الشاعر عبدالله بن عبدالعزيز العليوي السبيعي - رحمه الله -

ولد في القَصيم "في مدينة عنيزة" عام 1373هـ
تلقى تعليمه الإبتدائي والمتوسط في مدينة عنيزة ،‘
وتخرج من ثانوية عنيزة العامة من قسمها الأدبي .
ثم التحق في بداية عمله الوظيفي بأحد البنوك الوطنية
و عمل مشرفا ثقافيا في أحد الأندية الرياضية بالقصيم .
توفي يوم الخميس 25/12/2003م .


بدأت معاناة الشاعر عندما اصيب بفشل كلوي ومن ثم بجلطة اقعدته عن الحركة سنوات
وبقي هذا الشاعر متواجد رغم امراضه في الساحه الشعريه حتى رحل عن هذه الدنيا بصمت .
وكان يغلب على قصائده طابع الحزن والألم ،‘
ولم يصدر للشاعر سوى ديوان وآحد تحت عنوان "بقايا شوق" ~ .
ضّم أكثر من 72 قصيده ~ وقد طويت بـ موته صفحه من أهم صفحات الشعر ~
وهذه بعض قصائده رحمه الله

أنا تعلمت الجفاء مـن تغليـك
ومن المذلة والخضوع انتهينـا
من كل قلبي يشهد الله ناسيـك
غير الضياع بحبكم وش لقينـا
ابحتفظ في عزة النفس مابيـك
بالناس نلقى اللي نبيه ويبينـا
مما معي زينت للنفس ماضيـك
في درب حبك ليتنا ما مشينـا
هديت عرش الحب يازين بايديك
من بحر حبك بالنجـاة اكتفينـا
ذاب الحنين بعين قلبٍ تراعيـك
مثلك على النسيان والله قوينـا
أنهيت قصة حبنا فـي تغليـك
أمسح دموعك بالجفاء ما بدينا






خلاص لا ترجع ترانا سلينا..
ماكنت اصدق يوم اني انساك
في بعدكم ياما عليكم بكينا ..
واليوم ما تطري على البال ذ****
وانا ادري انك رغم صدك تبينا..
لا شك ناس ضدنا تقصر خطاك
خل الذي غير حنانك علينا..
يعطيك من قلبه ربع ما عطيناك
من سكرة الحب الصناعي صحينا..
حتى المجالس عفتها خوف طرياك
ودعت ماضي حبنا وانتهينا..
وقلب نسيته يوم لابد ينساك
ذ**** ياالغدار هانت علينا..
حتى دموع العين فرحت بفرقاك
حب جديد غير حبك لقينا..
حديتني جعل الليالى تحداك!!






وين أنت يا مشكاي عيني مشقـاقة
في حب خـلٍ دمعتـي يـوم عيـده
ودي بنسيانـه ونسيـان مـافـات
وابدا من أول فـي حيـاة جديـدة
وأقول ياقلب الشقـاء حبنـا مـات
ميـر الله أقـوى ذكرياتـه عنيـده
يخطي واسامح وأذرف الدمع بسكات
نفس الخطا فـي كـل يـوم يعيـده
أدري لقلبه في هوى الغير نوهـات
وما كل نفس تأخـذ اللـي تريـده
ما تبعد الغالين ... طول المسافـات
جسمي بعيدٍ عنـه والقلـب بيـده







ياللي تناسيـت العهـود الوثيقـة
ماعاش من قبلك بدنيـاه مرتـاح
لابد من يـومٍ وتلقـى الحقيقـة
تشوف لوعات الزمن كيف تجتاح
وتعود لي طيـرٍ مضيـع فريقـة
وأقول يا غدار عهد الوفـاء راح
تغيرت حتـى الوجيـه الصديقـة
والقلب الأبيض أصبح اليوم سفاح
يا ما تحملـت الجـروح العميقـة
والشوق بعيوني الا أقفيت فضاح
فيما مضى روحي بحبك غريقـة
مثل السفينة بالبحـر دون مـلاح
واليوم أنا قلبـي تغيـر طريقـة
مايرجع الماضي بالأعذار يا صاح
في خاطري عبرات هـمٍ وضيقـة
وشلون مات الحب في عز الأفراح

حاول تقدر موقفي لـو تكرمـت
من شان ماض راح تسمع دفاعي
قبل الزعل ليتك لوضعي تفهمـت
ما بيننا عشرة عمر لو تراعـي
تراك في حكمك علينا تسرعـت
خلك حليم ولا تصيـر اندفاعـي
كان الخطى مني فأنا لك تعـذرت
قلبك عطوف و ما يسرك ضياعي
دامك بقلبي من إسنين تحكمـت
ما شوف لهروج تجي منك داعي
كل الهموم أنساه لا مـن تبينـت
أهواك أنا مهما تكون اندفاعـي

