غياااب ..!



غيااب .. وتوقف الذكرى على حدي
وقف ضدي
يمد بقسوته حبل الأصيل اللي فباب الليل لضلوعي
ترك جوعي
أنادي من ورى صوتي .. وفدموعي
مرار الملحْ ..
انادي .. من ورى صوتي : ( ابيك الحين )
ابي .. ألمسك فعيوني ومايحرق جفوني ملح
وابي القاك وسط الليل ساعة صبحْ
تقوليلي .. عن اللي قبل ما احبك ( يشوفونك )
عن اللي بعد ما احبك ( يخافونك )
وعن حزبين :
جماعة ( حرف ) تكرهني ( يصافونك )
جماعة ( صدق ) ترحمني يجافونك
أبيك الحين
قبل ماتسافر السكين في صدري
وفي شعري بقايا فالْ :
يقال اني جمعتَ الليل على خدود العذارى خالْ
وغنيت القمر موال
وان اللي تبي ترسم ملامحها قصيدة باول الدفتر
تبيتسهر
وتنسجني عليها شالْ
أبيك الحين ..
أبي يدي
نسيت إن القلم فيها
وإن الطين .. ذاك اللي تروّى بالمطر مرة
رسمنا فوق ( رَوْبُه) قلب
وكلمة حب
وأول حرف من اسمي
وآخر حرف من اسمي
نسي وجهك .. ولكنه حفظ رسمي
ابيك الحين ..
وانا موج البحر مدي
بديته بأول شجونك
بديتك صوت
نسي في دفتر حضورك حروف الموتْ
وعاش افجنة عيونك
ابيك الحين
مسافة بين ماكنتي .. قبل عهدي
مسافة ماكتبتك حرف .. ظلّتْ نقطته يدي
ابيك الحين
حنين سنين
عذاب اثنين
ماابغى توقف الذكرى على حدي ..!

إحصائية العضو







إقرأني هنا

0 بينهما .. حضور الغياب ..غياب الحضور ..!
0 بانتظارك ..! ( 2 )
0 بانتظارك ..! ( 2 )
0 وحشتيني ..!
0 فيما رواه ..!







فراااغ ..!




فرراا غ .. وكيف ابو صف لك عن اللي لاسمعتيني
يهدّ الانتظار اللي بنيته بأول الأحزان

صحيح .. إن القلوب أوهى من احساسي وتكويني
وصحيح إن النصيب أقوى من الأحلام والأشجان

أحبك .. بس ماربي موفقني تحبيني
واقفِّي بس ماربي مقدّرني على النسيان

تقولي لي متى تامن .. وتتركني على ديني
بودّي بس كيف آمن على ديني من العصيان

سوالف نصها يكفي .. يموّتني ويحييني
ويبقى نصها الثاني نصيب الشك والبهتان

عرفتك هدنة شعوري ..على كيفك تراضيني
وإذا زعل الرضا مني .. رضيتي والرضا زعلان

أجي ودي عناقك .. بس .. خايف لاتصدِّيني
واجي ودي فراقك بس .. ( ضحكة صوتك ) الفتَّانْ

تضيِّعني ورا حزني .. تدوّخني .. ترابيني
وأجي مديون من غلبي .. وانا اللي فا لأصل ..ديَّان

مسافة بيننا هلحين .. لكن بينك وبيني
تضيِّع نفسها اللحظة .. وتسألنا عن العنوانْ

أحس إنك قريبة حيييل .. واحساسي يبكّيني
وأحس انك بعيده ويل .. واحساسي يجي ولهان

مصيبة قلبي المسكين .. يوم انك عرفتيني
متى بقبل .. متى بخجل .. متى بغضب وانا الغلطانْ

أفكِّر من هذاك اليوم .. : (حلمي لو تشوفيني )
أفكر ننتهي لكن .. أحن لموطن اللي كان

ركام الذكريات أكبر .. من حروفك تجافيني
وخصام الأغنيات أجمل إذا حزنك خلق فنان

ولكن كل ما فكَّرت واستبشرت .. جيتيني
غسلتيني وانا مشغول بين الشك والإيمان

وتبقى نفسها الحالة .. تكرر بس في عيني
ثياب الذنب في منطقك هي اللي على الغفران

وأنا مدري متى صدَّقت في طيبتك تخميني
ولا حتى متى كذَّبت هوجاسي وهو شيطان

ولا وش عاد يبقالي .. بقلبك لاذكرتيني
ولا وش عاد يبقالك بتاريخي مع الحرمان

بس اللي أعَرْفه زين .. احبك ماتحبيني
ولا ربي مقدرني إذا بنسى على النسيان

يكفي زعل ..!


يكفي زعل
يكفي نغيب ونفتعل ..حزن الذنوبْ
لو القلوبْ .. اللي يبللها الدفا
واللي تعب منها الوفا
تقدر تتوبْ .. وتستكين
أدري نويتي ترحلين
لاتعرفين وتجهلين وننفعل
كافي زعل ..!

يادمعة عيون الفرحْ
من أول حروف السلام
لآخر أخبار الخصام
ميييييييين انجرحْ
غير القلوب اللي تذوبْ
ياللي تعلمتي لحالكْ كيف أموت
ياللي تكلمني سكوت
جانا المسا وعدا نهارْ
ظلك بقى فوق الجدار
صوتك دروووب
واللي بقالي منك مايكفي أحبك فيهْ
أو أسألك عن نوع الذنوب
تصدقين ؟!
البارح افــ عز الحنين
كل المواقف للهروب
الا الطريق اللي وقفنا فيه صدفه عابرة
يالذاكرة
جرحك كذوب
يكفي زعل
كل المواقف تشتعل
وابترحلينْ .. اما زعل واما هروبْ ..!

شباكك المفتوح ..!




( 1 )



مسا بنت المسا .. جيتي .. حنين افلهفته مبحوح
وقلب يحاور أيامي .. ويشغلني عن أحلامي

مسا قلبك .. يناديني .. وانا في شرفته مذبوح
أفكّر فآخرةْ حبّي .. واناظر حسرة أيامي

مساك انتي .. مسا ( الحارة ) مسا شبّاكك المفتوح
اذا ناظرته بعيني أخاف تخونك أوهامي ..!

