صار منك انتي واخوك تجين وتسوين نفسك الطيبه... شذى سكتت وقعدت تناظرهم...كانت متفاجأه منهم... ام بندر:ما تخافين الله أنتي باللي سويتيه ببنتي... بعد ماعديتك مثل وحده من بناتي... بشاير قامت ماحبت هالمهزله تصير:يمه الله يهداك خلاص بلا مشاكل... ام بندر معصبه:بشاير لأنك مسكينه وبسرعه تصدقين جات تضحك عليك.. فاطمه:شذى الله ينتقم منك إنشالله أنتي واخوك... شذى قامت:بس خلاص كفايه... قاطعتها ام بندر:كفايه من إيش؟؟؟...انا المفروض اللي اقول كفايه منك أنتي وبلاويك...ولا إحنا اللي عزيناك واكرمناك... شذى ردت عليها عاد ماتحب الإهانه:وشو عزيناك واكرمناك...ليه لقيتوني في الشارع... سلمى ترد عليها بلقافه:والله اللي بالشارع اكرم منك واحسن منك... شذى انقهرت:انثبري..رجاء يا سلمى لا تتدخلين... فاطمه:إلا تتدخل على الأقل مو مثل ام اربعه واربعين... ام بندر كانت مره معصبه:ما اقول إلا حسبي الله عليك أنتي وامك إنشالله.. شذى:أم بندر رجاء امي لا تجيبين طاريها بشي شين هي ما سوت لكم شي ام بندر:تلقين الحين كل الدواهي منها... بشاير قاعدت تشوف الوضع يزداد سوء..كأنهم فاتحين حراج بحجرتها وهي ماتحب هالأسلوب... بشاير تصرخ:ياناس بس خلاص وش هالحاله؟؟... شذى تبي تطلع:انا طالعه ألحين... وطلعت وهي طالعه مرت من عند سلمى اللي قالت لها بصوت واطي مالت عليك؟؟؟... شذى ماكان لها ترد على تفاهات سلمى واول مانزلت دقت جوال على تركي اللي كان توه فاتحه... تركي:شذى بغيتي شي؟؟؟... شذى وهي تصيح:رجعني البيت الحين ماني قادره اقعد... |
.....((تابع الجزء السادس عشر))..... أول ما ركبت شذى السياره قعدت تصيح من قلب مهيب مستوعبه اللي صار لها اليوم...تركي اللي حس إنه فيه شي سألها و ماترد عليه.. تركي:الحين ممكن أعرف سبب هالسمفونيه من الصياح؟؟؟... انقهرت شذى من اسلوبه وماردت...بس تمت تصيح... كان تركي مستغرب وبنفس الوقت قاطعه قلبه... أول ما وصل للشارع اللي قدام بيتهم..دق جواله إلا يناظر يشوف رقم امه.. تركي يرد:هلا بالغاليه... ام بندر:بعصبيه:ألحين تعال ابيك ضروري... تركي بامتعاض:يا ام بندر توني كنت عندك ورى ما.. إلا تقاطعه امه بعصبيه:تعال ألحين ضروري ولا بتزعل والله يا تركي لو ماتجي... تركي استغرب وبضيق:طيب يله جايك الحين... كان خاطره يشوف وش في شذى تصيح..بس أمه طبعا اهم وتبيه اكيد بموضوع خطير... تركي وهو واقف قدام بيته:شذى انزلي..انا رايح... نزلت شذى وصكت الباب بعصبيه...انقهر تركي من حركتها..ما يحب يكون متنفس لزعل غيره... . . كانت شذى تصيح من قلب على الكلام اللي قالوا لها...مو معقوله تكون هذي ام بندر اللي أعرفها...ولا حتى بشاير...وسلمى هذي السوسه هي المستفيده من كل اللي صارلي...وهي تصيح وبغمرة احزانها وهمومها.. جاها تركي بعد نص ساعه وهو معصب بقوه... دق الباب عليها بقوه... تركي يصرخ:شذى افتحي الباب... كانت داريه إن امه قالت كل اللي صار... تركي:شذى والله لو ماتفتحين الباب لأكسره على راسك... خافت ماتدري وش تسوي...بس خافت إنه يكسر الباب قامت فتحته... اول مافتحت الباب..على طول شدها من ذراعها بقوه على فوق إلين ماخلاها توقف على اطراف رجولها... تركي يصرخ:إنتي توصلين أمي عشان تتجرأين تقولين لها هالكلام... شذى تمت تصيح وتحاول تفك يدها... تركي:قسم بالله لو تعيدينها يا شذى يكون الموت لك ارحم فاهمه... شذى تصيح:فكني يا تركي... كانت تصيح من قلب... تركي:على بالك دموع التماسيح هذي بتأثر علي... والله لو ما انتي حامل كان بتشوفين شي عمرك ما شفتيه.. شذى:يعني بتطقني مثلا؟؟؟...فكني تراك عورتني مره... تركي يقرب وجهها لوجه وقالها بغضب:يكون بعلمك بس إني ما عاد أبي اشوف وجهك...إنتي اصلا طايحه من عيني من زمان وكل يوم يبان لي وش كثر انا كنت مخدوع فيك... شذى وفكها يرجف من الصياح:طلقني يا تركي... تركي يقطها:بطلقك..ولا على بالك أنا متمسك فيك..بس إنتي اولدي وفكينا يابنت الناس... طلع وهو متضايق من اللي صار...مو معقوله هذي شذى اللي حبيتها؟؟؟.. مو معقوله هذي شذى اللي تزوجتها...كان حاس بالحزن والخيبه مايدري وين يروح؟؟؟...او وين يجي؟؟؟... اما هي فكان آخر شي ينقصها هوشه مع تركي...تكمل الناقص..تمت بمكانها تصيح...وتبكي وتندب حظها العاثر... ام بندر وفاطمه اللي لمن جا تركي قالوا له الهوشه مع زياده من عندهم كانت من فاطمه بس برضى من ام بندر...عشان كذا ثارت ثائرة تركي من شذى قالوا إنها قعدت تسب بأم بندر وتسب اخلاقها وإنها ماعرفت تربي عيالها...تركي ماكان مصدق بس قال يمكن طلعت من شذى بلحظة غضب كانت زيادات بس إنها وترت علاقة تركي بشذى زياده... *** بالشرقيه... ام محمد:والله يا محمد لو تاخذ إجازتك برمضان كان احسن... مريم:والله حتى انا اقول كذا...تعب عليك السفر وانت صايم... محمد:لا بالعكس...باخذها بعدين ما تدرون وش بيصير... ام محمد:إنشالله مهوب صاير شي...بس تفاءل بالخير... محمد:إلا شخبار شذى يمه؟؟؟... ام محمد:بخير...امس كلمتني تبارك لي بالشهر ووصتني ابارك لكم... محمد:وش مسويه مع تركي... ام محمد:تقول زينه... محمد:اشك في هذا الشي...والله لو ادري بس إنها صار لها شي منه ياويله مني... مريم تتطنز:اخس يا الشديد.. جحدها محمد بنظره خلتها تتحسف على كلامها... محمد:تتطنزين يا مريم... مريم:والله امزح لا تزعل... محمد:عيدها مره ثانيه وشوفي وش راح يصير... |
.....((تابع الجزء السادس عشر))..... بعد مرور خمسه أيام... راح تركي يزور سلمى...طبعا هذا امر ملكي صادر منه أمه... تركي ما يرفض كلام أمه بس حس بالضيق لمن أحد يقوله لازم تزور فلان وتشوف علان؟؟؟...يحس امه تبي تقهر شذى...وهذا اكيد بتأييد من فاطمه تتأفف من خاطره من هالمشاكل...خاطره إنه يصفي ناحيته من شذى...بس يحس إن الطريق قدامه طويل..كل ما يشيل حاجز يصير بينه وبينها ألف حاجز.. سلمى:ممكن تقولي سبب قطاعتك لي؟؟؟... تركي:انا ما قاطعتك...بس مشغوول... سلمى:اكيد مع السوسه شذى... تركي عصب:سلمى...وشو سوسته...رجاء لا تجيبين طاريها فاهمه؟؟؟... سلمى مسويه عمرها زعلانه:قولها...قول أنا ميت فيها وما احب احد يغلط عليها... تركي تنهد:سلمى...ما يصير كذا من جيت وانتي بس تعاتبيني.. وانا جاي اشوف احوالك... سلمى بدون نفس:بخير... تركي:للحين زعلانه؟؟؟.. سلمى:وإلى بكره بعد... تركي:سلمى...شوفي إذا بتقعدين زعلانه كذا من أي سبب سخيف صدقيني حياتنا بتكون ممله... سلمى سكتت..هي متعوده على عادل إللي يشيلها من الأرض لو تقوله إنها بس متضايقه... تركي:رضينا خلاص؟؟؟... سلمى:تركي بليز لا تصير كذا قاطع... تركي يبتسم من غير نفس:من عيوني ما طلبتي شي... سلمى تضحك:تسلم لي عيونك... وقعد معها سوالف يمكن ساعه وطلع...لأنه معزوم على قهوه عند واحد من اخوياه...وما خلته يطلع إلا لمن اخذت منه وعد إنه يجي يفطر معها يوم برمضان... *** ببيت أبو بندر اليوم الثاني... عايشه وفاطمه كانوا جايين لأم بندر... عايشه:شذى هالسوسه ماتخلص بلاويها... فاطمه:الله يعمي عيونها إنشالله... عايشه:آمين...هي بس تحب تمثل دور المسكينه... ام بندر:حسبي الله على اللي كان السبب بس... فاطمه:هي يمه السبب بكل اللي صار...واللي بيصير... كان حزن شذى يتجدد كل يوم...تحس إنها ما كلمت بشاير وتناقشت معها زي ماتبي...او تتمنى...ومن بعد الهوشه مع تركي ماصار بينها وبينه أي اتحكاك تحس بالزهق والقهر...كانت ماتنام إلى بعد نوبة بكاء طويله... ما أحد مهتم فيها هنا..ما أحد يسال عنها..رمضان اللي هو شهر صلة الأرحام صارت هي فيه بعيده عن كل الناس... دق سعود على شذى وقعد سوالف معها..سألها عن اللي صار مع بشاير قالت له كل شي بس من دون ماتجيب طاري هوشتها مع تركي... سعود:يعني تتوقعين ما فيه امل ترجع؟؟؟... شذى:اصلا انا مالقيتها غير هالمره بس..بس يا سعود ما اتوقع إنها ترجع.. سعود:بس انا احبها...وهي اكيد تحبني بعد... شذى:بس غرورها وكبريائها اكيد بيمنعها... سعود:شذى لا تضيقينها علي... شذى:والله ماني قاعده اضيقها...بس انا اقولك الصدق عشان لا تعيش بالاوهام... كانت أيام رمضان تمشي بسرعه..كان احلى شي عند شذى واللي تستمع فيه هو لمن تروح تصلي التراويح بالجامع القريب من بيتهم كانت تروح مع السواق اللي ينتظرها برى إلين ما تخلص...مع إن تركي نفسه يصلي التراويح بهالمسجد؟؟..بس كان كبريائها يمنعها إنها تروح معه بعد اللي صار بينهم..هو حاول معها كذا مره إنها تروح معه بس هي ترفض... هي تحاول إنها تقطع كل وسيلة اتصال بينهم مع إنها دخلت الشهر التاسع من الحمل... . . في هذا اليوم نادت بنات عمها اللي ساكنين بالرياض وعزمتهم على الفطور هي كانت علاقتها فيهم من تزوجت رسميه.. هديل:اقول شذى شخبارك من رجعتي الرياض؟؟؟... شذى:تمام بخير... هدى:وين بخير الله يهداك وإنتي بالمره ذبلانه... هديل:هذا عشان الحمل يا ذكيه... هدى:بس حتى ولو شوفي بنت جيراننا لمن حملت طالعه محلوه... شذى تمزح معها:آه يا هدى يا الخايسه يعني أنا صرت شينه الحين لمن حملت... هدى:من دون زعل؟؟؟... شذى:شوفي من الحين إذا بتمدحيني ما راح ازعل طبعا...بس إذا بتقولين صرت شينه بزعل ونص... هدى تغني:زعلان ازعل نص نص..لحسن هابعد ابعد آن ونص وراح تبئى أنت اكيد خسرااان... هديل تستغفر:استغفر الله يا الخبله...إحنا برمضان ألحين تقعدين تغنين... هدى وكأنها تذكرت:يووووه صح استغفر الله...والله نسيت... كانت شذى مره مبسوطه مع بنات عمها اللي نسوها جزء لو بسيط من همها... |
