سبّـة هروبي

أرحل واروح بعيد عنك اتخفى
واركض واطالع ساعة ورايه

واليا انتهى دربي قعدت اتعفى
إلا انت ياسبة هروبي معايه

أشوف لك لمحة إذا الطرف غفى
في صحوتي ماخذ خيالي مرابه

لو أنعمي وانصم..لو استخفا
لو عشت انا والذاكرة مو معايه

بحر غرامك حالفه مايجفا
عبر مسام الجلد تدخل حشايه

هذاك اليوم

لوك معي حاضر ساعات توديعه
ماقلت لي ليه في سن الصبا شبتي

ولو كنت حسيت في حرقه مواجيعه
ماقلت لي ليه عن لاماه ماتبتي

حان الموادع وحان اليوم تلويعه
ياكثر عقبه اوراق فوق مكتبتي

بيت شطبته وبيت عدت تصنيعه
عيت تصور هذاك اليوم موهبتي

إن راح وان جا يبقى العهد مابيعه
والله وفي ذمتي وعهد على رقبتي

ميخالف ارحل بس لاترحل بعيد
ميخالف اهجر بس خلك بداري

ميخالف اعشق الف عذرا من الغيد
ميخالف اجرح بس حاول تداري

أنا عقب فرقاك ما مرني عيد
العام ذا من كل الأعياد عاري

ياصاحبي لا تكثر العذل وتزيد
معذور الأعمى لو مشى الليل ساري

بابيع عمري لك من غير تحديد
عمري رخص من يوم شفت انكساري

عقبك.قسم بالله.مدري وش اريد
أبنتظر ما بي ثمن لانتظاري

واتركني أغرق في بحور التقاليد
إرحل وسافر بس خلك بداري

http://forum.hwaml.com/imgcache2/hwa...243986_285.gif

مـزاج

سمه دلع سمه غرور وعوابه
سمه مزاج يعشق اللي يناحيه

سمه قساوة قلب سمه صلابه
سمه لعانه..سمه اللي تسميه

هذي طبوعي والغلا مو طلابه
يانور عيني غير هالطبع مافيه

مليت قلب يشتكي من عذابه
وتصرفي دايم يذمه ويشكيه

ودايم على طبعي كثير عتابه
درب المذله يامنى النفس مابيه

مادام درب العيب ماجيب بابه
وعهد الوفا ماخنت روعة معانيه

أمومتي

قال الوداع وقلت له بالسلامه
هذي ظروفي دايما جابراتي

مسحت عبراتي بكف الندامه
وتليت من كفه حوايف عباتي

قفى يداري عضة في ابهامه
وقفيت اداري عضة في شفاتي

وكل رحل يحمل بقايا غرامه
وراحت حياته يوم راحت حياتي

فرقاه ضامتني وفرقاي ضامه
وعلى الله الوالي خلف ذكرياتي

وعقب البطا أرسل عليه سلامه
يطلب ويرجيني يبي تضحياتي

مقدر أضحي بالشرف للملامه
وأمومتي ترفض أيتم بناتي

من ماحصل لقياك يوم القيامه
ما ظن تحصل شوفتي يا غناتي!!

