 |
منتديات قصايد ليل
(http://www.gsaidlil.com/vb/index.php)
- …»●[الرويات والقصص المنقوله]●«…
(http://www.gsaidlil.com/vb/forumdisplay.php?f=12)
- - لبى قلبــــك
(http://www.gsaidlil.com/vb/showthread.php?t=27041)
سامي: طيب اوصلج ؟؟
جواهر: اعرف الطريق سامي: انزين تعالي ما جاوبتي .. جواهر ابتسمت : كل شي في وقته حلو خلك على اعصابك سامي وهو يعلي صوته : جهزي القهوه اليوم بعد العشا انا عندكم جواهر استانست ومن فرحتها نست السبب الي كان سامي بيقوله ؟؟ سلمان ورفعه توهم داخلين للشقه ترن ترن ترن ترن ...<<< تلفون سلمان: بسم الله كانهم حاسين ... ( ويرفع التلفون ) نعم ليلى: السلام عليكم سلمان عرف الصوت وحس انه متجبس في مكانه وبتردد: وعليكم السلام ليلى: رفعه موجوده . سلمان: وبكل جرائه ووقاحه تطلبها : من أقولها ؟؟ ليلى تمت ساكته معقوله ماعرفني : ليلى سلمان: والله مشغوله دقي عليها بعدين وعلى طول سكر السماعه .. رفعه: مين سلمان ماكان وده يقولها بس قال في نفسه ليش أسوي كذا معقوله ليلى في بالها شي تسويه لي .. رفعه: سلماااني سلمان: هلا حبي رفعه: وينك وين سرحت منو الي داق سلمان: وحده اسمها ليلى رفعه: يووووو ليش ماعطيتني اياها تدري منو هاذي سلمان وكانه مايدري عن شي : منو رفعه: هاذي الي عازمتنا على زواجها عقب يومين سلمان: ايييي طيب ليش داقه مو رسلت خلاص رفعه: هاو اشفيك اكيد تبي تاكد علي الروحه فديت عمرها ( وراحت لعند التلفون تدق عليها ) سلمان هذا الي ناقص تتفدى ليلى : لا تفدين احد غيري رفعه وهي تطالعه باستغراب : هلا السلام عليكم وكلمتها رفعه وكانت ليلى تاكد على رفعه الجيه مثل ماقالت رفعه لسلمان ... سكرت رفعه وهي مستانسه سلمان قاعد على الكرسي وتم يطالعها وهي تبدل وترتب ومتحمسه في السوالف عن ليلى سلمان: الله للدرجه هاذي غاليه عليج رفعه: تقريبا كانت وحده من بنات الشله في الثانوي سلمان: ومصره تروحين العرس رفعه: أكيييييد ليه ماتبيني اروح؟؟؟ سلمان: انا اقول ماله داعي عشان صحتج وصحة الي في بطنج وبعدين أخاف عليج يحسدونج عاد وين الاقي غيرج رفعه: ياقلبي انت الي في بطني ماراح يصيبه شي وانا الحمد لله مثل الحصان ماني تعبانه ولاشي وان شاء الله ماراح يصيبني شي وبقرا المعوذات على نفسي سمان: حتى ولو ما خاطري تروحين رفعه مستغربه من كلام سلمان فتوقعته هبال : سلمان تتكلم جد سلمان حس انه مصخها على شي مايسوى : لا أمزح معج شدعوه هذا خالتي بتروح بس انا اعفيني من الروحه رفعه: براحتك على انها لزمت علي انك تكون من الحاظرين سلمان: انا ماراح ازيد ولا انقص شي وعندي اشغال اهم من العرس رفعه : قلبي انته انزين لا تعصب خلا ص مو لازم تروح اليوم الي بعد رفعه كانت منسدحه في الصاله وقاعده تسولف مع دانه ... رفعه: والله ماادري شفيني اليوم احس بتعب وخموول دانه: يمكن مو نايمه زين رفعه: الله يسلمج أي مو نايمه انا وحامي كله نوم دانه: عادي كل الحوامل كذا رفعه : هههههههه حلوه هاذي الحوامل شوي الا يدق جوال رفعه وكانت جواهر بعد ماسكرت رفعه : حبوبه انا بروح بيت اهلي شرايج تجين معي البنات كلهم متجمعات دانه: لا خير فشله رفعه: أي فشله قومي بس الحين انتي مثل اختي دانه: تسلمين ياعمري بس .... رفعه: شنو بس احسن لج من القعده بروحج وانا بدق على امج وأقولها دانه : اوكي رفعه: يلا روحي تجهزي انا بطلع ابدل واجي دانه : اوكي .. العنود وأمها والهنوف كانو رايحين لعند جدهم جاسم يسلمون عليه طبعا الجد فرح بجيتهم خاصه البنات لانها على غير عادتهم العاده يجون الاربعاء أو الخميس بس هالمره العنود ماكان عندها شي وقالت تبي تروح مع امها الي تقريبا كل يومين كانت تروح له ومرت على الهنوف وراحو .. قعدو سوالف وضحك شوي الا يسمعون طقه الباب وتنحنح رجال الجد جاسم : من ؟؟ أحمد : هذا انا أحمد .. ويدخل الا في وجهه العنود ويرجع على ورى الهنوف والعنود خذو عباياتهم ولبسوها عقب دخل احمد وسلم على خالته وعلى جده وتم يسولف والبنات كانو قاعدين في جهه صاده عنه بس حاطين الغطا على وجيههم .. بعد ماطلعو العنود وامها والهنوف جاسم كان قاعد يسولف مع جده الجد: ها ياولدي للحين مانويت تتزوج أحمد: والله يابوي جاسم أكذب عليك اذا قلت لك ماأفكر بالموضوع الجد: زيين وقلت لامك تخطبلك أحمد: لا والله ياجدي مابعد افتح معها الموضوع بس ان شاء الله ابقولها والله يكتب الي فيه الخير الجد: انت حاط في بالك وحده معينه والا الي بتخطبها الوالده أحمد ابتسم وطبعا هو حاط في باله العنود : بيني وبينك في بالي وحده واتوقع ان الكل بيستانس عليها الجد: ومن