مرحبا في مرحبا يازايرن ديــواني
مرحباً اعداد وبل المزنة الوسـميّه

ياهلا باللي تعنّا من بعيد وجــاني
وشرّف سعيد ابن مقبل بالزياره ذيه

في مقام العز جعله دايمٍ عمـراني
يالله حي مشرّف الديــوان يالله حـيّه

الواسطه

مافيـه حاجـه ساقطـه الا وراهـا لاقـطـه
واللي يطيح من السما في الارض يلقا له قبيل
والطب ماخلّـى عـلاج الا عـلاج الواسطـه
ماعينوا اعلاجهـا فالطـب والطـب البديـل
حتى سهوم اهل النزاهـة فالدوايـر هابطـه
قليل لامنك لقيت اللـي بعـد مخْلـص قليـل
تلقـا خيـوط معاملَتْـك الهينـه مترابـطـه
من دونها يفتل وينقض راعي الطبع الرذيـل
الا يكـون تحـط فـي مخبـاه شـيٍ قافطـه
ولا تدوّر واحدٍ قد صـار لـه عنـده جميـل
يمكن تروح وخاطرك مبسوط منـه وباسطـه
انهيت موضوعك وهو قد كان عندك مستحيـل
وان جت وظيفة في قطـاعٍ كلبـوه مرابطـه
وظيفـةٍ يالله تسـد الديـن وتفـك الكفـيـل
هم جاك من همه وهم ابـوه وامـه شاخطـه
لاضاق صدره قال حسبي الله ونعـم الوكيـل
ينقـل ملـفٍ حطتـه الاقـلام كنـه خارطـه
من كثر مايكتب عليه ارقـام يشبـه للدليـل
قد له سنينٍ فوق طبلـون الغمـاره صافطـه
مر المناطق كلبوهـا مـن شـروره للجبيـل
قالوا له اللجنـه تـرا عنـدك ثنيّـه ساقطـه
والطول تحت المستوى وجسمك ضعيف ونحيل
رح ضبّط امورك مع العالـم بـدون مغالطـه
حاول وشف لك حل في عمرك ولايخْدم بخيـل
واللـي وراه قصيّـرٍ لكـن حظـه ماغـطـه
عيّن له مسنّع وصار بقـدرة القـادر طويـل
عوّد على النادي وسجّل مع صفوف الرابطـه
يشجع الكـوره ويلقـا فالعصـر ظـلٍ ظليـل
قال المدرّب ويش ذاك اللي عيونـه شاحطـه
اللي مع الجمهور متجمّـد تقـول انـه قتيـل
قالـوا هـذاك غليّـمٍ جرحـان قلبـه نافطـه
عليه من بقعـا همـومٍ خلّتـه مثـل الهبيـل
قال ازهموه امزح معـه والاطفـه واعابطـه
واشوف لو انه مع الجمهور مدسوسٍ عميـل
نادوَه والماخوذ جا مسـرع وراسـه رابطـه
اسبق من البارود لامن ثار من خشـم الفتيـل
قال الولد هذا علـى رجليـه سرعـه فارطـه
لو نقدر نحطه مهاجـم عندنـا مالـه مثيـل
واقبل عليهم ريّـس النـادي وثوبـه زانطـه
يمشي مع الملعب على رجليه كنه مشي فيـل
توه صلاة الظهر قدر الضغط تيـسٍ ماسطـه
والبارحه ممسي وهو في بطنه شقاق الحسيل
قال انت بكره لاتجينـي الا وراسـك ماشطـه
وتقص اظافر رجلك اللي كنها روس الدريـل
يمكن نحطك فالهجوم ان كان لعبـك ضابطـه
اربّك تسـد اللـزوم وتبـرد القلـب الغليـل
هذي الجماهيـر الغفيـره كلبوهـا ساخطـه
اللاعبين مهرقلين ومستـوى النـادي هزيـل
قال ابشر بعزّك ونا مانيـب اقـول مهايطـه
والله اني آجمّل عسى الله يكتب الفعل الجميـل
ولعبـوا ثـلاث مباريـاتٍ والنقـط متناقطـه
فازوا بها واهدافها من صاحب الجهد المهيـل
مافيه حـارس قدمـه الا بالكبـاري قاشطـه
الين صارت فالصحافه شهرته عابـر سبيـل
وقامت تفاوضه النوادي والعروض مساقطـه
وصارت ملايين الدراهم في حساباتـه تسيـل
واللكزس السودا الجديده عند بابـه صافطـه
والفلّه اللي سلموها له على شاطـي النخيـل
ضحْكت له الدنيا وهو قد بهْذلَتـه الواسطـه
والواسطه في طلبة الله راعي المـد الجزيـل

الفراوله


واحد صديقٍ لي تجوّز وحـدةٍ متغطرسـه
حاول يعَدّلهـا ولاكـن فشْلـت المحاولـه
قال اعطنا ياصاحب الافكار حـلٍ ندْرسـه
يوم انك مسوّي على كل الحلـول مقاولـه
قلت الهوى ياصاحبي ماهوب شيٍ تفْرسـه
ان جاز والا اترك بلنتيّه وطنّـش فاولـه
قد قلت لك منذو البدايه لاتجيـب مدرّسـه
ولا استمعت لكلمتي كنـك مـن النخـا...
واليوم عان الكنز عندك حاول انك تحْرسه
والا ترا بيجيك من يقْلب عليـك الطاولـه
انته تبي جني الثمر والغرس مانت بتغْرسه
ويوم استوا البستان ودّك تاكـل الفراولـه
ماجيت طابور الصباح ولا اتعبك دق جْرسه
لكن تبي تالي الشهر شيكٍ يجيـك مناولـه
لاياطويل العمر خصمك شايبٍ ما اشرسـه
والله انه ابعد لك من المندق ومن لاطاوله
الشايب اللي تو بنته قبـل عـامٍ معْرسـه
ماغمضت له عين من يوم الهنوف مشاوله
واليوم ودك تاخذ الصفري لحالك تمْرسـه
هذا الكلام اللي على طول الطويل مطاولـه

خويتي


يا راعي الفندق اعتزنـاك وافهمهـا
وياحبني يوم اعيّن شخـص فاهمنـي
ابي لي سويـت ياخذنـي وياخذهـا
سويت مضبـوط ياخذهـا وياخذنـي
خويّتـي جعلنـي والله مـا اعدمهـا
وهـي بعـد جعلهـا والله ماتعدمنـي
اللي ليا احتجت شـيٍ جيـت زابنهـا
وهي بعد تنبسط وتموت فـي زبنـي
في قلبهـا كلبـو الاسـرار حافظهـا
وهي تحافظ على سـرّي وتحفظنـي
يازيـن هدووهـا لاصـرت حاظنهـا
وهي تواسا علي وتْقـر فـي حظنـي
بطني على بطنها وايّـديّ فـي يدهـا
وهي على قربها تدني علـي وادنـي
لاتروح عينك على الصالـة تدوّرهـا
كانـك تحـاول تدوّرهـا فـدوّرنـي
افكار بعض العرب ما عـاد نضمنهـا
نضمن مباديـه والتفكيـر ماضمنـي
خويّتـي شنطتـي قدّامـك احْملـهـا
وليتك مع اللفت تحْملهـا وتحْملنـي
نبـي لنـا غرفـةٍ يالقـرم نسكنهـا
الله يجيرك من المسكـون والسُكنـي
طول المسافـات متعبنـي ومتعبهـا
والا الحقيقـة تعَبهـا اللـي متعبنـي
قال انت دعـواك خابزهـا وعاجنهـا
وانا التعب والسهر والهـم باعجنـي
هذا انت واقف على الزحمة وشايفهـا
بعيونك تشوف مثل ما انت شايفنـي
ماعاد في الفنـدق اجنحـةٍ نأجرهـا
ويالله على الصدق ياربـي تواجرنـي
كل الغرف فيه محْجوزة على اخرهـا
وهذا هو اللـي مجلّسنـي ومخّرنـي
حتـى البنيـات تاركتـن منازلـهـا
ماتشوفهن في الدرج واللفت ينزلنـي
اللي مع اصحابها واللي مـع اهلهـا
واللي تأهـل بهـا اللـي مايأهلنـي
واللي تغـرّب ولا احـدٍ داريٍ عنهـا
يعني بـلا محـرم ويعنـي ولايعنـي
قلت انت هرجتك ما ادري ويش داخلها
قال انت هرجتك منها الشـك داخلنـي
قلت اطرح اهدومها وانطـل ببرقعهـا
بعـض البراقـع تراهـن مايبرقعنـي
قـال المدافـع مـركـزةٍ ذخايـرهـا
وماحدٍ بذاخـرك للعـوزة وذاخرنـي
قلت احتمى سوقها كان انـت بايعهـا
قال احتمى سوقها كان انـت بايعنـي
قلت انتهينا عقـب مـازان مطلعهـا
قـال اذكـر الله وفيهـا لاتطلّعـنـي
قلـت الامانـة لاضيعهـا مودعـهـا
ماتقّـدر تقـول لاخُذنـي ولادعنـي
نسّيتنـي شنطتـي بغيـت اضيعهـا
وتقـول بعديـن همّلنـي وضيّعنـي
خويّتـي جعلنـي والله مـا افقـدهـا
وهـي بعـد جعلهـا والله ماتفقدنـي

