قصيدة لاسلهمت عينك


لاسلهمت عينك ترى جانـي المـوت
أ موت في سـود العيـون وهدبهـا

كم مرة لاشفتهـا برفـع ا لصـوت
أجـاوب الورقـى واغنـي طربـهـا

أكتب من ا شعارك على صفحة ا لنوت
شعر الغـرام اللـي بحبـك سببهـا

ياللي غلاك بداخـل الـروح مكبـوت
حبك سلـب عقلـي وحالـي سلبهـا

سحرك سرى فيني مثل سحر هـاروت
وغرا مك ا شقاني وروحـي نهبهـا

مغير أفكـر فيـك وا لبـال مشتـوت
ونفس ا لعنا طاريك يبعـد غضبهـا

يا منوة ا لمشتاق يـا منـوة القـوت
ترى هوا ك ا ليـوم روحـي جذبهـا

يامذهب ا حزا ني وا نا فيك مبخـوت
نفسـي سعادتهـا معـك تقتربـهـا

لمفارقك ماطعـت عـاذل وشافـوت
وحبك جبر نفسـي عليـك وغصبهـا

لاجابـوا ا لطـاري لفرقـاك بمـوت
وا لبعد وا لحرمـان حالـي عطبهـا

ياللي خيالك بيـن الأضـلاع مثبـوت
يطفي وهـج نـار بصـدري لهبهـا

قصيدة اصعب اللحظات


من سنين ارجيك والصبر انتها
واصعب اللحظات وقت الأنتظار

ا لعهود ا للي معـك ماخنتهـا
وانت ماعندك لها أي اعتبـار

لك حياتي ياظنينـي صنتهـا
عايشه مابين همـي والدمـار

لوحروبك من زمـان أعلنتهـا
كان ما مال الزمن فيني وجار

خطتك فشلت وانـا حطمتهـا
بانت القصه مثل شمس النهار

ليه نفسي في غرامـك هنتهـا
ياحبيبي منت في هجري مجار

المراره فـي غرامـك ذقتهـا
قلتها لك والمعاني باختصـار

قصيدة سكون الليل


خيم سكون ا لليل وا لنـاس رقـاد
سرى بي ا لهوجا س بارض بعيده

توا قد ت با لقلـب نيـرا ن وقـاد
أ طفي ا لقديم ا تجد نـار جديـده

طار ا لكرى يوم ا لمخاليق هجـاد
وا لعين تذرف وا لعبايـر شديـده

بصبر لعل ا لحـظ يرجـع وينقـاد
وترجع لنـا أيـام كانـت مجيـده

لكن -- نجاهد وضعنا ا ليوم بجهاد
وأ يامنا صـارت بوصلـك زهيـده

خذ ا لخبر يا للي عن ا لحال نشاد
أ قول معنى قصتـي بـا لقصيـده

فهمتهـا ولاتـرى ا لهـرج ينعـاد
ولا بـلاش أ ليـوم حنـا نعيـده

قصيدة اغليــك


أغليك وا هدي لك عيـون تراعيـك
وتصد عن غيرك وتحضا ك برفـوق

وا عطيك قلب ما يبي غيـر طاريـك
ونفس حدا ها ا لشوق ياغاية الشوق

تعال ا شيلك في عيونـي وا داريـك
يانظرةالعينييـن يـا ساحـر المـوق

تعال احطك في قصيـدي وا جاريـك
وطوقك قصه وباقصى الحشى طـوق

تعال نجمـه فـي سمايـه وا عليـك
واغيض هالنجمات وا نت ا لقمر فوق

أبيـك تفهـم مـن يحبـك ويغليـك
وا نت ا لقصيد اللي نغنيـك طـاروق

أ بيك تعطيني مثـل مانـي ا عطيـك
شوق الهوى ياشوق لك ساقني سوق

على القرا يـب وا لبعيديـن أبديـك
والحال من بعدك غدى شبه مدقـوق

شهد ا لعسل ينساق من بين أ شافيك
شهد رحيقه ينعش الـروح بالـذوق

يا إ ما تحس بلهفتـي يـوم أناجيـك
ولاترى قلبي من الحب (( معتـوق ))

قصيدة اذلل النفس لك تذليل


عجل علي زاد بي الويـل
ياروح روحي ووجدانـي


يالله عسى ديرتك للسيـل
يسقيك يـاروض بستانـي


اشتقتلك يالغـلا بالحيـل
ومن العنا كثرت احزاني


القلب ميل عليكـم ميـل
روح معاكـم وخـلانـي


اسهر واساهر نجوم الليل
والنوم ياشـوق ماجانـي


منزلك عندي شبيه سهيل
ويحرم على واحد ثانـي


اذلل النفـس لـك تذليـل
واغليك يانور الاعيانـي


ياويل حالي عليكـم ويـل
لك زود الشوق حرمانـي


أشتاق لك في سكون الليل
واحتاج اضمك بالاحضاني


بعد الحبايب يهـد الحيـل
وانا بـك الحـظ منانـي


أخاف وقتي يجي به ميـل
وتصعب مواصيل خلاني

قصيدة الهجر والخذلان


طال انتظاري والهواجس مناديـب
وين الوعد ولا على الـرف كنـاااا

يالله عساها في دروبـك تراحيـب
ويسعد حياتـك لوتخليـت عنـااااا

لاغبت عني وش تفيـد المطاليـب
رخصت نفسي والهوى بي تجنـى

مليت اعيش بصمت بين ال الاعيب
من كان منا صـار ماهـوب منـا

تعبـت أدور للمفـارق تقـاريـب
وليه المفارق يرتحل عـن وطنـااا

اللي نبيه يغيب باقـي ولا يغيـب
ومن كنت أبي قربه ترى غاب عنااا

الهجر والخذلان والشـك والريـب
هاذي بقايا من الغلا فـي زمنـاااا

قصيدة ابو متعب


ياواحـد ماغيرعفـوك وسيلـه
وبقدرتك عبدك وسيـع مجالـه

تحفظ بلاد الخير عـن مانويلـه
وتعز من للحكـم يرفـى خمالـه

الليث شيال ا لحمـول ا لثقيلـه
أللي ليا وكل له الحمـل شالـه

عبدالله اللي له فعـول جزيلـه
الليث ابومتعـب زعيـم العدالـه

العاهـل اللـي مانـدور بديلـه
عسـى الليالـي ماتبـدل بدالـه

راعي العلوم الطايـلات النبيلـه
مواقفـه تشهـد ولابـه جهالـه

للدار واحداث الزمن يرتكـي لـه
والشعب كله عايش في إظلالـه

العاهل اللـي شايفيـن جميلـه
يفعل لشعبـه مايـدور جمالـه

كم مسلم في حاجته ينتخي لـه
وان جاه مضيوم فزع وانتخى له

يمناه تكـرم باليالـي الفضيلـه
في كل دار وكـل مسلـم ينالـه

بالخير كل المسلمين تحكـي لـه
يدفع وينفق من غوا لي حلالـه

يمناه بالمـدات ماهـي بخيلـه
ومعرب من ساس جده وخالـه

الله يحفـظ مـن يزبـن دخيلـه
وعساه عند الله يفـوز بعمالـه

قصيدة شمس الشروق


الله الله وا شرقت شمسي شروق
وا بتدى في خافقي حب الوله

ياهواي اللي تغلغل فالعروق
ينبض بقلبي ودمي يحمله

آآه ياحب يرفرف لي بروق
يا مشاعر كل يوم تذوب له

سكرتي في خمر حبه ماتفوق
كود اضمه فوق صدري وامهله

بالحبر والشعر انا صغت الوثوق
من خفوقي كل همسة حب له

دام باقي لي معه حب وشوق
كل جرح في طريقي باهمله

والأمل براق والحزن مخنوق
والهوى طفل وحنا ندلله

أنشدينا ياتباريح الطروق
الوفا ظل القلوب تظلله

قصيدة وداعية / فمان الله


توكل لانويت تـروح تهجرنـي وتنسانـي
أمانه لايردك شـي واللـي عافنـي عفتـه

لاتستغرب شعوري ذا لأنـك ظالـم وجانـي
ولابه يوم جربـت الغـلا يافـلان أوزرتـه

خساره واحسبك ماتعرف الثالث ولا الثانـي
أثاري قلبك اللي مايعرف السبت من سبتـه

ومادام الرجل قوام على المـرآه بهجرانـي
تأكد كل رجـال عظيـم بزوجتـه واختـه

أنا الحوراء وانا الماسه وراس الغيم مسكاني
أنا الشيهانه اللي من طمان الأرض ماشفتـه