هي سعيد الحظ هاذي أحمد: العنود بنت خالتي الجد: والله وعرفت تختار مابتلقى احسن من العنود احمد: ان شاء الله ربي يكتب الي فيه الخير .. احمد من أول ماشاف العنود ذاك اليوم وصورتها ما فارقت باله وكان عازم انه يكلم أمه في الموضوع عشان تخطبها له لانها عجبته وهو أصلا من كانو صغار كان يميلها ويفضلها على الكل .. في بيت أهل رفعه .. دانه كانت مستانسه وداخله جو مع البنات تمت شوي عقب طلعت مع نوف فوق لغرفتها لانها هي تعرف نوف واكثر وحده تمون عليها .. وهم قاعدين الا يطق باب الغرفه نوف: منوووو حمد: انا ادخل نوف: لاااا دقيقه وقامت فتحت له الباب : هلا امر حمد: مايامر عليج عدو وين الاستشوار نوف: وانت ماتتوب ياخي اشتر لك استشوار وفكنا حمد: ماله داعي شعري ناعم وبعدين اخاف اشتريه وتستولون عليه اني واختج نوف: لا والله دام شعرك ناعم دور غيري يعطيك الاستشوار حمد: نوووووفه يلا عاد وراي طلعه مب فاضيلج نوف: حتى انا مب فاضيه عندي صديقتي حمد: صديقتج...؟ وينها؟؟؟ نوف :داخل الغرفه دانه كانت تضحك على اسلوب حمد ومستانسه في نفس الوقت حمد يقصر صوته شوي : الله يفشلج ولا تقولين لي انا ماخذ راحتي بالكلام نوف: عادي هاذي دانه مب غريبه منا وفينا دقايق اجيب لك الاستشوار حمد من سمع اسم دانه كان وده يطير من الفرحه ومتحقرص وده يدخل يشوفها بس طبعا ولافي الاحلام تم واقف الا تطلع نوف : تفضل حمد: مشكور .. الا اقول نوف تبون اجيبلكم خرابيط شي ماشيات انا حاظر ترى عندنا ضيفه ومو أي ضيفه نوف رافعه حواجبها وتطالعه مستغربه : الله الله شطاري عليك اليوم هذا صديقاتي كل مره يجون اترجاك تجيب لي الاغراض بطلعه الروح والحين انت بنفسك تعرض علي حمد: خلاص بطلت سويتي لي قضيه انا قلت بضيف صديقتج كيفج انتي الخسرانه نوف: مشكور وماتقصر دخلت نوف وهي تعلق على حمد ودانه ميته من الضحك عليه شوي الا نزلو تحت عشان رفعه بتروح في طلعة رفعه ودانه كان حمد طالع .. رفعه: هلا حمد حمد: هلا بالغاليه افا يالقاطعه كذا سلمان نساج اخوج حمد الي اول مايمر يوم الا لازم تشوفينه رفعه: هههههههههه للحين عزيز وغالي بس تعرف والله عاد الحين مع الحمل كله خامده حمد: الله يارفعو من كان يتصور انج تصيرين ام رفعه: هاو وش ناقصني حمد: ماناقصج شي بس الي يشوف هبالج اول يقول هاذي وينها وين الامومه رفعه: اقول بس اسكت فشلتني قدام دانوه حمد رفع عيونه ورى رفعه وشاف دانه ابتسم لها وغمز : عادي تمون دانه دانه هي من اول ماشافته وقلبها يدق وقاعده على اعصابها وبعد الغمزه حست جسمها كله حريقه رفعه: استح على وجهك يلا دانه وطلعو وراهم حمد وهم عند الباب في الشارع .. حمد: أقول تراني ابيج في موضوع خاص ابي اكلمج فيه هاليومين رفعه: ان شاء الله حمد: سلامي لحبيب القلب رفعه: يوصل وراحو وكانت دانه منهبله ومستانسه على هبال حمد وطول الطريق تمت رفعه تسولف لها عن هبالها اول وياحمد .. اليوم الخميس جات منى عند أهلها لان وقت ولادتها قرب خلاااص على وشك رفعه كانت فوق تتزين وادنه كانت معها تسوي لها شعرها .. دانه: الله رفعه صايره جنان مع هالدبه الصغيره رفعه: هههههههه صدق والله والا بس عشان لابسه احمر محليني دانه: لا والله ماشاء الله قمر والله وعرفت تختار ياعمي رفعه: تسلمين ياقلبي عيونج الحلوه دانه: الله يسلمك يالله تامرين بشي انا بنزل لعند منى تحت رفعه: لا مشكوره خلاص مابقى الا المكياج وانا بسويه دانه : اوكي يلا سلام لاتنسين تقرين على عمرك رفعه: ان شاء الله طلعت دانه من هنا ودق جوال رفعه من هنا رفعه: هلا يمى امها: هلا بج شخبارج رفعه: الحمد لله بخير ها جهزتي امها: أي انا طالعه الحين امر عليج |
رفعه : لا يمى مشكوره باقي لي المكياج انا بجي مع سلمان
امها: خلاص يمى براحتج بس لا تصيفين رفعه: ان شاء الله يلا مع السلامه الام: في حفظ الكريم حطت رفعه المكياج وتعطرت .. كانت لابسه جلابيه فخمه لونها احمر وكلها شك وتطريز وجايه مخصره على جسمها وصاير بطنها واضح فيها وشعرها خذت خصل بسيطه من الاطراف وشاتها وحطت ورده جوري طبيعي ومن تحت مرول بالفير وخصل قذلتها على عيونها طايحه ... بعد ماخلصت توها قايمه من على التسريحه الا يدخل سلمان اول ما شافها تم واقف ويطالعها وهو منبهر رفعه تضحك : شفيك شايف جني سلمان: ............................. رفعه قربت لعنده وتحرك يدها قدام عيونه : يااااهوو سلمان: الا قولي ملاااااااك ... استني خل اجمع قواي رفعه: ههههههههههه الله يقطع بليسك انت وسوالفك وليش تجمع قواك سلمان: الي يشوفج مو بس يفقد قواه الا كل شي يملكه يروح ياارب احفظ لي حبيبتي