المطرقه


يا هواميـر المعـارض جتكـم التدبيلـه
ارفعوا سوق المواتر وابشـروا بالطفـره
مابقا دون الوليمـة غيـر يـوم وليلـه
كل واحد يبْرد اسنونـة ويشـري شفـره
واظهروا ما زاد سعرة واتْخَـر موديلـه
واطرحوا تحت المفطح لاوصلكـم سفـره
واستعدوا في حـراوي لابسـات الشيلـه
وافرشوا الصالات زلٍ للوجيـه السَفـره
الكدالـك والفـروت اللينـة منهـي لـه
مالها غير الليـان اللـي تثنّـى خصـره
الفخامـة والطخامـة كلهـا تـاوي لـه
يطلب من النادر الغالي وهو تحت امـره
اسدحوا البي أم عند الباب قبل يجي لـه
وافتحوا بيبانهـا ياخـذ عليهـا نظـره
خلّوا الكيكـة تـذوب بقطعـة الفانيلـه
في نعومة ملمس الطارة وليـن البشـره
وهاتوا المرسدس الاسود وارخوا التظليله
خلّوا الزبدة تسيح بمرتبـة بـو سمـره
كنها لا ارخـى دركسونـه تبـي تقبيلـه
وكنّـه يحـاول يسابقهـا ويلقـم نمـره
وجهها وسـط الكبينـة ساطـعٍ قنديلـه
والشعـر ليـلٍ سـوادة مايغبّـي بـدره
وعودها اللين يطول الشرح في تفصيلـه
الوروك اكبـار والا خصرهـا ياضُمّـره
لامشـت لاكـن فـي فستانهـا تحبيلـه
زادت النعمة وبانت فـي سنـام البكـره
والهمر حطّـوه عنـد البـاب للجوّيلـه
اربعٍ فيهـن ثـلاثٍ كنهـن فـي سهـره
ناطـلاتٍ بالغطـاوي والسحـى عزّيلـه
السحى ماهوب يطرا مع حيـاة الدشـره
العِْبـي مخصّـراتٍ واليديـن انحيـلـة
والعيـون ملونـاتٍ والشفايـف حُمـره
اشترتْـه الدبـة اللـي دلّعوهـا فيـلـه
دمّهـا خفيـف لكـن وزنهـا ياكـبـره
ساقته بشويـش قالـوا ربعهـا دزّيلـه
خلّي اللـي يتبعونـة مايعَرْفـون اثـره
وانطلق في الخط يوم البنت شدّت حيلـة
فاهـقٍ كـل المواتـر يُمنـةً ويُـسّـره
وقامت العالم تحوفـه والعيـون اتخيلـه
يطردونه من هبـال ويطردونـه بطـره
هايلكس وجمس وهونـدا وراس تريلـه
وجيب شاصٍ مابعد حَوّل تنكْـه وتمـره
بعضهم يسقط عليه وبعضهم يدنـي لـه
وبعضهم ماغير يمشي مادرا عن عمـره
وبعضعهم يكتب تلفونـه علـى منديلـه
وبعضهم لاصف بالموتر نطـل بالغتـره
والهمر تلعب به الخفـرات وتغنـي لـه
من يمين القير خفره من يسـاره خفـره
وراعي الشاص انهبل من وحدةٍ تومي له
مادرى عن حملـةٍ يشلّهـا فـي ظهْـره
قام يقـرب ويتميلـح جنبهـا ياحليلـه
مادرا ان الخط قدمه في مسـاره حُفـره
طارت الحملة وطـار الثـوب والفنيلـه
وانحرف على الهمر واحدث بجنبه ثغـره
والهمر راح ايتطوى والعرب تدعـي لـه
وقامت الطارة تفلّت مـن يديـن الفغـره
وانقلب له قلبتيـن وراح فـي التحويلـه
وانتثر بدّيه على الازفلت كسـره كسـره
سلموا الركـاب لكـن خرْبـت التكميلـه
والوناسة والدلع راحت دمـوع وحسـره
قصة جتنـي وانـا فـي حـزة التقييلـه
يا جماعـة لاحـدٍ ينقـد علـي ويشّـره
مانبي بعض العرب يـروح فـي تحليلـه
الخبر ماهو خبر حتى يجي فـي النشـره
الشواهـد بيّنـه والسالـفـة طويـلـه
والحبل مبطي وهو ممسوس فوق المكره
واحدٍ يقسي عليـه وواحـدٍ يرخـي لـه
وواحدٍ فيه ايتفرج مـادرا ويـش امـره
واللي يسعى ف الردى بهراوته وازميلـه
الله لايجـزاه خيـر ولايطـوّل عـمـره
ماحدٍ راح ايتوسـط بـه ولايشكـي لـه
وش علامه يعْترض بين الدروب الخطْره
يهْدم بيوت العرب واموالهـم تبنـي لـه
ويطرح اقصور العرب والناس ترفع قصره
من يـرد العايـل اللـي ضايـعٍ دليلـه
من يعَلْمـه الطهـارة والعلـوم الظفْـره
سد مارب جـاه فـاره واقـدرت تزيلـه
لاتروح اسدودنا مثـل السـدود النخـره
وراعي الحمّى يبي لـه حبـه وتحميلـه
وان نفع معـه الـدوا والا يـدق بلبـره
الورق يابَس ويسقط والهبـوب اتشيلـه
والثمر يبقى مكانه فـي علـو الشَجْـره
والشعر عندي ماهو غايـة ولا وسيلـه
ان حضر يامرحبا به وان تغيّـب بُصـره
شاعرٍ ماهوب يكتب عن مشاكـل جيلـه
وش يفيده لاكتب في عصر ماهو عصـره

سكر زياده

قال شاهي؟ قلت له سكر زيـاده
قال حالي!! قلت له لاكان حالـي
قال متغير مزاجك!! قلـت عـاده
لا طرالـي شـي والا ماطرالـي
قال انا خابرك تشرب فيه سـاده
قلت ياصبري على طول الليالـي
الزياده ما حصل منهـا استفـاده
الا صار الزاد والمشروب غالـي
قال يعني نعتبـر هـذي جـلاده؟
قلت خذها واعتبرها راس مالـي
قال انا خابرْك تمشـي بالركـاده
رافعٍ عينك على روس الجبالـي
قلت راحت كنها عيـن الجـراده
ما تشوف الا الجوانب والتوالـي
قال عان الجـو لاذعـذع بـراده
انحر الفيّه وقيّـل فـي الظلالـي
قلت راسٍ مايجي تحتـه وسـاده
مايذوق النوم من حِرش الزوالي
قال وش غيّر مفاهيـم السعـاده
قلت غيرها الزمن يا بري حالـي
الحمادة عرقها تحـت الحمـاده
انقطع عنه المطر والقيظ صالـي
والعراده عرقها تحـت العـراده
انقطع عنه الندى والوقت طالـي
والعروق اللي تدمّس في السماده
عانها خضرٍ على كـل المفالـي
قال يـا رجّـال كـلٍ واجتهـاده
قلت هذي صح مافيهـا جدالـي
غير علّمني عن اخبـار العيـاده
هي زباينها من اصحاب المعالي
قال هاك العِلم والا اسمع الافـاده
العيـاده عرفتـنـي بالريـالـي
الزباين جت بهم حصـه وغـاده
يدفعون المال يشـرون الجمالـي
والعياده كنهـا ورشـة حـداده
سمكره, بويه, وترصيصٍ مثالي
يرجع الصدام كنـه مـن بـلاده
وترجع الشنطه على وجه الكمالي
والرفارف ما يجي فيهـا سـواده
كنها الكبـوت ملمسهـا خيالـي
والمراتب كـان كدتهـا الكـداده
عندنا التنجيـد يقلبهـا خمالـي
وفيه دكتور الشعر يقـدح زنـاده
كم زبونٍ راح من عنـده يلالـي
في جباه الصُلع مشروبـه وزاده
لا لقا الاصلع يصيح بصوت عالي
(انت يبني صابتك حرب الابـاده
والا ايه اللي قرا يالهـو بالـي)
ثم يباشر في العمل والشغل اجاده
والزبون يروح وقرونه طوالـي
قلت ناده ياطويـل العمـر نـاده
خلّنا ناخذ معه بعـض السؤالـي
والتفت للـي مسلّمهـا القيـاده
وحدةٍ كنها من العصـر الهلالـي
خشف ريمٍ تو ما زان اصطيـاده
عمرها واحد وعشرين وحوالـي
قال روحي وازهمي مستر حماده
قالت الدكتور ما عنـده مجالـي
قال ذالماخوذ مـا يتـرك عنـاده
قم تعال نروح له يابن الحلالـي
ويوم جينا لاعلى راسه صمـاده
وما عليه من الشعر شيٍ يقالـي
جاي للنبات فـي راسـه وقـاده
كن لمعة صلعته بـرق الخيالـي
قلت ذا حق الشعـر والا الـولاده
قال لا تمزح وتهـزأ بالرجالـي
الصلع جايه قبل ياخـذ شهـاده
ويوم جا دكتور عوّد مـا يبالـي
قلت سلم لي على شؤون العماده
اشهد انهم من كريمين السبالـي
صب لي ياصاحبي فنجال ساده!!
قال واللي قد شربته؟ قلت حالي!!