بشمت فيك خلق الله من القاصي إلى الدانـي
مكانك وانت حر في مكانـك يـوم وهقتـه

أنا حوى صحيح اني دموع العيـن تشقانـي
ولكنـي أذا صديـت قلـب المبتلـى دستـه

فمان الله وداعيه على شانـك علـى شانـي
قبل لايكبر الموضوع جود واخذ (هالنبتـه)

قصيدة تاج قلبي وشريانه



ياناس حبـه بـرى حالـي
لاقال احبـك مـن لسانـه

أنا اشهد انه هـو الغالـي
مـن بعـد فرقـاه تعبانـه

مـن بعـد فرقـاه عزالـي
ومن غيبته صرت حزنانـه

يا غايتي يا هـوى بالـي
هذا البطى وش هي الوانه؟!

لاجـاك خطـي ومرسالـي
لاتلومني صـرت ولهانـه

البيت بعـدك خـلآ خالـي
يا شين هالبيـت واركانـه

صوتك وطيفك على بالـي
يداعـب الفكـر بالحـانـه

يفداه روحي مـع المالـي
وهذا اعترافي على شانـه

غالـي ويشتـاق للغالـي
والطايـر يحـن لغصانـه

أختامهـا أنــت أمـالـي
ياتـاج قلبـي وشريـانـه

قصيدة بحر جده


ذكرتني ياذا القمر باريش العيـن
لأنه يشابه طلعتـك نـور خـده

ياما جلسنا ايام وشهور وسنيـن
سجيت انا وياه فـي بحـر جـده

أنشهد انه كامل الوصف والزيـن
أرخصت أنا الغالين في كسب وده

واليوم انا ياذا القمر والغضي وين
الكـل منـا دمعتـه فـوق خـده

يا صاحبي لا تبدل الزين بالشيـن
لا تسهر عيونـي وحالـي تهـده

أرفق بقلب لوعه عقبـك البيـن
وعين تعاف النوم فوق المخـده

الله يرحـم حالـنـا يالمحبـيـن
أرواح وا ستعصت عليها المـوده

عز الله أن الحب و اهله مساكيـن
كل موصله الهوى فـوق حـده

يسهر طوال الليل والناس ممسين
يساهر طيـوف الـذي زاد صـده

أعيش في ذكراه من حين الى حين
يالله عسى المولى حبيبـي يـرده

دونه حياتي خاليه مـدري لويـن
بصبر وصبري من رجا بستمـده

قصيدة جنة اطماعي


لاتكابر وا نت بعدك لـي هـلاك
صرت عقب جنة أطماعي جحيم

سرت في دربك ونجمي في سماك
غاب واصبح في سما حبي ظليم

واعذابي خافقي يطلـب هـواك
صار لك شوقي مثل طفل فطيـم

اتمنـى ساعـة فيهـا لـقـاك
لحظة يبرى بها القلـب السقيـم

يامنى قلب المعنا ويـش جـاك
ماترد الصوت للصـوت النديـم

تدري ا حزاني يبددهـا عطـاك
وا نت تبخل في عطاك المستديم

آآآه من هم بقلبي مـن عنـاك
أنجرح واصبر على فراقك واهيم

قصيدة ولاجيت أدور شعر شعار فاضيـن


في المنتدى ماجيت أبي حكي فاضي
ولاجيت أدور شعر شعـار فاضيـن

أنا عزيـزة نجـد بنـت الرياضـي
بنت الرجال أخت الرجال المسميـن

سود المشاعر ماتلامـس بياضـي
الشعر فيه العذب والزيـن والشيـن

ومافيه شخص صار بالزين راضـي
يوم السخافه جات في منتدى الزين

أقولها ماني علـى النـاس قاضـي
هاذي ببساطـه ماتنـص القوانيـن

أقرأ أللوائح شوف ليـه أعتراضـي
واللي أساسه شرط نرضاه راضيـن

شعري وأنا الحوراء كما برق ناضي
يلوح نوره في سماء الشعر ويبيـن

وأعلم بأن الشعر حاضـر وماضـي
يشوم عزه يوم طاحت ملايييييييـن

هذا نموذج في الخطـوط العراضـي
شعري وزنتـه دون أيـة موازيـن

ورود تنبت شعر وتزهـر فياضـي
نرجس وروز مخالطه بالرياحييييين

أنا غرامي شاعـر القلـب حاضـي
شاعر وصيته ذايـع بالمياديييييـن

حبـه معمـر مايجيـه أنقراضـي
في وسط قلبي صار دوحة بساااااتين

شيك الغلا وقـع بأسمـه بياضـي
والحب مبطي بيننا حنا الأثنييييـن

ماقلت لك ماجيت أبي حكي فاضـي
ولاجيت أدور شعر شعـار الالفيـن

قصيدة من بد خلق الله


صادني من بد خلق الله
لا رحم حاله ولاحالـي

منحرم من شوفته كلـه
واعذاب ا لقلب والبالي

أندهش لا شفت هالطله
أرخص الأول مع التالي

ساهر يـا قمـر قلـه
آتخيـل طيفـه الغالـي

كم صويب بالهوى تله
تل قلب الغالي للغالـي

ياولد ضيعت أ نا الملـه
من جماله جاني هبالـي

واهني من احتضن خله
في نعيمه دالـه سالـي

أنتظر حتى يجي حلـه
أطفي اللوعات والصالي

الهـوى تيارنـا شلـه
في بحوره غصت طوالي

قصيدة هلا يابلسم جروحي


هلابك والمحبه وهبـة مـن والـي الاقـدار
وانا حبيت صوتك دون شوف العين للصـوره

هلابك والله اكثر من هلا لوهي تجي لاختـار
وابرد لاهب وسط الضمايـر يشتعـل نـوره

هلا يابلسم جـروح خطيـره طبهـا يحتـار
سببها انت ودواها غرامك مااحتمـل جـوره

ترفق في صويب طعنته من سيفـك البتـار
إصابه بالغه تسفـك بدمـه ساعـة الفـوره

أنا هيمانـة مثـل الغريـق بغبـة الابحـار
يجيبه موج ويوديـه مـوج وبيـن فتـوره

وانا فيك ابتليت وحدني ظرف الحياة إجبـار
على فرقاك لوهي من حياتي صرت مجبـوره

ترفق ياحبيبـي لايطـول موعـد المشـوار
تكرم قرب الموعد ترى الساعـات منظـوره

حياتي ليه من بعدك شقيه كلهـا اصفـار ؟!
وقصيدي لاتعدى حضرتك ... ابيات مكسوره !

انا ماجيت ابلعب لعبة الشطرنج والا قمـار !
انا احبك .. انا منك .. وفيك اليوم مقبـوره !

الى من جيت اهلي بك .. واذا قفيت ياستاااار
لك اشواقي وبسماتي والى من غبت مخطوره!