من الحساد وحط يده على راسها وقام يقرا عليها وعقب باسها على راسها .. رفعه: تسلم سلمان: الله يسلمج شخبارج اليوم_ وهو يحط يده على بطنها_ وشخبار الأخ رفعه: تمام عال العال بعدين تعال يمكن اخت مو اخ سلمان : أخ أخت المهم انها منج رفعه ابتسمت وحست بحيا : انزين يلا ترى تاخرت سلمان تذكر انها بتروح عرس ليلى: يعني الا تروحين قعدي معي رفعه: ردينا لطير يلي ماراح اطول كلها ساعه ساعتين بالكثير سلمان: الله وااااجد سلمي عليها وباركي واطلعي رفعه تطالعه وهي رافعه حواجبها : لا والله انت احلف سلمان : والله والي يعافيج حبيبتي لا تروحين انا قلبي مو مرتاح لروحتج هاذي رفعه : لا تفاول ان شاء الله مابيصير الا كل خير خذت شنطتها الا يطق جوالها شافت الا رقم غريب وماردت سلمان: ردي شفيج رفعه: ماعرف الرقم كيفه يلا خل نطلع طلعو وهم بالسياره سلمان مافي ابطأ منه وطبعا متعمد وطول الطريق لاهين بالسوالف وطق الرقم الي قبل شوي وردت رفعه .. رفعه: نعم الطرف الثاني : الاخت رفعه رفعه: أي من معي الطرف الثاني : مو مهم انا مين ... بس حبيت أقولك ... توت توت تو ت<< ينقطع الخط رفعه: فضاوه سلمان: شفيك رفعه : ماادري وحده داقه قالت انتي رفعه قلت لها من معي قالت مو مهم بس حبيت اقولك وانقطع الخط سلمان : لا تردين عليها شكلها ماعندها سالفه رفعه: وهذا الي بيصير وصلو .. سلمان: يعني مصره رفعه: اكيد وتراني وصلت عند باب الصاله يلا ابدق عليك اذا خلصت سلمان: تراج قلتي ساعتين بالكثير رفعه: ههههههه ان شاؤالله يلا مع السلامه نزلت وسلمان يدعي ان ربي يحفظها له ويردها سالمه دقت رفعه على امها واول مادخلت ماشاء الله الكل جا يسلم عليها من صديقاتها الي بالثانوي والي بالجامعه والي لها معهم معرفه قديمه واستانست يوم شافتهم تمت شوي الا زفو العروس عقب طلع البعض فوق المسرح يسلم عليها ويبارك لها رفعه انتظرت لين خفو العالم عقب راحت لها ليلى يوم شافتها ماعرفتها بسيوم تكلمت رفعه .. رفعه : هلا بالعروس مبروووك ليلى تمت تطالع رفعه ومر ببالها سلمان : هلابك الله يبارك فيك رفعه صح ؟؟ رفعه : أي رفعه .. شخبارج والله تغيرتي ياليلى ماشاء الله صايره قمر ليلى : تسلمين ياقلبي انتي الي قمر ماشاء الله وفي قلبها مالوم سلمان فيج وانتبهت لبطنها الله يسعدكم ويوفقكم .... صديقاتها كانو حولها متجمعين وخواتها وحده من خواتها كانت تطالع رفعه بنظرات غريبه رفعه لاحظت بس طنشتها ... رفعه وهي نازله من على المسرح كانت وراها اخت ليلى وهي تنزل من الدرج توها بتحط رجلها على الجلابيه من ورى عشان تطيح رفعه الا تصرخ وحده : انتبهي انتبهي لا تدوسين على الفستان لفت رفعه وشافت اخت ليلى وراها جرت جلابيتها اخت ليلى: اسفه ماكنت منتبهه البنت: زين انج مادستيها المره حامل كان طاحت على وجهها اخت ليلى في قلبها ليتها طايحه قالت رفعه للبنت شكرا وراحت قعدت على الطاوله مع صديقاتها ومعارفها على الساعه وحده وشوي طلعت رفه وقبل لا تطلع جاتها اخت ليلى وقالت لها ابي اقولج شي سلمان كان يدق على رفعه وهي كانت مستعجله فعطتها رقمها وقالت لها تدق لها بعدين .. رجعت أخت ليلى للكوشه جنب اختها .. ليلى : لولو شنو تتمنين لي في هاليوم لولوه: ان ربي يسعدج طول حياتج ويوفقج ليلى: وانا اتمنى لرفعه نفس الي انتي تتمنينه لي لولوه استغربت من الكلام الي قالته اختها : وش دخلها بالموضوع ليلى: لولو حبيبتي اذا تحبيني جد خلي المره في حالها خلاص . لولوه ابتسمت : ان شاء الله في نفس اليوم بعد صلا الفجر منى زاد عليها الالم فراحت لامها وقالت لها وعلى طول ودوها للمستشفى وطبعها دقو على فارس وجا على طول وكان وقت الطلق الي كان معها امها وجدها وزوجها كانت الولاده شوي عسره لانها اول ولاده لها بس الحمد لله كانت طبيعيه والطفل سليم وكان ولد الكل فرح وطبعا دقو على الجده وقالو لها والصباح دقو على الاهل وخبروهم ... اليوم الجمعه الكل كان مجتمع في بيت الجده والكل فرحان بولاده منى والعصر راحو يتحمدون لها السلامه البنات عن الزحمه راحو بعد المغرب بس هم كان زحمه والغرفه ماخلت من الحريم ماشاء الله .. قعدو شوي عقب طلعو العنود: حشى مووت زحمه بدق على راجو يرجعنا للبيت دانه : والله تسوين فينا خير ريم: لحظه شرايكم نروح نشوف البيبي اول بعدين نروح الهنوف: يلا قومو ونزلو تحت وين يحطون الاطفال ولقو هناك محمد وسلمان وطبعا قام الهبال العنود: فدييييته يزنن سلمان: ولدي احلى ريم: انزين خل يطلع اول سلمان: بيطلع ويقص عينج بعد دانه : والله فله يصير عندنا بزر في البيت احسن من هالشويهد العنود: أي والله ياحظكم محمد: ليه حتى احنا ان شاء الله بيصير عندنا في البيت الكل لف لى محمد يطالعه العنود: منو .؟؟ ريم: لا يكون امي حامل وانا ماادري محمد: ههههههه لا شنو حامل تخيلو امي بكرشتها العنود: اقول عن الطناز لا اعلم محمد : ان شاء الله ولدي((( ويغمز للهنوف )) الهنوف انحرجت وحمدت ربها ان النقاب على وجهها لانه صار طماطه ريم: أي والله صدق وناااسه مو بس انتي يادانوه الي عندكم بزر الكل قام يضحك عقب طلعو البنات ومحمد بوصلهم اما دانه فراحت مع سلمان عند السياره قام الخناق بين الهنوف والعنود كل وحده تقول للثانيه انتي اركبي قدام قامت ريم نزلت من ورى وقالت انا بركب قدام وانتو اذلفو ورى محمد: زين سويتي وهم عند الاشاره كان هندي يبيع ورد جوري احمر محمد: ها مين يبي ورده ريم: من زينها العنود: مالت عليج جوري محمد: تعال صديق عطني وحده خذ محمد وحده وعطاه الفلوس العنود: حق منو بعدين ليه وحده احنا ثلاث محمد : ومن قال انا ماخذها لكم انتو انا ماخذها لقلبي ويطالع الهنوف من المرايا ريم: اكشخخخخخ اخوي عاد المفروض تعطيني اياها انا قاعده قدام لازم ترزني العنود: هههههه <<< بطناز قلو يعطيج اياها حبيبته وراه وتبينه يعطيج اياها وماتحس الا طقه على راسها من الهنوف والكل قام يضحك عليها .. طبعا وصلو الهنوف أول وهم عند الباب الهنوف: يعطيكم العافيه محمد: ترى انا الي سقت مب هم الهنوف: يعطيك العافيه محمد : ههههههه نزلت الهنوف ونزل وراها محمد وخذ الورده معاه : دقايق بنات واول ما سكر الباب قامت تعليقات ريم والعنود محمد من وراها يناديها : شدعوه يعني عشانك قمر تتكبر الهنوف : الحين ممكن اعرف ليش تنزل محمد: ابي اعطيج الورده دخلوا للحوش لفت الهنوف : شكرا ومدت يدها عشان تاخذها محمد باس الورده وقبل لا يعطيها قال : ياورده وصلي لها البوسه لان في الوقت لحالي ماقدر اوصلها بنفسي وعطاها اياها : يلا ياقلبي سلام بدق عليج الليله الهنوف طبعا مييييييته من الحيا : مع السلامه واول ماطلع نقزت وراحت للبيت تركض وهي طايره من الفرح في الليل طق جوال جواهر شافت رقم سامي ولا ردت وتم يدق ويدق لين ما ردت جواهر : نعم سامي : سنه مابغيتي جواهر : حد يدق هالوقت سامي: أي انا يلا انزلي استناج في الملحق جواهر: نعم نعم نعم سامي: نعم الله عليج يلا بسرعه جواهر: امي انت من صجك تبيني انزل لك في هالوقت لو شافنا احد شنو بيقول سامي: يقول الي يقوله عقب كم يوم بنملك جواهر: لا والله ... بعدين ليش تبيني انزل سامي: ابي اكلمج في موضوع ضروري جواهر : يتأجل سامي : لا ما يتاجل لازم أقولج اياه قاعد مكبوت على قلبي وعليه راح تقررين اذا يتم زواجنا او لا جواهر وبدا الشك والخوف يراودها : سامي انت شتخربط |
سامي: جواهر بتنزلين والا شلون
جواهر : ماراح انزل واذا مهم للدرجه هاذي قوله الحين سامي : كيفج ذنبج على جنبج جواهر: شنو تهديد سامي: لا بس انتي تبطين الكبد الموضوع مررره مهم .. جواهر: يتعلق فيني والا فيك سامي: فيني جواهر قلبها يدق : سامي فيك شي سامي: ايه ياجواهر فيني جواهر: شنو ؟؟؟ سامي: شوفي كل مره ابي افتح معج الموضوع وتضيعينه او يجي احد ومااقدر اكمل وكان ودي اقولج اياه وانتي قدامي ماابي بالتلفون .. شوفي تذكرين هذيك الليله يوم دخلتي الملحق وشفتيني قاعد بروحي وتساليني شنو فيك قبل لا اسافر جواهر: أي سامي: في ذاك اليوم واحد من أعز اخوياي الي كنت دوم معه طلعاتنا وجياتنا وكل شي مع بعض ... << وتم ساكت شوي وكمل >> كان هو تعبان من فتره ويوم رحت له قالي انه اصيب بمرض الايد... جواهر وقبل لا يكمل شهقت وحطت يدها على فمها : مستحيل سامي: خليني أكمل جواهر تمت متجبسه مو عرفه شتقول او وش تسوي ودموعها تنزل سامي: شوفي ياقلبي انتي وافقتي علي الا وانتي عارفه الماضي حقي ومو لازم ارجع انبش فيه وأقول الي مضى بس الي صاب خويي كان بسبب جمعتنا مع شلة بنات وشباب وانا .... جواهر وهي تصيح بشهاق : خلاص لا تكمل حرام عليك شلون يقوى قلبك تقول زي كذا سامي : جواهر اسمعيني انا ماكملت كلامي جواهر: ولا ابيك تكمل ولا ابي اسمع شنو بتقول بعد اكثر من الي قلته ... حرام عليك ليش سويت كذا سامي يقاطعها: جواهر اسمعي انا ماسافرت الا عشان هالشي رحت بره وسويت تحاليل والحمد لله طلعت سليم من هالمرض بس .... جواهر سكتت وقبل لا تكتمل فرحتها الي كانت بتدخل لقلبها لولا بس : سامي انا بنزل الحين سكرت الجوال وخذت جلالها ونزلت تحت وهي خايفه من ان احد راح يشوفها بس الي قاله سامي خلها تتشع وتنزل لان ماقدرت تكمل كلامها بالتلفون .. دخلت للملحق وكان سامي قاعد ومسند راسه على الكنب