طيّب وصدقت الحكي
غلطان غرتني العيون
مدري ان الناس في لحظه تحب .. والناس في لحظه تخون
الناس .. آه يالناس
حتى في المحبة يكذبون
كنت اتصور حبي في عيونك كبير
همزة وصل تبدى .. ولا تعرف أخير
كنت اتصور كل شي ممكن يصير
نشوف الكثير .. نعاني الكثير
نروح نتفارق
إلا اللي شفته .. ما هقيت انه يصير
شي خطير
الناس .. آه يالناس
حتى في المحبة يكذبون
اجرح مشاعر حبتك .. اكذب علي
اكذب واصدق كذبتك .. اكذب علي
الطيب انا عادتي .. والظلم يمكن عادتك
مسامحك روح .. رغم الجروح
نشوف الكثير .. نعاني الكثير
نروح نتفارق
إلا اللي شفته .. ما هقيت انه يصير
شي خطير ..

الصمت ..صافحني ونطق
قال و بكى
قال وشهق
واحد سرق
واحد تعذب و أحترق
واحد جبينه ما عرق
وفي ناس ما تحلم أبد
وفي ناس ما تعطش أبد
و في ناس ما تآكل خبز
و في ناس ما ذاقت مرق
الصمت كلمني بحمق
قال الشعر
شمس و تفق
و الحرف رايات وفشق
و اللي سكت مات وغرق
مستحي أكتب على اللوحة وأطوف
مستحي
اقعد اسولف للضيوف
اعذروني
مغمض وعيني تشوف
مقدر أكتب
للقراطيس القديمة والسيوف
مقدر أكتب
اعذروني
مستحي رغم الظروف
و رغم أشكال الدفاتر و الحروف !

تمشي على جروحي الحياة
يا للي تحت أهداب صوتك
سمعي بات
غني .. أعيش
غني .. اموت
غني .. تحت سورك أنا أطلع نبات
ردي الحياة
لا تتركيني .. في سجون الذكريات
يا قدر يتبعني في كل الدروب
يا تواقيع الاقامة في الهروب
يا سنيني اللي خذتها الشمس
في رحلة غروب
كانت عيونك وطن
كانت شعوب
كانت عيونك مدارس
علمتني الحب
في عز الحروب ..

حبيبى اختار
لاتنهار اعصابك
لاتنهار
اعترف بالسر..قول للناس
من حقنا نحب ونعيش
رغم الكون والاقدار
انت النبض فى شوقى
انت الدم فى عروقى
انت انسان خلق عمرى
وخلا لحظتى اعمار
وانا من غير حبك
ريشه فى تيار
ومعاك انته
يموت الفرق...
بين الشوك والازهار
وينبت فى حزن قلبى
فرح واشعار
انا وانت يمكن يوم
نروح عند القمر زوار
ونكتب فوق اشجاره سوالفنا
ونزرع سطحه وضلوعه
هوى واسرار
اوقف ارحم اعصابك
ارحمنى من الافكار
لاتتركنى دمعة حب
على ساحل هواك احتار
تعال نعلنها ثورة حب
تعال نذوق مره
لذة الاصرار ..