قصيدة (( المظامي)) ياصاحبي هيا نبي منك ميعاد


ياصاحبي هيا نبي منـك ميعـاد
قبل السنين العوج تبدي علينـا

وعقب المظامي تاخذ الكبد ميراد
وانصير بالمشوار تـو ا بتدينـا

خل الهنا مابين الاحباب يـزداد
من قبل لايفقـد حدينـا حدينـا

واعلن عليك احداد او تعلن احداد
ماينفع التطميـن قلـب حزينـا

البعد يامهجة ضميري له ابعـاد
والهجر والحرمان جرح مكينـا

والحب مابه لعب وجروحي جداد
في كل يوم يزيد هجـر السنينـا

انت الغرام اللي له القلب ماحـاد
يتوق لك شوقـي وكلـه حنينـا

وانا معك ياخذبي الهاجس اسناد
عهـد قطعتـه بالمحبـه متينـا

يااغلا غلا كل الغلا جاك منقـاد
متى على الله يالغـلا تحتوينـا

يامهجة اللي ماعرف طعم الاعياد
لالاتطـول بالقطاعـه عليـنـا

قصيدة صفحة التاريخ


انا البسمه انا الدمعه ملامح من بقايا اثـار
انا غيمه ويدفعها الهبوب وترفض هطولـه

قصيدة صفحة التاريخ حامت في سما البحار
انا الميته انا الحيه بنعش الريش محمولـه

انا الحوراء انا الدانه انا الماسه انا المحـار
انا من عمرها ظلت مـع الآثـار مشيولـه

انا ظروفي تعاندني .. زماني قاسي وجبـار
انا لامن نويت انهض بحظي (تحرد خيوله)