.....((تابع الجزء السادس عشر))..... بنفس الليله كانت بشاير تبي تكلم امها عن موضوع شذى اللي شاغل تفكيرها من أول يوم برمضاااان...تذكرت كيف إنها بعد الهوشه تبي تسأل أمها عن سبب هالضجه اللي سوتها...بس أمها ماعطتها مجال للنقاش وعلى طول اتهمتها بالطيبه الزايده وكيف إنها لعبه بيد الكل...سكتت وحاولت تكلمها بعدها بفتره بس رفضت هالشي بعد... بهاليوم كانت جايه نوف بنت فاطمه لبيت جدها أبو بندر... نوف:وين قطوتك من زمان ما شفتها عندك؟؟؟... بشاير بسخريه:توك تفقدينها؟؟؟... نوف:لا تقولين ذبحتيها لأنها من الشين سعود...ترى مايا مالها دخل... بشاير:لا وش دعوه اذبحها...بس امي اخذتها وانا بالجامعه وخلت السواق يقطها... نوف:حراااام والله شكلها كان جنان...أنا اول مره احب القطاوه منها... بشاير:عاد والله هذا اللي صار... نوف تغير الموضوع:أقول بشاير من جد شذى هي السبب باللي صار؟؟؟... بشاير:وش اللي صار؟؟؟... نوف:لا تقعدين تستهبلين علي...اقصد يا حلوه اللي صار لك... بشاير سكتت ما عرفت وش ترد فيه... نوف:تصدقين بعض الأحيان احس هي السبب...بس لمن اتذكر قعدتي معها احس والله إنها مووووت طيبه... بشاير تتطنز:اسمعوا المحلله النفسيه...قولي وش عندك بعد... نوف:يعني ما يجوز لي أعبر عن رايي؟؟؟... بشاير:اوووووه يا نوف والله صايره مره مليغه... نوف:شوفي نفسك إنتي بالأول...الجلسه معك ماتنطاق...ملل في ملل... وقامت نوف من عندها... بشاير انصدمت من كلامها...أنا الحين جلستي ممله؟؟؟... بشاير تكلم نوف قبل لا تطلع:ألحين انا ممله قعدتي؟؟؟... نوف:ممله مرررره...وعلى قولة معلمة النحو اللي عندنا حد السأم... وطلعت نوف من عندها و نزلت تقعد مع جدها اللي كان توه جاي من صلاة التراويح وجدتها تحت... بشاير كانت مصدومه..ما تدري ليش..يمكن من اللي صابها وهي زعلانه.. خاطرها ترجع مثل أول شعارها بالحياه طنش تعش تنتعش... بس وين تطنش بعد اللي صار لها...وباقي حب سعود يتنفس في قلبها... تبيه ينخنق ويموت بس للأسف كل ماله يكبر هالحب على رغم عذاباته وجروحه... *** تركي:أقول يا عمتي... تقاطعه عمته حصه:تركي وش ذا؟؟؟... مو معقول اللي تسويه بمرتك.. تركي:يعني وش تبيني أسوي احب فوق راسهاا عشان ترضى؟؟؟.. حصه:ما قلت حب فوق راسها...بس ليه هالتطنيش كله لها هي وش سوت... تركي:يعني بعد كل اللي قلت لك عليه؟؟؟... حصه عصبت:اقول تركي لو تقوم تجيب لي دوا الضغط والسكر يكون أحسن..إنت ليش ترفع ضغطي كذا؟؟.. تركي:في إيش رفعت ضغطك؟؟؟... حصه:طيب إنت قد قعدت مع زوجتك مره وسألتها وش موقفها باللي صار؟؟؟... تركي:لأ....بس أنا... وترجع تقاطع كلامه:بس إنت إيش يا حظي....إنت مشالله عليك على طول هجمت عليها وقلت لها أنتي السبب باللي صار... وتوك تقولي ألحين إنك ما قد جلست معها بهدوء وتناقشتوا.... تركي:صح كلامك يا عمتي..بس أنا لمن اعصب انسى اللي قدامي لو يكون ابوي... حصه:لا حبيبي يا تركي تعرف تكبت عصبيتك بس إنت قول الصدق إنك تكابر عليها... تركي:والله ما أدري..بس اللي وتر علاقتي فيها زياده هوشتها مع امي اللي يحفظها... حصه: وإنت على طول جيت تركض وهوشه معها بدون ما تسألها... تركي بعصبيه و معقد حواجبه:أنا يمكن أسكت على كل شي إلا أمي ما أرضى...بدت مع اختي ما زلت أحترمها...بس أمي مستحيل ولمن دريت عن سالفتها مع امي قامت عفاريتي... حصه: يا هالعفاريت اللي ماتبي تهجد برمضان...طيب اسألها..وبعدين امك احسها مزوده بسالفه شوي...تحب تبهر السوالف مشالله... تركي ابتسم:لا عاد حرام عليك يعني امي تبين تقولين تحب تزود بالسوالف... حصه:الله اعلم...بس هي لمن قالت لي السالفه كانت السالفه غير.. بس يعني سبحان الله السالفه في يومين تغيرت الله العالم... عرف تركي إن عمته تقصد إن أمه يمكن زايده شوي بالسالفه... تركي:تكفين يا عمتي يا يمه...من جدك امي يعني مزودت لي بالسالفه... حصه بقلة حيله:تعرفني والله ما أحب اكون فتانه وانقل الكلام... تركي بضيق:حشى لله يا يمه...بس إنتي قولي لي... وقالت له عمته حصه عن زيادات امه بالسالفه وقالت له بعد عن اللي صار بالحقيقه... تركي منصدم:وأنتي وش يدريك؟؟؟... حصه:امك بعظمة لسانها قالت لي... تركي باقي منصدم: افا يعني امي الله يهداها لعبت علي... حصه:لأنها تدري إنك اهبل وبتصدق...ولأنها قالت لي إن مرتك شذى رافعه ضغطها وباقي ما بردت حرتها فيها...فحبت إنك تبرد حرة امك... تركي:بس كذا حراااام... حصه:والله عاد يا تركي انا ماقلت لك هالكلام إلا لمن شفت شذى حالها وصل كذا... يعني انا ماني مصدقه إنها ورى سالفة اخوها وانا عمتك أجل وشلون أنت اللي ساكن معها ومقابلها كل يوم... تركي:انا محتار أحس راسي بينفجر...ما أدري امشي مع من... حصه:امش مع قلبك...وروح كلمها بهدوء و لا تقلبونها هواش... تركي:أحاول... حصه:لا تقول احاول ولا ترى بهالدله على راسك(كانت تأشر على دلة القهوه اللي قدامها)... تركي يضحك:اوكيه اوكيه..بس انت هدي يا ولد الحلال...خلاص ماراح احاول...إنشالله اكيد... حصه تضحك:ترى والله ما قلت هالكلام إلا عشانك أنت... |
.....((تابع الجزء السادس عشر))..... متعب:رجاء يا سارا لا تفتحين هالموضوع مره ثانيه... سارا:متعب...أنا ابي ازورها مو على كيفك تمنعني... متعب:ترى والله لو تروحين لها لأزعل... سارا:عن البياخه يا متعب...وشو أزعل...أنا بس قلت لك أبي أزورها.. متعب:حتى ولو...يا أنا يا هي... سارا:ياخي عادي...بس باقعد عندها ساعه... متعب:لأ...شذى بالذات ما راح تزورينها... سارا:وش معنى شذى بالذاااات من بين خلق الله... متعب:تعرفين ليش... سارا:لا تقول عشان سالفة بشاير... متعب:إلا عشانها... سارا:طيب خلني أروح اشوف موقفها من اللي سواه اخوها يمكن مو راضيه متعب:لأ ما فيه يا سارا... سارا تستسلم للواقع:يا شينك...خلاص مانيب رايحة لها... كانت سارا خاطرها تروح لشذى تعرف وش اللي صار منها... خصوصا بعد الهوشه اللي في بيت ابو بندر... تحس إن شذى ماهيب راضيه.. وكان خاطرها إنها تروح لها وتقعد معها بس متعب زوجها رااافض هالشي بتاتا.. بس حطت هي في بالها إنها لا حناعرب وهوايتنا الدموع والأكشنات ......حلوه عجبتني حس تركي إن عمته حصه على حق..لازم يقعد معها.. واساسا هو من دون ما تقوله يبي يقعد معها...هو بخاطره متأكد إنها مستحيل تكلمه بعد اللي صار...بس لازم يحاول معها....لأنه مشتااااق لها مررره... وفي نفس الوقت يحس إنه غلط عليها واجد..يعني كافي اللي فيها يقوم هو يزود الطين بله..راح لها لغرفتها..دق عليها الباب ودخل عليها لمن لقى الباب مفتوح.. سمع صوت مويه بالحمام وتوقع إنها تسبح(تاخذ شاور)...انتظرها إلين ما طلعت... هي اول ما طلعت وشافته بوجهها تحول إنتعاشها بعد الحمام إلى ضيق بان على ملامح وجهها...اول ما شافته قعدت تخز فيه وبعدها راحت قدام التسريحه تجفف شعرها بالمنشفه(التاول) وتمشطه هي معطيته ظهرها... هو لمن شافها كذا سكت...ما علق...وهي بعد فترة هدوء... شذى وهي تناظره من المرايه:كيف تدخل غرفتي من دون ماتستأذن... تركي:دقيت الباب محد رد...ولمن فتحته لقيته مفتوح ودخلت... شذى تتطنز:مشالله هي وكاله من غير بواب هاه؟؟؟... تركي يناظرها:والله انا اشوف الشغالات يدخلون لمن يلقون الباب مفتوح يعني السالفه وقفت علي... |
.....((تابع الجزء السادس عشر))..... شذى اللي كانت تناظره في المرآيه لفت عليه... شذى وهي حاطه يدها على خصرها:والله عاد أنا سامحة لهم..إنت لأ... تركي بضيق:ليه...أنا داخل مكتب وزير عشان تسمحين لي طال عمرك... شذى ببرود:تدري ليش...لأني مابي اشوفك...خلاص... تركي عصب بس حاول إنه يتماسك... تركي:يعني على بالك إني ميت على شوفتك... شذى بإستنكار:اجل وش تبي جاي عندي ألحين... تركي:شكلي أنا الغلطان لمن جيت اكلمك... شذى:غلطان..وباقي للحين تتوقع إنك غلطان؟؟؟... يا حليلك يا تركي من اللي ضحك عليك بهالكلام... تركي يخزها:تتطنزين؟؟؟... شذى:لااااا أبد من اللي يقول كذا؟؟؟...(تتكلم بجد)اصلا الغلط راكبك من ساسك لراسك.. وبعدين لا تقعد تخز فيني كذا... تركي حاول إنه يكون اكثر ليونه معها... تركي:شذى إنتي راضيه إن حالي انا وإنتي وصل كذا؟؟؟... شذى كانت متوتره بس ماحبت تبين له... شذى بكبرياء:راضيه...تدري ليش؟؟؟...لأنك ابشع مما كنت اتوقع يا تركي كنت مخدوعه فيك... تركي:طيب أنا وش اقول عنك؟؟؟... شذى تناظر فوق:اللهم طولك ياروح(بعدين قعدت تناظره)تركي خلاص أدري وش بتقول عني أنانيه وحقوده وقلبي اسود ومافيني خير... تركي يفتح عيونه:تعترفين يعني؟؟؟... سكتت شذى لأن هالكلام كان يقولها كل ماتهاوشوا...وقعدت تكمل تمشط شعرها... تركي:شذى خلي هالهواش على جنب...وخلي اتفاهم معك والله خاطري اجلس معك بهدوء من زمااان... شذى والدموع بدت تلمع بعيونها:مشالله عليك لمن تبي تتهاوش تتهاوش ولا احد يمنعك...بس لمن تبي النقاش بهدوء بعد بأمرك...ليه على بالك بنات الناس لعبه عندك... تركي:ليه تقولين هالكلام؟؟؟... شذى بعبره:لأنك بأول يوم برمضان وسالفة امك...تجرأت علي ومديت يدك... وقعدت تهاوش ولا حتى سمعت كلمه وحده مني... مع إني متأكده إني ماغلطت عليها...بس ماحبيتها تهاوشني... تركي برجاء:شذى تكفين لا تبكين وتصيحين.. خلي نتكلم بهدوء... شذى تمسح دموع تبي تنزل:مابينا نقاش كل شي إنتهى... مو قلت لي اولدي وفكنا يا بنت الناس... تركي يناظرها بإمعاااان:شذى تكفين مو كل ما ابي افتح بيني وبينك باب تصكينه ما يصير كذا يا بنت الحلال... شذى بإصرار:تركي..خلاص تكفى ما ابي منك شي غير إنك تفكني عاد.. تركي:طيب أنا آسف إذا كنت غلطت بحقك...والله على سالفة امي من جد متحسف على اللي صار... شذى بسخريه:ليه متحسف؟؟..إنت ماسويت شي غلط...مو كنت تدافع عن امك؟؟... تركي قام ووقف قدامها وحط يدينه على كتوفها:آسف على هذاك اليوم والله آسف... شذى توخر يدينه بهدوء:اعتذارك تركي مرفوض.... تركي:شذى... شذى:تركي كفايه والله ماعاد فيني طاقه اكثر من كذا... نارها تركي وشاف فكها يرجف..شكلها بتبكي خلاص... تركي:أنت الحين ليه تبكين؟؟؟... شذى بعصبيه:والله عاد مالك دخل فيني...دموعي وكيفي فيها... تركي بهدوء:براحتك... وهو طالع من الغرفه.. شذى:والله ياليت تصك الباب وراك... طلع تركي من عندها وبعد ما صك الباب...دخلت في نوبة بكاء طويله... من اللي صار تحس إنها قدرت تنتصر على تركي...حلوه ذي يبيني على كيفه... أما هو عرف إنه ما استفاد شي ابد من اللي صار غير إنه زاد حزن شذى.. ما عرف كيف يجي معها..عنيده مررره وراسها ايبس من الصخر... |
.....((تابع الجزء السادس عشر))..... كانت بشاير مع أم بندر قاعدين بالصاله يتفرجون تلفزيون والساعه عشر بالليل... بشاير:اقول يمه ودي افتح معك سالفه بس من الحين الله يحفظك لا تعصبين... ام بندر:لأ ماراح اعصب...بس إنتي قولي بالأول... بشاير:يمه..(بتردد)شذى خاطري... ام بندر تقاطعها بعصبيه:اقول انثبري بس...لا عاد تجيبين طاريها على لسانك مره ثانيه.. بشاير:طيب ليش؟؟؟... ام بندر:لأنك مخفه وينضحك عليك بكلمتين... بشاير عصبت:رجاء يمه لا عاد تعيدين هالكلام...وش مخفه؟؟؟... ام بندر:يعني لمن جاتك بحجرتك وضحكت عليك على طول كنتي بتصدقينها ... بس الحمدلله إني لحقت عليك لمن قالت لي فاطمه... بشاير:بصرررراحه كان اسلوبك يمه ابد مو حضاري... ام بندر عصبت:بشاير لا تصدعين راشي بهالسالفه خلاص... بشاير:لا يا يمه... بعدين شذى كانت جايه تكلمني انا يعني بالعربي الفصيح مال أحد فيكم دخل بيننا... ام بندر:بس انا امك واخبر الناس اكثر منك... بشاير:كلامك على عيني وراسي من فوق..بإستثناء شذى أنا اعرفها اكثر منك... ام بندر:يعني بعد اللي صار من اخوها سعود بترجعين معها عادي... بشاير:قلتيها بنفسك...اخوها مو هي...يعني لا تظلمينها يا يمه... ام بندر:اقول والله إنك ماتدرين وين الله حاطك..(بعصبيه) ماتفهمين هي السبب باللي صار وهي اللي قالت لأخوها يتركك... بشاير:طيب يمه خليني أروح لها واتفاهم معها... ام بندر:بشاير والله لو تفتحين هالموضوع معي مره ثانيه لتزعلين علي فاهمه؟؟؟... سكتت بشاير ورجعوا يناظرون التلفزيون...صدق بشاير سكتت بس باقي هالسالفه تحوس ببالها...