ومغمض عيونه وفاتح ابجوره واطيه فتحت النور فتح عينه : سكري النور لا احد ينتبه الابجور تكفي جواهر سكرت النور تقدمت شوي وتمت واقفه تطالع فيه وفي قلبها انا الحين ليش جيت ليش نزلت وش بقول المفروض اني مااخليه يشوف وجهي مااكلمه بعد الي قاله ... سامي قطع افكارها : وش اللي يدور في بالج جواهر: ولا شي سامي: طيب ليش هالدموع جواهر : لا تخاف مو عليك ابكي على قلبي المسكين الي حب واحد مايستاهل الحب شوف ياسامي اقولك اياها وبالفم المليان على كثر ما حبيتك بحاول اكرهك وانساك واشيلك من قلبي الي سويته لي مو هين جرحتني بما فيه الكفايه انا حبيتك بكل عيوبك بس ماتوقعت توصل لدرجه انك << ودخلت في نوبه بكاء >> سامي خذ نفس : قلتي كل الي في قلبج ارتحتي رفعت عيونها له وهي حممره من الصياح ودموعها ماوقفت تم سامي يطالعها وقلبه متقطع على الدموع الي يشوفها على وجه حبيبته قام وقف قدامها وصارو مقابلين بعض سامي: جواهر انا احبج ولو أي مخلوق في الدنيا خذج مني راح اموت بس عشان مااكون اناني وظالم ابي اقولج أنا ... جواهر منزله راسها وتحاول انها تتمالك نفسها لانها حاسه ان الخبر راح ينهيها سامي: انا عقيم رفعت جواهر عيونها المندهشه وتمت تطالع سامي الي كانت عيونه غرقااانه ونزلت دمعه حاره غصب عنه على خده .. سامي: رحت لاكثر من طبيب داخل البلاد وبره بس الكل قالي اني مافي امل انجب الا بعد مشيئه الله وانا هذا الشي الي كان ودي اقولج اياه قبل لا نرتبط وماحبيت اعلم أي احد عشان يكون القرار منج انتي وباقتاعج مابيهم هم الي يرفضوني عشان بنتهم ابيج انتي الي تقررين اذا موافقه او لا وصدقيني حتى لو رفضتي بالعكس راح اكون مقدر لشعورج انا رجال اشيل عمري بعمري بس انتي مره ومابي احرمج من احساس الام جواهر قاطعته: اششششش خلاص وحطت راسها على صدره وتمت تصيح وتشاهق لين حس سامي ان احد صاب عليه كوب ماي من كثر الصياح خلاها تصيييح لين ماسكتت سامي: ما ابيج توافقين علي رحمه والا عشان تحبيني فكري بعمرج ....... جواهر: ياخي انت ماتحس أي حب هذا الي في قلبك وتتكلم عنه لو تعرف معناه ماقلت هالكلام تعرف شنو معنى احبك تعرف شنو يعني انت الدم الي بعروقي تعرف شنو يعني مااقدر اعيش بدونك تعرف انك انت عمري وحياتي وامي وابوي وعيالي واهلي كلهم .. قامت تتكلم وتطلع كل الي في قلبها وسامي يصيح من الفرح ويمسح دموعها .. سامي : بسج دموع شخليتيس ليوم عزاي جواهر: فال الله ولا فالك لا تقول كذا جعل يومي قبل يومك سامي : ابتسم وباس راسها جواهر ردت لابتسامه ووخرت عنه: خلاص ترى مصخناها وطلعت من الملحق وهي مرتاحه لان سامي قال لها وما خبى عليها ... وهو بعد كان كرتاح من الكلام الي قالته صدق بعضه عور قلبه بس كان اكبر دليل على حبها له وانها ما تقدر تتخلى عنه ... بعد اسبوع كانت ملكة جواهر وسامي كل واحد فيهم الدنيا ماكانت واسعته من الفرحه ... دلال في ثاني اسبوع من شهرها التاسع جات للسعوديه عشان تولد جنب امها واهلها .. وفعلا جابت لهم دلول بنوته ولا احلى سمتها ** ليان ** عبداللطيف خذ له شقه عشان يسكن فيها هو وزوجته وبنته الي ملت عليه الدنيا من جات ورجع لندن بروحه وتم فيها شهرين تقريبا عشان نهايه دراسته ورجع لهم للابد .... رفعه ولدت وجابت لهم محمد الصغير وطبعا هذا كان الكل بالكل هذا ولد سلمان المدلل ... عرس أحلى ثنائي الهنوف ومحمد كان في الصيفيه طبعا الكل كان مستانس وفرحان لهم كانت الهنوف ولا اروع جميله جميله بمعنى الكلمه الكل انهبل عليها وعلى نعومتها وطبعا محمد كانت الدنيا مو واسعته من الفرحه واخيرا بيلتقي بحبيبته الي ياما وياماانتظرها على احر من الجمر.. سلمان وكان معه ولده حمود الصغير ومكشخه بثوب وبشت وشماغ وعقال على قده صاير شكله جنان محمد: اكشخ طالع علي عاد لا أوصيك حتى عروسك اختارها مثل عروسي سلمان: افا عليك وهو ولد سلمان هذا اذا ماكانت احلى من عروسك محمد: يهبى وين يلقى مثلها اصلا سلمان: هههههههههههه ها محمد ماودك يقضي العرس محمد: الا والله بس وش نسوي نصبر كلها ساعتين سلمان: ذوووق تذكر بيوم عرسي وش قلت محمد: توني احس فيك الصراحه عند البنات العنود: الهنوف يالله مابقى شي الحين بزفونج الهنوف : هاااا لا انتظرو شوي سهى: أي ننتظر الساعه 12 وشوي متى تبين تدخلين ان شاء الله الفجر الهنوف: لا مو الفجر بس استنو شوي العنود: ياعمري اخوي ذبحني بهالاتصالات والانسه تبي تاخر الزفه بدور: وي مسكييين ولد أخوي يلله الهنوف اجهزي الهنوف : بسم الله الله يكون في عوني والله ياخوفي اطيح وانا على الجسر بدور: لا تخافين كلنا قلنا مثلج ولا صار شي ..(( وتقعد على الكرس )) ااااه تعبت |