الاخوه


ياصاحبي لاتقول الخـوّه الخـوّه
هذا كلامٍ يبي له قلـب ولسانـي
هذا كلامٍ يبي له صـدق وامـروّه
ماهوب لاغبت عنك شوي تنساني
يالعنبو الصاحب اللي تنطفي ضوّه
لاجيت ابي نفعتـه قفّـا وخلانـي
حد الدعاوي ماغير اهروج ياقـوّه
يصنع لي الفلك قبل الموج يوطاني
وان عوّدت فالكلام الصدق ياشوّه
يصد لاشـاف زولـي ويتعدانـي
ياللي مع الوقت متغيّـر ومتمـوّه
سرّك عرفناه واللي مختفي بانـي
اثر الخلل فيك يالماخوذ من جـوّه
القلب تعبـان والتفكيـر تعبانـي
واليوم فرقاك حج وبعـدك منـوّه
ومانيب لاغبت من فرقاك خسراني
ماعاد لي في خِيالٍ ماصدق نـوّه
ازريت اجامل مزاج فلان وافلانـي
يا نافدا الصاحب اللي صافيٍ جوّه
لاجيت ناصيه رحّب بي وحيانـي
اما قضى الحاجة اللي منه مرّجوّه
والا تعذر بعذرٍ منـه وارضانـي
هذاك يستاهل امدح فيـه وانـوّه
وافرح بعد يوم ينصاني ويلقانـي
فان الشدايد تبيّن صامـل الخـوّه
والا الرخى كلبونا ربع واخوانـي

جوال موبايلي

خلوني ارقى ف السمـا بارايلـي
والقى وسيلة الاتصـال الهايلـي
اللـي تقولـه شَرِكـات التقنيـه
في هرجها المعسول والمتحايلـي
ياربعنـا تعاونـوا فـي نهبـنـا
ياشركـة الجـوال والموبايـلـي
هذا المواطـن جـوّدوه بفطحتـه
لايفوتكم هـذا السميـن الحايلـي
كلٍ يعشّي فـي جنوبـه ينهشـه
القلب مفضـوخٍ وحجمـه عايلـي
باقـي مكانيـنٍ علـى فقـارتـه
تلقونها خلـف السنـام المايلـي
اقضوا عليه وريحوه مـن الشقـا
لاتطاولونـه بالطويـل الطايلـي
ياكم وطاه مـن الخسايـر والعنـا
من سوق الاسهم يوم جا متهايلي
ومساهماتٍ في الهوى راحت سوا
طاروا بهـا لاكـن مانـي قايلـي
خلّو حياة النـاس قـاعٍ صفصفـا
ماعاد تلقى في الوجيـه سمايلـي
وتجارنـا فـي حقنـا ماقصّـروا
مـن حبهـم فينـا لقينـا مايلـي
اركـوا علينـا ميسـمٍ ماينطفـي
احر من صالـي لهيـب القايلـي
كـلٍ علينـا قـام يرفـع سلعتـه
ويقول ماجا في طرف مخباي لـي
والبدو جاهم حقهـم فـي برّهـم
الشـاه تبكـي والبعيـر يخايلـي
يشكون حـر الجـوع والله ربهـم
يالله دخيلـك مـن نعيـمٍ زايلـي
شيٍ ذكرته يوم جا فـي خاطـري
من بعض الاشيا اللي تعبي فايلـي
والناس مثلي يشتكون مـن الغـلا
هوايـل العالـم مثـل هوايـلـي
اكتب رسايل في همـوم المجتمـع
وهذي رساله من بَعَض رسايلـي
وان كانها ماجت على حسب الطلب
خلونـي احـوّل واجيـب ارايلـي

ابو كاس

ماودك تـروف بحالـة النـاس يابوكـاس
تر النـاس يابوكـاس عقبـك مساكينـي
ماغيرك يارز البسمتي في قلـوب النـاس
ولكـن تعـدى سعـرك اميـه وثمانينـي
بطون العرب فـي غيبتـك ضمّـرٍ يبّـاس
ولاغيـرك يليّـن جـفـاف المصاريـنـي
لو ان شركتك جاها الدهر واعلنت الافلاس
وصلها من الشعـب السعـودي ملايينـي
لكن ارفعت الاسعـار ماهمهـا الاحسـاس
ولاقـدّرت حـال الضعـوف الجويعيـنـي
بغينـا نقاطعهـا ونتبـع صليـب الـراس
ابـو هرجـةٍ تنفـخ كبـود البعاريـنـي
وطحنا مثل ماطاح عبـاس بـن فرنـاس
يـوم انـه ربـط جنحانهـا بالذَراعينـي
بغا بين جيلـه ياخـذ الطيـب والنومـاس
وحـوّل علـى راسـه بليـا كراعيـنـي
وذلحيـن يالدبـوس لاترجـي الـدبـاس
هـذا شكلـه مقلّـد ومصنـوع فالصينـي
دخلت البقالـة وامتلـت كلبـو الاكيـاس
وجيت المحاسـب خابـر انـه يراعينـي
ظرب لوحة الصرّاف واظهر علي قرطـاس
والا مبلـغٍ يخْلـف جمـيـع الموازيـنـي
وقمـت اتلفـت والعـرب كنهـم حـرّاس
احـد ينهـره واحـدٍ يـدز المواعيـنـي
تقرّبـت منـه وقلـت ياصاحبـي لابـاس
انـا مامعـي شـيٍ يكفـيـك ذالحيـنـي
ياليتك تسامحني وتكتـب علـى الكـراس
وتمّْهـل علـي وانـا بسـددك بعديـنـي
قال العفو انـا مانيـب عنتـر ولاجسّـاس
ولانـي كليـب التغلبـي كـان توحينـي
انا موظفٍ توّي قـراري علـى التربـاس
واقرب غلطةٍ صـوب الشـوارع تودينـي
تفضّل ترا الناس اطفشوا وانت مانت بحاس
وشوف السـرا خلفـك ولاعـاد ترجينـي
قلت الرجا فـي رحمـة الله قـوي البـاس
والا رحمـة العربـان ماهيـب تغنيـنـي
رجّع كلبو الاغراض واترك لي ابـو كـاس
واخُـذ قيمتـه لاكـان بميـه وتسعيـنـي

الكرلا والصني

يوم العرب تكتب قصايد فالشبح والفيكسـار
انا نويت اكتب قصيـده فالكـرلا والصنـي
ليه امدح اللي سعرها فوق المواتر طار طار
لين اصبحت فالسوق مايقلط عليها الا الغني
والا خذاها ديَن راعي الديَن من فوق الفقـار
حتى ينوّخ تحت حمل الدين لـو انـه ثنـي
يوم ارفعوا الاسعار ولّع سعرها فالسوق نار
تقدر بقيمة وحدةٍ منها تجيـب اربـع بنـي
والا الكرلا والصني ياحيهن ذيـك الصغـار
اللي تعَبِّر لازمي لاكـان ضهـري منحنـي
وان جيت عند الجيزخانه مايجي عندي قيار
عشره ريال ترفـع الامبيـر حتـى ينثنـي
وان جيت للموقف يكفّيها لو انه جحر فـار
الزّها فـي اقـرب مكـانٍ ضيـقٍ ماهمنـي
وان جيت فالزحمه وثار العج من تحت الغبار
قامت تمخّلَص بي مع الزحمه وريّحت بدني
وان جيت باسعّر قطعها عند حقيـن الغيـار
عينتها كنها تقول اظهر فلوسـك واخذنـي
والا الكبار كبار مايقـدر عليهـا الا الكبـار
اللي مخابيهم تنفّـخ كـل يـوم وتسمنـي
مواترٍ ضخمه وتبغي واحـدٍ جيبـه عمـار
ماهوب ينشب لابقا فالصرف قرشٍ معدنـي
بعض العرب خلف المضاهر كلبو حاله دمار
دايم وهو والديَن لاغلّـق رصيـده يشّحنـي
واللي عطاه الله من الخير وخذاهـا باقتـدار
اقول لارفّه على نفسه مـن النعمـه هنـي
واللي يقول انك تعَذربهـا ولاعنـدك خيـار
اقول ياربي عطـه منهـا ويـارب اعطنـي
انا خلصت من القصايد فالشبح والفيكسـار
واليوم سويت القصيـدة فالكـرلا والصنـي

امسية بيشه

حضرت ذالليل في بيشة وانا هاوي
عشق ومحبه ومسقط راس وربـوّه
يانفحة العود الازرق واطيب الجاوي
ياديرةٍ حبهـا فالقلـب مـن جِـوّه
لاكان مايعتني في وصفها الـراوي
ولاكان بعض الرواة يجيبه مشـوّه
ولاكان يخطي عليها الشاعر الثاوي
الشاعر اللي يعذربها طفـت ضـوّه
حنا نجيب الخبـر ونعلّـم الغـاوي
ونقول توّه على بعض الحكي تـوّه
هذي ديارٍ عليهـا العـز متسـاوي
فيها الكرم والوفا والطيب والخـوه
فيها تعيش القبايل صف وحـداوي
مابينها غيـر هبـة ريـح وعنـوّه
رجال بيشة رجالٍ تكْـرم الضـاوي
يشهد على ذلـك التاريـخ وينـوّه
يوم السنين العجاف وذيبها العاوي
والزاد شوفه لبعض العالـم منـوّه
ومن يوم ما راعي البل ينقذ الشاوي
وقتٍ حسانيه ماتذكـر معـا سـوّه
بيشة تضم العرب وتنقّـذ الطـاوي
ويشوف كل النعـم ماجـودةٍ تـوّه
واليوم يبرق ويرعد جوّها النـاوي
في حكم شيخ البلاد وضابط القـوه
بومتعب اللي على العدوان مايـاوي
والا على الشعب كله عطف وابـوّه
في عهده المملكة مخزونهـا راوي
شخصيـةٍ كلبوهـا طيـب ومـروّه
الشعر في جو بيشة مالـه مقـاوي
يجي على كيف كيفي واخـذ علـوّه
واللي تعب في محبتها وهو هـاوي
اقول جعل التعب هذا علـى القـوّه

