اتصدقي ؟!!
مرت سنه ...وما درينا ؟!!
والحلم ..شوفيه شكبر؟!!
صار رجال ؟!!
اتصدقي ؟! مرة سنه ..وما درينا ؟!!
والحلم شوفيه اشكبر؟! صار رجال !!!
تتذكري يومه يداعب يدينا ؟!
وكنا نغني له من الشوق موال؟!
صغير لكنه حلف يحتوينا
يا كثر ما كنا على الوقت نحتال
ابسألك:
ما تذكري ضحكاتنا؟!
واحلامنا؟!
غلطاتنا؟!
زعلاتنا؟!
مثل الاطفال ؟!!
مرت سنه من شفتك وضيعتني
خبيتني في عينك ...
خليتني عندك ..ورحت
مرت سنه ...والكل يسألني علي ؟!
واصفق يدي ..
واقول مـ اعرف وين انا ؟!
ماني هنا ...
اتصدقي مرت سنه وما درينا..
توي ذكرت اللحين !!
كان اللقا في يوم عيد ..
صدفه ..بلا موعد ..
جيتي لشاعر فلسف الدنيا ..
وصرتي كل سواليفه والقصيد ..
وبلهجتك : ما شي جديد ؟!!
اتصدقي ما به جديد ؟!!
شوفي شـ بقى حولي :
باقي صدى ذيك السوالف في زوايا غرفتي
وهديتك..
ووردها ..اللي اذبلت
مثل اللسنين اللي بقت
من عمر بعيشه بدونك
ودمعتي..
وضحكتك.
غلطاتك بحقي..
وتنهيدتي..
واحلامنا فوق الرفوف البالية
وانتي ...ولا انتي مباليه
وهذي بقايا من قصاصة ورق
كتبت فيها من الارق:
"تاريخ حبي ...وغربتي"
وهذي السنين اللي حلمنا انعيشها
لميتها وحطيتها في رف مثقل بالسنين وبالجراح
وكل من خلاني وراح
وعلى جدار الغرفه اللي يشبه ملامح وجهي المنهك بكا
صوره قديمه لشاعرك ..
يوم اخذله اخر صديق احتاج له
وعلى الجدار اللي سبق علقت حزني فـ صمته اللي ممتلي ضيم وكلام
كتبت أسما كثير
أسما كثير..
اكثر كثير من العمر اللي بعيش وعاشني
للي طعني وخانني
وللي جرحني
للي خذلني وباعني
وللي تركني وما اسأل نفسه : ليه انا بالذات يحتاجني ؟!
اسما كثير
بس المهم : وين اكتب اسمك؟!
هم ما اوصلوا قدرك
ولا اجرحوا كثرك
و ...في زاويه من غربتي ..
خبيت عنك اعتراف بـ اني كذبت وقلت لك :
(اني قوي ..وما انكسر
واني جبل ما هزني بعدك )
ابسألك؟!!
شقول لأمي لو رجعت من السفر وجهي حزين ومنكسر؟!!
ولنفترض اني كذبت وصدقت؟!!
وقلت السفر متعب ...
وبزعم جبت اكبر عذر؟!!
الانتظار ...وصالات المطار ..
وبعدها ؟!!
وشلون اخبي دمعتي لين اسألتني ؟!!
وينها ؟!!
شخبارها ؟!!
مو قلت لي مره زعلت منك ؟!!
راضيتها ؟!!
ابذمتك..في وقتها وشلون رد ؟!!
ابختنق لو قالت اسمك
وبتخونني كل الحروف
شقول؟!!
يمه ظروف ؟!!
اية ظروف؟!!!
بقول: يمه تذكري ...لما سألتي ..والدمع في عينك:
(وينك؟!..طولت في غيابك ..
على الاقل لو تتصل وطمن احبابك)
هي كانت احبابي وهي كانت اصحابي
سويتها لقلبي وطن
وعيونها لروحي سكن
وانفاسها ثيابي
كل شي عشته معك ..
الاماني ...
والاغاني
حلمنا
يا سلاااااااااااام
بيتنا المملى فرح
واللي انجرح.
