شقى جدار الزمن



شقي جدار الزمن

وانسي الدموع والخوف

وخطي كل المحن

وارسمي ع الأرض

اسمي حروف

أوعى تخافي الكلمة

لو تخرج من الحلق

وتشق الصفوف

امسكي قلمك وورقك

واكتبي كل الحقيقة

بالمناظر والشخوص والأماكن

حتى الوجوه البريئة

ارسمي …أحكي

أوعي خوفك يهزمك

اتكلمي …كوني جريئة

قولي كل اللي تشوفية

قولي الحقيقة !!!

انزعي توب الوشايا

والدنيا والمجون……..

والحياة من غير عيون

انزعي كل القساوة

والبسي توب الحلاوة

بس اوعي تلبسيه

إلا لما تخلعي توب السكات

توب الرقاد……..

والحياة من غير معاني ودعيه

انشلي العمر اللي باقي

م الضياع …..!!!!

عشان ما تيجي فِ يوم تقولي

العمر ضاع…….!!!

لملمي كل الشوراع

والحواري والطريق

واجمعيهم واختاريلك

من قلوبهم ميت صديق

شقي قلبك من ضلوعه

لو فِ يوم خانك وقال

انك انت مش حقيقة

لكن أغرب م الخيال

شقي قلبك من ضلوعه لو فِ يوم قالك وداع

حبي ليكي أو لغيرك

دة محال….!!

اصفعي قلبك بايدك ..

اصفعيه 000!!

لجل ما يرجع لرشده

رجعية 000!!

قبل ما يفوت الأوان

يكبر الحقد الصغير

يبقي غول000!!

يبتلع كل المزارع والحقول

يمشي في عروقك

يدنس كل نقطة دم

أنت عايشه بيها

يهزمك حقد صغير ما يساويش

يقطع الشريان ويسد الوريد

وانت ساكتة ..ما تقولبيش

ساكتة ليه اتكلمي ؟؟!!

راح خلاص زمن السكات

والحياة من غير معاني

ياللاه اصحي م الثبات

لملمي جسمك ويلاه نعدي بيه

اجمعي اللي تلاقية

ايوة دي ايديكي وراسك

ايوة رجليكي كمان

و في المكان دة000

لا قيت عنيكي …!!

بس حاسبي ع العنين

هي دي الرمز اللي باقي

يلاه وبسرعة امسكيه

حافظي عليه0000

كل شيء راح تلمسيه

بالعنين دي ح تشوفيه

بس أوعي تزعلي

لوشوفتي ف الصورة

حاجات ما تنحكيش

أو قريتي ف الكتاب

كلام ما يتقريش

بس لازم ترسمي كل الحقيقة

ارسميها ومتخافيش

ارسمي اللي تلاقيه

ارسميه وبسرع يلاه لوني

اختارتي ايه الوان قولي لي

لجل ما اعرف أي لون ح تمسكية

اختارتي كل الوانك غوامق

طب وليه ؟؟؟؟؟!!!

فيه مساوئ عايشة جواكي بترعي

زي سوس فِ الخشب بيهد فيه

لونهيا بالسواد …غمقيها وسودية

شايفة أي في الصورة تاني شايفة قلبك يندبح

ووريد علي جداره طبقة م الصدى

متمددا وودان سددها كوم تراب

وانثي عنكبوت متبغددة

كل دة …!!!!!!.ما يهمكيش

لونيها ومتخافيش

لوني كل الحقا يق والدقايق والفصول

احمي عقلك وانزعيه

من جوة دايرة الافول

وان لاقيتي جوة صورتك

حاجة حلوه

ضيعة جواكي ارسميها

لونيها بلون جميل

نظهره جوه الفصول

واحمي عقلك …طهريه

اغسليه بايديك انت اغسلية

تنحمي كل العقول

ولما صورتك تنتهي

امسكي قلمك وورقك

دوني كل اللي ياما حستية

اطلقي قلمك يدون كل كلمة

في صورتك انت اعرفية

اعرفي كل الحقايق جوه صورتك

انزعي كل الغوامق والمساوىء

دي بنفسك …!!

اشطبي كلمة سواد

وأهجري توب السكات

امسكي شمعة000!!

ودوري ف البلاد

قولي للناس انك انت

شوفتي نفسك من جديد

كبري الشيء الجميل

جوة صورتك وارعي قلبه …

زي قلب الام ما بيرعي الوليد

يلاه نبدأ من جديد

بس لازم برده ح تشوقي الطريق

جوه قلب الخوف

ح تمشي بدون رفيق

يلاه قبل ما يفوت الاوان

لملمي العمر اللي باقي

واتركيه يمشي ف امان

افتحي للشمس بابك

وشقي جدار الزمان0000!!

البحر والليل..



البحر والليل ،،

والشموع،، نجمات

بتلملم الشط اللي متشوق ،

للنسيم ،، حبات

تحيي بوار والخضار ،،

سنابل بالأمل ،، جيات

طارح نوار ،، والعمار

م النيل لحضن الفرات

والموج سبيل ،،

والسلسبيل نهري !!

طرح ورود والوعود ،،

كلمة،، تصحي الوجود

يخطها الموج ع الشط

ميت عنوة،، ما ليها حدود

النور يفوت ،،

والعنكبوت راحل !!

الضي قوت

للحلم لو كاحل !!

دربي ،، بيوت !!

لو الطريق واحل !!

البحر ……يــــــــــاه..!!

م البحر وظنونه

عاشقه معاه الحياة

مشتاقة لجنونه

صابر علي بلواه

لو موجه ح يخونه

البحر ……يــــــــــاه..!!

م البحر ورياحه …!!

داب النسيم ف هواه

عشق الندى جراحه !!

البحر و أنت وأنا

والليل….. بلا مرسى !!

وشمسي لو تنطفي

قلبي ما راح يأسي

ح يعاود المشوار

يمكن ف يوم يرسى ؟!!

البحر ……يــــــــــاه..!!

م البحر لو غادر …!!

أخاف أنا قسوته

لو حلمي ح يصادر !!

الليل يعشش ف قلب التوهة والحلم ح يسلم ….!!

لما النهار يصبح ،،

ما هوش قادر …!!

تدبل دموع الندى

تنطق بصمت الخوف

يا بحر ليه قسوتك ؟!!

تطرح غضب هادر؟!

البحر والليل والنجوم

وأنت وأنا ……دايرة

والشط مش باين

والمركبة حايرة !!!

لملم شراع الهوى

يا حلم نزلني ؟!!

قبلن يموت الأمل

واصبح أنا الجايرة !!!

واصبح أنا الجايرة !!!

اشراقة..