مساكْ .. بربكة الساعة .. وصوتي لاتمثّل روح
تخلَّق داخل أنفاسك .. ويكبر لحظة الهامي ...

أحبك .. إيه انا لحالي قدرت أقولها وابوح
أخاف هناك من صوتي ..صداه أكبر من اسهامي

تقوليلي ( كثير اشتقت ) ؟ واقول أكثر من المسموحْ
أفتّش في شوارعنا ..عن أجمل بيت قدامي ..!!

( 2 )


مسا .. صوتي ..
صدى موتي .. مسا ك انتي ....!
متى كنتي ..؟
يد الشاعر .. وديوانه
مدى تفكيره بشعره .. ونسيانه لعنوانه ..!
أمانة يا أول السهرة .. تظلّي لآخر السهرة ..
تعبت أجمع لك الفكرةْ
تعبت أكتبك وانتي غير ..
مساء الخير ...
لا .. .. أكبر ..
مساء الخير والنعمة
مساء أخضر ..
مساء أوقاتنا الـ ( طعمة )
ونوم الطير ...
على شيحة تدلَّى غصنها في بيت جيراني ..
مسا ( هاتف معك ) ثاني ..
مسا التخيير...!
بين انك تشوفيني ..و ما اشوفك
مسا التعكير ...
كيف اغتالني خوفك ... وانا أعمى
حياكَ اسمى
حياكَ اسمى
مساءَ الخير
لا.. .. أكبر .. مسا أكبر
أخاف يخونني التعبير ..!



( 3 )

صباحك .. أوله نسمه ..
وأحلى مابقالي منك .. صدى كلمه ...
( أحبك ) ... ..
آه ما أعذبها .. وما أصدقها .. وما أكذبها ...
أقول .. انتي تحبيني كثر صوتي ؟
عصافير وشجر وأوراق ...!
وشاعر ينتظرله فراق .. !
في موتي ..
يموت الشارع المخفي .........
وقنديل الصبر يطفي ..
تجين ومامعك صوتي
ولا موتي
ولا حتى وهم مشتاق ...

يروح الليل ... ضو الصبح يحييني
يودّيني مسافة عمري اللي راحْ ..
صباحك ..جنّة التفّاح ...
تحبّيني ؟!
كثر ما قلتها لحالي ....
كثر ما هالوطن غالي ..
كثر ما انتي تراعيني .. تحبيني ؟
فتحتَ .. لصوتك عيوني .. هجرتَ النوم ...
بديتَ اليوم
بجنوني ...
أحبك ..كثر ما هالشارع المزحوم ذكّرني ..
أحبك كثر ماصوتك .. افعز البرد دثّرني
وانا لحالي .. رضيت بحزني الأول ..
وخوووفي حزني التالي ..
تحبيني .. ؟
تحبيني ؟؟
أمانة بسْ قوليها ..
تراك .. أكثر ..
بعد أكثر ..
وحشتيـــــــــــــــــني ......

أبيك ألحين ..!!


أبيك ألحين
أبي
صوتك يجيني صبح
أبيك إنتي
بدال الجرح
أسولفلك
عن اللي قبل ما أشوفك
يحبونك
عن اللي بعد ماشفتك
يخافونك
أبيك إنتي
نهاية لو تكون الجرحْ
يا بنت الحرفْ
يا شمعة ليل ما تطفي
خذي من دفتري حرفي
أبيك انتي
خذي من ليلتي عطفي
خذي قلبي
سبب غلبي
خذيني.. روح
طفل مجروحْ
قعد مرَّة بجنب البابْ
وحوله .. شلة الأصحابْ
وقالوله .. متى نكبرْ
..وكبرو كلهم حوله ..
وهو وحده بدا يصغرْ
بدا يذكر .. ولا يذكرْ ..!!!
أبيك انتي
تجيني ..من ورا سور المدينة ريفْ
تجيني .. لو سحابة صيفْ
تبللني
تطهِّرني
تهدِّيني
تنام الليل في عيني
ترجِّع أول سنيني
طفل ولهان
زرع في طاقته
وردة .. وخلا قلبه البستانْ
أبيك انتي
محد غيركْ
وابي شعري تعابيرك
وأبي دربي مشاويرك
أبيكِ انتي
محد ثاني
محد يقدر .. يطلعني ..على سور القمر وينامْ
محد يقدر يجادلني .. بغدر الوقت والأيام
أبيك انتي ..
بلون الشوق
بطعم العشق في كاسي
نسيت بشوفتك ناسي
وجلا سي
وجيتك بردْ
يدفيني به احساسي
ياصوت الحب يا (همسه)
متى بنسى؟
متى بقسى
إذا إنتي .. تبين البعدْ
بموت .. ولا يجيلك برد
أحس انك مطر ما يكفْ
وأحس اني بقايا حرف
كتبتك فأول أوراقي ..
اسم يشهد على عناقي ..
متى بنساك يا (إنتي )
ترى مدري
أنا عمري
دقيقة .. وإنتي في بالي
وساعة .. وانتي أشعاري وموَّالي
ودرب أمشيه .. ما أسألْ
متى بوصلْ
رضيت بحزني الأول
وخوفي حزني التالي

تعااالي ..!




مسا الغيمة ..إذا مرت على جسر المسا تختال
مسا خوف الغياب اللي يهددنا مع الآخر

مسا موتي وميلادي مسا الألحان والموال
مسا صوتك إذا جاني قصيدة تكتب الشاعر

أنا ياساكنة همي ..مثل ما تحلمين أختال
بصوتك بالقصيد اللي يترِّخْ وقتك الحاضر

أجيك بضعفي ..بحزني .. أجيلك بانشغال البال
وأعوِّد من دفا صوتك أسير وكني الآسر

أنا يا شاغلة وقتي طفل من باقي الأطفالْ
غفا بين النجوم اللي ضياها يسحر الناظر

تقوليله متى تكبر وهو لوعايش الأجيالْ
طفل يغتر بأحلامه تراود صوته الساحرْ

أنا ياكل ماليّه من الأحلام والآمالْ
مثل ماتحلمين أحلم أنام مطيَّب الخاطرْ

أنا وش عاد لي غيرك .. إذا كلا حبيبه مال
على صدره وأنا لحالي أناجي طيفك الساهرْ

تعالي ..من ورا صوتي قصيدة في فمي تنقالْ
أرددها وأنا لحالي وأقول ( تعيش يا الشاعر ..!! )

لو نبوح ..!!