غــالي

غالي ولايوجد مع الناس غلوه
عن وصف حبه يقصر الشعر وغناي

كل يوم حبه يرتفع ويتعلوى
هذا وهو غايب ولاهوب وياي

في عينه اليمنى ملاذ وملوى
وفي عينه اليسرى قرارات منفاي

ما حاصل لي ان غبت راحة وسلوى
وان جيت كل الناس من دون رجواي

إن غبت بلوى وان تقربت بلوى
منشار ياكل بالخشب رايح وجاي

ماني شمالية

إليا تذكرت الموادع وحققت
سيده يديني وسعن جيب ثوبي

وتليت لي ونه عميقه ودنقت
اخذ نهار والصدى في جنوبي

واطبع حرارة ضيقتي لا تضايقت
على الشفايف لا ذكرت امحبوبي

وغربت في بحر التعاسة وشرقت
وكفرت حتى المقبلات الذنوبي

ذاب بهواي وفي هواهم تعلقت
ماخنت في عهده ولاهوب كذوبي

اللي حداني يوم حبيت فارقت
ماني شماليه ولاهو جنوبي

http://forum.hwaml.com/imgcache2/hwa...243986_285.gif

حرة.. قهر

أنا قعدت وصاحبي راح يمشي
عيت تعاوني على المشي رجلي

تعلقت دمعات عيني برمشي
لانازله ولا معوده راجعه لي

أصحى وأغشى وارجع شوي واغشي
واعي من الغشوه على صفقة يدي

شفت الهلاك وشفت قبري ونعشي
وقمة عذابي لا مشى والتفت لي

حرة قهر والام تعذيب وحشي
وا..خيبتي بالحلم وا..خيبته في

قال : اسمعي

قال اسمعي:فرقاك غصب عليه
عيا الزمن يمشي معانا بالاوفاق

وقفت لاميته ولانيب حيه
تضاربت بالجوف ضيقه وحراق

وقال:الرسايل وينها؟..قلت:ذيه
وللريح عرضت الرسايل والاوراق

ورزيت نفسي واتظاهر قويه
يعني كأني ما تأثرت بفراق

وانا عذاب الكون صوت عليه
أضحك بسني واختم الضحك بشهاق

ماكنت أظن الليل يمسي عليه
ولا كنت أظن تعود الشمس بشراق

يا نايفه

ياخبلي يانايفه ويامكثر خبالي
أنا احسب ان الموادع عادي هين

من شدة الغيض أنا ودعت لي غالي
أقول اليوم عسير ويتبعه لين

يرحمني الغيض وطبع العند يبرالي
والعاذل اللي حكاه يزيد ويشين

وجنبت عنه ورحت اسير بلحالي
كما يجنب عن الخفرات متدين

وعودت ابي شوفته لما هدا بالي
أثاري جرحي لخلي ما طلع هين

وا..وجد نفسي عليه وياضنا حالي
وا..همي اللي أدسه عنه و يبين

http://forum.hwaml.com/imgcache2/hwa...243986_285.gif

لا وداعية

لا وداعية ولاهم يحزنون
قط لي كل الرسايل وانصرف

رافض حتى وداع التلفون
قام يكرر:ماتخبيه انكشف

ماجداي الا أناظر بالعيون
لين زوله عن مدى العين انحرف

كيف خان وهو حالف مايخون
وين عهده..وين كلمات الشرف

كل شي عقب محبوبي يهون
واستوى عندي عذابي والترف

موت الرجا

جيته ابستأنف مواعيد فرقاي
أبي الوداعيه تأخر نهارين

جيته وانا مسبوهة الفكر والراي
بجاهة الرحمن..بعدين بعدين

يسراي راحت تلتجي وسط مخباي
مابيه يلحظ رعشة بي من البين

ويمناي تمسح دمعة في محياي
وكلتها تستر دموع من العين

وبين التنهد والحيا موت رجواي
أبي الكلام وعز..وا فالي الشين

أنتم تحبوني وانا أحب ثاني
واللي أحبه باغي ناس ثانين

هذا ابتلى فيني وهذا بلاني
واللي بلى مبلي وباليه مسكين

أنا ترجيته وغيره رجاني
والمشكله ماينقل القلب حبين

سهوم تجمع بين قاصي وداني
ياليت لسهوم المحبه قوانين

هذا ينوح وذا جريح يعاني
هذا قتل هذا ولاهم دارين

وهذا كتم سره وهذا علاني
الله أكبر يا جهاد المحبين

http://forum.hwaml.com/imgcache2/hwa...243986_285.gif