اعاني وحدتي .. حلمي ابي فارس بعد مغوار
واحب الواقع الملموس وارفض كل مجهوله

رسمت البسمه العينك واخفي صبري المنهار
انا اللي مكبلـه فعـادات والكفيـن مغلولـه

انا الحلوه انا المره وطيب الهيل والمسمـار
انا كلمه ولي اعراب للـي صـادق قولـه

بقايا حزن يسكني وتنبت في ثـراي ازهـار
مزيج العطف والرقه وشذى ينساب بسهوله

امد يديني للدنيا وانا اللي احفـظ الأسـرار
دلايل طبعي الوافي قصيـدة مجـد وبطولـه

انا ابيات معانيها وضوح الشمس وسط نهار
اناغيمه طواها الريح قبـل تسيـل سيولـه

قصيدة يفزلك قلبي وعيني تفزا


أهديت لـك شـوق بقلبـي تـوزا
عبر الهبوب ويمك اليـوم حـازي

يفزلـك قلبـي وعيـنـي تـفـزا
انت الوحيد اللي للاعيـان جـازي

حبك عديم وداخـل الجـوف لـزا
باقصى الضماير في حشاي أمتوازي

لاشفت طيفك جاير الشـوق هـزا
مثل الهبوب تشيل حتـى العـزازي

أ سهر ونوم العيـن عنـي تعـزا
أ سهر تساهرني نجـوم الجـوازي

ودي بمعسـولـك قلـيـل أمــزا
أ ذوق طعم اللي مصـون حـرازي

وأناظـر عيـون تطالـع بغـمـزا
فيها سهوم الموت فيهـا المغـازي

مرزوز عمره عكس منهـو يـرزا
مطنوخ مظهر والحلا فيـه فـازي

ياللي سهومك بالحشى سـرب وزا
جرحك ترا في داخل القلـب وازي

بالأمس قلبـي فـي هواكـم يعـزا
واليوم في قربك نسيـت التعـازي

دزيت لك شعري مـع الطيـف دزا
والشوق مركـوز بقلبـي ركـازي

وزنت لك شعري على الزاي والـزا
من بنت ذيب شهم ماهو انتهـازي

قصيدة لاتغرك جلستـي داخـل مصـر


لاتغرك جلستـي داخـل مصـر
لاسليـت ولانسيتـك يالحبيـب

كيف ابسلى لو ثواني بالسفـر؟
يابعد حالي ترى ماانت بغريـب

آتذكـر بسمتـك بيـن الـزهـر
لك وصايف تمتحني يارهيييييييب

ذقت مر الهجر وانـواع القهـر
ومامنعني عنك ياكود النصيـب

الدقيقـه كنهـا حسبـة شهـر
والعنب يامهجتي اصبـح زبيـب

والعمر في غيبتك ماهـو عمـر
شف خفوقي يابعد عمري كئيـب

ايه احبك واعشقك سـر وجهـر
طيفك اللي قد خذانـي مايغيـب

مـت بـس الله ياسيـدي ستـر
والعشق لاصار متمكـن عجيـب

ماكسبت ولاجنيـت الا السهـر
والدموع اللي على خدي سكيـب

حيلة المشتـاق ياكـود الصبـر
والغلا جرحه على قلبي عطيـب

بس بعطيـك الحقيقـه والخبـر
مالي غيرك يابعد عمري حبيـب

قصيدة لاتمر وتعداني



ياحبيبـي لاتـمـر وتعـدانـي
خل عيني بس لمحـه تهنابـك

صابني حبـك بقلبـي وعنانـي
والهوى سهمه طعني من اسبابك

ياعديل الروح لاجيت من شاني
حطني في محجر العين واهدابك

الغياب اللي مع الحـزن ودانـي
جابني يمك وانا اموت واحيابـك

انت روض يذهب الهم واحزاني
روض ريف والزهر فيه متشابك

يانظر عيني لك الوجد ينحانـي
لين ياخذني ويقبل علـى بابـك

ياحبيبي هاجس الحب مشانـي
اهتني بك ياهوى البال وادفا بك

حبك اشغلني عن الكل واشقاني
والزمان ابعدك عني ولا جابـك

قصيدة شيخ الشيوخ


سلام ياللي صار للمجد عنـوان
رمز العطاء رمز الوفا والجمايل

هذاك عبدالمحسن اللي له الشان
شيخ الشيوخ اللي على كل طايل

سلام له واهديه من قلب والسان
واحساس صادق مايمحيه زايل

فيه القوافي زان طاروقهـا زان
ماهي خساره فيه بدع المثايـل

ذكره وصيته بين كل العرب بان
غير المعمر شاع بيـن القبايـل

له بين ربعه له معزه وله شان
محشوم ومقدر عظيـم الفعايـل

والأسره اللي من مواكير عقبان
كل المعمر مابهـم قـول قايـل

أسرة وفا واعتز فيهم على شان
أرفع بهم راسي بكـل الحمايـل

قصيدة فقـد موضـي / مرثية


يالله ياللي كـل مؤمـن يطيعـه
يامروي عقب المحل كل روضي

ياللي على الشده حصونك منيعه
ياللي لك المسلم يصلي الفروضي

تطفي لهايب بالضمايـر وليعـه
على فؤادي والمعاليـق توضـي

لفراق بنت العم كنـي جضيعـه
الله يصبرني على فقـد موضـي

الغاليه جتهـا سهـوم سريعـه
راضين حكم اللي علينا يعوضي

فجيعـة ياكبرهـا مـن فجيعـه
لا جابو الطاري خفوقي يجوضي

من بعدها ضاقت علي الوسيعـه
كني مجاهد فالمعارك يخوضـي

ياجعلها في جنان رب الوديعـه
في جاه من بامره بروقه تنوضي

الموت حق وكلنـا فـي طليعـه
الله يسهلها ليا جاء المخوضـي

ولخوي ابو نايف بنفس مطيعه
ارفع مواساتي على فقد موضـي

قصيدة دمع مثل نهر الفراتي


واهز قلبي هز ريـح للاغصـان
ارياح صيف عاصفات عواتـي

مما جرالي صار حالي بنقصـان
ياهل الفكر والراي ويش السواتي؟

تلعب بي الاقدار والفكـر حيـران
وصرت انتظر للي به الرب ياتـي

امشي مع الماشين والقلب نيـران
واضحك وكني هانيه في حياتـي

واحسرتي بدلت ربحي بخسـران
ولاجـدا ياكـود هـل اعبراتـي

لوتنفع الحسرات سيلت الاوجـان
وهليت دمع مثل نهـر الفراتـي

وانا ليامنه علـي الزمـن شـان
جبت القلم والبـوك والمحبراتـي

وكتبت شعر بالصعيبات لـي لان
وابديت مافي خاطري في شفاتـي

يالله عسى يوم بنـور الزبرقـان
يالله لاتقطـع رجـاي بصـلاتـي

قصيدة منتدى الزين


سلام والمبدأ على الزين بالحـد
نجما ليامن شـع غيـره تجـلا

ياثابت السيسان بالعـز والمجـد
ياموقـع بيـن المواقـع تعـلا

من جاه يشكي لوعة البين والوجد
عود بلوعـات الزمـان يتسـلا

أشم ريح المسك ويشدنـي شـد
للخاطراللي له زمـن ماأسفهـلا

يشرب قراح اللي وصل جمة العد
مثل العسل صافي وزلال محـلا

مثل البحر جزره يلاطم به المـد
وش يجذب اللي منجم ماأستـدلا

غبة بحرفيهـا مـن الدروأزيـد
ياجوهـره فيهـا عيونـي تمـلا

وهذا محلي منتدى الزين من جد
إن كان لي بين الشواهق محـلا

سلام والمبدأ على الزين بالحـد
الزين باهله لجوه رحـب وهـلا

قصيدة مجاراة لشاعر


الوايلي حيه على كيف العرب بن وهيل
والنعم فيهم من جذور الوقت قوم فالحه


والموت حق وهادم اللذات كالسيف الصقيل
ويالله تحسن خاتمتنا من الامور الطالحه


جاني جواب صاحبه مدري علامه فيه ويل
خطه غريب وفيه شي من الهوى قد لافحه


ياشاعرا ماودنا نمشي على عكس الدليل
وحتى العباده ماتصح ان ماقرينا الفاتحه


كل على مايشتهي مغرم وحاله مع خليل
والحمدلله شيمتي في ذكر ربي سارحه


والا الردي لوزان حظه جمرته وسط الشليل
والذاكره ماخلدت ذكر الوجيه الكالحه


ادعي لك التوفيق ياناصر صباح والا ليل
والعذب مسقى نيتك ماهي مياه مالحه

قصيدة (ثورة احساسي)


غريبه كيف افكر به وتمـوت لشوفتـه عينـي
غريبه كيف اهو يسكن خيالي ويشغل افكـاري

غريبه كيف احس اني هويته وصـار يعنينـي
وكيف انه غدى بوحي وحبه جوهر اسـراري

غريبه ثورة احساسي وش اللي صار وش فيني
والاغرب حالتي لما يجي عنه ولـو طـاااري

اشوفه دوم باحلامي يجـي يركـض ينادينـي
واقول آمر تدلل ياحبيبي جيـت لـك شـاري

عشقته موت وااااحبه .. وحبه حيـل مشقينـي
ولا ظني ابد فكـر او انـه صـار بـي داري

وكل هذا غلا نظره أجل لو هو محاكينـي ؟!!
وش اللي يصير باحوالي لو انه صار اقداري !

ياليت انه يبادلنـي الغـلا والحـب يعطينـي
يا ليته حس باشواقي قبـل تعلـن بالاخبـاري

وعلى كيفه يخاصمني .. يزعلني .. يراضيني
واذا يزعل علي نذر اجي له واحمل اعذاري

ابيه يكون لي بسمه .. ابـي حزنـي ينسينـي
وابيه يعرف اني فيـه دايـم اكتـب اشعـاري

وعلى الله مايجي احساسي وهم كاذب يعنينـي
وتصير احكايتي قصة وهم كاذب من افكـاري

قصيدة (( حرة أبيه يالسعوديه))


ينعـاد عيـدك ياوطـنـا وينـعـاد
تبقى منيع السور في حكم آل سعـود

شامخ بنـا لنـك مواريـث الاجـداد
بالمجـد عـزك ياوطنـا بـلاحـدود

احلا قصايـد ياوطـن يـوم الاعيـاد
تهدالك الاشعـار والشعـر منضـود

ياموطن الاسلام موطن هـل الضـاد
موطن شريعـة ربنـا خيـر معبـود

تزداد فينا عـز منـك انـت نـزداد
هيبة سمـو ونرتفـع فيـك فـي زود

فيك انتوحـد نعتلـي فـوق الاشهـاد
ياديـرة الاعـراق والعـز والجـود

ماهمنـا عـاذل وشامـت وحـسـاد
حبل الوصل مابيننـا حيـل ممـدود

ارض الوحي وارض الرساله والامجاد
طرياك عنـدي كـل ماهبـت النـود

ينعـاد عيـدك ياوطـنـا وينـعـاد
عيدك وطنا وانت في ظل آل سعـود

قصيدة ((عزوتي بني تميم اهل السيوف الصقيله))


ياناشد عنـي انـا مـن قبيلـه
فيها الكرم والمرجله والشكالـه

وابوي شيـخ مايخلـي دخيلـه
ياما عطى الملهوف من حر ماله

انـا تميميـه ولانـي قليـلـه
هلي هل الوقفات واهل الجمالـه

اهل الركايب والخيول الاصيله
عاداتهـم معروفـة بالاصالـه

بني تميم اهل السيوف الصقيلـه
واهل الوفا والطيب في كل حاله

حناخذينا الطيـب والمستحيلـه
تاريخنا فيـه العبـر لامحالـه

صلنا وجلنا فالسنيـن الطويلـه
وسيوفنـا للمعتـدي دوم عالـه

اليا خذينا كـود ناخـذ جزيلـه
وليـا عطينـا ماطلبنـا كفالـه

وجودنا من قبل عهـد الجليلـه
منذ العصور الاولـه والجهالـه

ماهي حكاوي الف ليلـه وليلـه
اعلومنا تشهـد وكافـي دلالـه

واليوم حنـا بمملكتنـا مخيلـه
شعب السعوديه يعيش بسهالـه

في ظل اخو نوره ترانـا قبيلـه
والله يديم اللي حكـم بالعدالـه

قصيدة ((لك ايامي تدق النواقيس ))


ياصاحبي بالقلـب لفـت هواجيـس
وردن على قلبـي تجـر الجرايـر

قلب على نار الغضى والمحاميـس
هاذي مواريـد وهـاذي صدايـر

مر الزمان اللي مسـوي كوابيـس
في غيبة الاحـلام ماهـي سفايـر

مايدري ان الحال مثـل الفوانيـس
دايـم يصاليهـا لهيـب السعـايـر

حظي وحظـك ياحبيبـي مناحيـس
واحـد بنـا واحـد يهـد العمايـر

وهموم بعدك في ضميري جواسيس
داخل فؤادي مثـل كـي الشرايـر

تعال خـل ايـام عمـري توانيـس
عقب البطا ومفـارق كـان جايـر

ياللي لـك ايامـي تـدق النواقيـس
ذكرى لهـا عينـي تهـل العبايـر

وين انت تلعب بي هواجيس وابليس؟
يالله عساهـا مـاتـدور الـدوايـر

قصيدة (( تجلا الليل وراح الهيامي))



يوم يمر بدون شوفـك وطاريـك
يصبح علي الصبح كنه ظلامـي


ربيع قلبي يوم اشوفك واناجيـك
واعطيك واخذ منك حلو الكلامي


يفـز قلبـي وآتخيـل مواريـك
وافز لو انـي بحالـي منامـي


انا عليله منـك مافيـه تشكيـك
حبك لجا بين الضلوع الهشامـي


يزورني طيفك وبالحلم انا جيـك
وليا تجلا الليـل راح الهيامـي


مهما يطول البعد مانيب ناسيـك
منساك ياغاية منـاي ومرامـي


يانور عين اللي من القلب مغليك
ياروح روحي ياهواي وغرامـي


لاتطول الغيبه ولك ناس ترجيـك
بين الرجا والياس ترجف عظامي


قلب خذيته يابن الاجواد بيديـك
إرفق بخفاق طـواه السقامـي


يابعد عمري ياعسى الله يخليـك
طال السهر عقبك وطال الظلامي

قصيدة (صابني سهم العيون)