لو نبوح بشوقنا ما هي غرابة
..........................الغرابة نكتم الشوق الحنونْ

من يداري لهفته ساعةْ كتابةْ
..........................أشهد إنه قبلْ ما يكتب يخونْ

يحسبوني عاشقْ وشعري سحابةْ
..........................والمطر حزني وتحناني مزونْ

ويشهد الله ما بقى غير الكآبةْ
..........................أنثر دموعي وما عندي عيون ..!

لهفتي دمعة وتذكاري ربابةْ
..........................كل ما جرَّيتها تبكي اللحونْ

يا فتون الشعر فعيونك مهابةْ
........................أتخطَّاها وأهيم بها الفتونْ ..!!

ذنبي إني شاعرٍ ينثر عذابه
.......................بين صمته وانكسارات السكونْ

وانتي اللي واقفه في ظل بابه
...................... تحسبين إنه على نفسه يمونْ

ضحكتك جنَّة ولهفتك استجابه
......................وانتظارك خوف وأحلامك ظنونْ

الشجن كله على شانك غدابه
...................... لين قلتيله : ( تكون وما تكون ) ..!

والبنات بصفحته صوت ابتدابه
...................... يوم غنَّابه لقاهم يرقصونْ ...!!!

بس وحدك شمسه اللي ما تجابه
.......................لا ظهرتي كلهم يب يختفونْ

وانتي اللي تعرفين انا نتشابه
......................نختلف عنهم .. ويجمعنا الجنونْ

لو نبوح بشوقنا ماهي غرابةْ
..................... الغرابةْ .. نكتم الشوق الحنونْ ..!!!

مساء الخير ....



مسا دمعكْ
مسا وجه الطفل يبكي ..مسا صوتكْ ..
مسا الذكرى
مسا الحرف اللي ما ُيقْرَى ..ولا تشتاقه الأوراقْ .!
مسا الأشواقْ
مسا لا جيتلك مشتاقْ ..!
وفي صوتي طفلْ مغرورْ
مسا الجبَّار والمجبورْ
مَسَاءَ الخيرْ
صوتُه غيرْ ..!
وآخر بحِّتُهْ دمعةْ
مسا الدرب اللي ما خلاَّ لنا رجعةْ
مسا اللحظةْ
مسا ما سمِّتُه لفظةْ ..!
خيال الجرحْ
مسا ماينتظر ( حتى ولوغلطة ) يجيله صبحْ ..!

***

يا صوووت اللييلْ ..
يا آخر نجمة سهرانةْ ورا بيتي
متى جيتي ؟!
متى واحنا توادعنا بجنب الباب
طلعت لبيتي الكذَّابْ
وانتي ما لحقتيني
متى واحنا تواعدنا ..فبيتي ما تحبيني ..!
يا صوت الشارع الغافي
أنا الوافي ...!
أنا صوت الحزن مبحوحْ
أنا طير المطر مذبوحْ
وأنا الجارح وأنا المجروحْ
وأنا في قلبك الولهانْ
بقايا انسانْ ..
طفل تحت المطر ينْتف بريش الطير
مساء الخير .......!!

من نكون ..؟!!



( سئلي نفسك ها السؤال

من تكوني ومن انا )

----------

أنا صوت الليل ميت .....
وانتي حسرة حبنا
لو وريث الرمل آنا .....
وش بقى في رملنا ؟
غير وشمك في عيوني ..
والحنين اللي لنا
أه يا ميعاد دربي ..
وش بلاها دروبنا ؟
لاختفى فالدرب صوتك .....
ما بقى فالوقت صوتْ ..
صارت السكة حزينة .....
ضاقت دروب المدينة
صار كل الحلم موت ..........

***
يامواليد الزمان
من تكوني ومن أكون
أنا في كل العيون
شاعر الحرف الحزين
وانتي تنهيد السكون
لابتدا ليل الحنين

من أكون ..؟!!

احلفيلي من أكون ..
قولي إني طعم ليلكْ ..
والصباح اللي انتظرْ ..
قولي إني ( مستحيلكْ )
وانثري شِعركْ مطرْ ..!!
صارت البسمة غريبة ....
صارت اللحظة رهيبة
صارت الضحكة سنينْ
من تكوني ..ومن أكون
وش لنا في ها الجنونْ
ووش تبينْ
آنا بالحرف الحزين
وانتي بالبسمة الخجولة
أول اسطور الطفولة
وأخر كتاب الأنين ..

***
من تكوني .. ومن أكون
مثْل ( موَّالٍ عراقيْ ) ..
لاغفيتي ..برقتكْ ..
تكتبيني .. تنثريني ..
تجمعيني افــ.. ـبسمتك..
وأنا في وقتكْ .. مدارْ ..
لو يطول الليل عندك ..جيت لعيونكْ نهارْ ..!!
يسألونك من أنا ..
أنا صوتكْ .. لاضحكتي ..
لا بكيتي ..
لاتأمَّلتي الحياةْ ..
وأنا ظلكْ .. آنا حولك ..
آنا ( شاعرْ ) مبتغاه
يكتبكْ أحلى قصيدة
ويعزفكْ ساعة غناهْ ..!!
من تكوني .. ومن أكون ..
انتي آنا .. وآنا انتي
اتركيهم يسألون ..؟!!!
وش علينا ..
كانهم ما يعرفونْ ..!!

شوفيني..!