من فوق جسور المستحيل

شقيت طريقي

من جوه قلب الخوف

ومسكت بايديه النهار

واختارته أنه يكون صديقي

من فوق هضاب اليأس أنا خدت القرار

اليأس مش ممكن ح يهزم خطوتي

ولا يوم ح تقصر ماشيتي

ما دمت عارفة سكتي

مفيش تراجع أو فرار

والشمس تعشق النهار

ويضمها وسط السما

كما لقى الأحرار

فوقك يا أشلاء الطريق

أنا ح أمشي مرفوعة الجبين

لا يوم ح أطاطى للقدر

ولا يوم ح أوطى للسنين

فوق يا أشلاء الطريق

ح ارسم طريق للعاشقين

ح أقابل شمس أيامى

واسرح شعرها الدهبي

تطمنى علي بكرة

تنور لي ظلام عمري

تنسينى اسى امبارح

وأهة قلتها بدري

تفكرنى أمل طارح

وحلم نسيته جاى يجري

راح ارسم ع الحيطان وردة ونجماية

وأنور ع الطريق شعلة أمل جاية

وفوق جبين القمر

ح ارسملي ضحكاية

راح انسج م الامل توبي

واقول لدنيتى توبي

بلاش تكشيرتك ديه

عمر الضحكة ما تعيبك

ابتسمي و لو مرة

تلاقى الكل محاسيبك

ولو سيبتينى في مرة

أنا عمري ما ح أسببك

خارج حدود المكان


مفتتح :

على كل لون يا بشرْ

على كل لون يا خلقْ

متبعترين فِ السكك

زي الأمان والحق

زي الرياحين

تفوح بالمسك والعنبر

والطعم كله مرارة

يأذي الحلق

نقشنا فوق الصدور

كلمة سكات لنموت

عشقنا بحر السكات

لجلن ما نلقي القوت

اصبح رماد فِ الوريد

يخنق أمانينا

وكلمة الحق

ياما ع البشر بتفوت !!!!

((الليل))

الليل طويل عشش جدار بتنا

والخوف ملجم خطانا..

لا مشينا ولا بتنا ..!!

لما الليالي تليل

ع الأماني.. تموت

نبيع النهار بالبكا

ونشتري قوتنا

شاهد على العصر ولا

كلنا شاهدين ؟!!

كفاية نمضى الشهادة

يا قلبي بسكتنا !!

((فيلسوف))

مسك الحكيم شمعة

في عز نهار ..!

قالوا عليه مجنون ..!!

قالوا عليه محتار ..!!

ضحك الحكيم من قهر الاستهتار

ازاي دي حكمة قديمة وقلتها مرة

دايما بننسى يا شرقنا الحكمة

ان النهار جوانا لو نعرف ؟!!

لو انطفت شمعته ..جوانا ميت شمعة

((احتلال))

زرعت شجرة ريحان

والريحة فواحة

طرحت أمان

واستكان القلب للراحة

فتحت كل البيبان ،

للشمس بسماحة

غنى الحمام في البنان

ينده على خله

ام جيه غراب في الضباب

سرق الأمل كله

ما دريتش إن الأمان

محتاج لقوة وضمير

وايدين تصحى الكسالى

وعنين تخاف ع الغير

ترعى طيور العصاري

وهية راجعة بخير

من الغراب والضباب

والتوهة وسط الليل

((حلم))

حلمت خير انى تايهه

والتوهة وخدانى

والدنيا حلم الصبية

وبقسوة ..سرقانى

تكسر شراع الندى

وبتنسى عنوانى

لفيت على كل دار

أنده على دا الولا

اللي يلملم ضلوعى

ويشدنى تانى

من بين سنين الشجن

ويطفى أحزانى

وأدوب معاه في الصفا

واحس حر الدفا

ألقاه ويلقانى

(( مريم ))

أيا صاحبتى يا أحلى أغنية

جوه الحشا عشتها

فرحة وملاغية

بادوب في حضنك دفا

وسنين معدية

يا بنت عمري

يا عمري الجاي..

بصراحة ..

خايفة عليك من الدنيا اللي جراحة

وناس تعيش الذل بالراحة

وتاكل القوت متغمس بطعم هوان

وإن سألتى يقولوا : ما تفهميش

ولا تسأليش ح تعيشي مرتاحة

الحرف التايه..




تدور بينا سواقينا

وتجرحنا …!!

مع الصخرة اللي بتلامس

جوارحنا ….!!

فِ عز الصيف

نلاقي خريف يصبحنا

نقول الآهة …يرد صداها

يجرحنا ….!!!

يضيع الحرف فِ النبض

اللي تاه بينا …!!

يخاف الحرف يتكلم

لا نعرف اننا فِ محنة..!!

تدور بينا حروف الكلمة

مخنوقة………!!

وقلب الغنوة مسروقة

وحلم ع البيبان ضايع

ونور الفجر مش طايع

تمد الإيد ….ما تلاقي

تتوه فِ القلب أشواقي

ندوق الصبر ونعيشه

ويفرد ع القلوع ريشه

ونستسلم….!!

تموت الفرحة جوانا

ما نتألم …..!!

ويهزمنا هوان الخوف

يغور الجرح ويعلم

وتنزف أرضي تتألم

يا خوفي الجرح لا يسلم

يا صوت لحق ليه

مسجون ما بين جدران

عشقت العتمة والتوهه

قفلت ع الاماني بيبان

بعترت مني سكتي

والأهل وصحبتي وجيران

نستني حتي ضحكة

كانت هناك قبل الزمان بزمان

يا ريحة الارض

حدوته فِ قلب أذان

لملمي ضلوعي

متشوقة لحضنك أمان

علقم يا طعم الظلم

فِ الموال …….!!

علقم يا صوت الحق

فِ الاغلال….!!

علقم يا مشوار السنين

قصايد شعر راح تنقال

وحرف الغنوة مش طايل

و تايه فِ البلاد رحال

فايت ناسه وكراسه

وداره ع المدي اطلال

يعشش فيها بوم الغاب

يحول حلم عمره ،، محال

تدور بينا سواقينا ..تبدل بالمرار أحوال.

إنت....





أنت ليل جواه نهار

أنت نور والقلب نار

أنت فرح وجرح دابوا

طول سنين الانتظار

أنت يا صاحبي وصديقي

أنت يا حلمي الحقيقي

أنت يا فرحة ف عيوني

دوبت قسوة طريقي

مهما كان البعد بينا

مش راح أيأس من لقانا

مهما كان الليل طاحنا

النجوم عاشقة سمانا

ضحكتك تملى عيوني

قبل ما تقولها الشفايف

بسمتك تحضن وريدي

مهما كان القلب خايف

عود مع النسمة تلاقيني

فرح جرح تهون سنيني

حتى أيامي اللي فاتت

مهما كانت مستحيل

تقبلها عيني ….!!

لحظة الأحزان نسيتها

رغم طولها بطول سنيني

و ابتديت أعشق

و أحب الناس عشانك

رغم أحزاني وأنيني

وف خيالي رسمت صورتك

نبض إحساسي بكيانك

تاج منور فوق جبينك

و ابتديت أسال زماني

فين زمانك ….؟؟!!

فين مكانك….؟؟!!

