يازينها دنيا بها الحلم جالي‏
واستبشرت فيها الليالي والأيام

وخيوط نور الشمس فيها تلالي
على مغيب أوهامها نور الأحلام

تحققت عندي على قدوم غالي
ومنها أنجلت كل المآسي والأوهام

وتغيرت أطياف ذيك الليالي
غاب السواد إللي على بيض الأعوام

ولفتني ردون الغلا يوم بالي
أرتاح من ماضي مضى كله آلام

وأمطر سحاب الحب شوق خيالي
مامرني ياهل الوفا من يجي عام

عوضني إللي في حياتي مضالي
والحب له كله على صدري وسام

أنا ما همني شخص يدور حقه المهضوم
يصارع زيف ما قاله وهو بالفعل مغبوني

يقول إن الشعر غايب عليه من البنات اغيوم
سحابه ملتبد ماقد نشر من كبده مزوني

تناسى أن الزمن داير وفي ليله قمر ونجوم
يغالط واقعه وده جميع الناس يحكوني

هدف مكشوف كل إللي يبي يحصد وراه اعلوم
يبي الشهره على أقصر طريق لو يلوموني

مثل هذا كثير بيننا في عالم مهموم
على اكتاف الشعر يطلع يبي ياصل وشوفوني

يرزز نفسه في كل المواقع يابشر موهوم
يقول البيت مكسور وذا ما هوب موزوني

وهو مايعرف حروف الشعر من فكره المهدوم
بعيد بعيد لكن إنه يحب الشعر مجنوني

أقول إن البنات اليوم خوات إرجال سيد القوم
فعلهم يشرح الخاطر بنات إرجال يعدوني

وفيهم شاعرات خالدات بالقصيد اليوم
قصايدهن لهن رمزا وكل الناس يدروني

نردد في مجالسنا قصايدهن بطيب إعلوم
حقايق كل ما تخفيه تبين بنظرة اعيوني