يلاحقني الورق
تاخذني هموم الوقت من وقتي
اسكت والسكوت أنتِ
أحاول والحلول أنتِ
شسولفلك..وانت سالفة صمتي
بسمرت الشفايف
بين صمت وصمت
تحديت الزمن
حتى نساني الوقت
خطيتك على الإصرار
على التكرار
وشلتك في سكوت
الحب
حبيبة آخر المشوار
حبي فوق تعريفي
حبي فوق تحريفك وتحريفي
وأنا ملزوم اتصبر
نسيانك مهو بكيفي
وعيونك نجوم الليل
كل الليل في صيفي
أحارب عالم عيونك
أحارب ينكسر سيفي
أبحر فيك يا حلوة
تغرقني مجاديفي
أنا بصحرا سكوتي انتحر وحدي
أعاني الصمت
أعاني الخوف
أعاني وجدك ووجدي
بهاجر من جديد أبدي
بحارب بالجمر بردي
بصمم أوفي في وعدي
وأصمم أحكي ما عندي
ولما يرتفع صوتي
أحيّ حتى الورق ضدي
أنا المقسوم للسكته أنا المقسوم
أنا العايش..أنا المعدوم
أنا غيمة مطر
وأنا العطش كل يوم
كنت آكل من اشعاري
كنت أشرب من اشعاري
وكنت أعزم على المقسوم
كنت أتعاطى هم الناس
كان ( بيتي ) بيوت الناس
وياما بدفتر بيوتي
طاردني السهر والنوم
وياما بليلي ضاع الليل
في سكة قمر مهموم
وياما بشعري وأشعاري
غفت ياما كثير نجوم
أمشي في شوارع ليل
غريب حتى عن ثيابي
غريب حتى عن احساسي
عن اعجابي
أضيع في غربة الألوان
أسير الصمت وأعصابي
أضيع تحت المطر غابة
ارفضتني أصغر أعشابي
أضيع مثل الطفل في البر
حزن الليل ألعابي
أمشي..أمشي..طول الليل
الماضي يوقفني
الذكرى تصادفني
أمشي .. أمشي ..طول الليل
تتعب مني أتعابي
أمشي .. أمشي ..طول الليل
يبكي دربي وترابي
أنا أول شجر
أغصانه ممنوعه
أنا أول شجر
يشرب من دموعه
يهاجر ظلي من تحتي
يترك صوتي حنجرتي
تصير السكتة مشروعة
وبين الهجرة والهجرة
يموت الحب من جوعه
وتبكي خطوة عيوني
تبكي .. تبكي مخدوعه
أحاول امشي واتردد
جميع دروبي مقطوعه.

شرديني ..اتبعيني
وزعيني في تضاريس الثواني
في محطات .. ومواني
اهدمي مجدي اللي ضمنّته
ملايين المعاني
احرقي خيمة حناني
شرديني
شردي طيور الأماني
اجبري ايامي ترحل عن زماني
غيري طعم القصايد في لساني
شرديني
اتبعيني
أنا بيتي هناك في اللاشي مكاني ..

صمتي .. ذخيرة وأسلحة
وأنا متعلق في السنين
مثل الصبر لما يتعلق
في خيوط المسبحة
اللي كتبته في حياتي
صار.. لازم امسحه
ولازم أعيش الهم
حتى أشرحه
حبّيت في كل اللغات
لغة اهتزاز الوردة وهي مفتحه
ولغة الجفاف
بعين غيمه مجرحه
حبّيت في كل اللغات
حتى لغات الأجنحة ..للأجنحة ..

يلّي عيوني منزلك
سو الذي يرضيك
إن كان هذا أوّلك
ينعاف تاليك
متعوب منك
والسبب عطفي
متعوب ..
ماقدر يالحبيب أخفي
وفر كلامك
ما حصل يكفي
عذبتني
ربي عسى يهنيك
جرح الصبر
يبكي على جرحي
كل المعاني هزها شرحي
مابي الفرح لو جيّتك فرحي
ماعاد يهمني
لو طروا طاريك ..

انا مجروح .. عطني جرح
يجوز الجرح اذا داهم احد يشفي
اجمع لي العطش صخره على لساني
اجمع صمت كل حاجه
وانثر صمت كل حاجه
انا لجمت صوتي اللي سكن حرفي
يعيش الصمت
وانا الصامت الاول
وانا الصامت الثاني .. وانا صامت ويكفي
اشيل البحر في صدري
واشيل الارض في كفي
تعال ياصمت ابي كتفك على كتفي
تمر الكلمة من صوبي
اغض طرفي
واشوف الصمت .. بس الصمت في صفي
قتلتني حالة اللاحال
انا موجود او منفي ..

يا ناس لا تهدمون السكة
والبيت القديم
يا يبه بيتنا حلو..نحبه مديم
حرام الطين يصير مرمر. . .
حرام الذكرى
تحت "الهيب" تتكسر
حرام التريك
يصير نيون
حرام الشارع الهادي. .
يصير مجنون
يا ناس لا تهدمون السكة
هذي السكة من قلبي
والبيت القديم
مسوّر بحبي
خلّوا نتفه من قلبي
أصبّر فيها احساسي ..