بين سكوتي وبين كلامي

بين تفاريحي وآلامي

فين زمانك….؟؟!!

يا للي نبضي من كيانك

التمن...




تدور طاحونة رحى

تطحن حواشينا

يموت القلب ف الحزن

اللي داب جواه

وننسي حتي أسامينا

نضيع كلمة وراها كلام

نموت معني …!!

نعيش أوهام …!!

وتتلون خيوط الحلم

مطلية …!!

بلون الليل وطعم الويل

وتتسرسب سنين العمر

منسية …!!

تتوه مني…!!

تضيع منك …!!

يلطخ دمها ايدينا

و يدبل م البكا صوتي

تشق الصرخة جوف الليل

تهز الدمعة ف عينينا

ومــا بتنزل …؟!

ندوب ف الجرح وحدينا

ومين يســأل ..؟!!

ومين يفهم معانينا ؟!

ومين يدفع ثمن خوفنا

اللي مالينا ؟!!

ونتحير ،، هنا نكمل ؟!

ولا هناك ،، نمشي بس وحدينا !!

ونسأل نفسنا امتى ؟! وفين ؟!

راح نلقي أحلامنا

تضيق الدايرة تخنقنا

نلف ،، ندور ،،

كما تور السواقي البور

بلا معني ..!!

بلا أحلام تجمعنا …!!

نعيش ع الماضي والذكر ي

يمكن يتولد بكرة ؟!

يهون قسوة المسافات

يفكرنا بسنين جايات

كهبة ريح بتلطمنا

علي خدودنا

تصحي النبض في عروقنا

تزيل الخوف ..!!

تقوي قلب عاش مرجوف

تنادي حلمنا الضايع

تنادي حلمنا المخطوف !!

ليه أخاف...



ليه بأخاف؟

الحرف يخنق دمعتي

والكلمة يطحنها السكوت ؟

والآهة يبلعها الأنين

والحزن يطويها …يفوت ؟

ليه بأخاف ؟

الضى يتلون بخوف

والشرخ يوسع ف الضمير

وأنا من سكات عاشقة

وقلبي ليك أسير ..

طب ليه أخاف ؟

وأنا كل ذنبي إني أنا !!

و أنت البريء !!

وأنا كل ذنبي إني هنا !!

وأنت مسافر ع الطريق !!

يمكن بأخاف !!

ان اللي يبقى من ضميرك

شيء من الحلم الجميل

أو لمحة من لحظة غروب

أو توهه محتاجة لدليل !!

يمكن بأخاف ؟

إن اللي بينا كان سراب

أو كهل يحلم بالشباب !!

أو فكرة كانت مستحيل

أو نور يعاند في الضباب !!

يمكن بأخاف ؟

بكرة اللي عاشك من سنين

وأنت لسه في علم غيب ربك جنين

مستحيل أنى أسابق بيك زماني

وأنت بالأحلام ضنين !!

يمكن بأخاف ؟

تضيع من القلب الحياة

وأنت الحياة لو قلبي تاه

وأنت ضميري ومنتهاه

كل المشاعر خدتها

لو خنتها ….فين الحياة ؟!!

عرفت ليه لازم أخاف ؟!!!

علمت قلبي الهوى..



علمت قلبي الهوى

ورسمته فِ الشريان

عاديته بحر النوى

عودته ع النسيان

لو تاه فِ يوم و إنكوى

لو داق فِ يوم أحزان

صابر علي د ا الهوى

ولا علي الهجران

يحلم بحضن العنين

اسقيني شهد الحنان

يحلم بلمسة ايدين

متعطرة بريحان

علمت قلبي الهوى

يعشق يكون إنسان

يطوي السنين فِ ايديه

يضوي الحنين فِ عنيه

ويسابق الريح لو تعاند

مشاعر الوجدان

علمت قلبي الهوى

كحلت بحروفك عنيه

عرفت طعم الجوى

والعتمة منسيه

يا حلم مد الشراع

د ا الحلو مستني

عمري ما أحس الضياع

لو حضنه يوم خاني!!

عشقت فيه السمار

والقلب متحني

عيونه لون الخضار

يا بحر ليه خدني

لو دقت طعم المرار

فِ النيني ح يصوني

يا قلب ليه لانتظار ؟؟!

والشط مستني

يحضن عيون النهار

م الخوف ح يسرقني

يا شوقي عدي البحور

واسبق رياح الخوف

أنا حبي ليه باشتياق

ناره بتكوي الجوف

آه ، يا زمان النوى

باعد بعيد عني

القلب عشق الندى

غصني صبح ملهوف

يتلاقى بالحب لحظة

اعمل يا شوق معروف

علمت قلبي الهوى

وعرفت معني السهر

و ازاي أدوُر فِ الليالي

أنادي حضن القمر

و ابعت معاه الرسايل

استني طول العمر

كلمة تصحي دمايا

تحيي زمان احتضر

يا نجمتي فِ السما

طلي وصارحيني

لسه الحبيب قلبه شاري ؟؟!

يحضني وسط الخطر !!

آه يا زمان النوي

باعد بعيد واختصر

علمت قلبي الهوي

ومشيت أدور عليك

وسط الوشوش والناس

وشوشت فيك الودع

وفتحت لك كراس

فيها قصايد تنادي

بالحب و الإخلاص

أيدي في ايدك

مش عايزة دهب ولا ماس

كفاية قلبك دهب

ح أعمل له قلبي مداس

علمت قلبي الهوي

وعشقت فيك خطوتك

ودقت أحزانك

ودبت فِ محبتك

حبتها أوطانك لو

كنت بتحبني

شاكرة لعرفانك

مهما الزمان هزني

فِ النبض عنوانك

علمت قلبي الهوى

وعشقت انسانك

اسقيني شهد الجوي

من نهر بستانك

اسقيني شهد الجوي

من نهر بستانك

صورة حبيبي...




صورة حبيبي

الفجر صورة حبيبي طارح سنابل فل

وليد يشق الفضا من فوق سماه بيطل

ويدوب فِ وسط النهار شمساية فوق الكل

يبدر سنابل عمار عمره يا ناس ما يمل

الفجر صورة حبيبي والندى صاحبه

الحلم فارد دراعه للصبح ومصاحبه

لو يوم تأخر عليه او الانتظار جرحه

تلقاه ينادي عليه تملى القلوب فرحه

الفجر صورة حبيبي مشتاق لبكرانا

يطوى الانين والسنين يبدأها ذكرانا

يكتب بلا عنوان قصتنا وهوانا

يفرح هنا و هناك والدنيا سمعانا

الفجر صورة حبيبي وبكرة جاي يجري

يبدر زهور والعطور يشتاق لها فجري

بلل جبين القمر يا فجر واسقينى

حلمك وحلمي بريء ضيك أنا بعينى

الفجر صورة حبيبي فاتح بيبان للقرب

بايدنا نزرع طريق يمحى سنين الكرب

يدوب ضلام الليل من شوق وداد الصب

عاند سنينك يا عمري وافرد شراع الحب

سنة مرت....