يوم هدف صابني بين الضلوع
احسب انه ضربته يخطي بها

صابني سهم العيون اللي تلوع
عزتي للي يطيـح اصويبهـا

العيون اللي تقل فيهن فـزوع
يرمن اللي بالنظر يهوي بهـا

كن لاقاني بهافـارس بتـوع
سهم عينه بندق يرمـي بهـا

ما جرالي في مسا يوم الربوع
لحظة وادفـع ثمـن تعذيبهـا

آتذكر شوفته بيـن الجمـوع
ساعـة شفتـه بهـا ياطيبهـا

قلت يازين الوصايف والطبوع
زين معكم لحظة نسري بهـا

ساعة نلقاك والعالـم هجـوع
ماهقيت ان البخت يحري بها

طالبك لاتحرق القلب الولـوع
المحبـه ماتحمـل ريبـهـا

لاتصير بحب من حبك قطوع
ساعة اللقيا فلا تبطـي بهـا

قصيدة ~ياقريب لخيالي


ناض حرفي على ذاك الغـلا بالنشيـد
قلت اسمع شعوري فيـه كـل العبـاد



لوتبعدت عن عينـي غرامـك يزيـد
ولك مكانه على المعلوق وسط الفـواد


والله اني لا احبك لـو يطـول المديـد
ولو يطول غيابك خـذ كـلام الوكـاد


انت عندي عزيز وفي عيونـي فريـد
ماتحمل غيابـك مـا لصبـري جـلاد


كثر ما انت العنيد اللي برايـك عنيـد
وكثر ما انت الصعيب اللي براسك عناد


ياقريب لخيالـي وانـت عنـي بعيـد
كم تحملت من جـور العنـا والبعـاد


يابعيـد المسافـه يالقـديـم الجـديـد
كل يوم جروحي في ضميـري جـداد


ارهن النفـس ياحبـي علـى ماتريـد
لـك خفوقـي حـلال تملكـه بالـوداد



انت داي ودوايه واقرب مـن الوريـد
محرم عين حورا مـن لذيـذ الرقـاد



دام قلبي وعيني جبتهـن لـك قصيـد
قربـي يالمسافـه واحكمـي بالحيـاد


المسافه بعيـده مـن هـو المستفيـد؟
مشكلـه ندنـا يابعـد عمـري جمـاد


الله انه يجيب اللـي مثـل يـوم عيـد
شوفتك ياهوى بالي هي احسـن اعيـاد

قصيدة ~زاد الشبرمي للمجد مجد عظيم


الليله الفرحه بها نصـدح وللـرب الكريـم
نسجد ولانسجد لحد غيـره وهـذا كارنـا


الشبرمي فاز وتحقـق ماتبـي منـه تميـم
والفوز حققنـاه والبيـرق غـدى شعارنـا


مبروك فوزك يالتميمي من رجال ومن حريم
واكتملت الفرحه علينـا صغارنـا وكبارنـا


هاذي فعايلنا وحنا نضرب اوساط الصميـم
مانقصر الخطوه ليامـا يكتمـل مشوارنـا


الله خلقنا نطلب العليا مـن الـدور القديـم
افعال اهلنا الماضيه مصدر فخر حضارنـا


واليوم زاد الشبرمي للمجد في مجد عظيـم
خليل خلانا من الفرحـه تطـول اشبارنـا


كل القبيلة صوت واحد خلف شاعرنا العديم
نعزف على مجد تليـد ماانحنـت اوتارنـا


مبروك لك ياحامل البيرق ويالفكـر السليـم
حققت مـالا حققـه غيـرك وهـذا كارنـا

قصيدة - اللي عصر كفيه توت


يرتبك في خاطري صوت السـؤال
والسؤال احيـان مايحتـاج صـوت


فيه صوت وفيه قيـل وفيـه قـال
وفيه فكـره كـل ماجتنـي تمـوت


بس من موت الشعر تحيـا ظـلال
والظلال اللـي تظللنـي بيـوت00



حـد علمـي بالزعـل والأنفعـال
يجعل الروض الخضر كنه خبـوت


بـس والله مـن عرفتـه واللـيـال
كنها تفهـم جوابـي فـي سكـوت


صـارت الدنيـا محبـه وابتهـال
صرت طامع في لقا حبـه وقـوت


صاحبي واخترت حبه فـي حـلال
صاحبي يا زين شكله ف البشـوت


لا هواللي مـن قريبيـن المنـال0
ولاهو اللي ضاع ليله فـي بلـوت


عارف(ن) قدري ويدري بالخصـال
زانت افعاله وزانـت بـي نعـوت


صارحبـه وسـط قلبـي بالشمـال
واهتنـى قلبـي ومابالفـوت فـوت


صرت اقول الشعر واسرح في خيال
والهواء في طاعتي مثـل الربـوت


البس اوراقه نهـار القيـض شـال
ويلبس اوراقي بليل البرد كووووت


واهنـي اللـي سقيتـه مـن زلال
واهني اللي عصر كفيه تـوووووت


صـارت ايامـي سعـاده واحتفـال
والسبب نظره علي كيف الريموووت

قصيدة - غيمة حزن


غيوم وحـزن لابـارق ولاراعـد ولاهتـان
عسي حزن جرالي يوم اسمـع فيـه يجرالـك

وعسى قلبك يحس انه بظلمه قد قتـل انسـان
ملكته واخلص لقلبك خسرتـه سبـة اهمالـك

قتلت بذنبك افراحك وصارت فرحتك (جثمااان)
وهذاني فيك اتشفـي جـزاك بسابـق افعالـك

تموت اليوم لفراقي انا ادري بغيبتـي ندمـان
ابد مشغلت بك بالي وانـا دايـم علـى بالـك