شوفيني يوم عبدلله .. لونه يوم
وعيشي لهفتي لحظة .لو نه حلم
أنا الأول وأنا الآخر ..
وأنا الأبيات والشاعر
وأنا وحدي ورا بيتك
إذا ناديتني جيتك
طفل مشتاق
نسي وجهه ومدرسته
نسي صوته .. نسي يومه نسي وقته
وجاك بشوقْ
يشوفك مثل ..كل اللي عجز يوصل .. بعيد وفوق
يقلك ..
كاهني جيتكْ
أنا عنوان مدرستي .. أدله ..من ضيا بيتك
وأنا صوتي مثل ..موتي ..
سهل في عيونك النجلى
وأنا آخر شواطي الحب .. لافاتن ولا ليلى
شوفيني يوم عبد الله وقولي لي
تجي لجلي ؟
وأنا في طاقتي وحدي
مسكت كتابك المشجون في يدي
مسحت بدمعتك خدي

***
شوفيني يوم عبدالله ..
أنا ما تهمني الشطآن
ولا حتى البحر لو كان ......
أنا البحَّار والربان .. ْ
أنا السهرانْ ..
مثل كل البشر سهرانْ
أناجي نجمة عيونك
وأشوف الحلم من دونك
يموت بلهفة أشواقي
ووش باقي
إذا كنتي .. مطر روحي
وكل الطب لجروحي
أبصبر بس ..
وبانطر شمس
تجي باحساسك الذابلْ
وما تروحي ..!!
شوفيني يوم عبد الله
أنا مثله .. أبجمع لك حنين الليل
وابا نثر وسط بستانك .. عبير الهيل
أنا وحدي .. ولو قلتي .. كثيرين البشر حولي
أنا وحدي .. أعرفك دون ما تقولي
تحبيني ..!! ؟
أبد والله ما قلتي .. ولكنك تشوفيني
بقايا قلب
عنيد وصلب
يعاند صوتك المبحوح ..
ويسهر كل ليلة .. حالمة مجروح
تحبيني ؟!!
لا و اللهْ ما قلتي
ولكنك حرمتيني
أحس إنك تشوفيني .. مثل ما آنا
بلحظة شوق بكانا
بحرقة صوت ما يبكي
ولا يحكي ..
رضي ينسى وينسانا
أنا شاعر .. وأنتي فتنة النسوانْ
تقوليلي .. عن اللي كان
وعن ذاك المطر هتَّان
أبد ما يهمني هذا
أنا حلمي .. إذا أحلف
ترى والله ..
أكون فيوم عبد الله

إذا ذبلت دواويني ..!!


أبيكْ انتي ..
لونِّك فآخر المشوارْ
لونِّك لي حمامة دارْ
عرفت ( المستحيل ) انتي
وحلم المستحيل انتي
أبيك انتي
ولو كنتي
فراشة .. مستحيل تعيش
حول النارْ
حمامة فوق سور الدارْ
ومن حول البيوت اصغارْ
رموا بحجار وانصبتي ..
أبيك انتي ..!!

***
أبيك انتي مطر جاني
بليا غيمْ
مطر جاني وأنا ( ابراهيم )
يتيم الجرح والأحزان
مطر هتانْ
وأنا في عز نسياني ..بلا نسيانْ
أدوِّر عن بقايا الحلم فعيونك
يناديني
يضويني
عرفت ( المستحيل انتي ) وما فيني
أوقِّف نزف لجروحي
ولا حتى أغير شيء
نسيت ان الأمر ماعاد فاحلامي
ولا في يدي
تواريخي بلا ميعاد
وعمري موت لو إنَّه
غلط مرَّة وجا ميلادْ
عرفت ( المستحيل ) انتي .. ووش يحزن
لاصار المستحيل أقرب من الممكن ..!
لاصار الممكن اللي صار.. مايمكن
يكون المستحيل اللي
بدا ..ممكن ..

***
تواريخي ..
مطر شعري
وآخر صوت في عمري
خذيها واحفظيها صوت
أخاف الموت
وما القى إذا
ذبلت دواويني
من اللي يحتمل حزني ويبكيني ..!!

علاءَ الدين ..


على هونكْ ..
خذيني ليل
إن عيا يجيه الصبحْ ..!
خذي من آخر ظلالي ..
خيال الجرحْ ..!
خذي من بحري اللي صار
ما يقوى على أمواجه ..
مرار الملحْ ..!!
خذي من صوتي الدافي
حروف الشاعر ( الوافي )
خذي حتى ( الوفي ) مني
قبل ما أموتْ ..!!

***

على بابي وقف ماردْ ..
وقال : ( انتَ علاء الدينْ ..!!
وأنا ماني علا ء الدين .!
أنا أوهى من الأحلام والتخمين ..!
أنا ماني علاء الدين..!
إذا بطلبْ ..
أبي أطْلب غبار سنينْ ..
وإذا بهربْ .
أبي أهرب من اللي ماتت بعيني
بلا تكفينْ .. !
على بابي وقف مارد
وأنا واحدْ ..
من اللي كلهم واحد ..!
وهو يدري عن أحزانه
نسي لايحط عنوانه
على بابه ..
سأل يا رب وش جابه ؟!!!
أنا ما عاد ليَّه فيه ..
أنا ماني علاء الدين
أنا شاعر حزن مسكين ..
يبي يكتب ..
يبي كل العرب تقرا
وهو يكتب
ولا يطلبْ
يكون فساعةْ كتابهْ
علاء الدين ...!!!

***

على بابي .. وقف جبَّارْ
وقال بنبرة الواثق :
تبي تختارْ ..!؟
تكون العازف اللي دلَّله قيثارْ ..! ؟
تكون الصوت والتذكارْ ..
تبي تختارْ ؟!
وأنا ماني علاء الدين ..
ولا أقدر أفكَّ حصارْ ..
سنيني كلها شيحة انبتتْ بجدارْ ..!
وحلمي بس لو مبكي
على اللي صارْ ..!
أنا ماني علاء الدين..!
أنا نادوني الشاعرْ .
وخبَّوا لفظة المسكينْ ..!
أنا عصفورْ ..
وقع من شيحة الذكرى
وشافك سورْ ..!
قَرَبْ ..لكن طلعتيله
تقوليله
ترى منتى علاء الدينْ
انتْ الشاعر المسكين .
عجزْ ينسى ..
ولو ينسى .. !!
ماظن يكون لو لحظة علاء الدينْ ..!!