معقول؟!!
كلها كانت كلام؟!!
اتصدقي مرت سنه وما درينا
والحلم.شوفيه شكبر؟!صار رجال!!
مرت سنه..
او للامانه!!..
باقي شهر ونكمل سنه ..
بس للاسف
قبل السنه
انتهينا
ثقيله هالدقايق
اذا كان الوجع
بـ عمر ..انسان
ثقيله يا ثواني
هي بداية... (تمر ازمان )
بغيضه يالدموع اللي على خدين طفله
بعمر الورد/
وكبر الجرح
حزينه يا الاماني ..ليه ؟ّ
ليه ؟!
انا مدري وش اللي ماخذينه بس!!
انا مدري من المسؤل ؟!
عن الحصه /
عن التلميذ /
وآخر درس
انا مدري ..
انا ليه اكتب حروف اللحين ؟!!
احاول...اشرح ..الحزن الدفين
بثرثرات ...حروف ...وغصت عين
حكاية من حرم طفله..
تحس بضحكة الاطفال..
صباح العيد
حكاية (آآآآآه )..في حلق حيرتها
ورجفة أيد ..
وتتنهد في جدار القبر...ساعة
كنها ظلم الليالي ..بوحشة بيد
ومع أول دقايق سالفتنا ..
على شارع ...حمل ثوب الحداد
وحشرجات ..القبر ..
بسرعه مر ...
مع الوعد الذي ...ما قدر يوفيه
مع اسماع طفله ...ما تعرف الحزن !
لا
لا
كانت ما تعرف الحزن ..
تغرد له بصوتها النعسان ..
وتعزف أعذب الالحان ..
(
يبه ..عمري ..حبيبي
لا تْأخر ...
ابي ترجع قبل ما انام ..
ابي اتلحف حنانك...في
تصبحين بخير .. مع بوسه على خدي ..
يبه وانام ..
وقبل ما انسى ..يايبه اسمع ..
ابي دفتر رسم أحمر
وابي اقلام للتلوين ..
وابي فستان ...مثل لون
الشموس اصفر ..
وابيك انته ..تلبسني ..
تحمل يا يبه ارجوك ..
تمهل يا يبه ارجوك ..
شوي /// شوي
)
وكان آخر ..وصاياها ..
وعلى غفله ...تهور ..
مع سرعة ...بدون حساب ..
ينادي هالرصيف الموت ..
ينادي له ..تعال ..
يبه وينك ..
ويقطع حزن هالافكار ..
باب الدار ...
واصيح بصوت ...واتحشرج ..
منو بالباب ؟!..منو اللي دق هذا الباب؟!
انا مابي لعب ..واقلام ...
انا مابي هدايا
انا ما ابي اشوف اصحاب ..
يبه وينك ؟!
يبه .. يرضيك حالي اللحين ؟!
كرهت المدرسه ...والدرس ..
ولا حد فيني حس ...
تذكرني بغيابك...
شهاداتي ..
معلمتي ...
وباب المدرسه ...
والدرس
اصحابي
وعلاماتي ..
يبه وينك ؟!
كلامي يا يبه حارق
كلامي مر ...
وانا اقرا في الدفاتر
هنا ..
(يوقع ولي الامر )
يبه وينك ؟!
من اللي فرحتي تتكحل بعينه ؟!
وضحكاته
يبه ..وينك ..؟!
نجحت ..وتختنق فرحه
وسط صدري ..
تجيني الناس وتبارك ....
وهذا الحزن بي حارث ..
ولا تدري ...
باني يتيمه ..
والسبب حادث)
وبدت تذرف دموع
تشق صدر الليل
سواده ...حيل يشبه له شعرها ..
يشبه له غياب...الاب..
غايبه ..
ما وراه غياب..
ولا يمكن يعوضه ..
القريب / الاخ / والاصحاب
ثقيله هالدقايق
اذا كان الوجع..بـ عمر ..أانسان
بغيضه يالدموع اللي على خدين طفله
بعمر الورد
حزينه يا الاماني ..ليه ؟ّ
حزينه يا الاماني ..ليه ؟ّ