عزك الله يا وطنا

عـزك الله ياوطنّـا عـزك الله ياوطـنّـا
عزك الله عن هروج اللي هروجه ماتفيـده
انت حبك فالضمايـر لـه مشاريـعٍ تبنّـى
بعضها مبني قديم وبعضها تبنـى جديـده
والسفيه اللـي تكلـم بالسفاهـه ماشحنّـا
والله انّا خابرين ان الغبي غلّـق رصيـده
طاوع ابليس وغدابـه ينغـزه منّـا ومنّـا
سل سيفه جعل سيف الحق ينشب في وريده
يدّعي الاصلاح والاصلاح ماعنـه انتونّـا
صالحينٍ قبل ذاك الوجه يطلـع فالجريـده
ماحمد ربه على النعمه وكف الشـر عنّـا
واستراح وريّح العالم من رغـاه وهبيـده
البلاد بخير ياللـي فـي الاذاعـه ممتحنّـا
ماشكينا لك ولانرجـي نصايحـك البليـده
ذي حكومتنا الرشيده تفتخـر فينـا وحنّـا
نفتخر في مملكتنـا ياحكومتنـا الرشيـده
دولةٍ تحْكم بشـرع الله والسيـف المحنّـى
فوق روس اهل الفتن واللي يمسّون العقيده
وانت في لندن تجر الصوت ياذاك المعنّـى
حاملٍ هم الشعوب مـن المياديـن البعيـده
فالبحور المظلمات وترجـي امـواجٍ تثنّـى
تِظهرك من غبة اعموق البحر ياذا الفقيـده
ياهبيل الراي حنّا اللي نزبـن مـن زبنّـا
لانصانا راعي المعـروف يلقـى مايريـده
ياعميل الغرب حنّا اللي بامـان الله ومَنّـا
عايشينٍ في ذرى الاسلام والدنيا السعيـده
غير خلـك فـي ظلالـك لاتقـر ولاتهنّـا
بين كفار اليهـود وبيـن عُبّـاد الحديـده
المشاكل والفتن من جابهـا ماهـوب منّـا
من فتح باب الفتن فك الشياطيـن المريـده
والزمان اللي مضى ماهوب يفرق عن زمنّا
مااختلف غيرالنفوس اللي مذاهبها جحيـده
والهدايه ماتَلقـى كـل مـن حَـب وتمنّـا
نعمةٍ من عند ربي لابغـا يِصلـح عبيـده
والصراط اللي نعَرْفه والاحاديـث اخبرنّـا
واحدٍ تحته يطيح وواحـدٍ يمشيـه سيـده
والكلاب اللي تنابح كـل ماشافـت ضعنّـا
مالها غير الحيود اللي مضاربهـا شديـده
وعـزك الله ياوطنّـا عـزك الله ياوطـنّـا
قالها الشعب السعودي ونا زيّنت القصيـده

معي شهادة جامعيه

معي شهاده جامعيـه ولاعنـدي عمـل
اربـع سنيـنٍ طاولتنـي ونـا مليتهـا
ياليتني مارحت للمدرسـه يومـي طفـل
كان استرحت من الشهـاده ولاشليتهـا
واليوم ادوّج فالشوارع تقول انـي خِبـل
واحلامـي اللـي قـد تمنيتهـا خليتهـا
لاون حظي قام سجلـت فالنـادي شبـل
كان الجماهير اعشقتنـي ونـا حبيتهـا
وان زانت الهجمه وسجلت فالمرمى دبـل
جتنـي ملاييـن المهبّـل ولارديتـهـا
لكن ويش اقول في حظي اللـي منجطـل
اعَنّـزه بـيـدَيّ ويطـيـح لافكيتـهـا
قالوا لي ان سوق الفواكه فتح باب الأمل
تلقى الدراهم فيه ياكيتهـا مـن كيتهـا
وقّفت فالبسطات احَرّج على ثوم وبصـل
والعـم بنقالـي ولـه بدلـةٍ شقيتـهـا
يوم انه اصبح قال وين المغارف والسطل
ذي حزمة الكراث وش فيـك مارشيتهـا
اظهر وفارقني ولاعاد لك عنـدي شغـل
ورواتبك والله ان يجي الحول ماشديتهـا
واقبل علي باللوح كنه بيطرد لـه همَـل
يبـي يعاقبنـي علـى غلطـة سويتهـا
كسرت لوحه فوق راسه وجوّدت الحبـل
واربع مية جلده علـى غاربـه عديتهـا
مايدري انّا ناخذ القوم في وقـت الجهـل
لكـن ذالدنيـا قبـس فوقنـا كبريتهـا
وسافرت ادوّر للوظايف على كوكب زحل
يوم الوظايف فوق الارض انتهى تثبيتها
عينت لي ناسٍ ترحّب وترمـي بالعُقـل
ناسٍ تعَرفْ اسمي ونـا مابعـد مريتهـا
قدّمت معروضي عليهم ونا قلبـي وجـل
من ذلةٍ يظهر لي شروط ما استوفيتهـا
قال الزعيم اهلا وسهـلا تقـدم يابطـل
كل الرقـوم الشاغـره عندنـا صفيتهـا
نبي نحطك مستشارٍ على شـون الـدول
رتبة وزيـرٍ والـوزارات ذايـع صيتهـا
نعطيك خمسين الف راتب ومعها اربع فلل
واربع بناتٍ كـل وحـده تزيّـن بيتهـا
سميت بالله وشكرته على هـذا الفضـل
ذي نعمـةٍ مانيـب مضبـوط لوكبيتهـا
ولاانتبهت الا ونا جالـسٍ فـوق الجبـل
وشهادتي قدمي على الحيد قـد حطيتهـا
عرفت بان السالفه زيف وخـداع ودجـل
قصه تبي تمشي ونـا بالفعـل مشيتهـا
لاكن ماينفـع مقـامٍ بـلا قـول وفعـل
والنـار لـولا شـدة البـرد ماشبيتهـا

عن هواك اقفيت

عن هواك اقفيت مالي فيه داعـي
لعن ابو حـبٍ يجيلـي بالمهانـه
عزتي للنفـس عيـت لاتراعـي
ومن سلك درب الخطا خلّي وشانه
اللسان حصان والانسـان راعـي
وكم عظيمٍ راح من زلـة لسانـه
يرتفع عن سكة الواطي شراعـي
الصقر يبعد عن البومـه مكانـه
وما يفيد الي رحل كثر المساعـي
مابقا بالنفس من صوبـك ليانـه
بايعٍ قربك مع ارخص ما يباعـي
شاريٍ بعدك ولو غليّـت اثمانـه
ويش يجبرني على الحب الصناعي
استوى فيه الوفـا وايـا الخيانـه
لي عيونٍ مبصره والقلب واعـي
والهوى ماهوب ركن من الديانـه