مسافات الجراح ..!



تناديني ..
وأجيلك من ورى
سور المدينة ريفْ ..!
فعيوني دموع الليلْ
لاشتَّتْ ..سحابة صيفْ
أجي مدري ..
أنا أو إنتْ كان الطيفْ ..!
كلشْ صارْ
ماظلَّ افحياة اللي فقدك أسرارْ ..!
شجنْ ما يكفْ
جفِنْ ظلا سنين يرفْ ..!
يجيلكْ من ورى سور المدينةْ ريف
وتمطر في عيون الليلْ
غيمة صيفْ ويرجعْ

يمضغْ افجرحه وهو يسألْ
أنا أو إنت كان الطيف ..!!

***

مسافات الجراح أكبر من الأيامْ
ولو بنقيسها بأعوام ْ
عشر سنينْ
وهو الطيف نفس الطيفْ
وَهَمْ ما يبينْ
حلمْ يصادره للصبحْ
وشاعرْ في يده وردةْ
وفي قلبه ..نبت سكِّينْ ..!!

***

مسافات الجراح أكبر من الأيامْ
ولو بنقيسها بأعوام عشر سنينْ
وهو الطيفْ ..بعده طيف
وهو برق الشتا بعده يجينا صيفْ
وأسوار المدينة ريفْ
وأنا توي يتيم الجرح
كن مفارقك للأن قدامي
وكن الطين توّه ما نشف
من قيظنا الحامي ...!!!!
وكن أصابعك ما سلِّمت للرمل خاتمها
ولا حتى وقف كفِّك
عن التلويح لأوهامي

***

مسافات الجراح أكبر من الأيام
وأنا توي يتيم الجرحْ
فعيوني يبين الصبح ..وأطفِّيه
مابي صبحْ
أبيك انتي ..لونك مملكة من جرحْ
أبسكنْ فيه ..
وإذا قالوا من الشاعر ؟
بقول آنا يتيم الجرحْ ...!!!!!!

الــ (حابس ) من يوليو ..!



حيث الصديق حابس .. وتمائم التاريخ صدى لصوته في ( الحصة الرابعة تاريخ )



كم
قراني الفضول
القادر / المستحيل
كني الحين /غلطة ..
في مهب السؤال

مِسْتِوي
فوق شعري .. في عيوني أصيل
والشروق الله أكبر ..
كيف عشّش ظلالْ ..!


كيف ظنّكْ ..
أبوي الحين / يسقي النخيلْ
والصحاري عمامة
فوق روس الرجال

لفّ شال التمنّي
ليل حزنك
طويلْ
المسافة حسافة
والطريق / احتمال


آه ياللي كلامك
مثل ضحك البخيلْ
السوالف تخالف
والسكوت .. ارتجال

جيتْ .. ظلي عصايْ
ونص كلّي طويل
أتظلّل عصاي .. ونص كلي ظلالْ

كان صمتك ( مرّبع )
صوتي المستطيلْ
ناتج الضرب قسمة .. يوم أقــ وللك تعال

انثر الشمس صفرا فو ق
تلّ الصهيل
ولا سألوا وين غابت ..
قود ..جيش الخيالْ

الأغاني .. أماني
والوطن مستحيلْ
راحة البال خيمة ..
شفت لو هي خْبالْ

حابس أشعل مسايْ
الوقت شاعر هزيلْ
عودكْ اقوى على الضوْ ..
لو جمعنا اشتعالْ ..!






الرياض .. الــ ( حابس ) من يوليو 2005 م

مستعجلة ..!


مستعجلة .. مستعجلة
جيتك وأنا كلي وله
منهو أنا ..
مو مشكلة
لاجيت تكتبني تسمَّع ( مذهلة ) ..!


آآآه ياسيدتي
الألف المقصورة كواو ( العطف )
تبدأ ولا تنتهي ..!

مستعجلة ..
مستعجلة
باقي من أيامي نهار
وعدا من أحلامي مدار
كلّي وَلَهْ
أنثى تشيع الأسئلة ..!
يبقى الجوابْ
مثل السرابْ
غلطة ..قدر من آخره لأأوله ..!


ياسيدتي الجميلة :
في زحام الشوارع المشمسة ..
أينا لايدهسُ ظلَّ صاحبه ..؟!

مستعجلة ..غصبٍ عليْ
وش في يِدَيْ
كل المسافة ( غربلة )
الشمس عندي أرملة
والليل شاعر
كلنا نستقبله
مو مشكلة
جيتك وانا كلي وله
( مستعجلة ) ..!


ولكن ياسيدتي ..
الصدق وطن لاغربة فيه
والوفاء عودة المغتربين عنه إليه .

يووووه .. الكلام
جرّ الكلامْ
ياشاعر الحرف الحزينْ
كلي حنينْ
قلبي ( يتيمة ) ضايعة
حزني سنين
والوقت لعبة رائعة
خلّك معي ... حتى وأنا مستعجلة
مو مشكلةْ ...!
أبقى معك
أبغى أسمعك
وأبغى أطيعك .. وأمنعك
قلبي كبير
حلمي كسير
الا صدودك .. في النهاية ما اقبله ..!


بيني وبين الصبر ماء وملح ..!
والفناء أن يبقى الكون وحيدًا ..!


والله زماان
ياقلب .. محتاج الحنانْ
خذني افحضنك شاعرة
خذني قصيدة مسافرة
خذني ..شبه
خذني لروحك مكتبة ..!
مستعجلة ...
أي والله اني ..جيتك وكلي وله
الوقت فيدك ..لو تبي
لاقلتلك مستعجلة ...!
قوم وتسمّع ( مذهلة ) ..!

قلبي معك ..!


قلبي معكْ مهما تخافين يحميك
حولك مثل ظلك مكانه مكانكْ

أقطف من غصون الوله شوق وأعطيك
وأظلّل الصحرا بغيمة حنانك

يا نايمة في عين نورس تراعيك
كل النوارس حالمة باحتضانك

يكفيني انكْ لي ..ياليت يكفيكْ
شاعر كتب شعره عذوبة لسانكْ

كل القلوب الخالية لو تناديك
ماهمني مادمت فارس زمانك

ابقى معي ..!