لولا الوفاء ما شدني لك جمالك
لا يخدعك وقت الندم لو صفالك
إخلاصك الوهمي كشفناه تالـي
هديت كل اللي بنيـت بخيالـك
غروك ناسٍ يدعون الوفا لـك
حديتن أبعد يالغضي عن مجالك
ما طاع قلبٍ يبتعد قال وشلون
وشلون قلي تبتعد عن ضلالك
في عزتي للنفس يا قلبي بعته
ما ظنتي يا قلب يلقـا بدالـك
أختار درب الشوق يا قلب خله
يا قلب إنساه واذكر اللي جرالك

قلبي لقى غيركم شخصٍ يهلي بـي
يشفق علي وأنا بالحيل مبلـي بـه
أرجوك لا تعتذر يكفيني اللي بـي
والله يسامحك منك العذر مالي بـه
من واهجٍ بالحشا شقيت أنا جيبـي
ومن لامني بالهوى يصلى لواهيبه
لولاك للنـاس مابانـت عذاريبـي
يا ما تجاهلت حبي وأنـت تدريبـه
يوم أنت مرتاح في همي وتعذيبـي
ماقلت لك يوم ... تفقدني وتبكي به
يازين ماشوف لك عندي مطاليبـي
حبيت غيرك وحبك ويش أسوي به

ذكرتني حبك وأنا أقول ناسيـه
جرحت جرحك يوم قرب يطيبي
في شوفتك شديت قلبي لماضيه
يوم أنت عني ساعة ماتغيبـي
يا للي تلوم القلب بفراق غاليه
ليتك بدنيا الحب تأخذ نصيبـي
تمشي بدرب ما تحسب تواليه
ماتدري إنك بالنهاية صويبـي
تذكر حبيبٍ راح تبكي لياليـه
دار الزمان وكل شمس تغيبـي
بيديه قلبي يا عرب كيف أخليه
من حبه الظالم تعـذر طبيبـي

مابي حياتي لا خلت منك تنعـاف
وش الليالي لاخلت مـن قمرهـا
جرحتني واليوم ماعاد تنشـاف
عيني تمنـى شوفتـك يانظرهـا
ياصاحبي قلبي على جال ميهاف
الروح يالغالـي تزايـد خطرهـا
ماترحم اللي للشقاء صار ميلاف
لك فرحة الدنيـا وحنـا كدرهـا
تبكي عليك الدار يازين الأوصاف
ليـت النهايـة ماتبيـن خبرهـا
أيام قربك يالغضي مابي خـلاف
راحـت ليالـي حبنـا ياقمرهـا

الصيف قرب وا عذابي من الصيف
يبي يروح الزين ماعـاد ينشـاف
لا غاب عن عيني حسين التواصيف
عز الله إني للشقاء صرت ميـلاف
العام جرحي داخل القلـب ماشيـف
واليوم أخاف جروح فرقاه تنشـاف
قلبي معه والدرب يمـه صواديـف
ليته بجنبي كان ما عنـدي خـلاف
ياصيف ... لا تبعد قلوبٍ مواليـف
ارفق ترى قلبي على جال ميهـاف
في بحر حبه مـا تفيـد المجاديـف
انشهد ان الـدار لا غـاب تنعـاف

خايف عليك ومنك بالحيـل خايـف
عزي لقلبي يجمع الحـب والخـوف
خليت قلبي والشقـاء بـك ولايـف
قلبي عمى وش عاد لو عيني تشوف
عمري قضى ماقلت لك واحسايـف
عندي نهايه درب الاشواق معروف
جرحت قلبي يـا عديـم الوصايـف
ماظن تشرح ما بقلبي لـك حـروف
قلبي لغيـرك لـو تغليـت عايـف
حبك ملك قلبـي ونسانـي الخـوف

لو طال صبري يا هوى البال له حد
ماودي إنك توصل الصبـر حـده
رسمت لك شكواي والدمع يشهـد
عقبك خطير القلـب ينبـاح سـده
كيف أحتمل ياعزوتي عيشة الصد
أعطيك روحي والشقاء لـي تمـده
حاولت كتم الشوق والشوق يشتـد
أرحم رحمـك الله ترانـي بشـده
لا تجرح المشتاق في قاسي الـرد
قلبي عن الفرحـه معـك لا تلـده
قلبي معك والله ماخنت لـك عهـد
ليت الحنان اللي مضى لـي تـرده