احسب ان القلب


احسب ان القلب يوم ابطيت ناسي
واثر جرح القلب ما يبرى مغـزّه

يوم شفت الي وزى بين الكراسي
ومن ورا لجف الحشا وثّق ملـزّه

رج قلبي كن صايـده التماسـي
والقدم عيّـت عظامـي لا تـدزّه

قلت يا ربي دخيلك ضعف باسـي
ما معي له كون ترحيب المعـزّه

لي ثمان سنين وعروقي يباسـي
عقب ما كانت تروّى كـل حـزّه

راح في دنياه واقفيـت بعماسـي
وانتهى حلم القلـوب المستفـزّه

يوم رحت اتمشى


ياهل المنتدى ماشفتوا اللي جرالـي
يوم رحت اتمشى في مصايف وطنّـا
ديرةٍ في محبتهـا يطـول المجالـي
والنفوس العزيزه للوطـن يطربنّـا
يوم جيت الجنوب ام الجبال الطوالي
والسحاب يتزبّـر فوقهـن ويتثنّـا
بهجةٍ للعيون اللي ملتهـا الرمالـي
والكبود الضمايـا عندهـا يرتونّـا
قلت ادوّر على بيتٍ يظـم العيالـي
ونتريّـح بذيـك المنطقـه ونتهنّـا
عقب ذاك الطريق اللي يجي بالهبالي
ضيّقٍ والحـوادث فيـه منّـا ومنّـا
من مشى فيه يومينٍ تجيه الدوالـي
والعظام النشيطه من مسيـره تونّـا
قلت ياراعي المكتب ترا شف بالـي
غرفتينٍ على جو المصايـف تغنّـا
غرفتينٍ هواها من جنوب وشمالـي
واجهتها على السوده جمـالٍ وفنّـا
قال كانك مصيّف دق خشم الريالـي
ولاطلبناك من حمر الورق لاتضنّـا
مطلبك عندنا والسعر شـيٍ خيالـي
فرصةٍ يالسنافي جت علـى ماتمنّـا
استلم شقتك وارقد من الهم سالـي
واعتبرنا هلٍ لك وانتو اليـوم منّـا
قلت هذي ثمانميه على كـل حالـي
مبلـغٍ راصدينـه للسكـن لاسكنّـا
وانبسطنا ثلاث ايام واربـع ليالـي
في ديارٍ رعَدهـا كـل يـومٍ يحنّـا
ورابع ايامنا من بعد وقت الزوالـي
استلمنا العوايـز فالشنـاط وشحنّـا
قلت حنا بنمشـي ياكريـم السبالـي
البلـد غاليـه وفلوسنـا ماكفـنّـا
قال وين انت رايح يالزبون المثالـي
تحّسب انّـا نسينـا حقنـا تحّسبنّـا
باقي الفين عندك بالوفـا والكمالـي
الحساب المسمّـى تونـا لـه فطنّـا
قلـت ياهملالـي ثــم ياهمـلالـي
يمكن انّـا غلطنـا فالمحـل يمكننّـا
لانكون اتجهنا للوطـن الاسترالـي
والا ذيك النوايا صوب لنـدن خذنّـا
انت ياللي كليت من الثمر كل حالـي
وكل عامٍ تزايد فـي عنـاك وتجنّـا
قد خذيت السهول وقد خذيت الجبالي
كل شعبٍ ولك فيـه العمايـر تبنّـا
الطمع سد عينك ماتشوف الرجالـي
ولاتقدّر ضروف الناس واللي تعنّـا
خاف ربك ترا حب الوطن راس مالي
والوطن حال من دونه زمـانٍ فتنّـا
ليتنـا ماتعنينـا مـن اول وتـالـي
كان ما اخذت دراهمنا ولااحدٍ غبنّـا
ولاطمع في مخابينا الرفيق الموالـي
مانلوم العرب فـي وضعهـم لاتدنّـا
يالله اني طلبتـك ياعظيـم الجلالـي
ياكريم ورزقـك مايجـي فيـه منّـا
رحمتك والعفو يوم الحشر والسؤالي
والرضا يـوم تلقانـا ونلقـاك حنّـا
والقناعه برزقٍ من دروب الحلالـي
وابعد الشر والوسواس والهم عنّـا
واحمد الله على الفيه وبِرد الظلالـي
الله اللي بفضله عزنـا فـي وطنّـا

حال التدوال

قالوا ان السوق مدحـدر
قلـت يالله انـك تسـتـر
الدراهـم فـي المحافـظ
والبنـك شـويٍ ويسكّـر
**
سوقنـا الله يعلـم بــه
طايح في ناسٍ تلعب بـه
يشوتونه شـوت الكـوره
والضعيّف ما يكسب بـه
**
اللـي ورطـانٍ فالصالـه
يصفـق يمينـه بشمالـه
يوم يشوف سهومه طاحت
ودمـوع عيونـه همّالـه
**
واللـي علـى الكمبيوتـر
كنه يعشّـق لـه موتـر
تعطـل وقـت الـتـداول
والهاتف يطلبـه يفوتـر
**
واللي ماخذهـا للصاجـه
يكاكـي مثـل الدجاجـه
كـل فلوسـه فالمواشـي
والراعـي قفّـى بنعاجـه
**
واللي حاطـز فالفنـادق
في جنب الصاله ويشاهق
شـويٍ ويضيّـع عقلـه
يمـد اقدامـه ويفـاهـق
**
واللي طمـر فالمصافـي
غشيـمٍ لاكـن متعـافـي
المبلـغ ماهـوب هويّـن
هذا هاتوا لـه الاسعافـي
**
واللي خذا فـي صافـولا
راحـت عويناتـه حـولا
يظهـرونـه بالنقّـالـه
فـوق الأيـادي محمـولا
**
واللـي تـورط فالزامـل
يترنـح مثـل الحـامـل
لاشافهـا تحـت النسبـه
يعـض اطـراف الانامـل
**
واللـي دخـل فالفتيحـي
عانوه يوقّـف ويطيحـي
يوم انه شـاف التجـاره
راحت في مهب الريحـي
**
واللي تعلّق في الكهـرب
ماله مجـال انـه يهّـرب
يبطي وهـو فـي مكانـه
يتحكـك مثـل الاجـرب
**
هذا حـال اهـل التـداول
بيـن البلنتـي والفـاول
واللي ماهـوب مصدقنـي
يدخل في الاسهم ويحاول

ما يخاف من المباحث

حظ منهو لامشا مايرتبش مـن ظلّـه
مايخاف من المباحث تلزمه والشرطه
طول عمره مستقيمٍ مايعَـرفْ الخِلّـه
مالَهم حب الهليل ولاهبـد فالطرطـه
عند نوقاته وفي جـوٍ يـداوي العٍلّـه
مستريحٍ من تفلساف الزمان وخَرطـه
مامعه في مزهبه غير النجـر والدلّـه
وضوّه اللي شبها ماهيب عنده ورطه
احسن من مهاترات العالـم المنحلّـه
عالمٍ خلف الدوادي والدلـع منفرطـه
يمشي الواحد تقـول انـه بليّـا ملّـه
ناسيٍ ربه وروحـه فاللهو منخرطـه
ولو نشدته عن ظروف الدوله المحتلّه
يظرب الجبهه ويكثر فالبراطم قرطـه
خاوي الوجدان غير من السهر والشلّه
والعلوم الغانمه عنده تحَتهـا شرطـه

جلست افكر


جلست البارحه لين انتهى ليلي وانا سهـران
افكر في زماني وش خذا منـي وش اعطانـي
افكر في الحياه الي تباهت واشغلت الانسـان
عن الدار الاخيره والهته عن عمـره الثانـي
عن الدنيا خذتنا واشغلتنا عن رضا الرحمـن
وخلّت من تبعها فـي النهايـه خاسـرٍ فانـي
كثر فينا الحسد والخير قفّا واقفرت الاوطـان
وصار الشيخ قبل الشـاب طمـاعٍ وقومانـي
تخلينا عن العـادات واصبحنـا بـلا عنـوان
نسينا الي مضى واصبح لنا التقليـد عنوانـي
تغيّر وقتنـا عـز الله انـك يازمـن خـوّان
تقلّـب كـل يـومٍ حـال والله مالـك امانـي
قديم الوقت كان الذكر لاهل الجود والشجعـان
ولاهل المعرفه والطيب واهل الشور والشانـي
الا منه ذكر للناس جاه مـن الثنـا مـا زان
يقال ونعم له ذاك الرجل قد كـان ثـم كانـي
ماهوب اليوم كل انسان له عند الملا ميـزان
وميزانه رصيـده فالبنـوك ان كـان مليانـي
ولا احدِ ينشده من وين جاك المال يـا فنـان
حرامٍ في حرام وصرت به ياشيـن سلطانـي
الا منه دخل في مجلسٍ فيـه الـردى مليـان
نفخ صدره نسى ربه تكبـر صـار شيطانـي
يفز اله الحضور وكنهم حوله حـرس هامـان
وكلٍ يمدحه منهم عسـى يحظـى بالاحسانـي
ومثله صاحبٍ سمسار يغشك باعذب الالحـان
كلامه حالي مثـل العسـل والقلـب بركانـي
اذا له حاجةٍ عنـدك يحطـك للبلـد سلطـان
ويبدي لـك محبـه مالهـا فالكـون ميزانـي
خويك فالرخى وان ضاقت الدنيا عليك يبـان
يهدك لا انقطع حيلك يبيعك بارخـص اثمانـي
تجنب صحبة الخاين ولا ياخذك فيـه احسـان
خوي المصلحه مالـه سـوى ذلٍ وحقرانـي
وثالثهم جليس السو سموه العـرب شيطـان
تحلّى في صفات ابليس قاصيها مـع الدانـي
عذابه لا لقاك بخير شبـت جوفـه النيـران
يبي يبعـدك عـن درب الطهـاره والتديانـي
يزين لك دروب الشـر ويفتّـح لهـا بيبـان
يقول انت العظيم ومنزلتك اعلى مـن فلاانـي
يجي لك من طريق المال والنشوه مع السلوان
وتبدا ما دريت ان الطريـق اقصـاه نيرانـي
ولا منك وقعت اقفى وهو متشمـت ٍ فرحـان
قدر يغويك واقفى عقب ما شافـك بالاكفانـي
وابو وجهين يا ويله نهـارٍ ترجـف الابـدان
يعذب فـي جهنـم ينكـوي بالنـار ويعانـي
يغش الناس في شكله تقول انه من الرهبـان
خدع من صدقه ما يدري ان الشيـخ ثعبانـي
اذا جا بين نـاسٍ يعبـدون الواحـد المنـان
تظاهر بالخشوع وهل دمعه فـوق الاوجانـي
والا منه خلا بالنفـس قـام يطمّـر الحـدان
سعى في كل شيٍ يغضـب الوالـي بكتمانـي
تراشى وارتشى ما خاف من ربي عظيم الشان
كلا مال اليتيـم وبالربـى تاجـر وكسبانـي
وباع المنكرات الي تحط الممجتمـع مرضـان
جنى مالٍ حرام وذوقـه لاهلـه وهـو عانـي
الا ياسامعٍ قولـي تـر الدنيـا لهـا وجهـان
لها وجهٍ حلو والوجـه الاخـر فيـه نيبانـي
وفيها الامتحان الصعب وابطاله هـل الايمـان
لهم فيها شهـاداتٍ الـى الجنـه وغفرانـي
لأن المومن الصالح اذا جته المصايـب بـان
دعا ربه وزاد الصبر فـي قلبـه والا يمانـي
واذا جاه النعيـم يقابلـه بالشكـر والعرفـان
يزكي المال ويعين الضعيـف ويكـرم العانـي
تذكر يا بن آدم واعرف ان ف الاخره ديّـان
غفـورٍ للذنـوب ولا تغـرّه زلـة الجـانـي
وقدامك سبيل الرشد والا الكفـر والعصيـان
ولك عينين في راسك ولك عقـلٍ ووجدانـي
الا يـارب تهدينـا وتغفـر زلـة النسـيـان
وتدخلنا نهـار الديـن فـي جنـات عدنانـي
وصلى الله على محمد نبي الحـق والبرهـان
رسول العالمين اجمع ودينـه خيـر الاديانـي