ودها تلقى شذى..وهي مقهوره حتى من تركي اللي لمن تقعد معه وهو يجي يزورهم...مايجيب طاري شذى ابد على لسانه... بس في بالها انا لازم القاها واللي يصير يصير؟؟؟؟... *** الليله أعلن التلفزيون السعودي إن بكره عيد...والشهر ناقص...يعني 29 يوم بس كانت الفرحه تشمل المملكه كلها والعالم الإسلامي بعد...الناس فرحانين ومطروبين بقدوم العيد...والأطفال يغنون(مرحب مرحب بالعيد...أهلا أهلا بالعيد)<<<<أدري قديمه بس تمشي هههههه... وطبعا التهاني والتبريكات شغاله بالمسجات والتليفونات اللي مشغله الإتصالات..الزعل بهالليله ممنوع والعتب مرفوع إلى حتى بعد العيد.. طبعا واللي باقوا ما خلصوا مقاضي العيد على طول راحوا السوق يحاولون يكملون الناقص من اغراظهم... بعد ماعرف تركي بإنه بكره عيد من إمام المسجد وإنه مافيه بكره صلاة تراويح...راح كعادته السنويه يمر امه وابوه يبارك لهم بالعيد... أم بندر:الله يبارك فيك يا تركي...وكل عام وإنت بخير.. تركي:وإنت بخير يايمه... ويجي ابوبندر ويبارك له تركي بالعيد ويقعد سوالف معهم يمكن ساعه.. وبعدها استذن يبي يروح... ابوبندر:تو الناس... تركي:بدري من عمرك يباه...بس تعرف الليله عيد...وخاطري أمر على على عمتي حصه... ابوبندر:اذنك معك... وقبل لا يطلع تركي لحقته امه تعطيه اغراض يوديها لعمته حصه.. تركي عند الباب:اعطيها عمتي حصه... ام بندر:إيه عطها ولا تنسى.. تذكر تركي موضوع شذى وكذب أمه عليها... تركي:يمه ممكن اسألك سؤال؟؟؟... ام بندر:اسال يا بعد عمري... تركي:يمه ليش تكذبين بسالفة شذى علي وإنها طولة لسانها عليك... ام بندر ماعرفت وش به ترد... ام بندر:انا ما كذبت... تركي:لا يمه لعبت علي...وعمتي حصه هي اللي قالت لي... ام بندر:اووووه من حصه هذي الفتانه ما تعرف تسكت... كانت ام بندر مرتبكه وهي من عادتها ماتعرف تكذب..بس لمن درت عن حصه قالت انقهرت وعرفت إنه افيه مهرب من السؤال... تركي:ليه يمه كذا... ام بندر لمن عرفت إنها ماراح تقدر تجادل تركي راحت وخلته... ام بندر وهي رايحه وتقول بتردد... ام بندر:يالله مع السلامه مابقدر اخلي ابوك بحاله... تركي:يمه بس انا باقي ماخلصت كلامي.. ام بندر:خلاص يا تركي هذي السالفه قديمه وبكره عيد...يالله بروح لأبوك والأغراض عطها عمتك هالفتانه... راحت ام بندر ورجعت المجلس وهي متفشله مرررره من ولدها...ياربيه وين اودي وجهي منه...كله منك يافاطمه خلتيني اكذب عليه..وكله من هالشينه شذى هي سببه البلاوي كلها...لمن عرفت إنها ماهيب قد المواجهه انسحبت..وبخاطرها اوريك ياحصيصه محد يقولك شي... أما تركي انقهر من امه...ياربي وش فيها كذا ماخذه السالفه بكل بساطه ولاكنها مسويه..ماقدر يقول شي لأنها امه... . . هو عند عمته حصه قعد سوالف معها...وقالها عن أمه اللي ماتت ضحك وعرفت إنه ام بندر بتقعد تناقشها بكرة بيوم العيد وتسوي مشكله زتتهمها بالفتنه وإنه صورتها تشوهت قدام عيالها... تركي:يمه...أنا ما ابي العيد يجي وانا و شذى باقي كذا... حصه:والله الحل بيدك أنت... تركي سكت وقالها عن تهديده لشذى بأنها لمن تولد بياخذ ولدها و يرجعها بيت أهلها... حصه بعصبيه:ما تخاف من ربك أنت؟؟؟...ليش تهدد البنت كذا.. والله حرام تبي تحرمها من ضناها...والله يا تركي إنك في هذي من جد نذل... تركي:بس انا انقهرت وقلت هالكلام بلحظة زعل... حصه:وعمرك ما رضيت إنشالله...حرام والله روح راضها واكسب ودها... تركي:بس هي تتمنع يا عمتي... حصه:والله على حركاتك معها واسلوبك الشين اكيد من حقها تتمنع.. تركي:يعني اقعد وراها إلين متى كذا؟؟؟... حصه:إلين ماترضى...بس بسألك سؤال واحد بس؟؟؟... تركي:اسالي... حصه:وياليت تجاوبني بصدق...إنت تحب شذى ولا إنت تبي الفكه منها وتدور لك أعذار...إذا إنت خلاص كرهتها سرحها بإحسان وريحها... تركي:لا..انا والله اموووت عليها واحبها...بس في اشياء كثيره تمنع بيني انا وياها... حصه:والله لو إنت تحبها من صدق...كان مستحيل أي شي يمنع هالمشاكل والمواصيل اللي وصلتها معها... تركي:يعني... |
.....((تابع الجزء السادس عشر))..... حصه:يعني..الأمر لك إنت إذا تبيها وتحبها ومتمسك فيها أكيد بتكون حريص على مشاعرها وحياتك معها... سكت تركي وقعد يفكر في كلام عمته اللي تتكلم بواقعيه...حس إنه لازم يقرر حياته مع شذى لوين بتوصل؟؟؟... *** كانت ليلة العيد..يعني للناس الفرح...بس هي كانت تحس بالحزن... ماتدري ليش...يمكن لأنها فاقده اشياء كثيره... على إنها مانزلت للسوق إلا بس مره وحده مع بنات عمها...وشرت لها بس تنوره و بلوزة حمل مع صندل كان لبسها عادي لأنه ما كان لها خلق تنزل السوق مره ثانيه وتبي تخلص اغراضها بسرعه...تذكرت كيف إنها بالأول تحب يكون لبس العيد حقها مميز...بس سبحان الله الأول تحول... تذكرت كيف تركي معها ليل العيد العام الماضي..وكيف هالسنه...بالماضي حب...والحين بلا مشاعر تحس تركي تغير للأحسن...ما عاد فيه كره لها من جهته تغير عن بداية رمضان..كان الشغالات يقولون لها إن تركي يسأل عنها إذا اكلت و اهتمت بصحتها كانت تقول بنفسها أكيد عشان ولدها اللي ببطنها يسأل عنها مو لسواد عيونها...بس مع هذا كله كانت تخاف من الولاده...لأنها غير مخاوف الولاده اللي تعيشها كل بنت مع أول طفل لها...كان يراودها فكرة طلاقها وسحب الولد منها...كانت تتمنى إنها تولد وتفتك من هالتعب وبنفس والوقت ماتبي تولد..ماتبي ولدها ياخذونه منها أبد أبد... كلمتها أمها ام محمد تبارك لها بالعيد.. أم محمد:كل عام وإنتي بخير يا الغاليه... شذى:وإنتي بخير...ومن العايدين مقدما... ام محمد تضحك:لاااا العايدين بكره... شذى:خلاص يمه كلها 8 ساعات ونصير بكره... ام محمد:سبحان الله رمضان مر بسرعه...بس يالله إنك تعيده علينا بالخير والصحه والعافيه... شذى:آمين إنشالله.. أم محمد:والله خاطري يا شذى إنك تعيدين معنا... شذى:والله حتى أنا خاطري يمه بكذا... ام محمد:شذى حبيت اسألك عن تركي وش مسوي معك... شذى:من أي ناحيه يمه؟؟؟... ام محمد:يعني اقصد علاقتك فيه زينه...يهاوشك شي كذا... شذى:لا ما بينا أي شي ألحين لا زين....ولا شين... ام محمد:يعني بالأول شين؟؟؟... شذى اللي ماتحب تزعج امها بأخبار شينه:مثل ما أقولك يمه لمن كنتي تكلميني قبل...يعني زعلان شوي عشان اخته... ام محمد:ما أقول غير الله يكتب فيه الخير...مع إني حاسه إنك تخشين علي.. شذى:وش يجبرني اخش عليك..لا بالعكس كل شي يصير لي قلت لك.. ام محمد:اتمنى هالشي من كل قلبي... وبعدها قعدت سوالف مع امها شوي...وبعد ما صكرت دقت على اخوانها واحد واحد تبارك لهم بالعيد..وعلى حريم اخوانها بعد...وطبعا خويتها ريم دقت عليها بس ما طولت لأن ريم كانت بالسوق... *** كانت شذى قاعده بحالها بعد ما صكرت من ريم خويتها...حست بالضيقه وإنها ودها تصيح..بس خلاص هي لاعت كبدها من نفسها ومن كثر صياحها... وهي قاعده إلا تجيها الشغاله ومعها جوالها يدق... كاتي:مدام جوال إنتي فيه يدق... ولمن خذت شذى الجوال تفاجأت لمن شافت المتصل سارا مرة متعب... ترددت ترد ولا لأ؟؟؟...بس في النهايه ردت... سارا:شذى وينك ما بغيتي تردين؟؟؟... شذى تفاجأت من كلام سارا... شذى:هلا سارا؟؟؟... سارا:وينك انتي الحين... شذى:بالبيت... سارا:اشوى الحمدلله...طيب افتحي الباب انا عند الباب الحين... شذى تفاجأت:وش تقولين؟؟؟... سارا:يله باي اقول افتحي انا عند الباب... وصكت سارا كانت شذى متفاجأه يالله سارا جاتني...كانت مندهشه وفرحانه واخيرا احد عبرني...وخلت الشغاله تفتح الباب ونزلت ببيجامتها... ولمن دخلت سارا تفاجأت زياده لمن شافت معها بشاير...مو معقوله بشاير بنفسها جات... سارا:هلا بالدوبه شذى...مبروووك العيد... بشاير:هلا شذى ومبروك بالعيد على قولة سارا... سلمت عليهم وشذى وهي باقي متفاجأه..بشاير وسارا جايين يزورونها... ما اقدر اوصف لكم كبر فرحة شذى بهالزياره...مره فرحت من الخاطر.. وقعدوا سوالف معها ولا كأنه شي صار من قبل بينهم... سارا:حسبي الله على ابليسك يا بشاير كسرتي رجولي بالسوق.. بشاير وسارا كانوا وبالسوق وهم راجعين الساعه 11 بالليل مروا على شذى من دون محد يدري كمغامره منهم... بشاير:والله انتي اللي بس كل ما مشينا خطوتين تعبتي وتقعدين السوق يبيله شده... سارا تضحك:اموووووت على الشده...يا خبله ما إحنا داخلين ساحة معركه.. وكانوا قاعدين سوالف شذى فرحت من قلبها على جيتهم لها... ولمن جات الساعه 12...استأذنت سارا ومشت... شذى:سارا اقعدي من زمان عنك؟؟؟... سارا:لا والله لازم ارجع... |
.....((تابع الجزء السادس عشر))..... ورجعت سارا مع سواقها اللي كان ينتظرها برى...أما بشاير فقعدت مع شذى... تناقشت بعدها مع شذى في هالموضوع..اللي هو موضوع سعود وعلاقة بشاير فيه...بس حلفت شذى بالله العلي العظيم بأنها ماهيب راضيه باللي صار ولا كانت اصلا تدري عنه...بشاير وشذى ما قدروا بالأخير غير إنهم يبكون...مايدرون ليش بس بشاير ماحبت يكون الوضع مأساوي يوم العيد... بشاير وهي تضحك وبعيونها دموع:خلاص بلا أفلام هنديه إحنا ليلة عيد.. شذى اللي ضحكت على كلام بشاير مع إنها تصيح:هههه بشاير عن الطنازه.. بشاير:بليييز خلاص لا نصيح والله اكره شي عندي بالعالم الصياح... وبعدها قعدوا سوالف وضحك...إلين الساعه 3 الفجر... وراحت بشاير مع تركي اللي تفاجأ لمن شاف بشاير عنده بالبيت ولمن سألها عن سر الزياره قالت تبي تتناقش مع شذى والحمدلله طاح الحطب بينهم؟؟؟... بعد مانزل بشاير ورجع للبيت شاف شذى قد دخلت غرفتها... وشاف النور من تحت الباب طافي معناته إنها نامت... شذى اللي النوم كان رافض يجيها من الفرح بعد زيارة سارا وبشاير لها كانت فرحتها لا توصف...كانت احلى عيديه لها..كانت تشكر الله على هالمفاجأه الحلوه...عرفت منها كبر قلب بشاير وبياضها اللي مثل الثلج... وطبعا ماتنكر طيبة سارا وحلاوة عشرتها... *** |