عفت أنا الدنيا إلا جـار الصديـق
كل واحد صار بالشكـوى يضيـق
من يدور لـه بـذا الغابـه رفيـق
ينقضي عمـره ولا يلحـق منـاه
دمعتي تجري ولا أحـدٍ لـي بكـى
عندهم شكـواي ماتلقـى صـدى
ياوجيه الغدر ويـن أهـل النـدى
أبعدوا عنـي تـرا عفـت الحيـاة
كم انا مخدوع فيكـم مـن سنيـن
عشت أنا المظلوم وأنتـم ظالميـن
لـي خفاياكـم ورا تـوه تبـيـن
يوم دار الوقت وأظهـر لـي رداه
كنت أشارك في هموم الكـل منكـم
كم تمنيت أحمل الضيقـات عنكـم
لو دريت أن الوفاء وهـم بنظركـم
ماقضى عمري وأنا أزرع في صفاة

منك انتهينا يـا مخيـب رجانـا
الصبر طال وعذبتنـا المشاويـر
في موت حبك يجبر الله عزانـا
بيدك رميته لا تقـول المقاديـر
لولاك حنـا مـا تبـدل غلانـا
كل الوفاء منا ولا منـك تقديـر
قلنا سحابة صيف تعبـر سمانـا
وتزول ماله في سماء الحب تأثير
غدرك على نسيان حبك حدانـا
هذي سواتك ماتفيـد المعاذيـر
عفناك واللي عالـمٍ فـي خفانـا
البعد عنك أرحم وقلبك مع الغير
تبيعنـا واليـوم تبكـي هوانـا
لا يا عديم القلب فرقاك لي خيـر

أنا عرفتك بالهـوى ألـف خـداع
وأنا بنظرات الوفاء منك مخـدوع
لا واحسايف عمري اللي معك ضاع
لا صار لك قلبٍ على الغدر مطبوع
تركتني وحدي على الدرب ملتـاع
أخذت عمري والعطاء منك ممنوع
تبي السموحه وأنت لي صرت بياع
وما زال قلبي من سواياك مفجـوع
يا ما نهيت القلب لاشك مـا طـاع
وأنا أشهد إني مابعد شفت لك نوع
ما نيب لا عذار تجي منك سمـاع
يكفين ماعشتـه بدنيـاك مخـدوع

مابك رجاء ... من حبكم طابت النفس
ماشفت بك زودٍ علـى باقـي النـاس
جمالك الفتـان ماشفـت لـه جنـس
وش فايده ... ليتك بنيته على سـاس
قلبي عليك اليوم ماهوب مثـل أمـس
دور وتلقى اللي يشده لـك احسـاس
ليلـك طويـل ماتبينـت لـه شمـس
عمري قضى بين الرجاء فيك واليـاس
حاولت اجاهد عبرتي والخبـر همـس
اضحك واكذب مـن يقولـون لابـاس
متى ... تعاني لوعت الحـب وتحـس
في حالتي ... ولا أنت معدوم الاحساس

قالوا أبعد وش يحـدك ترتجيـه
شمس من حبيت غابت عن سماك
قلت أنا ياناس قلبـي فـي يديـه
الغـلا خـلاه بعيونـي مــلاّك
ياعذولي خايفِ منه ... وعليـه
والسبب جـرحٍ بقلبـي ماخفـاك
لا تلومن .. لو بكت عيني عليـه
بالهوى ربي بلانـي مـا بـلاك
أنت بين يديك كـل اللـي تبيـه
الزمن ليته عطانـي مـا عطـاك
لو يضيع العمر اصبر وارتجيـه
غيبتـه يانـاس للمبلـي هـلاك

وحيت لك طاري مع الناس فزيت
حبك بقلبـي مـا طوتـه الليالـي
كني فطيـمٍ فارقـت أمـه البيـت
ولا لقـى قلـبٍ بدالـه مـوالـي
يا منيتي من عقبك الناس مليـت
مالي بغيرك يـا حسيـن الدلالـي
بأقرب قريب لي من الناس ضحيت
وارخصت من شانك عزيز وغالي
الله يشهـد مـا بحبـك تسليـت
واليـوم قلبـك غيرتـه الليالـي
اشقيتني في عيشتي مـا تهنيـت
وأنت بعذابـي مستريـح وخالـي
نسيت حبي كيف عنـي تخليـت
حطمت قلبـي يالغضـي عزتالـي
حطمت قلبي في عذابـي تماديـت
ليتك ترى في غيبتك وش جرالي