لأني مخلصه بطبعي وطبعك للأسـف خـوان
وشالك قلبي الوافـي وخنتـه بعـد ماشالـك

تبيني وانت طاعني تجيني كن شي مـا كـان
تبي آسامحـك وادمـح (وعـزي) ماتهيالـك

وكيف انسى انا قصة خيانـه للغـدر عنـوان
محال اني اصـدق بعـد هـذا تافـه اقوالـك

ياهيه ارحل عن دروبـي بـدل والله ماتنهـان
هبيل تفكر ارجـع لـك هبيـل بقمـة هبالـك

غيوم وحـزن لابـارق ولاراعـد ولاهتـان
عسي حزن جرالي يوم اسمـع فيـه يجرالـك

قصيدة - سبة ضياعي


مال الجزا والهجر يازين داعي
ولالي على فرقاك صبر وجلاده

جيتك هوى جيتك غلا واندفاعي
وزداد فيني شوق سكر زيـاده

فليت في بحر المحبه شراعـي
وازريت عن حر الدهر وارتياده

ياللي جفيت ومن سببك التياعي
الله حسيبك مامشيـت بهـواده

اقفيت وعيوني لزولك تراعـي
وجزيت من يغليك زود ابتعاده

اسقيتني ياشوق سـم الافاعـي
وخذيت فيني بالتعسف شهـاده

خسرت فيك وبان فيك انقطاعي
واللي زرعته مااهتنيت بحصاده

ومن دونك الايام تلوي ذراعـي
ومرت علي ايام حزن ونكـاده

حسيت من فرقاك سبة ضياعي
ماينفع المخلص كثير اجتهـاده

ياويل حالي من نهار الوداعـي
مع واحد ولـع بقلبـي زنـاده

نم ياهوى راحت جميع المساعي
النوم لك مادمت ظالم .. عبـاده

قصيدة - اشفيت قلبي في يدينك تداويه


يالله ياسامـع نـدى مـن يناديـه
عطفـك ولطفـك يـاالاه العبـادي


يـارب شكـرك لازم انـا نبديـه
وذكرك وبك نبدا على كـل بـادي


ياخالـق المخلـوق عـلام مافيـه
ياعالم اللـي لـك يكنـه فـؤادي


يالواحداللي مايخيـب الرجـا فيـه
بك يستفيظ السيل مـع كـل وادي


منك المطر يسقي الصحارى ويحييه
ويخضر به قاع محيـل وكـادي


انـا رضيـت بماكتبتـه وتنويـه
والشكر لك ياللي عليـك اعتمـادي


مرت بي ظروف صعيبـه ولافيـه
غيرك يعافيني أيـا خيـر هـادي


اشفيت قلبي فـي يدينـك تداويـه
ولك ببتهل يارب وانـت استنـادي


ثم ارفع التقديـر والشكـر يتليـه
واهديـه للشعـار ورد وكــادي


لهل الوفا واللـي تنومـس مباديـه
وللي نشد عن حالتـي باجتهـادي

قصيدة ~جريح الغرام


جريح الغرام اللي طواه الهوى واشقـاه
وش علاج جرحه دام للجـرح ماريـه


شكيت الهوى واثر الهوى ماله مـداواه
صويبـه يطيـح وعلتـه دوم مخفيـه


تجيه االأطباء والـدواء ماقـدر بشفـاه
يقولون مالـه طـب حالـه غراميـه


وانا اضم جرحي واعذابي واعرف دواه
دواه الحبيب اللي ذبحنـي وانـا حيـه


يطيبن جروح القلب في شوفـة محيـاه
وتزيد الجروح ان كان له بالهجر نيـه


وانا اجر صوتي والحق الصوت وويلاه
سطابي غرامـه دون رحمـه وماويـه


نسى كـل مابينـي وبينـه وماذقنـاه
من احلـى ليالينـا ولحظـات ورديـه


نهايه ومن عقب السعاده على المأسـاه
ليالي السعـاده روحـت مالهـا جيـه

قصيدة ~سامرات النجومي



وش هالجفا يامحرق خافقي حيـل
عليك اسامـر سامـرات النجومـي


الليـل متعبنـي و يامطـول الليـل
وان بان نور الصبح ضاعت علومي


سمعي مجنب من هروج العواذيـل
وانت الهجر صار لك طبع وسلومي


يامعذب قلبـي عقـب زود تدليـل
ليه الجفا والحب صـار مهزومـي


اقفـت ليـال افراحنـا والتعاليـل
شقاي من صدك على القلب يومـي


اوماي قشع به نسيم الهـواء ميـل
جفـت عروقـه وقتفـاه السمومـي


وقت مضى يالعذب جا فيه تبديـل
عقب السعاده صار كلـه همومـي


تبـدل ايـام الفـرح والهلاهـيـل
صار الفرح طير بالاجوا يحومـي

قصيدة ~فلسفة شعر


بنت عـز شامخـه بنـت الرجـال
عز اهلها مو علـى لبـس البشـوت


انفصال الكون هـو عكـس اتصـال
والعنب يبقى عنـب والتـوت تـوت


الحـلال يبيـن يـا ولـد الـحـلال
من على نهـج النبـي يالله الثبـوت


فلسفـة ابيـات شـعـري لاتــزال
وانت يا(ابن الناس) مالك بي شمـوت


تدري ابياتـك عبـث لعبـة عيـال
ما انت سعدون .. وانا ماصرت نوت


بالمثل00 حبيت اوضـح لـك مقـال
والشعر عسفه سهـل ماهـو فلـوت


لاتقارنـي باحـد يـابـن الـحـلال
فيني جـزال القصايـد مـا تمـوت


شعـر بخـوت المثالـيـه لـحـال
والا انا الحوراء وبخـوت البخـوت


انفصال الكون هـو عكـس اتصـال
والعنب يبقى عنـب والتـوت تـوت


بنت عـز شامخـه بنـت الرجـال
عز اهلها مو علـى لبـس البشـوت

قصيدة ~صخـ أنثى ــب


فيني صخب انثى و كرم حاتم الجود
وفيني صلافـة شاهقـات الجبالـي


القلب يعطي والعقل يمنـع الـزود
اخاف ربـي مـن وزار الثقالـي


ويميـن ربـي مابعـد ربنـا زود
يا انك بقلبـي ومسكنـك بالعوالـي


ان قلت ببعد فانت بالقلب موجـود
سلواي طيفك لانوت بـي الليالـي


خبرت من خلي تواصيف بركـود
متواضع طبعه و لا هـو متعالـي


يامر وينهى وسط قلبي لـه شهـود
و احترت أميز بين مر و حالـي


ومادام لك عندي مواثيـق وعهـود
عهد الغلا مابيـن غالـي وغالـي


اقلط مكانك داخل القلـب موجـود
وخلـك بقلبـي شامـخ كالجبالـي

قصيدة ~ الغدر والمظلمه


الغدر والمظلمه ماهي جديـد
الجديد حروف تنكر حبرهـا


والهوى اللي ولع بقلبك قصيد
ولع النيران واطفى جمرهـا


لاتقـول ولاتعيـد ولا تزيـد
خذ مقاديرك وسلـم بامرهـا


كل من ترمي بقلبـك للبعيـد
عمرها ماجت ولاجت عمرها


خلك بدنياك تطمـح للمزيـد
قايض الايام وادفـع سعرهـا


ومن عيوبك حاول انك تستفيد
واعطي الغلطه دروس لعذرها


ياعسى يبقى لك الحظ السعيد
والليالـي تلتقيـك بفجـرهـا

الحب يلي تغنـي


الحب يلي تغنـي سكـر ستـاره
مالك ومال الهوى والحب والذكرى


هذا وليفي حبيب القلب و انـواره
لأجله نظمت القوافي شعر ونثـرا



عليه قلبي يحن ويكسـر اسـواره
اكتب مشاريه حبي والمـلا تقـرا


يا ليتني في ضواحي حارته جاره
واشوف زوله ولو الخلق بي تزرا

قصيدة ~لا ماكتبت الشعر شهره


لا ماكتبـت الشعـر شهـره ونومـاس
لكـن كتبتـه مـن خفـو ق يعانـي

صغته على وضح النقاء بروح واحساس
والجـرح ينـزف والزمـان ابتلانـي

والبال مـن كثـر التفاكيـر محتـاس
والهـم خيـم والامــل مااحتـوانـي

همـي بقلبـي زاد ويـدق الاجـراس
يعلـن تحـدي يـوم وقتـي حـدانـي

والوقت قاسي والزمـن كلـه اتعـاس
لوجيت اقـاوم كيـف حزنـي قوانـي

حزني كبيـر بداخلـي مالـه اقيـاس
وقتـي يعذبـنـي ومــره سقـانـي

لكن ابا اصبر والصبر يطـرد اليـاس
لوكنـت فاقـد كـل عطـف وحنانـي

لابـاس ياقلبـي ولا بـاس لابــاس
اصبر على جـور الدهـر والزمانـي

قصيدة - شاش راسي للتميمي وحق انه يشوش


شاش راسي للتميمي وحـق انـه يشـوش