بعد مرور عام .. جمع شعره المحكي ثم كتب إليها :

مرَّت سنةْ والحرف عصفور ماينـام
..................................... غنى على غصن السطورالجديدة

تستـقبلينه شوق واحساس والهام
..................................... ويبات فعــيونك مســافة بعيدة

كنــه حكاوينا على مـــــرَّ الأيام
..................................... تجسدت فســطور شاعر عنيدة

هذا أنا .. انتي غفينا من الــعا م
..................................... حتى صحينا والسوالف قصيـدة

صمتت قليلا ثم قالت له هل تبقى معي
الليلة قليلا ..؟!
فأنشدَعلى لسانها :



ابقى معي
اليوم بس ابقى معي..!
أبغى أحس إني معك ..
أبسمعك..
وأبنثر حروف الوله في مسمعك .!
أبغى أحس بلهفتي تمطر شعر
وأبغى أطير بوحدتي صوب القمر ..
أنثى أنا ..
وانتَ مواعيد الهنا
آخر طريق لوحدتي
وأول قصيد لقسوتي
تبكي عليّ ..؟!
وش في يديْ
أنثى قوية ظالمة ..!
ابقى معي ..
اليوم بس ابقى معي
طفلة صغيرة حالمة ...!!

***
ياصاحب القلب الكبير
حلمي صغيرْ
ليله من العمر الضرير ..
تبقى معي
تلعب بشَعري وانتفضْ
أغفي بحضنكْ وأفترضْ
إن الحياة انتَ وأنا ..
ماغيرنا
يقدر ينازعنا الهنا
يقدر يسافر للقمرْ
ينقش على بابه شِعر
ماغيرنا
يسمع مواويل الحنينْ ..وينتشي
يرشي عصافير الصباحْ ..ويرتشي
بأحلى نشيدْ
اليوم بس ابقى معي
قلب ووريدْ ...!!

***
ليلي حزينْ
ياسيد أحزان السنينْ
العمر كله في يدي
الآمرة والناهية
الواعية والساهية
أدري بحالي ظالمة
لأنك بكيتْ
وأدري بحالي هايمة .. لاني نسيتْ
أنثى أنا ..
تعرف متى تستعمركْ
تعرف متى تستثمركْ
لكني الليلة أجيك..
غير الليالي كلها
طفلة صغيرة حالمةْ
ابقى معي ......!!
اليوم بس ابقى معي
ننسج سوى
تاريخ فجر بلا نهارْ
رغم الحصار..
نحيا فباب الانتظارْ
لحظة هوى .. !!

يقولون الحزن نزوة ..!


إذا قالوا جميع الناس لاتهتمْ ..
ونام الحزن في عيوني .. وأنا مهتم
بغيت أسألك .. هو الحزن .. مايرحم..!!
والا الناس ماتدري صنوف الهم .!!
يقولون الحزن ..نزوة ..
وبعض الناس لابالغْ ..
يقول إن الحزن شهوة ..!!

وأنا لحالي .. أشوف إن الحزن سيرة ..
بتعذيبه وتأثيره
أنا التاريخ لاحزاني ..
وّاذا مرة بغيت أحزن قعدت أقراه
لقيت إن العمر مرة ..
حكاية تبتدي بالموت ..
ومرة تنتهي بالصوت ..
وكل اللي قريت ألقاه

***

أنا الأحزان .. تذكاري ..
قلم في يد مشلولة ..
تعريني مع أشعاري
وتنثر حسرتي حوله
بغيت أسألك وانتي قاعدة وحدك
من اللي يقدر يفكرْ
بأنثى فاتنة بعدك ؟!!
من اللي يقدر يسافر عن عيونك
من اللي يرزرع أحزانه ..
وتاريخه
وعنوانه ..
بأرض ترابها دونك ..!!

***
وريث الرمل .. وش يعني
ورثت الحزن والحسرة
وإذا بكره
نبتت زهره
ابقطفها وأقدمها
هدية حب في مظروف لعيونك ..!
ابكتب فوق جدرانه ..
أمانَةَ عليك وشلونك .؟!!
وحشتيني ..
يا أجمل وأعذب سنيني ..
تحبيني ؟!!

وحشتيني ..!



زينْ .. بعد كل هذا وحشتك ؟!
---------------

وحشتيني ..
وحشتيني ..
كثر ما بِكْيت سنيني
كثر موج البحر لاصارْ
يذكّرني بميعادك
كثر مااغليك
كثر ماابكيك
كثر ماطوّل بعادك
وحشتيني .. وحشتيني ..
أحبك حيل ..
واشوفك ليل ..
مايبقى مع العشاق
اشوفك أجمل سطوري
تصوِّر حالة شعوري
.. وأضمك وردة الأوراق
سألتيني ..
وحشتك بس ..؟
وحشتيني ..وحشتيني
كثر ما زاورتنا الشمس
كثر ما بيننا من همس
كثر ماابكي من أول امس
وحشتيني .. وحشتيني ..
يا أجمل واعذب سنيني ..
تحبيني ؟!
( أبد والله ما قلتي )
ولكنك وحشتيني
زمان .. ابغى سؤالك ذا
زمان .. وما هذى طفلي
بقي ظلي ..
يقرّبني
ويبعدني
يبكّيني .. يبكّيني ..
كثر منتي وحشتيني
وحشتيني يا أجمل صوت ..
ياأ حلى صورة في عيني
أحس ان ابتعادك موت ..
أموت ولا تخليني !
شربت الدمع فغيابك
وقفت الشوق في بابك
كتبتِ فصفحة الذكرى
متى ترجعْ
متى تسمع سواليفي
متى تقرى
رسالة صغتها لأمي
متى بتحس في همي
متى بيقلها ظلي
جعلني روح
طفل مجروح
متى تقرا تخاريفي
وتلويني
وحشتيني .. وحشتيني
كثر ماصرت فبعادكْ
طفل ما ينامْ
كثر ماطالت الأيام
كثر ما بكيت الأحلام
وهي جنبي تواسيني
وحشتيني
كثر منتي تزوريني وأنا نايم
كثر ماشاعرك هايمْ
وحشتيني
لونّك ماسألتيني
تِعَرْفيني ..
أكيد انك وحشتيني ..!!!