رفعه : ما احد قالج تحركي ارتاحي ترى مو زين لج الوقفه وانتي حامل
العنود: أي والله انتي تشيلين روحج والا تشيلين الي في بطنج العنود كانت اسعد انسانه في العرس لانها شافت الفرحه في عيون حبيبتها وصديقه عمرها الهنوف وأخوها الغالي محمد وبدور الي كان شكلها ولا اروع مع بطنها الي كان في الشهر الخامس وصايره جنان لان الحمل مناسبها ومخليها تحلو أكثر ... رفعه بعد تخرج دانه ودخولها الجامعه فاتحتها بموضوع خطبه حمد لها وللعلاقه الي بينهم الي مثل الخوات قالت لها دانه خل تخلص السنتين الاولى من الجامعه عقب خل يتقدم لها لانها حاليا ماتفكر بالزواج على قولتها تبي تعيش شبابها شوي<<ماثره عليها الاخت ريم >> حمد مازعل بالعكس كانت له فرصه عشان يكون نفسه ويستعد أكثر للزواج بس تطمن ان دانه باذن الله راح تكون له ... ريم كانت رافضه تماما فكره انها تتزوج الا بعد ماتخلص جامعتها .. هاااااااااااا بقى احد نسيته ؟؟؟؟؟ ادري بقى اهم شي في القصه كلها ,,,, بعد سته شهور ,,, العايله كانو مقررين انهم يروحون للشاليهات ويقعدون فيها كم يوم بما ان الجو حلو .. العصر في بيت عبد العزيز .... ام عبدالله كانت قاعده في الصاله الا يطق التلفون وترفع ام عبدالله: نعم المتصله : السلام عليكم ام عبدالله: هلا وعليكم السلام المتصله : شخبارج ام عبدالله ام عبدالله : بخير الله يسلمج انتو شخباركم وش مسويين المتصله: والله الحمد لله شخبار العنود وريم ام عبدالله: والله بخير يسالون عنج شخبار سهى واخوانها المتصله <<الي هي مرت ابو سهى>: والله ان شاء الله بكره بترجع من الرياض العنود والهنوف نازلين من الدرج وكانو يتكلمون عن الروحه بكره للشاليهات .. العنود وهي تصب شاهي : ها يمى من تكلمين امها: اكلم ام سهى العنود: ياحليلها وش الطاري داقه عليج شخبارها امها : بخير تسال عنج العنود: سالت عنها العافيه خير شفيها تسال عني امها: ناويه القرب تبي تخطبج الهنوف رفعت عيونها للعنود العنود وهي مستغربه : تخطبني ؟؟ العنود تمد الشاهي للهنوف وامها تكمل كلامها : أي تخطبج حق ولدهم فيصل العنود فتحت عيونها وتجبست مكانها الهنوف تبسمت وغمزت لها قعدت العنود وهي الى الان مو مستوعبه الموضوع وامها تكمل كلامها : والله هي فاتحتني بالموضوع من فتره يوم اشوفها في عزيمه ام خالد وقلت لابوج وما عارض وفي نفس الوقت كان خاطبج ولد خالج وانتي قلتي ماتفكرين بالزواج عاد ولا رديتلها خبر ورجعت الحين دقت والصراحه ولدهم ما ينعاب أخوج وبوج والكل يمدح فيه عاد غريبه سهى ما قالت لج انتو يالبنات تخططون واحنا اخر من يعلم العنود مانتبهت الا لاخر جمله : أي تخطيط يمى الله يسلمج انا ماادري عن السالفه شي وسهى ولا حتى لمحت لي . ام عبدالله : عاد هذا انا قلت لج وفكري والمره تنتظر الرد العنود تمت ساكته ولا ردت الا في نزله ريم ريم: السلام عليكم الكل الا العنود : وعليكم السلام ريم: شخبار مرت أخوي وبيبيها الهنوف: الحمد لله زينين بس ولد اخوج هاليومين ماادري شفيه مشتهي منجا ريم: والله انه كشخه يعرف وش يشتهي بس عسى حمود جاب لج المنجى الا في دخله محمد وابوه : السلام عليكم الكل وعليكم السلام ريم: عمرك طويل عسى جبت المنجى لولدك محمد: بس منجى الا قولي كرتونين منجى ريم: حشى بيصير فيل اذا بياكل الكرتونين الهنوف: هههههههه بوعبدالله: يام عبدالله خلي الشغاله تدخل الفواكه قامو البنات يسلمون على ابوهم والهنوف تحب راس عمها ابوعبدالله : حبتج العافيه يابني ها شخبارج مع الحمل الهنوف: الحمد لله بخير ابوعبدالله : عاد جبنالج كل الفواكه اكلي زين عشان صحتج وصحة الي في بطنج الهنوف: جعل خيرك دايم ماتقصر ياعمي ريم: يبىىىى ترى نغااار محمد: واللهعاد غرتي والا ماغرتي هذا ولدي لازم يتدلع حتى وهو في بطن أمه الكل قام يضحك ... في الليل العنود والهنوف ومحمد كانو قاعدين في الصاله وريم كانت بعيده عنهم شوي تكلم دانه في التلفون وام عبدالله وبو عبدالله طلعو من نص ساعه ينامون محمد انتبه ان العنود مو معهم بالسوالف محمد : العنود العنود: هلا محمد : شفيج ساكته مو من عوايدج وش الي شاغل بالج العنود: ها لا ولا شي الهنوف: أي ولا شي انتي حتى العشا عقلج كان مو معنا كل هذا من الي قالته لج خالتي العنود تخز الهنوف: هنووووووف محمد: وشووووووووو؟؟ العنود: ولا شي بس الهنوف تبي تهبل فيني الهنوف : أي أي اهبل فيج العنود تمد لسانها للهنوف وهي قايمه : قومي نامي ترى السهر مب زين لج ولال للي في بطنج بعدين بكره وراج قومه من الصبح الهنوف تضحك على تصريفة العنود : ههههههههههه العنود: أي ضحكي شعليج يلا تصبحين على خير عقب كلهم قامو ينامون وفي غرفة محمد والهنوف محمد: أقول عمري شفيها العنود صدق امي قايله لها شي مزعلها الهنوف: الله للدرجه هاذي واضح عليها محمد: لا بس انا اعرف العنود اذا كان شاغلها موضوع الهنوف: عاد هذا مو أي موضوع محمد: ليه وش صاير الهنوف: انخطبت محمد: اييي السالفه فيها خطبه ومن سعيد الحظ الهنوف : فيصل اخو صديقتها سهى محمد: اووو فيصل ماغيره الهنوف: ايه ماغيره محمد: والله وخوش رجال حرام لو ارفضته شكلي بكلمها انا بنفسي الهنوف: للدرجه هاذي ماشاء الله عليه محمد: والله انا هذا الي اشوفه ومااسمع عنه الا كل خير عاد توني قبل اسبوع شايفه ولا جاب لي طاري بس شدعوه العنود تحاتي كذا ياكثر الي خطبوها قبل وردتهم بدون هالسرحان الهنوف: وانتو وش دراكم يالرجال ماعليكم الا تخطبون وبس بعدين رجال عن الثاني يفرق محمد وقف وقام لها: يعني يوم خطبتج سويتي زيها الهنوف: لا والله انت نسيت وشلون فاتحتوني بالموضوع انت والعنود محمد: ههههههه لا مانسيت الهنوف: أي من قدك تسمع الرد بنفسك محمد: أي والله من قدي اصلا انا الكل حاسدني عليج الهنوف : اسم الله علينا من الحسد محمد: امييييييين يارب ويالله قومي ننام بكره ورانا قعده من الصبح الهنوف: لا تخاف عندك من الساعه 12 لين الساعه 8 الصباح يعني 8 ساعات محمد : ومن قالج ابي انام الهنوف : انت قل ... وسكتت وتمت تطالعه وهي تضحك ومنحرجه محمد: ههههههههههه فديت الي يستحون تراني زوجك الهنوف تمد لسانها : ادري ومن قال اني مستحيه محمد راح لها ولمها وهو يضحك : مااحد قال ياربي ودي اكلج من حلاتج الهنوف: عيب ترى في واحد يسمعنا محمد : خل يسمع عشان يعرف شكثر امه حلوه امه الي دوختني وماخلت فيني عقل <<وهو يسوي روحه يكلم البيبي >> شوف ترى امك الليل ماخلتني انامه تعبتني وعذبتني بحبها بس احبها واموووووت فيها ورجع يطالع الهنوف تدرين حبيبتي انج من اول ماقلتيلي انا حامل وانا ادعي ربي انها تكون بنوته حلوه على امها الهنوف : واناادعي ربي اذا ولد يكون مثل حلاتك عشان يخبل البنات مثل مابوه خبلهم وانا اولهم .. اليوم الي بعده الصباح الكل كان صاحي من بدري وطلعو للشاليهات وكانو ناويين يقعدون 3 أو 4 ايام وطلعت العائله كلها حتى الجد والجده معهم .. كانو مررره مستانسين اليوم الثاني في الشاليهات قامو يلعبون في الدبابات وطبعا العنود اول من ركب ورفعه معها وريم ودانه حاطه ليان بنت دلال وتلعب فيها وسلمان حاط ولده فوق الدباب ويلعب معاه وبدور عن خاطرها لفت دوره .. الهنوف كانت تحن على محمد بس مارضى لها بعذر انه خايف عليها هنوف : حبيبي الله يخليك بس دوره محمد: احنا في الليل واذا ماانتبهتي لشي وطحتي وذيك الساعه وش يفيد الهنوف: الي يشوف انا اول مره اركب دباب هذا في البر ماتقول شي الا تجي من عندهم العنود : محمد يلا عاد خل الهنوف تلعب عن خاطرها مسكينه كل الناس يلعبون عيالهم الا انت يالله خل ولدك يتعلم على الدباب من الحين محمد: لا ياعيوني ناويه على ولدي |
العنود: انزين اركب معها
محمد: اوكي مدام انا راكب معها عادي الهنوف تطالعه وهي مبوزه محمد: ماتبيني اركب معاج العنود: يالله المهم تركبين الدباب عاد بيضر انتي الي سوقي وخليه وراج محمد: هاه الهنوف: مو فشله قدام الناس العنود: أي ناس الدنيا ليل ماحد شايفج محمد: انا الرجال ماقلت شي وانتي تقولين فشله هذا جزاتي بركب معاج عشان خاطرج اذا ماتبين كيفج .. الهنوف: لا لا خلاص العوض ولا القطيعه وركبت وركب معاها محمد وكان ماسكها من خصرها .. الهنوف: الحين وش له هالمسكه خايف اطيحك محمد: والله انتي كل شي تسوينه عشان لو فكرتي تطيحيني اطيحج معاي الهنوف :" اوريك وبدت تسوقه وبردت كل الي في خاطرها اليوم الي بعده حجزو ثلاث جتسكي وكل شوي اركبو عليه اثنين يدورون ويرجعون ... ركب سلمان ورفعه مع بعض ومحمد والهنوف مع بعض وبدور وطلال مع بعض وتمو يتسابقون ويستهبلون وباقي العيال والبنات واقفين ينظرنونهم .. الهنوف كانت متوعده لمحمد في البدايه كان هو يسوق عقب هي صارت تسوق وبعدت شوي محمد: ياهوووو مسويه فيها تعرفين الطريق اقول ارجعي لا نضيع الهنوف: هههههههه اوريك الحين اذا ماني الهنوف ما طيحتك وتلف وبقووووه محمد : هنووووووووف مليتيني ماي الهنوف: عادي حلاتها بالماي ورجعت لفت بقووووووووه وطشر ماي على محمد محمد : اوريج يالدبه ويقوم ويعضها برقبتها وقبل لا يكمل عضته تصرخ الهنوف وتدفه على ورى وتطيحه وبسرعه وقفت وهي ميته عليه من الضحك : حبيبي صار لك شي محمد: لا والله طيحتيني وتقولين صار لك