متفرقات

العمر يا صاحبي معدود
نضيع في لمحة الرمشي

مهما نسوي نريد الزود
الواسطة فيه ماتمشي

أن بغيته حبيبي قمت كلمته
ما عليه من النمام والحاسد

كان رقمه من الأجواد مانلته
بارك الله في واحد صفر واحد

العين بالعين

تدري بطبعي حبيبي حيل وتعرفه
العين بالعين والبادي هو الظالم

ماني ورا العاطفة بالحيل منجرفه
طبعي على صد ردات الفعل والم

إلا خيانتك ما املك عندها صرفه
واحذر تحاتي ترى من خونتي سالم

ما ارضى أخونك ولا ارضى اعيش منحرفه
ماهو عشانك عشان النفس والعالم

درب الخيانات لو أموت ما اعرفه
لكن يا عمري تحاشى ثورة الحالم

http://forum.hwaml.com/imgcache2/hwa...243986_285.gif

حروف ومعاني

أنت أهلك ياصاحبي صاد والعين
وانا اهلي صاد وعين على صاد

بلاني العاذل من الجيم للسين
ياليت كاف ونون حولته ارماد

لك نون عيني والحشا بيت يازين
إستعمل اللامات من دون الابعاد

http://forum.hwaml.com/imgcache2/hwa...243986_285.gif

ذبحني غلاه

يجيني بلا غلط وانا ضيقتي بغناي
أغني باحكم هاجس ماكل حالي

ذبحني غلاه وحدني لين جبت اقصاي
ذبحني عسى مال الغلا ياعرب والي

غدا راس دبوس بدمي سرىلعضاي
ولا ادري أهو وينه وقف كيف ينطالي

تغلغل بمخي والعصب والعظم وكلاي
يدوج غلاه بمهجتي دون ترحالي

سبه عقلي الراجح وضل الفكر والراي
ياخبل الذي هاقيه..نزوه وتنزالي

بلاني عفاه الله..ليته بلى بلواي
غدا علتي ودواي والمر والحالي

آه .. ليته

كل ماجيت اغط بنومتي واهدي
جاني صوت لا نادى خافقي طار..به

جاني صوت ينادي عابرة إقعدي
ودعيني ترى شمس الرجا غاربه

ثم قمت اتقلب في لهب مرقدي
واتهاوش أنا والنوم واحاربه

و ردت الذاكرة للي مضى لي تعدي
يابيوت الغرام الخاوية الخاربه

اه..ياوقتي اللي راح حظي ردي
واقعي وامنياتي حيل متضاربه

اه..ليته يساعدني واجيب جهدي
نلغي السور والا نولع النار..به

يتصبر وانا للصبر ترفض يدي
إن طرا لي كلامه وضحكته وشاربه

غرامه ربى في داخلي وانتشر بالحيل
من الصغر حبه في حشا النفس منغرسي

أنا في نظر عيني حشا ماسمعت القيل
أهو حاضري ومستقبلي وباكري وأمسي

جحدني مثل مايجحد الكافر التنزيل
فجعني مثل فجع الهواجيس للمسي

جرحني مثل جرح الثرى من غزير السيل
رماني مثل مايرمى بالي اللبسي

محبة ثمان سنين ضاعت بلا تحصيل
تصدق..ختمها صاحبي يوم قال..انسي

ختمها بصمت..لا وداع ولا تعليل
ولا زال جرحه داخل الروح مايبسي

تسرب طواري صاحبي مع ظلام الليل
تحرم عليه لا مست الخلق..ما امسي

أويلاه..عقب الحب والخير والتدليل
أهل الدموع وخاطري ضايق عمسي

على ادناة شي ازعل على ادناة شي اعيل
أويلاه..عقب اليوم ياخفها نفسي

ياويلي عليه اليوم ويل يجر الويل
عقب صاحبي كن القدر معلن حبسي

فلا عدت اميز ياعرب بالعدل والميل
خياله يتابعني من الصبح لين أمسي

http://forum.hwaml.com/imgcache2/hwa...243986_285.gif

الضيقة

جاني بلاي وضيقة العام جتني
تلم بي لم الهوا بالبيارق

لامنها وقت المغيب حضرتني
يسيل دمعي فوق الأوجان حارق

الضيقه اللي في حشاي ادمرتني
بلاي من هم بالاضلاع غارق

باسباب من مدة غايبه طوتني
عامين لا علم ولا منه طارق

جفت حياتي والهموم امحلتني