ودي بشوفك يـا مطـول غيابـك
بعدك علي الكون ياعزوتي ضـاق
أسهرت عيني في رجاوي كتابـك
يمكن يهدي بين الأضلاع خفـاق
جفت غصون القلب وابطى سحابك
للموت روحي ياهوى البال تنساق
ناشدتك الله لا يخيب الرجاء بـك
عساك لي يامالك الروح مشتـاق
قلبي معك لو تجرحه فـي عتابـك
لا شك من دونك خطاويه تنعـاق
يازين قلبي من هواك التجى بـك
لاتجرحه زودٍ على جرح الاشواق

مـمــا جــــرى يـاصـاحـبـي لا تــكــدر
حـزنـي طبيـعـه مـاتـعـودت الأفـــراح
الـصـبــر يـنـفــذ والـغـرابـيـل تـكـثــر
صـار الأمــل للـيـاس والـهـم مفـتـاح
ابـكــي شـبـابـي وأشـتـكـي وأتــذكــر
وقــتٍ مـضـى ليـتـه تـوقــف ولا راح
ابـكـي شــره وابـكــي نـــدم واتـعـبـر
من حر مابي ليت مـن مـات وارتـاح
طـبـع الــو فــاء يـانـاس فيـنـا تـغـيـر
حتى الو فاء مسكين من غدرنا طاح
الله معك مـابيك مــنـــي تــعـــذر
يكفيـن عنـك اسهيـل والطيـر لا نــاح
يمـك حـدان الشـوق مــا نــي مخـيـر
واللي حداه الشوق معذور لـو صـاح

يـا لـلـي مسـافـر يشـهـد الله فقـدنـاك
تعـال باسـم الحـب جـرحـي خطـيـري
أنــا غـريـق بالـهـوى هــات يـمـنـاك
فـي زحمـة أمواجـك تعـذر مسـيـري
مشتـاق لـك بالحيـل يـا كـود فـرقـاك
عـن ذكريـات الحـب ويـن المطيـري
أرفــق بـقـلـب تـالــي الـلـيـل نـــاداك
وقتـي حدانـي فـي هـواك استجيـري
نسيـتـنـي و إلا تـنـاسـيـت مـمـشــاك
و إلا أنت مشغول برجاء حب غيري
يـا مستريـح البـال و شلـون ننسـاك
والشوق نـاره تشتعـل فـي ضميـري
خذ روحي اللي هدها الشوق تفـداك
عـسـى الفـلـك لأخـذتـهـا يسـتـديـري

بيدي رميـت القلـب فـي وسـط نـارك
و أقفيـت يـا ظالـم وأنـا فيـك مفتـون
إنـهـد حيـلـي فــي عــذاب إنـتـظـارك
و أخفيت جرحي مابي الناس يدرون
أرمي سلاحـي واعتـرف بانتصـارك
ابكيت من يضحك على اللي يحبـون
مـتــى تـخـفـف لـوعـتـي بـاعـتـذارك
اشوفكـم مـره عـلـى الـحـب تبـكـون
أنـهـيـت قــصــة حـبـنــا بـاخـتـيـارك
وين الصبر يا قاسي القلب وشلـون
يازيـن قلبـي مـن هـواك استـجـارك
حبك عسرني ماطوى القلب بالهون

أبكي هوانا كل ماناح قمري
واذكرك لاضاقت على نفسي الدار

وانت بجروحي ياهوى البال تدري
ياشايلٍ قلبي على كف الأقدار

حفرت في ذ**** همٍ بصدري
لولا الأمل والخوف بيّحت الأسرار

سفينتي في بحر الاحزان تجري
يازين في عهدٍ مضى صرت غدار

مهما يطول الليل باتلاه فجري
لابد من صبحٍ عقب ليل الاكدار

حبك طوى ياغاية النفس عمري
متى بشمسك ينجلي ليل الاقدار

تذكرتك وقلبي مسرف الخطوه يبي فرقاك
وفي نفسي بقايا من جروح العام مدفونه

تذكرتك وفي عيني مواري حزن من ذ****
تلفت يمك الخافق وجاك خطاه مجنونه

وجيتك ثاير العبره .. أحبك من يقول أنساك
غيابك نار .. من يقوى يشيل النار بعيونه

هلا بايامك السودا .. هلا بالحزن في دنياك
رضى قلبي بتعذيبك أبد مايطلب العونه

متى تفرح بك ايامي متى وشلون كيف القاك
متى هالليل في شمسك يذوب ويختلف لونه

تعبت من التعب وينك تعال ومد لي يمناك
حياتي لا خلت من شوفتك ماهيب مضمونه

انشدوني عن هوانا قلت ضاع
يوم شفنا الصد راحه للجميع
خلنا نرتاح من هك الصراع
والسهر والهم في رجوى الربيع
ناوي الفرقا وفليت الشراع
مثلما ضيعتني خلك تضيع
ابتعد بسكات مابي لك وداع
مابي فرقالك ها القلب الرضيع
تحسب ان قلوب خلق الله تباع
يوم تشريني وبالثاني تبيع
لاتغرك جيتي لك بإندفاع
لوبغيتك عز نفسي مايطيع