.....((تابع الجزء السادس عشر))..... العيد.... الساعه ثمان الصباح... كان الكل فرحان وشذى من أمس فرحانه وماجاها النوم إلا من بعد صلاة العيد...بعدها راحت تنام...هي كانت فرحانه بس جهتها مكن ناحية تركي كانت زعلانه و هي كانت تبي تقهره فخلته مايشوفها يوم العيد... أكيد هذا الشي بيقهره وقالت للشغالات يقولون له إنها نايمه... تركي اللي انقهر منها وهو اللي حب يعيد عليها...بس لمن لقاها نايمه راح بيت الوالد... . . في بيت ابو بندر كان الكل فرحان...وبشاير وسارا كانوا فرحانين أكثر بنجاح مغامرتهم اللي بليلة العيد.. والكل كان جاي...حصه وام بندر تهاشوا من صباح الله خير..أم بندر متهمه حصه بالفتانه وحصه متهمه ام بندر بالنشابه اللي تنشب بين الأزواج...بس كالعاده نص ساعه ورجعوا عادي والكل فرحان.... *** بالظهر يوم العيد...كانت عزيمة الغداء ببيت ابوبندر...بس شذى طبعا ماجات رفضت إنها تجي... طبعا شذى اللي كانت كاشخه ولابسه ماحبت تفوت على نفسها هالفرصه...إلا وتلقى تركي فيها...ومثل مابغت قدرت فاطمه إنها تلقى لهم جو شوي رومانسي...تركي كان باله مشغول مع شذى.. اكيد ياحليلها ماحست بحلاوة العيد... سلمى:وش فيك سرحان كذا؟؟؟... تركي:ابد مانيب سرحان...بس تعرفين شوي مرهق مواصل من امس مانمت بليلة العيد... سلمى بسؤال مبطن:ليه مانمت...وش حادك على السهر؟؟؟... تركي عرف قصدها بس ماحب يخلق قضيه:اصلا من عادتي من انا صغير ماانام ليلة العيد... سلمى:وش هالشقى...أكيد تكون بيوم العيد تعبان ومرهق... تركي يبتسم:إلين المغرب بس وبعدها اصحصح... سلمى بدلع:طيب وش رايك اليوم بلبسي؟؟؟... كانت لابسع تنوره فوق الركبه بشوي مع توب كت وهاينك الكل لونه بيج مع حزام أحمر وكعب أحمر....كان شكلها مره نايس ومشرقه طالعه جنان.. تركي يناظرها:طالعه حلوه..(بس يناظر سيقانها) اقول سلمى مو احسن لو كانت التنورة اقصر من كذا بشوي... كان يقولها بطنازه... سلمى:تتطنز حضرة جنابك؟؟؟.. تركي يتكلم بجد:بصراحه حتى لو ماسألتيني كنت توني بأعلق على لبسك هو حلو بس مره قصير...ترى مهوب زين لبس المره يكون كذا قصير... سلمى:تركي عن التعقيد... تركي:مع عقدتها...(بجديه أكثر يتكلم) رجاء يا سلمى ملابس مثل كذا لا تلبسين ترى اكره ما شوف وحده تلبس مثل كذا فاهمتني؟؟؟... سكتت سلمى وانقهرت:إنت ليش معقد كذا؟؟...ليه ماتطور مع امة محمد... تركي:والله عاد الله خلقني معقد وش تبيني أسوي لك؟؟؟... انقهرت سلمى وقعدت شوي وقامت..تركي مارضاها خلاها تزعل لأنه من جد لبسها ابد موعاجبه..بنفسه كيفها خل تتعدل غلطانه وتبي احد يراضيها.. بعد مارجع تركي للبيت مالقى شذى..حس بالحزن مايدري ليه... خاطره ياخذها ويطلعون يتمشون هاليوم... هو راح بالمغرب مع اخوياه يتمشى.. ولمن صارت الساعه تسع بالليل رجع ونام... اما شذى فكانت عاكفه بغرفتها تقرا كتب تحاول تسلي عمرها فيها... *** طبعا باليوم الثاني بالعيد جوا بنات عم شذى عندها يزورونها... كانت مستانسه مره بجيتهم...عزمتهم هي من الغداء و جوها...كانت وناسه القعده خصوصا هدى بنت عمها الصغيره كانت تضحكهم وهي تقلد حرات الفنانين وتتطنز عليهم... شذى تضحك:من جد هدى إنتي توووووحفه... هديل تضحك:هدى وري شذى حركات كارول سماحه لمن تقلدينها... هدى تضحك:الحمدلله والشكر ياكرهي لكارول... وقعدت تقلدها مثل ما كانت تغني بأغنية(غالي عليا)... شذى وهديل كانوا ميتين ضحك عليها... شذى:تنفعين تصيرين مع داوود حسين وتقلدين الفنانيين... هدى:تعرفين هنا بالرياض محد يعترف بدخول الفتيات عالم الفن... هديل:يعني أنت مع هالخشه تبين تدخلين التمثيل؟؟؟... هدى تضحك:ههههه لا وش دعوه...أنا بنت ناس وش لي بالتمثيل... كانت شذى مستانسه مره معهم...بس كانت تحس بمثل الآلآم تجيها ببطنها بين فتره والثانيه...كانت تتحملها...بخاطرها تقلصات وتروح... من جد كانت تشكر الله على إن بنات عمها جووها ولا كانت بتموت منتحره من الطفش... قعدوا معها بنات عمها إلى الساعه 4العصر وراحوا... حاولت فيهم إنهم يقعدون معها زياده بس رفضوا وقالوا إنهم مصخوها بالقعده...بعدها راحوا.. |
.....((تابع الجزء السادس عشر))..... مع المغرب كانت الآلآم تزداد مع عاد قدرت تتحمل...مسكت الجوال ودقت على تركي...تركي اللي كان أصلا راجع البيت..شاف شذى تتصل عليه.. استغرب وش عندها...اصلا هي ماتدق عليه ابد... تركي:هلا شذى بغيتي شي؟؟؟... شذى تصيح:تركي إلحق علي ماني قادره اتحمل آلام فضيعه... صكت الجوال منه وهي تصيح ماهيب قادره تتحمل...السواق كان بإجازه هذا اليوم..وهذا اللي حدها تدق على تركي...تركي اللي خاف موت ماعرف وش فيها... . . . كان تركي جالس برى ينتظرها...كان مره خايف ومهوب عارف وش يسوي...الدكتوره قررت إنها حالة ولاده وعلى طول دخلتها داخل... كان مابين حالة يأس ورجاء...فرح وخوف...خوف عليها..وفرح بأنه بيصير أب...كان يدعي الله إنه يقومها بالسلامه... . . بعد مرور فتره طويله مرت كالدهر على تركي...ولدت شذى وزف له الخبر عبر النيرس إنها جابت ولد...فرح إلا بغى يطير من الفرح... أخيرا انا صرت أبو...سأل عنها قالوا له إنها بخير... اول ماطلعت الدكتوره... تركي:هابشري يا دكتوره إنشالله هي بخير.... الدكتوره اللي كانت سعوديه:الحمدلل بخير هي..وبعد شوي تقدر تشوفها... تركي:بس ليش هي طولت كذا بالولاده؟؟؟... الدكتوره قعدت تضحك وهي تعدل حجابها:بالعكس عادي وولادتها كانت سهله والحمدلله...بس تعرف لأنها بكريه وهذا اول ولد... تركي:مشكوره يا دكتوره الله يطمنك... الدكتورة:العفو...وتقدر بعد شوي تشوفها هي والولد... . . راح لها بالغرفه كانت منسدحه وتعبانه مره ومغمضه عيونها..كانت تحس بالإنهاك في جميع أنحاء جسمها... قرب تركي منها...ناظرته بتعب خاطرها تتكلم بس كانت مره تعبانه... مسك تركي يدها...وباسها على جبينها وخدها... تركي بهمس:مبروك شذى..والحمدلله على السلامه... شذى بصوت واهن:الله يسلمك...وين الولد؟؟؟... تركي:الحين بيجيبونه...بس إنتي ارتاحي... ودخلت النيرس ومعها الولد...راح لها تركي يبي يشوفه... كان صغير حجمه ووجهه أحمر وفمه كان مره صغير... باسه وهو في حظن النيرس.. النيرس:شيلوه ده ابنك... تركي ابتسم بفشيله:اخاف يطيح...خليه بحظنك... النيرس:الله رقال طول بعرض ومابتعرفش تشيلوه...شباب آخر زمن.. تركي بخاطره أنثبري بس... وودته النيرس عند شذى..اللي كانت تحترق وهي تبي تشوفه... حطته النيرس جنبها..كانت مره تعبانه وماقدرت تشيله...ابتسمت شذى لمن شافته...باسته على خده بخفه...حطت يدها عليه...بعدها قعدت تناظر فيه وهي ماهيب مصدقه إنها جابت ولد وولدت وإنها الحين ام..بعدها جاتها الصيحه..بدت تصيح بصوت مكتوم..انتبه لها تركي..وحب يخفف عنها.. تركي:حبيبتي..خلاص لا تصيحين...وش اللي يصيحك ألحين؟؟؟... سكتت شذى وغطت بيدها عيونها وهي تصيح...شال تركي يدها من على وجهها وحب يخفف عنها... سحب تركي يدها وباسها وقالها:شذى لا تصيحين والله خلاص كفايه... شذى:لا تاخذه مني يا تركي...والله حرام.. تركي:ومن قالك إني باخذه منك...الله يهداك بس إنتي ارتاحي الحين... وقعد تركي يخفف عنها من احزانها...إلين ماسكتت...وهدت وقعد معها إلين مانامت وهو بس يناظرها ويناظر ولده...ما يدري يحس بهاللحظه بس تغيرت اشياء كثيره فيه... |
.....(( الجزء السابع عشر))..... برغم.. برغم خلافاتنا.. برغم جميع قراراتنا.. بأن لا نعود.. برغم العداء..برغم الجفاء.. برغم البرود.. برغم انطفاء ابتساماتنا.. برغم انقطاع خطاباتنا.. فثمة سر خفي.. يوحد مابين اقدارنا.. ويدني مواطئ أقدامنا.. ويفنيك فيّ.. ويصهر نار يديكِ بنار يديّ.. 000 برغم جميع خلافاتنا.. برغم اختلاف مناخاتنا.. برغم سقوط المطر.. برغم استعادة كل الهدايا..وكل الصور.. برغم الإناء الجميل.. الذي قلت عنه..انكسر.. برغم رتابة ساعاتنا.. برغم الضجر.. فلا زلت أؤمن أن القدر.. يصر على جمع أجزائنا.. ويرفض كل اتهاماتنا... 000 برغم خريف علاقاتنا... برغم النزيف بأعماقنا.. وإصرارنا... على وضع حد لمأساتنا.. بأي ثمن.. برغم جميع ادعاءاتنا.. بأني لن.. وأنك لن.. فإني أشك بإمكاننا.. فنحن برغم خلافاتنا.. ضعيفان في وجه أقدارنا.. شبيهان في كل أطوارنا.. دفاترنا..لون أوراقنا.. وشكل يدينا..وأفكارنا.. فحتى نقوش ستاراتنا.. وحتى اختيار اسطواناتنا.. دليل عميق.. على أننا.. رفيقا مصير..رفيقا طريق.. برغم جميع حماقاتنا.. (نزار قباني) *** باليوم الثاني...قامت شذى وهي تعبانه ناظرت السرير الصغير اللي جنبها خاطرها تشوف ولدها ومن حسن حظها كان على وقت دخلت النيرس... النيرس:صباح الخير يا ست الكل... شذى بإبتسامه:صباح النور.. النيرس:عامله إيه النهار ده..إنشالله كويسه.. شذى:الحمدلله أحس إني أحسن من أمس... النيرس وهي رايحه لسرير البيبي:وأخبار البيبي اليوم؟؟؟.. شذى:زين...أعطيني إياه... وشالته النيرس وباسته وأعطته شذى وهي تقول... النيرس:مشالله بيقنن الصغنن ده... شذى وهي تشيله وتبوسه:مشكوره.هذا من ذوقك... النيرس:مرت عليك الدكتوره اليوم؟؟؟.. شذى:إيه مرت علي ببداية الصباح...بس رجعت نمت... وبعدها قعدت تناظر شذى بولدها وهو بحجرها...كانت مبسوطه حيل عليه..مع إنه كان نايم ولا يتحرك..بس كانت تراقب تنفسه وتتأمل ملامحه كانت تمسك يده اللي كان قابض عليها بقوه وتفكك أصابعه ومبهوره منه ومن صغر حجمه كأنها أول مره تشوف طفل..بس يمكن لأنه غير لأنه ولدها؟؟...على قولة الكويتيين(حشاشة يوفها)..تحط يدها على راسه بحذر لأنه تحسه باقي طري..وهي تناظره تذكرت إنه تركي كان يقولها إنه بياخذه منها..وإنه بس ينتظرها تولد...حست بالدمع بعيونها..مع إنه تركي أمس حلف لها إنه مابياخذ ولدها منها..بس حتى ولو فكرة إنه بياخذه تثير أحزانها وحسرتها..بخاطرها(لا مستحيل أي حد بالعالم ياخذ ولدي مني) ناظرت ولدها وهو نايم ولا حاس بشي من العالم ولا بمشاعر أمه اتجاهه..لمته شذى إلى صدرها بنعومه وقعدت تصيح بدون صوت... . . دخل عليها تركي بعد ساعه يزوها..كانت قد وقفت صياح وولدها بجنبها على السرير كانت منسدحه على جنب وهو بجنبها ماملت منه... تركي بإبتسامه:صباح الخير على الحلوين... رفعت نظرها شذى له وبدون نفس:صباح الخير... كانت باقي حاقده عليه من تهديده إنه بياخذه منها... تركي راح لها وقال:ممكن اعرف ليش زعلانه؟؟؟... شذى من دون اهتمام:مانيب زعلانه.. تركي ينحني لها:و نبرة الصوت هذي...وش نسميها؟؟؟... شذى سكتت ناظرته وبعدها ناظرت ولدها... تركي جلس على طرف السرير وقال لها.. تركي يناظر ولده:يا حبي له..مشالله على ولدي يهبل... سلم عليه تركي... تركي يكلم شذى:شخباره اليوم؟؟؟... شذى:بخير... تركي يلف شذى عليه... تركي:شذى وش فيك؟؟؟...منتي طبيعيه؟؟؟... شذى بعصبيه:ليه شايفني هبله... تركي:لا مو كذا..بس أحسك زعلانه ومتضايقه... شذى:زعلانه ومتضايقه..عندك مانع... تركي بهدوء:لأ ماعندي مانع...بس ممكن أعرف ليش؟؟؟... شذى:والله لو تعرف أكيد بتزعل فعشان كذا خلني ساكته... تركي:مني يعني؟؟؟... ناظرته شذى بكبر وهزت راسها بالإيجاب... تركي انقهر منها فحب يقهرها... تركي:والله عاد إذا جيت أزورك انتي تعالي تكلمي بس أنا جي أزور ولدي. تفشلت شذى بس ردت عليه... شذى:والله اللي يزور ولدي يزورني واللي يزورني يزور ولدي انا وهو واحد(تناظره بغيض)ومستحيل أي احد بالعالم يفرق بيني وبينه... تركي يناظرها:وشو يفرق بيني وبينه ومسوية لي مسلسل مصري.. شذى بعدم اهتمام:والله مسلسل مصري ولا هندي افهمها زي ماتفهمها.. تركي مسوي بريء:طيب أبي انضم معكم لحزبك أنتي وولدك عادي؟؟؟... شذى:لأ... تركي يكلم نفسه بصوت عالي(يستعبط):والله وراح عليك الدلال ياتركي خلاص يا شذى الحين صرت صفر على الشمال والحب كله راح لولدك؟؟.. تناظره شذى بإستغراب(طالع وش يقول اللي يسمعه ماكأن بينا مشاكل واصله للسما؟؟؟...).. شذى تناظره بإستغراب وتقول:أي حب وأي دلال لك مني؟؟؟