ولا اشوف به غيث ولا اشوف بارق

من وين ماطقيتها عاكستني
ياكثر مابيني وبينه فوارق

صبحية العيد

ليته درى صبحية العيد وش صار
ياهي جرت لي من عذابي هوايل

يوم العذارى بيحن بعض الاسرار
وجت السوالف بين قيل وقايل

هذي معايدها قبل وقت الاسحار
وهذيك صاحبها عطاها رسايل

وهذي تقول انه لفى البيت زوار
وهذيك راحت له زيارة عوايل

وهذي تفاخر في غلا الصاحب البار
تقول عايدها بكل الوسايل

وأنا اطالع فوق ويمين ويسار
بالعيد ماحتى مشطت الجدايل

خوية الذات

أنا اسفة يا قصيدة وابعدي عني
الوقت كله عطيته لامتحاناتي

حتى حبيبي بطيفه لا دنى مني
للغرفه الثانية لملمت حاجاتي

الوقت ضيق وانا دروسي يهمني
خليني اختمها مسك اخر محطاتي

ما انكر جميلك علي يا مخففه عني
قصة شقاي وعناي وكل ضيقاتي

أدري أنا منك وانتي قطعة مني
كلن صراحة ثقيلة بعض الأوقاتي

خوية الذات لا..لاتزعلي مني
العمر قدام..وانتي مرصد اهاتي

ثــروة

تشوف عيني جملة الناس عدوان
وعقلي يقول اصابعي ماتشابه

وقلبي تبلد من عقب جرح خوان
ماعاد يرد العلم عقب الإصابه

في صمت تجري بي تصاريف الأزمان
أمشي وعلم الغيب مايندرى به

واحس بالغربه وانا وسط الأوطان
يتيمة بين الأهل والقرابه

أوراق مع ظرفين صوره وديوان
ثروة تنازعني عليها ذيابه

وصار الزمن والناس والحظ عدوان
والغلطه إني مدمنه بالكتابه

طفولة

رجعت ل ورا..لأيام في طية النسيان
معالم طفولة عاجز الوقت يخفيها

ليالي الهنا عن مسحها وقتها عجزان
أنا من خلال الذاكرة شفت ماضيها

أشوف الربيع الزين واشوف لي بدوان
ومقاطر طويلة مالحقنا تواليها

أنا اشوف لي روض امتلا بأجمل الغزلان
واشوف العدود اللي القطا من حواليها

وانا اشوف لي عد شهد مفرق الخلان
وعليه التقت ياما هنوف بغاليها

وبيت كبير تلعب اقباله الورعان
ومن بينهم طفلة يحير النظر فيها

براءة طفولة رائعة تخجل الشيطان
وتزيد التدلع كل مامر واليها

تمرد فرحها سابق الطير بالريضان
لحتى عجز عنها الفضا لا يكفيها

معاها القدر طايع وهي تشتهي العصيان
تدور على اللي بالتحدي يناحيها

وعنها القدر غض النظر فاشل خسران
عجز وارتجف خاف القدر من تحديها

وعنها القدر غض النظر فاشل خسران
عجز وارتجف خاف القدر من تحديها

أنا ادري عن الترحال عادة مع البدوان
ولكن غريبة كيف تهجر أراضيها؟

أنا ضحكتي للحين في وحشة الوديان
تصارع شبح نسيان وتخاف يطويها

تدور على الحروة وتلقى العوض مرحان
تمرد..تزيد ولا لقت شخص يحويها

تشوف بزوايا مرحنا ندرة الأحزان
يقولون به أحزان نسمع بطاريها

تعود لأراضي شاسعة ماوطاها انسان
تراودني الشكة على صدق ماضيها

كوشة فرحها

معنى الحياة بعينها صحوة الموت
شهود صلوا والمملك دفنها

وكوشة فرحها حولوها لتابوت
واكليلها الأبيض بقايا كفنها

تبريكهم أصبح عزا يجرح الصوت
صرخة ويبابه تشابه لحنها

غصب عليها تقبل الوضع بسكوت
مهره وعادات البداوة رسنها

أغضت وصدة وانطلق صوت مكبوت
لابو تقاليد الحياة وسننها

وراحت معاه بقلبها حرف منحوت
يبقى معاها لين يطوى بدنها

وراحت وبركان القهر لاتها لوت
تبي تصيح وفيه خوف سكنها

راحت وصدى كلماتها زلزل بيوت
لابو تقاليد الحياة وسننها !