يامالك قلبي لنا عنك مده
وراك عنا أريش العين صديت
ماذقت من غيرك جروح الموده
غالي علينا ياحلو لوتغليت
يزداد حبي كلما زدت صده
وراك عن قلب ملكته تخليت
ليت النظر ياصاح يمي تلده
ياما قسى قلبك ولايوم حنيت
وصل الصبر ياقرة العين حده
ومنين اجيب الصبر لا عني اقفيت
ذاك الحنان اللي مضى لو ترده
أقول من قلبي بحبك تهنيت
ماعاد فيني يازمن ماتهده
ابعدت خلي يازمن ويش خليت ؟

مع زماني لاتحاربني بصدك
خلني بالعمر أضحك لو ثواني
كان لك قلب على غيري يحدك
وش ترى في قلبي اللي لك حداني
بالجفاء ياصاحبي عديت حدك
ماوصلني منك يالغالي كفاني
اشتكي لك لاتعذبني بردك
لاتصد ارجوك يوم الله بلاني
ليت حب ضاع للذكرى يشدك
تذكر اللي راح منا في ثواني
ليتني مرتاح من قلبي وحبك
ليت لي يازين مثلك قلب ثاني

قلي على الله وابتعد عنك وارتاح
قلي على الله بس من غير تجريح
من شب نار الشوق ياشوق ماصاح
واللي وطاها يشرح الجيب ويصيح
لولا الغلا ماهانت النفس ياصاح
محبتي لك ماوراها مصاليح
وشولن تنسى يالغضي كل ماراح
مركب غرامك سار مع وجهة الريح
القلب في يمناك ياعزوتي طاح
حنا على شط الرجاء بك مجاريح
جرحتني واحسبك للقلب جراح
اشوف بعيونك على الصد تلميح

قالو سعيد بالهوى قلت بالحيل
سعادتي مايندرى وش وراها
دربي صعيب وتحسبونه تساهيل
محد شكى من جمرة ماوطاها
كل مريح ياعرب تالي الليل
وانا بحال يعلم الله شقاها
فكرت لو يطري على الزين تبديل
كيف أقدر الفرقا واعيش بعناها
واهواه من قلبي ومن غير تعليل
لاتجبرون الروح تبدي خفاها
ياماكتبت اسمه على نجمه سهيل
أصل بنور العين عالي سماها

اللي حصل وقفه خواطر وطالت
بيني وبينك وأنت زودتها زود
سحباه مرت سمانا وزالت
هذا اعتقادي كنت لرضاك مشدود
واشوف زلاتك علينا توالت
تخطي واسامح بس ماشفت مردود
ياما عليك النفس يازين شالت
هم لجافي خاطري ماله حدود
معك الليالي يوم صديت مالت
صارت عقب فرقاك أيامنا سود
رغم الظروف اللي عن القرب حالت
يازين أحبك والأمل فيك مفقود

منتب على خبري تغيرت بالحيل
مهوب قول الناس شوفه عيوني
مثلت لي دور المحبين تمثيل
رح كمل المشوار هاللحين دوني
دامه خصل بالوضع يازين تبديل
في عزتي للنفس هجرك يهوني
ماقلت يوم اقفيت ماطولك ياليل
مابيك دام الغير بك شاركوني
شكيت جرح من سواياك لسهيل
لاشك نجم سهيل زود شجوني
مليت أنا ماعاد ابي منك تعليل
خلك مع اللي في هواك احسدوني

لاتزيد الجرح ماقصر زماني
شايل بالقلب احزان السنين
لاتزيد الجرح مافيني كفاني
لاتصير اليوم مع وقتي معين
ياحياه الروح ربي بك بلاني
بالحشاء لك جرح يالغالي مكين
في زمان فات يالغالي تراني
اخفي الأحزان والعبره تبين
مندفع لك جيت شوقي لك حداني
جيت أبي نظرات عطفك والحنين
عمري اللي ضاع باحلام واماني
شوفتي لك يوم والفرقا سنين