أصلا كل شي بينا انتهى...وانا بس بدق على اهلي ويجون ياخذوني انا وفيصل.. تركي:مين فيصل؟؟؟... شذى:ولد الجيران...يعني مين اكيد ولدي انا سميته فيصل.. تركي بجديه شوي:والله أنا اللي طلعت ولد الجيران ومثل الأطرش بالزفه عسى ماشر..بتاخذينه وتروحين لأهلك..وسميتيه على كيفك... ليه انا وش موقعي بالإعراب طال عمرك؟؟؟... شذى ببرود:والله مالك موقع بالإعراب...محذوف من القائمه... تركي:والله يا قلبي شكلك أنتي اللي بتنحذفين...هذا إذا باقي للحين ما انحذفتي... شذى:والله عاد أنا وولدي مع بعض إذا نحذفت فهو معي... تركي ماحب السالفه تكون جد وهو اللي من أول مارجع أمس البيت قرر إنه يستأنف حياته مع شذى ويرجعها مثل أول...لأن هذا الشي بيكون لصالحه هو وشذى وولدهم ألحين... تركي بمزح:وش فيك الله يهداك معصبه كذا هدي... شذى:والله ماسمعت انت وش تقول؟؟؟... تركي يراضيها ويسندها حتى تعدل قعدتها... تركي:يابعد قلبي ياشذى..إنتي وهالنتفه اللي أنتي جايبتها..لا تزعلين والله أمزح..وبعدين إذا تبين تسمين الولد فيصل أوكيه يابنت الحلال ولاتزعلين.. شذى راحت تشيل ولدها بحظنها:وبروح الشرقيه وارجع اعيش عند أهلي... تركي:تبين تروحين مع السلامه..بس ولدك بيقعد هنا..تبين تقعدين معنا الله يحييك إذا ما شالتك الأرض أشيلك بعيوني... شذى تناظره بإستغراب:وش هالحب الفجأه اللي نزل عليك وصرت تحبني؟؟ تركي بجديه:والله من زمان وأنا أحبك وماعمر مشاعري تغيرت بلحظه.. شذى:أحاول اصدقك بس مافيه فايده... تركي:طيب وش قلتي بتقعدين معي أنا وفيصل ولا لأ؟؟؟... شذى:طبعا لأ أنا بروح وهو معي للشرقيه وإذا تبي تشوفه مر عليه... تركي يمزح:شوفي تتحكمين إذا صار هالولد لك بحالك بس لا تنسين هو شراكه بيني وبينك...يعني لي فيه خمسين بالميه... شذى معقده حواجبها:عسى ماشر شراكه...لاحبيبي هذا ولدي بحالي... تركي قعد يضحك...قام وباسها.. تركي:أنا طالع الحين امر على الدكتوره أشوف متى خروجكم... |
.....((تابع الجزء السابع عشر))..... بالعصر جا اهل تركي كلهم يزورونها بإستثناء فاطمه اللي ماتت قهر لمن عرفت إنها ولدت... أم بندر واللي من فرحتها تناست المشاكل بينها وبين شذى... أم بندر:مبرووك يا شذى والله ماتتخيلين فرحتي بولادتك... شذى واللي مستغربه منها مره:الله يبارك فيك... بشاير واللي جات مع أمها بالغصب:مبروك يا شذى(وكان الولد بحظنها) يجنن ولدكم...مشالله ماتوقعت إنتاجكم كذا... سارا بجنب بشاير:شوي شوي على الولد ترى باقي صغير..بس شهادة حق شكله مره مغري إنك تشيلينه... أم بندر:هاتوه أعطوني إياه ولدي خل أشوفه... وقامت بشاير وأعطته إياه وهي بس تقرا عليه وتسمي وتذكر الله... وبعد فتره بسيطه دخلت العمه حصه...وسلمت على شذى كانت شذى تحبها مره تحس إنها طيبه وعندها قلب مامثله بهالعالم...وراحت حصه جلست جنب أم بندر..وأخذت الولد منه...وهي الثانيه تذكر الله عليه... حصه:وين تركي ما أشوفه؟؟؟... أم بندر:الحين بيجي... وقعدوا سوالف..أما شذى تمت تتأمل الورد اللي جابته العمه حصه معها وتتأمل الورد اللي جابته بشاير وسارا...والحلاو اللي جابته ام بندر أما تركي اللي مسوي لي فيها رومانسي ماجاب لها ولاشي بعدين قعدت تأمل عمرها إنها اصلا ماتبي منه شي؟؟؟...وبعدين ماستوعبت إلا على دخلة تركي... تركي يكلم شذى:ترى أبوي ألحين بيدخل يسلم عليك.. ارتبكت شذى من متى ماشافت أبوبندر؟؟؟...يمكن من قبل لا يموت أبوها وماتدري وش موقفه منها خصوصا بعد كل هالمشاكل... سلم تركي على عمته ودخل أبوبندر وسلم على شذى..كان ابوبندر يحس إن شذى مالها دخل..خصوصا إن تركي كان دايم يقوله من رجع شذى إنه مالها ذنب باللي صار... أبوبندر:الحمدلله على سلامتك يا شذى... شذى:الله يسلمك عمي..وتعبت نفسك على هالزياره والله... أبوبندر يبستم للبيبي اللي بحظن حصه.. أبوبندر:لا بالعكس يستاهل ولد تركي إني أجيه ولا يا أم بندر؟؟.. أم بندر وهي تبتسم:إيه والله ولد تركي يستاهل... وبعدها قعدوا سوالف وضحك...ومعهم أبوبندر كانت أول مره تشوفه شذى كذا على بساطته...حست إن قلبه كبير وحتى ام بندر اللي شكلها تناست اللي صار ببداية رمضان عندهم..استغربت لهالدرجه ولدها قدر يصلح العلاقات بينهم... وبعدها استأذنوها وطلعوا...بعد كذا بساعه جاب تركي لها وله عشاء وكانت الساعه سبع...اول مادخل لقاها منسدحه شكلها تعبانه اول ما بغى يرجع ويطلع..سمع شذى تناديه... شذى:تركي تركي:هلا...إنتي صاحيه؟؟؟... شذى:إيه بس كنت منسدحه وش عندك؟؟؟.. تركي:لا شكلك تعبانه...بس كنت جايب عشاء و... تقاطعه شذى وهي تعدل قعدتها:لا بالعكس احس إني أحسن... راح لها وسحب الطاول المثبته بالسرير وحط العشا... ووقف... شذى:وش فيك ماتبي تتعشا؟؟؟... تركي:ِشكلك تعبانه..يالله بأستذن انا تامرين على شي؟؟؟؟... شذى واللي ماحبت تتمسك فيه زياده:أبد سلامتك... وراح يسلم على ولده اللي كان بالسرير... تركي:انا اول مره ادري إني بحب إنسان كثر ماحبيته... وبعدها سلم عليه وطلع.. *** سلمى اللي من درت ماتت قهر..خصوصا بعد التهزيئه اللي جاتها من تركي بأول يوم للعيد..كانت جايتهم أختها عايشه..وهي الثانيه بعد مقهوره من شذى.. سلمى بقهر:يالله يارب جعلها تموت بحريقه تحرقها هي وولدها قولي آمين.. عايشه:آمين... سلمى وهي حاطه رجل على رجل:وتركي بس من جاه هالولد ولا دق علي.. عايشه:تو مرته الشينه والده أمس... سلمى:عايشه انا ميته قهر...أحس خلاص ماني بقادره اتحمل اكثر من كذا.. عايشه:حسبي الله عليها من مره بس شوفي كيف خلته يرجع لها بعد كل اللي سوته هي واخوها... سلمى وهي تعقد حواجبها:تدرين ليه لأنها ساحره وإحنا ياغافلين لكم الله.. عايشه تزيدها:لأنك مسكينه وعلى نياتك موهي تتمسكن إلين ماتتمكن... سلمى بعصبيه:اوففففففف حسبي الله عليها الحيوانه...قاهرتني... إلا يدخل عليهم فارس ولد عايشه...كان آخر شي ناقص سلمى دخلة فارس اللي كانت حركاته مره قاهرتها... فارس يضحك:هاي قايز... سلمى:قايز في عينك...وش شايفنا اصغر عيالك تراني خالتك وذي أمك... فارس يقعد جنب امه:أقول سلمى وش هالرسميات؟؟؟...خلينا فري وفليها... سلمى تكلم عايشه:عايشه سكتي ولدك ترى آخر شي ناقصني هو... فارس:ماراح ارد عليك..(وبعدين كأنه تذكر)إي صح كل عام وإنتي بخير.. سلمى:تو الناس تعيد..اليوم ثالث العيد وإنت توك تعيد علي.. فارس:والله يكثر خيري بعد إني فكرت أمرعليك..توني كنت جدتي وجدي أمك وأبوك...وقلت بنفسي يافارس مر على خالتك واكسب أجر... سلمى بسخريه:ليه شايفني سبيل انت وخشتك؟؟؟...فارس عن المصاخه.. فارس:اقول يمه...وش فيها معصبه أختك؟(ويناظر أمه اللي معصبه) وأنتي بعد معصبه ليه؟؟...الناس ترى عيد...يعني افرحوا انتووا ووجيهكم... عايشه عصبت:استح على وجهك أنا امك... سلمى:اقول خلي عنك ولدك اللي مامنه فايده..وقولي لي وش اسوي بتركي؟؟.. فارس والضحكه شاقه فمه:أها...عشان عمي تركي جاله ولد من مرته الأولانيه..والله وراح عليك ياسلوم..خلاص اتوقع تركي بيسحب عليك... سلمى:انثبر بس... فارس اللي حب يقهر سلمى زياده لأنها دايم تقهره لمن تعبي راس امه عليه فارس:اقول سلمى سامحيني على هالكلام..أنت من جد ماتستحين على وجهك لمن اخذتي واحد متزوج؟؟؟(امه وسلمى يبحلقون فيه)صدق كلامي قوي بس هذا الصدق..اثبتي لي إنك خطافة الرقاله على قولة فيفي عبده.. سلمى بعصبيه وهي موقفه:فارس اطلع برى... فارس وهو طالع يضحك عليها:انا اصلا طالع ياالدكتوره..يا حرام رجلها سحب عليها... عايشه اللي تفشلت موت من ولدها..وسلمى اللي ودها تذبحه من القهر آخر شي كان ناقصها فارس يجي يتشمت... |
.....((تابع الجزء السابع عشر))..... تركي من رجع من المستشفى راح لبيت اهله..وبعدها طلع مع بشاير للسوق يشترون اغراض لفيصل ولد تركي... بشاير وهي تمشي بالسوق مع تركي:بصراحه شذى مهمله شلون ماشرت لولدها من قبل لا تولد... تركي واللي كان شايل الاكياس بدل بشاير:والله عاد اساليها... دخلوا محل أطفال مواليد ووقف تركي عند الكاشير وقعد يناظر ببشاير وهي تشيل لها ملابس أطفال مواليد ويشوفها تسأل البائع عن اللفات وملابس الاولاد..كان يحس بحب كبير لها يشوف فيها الحنان والأمومه على رغم صغر سنها...يشوف قلبها الكبير وسعة بالها وطيبتها اللي غصب تحبب الناس فيها...كان يشوفها نقيه بزياده عن البشر يتمنى إنه يكون له قلب مثل قلبها يقدر يسامح ويرجع العلاقات الحلوه مثل أول وأحسن..ما قدر يقول بخاطره إلا يا لبي قلبك يابشاير... بشاير:يالله حاسب على هالأغراض والحقيني خل نلحق على المحلات قبل لا تصكر... تركي:اوكيه عمتي بشاير...تآمرين على شي ثاني؟؟؟... بشاير:لأ بس يله بسرعه..تدري ياتركي إنت المهمل مو شذى موهذا ولدك بعد؟؟؟... وطلعت من المحل..وحاسب على الأغراض وطالع معها... تركي:والله الولد بيكمل سنه وما راح يلحق على لبس هالأغراض كلها؟؟؟.. بشاير تضحك:ياكرهك اقول يله يقولون منزلين بضايع حلوه للأطفال مااقول إلا ان حظ ولدك زين... وهم ماشيين كانت عيون الناس عليهم..خصوصا تركي اللي كان يتضايق من نظرات البنات له..كانوا مبهورين بوسامته وهو مومعطيهم وجه... بشاير اللي انتبهت قعدت تضحك:لو شذى موجوده كان ماتت قهر... قعد يضحك تركي:اقول اسكتي بس..اخلصي علي ترى والله احس إني تعبان... وبعدها راحوا لكم محل وشروا أغراض لفيصل ولد تركي... وهم طالعين..بشاير:اقول تركي ولدك عنده سرير؟؟؟... تركي:لا... بشاير باندهاش:ليه؟؟؟... تركي باستعباط:لأنه بينام على الأرض(بجديه)نسيت عنه يعني وش رايك... بشاير:طيب بسرعه في محل يبيع أسرة اطفال روعه... راح تركي معها..وهو ممتن لها..يحمد ربه على بشاير وقعد يقارن بينها وبين فاطمه..كانت المقارنه ظالمه لفاطمه اللي كان المفروض تكبر عقلها شوي... *** عائلة شذى اللي كانت توها تدري الليله لمن أرسلت شذى مسج لسعود تخبره بهالخبر..وهو انبسط مره وبعدها راح لأمه يخبرها اللي كانت قاعده مع خالد ومحمد بالمجلس... سعود يضحك:يا جماعه أبشركم.. محمد:طيب شوي شوي على نفسك..وش تبشرنا به... خالد:عطوك اجازه؟؟؟... سعود مسوي نفسه عنده سر ويروح لأمه:اول شي أقول لمامي... ام محمد تضحك:طيب قول وش عندك بسرعه... سعود يمد يده:اول البشاره... ام محمد:وش تبي؟؟؟... سعود:أبي حلاوه...<<<يستهبل... ام محمد تضحك:مافيه حلاو...وصك الجوال... محمد:يا ثقل طينتك بس... سعود مثل اللي تذكر فجأه:اوووه نسيت شذى ع الجوال... كانت شذى باقي على الجوال وسمعت حوار أهلها قعدت تضحك وحست بمثل الدمعه بعيونها خاطرها تكون ألحين معهم... سعود يبتسم ويحط الجوال على اذنه:ابشركم صرت خال اخيرا... ام محمد من الفرحه قعدت تناظر عيالها:ياقلبي ياشذى ولدت..متى؟؟؟.. سعود:هلا شذى..