لملمت أوراقي القديمة

صفحة فاتت..

من سنين عمري اللي فات

صفحة دابت فيها نفسي

بدلت صوتي بسكات

سطر فيها عاش أماني

ولا ماتت أمنيات

سطر يحلم بيه زماني

نيل بيجري جوه دمي أو فرات

سنة مرت ..!!

بكل ما فيكي عديتي

بضحكاتك…. بأناتك

بأحلامك….. بدمعاتك

يا عام من عمري عديتي

عشتك ..لحظة ترحالي

وحب كان ف النبض

يوم غالي ..!!

بنتعارك ،، ونتصافى

ونتلاقي ،، ونتجافى

تضميني ،، تعانديني

تكوني المرسى ،، تخديني

تكوني البحر ،، ترميني

يا عام من عمري عديتي

مع بدايتك ،،

حلمت ان الامل طارح

ف ارض بوار..!!

وف نهايتك ،،

قلت تعبت م الافكار

فيكي الحب،، حبيته

وجوه عيوني ،، خبيته

وعشت الصدق بأصوله

وداب القلب في فصوله

وقلت انت ،،

بكل العمر وسنينه

ونبض النبض ،، وحنينه

علي قد الامل فيكي ،

ما شاف النور

قد الليل ما كان ضلمة

وبيت مهجور

يا عام من عمري عديتي

اشتياقي يوم وداعك

زي لحظة اشتياقي

يوم ما جيتي…..!!

قلنا ده زمن العجب ..



غريبة دنيا العجب

غريبة اوجاعنا

عايز ويفهم فتح بقه وسمعنا

من كل فيلم اتحكى كلام ملوش معنى

قصدك تعالج سكوتنا ،

بآهه مسموعة .

ولا تعالج نفوسنا

بكلمة موجوعة

ولا الغرض من كلامك ،

تنبش في اوجاعنا

مين راح يوافق كلامك

واحنا الخلاف طبعنا

حتى لو الكلمة واحدة

نخنقها من ذلنا

قصدك نبيل ،،، يمكن !!

قصدك كريم ،،، جايز !!

والدنيا يا صحابي تاخد من العايز

عندك ردود من هنا

وردود كمان من هناك

اشعلت فيهم بارود

ومالكش منهم فكاك

الكل سن السيوف ،

وركبوا موجة رفض

وأنا كمان راح اشارك

ناقصنى ايه عن حد ؟!!

ما دمت ح اشجب وأندد

وأقول عليك مش جد

وبدال ما اسب الصهاينة والامريكان عن عمد

ح اصرخ عليك انت أكتر

بلاش تكون محتد

انت يا عايز وتفهم

فهمنى بس الكلام ،

اللي ما فهموش حد !!!!

وعجبي

كان وكنا..




ياما ، حبيت الاماني

جوه ف عيون الصغار

واتصفيت ويا زماني

رغم ظلم الانكسار

رغم ظلمك ليه عشتك

رغم هجرك ليه شوفتك

رغم بعدك ،،

عشت صورتك ليل ، نهار

كنت أوراقي القديمة

والجديدة واللي جاية

كنت ليه شمس بكرة ،

حتي ساعة المغربية

عشت فيك الحب ذكري

عشت أحلام مستحية

كان وكنا مش ح اقولها

قصة تاهت من فصولها

مش ح تبقي ف يوم قضية

حرف متكرر علينا

كلمة تاهت بين عينينا

مش ح تقدر يوم تقولها

وانت بايع ،،

واحنا برخيص اشترينا

مش ح تقدر يوم تقولها

رغم صدق النبض فينا

عيش حياتك ، زي ما انت

ضيع مع الاوهام وانسي

اما قلبي مش ح يقسى

ف يوم عليا ..

مش ح يرضي يكون ضحية

كان ، وكنا مش ح تبقي

ف يوم قضية

لم ليلك ويا قمرك

واطوي ظلمك ويا غدرك

واطلب الغفران بقلبك

لو طلبت ف يوم سماح

راح اسامحك ، رغم جرحك

مش عشان خاطر عيونك

لأ عشان قلبي اللي حبك

قلب صافي ،،

حب كل الناس وعاشهم

حب ليلهم ، قبل نورهم

كل أحلامه لوجودهم

كل همه انه يساعدهم

قلب عمره ف يوم ما يكره

حتى لو كرهت قلوبهم

كان وكنا مش ح تبقي

ف يوم قضية …!!

لما يومينك ينقضوا...




لما يومينك ينقضوا

راح يفردوا دمك قصيدة، للى رايح واللي جاي

ح تشوفها صورة ع الحيطان متزوقة ،

والناس ، أدان يصرخ ، وحلمك داب ف قلب المحرقة

والناس ايدين متفرقة ، والنور معدى والسفينة مشرقة

لما يومينك ينقضوا !!

راح نرفضوا ،، وننددوا ،، راح نشجبوا ونزودوا

كام كلمة في حق الولا

واللي ابتلى لازم ح يصبر ع البلا

يا دي الغلا ،، والقلب م القهر اتملى

واتسرسب الحلم اللي شاب ،، لما يدوب سكت الولا

ما عدش صوتك يتسمع ما درينا ايه اللي حصل واللي جرى

لما يومينك ينقضوا ،

ح اكتب على قبرك ، سلام ع اللي ما بعش ولا اشترى !!

ح اكتب على قبرك ، سلام ع اللي ما بعش ولا اشترى !!

ازاي يومينك ينقضوا ؟


ازاي يومينك ينقضوا ؟1

والسهل صعبان ع الخسيس

والناس بيطحنها العجب

والسوس بينخر في الدريس

وأنا وانت يخنقنا اللهب

مبقاش ف قلب الغيط سريس

شفت البنية لما نسيت حلمها

فوق ساقية الخوف اللي طاحن عضمها

ربك مغيث ..

لما الجدار شقه النهار

عيونا عميت م السهاد

قالوا : الحكاية حلها انك تعيش

خايف ومحروم وتايه ف البلاد

ومتشتكيش

لو قلت عاشق حسنها ،

دمك لها،،

قلبك لها ،،

ح تموت صريع في حبها

وايدين بتفرم لحمها ،

وانت الجدع عايز تعيش !!

يا عم طاطينا الرؤوس

مطرح ما تلقى أرضى دوس

خدها عزيزة مننا ،

اكمننا ما خدمنهاش غير بالفلوس

خدها عزيزة مننا ،

الاخضر والاحمر يا ما غير ف النفوس

الناس هنا على ارضنا نسيت زمان

حفرت بايدها قبرها ،،

واتمرمغت في ايدين جبان

أصل الحكاية اننا ،

عشنا الهزيمة في حلمنا

قلنا النكت على قهرنا،

وضحكنا من غلب اللي دابوا في غلبنا

ياصبرنا ، يا ذلنا

ماتوا الولاد من قهرنا

ازاي يومينك ينقضوا ؟!!