تقاسيم بوح ..!



( 1 )

ورا بيتي سكن عصفورْ
يحب النور
يخاف الظلمة اللي صوتها مغرورْ
أجيه بآخر الشارعْ
أجيه الشاعر البارع
يغنيني ..!!
يناديني
وأنا مبهورْ
ياربي كيف ها العصفورْ
قدرْ يقطف غصون النورْ
وأنا الشاعر ..
عجزت ألمّ من ضعفي
شظايا قلبي المكسورْ ..!!

( 2 )

مثل رش المطر هادي ..
على الوادي
مثل مانتَ بقايا حروفْ
وأنا في حزني الأول مثل ماتشوفْ
أنادي راحة الخاطر
وأنا شاعرْ
وأحنِّط شهقتي ملهوفْ ..!

( 3 )

أبي أكتبْ
عشان ألقاك من أوَّلْ
وأبي أشطب عشانْ أقراك وأطوِّلْ
سهرت الليل بذنوبي
نسيت العطرفي ثوبي
وطرت بحرفك الأوَّل ..!
مساء الحرف كله فالغرام يهون
دموع الصوت .. أو حتى دموع الكون ..!
أنا عاشقْ
قبل هذي الحروف وذي
ومن عشقي بديت أهذي ..!
جمعت لحسرتي فالليل نجم الصبحْ
وعشت بعطرها فالصبح ضحكة جرحْ
أبي أكتبْ
وأبي أشطبْ
وأبي أرجع من الأولْ
أقول أحبْ ....!!!!!!

( 4 )

شجن ما يكفْ
وعين ترف
وحزن يصادر إحساسي
أنا ما أعيش بأنفاسي ..!
وإذا مرة سألتيني ..
عن أحزاني .. وعن ياسي
بقول انتي
وعن حلمي ونوماسي
بقول انتي
وإذا مرة ..تذكَّرتي وأنا ناسي
بقول الذكريات انتي ..!
شجن ما يكفْ
وعين ترف
مرار الوقت في كأسي ...!

( 5 )

نمر فيومنا الثالث ..
ولا أشوفك ..
أفكِّر بس بظروفك
وأناظر شوق بحروفك ..!!
أحس برعشتك .. خوفك
من اللي صار ..
أكيد البارح احتجتي لأحد مثلي ..
ومن بعدي .. محد بعدي ولا قبلي ..!
أنا اللي أعرف إحساسكْ ..
وأعيش الخوف بأنفاسك ..!
وأنا اللي فيومنا الثالث
تحريتكْ
ولا جيتي ..
وصرت أخاف من بيتي ..!!

بسافر بس لو مرّة بتفكيرك ..!




أنا مالي أحد غيرك ..
وش الكلمة ..
وش الأبيات .. إنْ ماهي تعابيرك
أنا حلمي مشاويرك
وحلم الليل لومرة
أسافر وسط تفكيرك
وأفكر فيّْ
وانتي ليّْ
واشوف شلون .. تلقيني
أشوف شلون تشجيني
يابنت الشعر بحروفي
وآخر نبض في جوفي
تلوميني على خوفي ؟!
ومن مايخافْ
على آخر مسافاته
على حلمه وهقواته
على صوته ..
على موته
وميلاده ..
على شوقه وميعاده
أخاف الوقت يغدر بي
وتنسيني
يجي غيري .. وتلقيني
ورا بيتكْ
ألم أوراق بستانكْ
وأضيّع فيك عنوانكْ
ياحلم الشعر والشاعرْ ..
أنا الأول . أنا الآخر..
أبد مايهم
أبي القاك بلحالي
مطر في يم ..
وأصارع لجلك الأيام
أبي القاك دون الناس ..
تخيرتك . ونقيتك ..
وصرتي روعة الإحساس
أبد ما يهمني غيرك ..
بسافر بس لو مرة بتفكيرك
وأشوف الناس من حولكْ
مين اللي تحبينه
ومين اللي تجافينه
ومين اللي إذا جالك تصدينه
بسافر بس لو مرة بتفكيرك
.. وبسأل نبضك الدافي
عن الوافي
عن حروفه ..
وعن حزنك من ظروفه
وعن همك .. إذا ماباح لك مرة سبب خوفه
عن الحرمان .. .. وعن قربه من عيونك
عن اللي صار مجنونك
بسافر بس لو مرة
بتفكيرك
وبسمع بس لو مرة ..تعابيرك
إذا صرتي بلحظة صمتْ
مين اللي تولاها
إذا عينك بكت مرة
مين اللي بكى لجلك وبكَّاها
يابنت الشعر والشاعر ..
أنا الأول وأنا الآخر ..
لكن من يزاحمني
مين اللي إذا مرة نسيتيني يعلمني
ومين اللي يبي مثلي يجيك بساعة أحزانه
بسافر بس لو مرة بتفكيرك ..
ووش عندي .. أنا مالي أحد غيرك ..!!!)

في آخر الذاكرة



( هي )



مرت سنة وآنا أعاني تمردك
ألقاك ود وقلبك يشوفني صد

غرّك صفا قلبي وظنك تفردك
أجْمعك أنا وانته مثل شوكة الورد

غيري يشمك يوم أنا أجمع توددك
لافادني قربي ولا فادني عهْد

لاغبت عنك القاك والبعد يجهدك
تبكي عليّ افحضن غيري من البعد

ماحس فيك الحين مابي قصايدك
مسافة احساسي معك دونها حد

ابغى اتطهر منك والثم توردك
حمرة خجل أودم ما يفرق القصدْ

أغليك وأنزف جرح لا جيت أعاندك
بس الحقيقة ضد يحتاج له ضد

ياشاعري مصلوب قلبي فمعبدكْ
أموت وانته ماتصلي من الفقد

تبكي بعيد .. وبس همك تخدّدك
تشكيني لروحك وهي ذنبها يهدْ



( هو )


ياساكنةشباك فجدار عيني
متى يشوف النور شباك الأحلام

شعري عيونك وانكساري حنيني
وغيابك احساسي بخيبات الأيام

تصدقيني عاد ( بينك وبيني )
حنا غدينا اغراب عن بعْضْ من عام ..!