السماح لأني نسيتك على الخط... شذى تضحك:لا عادي... سعود يستهبل:عادي ولا ملون ههههههه... شذى تضحك:عن البياخه وعطني امي... وكلمت شذى ام محمد...وقعدت تسولف معها شوي وكلمت محمد وخالد.. وبعدها رجعت تكلم سعود... سعود:اشوفك ماتنعطين وجه يا ام شوشه؟؟؟... شذى:خير؟؟؟...وش تقول عمي؟؟؟؟... سعود:يالله طولتي علي وانا مشغول... شذى:اقول بس لا يكثر... سعود:اوكيه شذى والله وكشختي وصرتي ام...يالله باااي... شذى تضحك:باااااااااي... . . بشاير:أقول تركي؟؟؟... تركي:هلا...لا تقولين باقي في محل بتروحينه..ز بشاير:لحظه لحظه..لا يكون أنا شاريه لعمري الحين...ترى كلها لولدك.. تركي:بس فرفره بهالسوق...والله احس بتعب.. بشاير:خلاص خلنا نرجع البيت.. تركي يضحك ويمسك يد بشاير:لا أمزح..والله تبين تروحين مكان... بشاير:لا أبد.. تركي:طيب وش رايك نروح نتعشى بمطعم؟؟؟.. بشاير تبتسم:امممممم ماراح اقولك لأ... راحوا وتعشوا بالمعطم..وقعدوا سوالف من زمان عن بعض..بعدها رجع لبيته وحط أغراض البيبي(فيصل)ورجع بشاير لبيتهم..ورجع بعدها بيته وهو دايخ مره يبي ينام خصوصا إن بكره موعد خروج شذى من المستشفى... *** بصباح اليوم الثاني...كان موعد خروج شذى...مر عليها تركي.. وبعدها راح للدكتوره اللي طمنته إن شذى وفيصل ولده تمام...طلع معها على الساعه 11يمكن...وأول ما وصلت البيت ودخلت...كانت تحس باقي بالتعب...كانت تبي تطلع فوق ترتاح شوي... تركي:تبين تنامين؟؟؟... شذى بدون نفس:إيه... وأخذت ولدها...وطلعت فوق مع ولدها اللي تحس إنها خلاص ماعادها قادره تستغني عنه... واول مادخلت غرفتها اللي اتخذتها لها من رجعت آخر مره مع تركي إلا تشوفها فاضيه...عصبت وحطت ولدها على السرير..وراحت تفتح الدواليب وشافتها فاضيه...انقهرت..(على كيفك انا يا تركي متى ماتبي تجيبني تجيبني)..نزلت وشافت تركي قاعد بالصاله يتفرج على التلفزيون... شذى بعصبيه وهي متكتفه:ممكن أعرف وش دخلك بأغراضي؟؟... تركي يناظرها:مانمتي؟؟؟... شذى:مالك دخل نمت ولا مانمت...ممكن اعرف ليش شلت اغراضي من دون اذني؟؟؟... تركي:ليه ماتبين ترجعين تنامين معي؟؟؟.... شذى انقهرت:طبعا لأ...اصلا انا مالي قعده معك..برجع لأهلي وإنشالله عن قريب... تركي عصب:اوكيه شذى هدي شوي...وشوله هالعصبيه يا حلوه... شذى:مالك دخل حلوه ولا شينه...الموهم مالك دخل فيني... وقعدت تصرخ تنادي الشغاله...ولمن جات قالت لها ترجع أغراضها لغرفتها... وطلعت الشغاله تبي ترجع الأغراض... تركي:لحظه..أنا ماقلت للشغاله ترجع أغراضك للغرفه مو لسواد عيونك ياحبي..لأ بس لأن بشاير أمس توها تقول لي إنها بتجي تنام هنا إذا طلعتي من المستشفى... سكتت شذى..من جد بلشه إذا بشاير بتنام هنا.. شذى:ولو...قلي مو كذا على كيفك..ترى الدنيا مهيب فوضه... تركي بضيق:خلاص.. وقام وطلع من عندها...شذى من داخل نفسها من جد على باله الدنيا فوضى؟؟؟...بعدها طلعت وعادي عندها وما كأنها سوت شي..وراحت تشوف ولدها اللي تحس غير معالم الحياه عندها... طلال:مبرووووك والله وصرت ابو يا تركي... تركي يناظر خويه طلال:الله يبارك بعمرك... طلال:ياخي أنا اشوف إنك لو تتركك بنت عمك أحسن أحس إنها مظلومه صفر على الشمال... تركي:والله يا طلال ما ادري...بس من جد كلامك أحسها مظلومه... طلال:طلقها ولا تعلقها كذا... تركي:مستحيل اطلقها... طلال بإستغراب:وليش بالله مستحيل... تركي:أولا لأنها بنت عمي..وثانيا وش ذنبها إنها تحمل لقب مطلقه... طلال يضحك:أموووت على الحنيه أنا.. ياخي أحس مو لايق عليك الحنان.. تركي يضحك بسخريه:ياشينك وانت تضحك..تكفى ياللي تليق عليك ألحين.. طلال:اقول بس قم خلنا نروح نتغداء... تركي وهو يقوم:لا ما أبي...خلها مره ثانيه... طلال:امش انا عازمك على مطعم يحبه قلبك عليه مندي عمرك ماراح تذوق مثله...مادام مرتي عند اهلها فرصه اروح انا وياك... |
.....((تابع الجزء السابع عشر))..... باليوم اللي بعده...قامت شذى ولقت بشاير قد صحت من النوم... بشاير:صباح الخير... شذى:صباح الخيرات...متى قمتي؟؟؟... بشاير تضحك:منذو مبطي...قولي لي بس وين فيصل؟؟؟... شذى:باقي نايم...هو أصلا متى يقوم؟؟؟.. بشاير:بصرااااحه ولدك ماخذ عقل أمي...بتنهبل عليه كأنه اول مره يجيها حفيد... شذى:ياقلبي عليه..حتى أنا ميته عليه ماتوقعت إني بحبه هالكثر...بصراحه ولدي ماينلام اللي يطيح بهواه من أول نظره... بشاير تضحك:اقول لا يكثر بس تعالي افطري... شذى:اوكيه..لحظه خلي أقول للشغالات يجهزون الفطور... بشاير:هو جاهز بس باقي يجيبونه... شذى بتفكير:طيب وين تركي؟؟؟... بشاير:افطر الصباح وطلع... شذى انقهرت:ياربي منه...بس يطلع مايعرف يقعد بالبيت.. بشاير:ماعليك بس تعالي افطري..مصيره بيرد... وبعدها جابت الشغاله الفطور...بهاللحظه رضعت شذى ولدها..ووخلت الشغاله تجر السرير للصاله عندها قريب...بشاير قالت لها ماله داعي تجيبينه هنا...بس قالت ماتقدر تخليه بعيد كذا مره عنها...وهم يفطرون قعدوا سوالف وبعدها سكتوا فتره..حستها بشاير فرصه تتكلم مع شذى خصوصا تحس النفسيه شوي عاليه..وفيه تآلف بينهم مثل أول تقدر تكلمها.. بشاير:شذى ودي أكلمك بموضوع وياليت ماتعتبرينه لقافه أو... شذى تناظره باهتمام: لا بالعكس يابشاير خذي راحتك... بشاير:بصراحه انا ملاحظه إن علاقتك بأخوي تركي مره سيئه...وإنتي وهو مهما تحاولون ترسمون قدامنا إن علاقتكم عاديه لايزال باين إن بينكم مشاكل كثيره ومافيه أي ود وتفاهم...ليش كذا؟؟؟... تناظره شذى وتبتسم بسخريه:تدرين ليش؟؟؟..لأنه مثل ماقلتي مابينا أي ود او تفاهم..خلاص أنا احاول أنسى كل اللي راح..ماعاد لي مكان هنا يا بشاير..بتقولين تركي وحبك له...باقولك خلاص عفت حبه..وهو طبعا متيم بهوى سلمى بنت عمك..وخلاص الزواج أكيد قريب...انا وهو ماعاد احد يبي يشوف الثاني..بس ولدي هو الشي الوحيد اللي ممكن يربطني بأخوك.. بشاير تناظره باهتمام:شذى..مو معقول اللي اسمعه؟؟؟...شلون ماتحبين تركي وهو مايحبك...انا لمن قضيت لولدك رحت بعد السوق انا وهو لمطعم تعشينا وقعدنا سوالف...قالي أشياء كثيره..منها إنه يبي يعيد برمجة حياته من جديد... شذى تقاطعه:طبعا وانا اول المحذوفات.. بشاير:انتظري خلي اخلص كلامي...بالعكس يا شذى والله أحس إن تركي أخوي باقي يحبك..ويحبك موت بعد... شذى:بشاير رجاء لا تكذبين علي...انا اخوك ماعاد أبيه وأهلي عن قريب بيزوروني...وبروح معهم أو بمعنى أصح أرجع اعيش عندهم... بشاير متفاجأه:شذى وش هالكلام؟؟؟...عن الخبال... شذى:طيب ممكن أسألك سؤال؟؟؟... بشاير:اسألي... شذى بتردد:سعود يا بشاير... بشاير اللي تغيرت ملامح وجهها:شذى صكي الموضوع رجاء... شذى:لا ما راح أصكه... بشاير:سعود صفحه انطوت من حياتي..وبصراحه اعتبرها أسوأ واسود صفحه... شذى:بشاير..يمكن ماتصدقيني لو أقولك..إن سعود اخوي باقي يحبك.. ناظرتها بشاير:اخوك أناني ومايحب إلا نفسه...وللأسف كنت مخدوعه فيه.. توقعت إني أخترت الرجل الأفضل..بس كان توقعي خطأ.. كان لمن يجي احد يبي يشككني بإختياري..أصير اذن من طين واذن من عجين ما اسمع صكيت عيني واذني عن كل الإنتقادات...(بدت تخنقها العبره)أكذب عليك يا شذى لو قلت لك إني ماحبيته..بالعكس كنت موتي وحياتي بيدينه.. حبيته بكل جوارحي...ما اتوقع حد حبه كثري.. تصدقين بعض الأحيان اول قبل لا تصير المشاكل..أبكي..خصوصا بعد مااصكر منه اخاف كثر ما أتعلق فيه كذا يروح مني..وبالفعل ماخاب توقعي...المشكله ليه تركني مافيه سبب؟ ..هو بهالحركه خلى الناس كلها تشمت فيني...أو يتعاطفون معي.. وانا أكره مايجيني بالحياه لمن أمشي واشوف بعيون اللي يناظرني شفقه علي.. أنا ما احتاج شفقه...لا بالعكس انا اللي اشفق عليهم...لأنهم مايعرفون أنا مين؟؟؟...انا قويه ومهوب أنا(سكتت شوي).. عشان كذا صكي الموضوع.. شذى تناظرها بحب:ياقلبي يا بشاير..بس حيبت أقولك إن سعود من جد ندمان على اللي سواه..وخاطره ترجع العلاقه بينكم.. |
.....((تابع الجزء السابع عشر))..... بشاير:ندمان..ياحليله اخوك..على باله بأرجع له..قولي له نجوم السما اقرب لك من إني ارجع له... شذى:بشاير طيب خليني أفهمك ليش هو سوى كذا؟؟.. بشاير:أعرف ليش سوى كذا..بسبب مشاكله مع اخوي تركي عشانك أنتي يا البطه... شذى:بس والله هو متحسف مره وخاطره يرجعك..صدقيني اخوي سعود حبيب وقلبه أبيض...بس اخوي محمد ضغط عليه وكان الوقت حساس شوي... بشاير بعصبيه:ليه هو ماعنده شخصيه مايعرف يقول لأ... شذى:بليز بشاير... بشاير:رجاء شذى صكي الموضوع...وخلي اخوك يرسل لي ورقتي عاد مايصير معلقني كذا... شذى:بشاير... بشاير قامت:الحمدلله انا شبعانه... ناظرتها شذى وهي رايحه...ما ألومك يا بشاير لمن سويتي كذا من جد سعود حركته بايخه... . . . على الغداء جات ام بندر وحصه عند شذى بزياره لها هي وولدها... أم بندر:أقول شذى لازم تهتمين بولدك اكثر من كذا... بشاير:حراااام عليك يمه..وش تبين تسوي فيه أكثر من كذا تحطه بقزازه.. ضحكت شذى من كلام بشاير... بشاير تكمل:من جد حومت كبدي من كثر اهتمامها فيه..كأنها الوحيده اللي عندها ولد بالعالم... سارا:لازم كذا مع اول واحد... بشاير:ولو...مهوب كذا عاد... حصه:شذى اقول اهتمي أكثر بنفسك...شوفي شلون مصفره.. شذى:لا تخافين علي مهتمه بنفسي ياعمتي... حصه ابتسمت:لا...لازم تهتمين اكثر بعمرك...أحس ماعاد فيك دم لازم تاكلين... بشاير:حرام عليك ياعمتي...هي لازم تخف صايره دووبه... حصه:بشاير لا تضحكين عليها المسيكينه وتصدق... بشاير:والله هذا حتى كلام تركي رجلها...الكل يشهد إنها صايره دوبه.. حصه:لازم التغيرات اللي تصير مع الحمل..ولا تبينها آله ماتتغير.. شذى:يسلم لي لسانك يا عمتي...حكيمه والله جعلني ما أبكيك... بشاير:كل هالكلام لها..عشانها دافعت عنك..ترى عمتي تجامل كثير.. حصه:إلا بالحق...ما أجامل...لا تاخفين يا شذى بس تخلصين الأربعين و مع الإهتمام بيرجع جسمك مثل أول... شذى ابتسمت لها...محد فكر يقولها هالكلام غيرها..ولا احد يسال عنها.. . . بالعصر راحت أم بندر وسارا..ومعهم بشاير...اللي رفضت القعده لمن عرفت إن اهل شذى بيجون بكره...وحست إنه مالها داعي تقعد اكثر خصوصا موقفها من سعود... أما حصه لمن عرفت إن اهل شذى بيجون حست إنها لازم تكلم شذى قبل لا يجيون...وام بندر اللي تغيرت ملامحها وعصبت من جيتهم عشان بشاير بنتها...وسارا كانت خايفه من هالزياره لا تكبر المشاكل أكثر من إنها تصغرها... بعد ماعم الهدوء المكان من عقب روحة ام بندر وبشاير وسارا... شذى بابتسامه:يا حيا الله عمتي حصه والله تو مانور المكان... حصه:المكان منور بأهله...بس ياشذى خاطري اكلمك بس اخاف تقولين وش دخل ذي المره فيني... ضحكت شذى خصوصا إن بشاير بالصباح قايلة لها نفس الشي.. شذى:افا عليك بس إذا ماتدخلتي إنتي من اللي يتدخل فيني... حصه:طيب اسمعيني..