وطشت اليمنى لثـام القوافـي فـي تميـم

حي ابن فارس وحيه وحنـا لـه جيـوش
شاعـر مثـل قبيلـه وشعـره فالصميـم

عن تميم ينوب وينـوب وبيوتـه تهـوش
فالمواقف كلها صـار لـه فعـل عظيـم

يوم ابن فارس تغنى مشى بيـن الرمـوش
سيد مـن سـاده اكـرام جابـوا للكريـم

للحلم قوم وللحكم كـم سـادوا عـروش
و للمعالي في مضر جال في راسه جحيـم

لركبوا بالخيل ذا يـوم تجهيـز النعـوش
لغضبوا شر اتقوا شـر غضبـات الحليـم

لابتي ون صاحت الحـرة بيـوم غبـوش
لمت الثوب الخضر منهم روضـة خريـم

لا بتي تكفون خلوا الرسايل مـوش مـوش
للتميمي لين يشكـي مـن الوبـل الاديـم

شاطي الراحة من الفزعة اليوم (ا) مخروش
الرسايل مـن تميـم وكـل ارض تميـم

قصيدة - فــــــــــزة خفوق الطير


لا تعطي الشمات وجه و تخليـه
يغتال فرصـه بالشماتـه علينـا


ما تلحق النفس الشقيـه مشاريـه
اطلب وفي ما تطلبـه حاضرينـا


قلب يحبك ما اختلف عن مباديه
الا علـى فرقـاك دايـم حزينـا


اسمك ليا جاني مع الناس طاريـه
افز فـزة مـن طـواه الحنينـا


فزت خفوق الطير مع حس راعيه
ولاجفـول ذيـرت بالبطيـنـا


يا شمعة عيون نظرها تضويـه
لك انت وحدك مالـك مشاركينـا


والله لـو تدخـل لقلبـي تلاقيـه
مطبوع فيه اسمك ورسمك يبينـا


بيتك بصندوق الضماير مسويـه
اسكن فؤادي كل وقـت وحينـا


ان ماسكنته نلحقـك بالمشاريـه
كانك نسيـت الحـب لا مانسينـا


حنا على عهدك وحبـك نداريـه
لا تطول المشوار عـود علينـا

قصيدة - يذوب الثلج فـاعروقي


كتبت البارحه حرفي وحرفي من غلاك يزيد
ابي تمطر على قلبي سحابه منـك تسقينـي

كتبت احلا القصايد والغلا يـزداد بالترديـد
احبك واعشقك واهواك مـا ظنـي تكفينـي

لانك لي فرح بكره وبكره فيك يصبح عيـد
لانـك بالهـوى تقـدر تفرحنـي تبكينـي

حبيبي انت تعجبني ترفق بي وزيـد وزيـد
لاني ذبت فـي حبـك وانـا ودي تدفينـي

يذوب الثلج ف/ اعروقي ويبقى للقاء تجديد
غيابك ياحياتـي يـوم يتعبنـي ويشقينـي


احبك حب مايوصف اموت بشوفتك واعيـد
ملكت الـروح ياحبـي دخيلـك لا تعنينـي


اعبر عن شعوري ماعليه من زمانـي قيـد
تعبت اكتم احاسيسي ابيك اليـوم تروينـي

قصيدة - العشقـــ نوع من الجنان



احترق من شان حبه وحبه لـي حيـاه
واعشقه بجنون والعشق نوع من الجنان

لو يغيب سنين وشهـور قلبـي مانسـاه
صار اله في داخل القلب منزال ومكـان

كن عشقه روض والروض يهنى من لفاه
تجتمع فيه الخزامى وزهـر الاقحـوان

يامر وينهى حبيبي وانا روحـي فـداه
الله اللـي ميـزه والمحبـه عنـفـوان

سقت له صدق المشاعر وتاهت في هواه
وصاحت جروحي تنادي وتطلب للحنان

اشعر اني املك الكون في ساعـة لقـاه
واعترف بالحب واقول احبك من زمان

ون نطق ون قال احبك وقالتها الشفـاه
اتلعثم وارتبك وقـت ويحيـر اللسـان

قصيدة - هيــه يالمرسولــــ


هيه يالمرسول خبر مـن غبنـي
علمه بأن الهجـر زاد اهتمامـي

قله انه لو يغيـب اليـوم عنـي
في خفوقي مكتسب كل احترامي

واعذابي كـان الايـام ابعدنـي
عن دياره واستمريـت بهيامـي

آتمنا بـس وش جـاب التمنـي
الاماني ما يمس بهـا الحزامـي

جيت طالب للحنان وخاب ظنـي
لوعة الحرمان يدفعهـا غرامـي

صابني رمشه وفي حبـه فتنـي
يوم شفته ماقدرت اجمع كلامـي

الله اكبـر كـان الايـام اقبلنـي
واقبلت دونه جموع بزدحامـي

اتصبـر دام الايـام اجبـرنـي
فيه امل لو غاب له عشرين عامي

قصيدة - رعـــــــد الحيــاء


عسى رعد الحياء ينساق غيمه
ويرزم بالمطر في دار خلـي


ويحيي قلب عروقه هشيمـه
بعـد ودان خيـره يستهلـي


ثلاث اسنين وجروحي اليمـه
ودمع العيـن لفراقـه يهلـي


سهرت الليل و الغربه ظليمـه
و لا به شـي فالدنيـا يسلـي



شربت المر وضلوعي حطيمه
وشوفه ياعيونـي ماحصلـي


على جمر الغضى كني مقيمه
وبعده يحرق الـروح ويتلـي


حبيبـي كننـي بعـده يتيمـه
تبل دموعي الريضـان بلـي



غيابه يتعب القلـب ويضيمـه
وسمايه تنتظر نجمـه يطلـي

مرثيتي والدي - رحمك الله


الحزن يمي سـاق يمـي ركابـه
حكم القدر ماعنه صده ومجنـاب

صفقت كف بكـف لا واسفـا بـه
وماكان في عيني من الدمع صباب

دمعي نثرته مثل وبـل السحابـه
عند الوداع ودمعتي ماتت غيـاب

حزن الملا يلوح لي فـي غيابـه
اجول بالذكرى على كيف ماطـاب

سمعت في صوت النخيل انتحابـه
اذكر ليا من شافني فـز ترحـاب

اشوف كـل الـدار عقبـه كآبـه
كن المزن واقف ويبكي على الباب

البيت مـن عقبـه تناسيـت بابـه
السور طاح وباقي البيت منصـاب

غاب الفرح عن ناظري في غيابه
مات الصديق ومنزله يرجي احباب

سيارته صـارت عليهـا الغرابـه
يقطع توالي هالزمن ماله اصحاب

هذا طريق الحق كل مشـى بـه
تفنى العزوم وطارد الوقت ماجاب

ياعز من جـاه ولجـى والتجابـه
يلبس من البيضاء ليا قام جلبـاب

قصيدة - لفـــــــــــت بي الدنيا بوقت


الصبر له مفتـاح والوقـت قاسـي
مابين نار وغـار والفكـر محتـار


ماكن حولي كـل ربعـي وناسـي
كني وحيده والزمن صـار غـدار


لفت بـي الدنيـا بوقـت قياسـي
وحترت بين علوم وحلـوم وافكـار


وقدرت اقاومهـا بحلمـي وباسـي
بايمان قلب حافظـآ كـل الاذكـار


تغلبت نفسـي علـى طـرد ياسـي
في قوة ايماني وعزمي والاصـرار


يالله يامثبـت جـبـال رواســي
يا عالم كـل الخوافـي والاسـرار


إنـك تجنبـنـي دروب المـأسـي
وتحمي نفوس الخير من كل الاشرار


وتظفي علي ستري وستري لباسـي
وانا عزيزة قوم في كـل الاقطـار


أهلي تميم العـز نبعـي وساسـي
اللي يدوسون الصعايب والاخطـار


وانا الاصيله دوم مرفـوع راسـي
ويكبر شموخي في معـزه ومقـدار

قصيدة قلبي مغرم ومفتــ ون


اسهر واعانـي والخلايـق ينامـون
من سبة اللي فـي غرامـه بلانـي

يتـل قلبـي دون رفـق ولاهـون
مـزع معاليـق الخفـوق وطوانـي

لاشفت زوله طحت قمت اطلب العون
وان صابني في سهم حبـه رمانـي

قرم وفي فيـه الوسامـه ومزيـون
اصله عريـب بكـل شـي دهانـي

قلبي بحبه صـار مغـرم ومفتـون
وعينـي لغيـره تبتعـد ماتـدانـي

حبيب قلبـي لـه محبـه ومكنـون
حبي خفـى واعلنـت حبـي بيانـي

ماطـاوع الحسـاد واللـي يعذلـون
حبـي وحبـه سامـي بالمعـانـي

ياعزتي لي كان هو غـاب تكفـون
ضاع الامل بيـن الرجـا والأمانـي

الحال ياهل العرف من دون في دون
الحب صعـب مايجـي بالهوانـي

والله لـو جابـوا بدالـه ترلـيـون
واتبدلـت احزانـنـا بالاغـانـي !