واحنا اللي دافنينوا سوا

واحنا اللي دافنينوا سوا

عابر سبيل



مفتتح

صفرت يا قطر محطاته

تعبت من كتر الجري وراه

وانا باستناه

الحلم الفارد درعاته

ومراهن ع الكون بحياته

قطع المشوار

ما بين النسمة اللي مسافرة

والقلب الحالم بنهار

لجل ما توصل للشموسه

السارحة ف حضن النوار

صفرت يا قطر محطاته

وأنا عابر و سبيلي آهاته

باتمني الضحكة فِ دمعاته

ومسافر يبحث عن ذاته

مشتاق للحضن الجواني

عابر ، و دنيتي واخداني

بأخرج من عالم للتاني

سواح في بلاد الله

والخلق خلايق يتعدوا

وفِ هم المسافات بيباعدوا

وان توهت فِ سكتي ح يساعدوا

دي عجايب خلق الله

صفرت يا قطر محطاته

وأنا عابر وسبيلي آهاته

(1)عابر سبيل ، مشوار طويل

والحلم متلفح بليل

والموت سكوت

و العتمة موت

والآهة تصرخ ألف ويل

فين السبيل ؟؟!

من غربة الليل الطويل

دقيت علي كل البيبان

مشتاق يا حلمي

يا اللي كان !!!محفور علي كل الحيطان

صورة و آذان

واتسرسبت مني السنين

موال حزين

ما دريت ولا أعرف

هوه فين ؟!

يمكن يكون ؟!

يمكن يهون؟!

يمكن ما تنزل دمعتين

تطهر الليل م الأنين

لما أتخنق فيه الحنين

و أتلجم القلم الفصيح

مبقاش يصيح !!!

واتبعترت كل السكك طواحين

يا شاعر الناي والربابة

يا عاشق الناس الغلابة

المحرومين م الحلم والتفاريح

اللي بيوتهم من إزاز وصفيح

متشوقين للنسمة وسط الريح

اللي ساكنهم الألم تباريح

اللي عاشقهم السكات تسابيح

يا شاعر الناي والربابة ……

متلجمة يا شمعة المصابيح

قلتها كلمة وحكيمة



قلتها كلمة وحكيمة

ضاعت الحكمة القديمة

في الملامح والخطوط

والحزن عشش في البيوت

بين ايدين الاخطبوط

قلت جايز يجي بكرة

يمحى من قلبي الجمود والذل

اوح يمسح دمعة حايرة من عيون الكل

مش عشانك أو عشانى

ح اكتب واقول ما ح امل

لأ عشان ابنى وابنك

نمحى عار الانكسار والذل..

قلتها كلمة وحكيمة

لما شاب الطفل فينا

والأمانى المستكينة

لما مات النور

وغرقت بينا أحلام السفينة

وانتحر ضى القمر

لما دقنا الشهد مر

والحنين للوطن دايماً يغر

يلاه نرجع ..لا مفر

العروسة لابسة توبها

والفتى مستنى دوره

لجل يرجع للحبيبة

ليها ح يعدى بحوره

نهر فايض من محبة

حلم تتأصل جذوره

وانتى شاهدة يالحبيبة انى راجع

مهما كان الجرح دامع

مهما كان القلب شاهد ولا سامع

انى سيبتك غصب عنى

وانتى جوة القلب نينى

بس نفسي يبقى عندى جلابية ،

جديدة نوفى

حتى اقابل بيها احبابي وضيوفى

غربتى يمكن طويلة والسبب ايدى العليلة

والأمانى المستحيلة

اسمعى همسى وشوفى

آه بحبك ..بس لكن من سكات

عشت فيك العمر كله باصحى ع الاحزان وابات

لما احس انك غريبة عن عيونى

والحقيقة فيكى ضايعة

والفساد فارد دراعه

لما يبقى مسلمات

باتخنق وأفور وأغلى وارمى نفسي

في حضن غيرك

من سكات..!!

ليه يا (وطنى) تقل خيركْ.

ينتحر حلمي وضميركْ

لما مات العدل فيكْ

يوم بكيت ليه وليكْ

قلت رايح

مش راح ارجع

وانتَ جرح في قلبي يوجع

باشتكيكْ بس ليكْ

عمري ما داعيت يوم عليكْ

وانتهى بيا المطاف

اركب الموجة ..ما اخاف

دوست على قلبي اللي شاف

فيك يا وطنى سنين عجاف

قلت اضيع وسط الخلايق

مهما خانتنى الحقايق

مش ح اقول أنا كنت راضى

باللي حاصل واللي ماضى

كنت ثاير

جرحي غاير

شوكة في قلب الضماير

واللي راح زي اللي شاف

مش ح تفرق!!

قلب حاير

عشت الملم في الفلوس

اللي داست ع النفوس

واللي خان اهله عشانها

دوس على الناس بيها دوس

والسنين مرت طويلة

والايدين ما بقت كليلة

قلت ارجع

عايز اسمع

صوتها تانى

مش ح اكون انسان انانى

عايز اكون ليها وبيها

لجل ابنى مش عشانى

قلتها كلمة وحكيمة

يلاه راح نركب سفينة

والشراع مفرود يشاور

ع الحبيبة أم البشاير

مهما كان البعد بينا

ح التقيها بحلمى طاير

كنت واحد من الاف

عدى بحر الخوف ما خاف ا

نا شوفت لحظة موتى صورة مش خيال

الارض تصرخ ع الولد لأ والجبال

وعنيا غرقت في الدموع

انا شوفت موتى وسط بركان الخضوع

السفينة لما مالت مالت الاحلام معاها ، بدون رجوع

قلت اصرخ يمكن القى حد يسمع

ولا عين تبكي وتدمع

طائر النورس حزين

كان بيسأل أنتوا مين ؟!

قلنا : غلابة ومحرومين

اترمينا في حضن ما بيرحم جنين

ولا يشفع للامال جوانا أو حتى الحنين

آآآه يا وطن المظلومين

الف واحد منا ماتوا

مين ح يحمل ذنبنا؟!!

ولا يدافع عننا

وصل المطاف بينا يتاجروا في دمنا

وفي لحمنا

ولا عشان اكمننا

من الغلابة المحرومين

اللي داقوا م الهوان مر السنين

تاجروا في قوتنا وحلمنا

والعتمة ليها ميت دليل

القلب صارخ

والعذاب في حشانا جارح

واللي ماتوا مش قليل

لما مات فينا الضمير

انهزمنا كلنا ..

واللي هزمنا ،حبنا ليك يا وطن

بيصوروك دايماً بخيل..!!!!!

الا الحبيب المصطفى .




الا الحبيب المصطفى ..

رمز الوفا والخير لكل العالمين

يخرس لسان العولمة ، واللملمة

والحرب بين دنيا ودين

نصحى نفوق من جهلنا

وننادي فوقوا يا مسلمين

مبقاش خلاص وقت لدموع

الشدة محتاجة الايدين

تفتح لنا طاقة نهار

ونحسها جوه العنين .