الحين وش ناويه تسوين بحياتك انتي وولدك.. شذى:إذا جو اهلي يسلمون علي..بأشيل قشي واروح معاهم.. ياعمتي ماعاد لي مكان هنا... حصه عقدت حواجبها:وش هالكلام ياشذى...من قالك ماعاد لك مكان هنا... شذى تتكلم وتحس الكلام طالع من قلبها:ياعمتي..لا تجاملوني بالكلام.. أنا حياتي وقفت هنا مع تركي..اللي اصلا ماعاد أقدر اكمل حياتي معه..وحتى هو ماخذ بنت عمه..بروح مع اهلي..لأني واثقه مالي مكان إلا معهم... حصه تمت تناظر شذى فتره وبعدها قالت لها:كلامك كله غلط ياشذى... شذى:بالعكس هو عين الصح...وين اروح ياعمتي..ولد اخوك لو يراضيني من اليوم لبكره مستحيل ارضى عليه لأسباب كثيره... حصه تحط يدها على خدها:طيب قولي وش هي؟؟؟... شذى:اشياء كثيره... حصه وهي مثل ماهي عليه:طيب قولي واحد منها بس... شذى وهي ترفع حاجب وتنزل الثاني:اولا زواجه من بنت عمه...أصلا انا كنت داريه إنه بيرجع لها..أتوقع هالسبب بكفه والأسباب الثانيه بكفه ثانيه وش على باله انا راضيه بكذا..مستحيل اقعد على نار واحد متزوج غيري.. حصه:شذى الله يهداك وش هالكلام؟..ألحين على بالي إنك ماراح تكونين انانيه بس تفكرين بنفسك..طيب مافكرتي بولدك؟كيف بيعيش من دون اب؟.. شذى والعبره خانقتها:ياعمتي..عمري ماكنت انانيه..بس قولي وش اسوي؟؟ انا احس إني اموت باللحظه الف مره بس لمن أعرف إنه معها...والله ماني قويه لدرجة إني اشوف زوجي يروح لغيري وانا ساكته...ما اعرف... حصه:طيب شوفي انا زوجي أبو فيصل..متزوجني ومتزوج وحده ثانيه غيري...بس عايشه عادي... شذى:بس أنا ما أقدر...والله ما اعرف ما أتحمل...تكفين عمتي لا تضغطين علي...أنا برجع لأهلي وماعاد لي قعده هنا.. حصه:ليه؟؟؟..وولدك..شذى إنتي الحين ام..يعني لازم تفكرين بولدك قبل نفسك... شذى:ولدي مكانه مع أمه...ومادام ابوه ما قدر أمه وش له يقعد معه... حصه بنفسها ياربي وش كثر هي عنيده صدق ماكذب تركي لمن قال إن راسها يابس... حصه:مافيه أحسن من ولد يعيش بين امه وابوه...بعدين ياشذى والله إن تركي شاريك..ويحبك موت وعمري ماشفت تركي يحب هالكثر... سكتت شذى وتمت تناظرها وبعيونها دموع تلمع... حصه وهي تشد على يدها:لا تتهورين وتروحين مع اهلك وتخلين تركي صدقيني لمن بتبعدين عنه مع الأيام حبه لك بيتبخر... المره صدق يمكن تحب رجل واحد طول عمرها وحتى لو يكون ميت..بس الرجل غير... شذى ماقدرت تتكمل بعدها انفجرت بنوبة بكاء طويله...وكانت تشهق بين بكائها...كان بكاء حار من القلب بان عليها وش كثر كانت مخبيه بقلبها... شذى وهي تصيح:والله خلاص ماعادني قادره أتحمل...أحس كثر ماني مجروحه وكرامتي مهدوره...أحس كثر ماني حيبته ولاني قادره أستغني عنه... حست حصه إنها حطت يدها على الجرح...ووصلت للي تبيه... حصه بحنان:شذى حبيبتي..صدقيني محد بيتضرر من قرارك غيرك أنتي وولدك..فكري زين ياشذى ووالله صدقيني أشوف قعدتك ببيت رجلك أحسن الف مره من روحتك مع اهلك وصدقيني الايام بتثبت لك كلامي... سكتت شذى وقعدت تصيح كانت محتاره...وتحس بتوتر شديد خلاص تحس إنه أزف الفراااق؟؟؟... |
.....((تابع الجزء السابع عشر))..... باليوم اللي بعده وبنفس الوقت كانوا اهل شذى موجودين بزياره لبنتهم.. وكانت أم محمد وخالد وسعود هم الوحيدين الجايين أما محمد فكان الكل رافض روحته خصوصا بعد اللي سواه...تركي اللي لمن درى بجيتهم احتار يقلبها هوشه أو يحترمهم لأنهم ببيته..بالأخير اختار الثاني على الأول... كانوا قاعدين بالصاله وتركي اللي توتر لمن شاف سعود... ام محمد:يا ملحه ولدك يا شذى...مشالله يهبل... خالد:هو مملوح بس وش فيه صغير كذا مره؟؟؟... تركي اللي كان مابينه هو وخالد مشاكل:تصدق يا خالد حتى انا مستغرب بس تقول الدكتوره عادي مع الأيام بيزداد حجمه... شذى تضحك:على صغره بس الشهاده لله إنه مزيون... سعود كان قاعد جنب شذى:على خاله سعود ولا من وين له الحلا ياحسره.. تركي اللي يبي يقهر سعود:غلطان يا سعود ماخذى من ملامحك شي هو راجع لأعمامه... سكت سعود وناظر شذى اللي ترجته بنظراتها لا يرد..بعدها سكت... بعدها تكهرب الجو شوي بس خالد وام محمد حاولوا إنهم يلطفون الجو.. قعدوا يسولفون ويضحكون أما سعود وشذى كانوا يتكلمون مع بعض بصوت هامس لدرجة إنه محد سمعهم.. سعود بغيض:رجلك هذا ودي أصطره قاهرني.. شذى:طيب طنشه لا ترد... سعود:ما أعرف... شذى:تحمل مو إنت لك حاجه عنده... سعود يناظره وهو يسولف مع خالد:ياربيه وش هالمذله؟؟؟... شذى تضحك:جب أي مذله والله هذا بسبب غبائك... سعود يرفع حاجبه:غبائي؟؟؟...أقول اسكتي واللي يرحم والديك يا الذكيه... شذى:والله محد ضربك على يدك وقالك اسمع كلام محمد... سعود عصب:شذى خلاص اكرمينا بسكوتك..وخليك بولدك.. شذى ضحكت وناظرت تركي اللي كان يسولف مع امها..اختفت ابتسامتها.. وقعدت تفكر بأي قرار تاخذ تقعد هنا...أو تروح؟؟؟... . . . بالمغرب جاء يزور شذى وأمها بنات عمها ومرة عمها..يسلمون عليها... قعدوا سوالف ووناسه...شذى استانست ببنات عمها...وهم فرحوا لها... وقعدوا معهم إلى بعد صلاة العشاء... *** بعد صلاة المغرب..وهم طالعين من المسجد اللي كان قريب من بيت تركي.. حس سعود إنها فرصه يكلمه..خصوصا إن اهل عمه عند شذى اخته بالبيت..وخالد راح يسلم على على واحد يعرفه... سعود بتردد:..تركي... لف عليه تركي:نعم... سعود:بغيت أكلمك بموضوع... تركي ناظره ببرود وعرف وش خاطره يقول... تركي:طيب امش للبيت وقولي هناك... وراحوا البيت و دخلوا بمجلس الرجال... تركي:قول وش عندك يا سعود؟؟؟... سعود:بصراحه يا تركي ودي أكلمك عن بشاير... تركي اللي كان متوقع عصب عليه:سعود رجاء لا تطري اسم اختي على لسانك فاهم؟؟؟... سعود عقد حواجبه:بس هذي زوجتي...وانا مملك عليها... تركي:كانت..بس ألحين لأ وزين إنك جيت عشان تطلقها وتفكنا... سعود واللي ماعجبته طريقة تركي:لا يا تركي ماراح اطلقها... تركي:أجل وش جاي تبي تقول؟؟؟.. سعود:أولا يا تركي لا تكلمني بهالطريقه...ثانيا مانيب اصغر عيالك تقعد تعصب علي...في الحقيقه أنا جاي ودي اصلح اللي صار بيني وبين اختك.. تركي اللي يناظره بإستغراب:سعود من جدك تتكلم؟؟؟...ترى بنات الناس مهوب لعبه عندك... سعود:أي لعبته...تركي أنا اتكلم من جد ودي علاقتي بأختك ترجع مثل أول وأدري إني غلطت بحقها و… قاطعه تركي:سعود إنت مو غلطت بحقها وبس…لا بالعكس بينت معدنك وبينت إنه مافيك خير…على العموم مستحيل ترجع لك..ولو هي توافق انا بارفض هالشي… سعود انقهر وقعد يناظره بغيض.. تركي يكمل:إنشالله بكره تروح المحكمه وتطلقها..ومهرك اللي دفعته لها بيرجع كامل من غير ماينقص ريال واحد منه… وقام تركي من عنده قبل لا يسمع جواب سعود اللي كان يدعي الله إنه بس يصبره ولا يقعد هواش مع تركي ويخرب كل شي… بعد ماطلع تركي..راح سعود بعدها لسلطان خويه يشوفه...اللي فرح كثير بشوفة سعود... *** راح تركي لسلمى...اللي ماشافها من أول يوم بالعيد...وخصوصا بعد التهزيئه المحترمه اللي جاتها منه..حس إنه ظلمها... سلمى تناظر تركي بسخريه:وشو له جاي؟؟؟كان قعدت مع ست الحسن والدلال...شذى هانم.. ناظرها تركي:للحين زعلانه؟؟؟... سلمى بعصبيه:رجاء لا تكلمني... تركي:سلمى خلاص بلا زعل..ما اتوقع إنه فيه شي يزعل... سلمى وهي عاقده حواجبها:وشو اللي مايزعل كلامك معي بيوم العيد وبعدها من ولدت الخايسه نسيتني... تركي اللي على صوته:وشو خايسه؟؟؟...احترمي نفسك ونقي الفاظك... وبعدين كلامي معك بالعيد كان لأنك كنتي مستتره بزياده عن اللزوم... كان يقول كلامه الأخير بسخريه وهي لاحظت هالشي... سلمى واللي بدت العبره تخنقها:قولها ياتركي قولها...قول ماعاد أبيك وإنك بس تزوجتني عباطه..والحين متحسف وتدور اعذار والحجج عشان تطفشني فيها...ترى عادي إذا ماتبيني حتى انا ما أبيك... انصدم تركي من كلامها..وش تقول هذي..بغت تقوم سلمى بس مسكها تركي من يدها...ورجع وقعدها.. تركي:سلمى الله يهداك وش هالكلام؟؟؟... سلمى قعدت تصيح..اما تركي تفاجأ من صياحها..اول مره يشوفها تبكي ما حب إنه يكون سبب في صياحها... تركي:سلمى تكفين لا تصيحين والله خلاص آسف إذا كنت زعلتك... وسلمى ما ترد بس تصيح... تركي:يابنت الناس آسفين والله عارفين إنا غلطنا بحقك... سلمى من بين صياحها:خلاص تركي...حرام عليك اللي تسويه فيني... تركي يناظرها بضيق:شوفي أروح من هنا وإنتي زعلانه مستحيل... سلمى بس سمعته يقول كذا وهي تزيد من كميات الدموع.. ... |
.....((تابع الجزء السابع عشر))..... سعود اللي ما طول مع سلطان رجع لبيت شذى يكلمها...لمن رجع ما شاف امه وخالد اخوه سأل شذى قالت راحوا لفندق ينامون فيه وإن تركي للحين مارجع...سعود حسها فرصه يكلمها على راحته مع إنها اصغر منه إلا إنها تفهمه أكثر من غيرها... سعود:بصراحه تركي يرفع الضغط ما أدري وش أسوي معه؟؟؟... شذى باهتمام:كلمته طيب؟؟؟... سعود:وش اقولك تو...إيه كلمته بعد صلاة المغرب بس كلامه يقهر... شذى:حاول إنك تداريه...بس تدري لا تحاول أحسن لك... سعود:ليش؟؟؟؟... شذى:لأنها مستحيل ترجع لك...هي قالت لي بنفسها... سعود:أعرفها بشاير تحبني... شذى بعصبيه:حبك برص إنشالله زين؟؟؟... سعود:وإنتي بعد زين... شذى قالت له عن الكلام اللي دار بينها وبين بشاير..وبعد ماخصلت كلامها سعود بقلة حيله:طيب وش أسوي يا شذى الحين؟؟؟... شذى:والله إنت اللي طيرت البنت من يدك بنفسك... سعود وهو معقد حواجبه:والله ما كنت متوقع إن السالفه لها صدى هالكبر... شذى تضحك بسخريه:ياحليلك يا سعود إنت وين عايش؟؟؟..وشو تقولهم ماعاد أبي بنتكم والحين تقول ما توقعتها كبيره... سعود بحزن:لو ماصار اللي صار كانها الحين معي بالبيت... شذى:[لو] هذي تفتح عمل الشيطان...خلاص انساها ياسعود... سعود:مستحيل انساها...لو اعيش عمري مرتين ما باخذ غيرها... شذى:تبي الصراحه ياسعود إنت موقفك معها مره نذل... سعود يناظرها بطرف عينه:انثبري.. شذى بصوت واطي:انثبر انت... سعود:يعني الحين..اعطيني الزبده.. شذى تتطنز:الزبده في الثلاجه... سعود وهو يتأفف:آخر شي ناقصني بهمي تجين تنكتين انتي وخشتك... شذى واللي طنشته وشالت ولدها اللي فتح عيونه ورفعته فوق... شذى وهي تضحك:ياناس يزنن ولدي...بالله وش رايك ياسعود ما ياخذ العقل... سعود يناظر ولدها كان طفشان بس غصب عنه ضحك على أخته اللي كأنه ولدها عندها لعبه عند طفل كل شوي شايله وماخذه معه... شذى انتبهت لسعود اللي بدى يسرح... شذى بهدوء:لهالدرجه تحبها يا سعود؟؟؟... انتبه سعود لشذى وناظرها وهز راسه بنعم... شذى:أجل خلاص كلم تركي مره ثانيه... سعود يناظرها:توني كلمته ورد علي برد زي وجهه... شذى:ارجع كلمه مره ثانيه..ولا تنسى الأهم بشاير روح كلمه خلي يقول لأهله امه وابوه...وبشاير... سعود بعد فترة صمت طويله:شكل مالي إلا هالحل... . . طلع تركي من بيت عمه..