18

على مثل نشوى ينحر المرء عمره
ويظرب بها من فوق عشرين طابقا
لها في صميم القلب تسعين طعنـةً
من الفم والعينين والصدر ساحقـا
وجسـم يضايقـه اللبـاس كأنـه
يغار على النهديـن حتـى تمزقـا
يضيعون نيرفانا وبرغوث جنبهـا
توارى النجوم ويظهر البدر شارقا
اذا شفتها قامت تسابـق مدامعـي
كفـردٍ تعسّكـر ثـم داوم فطبقـا
ومثلي جماهيـر تحـرّوا قدومهـا
على شاشة التلفاز والشوق حارقا
لقـد عقّرونـا يارجاجيـل انهـم
نساء على خطف العقول سوابقـا
فإن رحت من نشوى وجدت كلوديا
وإن عدت لديانـا فـؤادي تعلقـا
وإن قلت يانيكـول يكفـي تغنجـاً
أجابت بتخسر لو قميصي تشققـا
وعينـاي تهتـزان والفـم فاغـر
وكفي مع الريموت كادت تلاصقـا
أنـام ولا ادري بــدون مـخـدةً
وأذهب في بحر الكوابيس غارقـا
وأصحو كمن نام على ظهر ناقـةٍ
وجنبي من المركـا عليـلً مفتقـا
أناظـر تلفـازي بعيـنٍ مريضـةٍ
وعينٍ عليها النـوم لازال عالقـا
وأذا بفتـاة تتأرجـح فالـهـوى
نحيلة خصـرٍ والعيـون سوارقـا
تقول رولا معكم وتدنـو بعمرهـا
شحيحـة لبـسٍ والشفـاه تعانقـا
لقد اتعبونـي شلـة الغنـج انهـم
بنـات امانيهـن جمـع العواشقـا
ومليت من شوف الرذيلة والخنـى
وقررت ان اهجر مكان الفواسقـا
وقمت الى الدش الخبيـث مكسـراً
وبعت الرسيفر والريموت مفارقـا

البارحـه يـوم كـلٍ راح لفـراشـه
عيّنت هم الوظيفـه ماخـذ فراشـي
الناس في حالهـا تمشـي ومعتاشـه
وانا على ذمـة التحقيـق منحاشـي
اهل الوظايف صلاة الصبح غبّاشـه
وانا على مرقـدي كنـي بالانعاشـي
كلٍ تجوّز واخذ له يـا عـرب باشـه
واصبح مع الناس مبسوطٍ ومعتاشـي
شريت لي غتـرةٍ بيضـا ودشداشـه
واقبلت صوب المكاتب كني الشاشـي
قال الموظف ملفـك وسطـه قراشـه
كسرة تميسٍ عليهـا الـذر يهتاشـي
صديت مابـي سواليفـه وفرفاشـه
مانيب فـي حـال مـزّاحٍ وفرفاشـي
لو شغّلو لي مسلسـل خالـه قماشـه
والا ثلاثين حلقة طاش مـا طاشـي
القلـب كنـه يحَـرّك فيـه خرّاشـه
والكبـد كنـه ينقشّهـا بمنقـاشـي
قلت ابك عطني دقاق الهرج واجراشه
ابي كـلامٍ يطفّـي لاهـب الجاشـي
قال انت مافيك امل تصبح فتىالشاشه
ولا شريطي تبيع وتشتـري كاشـي
وشهادتك حطهـا الديـوان بخياشـه
وطافت عليها السنين ونسبتك ماشي
والا عيونك تقـول عيـون خفاشـه
وحده تكبّس والاخرى تضرب فلاشي
وان قمت تمشي يجي رجليك رعّاشه
كنك تشوّت كوور في وسط الاحواشي
احسن لك تروح سوق البدو وعشاشه
تبسط على فصفصٍ وتبيع فشفاشـي
عودت ما عاد ابي سمـه وطرّاشـه
الله ولا حاجـةٍ تجبـرك بالـلاشـي
اليوم الانسان تقديره حسـب كاشـه
لو كـان مالـه منسيـه الترواشـي
حوايجه تنقضـى وتجيـه برماشـه
لو ان مخّـه معبـا تبـن وخياشـي
لكـن قالـو لهـا دنيـا وغشاشـه
واقول انا كل نفس ورزقهـا ماشـي

قالـوا تحـب النـوادي قلـت لابالله
مانيب اشجّع ولانيب اعشق الكـوره
انا بـدويٍ واحـب النجـر والدلّـه
واحب شوف الدبَش والارض ممطوره
هذي هواياتـي اللـي تبـري العلّـه
ولاشك كلٍ علـى شفـه ومنظـوره
يوم ان راعي المدينـه زيّـن الفِلّـه
والبايكه حطها للجمـس مقصـوره
وجا بالخدم والحشم كلٍ علـى ملّـه
واحد مسيحي والاخـر عابـدٍ ثـوره
الين راحـت زوايـا البيـت محتلّـه
كلٍ علـى مذهبـه ويحـط دستـوره
والوِرع لاولِد قالو ويش نعمـل لـه
امـه تـداوم نهـار وليـل دكتـوره
تـداوي النـاس ثـم تـدوّر الفَلّـه
وماهيب لمقابل الورعـان مجبـوره
هاتوا له مربيّه لاجـاع تفطـن لـه
تعطيه لاقـام تالـي الليـل قـاروره
ثم جا هزيـلٍ وبانـت فالولـد خِلّـه
يصبح ويمسي على اندومي وشابوره
ولاكبر سنـه يهيـن العـوَد ويذلّـه
يقول عـوَدٍ مخـرّف وانتهـى دوره
يالله دخيلك مـن الحقـران والزلّـه
ومقابل اهل الردى بالصوت والصوره
اللي حياته مـع السهـرات والشلّـه
ولابان وجه النهـار مطفـيٍ نـوره
هذاك حطه على يسـراك ثـم زلّـه
ولاتاخذك فيه رحمه واجرح شعـوره
قٌرب الهلايـم يعـل القلـب ويسلّـه
ويحط فالكبـد شـيٍ كنـه باكـوره
الله علـى واديٍ تـو المطـر علّـه
والسيل خلا البطاحـي كنهـا نـوره
جايه من الوسم مطّـار علـى حِلّـه
ستين ليلٍ وهـي ماجفـت زهـوره
مع صحبةٍ نـادره فالمجتمـع كلّـه
مافيهم اللي يشل الكبـر فـي زوره
احسن مـن مقابـل الخـدام والفلّـه
واحسن من مشاهد الجمهور والكوره

مثل تالي النهـار اللـي تقفـاه ليـل
والشفق تحت قرص الشمس متبعثري
يالله انّي دخيلـك يامنجـي الدخيـل
جعلنـي دايـمٍ متهـوم ونـا بـري
مايـذل العزيـز ولايـعـز الذلـيـل
كود مسرى الخطا في ليل ماينسـري
حسبنا الله على الظالم ونعـم الوكيـل
كل ماشفت طلـة زينـب العسكـري
ياوجودي وجود اللي عشق مستحيـل
قلت وش تحتري وقال وش تحتـري
قلت طرقي ومتغرّب وعابـر سبيـل
والمصيبه هنا يابـري حالـي بـري
والله اني من الوزن الثقيـل الثقيـل
مير بعض المواقف ماتجـرّي جـري
مادري ويش احط ولادري ويش اشيل
بس اغنـي كـذا يالابـس الغنـدري
زينب العسكـري bmاخـر موديـل
ماركـه عالميـه تتعـب المشتـري

اقبلت مثل


اقبلت مثل القمر لامـلا الدنيـا شعـاع
كوكبة حسن الكواكب حواليهـا تـدور
اشرقت والليل من حسنها قفّـا وضـاع
تطرد الظلما وتملا سـواد الليـل نـور
تمشي الدنيا على كيفها في كـل سـاع
زهرةٍ خلّت ربيع السنه عشـرة شهـور
صاغها ربي وسخّر لها حلـو الطبـاع
والدلال وزين الاخلاق والعينيـن حـور
والشعر الاسود تحدّر على ذيك الوسـاع
يحتظن عودٍ تثنّى مـن الفتنـه يفـور
ترسم البسمه على وجهها سن الرضاع
طفلةٍ ما عاندتهـا تصاريـف الدهـور
آية فيها مـن الزيـن مـا لا يستطـاع
منهجٍ فيه التواضـع يـدرّس للعصـور
يا هنا حظي رقى فـي علـوٍ وارتفـاع
يوم جيتي في طريقه عرف درب السرور
صك بابه عن دروب الهوى سمعٍ وطاع
ما يخالف شورك اليوم يا بـدر البـدور
اضحكي خلّي هموم الحشا تمسي جياع
فرحتك عندي تساوي ملايين القصـور
اقبلـي يـا درةٍ لا تسـام ولا تـبـاع
غطرفي يابسمة الصبح لاحزان السحور
ارعدي يا مزنة الغيث من دون انقطـاع
في صحاري عمري الي قضى كله قفور
رددي لجروح الايـام فـي قلبـي وداع
واسمحي في جيتك للمحبـه بالضهـور
لي خفوقٍ قبل اشوفك هقيت انه شجـاع
لين جاه من المظاليـل سلهـامٍ يجـور
جاك من حبه وهمه وشوقـه باندفـاع
يطلبك يا حلوة الوصف تجبير الكسـور