لو تلتفت ياناوي الصد وتشوف
تلقى بدال فراقنا حل ثاني
يشدني حبك ويبعدني الخوف
شيعت في رجوى حنانك زماني
حاولت اصور ماخفى عنك بحروف
لقيت حبك فوق كل المعاني
أنا على قربك شفوق وملهوف
أقبل وتبعد خطوتك عن مكاني
اللي بقلبي لك من الود معروف
حسيبك اللي في هواك ابتلاني
ياقلب ماظنك على ذاك موقف
بليت باللي باعني ماشراني

وقف وقلي وش سبب هالتحدي
ابي الصراحه واقطع الشك بالياس
انت وزماني والغرابيل ضدي
ياللي جرحت القلب وينك والإحساس
قلبي عليك ودمعتي فوق خدي
منك اشتكي لك ياغناتي من الناس
لولاك غالي ماتعديت حدي
ليتك بنيت الحب مثلي على ساس
بكيت يوم اقفيت وانباح سدي
شربت منك المر كاس بثر ماس
ليتك بنظره عيونك تلدي
محبتي لك يالغضي ترفع الرآس

انشهد انك شاطر بالتحدي
وانشهد انه غلطتي ياعشيري
حطيت شمعه لك تعدي
واحرقتني يومك عرفت المسيري
درب يودي يالغضي مايردي
تلقى على طبعك من الناس غيري
حفظت انا عهدك وضيعت عهدي
الشوك لي والورد كله لغيري
أحرقت رسمك يوم يدك بيدي
واليوم ودي عن هواك استخيري
القلب يعطي مره مايردي
حبك تحكم واستقر بضميري
ذكرى سنين في دقايق تعدي
ويلاه من ضيم الحياه المريري

ياللي نسيت الحب مثلك نسيناه
جرحي يهون ولامذله خضوعي
قصرك بقلبي طاح وانهد مبناه
لاتنتظر مني لحبك رجوعي
من عافنا ننسى غرامه وذكراه
لاواحسايف في غيابك دموعي
الغدر في نظراتك اليوم شفناه
اليوم نظراتك لقلبي تروعي
مليت حب ضاع عمري برجواه
وهديت من زود الغرابيل روعي
يامن قطع حبل الرجاوي بيمناه
من دمعتك اشعلت طافي شموعي

وداعك كيف ابتحمل وداعك
وداعك موت ياكل الحبايب
دخيلك لاتلوح في ذراعك
ترى قلبي بنار الشوق ذايب
دخيلك قبل ماتطوي شراعك
منين الصبر قلي وانت غايب
على الفرقا وانا اشوف اندفاعك
واقول الله يادنيا العجايب
ششريت الزين ياقلبي وباعك
وراح اليوم وجروحك عطايب
نهايتنا بكلمه قلتها لك
وداعك موت ياكل الحبايب

لولا غيابك ياهوى النفس ماضاق
صدري ولابانت بنظراتي الشوق
لي قلب مثلك واسهر الليل واشتاق
غيرك فلا والله تمنيت مخلوق
بيني وبينك خطوة الرجل تنعاق
حسبي على اللي صار من بيننا عوق
أجرح وقلبي لك على الطول ينساق
رمشك ملكني ساقني للهوى سوق
كمل جمالك والي العرش باخلاق
حتى الجروح اللي تجي منك له ذوق
كيف انتهت ذيك المشاوير بفراق
العام الأول كانت احلامنا فوق

شفتك مع اللي صار عقبي حبيبك
واحترات العبره بعيني وصديت
مدري هي صدفة لدربي تجيبك
مدري انا اللي في دروبك تحريت
ملكتني واقفيت ربي حسيبك
ماتعرف الرحمه بقلب توليت
ياقلب جرحك سبته من طبيبك
ياقلب ليتك بالوفاء ماتماديت
من حبنا كل السعاده نصيبك
يافاقد الإحساس عني تخليت
وش فايده لو قلت عني حبيبك
وانت بحياتك يوم ماظن حبيت

عيني على اللي مضى هلت عبايرها
فرقاك نار صلتني في سعايرها
يامن سمع هرج عذالي وعذاله
لك مده مبتعد وخاط قاصرها
ظنيت حبك يدوم ودارت الدنيا
سهراتنا اللي مضت هذي عواقبها
انا معك ماشي بالسمع والطاعه
محبتي مابها شي يعذر بها
وشولن تقفي وقلبي تشتعل ناره
أنا انقذ الروح ولا فأنت دمرها
خذ من حياتي .. حياتي وارجع الماضي
وابعد عن النفس ضيقات تحاصرها