الا الحبيب المصطفى

الصبر ولى وانتهى

والجبن فارق دا الجبين

ماعدش غير قلب الجفا

مفتوح لكل المشركين

ازاي يسبوك يا نبي

وانت رمز المسلمين

النور طريقك والهدى

نهجك .برغم الحاقدين

الحرب بدات والطريق من أوله

ما تقولش قدامنا سنين

الا الحبيب المصطفى ..

باسم السلام .. خنقوا الحمام

داسوا علينا كالنعام

من غير نفس ،، من غير كلام

والسر ايه ،؟!!

ماضيين معاهدة فى السلام

باعوا فينا واشتروا

بالزور ,واكل الحق ، ما بنقبل حرام!

عيشوا حبايب في الوطن

سفاح وسيبه في ارضكم ،

يبادلكم الشوق والغرام .

والسر ايه ؟!

ماضيين معاهدة في السلام

الا الحبيب المصطفى

ياناس كفى من المهانة ما اكتفى ؟!!

مع مين بنحلم بالوفا ؟!

التعلب المكار قصاد الدار

صايدنا كلنا لو ما انتبهنا لنفسنا

نابه ظاهر ما أختفى!!

الا الهدى والنور وحب المصطفى

مبقاش خلاص الا الخلاص من ذلنا

والغيرة تجرى في دمنا

ونزود بقى عن عرضنا

كفاية ضيعنا العراق

ومضينا عهد من الفراق

ونشرنا بينا الف داء ووراها داء

والحل ؟؟

يرجع حبنا للمصطفى وننسى الرياء

ما بلاش بقى فكر التروى والغباء

من بعد سب المصطفى ، فين الحياء ؟!

دي مش سياسة حتماً ح نلعبها بذكاء

ده صون وعزة للنبي ع الارض وف جوف السماء .

ده صون وعزة للنبي ع الارض وف جوف السماء .

لحظة فضفضة...



جيت لك يا صاحبي

بعد فرقة وطول مغيب

جيت لك تداوي جرح قلبي

أو تِطّفي لي اللهيب

كلي احساس شوق ولهفة

حضنك الدافي امان

يترمي فيه الغريب

جيت لك يا صاحبي

لجل ما ارمي فيك همومي

و أحضنك تروي جوايا الآمان

وف وريدي ارسمك

عايزة اقولك

كل احزان الضلوع

عايزة اقول لك

بس اخاف تلسعني

دمعة م الدموع

ويضيع مع العتمة الطريق

وانسى الرجوع.!

جيت لك يا صاحبي مشتاقة لك

رغم قربك من عيوني

مشتاقة لك اشتكي

همي واحزاني وجنوني

و أوعى يا دمعة تخوني

عايزة اقولك….

بس اقولك ايه ….

ح تسمع ولا راح تفهم ظنوني

طب متزعلش يا صاحبي

ليه بتهدر مَيتك

رغم ان طابعك التأني والهدوء

ليه بتغضب رغم حبي ليك

بلهفة سابقة شوق

ليه بموجك تلطم الجرح المخبي

ليه يا صاحبي …؟؟!!

تخنق وريدي وتنتظر اني افوق

وانا جايه اجري

ارمي حلمي فيك وهمي

اترمي جواك واصرخ

باشتياق لهفة حبيب...

و أنت ف اللحظة دي أمي

راح تاخدني بين كفوفك

راح تسمي

وتداويني ..

ما انت صاحبي والطبيب

راح تعاند فيا احزاني وهمي

جيت يا صاحبي

ليه باحس انك قُريب رغم بُعدك

غصب عني

ليه باحس اني باطولك

رغم انك مش سامعني

ليه باخاف لحظة غموضك

رغم انك حته مني

ليه باعيش جواك قصيدة

حتي موجك جوه سامعي

راح يغني …

جيت يا صاحبي

لجل ما تلملم ضلوعي

لجل ما تنشف دموعي

لجل ما تروي فروعي

وترد لي عقلي

اللي تاه ف السكة مني

جيت لك يا صاحبي

خطوتي صبحت تقيلة

كالجبل غصب عني

دابت الفرحة ف حروفي

وانتحر جوايا فني

عصب عني..!!

وابتديت اعشق جروحي

وانسي عشقي لكل احلامي

وطموحي غصب عني

ياما اتمنيت اجيلك

جوه محرابك اغني

لكن الدنيا يا صاحبي

مش اماني او تمني

ضاعت رموزي جوه مني

وانت يا صاحبي بغموضك

حته من قلبي ومني …..

أنا و أنت..



أنا و أنت

بنتقابل علي مركب حياة، تايهيين

تجمعنا الصدف فكرة !!

تفرقنا الظروف بسنين !!

نخاف نحلم نعيش بكرة

لتهزمنا الحياة بأنين

أنا وأنت ،،

سِكنا الخوف في أغنية

عشقنا الصبر جوه العين

رسمنا الآهة مرئية

ودمعه تطل فِ عنية

بتتمنى يدوب كَفين !!

أنا و أنت ،،

شراع مكسور

عتمة ونور

كتاب ضاعت ما بينه سطور

وفيه اسمك وعنوانك

وقلب يناجى انسانك

ونبضى زهر بستانك

أنا وانت ،،

باحسك آه تنادينى

وطاقة نور تواسينى

لما أغرق في وسط بحور

أنا و أنت ،،

تمد الكف تلقانى

شجرة ورد فوق الخد ريحالك

تغازل فيك امانى بجد ملهاش حد

سمعالك

صدى صوتك بيغلبنى

وهجرك ليه يتعبنى

أنا وانت

حبايب بعض

مهما الطبع غالبنى

وفاق الحد

دم العـــراق



دم العراق مسفوح

غصن السلام مدبوح

قلب الوطن مجروح

وأنا وانت ليه ساكتين !

الغل عشش وبان

ما عدش ف البيت أمان

والزور مزور طريقنا

وهمومنا بالملايين !

حلم الصبايا ، انتحار

ضاع ، الامان .. الاختيار

فارقنا شمس النهار

بدلنا دنيا بدين !!

همك وهمى فِ قصيدة

والسكة لسة وحيدة

كل الطرق مسدودة

دنيا وآه عايشين !!

همومناع القلب حلت

ورابطة الود حلت

وقلوبنا ف العشق ملت!

ما عدش فيه محسنين

غيرت ناسي ودياري

وقلت ح اخد قراري

بايدى ح اخلق نهاري

ما لقيتش غير جزارين

دبحوا الامان والامانى

والذل له طعم تانى

علقم فِ قلب الاغانى

وقصيدة للمحرومين

يا ريت أنا كنت فيهم

تحضن ايديا ايديهم

نمسح الخوف من عينيهم

ونخضر البساتين

الغل غالل ايديا

والعتمة نيني ف عنيه

والسكة ما عدتش هيَّه

فين الصديق الأمين ؟!