متى يعـم الفـرح ويجـوّز الخاطـب
ويصيـر عنـده بنيـاتٍ وورعانـي
يقوم يلقا فطـوره فالضحـى زاهـب
ويسرح وهو خاطره ماهوب زعلانـي
ماهوب واقف على الصندوق ويحاسب
لو ضيّع ريال شبـوا فيـه نيرانـي
دنياً تقلب علـى المغلـوب والغالـب
كـلٍ وردهـا وكـلٍ راح ضميـانـي
قد قالوا اهل المثايل مالهـا صاحـب
كم واحـدٍ خلتـه فالـدرب خسرانـي
والحظ كانه فزع لـك قـام بالواجـب
ينبت لك سنون وقـرونٍ وجنحانـي
وان كان حظ الشقا لزمك مع الغـارب
والله ان تشيّب عيونك وانت فقرانـي
ياللي توفقت يوم انه دعـا الشايـب
في تالي الليل ربه وانـت سهرانـي
واليوم في مكتبك مستانس وناصـب
كنك تشـوف البشـر نمـلٍ وذبانـي
نفخت راسك وقمت تسـب وتطالـب
كن العرب يطلبونـك بـر واحسانـي
ماخفت بطش الكريم الرازق الواهـب
اللي خلقك وحفظك وحطـك انسانـي
ماتدري انه عملك اللي بـه مطالـب
واللي يخون الامانـه مالـه ايمانـي
والا انت ياللي حلقت الدقن والشارب
تبي تزيّـن وعيّـا الوجـه مازانـي
ضاعت هويتك لاموجـب ولاسالـب
الوجه مصلـوخ ورمـوشٍ وحجّانـي
الدين ينصحك يابن النـاس ويعاتـب
يقـول سنـة نبيّـك شانهـا شانـي
ياليتني ما دخلـت المدرسـه طالـب
ولا تعلمـت مـن حمـدي وحمدانـي
ضاعت حياتي وانا مهتـم ومواضـب
واتلى التلايا مع اهل البيت عطلانـي
وقت تبسـم مـع الفنـان واللاعـب
هـذاك كبتـن وهـذا قيـل فنـانـي
صاروا شيوخ الزمان الخادع الكـاذب
يظِرَب لهم بالمثل فـي كـل ميدانـي
والله لانيـب لاحـاسـد ولانــادب
حظي وراضي بمقسومـي وماجانـي
ماغير اعبر عن اللي فالحشا راسـب
واشكي على الله من ظروفٍ تحدّانـي

الشعـب لاصـار مايرتـاح للحاكـم
ماينفعـه يـوم كـلٍ ينفعـه جيشـه
ياناس شفتوا نهايـة قصـة الظالـم
اللـي ثلاثيـن عـامٍ نافـخٍ ريشـه
اليـوم قـدام بـوش ونايبـه جاثـم
مايبغي الا الشراب ولقمـة العيشـه
من اول الشعب رهن اشارته خـادم
واليوم فالكونجرس والراس في خيشه
يالله دخيلك من سهوم الدعا الصـارم
اللي لهـا فالسمـا لجـه وتخريشـه
هو ذنب الاكراد والا غزوه الغاشـم
ساعة دخل فالكويت مقوّمـه طيشـه
والا يتامـاً علـى تشريدهـم والـم
ساقوا عليه الدعا صُفـره وتغبيشـه
ياللي بعد في حياتـك سالـمٍ غانـم
الحق زمانك وخل العزف والريشـه
ماطار طيـرٍ وحلـق فالسمـا حايـم
الا وصل الارض في تالي مطاريشـه
والهرج لاصار مايدري بـه الفاهـم
فان الغبي قام يبني عمّـر الشيشـه

زادت القوات فـي درع الجزيـره
واصبحت الاخبار من ديره لديـره
كل مسلـم رافـعٍ كفـه ويدعـي
يطلبون الله عسى في الامر خيـره
اليهود اليوم شبّـوا فـي طرفنـا
والحطـب منـا وشبتنـا سعيـره
جابهـم صـدام جاذبهـم عليـنـا
خدمـةٍ للغـرب قدمهـا كبـيـره
العميـل اللـي تعامـل بالخيـانـه
يوم لعبوا بـه شياطيـن الظهيـره
باع دينه ثم باع ارضـه وشعبـه
ولا غرابه قبلهـا بايـع ضميـره
طـاوع امريكـا عليهـا لعنـة الله
عزوة الكفـار والقـوم الحقيـره
درّسوه الغدر في فصـل الخواجـه
لين جاله سيـرةٍ واخـس سيـره
وغرروا به في ملـذات المعاصـي
لين راحت همّتـه كبـر الشعيـره
قالوا انت اللي تـدوّرك الزعامـه
ياسليل الجـود ياشيـخ العشيـره
اضرب اللـي مايطيعـك بالقنابـل
خل ذا ميّـت وذا رجلـه كسيـره
وادعس الشعب العراقي تحت رجلك
مايقوم الشعـب واحوالـه فقيـره
ذبّح السنّـه عسـى ربـي يسنّـه
حـزةٍ كــلٍ يــدوّر للستـيـره
انشدوا الاكراد عن ذبـح العجايـز
كيف كان العود يذِبح في سريـره
وانشدوا الاطفال عن موتة حلبجـه
يوم خلّوهم علـى الحدبـا نثيـره
ماسلم من فعلهـم حتـى البهايـم
احرقوها باللهب وسـط الحظيـره
كل هذا والعرب في شغـل شاغـل
فالملاعـب يتبعـون المستـديـره
وكل هذا والعـرب فيهـا المحافـل
والطرب والرقص مايرتـاح زيـره
وبعدها جا للكويـت يجـر جنـده
عوّد الخاين يبي ينهـب قصيـره
كبـرة جنوبـه والانـذال لعبوبـه
النفوس اللي على الامـه شريـره
والا جيرانه لهـم حـق الكرامـه
ارتكوا له يوم الاوضاع الخطيـره
يوم صكت بـه طوابيـر الخمينـي
ضايعين الدين عميـان البصيـره
اعتزوا له وارخصوا له كل غالـي
وافتحوا له كـل بيبـان الذخيـره
لكن الخايب علـى ماقيـل خايـب
مايذب الريـع وشبـوره قصيـره
ينهب الدو له يحَسّبهـا بطـو لـه
يذبح الرجـال والحرمـه اسيـره
وخّذ له ربي والاصحـاب خذلوبـه
عادة السرقـان ذمتهـم صغيـره
واخرجوه من الكويت اللي غزوا به
وانتهى دوره مع الحلقه الاخيـره
عقب ما يسّر لهـم اكبـر مهمـه
ودنسوا باقدامهـم ذيـك الجزيـره
حركوا باسلوبهـم كـل المشاكـل
واقلبوا الاوضاع في اشياء كثيـره
كـل يـومٍ ينفتـح بـابٍ عليـنـا
ونتصدى له ويفتـح بـاب غيـره
واستمروا فـي تماثيـل الخديعـه
قالوا ان صدام قد وصّـى وزيـره
يظرب اسرائيـل بسـلاحٍ كمـاوي
تنعـدم منـه الجماهيـر الغفيـره
ودّنا ندخـل عليهـم فـي وطنهـم
نلزم الطاغـوت ونحـدد مصيـره
وانطبق فيه المثـل يومـه تحقـق
مثل بن برمان يـوم انهـد طيـره
مالقى منه العرب غيـر المـذ لـه
ولا لقى منه العـراق الا المريـره
واحشدوا القوات عبّـاد الكنيسـه
الجيوش اللي على الصحرا خبيـره
200 الـفٍ لهـم حنّـه ورنّــه
لا مشا طابورهـم تسمـع هديـره
وسخروا الاعلام من شان القضيه
يشحنون اهل القلـوب المستذيـره
مايبون الا احتلال ارض الخلافـه
والذهب والزيت والبيـر الغزيـره
والتفاني في رضا الطفـل المدلـل
لا حدٍ يخطـي عليـه ويستثيـره
واستفاد من القضيه شعـب واحـد
شعب صهيوني وشـارونٍ مديـره
المصايب كلها مـن تحـت راسـه
سلسلة صهيون مطعون السريـره
دخلو فالقـدس باقـدام النجاسـه
ياشبـاب الديـن حالتنـا عسيـره
صابنـا ذلٍ عسـى ربـي يزيلـه
شوفة المسلم وهو يذِبـح يسيـره
يالله انك تنتقـم مـن كـل ظالـم
يـا كريـمٍ كلبـونـا تستجـيـره