البرئ

صرت مثل البرئ المتهم بالقتل
واقف بانتظار الحكم دون امتناع

واقف في طرف المحكمه منذهل
عين عند النيابه وعين عند الدفاع

إشهدوا زور ضده لين ضاع العدل
مايفيد السكوت ومايفيد الصراع

ودخلوا له شيخ قال له..اغتسل
ولقنوه الشهاده ولبسوه القناع

يتوسل ويبكي يرتجي ويبتهل
عندي أسرة صغيرة معرضة للضياع

الحـرّة

تدري وش اخر حلول مكافح الحره
اخذ من الماي ورشه على كبدي

صفت صفت مابقت لي حلول بالمره
جربت كل الحلول و وقفت ضدي

باللين أجي مره..وبالعند أجي مره
أبيها تمشي معاي وبيحت سدي

إي والله أقولها مانيب منسره
من قيدي اللي ورثه أبوي عن جدي

زهقانه..ضايقه حدي..ومحتره
يومه فشل كل حل طالع بيدي

أفكار .. أفكار

يا كثر أفكار توارد في مخيلتي
ياكثر ما صدها وكني أدللها

لا واعذابي بليلي وعز قايلتي
الكل منهن تبي مني أسجلها

هذي شطبنا عليها تحز عايلتي
وهذي مابيها سبقني شخص قايلها

وهذي مابيها صغيرة بحق منزلتي
وهذيك لقيتها وازريت اكملها

وهذي اذا قلتها قالوا تعيلتي
وهذي أهييء لها جو وأنزلها

ياكثر أوراق ودفاتر فوق طاولتي
من غير أجناط امليها واقفلها..!!

http://forum.hwaml.com/imgcache2/hwa...243986_285.gif

رَجــوى‏

بين رجوى الغريب وبين ضغط الأهل
لا حصل لي صعود ولا حصل لي نزول

إلتزمت اتفرج مابقت لي حيل
إطلعن المشاكل عن إطار الحلول

بس أطالع بعيني إنسحاب الأمل
وانكسار البيارق وانتصار العذول

وحلمي اللي رجيته عن حياتي رحل
لملم اللي بقى له وانهزم في ذهول

والأماني تبارى مقفية بالعجل
كن حلمي تهمها والجواب القبول..!!

ليل الشتـا

في عز ليل الشتا قعدت بلحالي
ماغير أنا وهاتفي والبوم والدوه

أنطر يبي يتصل بي واحد غالي
وطفيت ليتي أخاف انشاف في ضوه

أقلب الفيش..أخافه عاطل بالي
أموت واحيا وعقرب ساعتي توه

أنا في موقف يخوفني به اظلالي
واقول ما قوم لين يقول لي:قوه

ودقات قلبي تزيد وينشغل بالي
ويزداد خوفي لادرت الوجه للهوه

خلاني أنطر حبيبي المذن التالي
عز الله انه ماسوى خير ومروه

لي صاحب

لي صاحب منه تبي تطلع الروح
خبل ومنهي مولعه فيه خبله

عامين أوضح له مع الجد ومزوح
واقول ياعنتر تناديك عبله

طال المدى ثم قلت انا اغليك يالوح
مجروحه جرح مخاطره عجله

دنق وقال انا من العام مجروح
واشر لجرح مبطي وسط رجله

http://forum.hwaml.com/imgcache2/hwa...243986_285.gif

وقفت اطالع

سألت عنه الشمس.. يا شمس وينه؟
واشوفها عني لجت تزبن النو

وسألت عنه في شوارع المدينه
لكن طفت أنوارها واظلم الجو

ورحت اسأل الحاره هوى البال وينه
عقب الرحيل اللي شهدتيه ما جو؟

تكفين مثل الغير لا تنكرينه
ياما لعبنا بالبراحه أنا وهو

وقفت أطالع بالأماكن حزينه
أسترجع الذكرى وأنا داخلي ضو

ذكرى الطفولة و أول الطيش فينا
وحروفنا اللي كن تسجيلها تو

وضحكه وخيال وصوت طفل يبينا
في ماقفي كم قلت ليت ورا لو

أسوق من عندي بشاير ثمينه
اللي يعلمني بهم كانهم جو

http://forum.hwaml.com/imgcache2/hwa...243986_285.gif

فرقاه صار

أغض عيني عن خطاه و خماله
و ارقع فضايحهم بزين التواصيف

أثاري فيهم ما تفيد الجماله
و الناس لا سبوه قلنا ملاقيف

فرقاه صار 00 و نسيته لا محاله
ولا عاد في بوم <1> الليالي لهم طيف

دموع عز ولا ابتسامه نذالة
دنياك ما دامت لغيرك على الكيف

http://forum.hwaml.com/imgcache2/hwa...243986_285.gif

لله ابشكي

لله ابشكي (حيرتي ) لله رب العالمين
وامد له كفي (دعا) يالله عفوك ياجليل

يامنتهى (الشكوى) إله العابدين الصابرين
يالله (عونك0فزعتك) همي على قلبي ثقيل

جتني (رساله) نصها ياعابره (حزن وأنين)
مع(تجربه)مضمونها فيه النتايج والحصيل

في شكلها الظاهر (غطا) وفالباطن المعنى الدفين
وفي (حبرها) تلميح لايمكن يصير المستحيل