قلب العراق ضايع

والحرف ليه مايع؟

صوتى ما نيش سامع

نضحك بإية على مين ؟!

ما نقولها ونخلص

الحلم للاخلص

هدفك ما تتملص

شكل العدو ، حافظين

سُنة ، كمان شيعة

الفرقة دي مريعة

عايزنها تقليعة

بس احنا مش عايزين

ده ربنا واحد

خلقنا نتاحد

نرفع شراع السماحة

وحلمنا الواحد

وكلنا مسلمين

مين فيكم هلالى؟



مفتتح:

مغموسة يا طعم الهزيمة

بالعلقم المسموم

لم تنفع حكاوي الزناتي خليفة في شيل الهموم

واليأس جوه القلوب احلو له النوم

مغموسة يا طعم الهزيمة بالعلقم المسموم

(1)

طول عمرنا نحكي الحكاوي

ونقول غناوي ….!!!

نغزل الغنوة من جوه ضلمة الكلمة

نلونها بلون وردي

نبتدي بيه الحكاوي

تلقى الغنا ساحر

يوهمك انه مداوي

مع إن ده كله محال

ما أصلنا نحب الخيال

محبوسة يا عقولنا

مقفول عليكي

ومصدية الأقفال

علي كل ركن فيكي

قصة ومية موال

محبوسة يا عقولنا

وسط الحكاوي والغناوي

يتغسل بيها العقول

وتضيع معاها الأصول

ويا الحلول

وتتوه مراكبنا

ويضيع معاها الولاد

وف شدة الكرب لا نشوف عنترة ولا شداد

الكل صار عبلة ولبس توب الحداد !!!!!!!

***************

(2)

الكون سكون

والليل فارد له مِيت دراع

والنوم معشش ف العيون

والجفون متسبلة

والإيدين متخدلة

كأنها في حالة وداع

والضلمة تهوى اللي ضاع

تمسك إيديه

وتحركه جوه الضياع

تلقى العقول متبدلة

مش عارفة إيه المسالة

كل اللي بيها

إنها خايفة الطوفان

والرعب عارف سكته

جوه القلوب

ضاع الأمان

ضاع الأمان

(3)

المركبة تاهت في وسط الريح

بتجرفها شمال ويمين

بتتخبط وتتلخبط كما الأسد الجريح

وتتكسر عواميدها مع أول هبوب للريح

وكل شمع انطفى واتكسروا المصابيح

وراح زمان الحكمة والديك الفصيح

والناس دي واقفة ف قلبها

الخوف هزمها وذلها

و لا شفت واحد مد إيده وشدها لبر الأمان

ولا شفت واحد زعق بصوته

وقالنا لازم تعيش … لنموت كمان

الصوت خرس والصمت ساد

واتلجموا زي الحصان

ملعون …… ملعون

يا اللي ما تعرف سكتك ساعة الهوان

************ (4)

شراع المركبة مكسور

يا مين يصلحوا ف النور

من غير غنا وزعيق

ولا ناس تقول من هنا ح نصلحه

ولا ناس تقول من هنا ح نعيد

كلنا وسط الحكاوي

نعمل نفسنا أبو زيد

ونهاتي وسط القوم واللي نقوله نعيد

ونعيش ع الوهم اللي قاتلنا

مسجِدنَا …. مخلينا في عصر عبيد

مبدل كل أحلامنا

شددنا لبير ما لوش أخر

نبدد كل أحلامنا ونتـاخر !!!

نلاقي الغنوة تتكلم

ضحكت عليكو ف الآخر

وتتألم الم ساخر

يا مين يجيبلي من وسط الحكاوي

أبو زيد وهلالي يمدنا بالعون

ويمسح دمعة المحزون

ويشيل غبار الليالي

ويغزلي م الشمس توب

ويرفع شراع المركبة عالي

يزعق بصوت الأسد

ينادي الهلالي اتولد

يا رب ألفين مدد

وتعدي مركبنا

يا رب ألفين مدد

وتعدي مركبنا

فيتامين واو....



مفتتح :

سكت الكلام ....

لما الكلام ضاعت معانيه والسلام

لَّما يدوب قلب الحجر

عشق السفر بين الضلوع أوهام

سكت الكلام ...

لما الكلام مرر فِ قلب الحلق

و اتلخبط الباطل فِ قلب الحق

ما دريت أنا ....

امتى اقول الآه ...

ولا أقول اللأ...

سكت الكلام ..

(1)

علمتنى الدنيا يا أمه

ازاي اعوم

ضد تيار الهموم

علمتنى كيف راح ازرع

نجمتي وسط الغيوم

لجل ما تطرح نجوم

علمتنى الدنيا يا أمه

ازاي أكون

شجرة صنبور ولا شجرة سنديان

قلب ما يقدر عليه الف جان

لو يخون النور طريقه

يركب الحلم .. الحصان

علمتني الدنيا يا أمه

والحقيقة طعمها في القلب زاعق

والانين اللي محاوطنى

دايس الأحلام ومارق

واحنا في السكة .. الَمفارق

كالغريب اللي مسافر

تارك الدنيا ومِفارق

علمتنى الدنيا يا أمه

ان حلمى لو ملكته

مش ح ياخده منى ناهب

ولاَّ سارق ...!!

(2)

وباذاكر واشقى وباتعلم

وأحلم بالشمس وبنهاري

واشيل الحلم المتلملم

وأذوق بالفجر خضاري

وادوب في الحلم وما اشبعش

وأطاوع بكرة وما احنيها...

راسي والعز اللي ماليها

ورغيف العيش واللي خلقنى

شهاداتى في الدنيا كتيرة

متعلم والعمر سرقنى

ويقولوا على الطبقة فقيرة ؟!!

شهاداتك ايه انت يا افندى ؟!!!

اسكت وتضيع منى الكلمة

شهاداتى ؟!!

يتلجم صوتى الجوانى

يتبعتر حلم ورا تانى

شهادتى مش علم أخذته !!!

ولا درس من الدنيا انا شوفته

شهاداتى كارت من اياهم !!!

صدقنى .. ياريت تستنانى

دي حقيقة ، لكن وجعانى

وبسرعة أقول.. ما عييش

ويضيع الحلم المقتول

ويطير كالريش

ويروح علي بن المسئول ؟!!

ان شالله يعيش

وأرجع

مالقيش ...

.غير لقمة عيش

مغموسة في زيت

ويضيع العنوان جوه البيت

وأدور ع الكارت ف جيبي

مالقيش غير حلم .

ان آخد م الدنيا نصيبي

بكفاح العلم ..!!

وأرجع وياريتنى ما جيت

دى حقيقة اغرب م الحواديت

انا ياما حلمت

لكن دلوقتى بس صحيت

يتلجم صوتى الجوانى

ويضيع الحلم ورا التانى

ويضيع الحلم ورا التانى

في حب مصر ..