من ليالي زماني واثق ماهقيت
تخلف الظن وتبدل هناي بشقا
ابنسم واحسب انك غافل مادريت
والندم في عيوني بيّن ماخفا
يوم شفتك عيني في هوآك ابتليت
ليتني ياعلى ماشفت ظبى الشفا
من زماني وحبك والفراق انتهيت
هد حيلي غيابك نور عيني طفآ
من جروح قلبي صابر ماشكيت
عن هوى الغير قلبي في هواك اكتفا
في وداعك حقيقح غصب عني بكيت
كيف لابعدت عني وين ابلقى الدفاء

أنا تقبلت العزاء بك مـن العـام
كن العزاء في موت حبك تهانـي
يا ما سهرت الليل لا غبت ما نام
ترقد وأنا ازرع في رجاك الأماني
واثر السعادة في رجاء حبك أوهام
لا طاب جرحٍ صابني منك ثانـي
جارت على قلبٍ شقا فيك الأيـام
أشكيك للي فـي غـلاك ابتلانـي
سهرت عليك عيون ماظن تنـلام
ذاك أمس ولا اليوم ماجا كفانـي
إفرح بطيشـك والغرابيـل قـدام
يا طاك من وقتك مثل ما وطانـي

مدري متى صارت جروحي تسليـك
عقب الوفاء وشلون غرتـك دنيـاك
يا من علي اليـوم كثـرة طواريـك
نهايـة الغـدار مـاظـن تخـفـاك
في حبك الثاني عسـى الله يهنيـك
حنـا مـع الأيـام ندلـه وننسـاك
كنت الرجاء واليوم خاب الرجاء فيك
أرخصت ماضينـا وغيـرت مبـداك
وين الحنان اللـي مقـره موانيـك
وين الضمير اللي عن الغدر ينهـاك
غال الدموع أرخصتها لك وأنا ارجيك
ابني لـك بدمعـي وتهـدم بيمنـاك
يكفين ما قاسيـت منـك و تغليـك
منتب علـى قلبـي وصـي ومـلاك

ماجيت حب لك ولانيب راجيك
ماجيت يمك في رجاء مد يمناك
جيتك مثل غيري بنفسك اعزيك
مالك وجود اليوم مت ودفناك
شربت منك المر واكتم واداريك
حتى عدوي مايسوي سواياك
الشاهد الله ماخبر جبت طاريك
وان جاء لك الطاري بخير ذكرناك
عين بكت لك ماتلد النظر فيك
غصب علينا من سواياك عفناك
عواذلي قامت تبيعك وتشريك
ارجوك تبعد عيدنا يوم فرقاك

قلبي بعيد عنك وين انت وياه
قلبي عليك اليوم ابعد من سهيل
قلبي كفاه من الشقاء منك ماجاه
ماحده الله للشقاء والغرابيل
قلبي معك ذاك امس تامر وتنهاه
واليوم عيني منك ماتسهر الليل
نسيت حبك وانت ياليت تنساه
أيامنا ضاعت خداع وتمثيل
عزي لقلب مثل قلبك تولاه
ماعاد ابي للي حصل منك تعليل
هذا الفراق اللي تبيه وتمناه
خلك بعيد وعلهالك تساهيل

محاولة نسيـان حبـك وطاريـك
أكبر خطاء فكرت به في حياتـي
حبك سطابي حطني بين أياديـك
صار إندفاعي لك من أبرز صفاتي
ابيع كل الناس يازيـن وأشريـك
وشوف في نظرة عيونك غناتـي
ليت الهموم تصيب قلبي وتخطيك
ما اقول قلي من يسوي سواتـي
يزداد حبـي لـك بزايـد تغليـك
حسيت إني فيـك حققـت ذاتـي

راجع تبي قلبي عقـب ماتندمـت
راجع تبي قلبي على خبرك العـام
العام انادي ياهوى البال وين انـت
واليوم حبك ينتظر حكـم الإعـدام
على الجفاء من طول صبري تعلمت
والجرح في قلبـي تداويـه الأيـام
خلك بدربك لو مشيـت وتعثـرت
مسكين ياباني قصـورك بالأحـلام
مجبور أبيعك لو بكيـت وتأثـرت
وش حيلتي حظي تـردى ولا قـام
ما عاد لي بالحب مثلـك تغيـرت
يا زين حبك ينتظر حكـم الإعـدام