وانا حقيقه ماعرفت شلون ببدى ياحنين
مدري ابدي كلمتي أو الزم الصمت الفضيل

لا جيت ابتكلم لقيت الوضع قاسي مايلين
وان جيت ابسكت مالقيت علاج للقلب العليل

لاكن (عزايه) مامعي سلطه ولاعندي ضمين
ولاقدر اميل ماعدل ولاقدر اعدل مايميل

ماعندي الا (كلمة ) فيها العوارف خابرين
القاع لاصارت دهر (يابدو)يازين الرحيل

وخلافها (سلامتج) والله على الدنيا يعين
والصبر عنوانه(فرج) والغيث لابده يسيل

ويامنتهى الشكوى إله الصابرين العابدين
لاحارت افكاري ترى مالي سواك انت الدليل

ش اقول له

باكر يجي .. يا شيب عيني من الويل
من عقب ما سافر سنين مديه

ش اقول له : صاروا عيالي رجاجيل
ش اقول له ؟ : ماني بعهده وفيه ؟

إن قلت له إني تعذبت بالحيل
و إن قلت له أكبر عيالي سميه

يبي يعذرني و يترك القال والقيل
و لا يجي ويا زماني عليه

و ان جبت حظي و المقادير 00 تعليل
و اني ضعيف , و رغبة الله قويه

يبي يصدق كلمتي دوم تحليل
و لا يبي ينسف كلامي عليه ؟

ش اقول له ؟ ما ينفعن الاقاويل
ما دمت ماني في وعودي وفيه

http://forum.hwaml.com/imgcache2/hwa...243986_285.gif

إنَّــا لله

ليتني البارحه يا نايفه ما سريت
يم درج مقفل من قديم السنين

أشهد اني فتحته و انتبحت و بكيت
شفت ما هيض الجرح القديم الدفين

شفت وسطه رساله و ليتني ما قريت
بيت شعر قديم و ظرف مع صورتين

أشهد اني لغيره بالغلا ما عطيت
و اشهد انه بغاني مير ما من عوين

صحت من قلب يا ويلي على اللي هويت
و قمت امس دموعي من يسار و يمين

لا طرالي حبيبي بصوت واطي حكيت
إنا لله وإنا للولي راجعين

خلنا نتـفاهم

لاترفع الصوت ماني فيك مجبوره
قررت دربي وصوتك ما يوقفني

أرضى أنا بقاسيه أرضى بمغروره
ولا أرضى بعشرة حبيب ما تشرفني

ياما وياما وياما قلت بحروره
حاول تغيير ترى وضعك يكلفني

خلنا نتفاهم تعال نوضح الصوره
إما انت تمشي معي او لا توفقني

مسرور فيني وانا مانيب مسروره
حبي يشرفك وحبك ما يشرفني

رغــبة

أنا أبيك .. وحش يحتوي داخله عصفور
وانا ابيك .. طفل يحتوي داخله رجال

أبيك .. الأب بالعطف والأخ بالمعسور
أبيك أمي بالتدليل ومداعب الجهال

انا أبيك .. تاج الستر ياعاري المستور
أعاف العقل وانجن مادامهم عقال

أبيك .. المطاع الطايع المنذل المغرور
انا أبيك .. جوعي وشبعتي والفقر والمال

أنا أبيك .. تشكيلة عواطف كما البلور
أبي تحتوي كل التناقض مع الاشكال

أباصير انا وياك.. داخل بعضنا ندور
ياحتى نضيع وين كنا مع المدخال

خلاص انتهى صبري وتلاشت خيوط النور
أبعلن جنوني وش نلت من عالم العقال؟؟

المشكله

المشكله ماهيب هذي ولا ذيك
المشكلة لاحبت العين طايش

تزعل ويضحك وان تبسمت يبكيك
الموت جاك وهو بالأفراح عايش

تناقشه يزعل ، تداريه يشقيك
ترقع شروخ ويطلعن لك درايش

ماينتراضى وبالزعل مايراضيك
والصبر يثر بالقلوب الهشايش