اكتب يا شاعر ودوس على قلب الوجع بايديك

لملم جراح الحبايب وابدر بذور الوفا بعنيك

اياك تسيب حضنها مرة ولاّ تعيش وحديك

دي هيه بلسم جراحنا ومن الحنان تسقيك

بلد الخضار والعمار والنور وكل الخير

تعشقها من اسمها عشق السما للطير

تقطع جسور المنافى ترجع لها مشاوير

تحلم لها الف مرة ، لو جنتك عصافير !

اكتب يا شاعر وغنى للسمرة أم الرجال

القوة في ضعفها وتشيل هموم كالجبال

صخرة ، عفية ،بهية ما تهزهاش أهوال

بلد النايات والحاجات والصبر ، طولة بال

اكتب يا صاحبي وقول احكي لكل الناس

عن الحبيبة القريبة م القلب والاحساس

ترابها كحلة عنية ف القلب ما ينداس

لوعشت يوم دنيا تانية هيه الوجود والاساس

اكتب ياشاعر نشيد.... للوفا والحب

بلدى اللي نورها بيضوى جوه الحشا والقلب

محتاج أنا حضنها لو كان ضنى أو كرب

الجوع ، أكلنى.. لكن قلبي ماليه الصب !!

كلمة للقاضى ...



ابويا راضى وانا راضى

ومالك انت بقى يا قاضى

نعيش في هم وليل وسكوت

والذل سيف ع الناس ماضى

والغدر بيعشش ف بيوت

والنور مسافر مش فاضى

أبويا راضى وأنا راضى

اسكت وسكتنا يا قاضى!

الموج يثور والبحر غريق

والعتمة صبحت شيء عادي

والصوت عِلِىِ لكن مخنوق

والحر ، حتماً ح يطاطي

والناس شوارع والحواديت

بتزيد فِ حيرتى وعنادي

أبويا راضى وأنا راضى

ابكي وبكينا يا قاضى

على كلمة الحق الضايعة

واصرخ وسمع اولادي

ان الامان ما يجيش بسكوت

وعار علينا الدنيا ياادي

لو قلنا نسكت لجل القوت

ح يضيع زمانى واحفادى !

والديب ح يسرح فينا يفوت

ينهش فِ قلبك يا بلادي !

قلها يا قاضى بعلو الصوت

عايزين نهار يحمى بلادي

وكفاية ليل طول وسكوت

وأيدين بتخطف اعيادي

واحنا معاك ح نقول لأه

ونحارب العقل السادي

اللي طحن قلب الحرة

وهان عليه دمع بلادي

اصرخ وفوقنا يا قاضى

فلســطينى



فلسطيني

حروف اسمي بتصرخ آه

فين عروبتنا؟!

!بيخنقها الأنين و الآه

وتتقطع علي سكوتنا

و تتوارى أمانينا

و تتبدل رجولتنا

تضيع ف التوهة نخوتنا

وتصرخ أرضنا منا ..

وتتمني تشوف موتنا

لأن الذل صار قوتنا

ومأوانا وعزوتنا !!!!

فلسطيني ،،

حروف اسمي بتصرخ آه

فين تاهت عروبتنا ؟؟؟

فلسطيني ،،

حروف اسمي نهار واضح

وقلب القلب ما يسامح

لو اتخاذل !!

لو اتنازل !!

لو ضاقت بُه أحواله

ما يتكاسل

علي أشلاءه ح يواصل

طريق النور ،،

بقلب جسور

ما هوش هاين

ولا خاين

ولا جايز تقول كاين

فلسطيني،،

حروف اسمي ،،

بلا تبديد ولا تحديد

ولا اقرار ولا ذمة

ولا محتاجة لللمة

لجلن تصحي يا أمة !!

و أنا محتاج لثوارك

يموتوا و ويزرعوا نهارك

كفاية كلام

كفاية النوم مع الأوهام

حروف اسمي

بتصرخ اصحي يا أمة

فلسطيني ،،

حروف اسمي بالعدد سبعة

بتنزف كلها دمي

وتخطف م النهار شمعة

يا نهر فرات ،،

طوفانك أتي من دمعة !!!

حروف اسمي

يا أرض النور ،،

بتتألم نيران والعة

وبركاني يفور ،، يهدر

يحاوطني الألم يغدر

ما يهزمني ،،

ولا علي حلمي راح يقدر

يا أرض النور

دة أنا ابنك فلسطيني !!!

الفاء ،،

فداكي دنيتي وناسي

يا أرض النور يا نبراسي

يا مرسى المصطفي

قومي ..،!!!

وداوي جنوني من راسي

فديتك بالحبيب والصحب

فديتك ف الهوان والكرب

فديتك بالأمان الصعب !!!!

بنفسي كلنا واحد

يا أرض النور ،،

يا نهر الحب ،،

امتي بس نتواحد ؟؟!!

اللام،،

لاموني وقالوا يوم بيعتك

وانا متباع من قبلك

ويشهد ربي ما خنتك

بجرة من قلم غادر

تراب الأرض يتصادر

باعوني وباعوا أحلامي

وضاعت مني أيامي

ورغم المنفي أنا صنتك

ما بين الضلع و حشايا

ولملمتك جروح حيرة

تزيد الآهة جوايا

ولا نسيتك!!

ولا رميتك !!!

ف قلب وريدي خبيتك

يا أرض النور

انا منك فلسطيني

السين ،،

سنين مرة ،،

من يوم تمانية واربعين

ما أعرف لها طعم السنين!!

ما أدري اذا كنت ف شبابي

ولا عديت الأربعين

سنين مرة وسرقوني

سرقوا الضي ف عيوني

ولا موني !!!!!!

وساوموني علي بكرة

وباعوا واشتروا فيا

و أنا وحدي بقلب حزين

وحلم ضنين

سنين مرة !!!!

بانادي عليك يا فلسطين !!

الطاء ،،

طريق مشيناه وح نكمل

في قلب الآهة ما نتململ

طلينا قلوبنا بالصبار

وقلنا لابد نتحمل

طابور خامس

طريق سادس

أمانينا ما ح نسلم

يا أرض الخير

يا جرح أسير

في قلب القلب متعلم

الياء ،،

يمامة ف الفضا ناحت

علي أقصى أسير الخوف

وريحة ذُلنا فاحت

وحرقت قلبنا والجوف

يهون الجرح يا وطني

يهون الدم يا وطني

لو صار حلمنا مخطوف

النون ،،،

نشيد بكرة لأطفالي

أنا عربي ،،

اسير حبك يا أوطاني

ندي صبحك يصحيني

تراب ارضك يغطيني

وشمسك تحي ايامي

انا عربي

فلسطيني

اسير حبك يا أوطاني

الياء ،،

يا رب العون أنا طالب

بدمي الحر أكون غالب

أرجعها لحضني

غالية مشتاقة ،،

ولا سيبهاش لمين ناهب !!

يا رب العون أنا الغالب

فلسطيني

حروف اسمي بتنطقها

بتحلمها

بتعشقها

يا ارض النور …!!