ماريد انـا غيـره وغيـره يولـون
على غرامه قـد عطيتـه ضمانـي

قصيدة ابعد فـــ مان الله


كانه تغلـي ياهـوى البـال قلـي
وكانه صدود اللي طرالك وقفيـت


لرضاك كلي جيت واجفـاك كلـي
كانك عقب ذاك الغلا ذاك صديـت


وكانه تغلي خـل عنـك التغلـي
تعال صارحني علـى ماتماديـت


والله لو ان الحـب لعـب وتسلـي
يمديـك يالغالـي بحبـي تسليـت


مير الهوى سلمه ماهـو بالتخلـي
سلمه وفا واخلاص من غير تشتيت


تذكر كلامـك يابعـد كـل ملـي
وش غيرك عقبه وبالصد باديـت


ياللـي لمعلـوق الضمايـر تتلـي
تليـت خفـاق المعاليـق تلـيـت


وابعدت عنـي وانتهجـت التبلـي
صدقت انا لـك بالمحبـه ووفيـت


مير انت يالغـدار م نتـاب حلـي
ماني مسامحتك ولا لـك تمنيـت


ابعد ف مـان الله مابـي التسلـي
عمر الزمن مايجمع الحي بالميـت

قصيدة الحوراء بنت نجد \\ مجاراة ناصر بن قزلان



فصيدة / الشاعر ناصر القزلان



ان كان للشعـر التميمـي سفيـره
بنـت تمثلنـا بـكـل الميـاديـن

من غيرها هي شاعرتنـا الاميـره
اللـي قصايدهـا تهـز الملايـيـن

مثل الرعد لاحـن توحـي هديـره
على النقاء والعز والمنهـج الزيـن

شيهانة في راس هضبـه عسيـره
ماحولها الا الغيـم بيـن الشياهيـن

مادوجـت مثـل الغنـم بالحظيـره
يديرها سرحـان والنـاس غافيـن

باشعارها تقـدح معانـي خطيـره
ماهي سواليـف الغنـج للشياطيـن

قصيدهـا مـن راس ماتستعـيـره
ماتشتريها مـن حـراج المواعيـن

يوم الشعر بلـواه صـارت كبيـره
يزبن على الحوراء ويلقى العناويـن

يلقى جزيـلات البيـوت الشهيـره
دوك اسمها يختال بيـن الدواويـن

بنت لها في صفحة المجـد سيـره
هذيك ( حوراء نجد ) بنت السلاطين

تاج الشيوخ ونعـم ذيـك العشيـره
ال المعمـر راجحيـن المـوازيـن

مركز قوى في وسط شبه الجزيـره
من يفتح التاريـخ يلقـا البراهيـن

امجادهم سطـوه وشيمـه وغيـره
مكانهم حاجب تعلا علـى العيـن

يوم الملاقـا بالسيـوف الشطيـره
والحكم باقي في يديهـم لـه سنيـن

الطيـب فيهـم مايحاسـب وزيـره
بالجود والرحمه وحـب المساكيـن

حل المجال وقلـت كلمـه قصيـره
لاطالب فزعه ولا مشتكـي ديـن

لكن كلمـة حـق وسـط السريـره
كتبتها مـن قلـب حشمـه وتثميـن

تصيب والا جعـل بالامـر خيـره
وادخل على الله من عيون الحسودين

هذا زهـر شعـري لفاكـم عبيـره
جمعتهـا مـن ورد كـل البساتيـن

اهديتهـا لعيـون بنـت ستـيـره
الوافيـه بنـت الرجـال الوفيـيـن



،،،،،،،،،،،


قصيدة الشاعره الحوراء بنت نجد مجاراة الشاعر ناصر بن قزلان..






يا مرحبا عـد المـزون الغزيـره
ترحيبة من خافقي تقضـي الديـن

من صدقها تجبـر قلوبـن كسيـره
ومن حلوها مثل النفل والرياحيـن

تخص زيـزوم الامـور السفيـره
ناصر ولد عمي عـذاب المعاديـن

ياعزوتي يامـن لكسـري جبيـره
ياعضدي ان تاهت علي العناويـن

ياسيفـي البتـار وقـت المغيـره
ويارمحي ان صارت هقاوي وتثمين

خصيتني بالشعـر وانتـه خبيـره
وعزالله انك تـاج كـل المواليـن

شعرك مثل وردن شـذاه وعبيـره
في داخل الحوراء عمرله بساتيـن

ياولد عمي لـك مشاعـر جديـره
تعجز على غيرك وقولك براهيـن

في سلمنـا تبقـى الكبيـره كبيـره
والشعر اله نقاد ماهـوب تخميـن

والعفو بالتأخيـر يابـن العشيـره
وضع السفر يحكم علـي بقوانيـن

مشغولـت مابيـن ديـره وديـره
مسافره ماكنت فـارض الحرميـن

واليوم جيت وحيرتي غيـر حيـره
حيره عساي ارقى بـردي لغاليـن

لانك ومن يعلـم خفـي السريـره
احرجتني في رد طيبتـك والديـن

لعل سيف الطيـب يشهـد جفيـره
وارضيك لنك من له الطيب يدعين

قصيدة - امطر لا صــ رت لي جو


طيفك لفاني يوم خلـق الله امسـو
وسهرت ليلي والسماء كلهـا ديـم


امطر علي وهات لاصرت لي جو
روحي لك المضياف روحك معازيم


في طلتك مانيب محتاجـة الضـو
ليلي شتاء ممطر وانا بالدفـا اهيـم


معاك احس بمتعـة الديـم والنـو
وتغني افراحـي شمـوع وترانيـم


كل شي بوجودك خيالـي ومحلـو
وطعم الحياة مغرق بشهـد تسنيـم


كن الحيـاة بغيبتـك بـور وخلـو
وعنوانهـا هـم ومذلـه وتحطيـم


من منبع اشواق الغـلا اقـدع ورو
واشرب حناني واحمني لوعة الضيم


يا اطهر ذنوبي ماتبي بالحشا سـو
مالك سوا حـب ومهابـه وتسليـم

قصيدة - يالعاصمه فزي على شان سلطان


ياالعاصمه فزي على شان سلطان
خلي طوارف نجد ينبت زهرهـا

ومع فزتك حبي على راس سلمان
في غيبته عينك تداعى سهرهـا

بقدومهم فرحه وتوديع الاحـزان
كل النفوس انزاح منهـا كدرهـا

والمملكه بحظورهم شانها شـان
حقيقـة ماحـد بربـي جبرهـا

والمزن جادت في لذيذات هتـان
لين الريوف افنت مدايد دهرهـا

والقاف غنى له بعذبات الألحـان
صعب المعاني لجل عينها سبرها

سلطان مسعد كل جايع وظميـان
عز الموالي والمعـادي دحرهـا

ياحظنا به يوم شـرف للاوطـان
إي والله انـه لليالـي قمـرهـا

وانه برب الكون ما مثله انسـان
والشاهد ان القاع غطرف زهرها

قصيدة *يالله تبلغني خبر *



ابطيت ماجاني خبـر
يالله عسى وصله قريب

اصبر وياطول الصبر
كله من فراق الحبيـب

لوهو نزيل في قبـر
ابكيه فجر مع مغيـب

مير البلا جف الحبـر
لليوم ما عنه مجيـب

الموت له عني شبـر
ولا والله يفيد الطبيـب

كسر العظم يلقى جبر
كسر المحبة مايطيـب


أكبر وحظـي ماكبـر
كنه على الدنيا غريب


آخذ دروس ولاأعتبـر
والكون في عيني كئيب


يالله تبلغنـي خـبـر
لعل يبرا بي عطيـب

فنـــ الخطــابــ


لاتباطاني تـرى طبعـي ثقيلـه
بنت ناس ومن عزيزين الجنابـي



المحبـه ماتجـي يـوم وليلـه
والرزانه للهوى ستـر وحجابـي



والصبر لوصارت المده طويلـه
تنحمد عقباه لو كبـر المصابـي



وانت ياوجه الزمن ماجيت غيله
جيت واضح ماعلا وجهك ضبابي



لوتحداني على ظهـر الاصيلـه
والله ان ارميك في شلفـا ذيابـي



بنت فرسانآ ومن سالـف قبيلـه
يعربيـه ماتخـاف ولاتهـابـي



كود من ينجي من الشده دخيلـه
الله اللي من لجـا لـه مايخابـي




ويانديـم ضيعـه عنـي دليلـه
ضاع عني وانتحا كنـه سرابـي




لاتحداني تـرى حالـي نحيلـه
لكن اني مـن قوييـن المهابـي




خل وقت العولمه لاتنتـوي لـه
رح تعلم بالهوى فـن الخطابـي