ساعة سألتيني متى تحتويني
حضنت حزني قبل ما تجف الاقلام

ما يكفي اللي فيك يجتاح فيني
أبكي عليك ومنك واشتاقك الهام

تقارنيني فيه تب تجرحيني .. ؟!
ماعاد يبقى جرح يشتاقك خصام

مات الأمل عندي مثل ما تبيني
ميت قريب ومبتعد صدقه أوهام

أبغى أدفن الذكرى قبل تدفنيني
آنا وكل اللى مضى شهوة أحلام

الــ.. ( مها ) ..!



يقولون المها تجفل إذا ماشافت الصيَّاد
وأنا أقول المها تقبل علي وتحتمي فيني

ألا من يقدر يفرِّق مابين الموت والميلاد
إذا تبكين من ضحكي .. وتنثر دمعتك عيني

دقايق عمري الباقي بصوره كلبوها أبعاد
أقرِّبها من عيوني وأضيِّعها من ايديني

تقوليلي متى تكتب .. وشعري لاكتبت عناد
إذا بكتبكْ فعيوني .. بخونك في دواويني

أنا مثل المطر شعري وحلم الفاتنات بلاد
أبنثر فالمدى صوتي ..وابترك لك عناويني

تقوليلي لمن تكتب .. ابكتب فرحة الحساد
إذا قالوا تحبيني ..يشوفونك تجافيني

وأنا فاحزاني الشاعر .. وحرفي كلبوه حداد
حبيبة ماتت فعيني ، وماماتت بتلحيني

حبيبه كانت الدنيا وكانت لهفة الميعاد
وكنت الشاعر العاشق .. أزعِّلها تراضيني

حبيبة ماتت بلحظة .. ومالي فالممات جهاد
أبكتب بس بدموعي وأبرثيها وابرثيني

( يقولون المها تجفل .. وأنا ماني لها صياد
أنا ماصيدها لكن تجيني تحتمي فيني )

فلنتاين ..!



بغيْتَ أكتبْ لعيدِ الحبّ واكتبلكْ ..
أنا مَحْسِبْ لعيد الحبْ ..
ولوإنِّي ابا احْسِبلك
بغيت أسألكْ
كيف الليلْ للعشاق
كيفِ ا مْطَارَح الأشواقْ
صدقني ...! أنا مدري
يموج الوقت في صدري
أنا مدري
هوّ الليلْ متأخرْ ..
والاتوّنا بدري ..!
أنا ليلي مِثل فجري
افعيد الحب ..
عذاب وغلبْ
أقلِّب صفحة الذكرى ..
وانا ولهانْ
من تحتي نهر يجري
وأنا كلّي شجر عطشانْ ..
بغيت أسألكْ كيف الليل للعشاقْ؟
كيف امطارح الأشواقْ ..
كيف الحب دون فْراقْ ؟!
يقولونَ الصّباح أحمر ْ.... وبالوناتْ
وساعات الصباح أكثرْ من الساعات
وإيد افــ ... إيد
كأنَّه عيدْ ..!
إيوه عيد يقضونه
وباسم الحب يِحْيونه
وأنا ( لحالي ) مابين اللي خلق ربي يخافونه
أخاف ( فلان ) هنَّاها
وأخاف أسأل .. وأزعّلها .. وما القاها
أنا مدري .. متى وقت الفلنتاين
ووش لازم عليّ أبديه
وكيف أجلس معاها فيه
أسولف عن قصايدنا ... مهو بمعقول
طيّب ويش أسوّي فيه
أخاف تقول ..!
هذا ما يِِعَرْفِ ( ايحْب)
ماربي خلقله قلبْ
وانَا من يوم مالت بي غصون الوقتْ
كلي كبْتْ
كل أيامي الجمعة .. بعدْها سبْتْ
بغيت أسألك وش هذا الفلنتاينْ
مهو باينْ
يقولون ... الزمانَ أوَّلْ
( مليك وكاهنْ وعشّاق )
إذا الكاهن .. فلنتاينْ
ومالِكْ وقتنا مشتاق
من بيفرّق الأشواقْ
على اللحظةْ
ومن بيموّتَ اللفظةْ ...
عشان يطيح سوق الوردْ
مشكلته يجي فالبرْدْ
وأنا ولهان..!
من تحتي لهيب الشوق وأنا لحالي شتا بردان ..!
وش هذا الفلنتاينْ
كيف اعيش لحظة حب
وانا من يوم ماحبيت
مات الحبْ !!!

***

هذا هو الفلنتاين ..؟!
زهر مشتاق لغصونه وطعم احساس
وشاعر كل ما يكتب
يسيل الحرف بعيونه .. وقال الناس :
هذا كاهن النسوان ..
تعوّذ من كتاباته ( ترى شيطانْ ) !!
يـ...ــــاَرَبِّي ليه ..؟
.. يسأل ليلُه الموجع
مهو بيديه .. ( يسألها )
.. متى ترجعْ
حكايا لهفتك فاتت
... إنته ليه ماتسمعْ ..!
ترى فاتن
قبل هذا الفلنتاين
ترى... ( ماااتتْ )
يـ...ــــاَرَبِّي ليه ..؟
متى صارتْ وهم فايتْ ؟
ووش يبقى من الأعياد
إذا هذا الفلنتاين بلا ميعاد
وأعيادك بلا ميلاد
بغيتَ أسألك كيف الليلْ للعشاق؟!
إذا يقسى
وكيف أكتب بدون أوراق .. عشان انسى !!! ؟
بغيت أسألكْ ...
واهْيَهْ من ثلاث سنين في صدري
هو هذا الفلنتاين .. وأنا مدري ..؟!!

تمـــــــــــــــــــــــــــــــــــــــــــت