شي الهنوف: هههههههههه عادي حلاتها بالطيحه محمد: حلاتها بالطيحه هاه ويجرها من يدها ويطيحها معاه الهنوف : ليييييييييييييه محمد: بس حلاتها بالطيحه الهنوف: انا غير انت رجال عادي بس انا بنت محمد: قصدج حرمه الهنوف : وتطنز بعد وقامت تصيح محمد ميت عليها من الضحك مر سلمان من جنبهم وهو فاقع من الضحك هو ورفعه سلمان: وش سويتو ليش طحتو بالماي الهنوف وهي تصيح: عمي والي يعافيك ساعدني ابي اطلع محمد: سلمان ماعليك منها رح سلمان: سلاااااااااااام الهنوف عصبت أكثر : ليش سويت كذا الحين شلون بطلع قدام الناس وكلي ماي محمد: تراني وياج وطلع فوق المركب ومد يده لها الهنوف مامدت يدها محمد: يعني شلون اروح واخليج الهنوف: احسن روح محمد: ههههههههههه يالصيوحه انتي اخلي روحي ولا اخليج وجرها وركبت وراه .. امسكيني زين يلا بنرجع عشان مايصيبج برد العنود طبعا عرفت انهم رايحين لجهه المراكب ودقت على نصور يرجع لها بس مارضى وراحت بروحها وهي تتلحطم عليهم لان الوقت قرب يظلم وهي ودها تركبه والشمس موجوده وهي في الطريق رايحه لهم مشي لا ن المكان بعيد بس تقدر تروح له برجولها جاها تلفون من سهى اول ماشافتها هي المتصله على طول ردت وتمت تسولف معها وهي تتمشى وتحمست بالسوالف ومانتبهت ان مجموعه شباب كانو مارين من جمبها قصرت حسها وكملت طريقها الشباب غيرو اتجاههم عنها بس واحد منهم كمل طريقه ولحقها وكان وراها تماما وهي مانتبهت له وكانت تسولف مع سهى العنود: أي حماتج يالزفته ولا تقولين لي قبل ولا تهياين الموضوع لي ’’ سهى: بغيت اخليها مفاجأه كنت متوقعه انج بتهزئيني بس يالله الحين انتي موافقه والا لا العنود: وش دخلج اذا موافقه بعدين تعرفين بعدين توني مافكرت امي امس قالت لي سهى: شتفكرين فيه فيصل وطالبج للزواج توافقين والا لا حرام عليج تراه مييييت عليج العنود: ميييت علي وانتي وش دراج سهى: أخوي بعد شلون وش دراني ؟.. العنود : انزين سهى: شنو انزين موافقه كلللللوووش مع السلامه بروح ابشره العنود: لااااااااااا وجع تراني في الشارع كلهم سمعو صرختي .. لا تقولين له شي سهى: عنود فكرتي في الموضوع وربي فيصل شاريج الا قولي يموت فيج العنود : بيبني وبينج أصلا مايبيله تفكير بس السالفه ومافيها اني انصدمت لان توقعت تعطيني خبر قبل سهى: يعني ان شاء الله موافقه العنود: ان شاء الله بس بصلي قبل واستخير وان شاء الله تعرفين الرد من امج بعدين انا وين بلاقي مثل فيصل سهى: ان شاء الله اوكي ياقلبي اناالحين اخليج والمره الجايه بدق ان شاء الله عشان اقول مبروك وسلامي للبنات العنود: ان شاء الله يالله مع السلامه سكرت العنود وهي تحس ان الدنيا مو واسعتها من الفرحه وقامت تسرع شوي لانها قربت وتوها بتوصل لهم الا يدق جوالها نغمه رساله فتحتها الا رساله وسائط والرقم كان غريب فتحتها الا تسمع صوت تعرفه زين يقول فقدتك ياأعز الناس فقدت الحب والطيبه وانا من لي في هالدنيا سوالك انت لو طالت الغيبه على طول سكرتها لان الصوت كان عالي الا تسمع صوت من وراها : العنود العنود لا شعوريا لفت عليه : لبيه تمت واقفه منصدمه من الي شافته وماعرفت شتسوي فيصل وهو مبتسم :** يالبى قلبك **.. سامحيني ترى كنت وراج من اول مادق تلفونج وسمعت كل الي صار بينج وبين سهى اذا ماكنت غلطان واسفه بس خفت لااحد يضايقج قلت اصير وراج لين ماتوصلين مكانج وعشان اتاكد اذا انتي العنود رسلت الرساله .. العنود والى الان تحس انها في حلم : فيصل فيصل والابتسامه على وجهه : أي فيصل لا يكون انتي مو العنود . العنود: ههههههههههههه قامت تضحك عليه شلون مو العنود ويوم ناديتني لفيت عليك فيصل : هههههههههههههههههههههه ههههههههه عقب لفت العنود وجهها وهي مازالت تضحك عليه وكملت طريقها وتحمد ربها انه جمعها مع الي قلبها حبه وهي ماتدري وعلى هالمعجزه الي نزلت لها من السما وماكانت ابد متوقعتها ولا في احلامها .. وفيصل تم واقف مكانه ميت من الفرحه ويحمد ربه ويدعيه ان يجمع مابينه وبين العنود .... *** النهااااااااااااااااايه*** |
200 مشاركه
حضور طاغي من الفراشه يشد انتباه الجميع من روعته احترامي |
شاكره مرورك العطر |
مشكوره يالغلا على روعة اختيارك
ما ننحرم من جديدك ياعسسسل مودتي .. جنوووووووو ..~ |
|
شاكره مروركم العطر
|
| الساعة الآن 11:39 AM |
Powered by vBulletin® Copyright ©2000 - 2024, Jelsoft Enterprises Ltd. TranZ By
Almuhajir
HêĽм √ 3.1 BY: ! ωαнαм ! © 2010
new notificatio by 9adq_ala7sas
جميع حقوق النشر لشعارنا و كتابنا ومسميات الموقع خاصة و محفوظة لدى منتديات قصايد ليل الأدبية