من عند سلمى بعد ما راضاها..حس بالألم لها..يحسها من جد مظلومه..على كل الفتره اللي مرت من ملك عليها للحين مافيه أي حب منه لها...حس إن ابوه ظلمها معه يعني لو ماخذاها تركي كان خذاها غيره اللي اكيد اللي بيحبها ويكون سبب لسعادتها...مالقى بنفسه غير الله يسامحك يابو بندر راعي هذا الزواج.... *** باليوم اللي بعده... تركي يناظر من سعود اللي خلص كلامه:الحين انت جاي تعيد علي كلام أمس؟؟؟... سعود:رجاء يا تركي عن الطنازة... تركي وهو يعدل جلسته:لا والله ما أتطنز...بس من جد أتوقع الموضوع انتهى...يعني المفروض اليوم إنك تروح تطلقها..لأن رجعتها مستحيله أنا اقولك من الحين(بسخريه واضحه)لا تتعب نفسك... سعود عقد حواجبه:إنت كلم اهلك وشوف... تركي يقاطعه:من دون ما أشوف انا عارف ردهم..خلاص يا سعود لا تحاول... سعود:إنت شوف يا تركي وكلمهم... سكت تركي وقعد يفكر يقول لأبوه وامه هالكلام ولا كيف؟؟؟... . . بنفس الوقت كانت ام محمد مع شذى بنتها... ام محمد:الله يهداك شذى ليش تصيحين؟؟؟... شذى:يمه اقعدي هنا معي ماله داعي نومة الفنادق هذي..اجل وشوله متعبه نفسك إذا بتروحين تنامين بالفندق... ام محمد:تعرفين مشاكلنا مع رجلك...عيب بعد اللي صار ننام ببيته... شذى:بتنامون معي...مو عنده هو.. ام محمد:بس لا تنسين هو صاحب البيت...ولا تبين إنه نكون مانستحي بعد اللي صار نرجع عادي... شذى:بس هذي انتوا وخالد تسولفون معه عادي.. ام محمد:لأنه هذا من الإحترام بس لا تنسين اللي صار منك انتي وسعود الله يهداكم... شذى تمت تناظر بعيون امها اللي تحسها سرحت... ام محمد تكمل:بصراحه انا كنت ناويه اروح اكلم ام بندر على موضوع سعود وبشاير بس أخاف إن روحتي لها تكبر المشاكل.. شذى تأيد أمها:يمه روحتك بتزيد المشاكل..احسن لك لا تروحين... *** تركي راح بعد صلاة العشاء يقولهم عن سعود..خصوصا إنه ابوه لمن درى بجيتهم أكد على تركي إنه لا يروح إلا بعد ما يطلق بشاير... ام بندر بعد ما سمعت كلام تركي:بعد اللي سواه يجي يعتذر بكل برود؟؟؟.. تركي بهدوء:ما أدري عنه..بس هذي مره ثانيه يكلمني... ام بندر بعصبيه:والله لو إنه عندي بس..قوله بنات الناس مهوب لعبه عنده خصوصا بشاير... ابو بندر اللي كان مهوب مستغرب مره خصوصا لمن يتذكر شكل سعود لمن جاء يبي ينهي كل شي كان مبين إنه مدفوع لهالشي دفع خصوصا من محمد و اللي مأكد له هالشي تركي لمن قاله إن محمد يبي ينتقم منه عشان اخته... تركي:طيب راي بشاير؟؟؟... ام بندر بعصبيه:وعادك تسأل يا تركي...شي طبيعي إنها رافضه أصلا كله من مرتك السوسه شذى..لمن شافت إنه رجعنا معها عادي بعد ما ولدت صارت تبي ترجع أخوها لبشاير..هي على بالها إن احنا على هواها... تركي بضيق واضح على معالم وجهه:الله يهداك يمه وش دخل شذى بالموضوع؟؟؟... ابو بندر يقاطع كلامهم:طيب ليش يقول إنه مايبيها ما دامه بيرجع لها... تركي يناظر ابوه باهتمام:لأني قلت لك يباه اخوه محمد الكبير أمره بكذا... ابو بندر:وش يدريك؟؟؟... تركي بتأكيد واضح:انا متأكد مثل مانيب متأكد إني ولدك أعرفهم زين يباه عيال عمي ابو محمد الله يرحمه... ام بندر بعصبيه:بصراحه إذا هذا الشي صحيح إنه يترك اختك عشان اخوه قاله كذا فصدقني إنه مهوب رجال وش طوله وكلمته عند أخوه؟؟..يعني هو إمعه ماله راي؟؟؟...ماله شخصيته؟؟؟...انا ما آمن بنتي عنده اخاف اخوه محمد يجي يوم ويقوله طلقها...يقوله أبشر...خله بس يذلف ويفكنا... ابو بندر بعصبيه:ام بندر خلاص وش هالكلام؟؟..اسكتي ماخليتيني حتى اعرف افكر... ام بندر:والله من القهر من اللي قاعد اشوفه... ابوبندر اللي عصب من كلام ام بندر لمن تكلمت عن سعود حس هالكلام تقصده فيه بطريقه غير مباشره..كأنها تذكره باللي صار معه مع اخوه ابو عبدالكريم لمن بغى تركي لسلمى...مايدري هل اللي صار لبنته جزاء للي سواه بشذى لمن زوج تركي...او عشان يشوف بنفسه كيف آراء الناس في سعود اللي طاع اخوه في فك الزواج وشلون إن الناس خذت عليه هالشي.. تركي:وش ارد عليه يباه؟؟؟... ابوبندر:طبعا قوله لأ...وخله الله لا يهينه يطلقها لأنه ماله شي عندنا... وبعد ما تناقشوا شوي طلع تركي من عند أبوه وراح...وطلعت ام بندر لحجرتها تبي ترتاح وهي طالعه شافت بشاير فوق تناظر التلفزيون حبت تقول لها هالخبر.. ماتدري بردة فعلها بس أكيد لازم تعرف...وبالفعل قالت لها أم بندر بكل اللي صار..وطبعا بشاير كانت داريه إن سعود يبي يرجعها بس مستحيل ترجع... |
.....((تابع الجزء السابع عشر))..... تركي اللي لقى سعود ببيته مع شذى..ناداه للمجلس وقعد معه...وقاله باللي صار..إن اهله ماعاد يبونه... تركي:عاد أنا قلت لك يا سعود طلقها باللتي هي احسن.. احسن لك ولنا.. سعود بخيبة أمل:تركي ماراح أطلقها... تركي:لا تعذب نفسك أختي اعرفها مستحيل ترجع موتها عندها احسن من الرجعه... سعود مايدري ليه تذكر تركي لمن كان يجيهم ويبي شذى كانوا يقولون له مانبيك وطلقها...سبحان الله المشهد الحين ينعاد وكما تدين تدان... سعود:تركي ممكن اعرف وش سبب إنه ماتبوني أرجع بشاير؟؟؟... تركي اللي يناظره بإستغراب:سعود من جدك تتكلم؟؟؟... وهاللحظه دخل خالد... خالد:السلام عليكم.. تركي وسعود:وعليكم السلام.... خالد:وش عندكم... تركي:بالله يا خالد شوف أخوك وش يقول؟؟؟.. خالد:وش قلت يا سعود؟؟؟... سعود يقلب نظره بين تركي وخالد:قلت ليه مايبوني أرجع بشاير؟؟؟... خالد سكت...يعني حسه سؤال غبي...تذكر كيف إنه قبل لا يسافرون قال لسعود ماله دخل باللي صار..وإنه ماراح يتدخل في الموضوع... تركي يكلم خالد بجديه:خالد بالله قول لأخوك ليه؟؟؟... خالد سكت من جد ماعرف وش يقول..واللي قهره ردة فعل سعود اللي ما كأنه مسوي شي... *** بشاير اللتي بكت كما لم تبكي من قبل..الحب سطر لها في ميلادها تاريخ جديد وفجر جديد..حبها لم يكن مسألة وقت..او لم يكن مفروض عليها ان تحبه كزوج مستقبل..بل أحبته كما تحب المراه وليدها..وكما تحب الأنثى انوثتها..أحبته كما أحبة نفسها او أكثر من ذلك..حبه الذي جرى في أوعيتها كمجرى الدم..حبه اللذي تغلغل حتى النخاع..حبها له..فقدت أهدته الكثير من الحنان..كأم صغيره..واهدته الكثير من الحب والعشق.. كانت دمعتها تسبق المه..كان قلبها يخفق بشده لحزنه..عاشت أحزانه أحست انها ملكه في زمن لن تكن له ملكه..بكت كثيرا ارادت ان تكون جروح قلبها قد بردت ولكنها لم تبرد يوما..لقد باعها بلا ثمن؟؟..أحست بالغبن من حبيبها ومعشوقها ..بالوقت الذي تريد أن تنهي حبها وتنزع بقاياه من حناياها..كان اشد التصاقا بقلبها ووجدانها..حبا لن يكون من السهل محو ذكرياته مع الزمن..حبه الذي تغلغل بها فاصبح يجري بدمها ويتنفس هوائها ويشاركها جميع اجزاء جسدها...ولكن كانت عزة نفسها وأجزاء كرامتها مالتناثره ترفض وبشده القبول او حتى التفكير كانت تحس بالتوتر من شدة المها قلبها وحبه الذي يكبر مع كل ثانيه..وعقلها الذي يرفض أن يعود والقبول بالعوده من بعد الرفض... كلمت شذى ريم خويتها بعد ما أرسلت لها مسج بأنها ولدت...تدري إنها متأخر بس ما كان فيه وقت..او بمعني أصح نست تقولها... ريم:هلااااااااااااااااااا بمربية الأجيال القادمه... شذى تضحك:من الحين أجيال...هو يادوب واحد وتقولين اجيال... ريم:وليش مايصيرون جيل؟إنشالله السنه الجايه مثل هالوقت معك واحد ثاني شذى:لا ما أتوقع فيه واحد ثاني...لأن فيصل بيكون وحيدي... ريم:وليه هالفال الشين إنشالله؟؟... وقعدت شذى تحكي لريم عن وش صار بولادتها لمن دقت على تركي..و قالت لها عن بشاير...وعن جية أهلها..وعن العمه حصه لمن كلمتها بقرارها بالرجعه وحكت لها بكل شي بنفسها لأن ريم هي الوحيده اللي تمون عليها شذى وتقدر تقولها بكل شي... ريم بعد ما سمعت شذى:شذى تبين رايي؟؟؟... شذى:هذا انا اسمعك قولي... ريم:لا ترجعين...من جد والله أتكلم لا ترجعين خلك ببيتك احسن... شذى اللي تفاجأت من رد ريم:ريم من جدك تتكلمين؟؟؟...يعني لو اللي صار لي نفس الشي صار لك مع عبدالعزيز بترضين؟؟؟... ريم تحاول تقنع شذى:شذى ما أقدر اتوقع ردة فعلي لأنها يمكن تكون صح او خطأ...بعدين أنا اقولك من منظار الصح اقعدي ببيت رجلك... شذى:بعد كل اللي صار لي أحس ماعندي كرامه لو قعدت... ريم:وش دعوه؟؟؟...إنتي بتقعدين عشان ولدك اللي خاطري اشوفه و عشانك إنتي...شذى وش ماعندي كرامه؟؟؟...انا عندي نظرة لو تكون غلطانه بس اؤمن فيها مافيه شي اسمه كرامه بين الي يحبون بعض.. فيه عزة نفس صح...بس مافيه كرامتي ماتسمح لي وكرامتي..عسى ماشر؟؟؟.. شذى:...... ريم تكمل:اقول اقعدي وشوفي رجلك تركي والله كسر خاطري وإنتي بالشرقيه شوفي كم مره جاك وكم مره قلتي له ما أبيك وكم مره قالوا له اخوانك إنهم ماعاد يبونه صح؟؟؟..ليه ماقال نفس كلامك... شذى صدقيني لو تقعدين بيكون افضل..لأنه اخوانك ملتهين بزوجاتهم صح يحبونك بس لا تنسين كل واحد فيهم له حياته الخاصه..شذى فكري بقرارك لأنه بيأثر فيك وعلى كل اللي حواليك... شذى واللي اقتنعت بكلام ريم:ريم مشكلتي الوحيد هي سلمى ما ادري وش اسوي معها... ريم بقهر:حسبي الله عليها الساحره ذي..بس اسمعي اقعدي انتي ببيتك وزوجك بس مملك عليها..وأنتي ماتدرين يمكن لمن يستقر بحياته معك انتي وولدك يطلقها...خصوصا بس السالفه بينهم ملكه... شذى:ريم لا تحطين ببالي امل بعدين اتحطم... ريم:انا ما أئملك..بس إنتي حاولي يرجع لك حاولي تتقربين منه شذى إنتي ماحاولتي معه..اعرفي اسباب زواجه بالتفاهم يمكن شاف منك شي ماتدرين بس مع هذا كله يمكن يرجع يتزوج سلمى هذيك الساعه والله لك حرية الإختيار بأنك ترجعين أو تكملين حياتك معه بس ماراح تكونين ندمانه لأنك حاولتي معه لمن تطلعين بأقل الخسائر المصيبه تهون على قلبك لأنك بذلتي الأسباب... شذى بعد ارتاحت لكلام ريم:ريم... ريم:سمي... شذى:الله لا يخليني منك إنشالله من جد كلامك يقنع يالدوبه من مكالمه وحده اقنعتيني..أجل عبدالعزيز بسرعه تقدرين تقنعينه... ريم تضحك:هههههه بس هذا عشان تعرفين قيمتي وانا ياحليلي آخر وحده من درت بفصول ولدك عاد هو ماعنده خاله...أنا خالته من الحين.. شذى تضحك:أفا عليك بس..اول كلمه باخليه يقولها خالتي ريم... بعدها قعدوا سوالف..ولمن صكت ريم من شذى قعدت تفكر شذى بكلام ريم اللي تحسه دق على الوتر الحساس بقلبها وخاطب عقلها بنفس الوقت... من جد ريم كلامها صح..بس تركي للحين ماكلمها من جوا اهلها عشان تقعد؟؟؟ قعدت تفكر شذى إذا ماجاء كلمني بروح مع اهلي...بس من جد لازم اكلم تركي إنه ينهي موضوع سلمى هذا... |
| الساعة الآن 05:56 PM |
Powered by vBulletin® Copyright ©2000 - 2024, Jelsoft Enterprises Ltd. TranZ By
Almuhajir
HêĽм √ 3.1 BY: ! ωαнαм ! © 2010
new notificatio by 9adq_ala7sas
جميع حقوق النشر لشعارنا و كتابنا ومسميات الموقع خاصة و محفوظة لدى منتديات قصايد ليل الأدبية