ما بقى بي حيل للجرح الجديد
جرحك اللي فات توه مابـرا
صارت الأيام مثلـك ياعنيـد
عن جروح القلب قلبك مادرا
من خطاك العام حاول تستفيد
وادفن الذكرى القديمة بالثرا
يوم قلبي عنك مايبعد بعيـد
وأنت قلبك بالهوى باع وشرا
ليت من ينساك في حبٍ جديد
ليت حبك ما على بالي طـرا

ياليتني ماشفت زولك ولا جيـت
دربك ولا شافت عيوني عيونـك
ليتي معك بالمعرفة مـا تماديـت
ليت الظروف وسود الأيام دونـك
من قبل أشوفك ليتني عنك صديت
قبل تمكـن بالضمايـر طعونـك
الوقت ما جالي على مـا تمنيـت
خلن بحالي ما ترجيـت عونـك
يا زين من طول المشاوير مليـت
يا مشغل قلب شقا فيـك هونـك
وين أنت أنا لك تالي الليل ناديت
حتى السهر ماله حـلاة بدونـك

لو ترد ايام ضاعت في رجاك
ماسهرنا في غيابك نرتجيك
داري بالجرح جرحي ماخفاك
تدري ان الحل والله في يديك
خل جرح القلب يرفع مستواك
غيرتنا مثلك الدنيا عليك
بالجفاء والصد يوم الله بلاك
ليت ربي بالموده مبتليك
لاتعاتب والخطآ كله خطآك
بعت منهو في حياته مشتريك
ابتعد لو كان قلبي مانساك
قلتها مجبور ابعد مانبيك

يعني خلاص ارخصتنـا مـا تبينـا
نقطع رجانا منـك مـره وننسـاك
قفلـت بـاب المعرفـه وانتهيـنـا
وش عاد لو نسمع مع الناس طرياك
لو رحت عنا اليـوم باكـر تجينـا
لولاك ما عشنا مع الحـب لـولاك
أنت الحبيب اللـي بهجـرك بكينـا
يا ما تلوعنـا علـى أيـام فرقـاك
وين الليال اللـي بقربـك قضينـا
يوم أنت مرضيني وأنا أقوم برضاك

حاولت أعزي مثل غيري من الناس
لقيت نفسي أستحق العـزاء فيـه
يا موت مالك قلب ما عندك إحساس
ما شفت حال اللي فقد شوف غاليه
يا موت ما ترحم طوى حالي الياس
قلبي جريحٍ ما لقى مـن يواسيـه
يا موت لو تشرب من الهم لو كاس
ترحم وحيـدٍ هـم قلبـه يباريـه
قالوا مقدر قلت يا نـاس لا بـاس
أصبر وهمي في حشا القلب مخفيه
أمرٍ قضاه الله على العين و الراس
خلوني أنسـى لا تجيبـون طاريـه

قضى العمر يا ظالم وأنا أقول عنك اقفيت
والا شفت زولك بالصدف هلت اعيانـي
مشى القلب في ظلك يباريك لو صديـت
ولو عفت حبك يوم مـا عفتـه الثانـي
أنا ما قويت أنسـى حنانـك ولا ظنيـت
سألتك بربـك ويـش كلفـك نسيانـي
وأنا أشـوف زلاتـك بعينـي إلا زليـت
وش اللي يفيد الشوف والقلب عميانـي
أخذت العزاء مني ولا قلب لـي خليـت
وأنا من هواك اليـوم حبيـت حرمانـي
عطيتك حياتـي يـا قمرهـا ولا رديـت
أبي منك لو نظرة ترى هجرك أشقانـي
أبي قلبك القاسي وراضي بمـا سويـت
تعاتـب وتجرحنـي وتامـر وتنهانـي
لك الحب مشاني أنا في هـواك إبليـت
أحبك ولـو صديـت يـا كـل خلانـي

يتك تعيش بواقع الحب لو يـوم
و الا تشوف لوضعنـا ذا نهايـه
بالحب أنا يا غاية النفس مظلوم
محتاج يا لغالي لعطف ورعايـه
لي السهر ولعاذلي لـذة النـوم
من شان حبك ما سهرنا هوايـه
ما صابني من نظرة العين مقسوم
أسيـر حبـك لا تحطـم رجايـه
ما كل عين تجرح القلب بسهـوم
و ما كل من يرمي يجيد الرمايـه
أنشهد إني منك يا زين محـروم
معك ابتديت وفي هواك النهايـه
فات الأوان و لا تزيدون باللـوم
الصبر بيدي يوم قلبـي معايـه
بالاسم والمعنى و ما قلت مفهوم
يا شمس عمري يا بدر في سمايه