عزك الله ياطويل العمـر ياصقـر العروبـه
ياحكيـم الـراي ياهـداج ياجـزل العطايـا
عشت ياريف الضعوف اللي يشوفون العقوبه
انت يانسل الشيوخ اللي يجيبـون السبايـا
كم فقيرٍ جا على بابك وهو تومـي جيوبـه
ويوم عوّد صوب ربعه عوّد جيوبـه ملايـا
انت لك شخصيةٍ بيـن الجماهيـر امحبوبـه
كلّبو شعبك يابـو متعـب يبادلـك التحايـا
ونا نفسي في قصيد المدح ماهيب امغصوبه
غير لاجا في مجالك تجـري بيوتـه جرايـا
وما جذبني للحديث الا الصراحـه والعذوبـه
في حديثك يابعـد كـل السوالـف والحكايـا
كان عندي موترٍ ماهوب يروى من شروبـه
يشرب البنزيم شرب الهيم لاورْدت ضمايـا
كل ماجيت المحطه وجهت الانظـار صوبـه
قالوا العمـال هـذا وقـت توزيـع الهدايـا
نصف راتب حظرتي دوبه يكفي الجيب دوبه
ماخذٍ حقه من الراتـب علـى كـل النحايـا
مامليت التانكي من يـوم بـادرت بركوبـه
الا مرّه وحده اذكرهـا وسـوا بـي سوايـا
اشرقه كثر الوقود اللي تزايد فـي صبوبـه
وقام شكمانـه يثـوّر بالمدافـع والشظايـا
لين راح الخط بالدخان كنـه فـي رطوبـه
لاكحيح الناس من خلفـي تباريـه الدعَايـا
لين جا وقت القرار وصارت البنت امخطوبه
العروسه مملكـه واللـي خذاهـا بالحكايـا
الزعيم اللي عصابة راسه اليوم امعصوبـه
في سبيل الشعب يظهر كـل يـومٍ بالمزايـا
خفف البنزيم جعل الله يخفـف مـن ذنوبـه
وعمت الفرحه على كل المدايـن والقرايـا
الرجاجيل افرحوبـه والنساويـن افرحوبـه
وافرحوا الفتيان حتى وافرحوا حتى الصبايا
كلبوا العربان لجّوا بالدعـا يـوم اسمعوبـه
يالله ان تجـزاه بالجنـات يـارب البرايـا
ولاغرابه لاعطاه الطيب من نفحـة هبوبـه
بوه حاكم نجد وامه بنـت شيخـان الطنايـا
الكرم كنه مفصّل له علـى تفصيـل ثوبـه
لاعطا ماعاد يدري ويش يبقى مـن بقايـا

ياراعي الموتر اللـي بايـحٍ لونـه
اللي من الشمس راحت معظم الوانه
مكروف لين انتهت جلدة دركسونـه
واربع سكاريب تلـزم روس بيبانـه
من مصنعه ماتغيّر زيـت سيفونـه
صوت السبايك على الجنبين حنانـه
ولابه انبير يمشي وسـط طبلونـه
سيورهن من قديم الوقـت خربانـه
والقير لاعشّقـوه اثنيـن ينسونـه
مايعتقه لين يظهـر زيـت شكمانـه
والمرتبه في بطون الضان مدفونـه
وجنوبها من ثقيل الحمـل هريانـه
ورفارفه جنب طنب البيت مركونـه
طاحت مساميرهـا والحـال تعبانـه
ماترحم اللي معك يمشي على هونـه
مطفّـي النـور والرجليـن حفيانـه
يسوق عمره علـى دربٍ تسوقونـه
قلبه تحطـم وهـذا صـوت رمانـه
يابو خـدودٍ تشابـه خـدة فلونـه
ماهيب من رشـة المكيـاج مليانـه
وبريقـعٍ صغّـروه اللـي يسوونـه
مـرٍ يغطـي ومـرٍ ذيـك لحيانـه
والجسم شيٍ يدوّخ مـن يشوفونـه
بنت من مقابـل الخلفـات فسقانـه
ماهيب في دجة الموضـات مفتونـه
اللي مع السـوق رجليّـه وهجانـه
الوجه مكشوف والخديـن مدهونـه
ولاتخلّـي ولارجّـال فـي شـانـه
يابنت شرع السواقه ويش قانونـه
يوم القوانين عنـدك مالهـا خانـه
قالت مع البـر مملوحـه ومزيونـه
جوٍ يغطّـي علـى الـزلات ميدانـه
وسواقةٍ فالمدينـه غيـر مضمونـه
لاشافوا البنـت كـل طلّـع لسانـه
في زحمة الناس كلٍ يفـرك عيونـه
تقول جمهـور فـنٍ شـاف فنانـه
سواقتي من ورا الابرق ومن دونـه
من خلف نوقات ابوي وخلف غنمانه
الشايب وحْيد والرجليـن مرهونـه
ولابه اخـوٍ يقـوم بـلازم اخوانـه
مانيب اعَرف البحر يللي تعرفونـه
ولاتمشيـت تالـي الليـل سهرانـه
ولابي الناعم اللي يسحـب ردونـه
اللي على طول يومـه ياكـل لبانـه
شفي من البـدو رجّـالٍ بكرتونـه
معَـرَّبٍ راس ابـوه وراس جدانـه
يصلّي الفـرض لاقامـوا يصلّونـه
ويصوم شهر رمضان ويحفظ اركانه
ماهوب لاجا الضحى دنّق على التونه
ولاقالـوا الله اكبـر شـب دخانـه
قلت اشهد انـك سنافيـه ودندونـه
والعقل نعمه من المعبـود سبحانـه
والسالفه حدهـا ذربـه وموزونـه
يطرب لها المستمع ويقـول فنانـه

عند باب البنك شفت بنيـةٍ كنهـا طماطـه
شلّت من الزين حملٍ ماحـدٍ يقـدر يشيلـه
والعرب من حولهـا كـلٍ يـدوّر للوساطـه
كل واحد يعّرض الخدمات لعيـون الجميلـه
اخلفت شوفي وجيت مزحلقٍ فـوق البلاطـه
عقب مازحلق فؤادي في محاجرها الكحيلـه
اضحكت من منظري قلت اضحكي ياذالحماطه
والله ان ضحكك يرد الروح فالكبـد العليلـه
وقمت احت الثوب واسوق البلاهه والعباطه
يمكنٍ تمشـي عليهـا خفـة الـدم الثقيلـه
واثر باب البنك قدمي قد تربّط فـي رباطـه
والقزاز من النظافه ماعليـه ايـة وسيلـه
واخر علومي بعمري يوم ورّانـي نشاطـه
ياصدمني ياصدمتـه المهـم انهـا مهيلـه
طرت كني سندبادٍ يمتطي صهـوة بساطـه
واسمع اهروج العرب حولي ونا اجر الطويله
ما وعيت الا وراسـي حازمينـه بالخياطـه
غـرزةٍ منـا ومنـا غرزتيـنٍ مستطيـلـه
الله انه لايعيـد البنـك وخـدود الطماطـه
كانها حطت على راسي وسـومٍ مستحيلـه

قالوا اكتب فالمدرس والمـدارس والدراسـه
واعتبرها مهنةٍ لـك كـن ماعنـدك وظيفـه
قلت هذي ياجماعه لاتكـون مـن السياسـه
ونتوهق فـي دهاليـز السياسـات المخيفـه
قالوا ابداً ذي تراها من فمك حتى الرياسـه
توصل اللي فالمكاتب جالسٍ فـوق القطيفـه
قلت انا مانيب اعَرْف الا الخفاره والحراسـه
نابـتٍ فالعسكريّـه واهتماماتـي خفيـفـه
والمدرس لقبوه المجتمـع راعـي الوناسـه
ماخذٍ حقه مـع العربـان والمهنـه شريفـه
الاجازات اربع اشهر ماتقلـل مـن حماسـه
بعدها يرجع على الطـلاب واخلاقـه لطيفـه
والتقاعد مايجيه الا ليا مـن شـاب راسـه
لاخذا ستين عـامٍ وانتهـى باقـي خريفـه
قالوا اليوم المدرس صار منـدوب التعاسـه
والمزايا اللي ذكرت اوصافها صارت كليفـه
مايعيّن غير لامنـه فقـد كامـل احساسـه
كل يومٍ ينتظر دوره علـى وجـه الصحيفـه
والرويتب مايسـده فـي مقاضيـه ولباسـه
والحصص تكثر عليه ان كانت جنوبه صخيفه
والتلاميذ اصبحوا يمشون في درب النجاسـه
واصبح الاستاذ عرُضَه للعبـارات السخيفـه
وان رفع خشمه يورونه قوانيـن الشراسـه
كم مديرٍ ذوّقـوه مـن المشاعيـب النحيفـه
واختنا فالله جاهـا ماتعـاف مـن النحاسـه
واحذفوها فالحجاز وهي تبـي وادي حنيفـه
جت تبي ستر الوجيه وفكةٍ مـن الانتكاسـه
يطلب اللي فالـوزاره مايضـرون الضعيفـه
ماحدٍ عبّر كلامـه وانتهـى عزمـه وباسـه
وارتخى شوفه وهو يشكي من الحال الكسيفه
بعدها شـد الرحـال وودع احبابـه وناسـه
ساعةٍ فيها الوليف يموت من فرقـا وليفـه
عقب ماشابت عيونه جا قرار البنت حاسـه
ولاتهنّى في شتـاه ولاتهنّـى فـي مصيفـه
قلت كلٍ عارفٍ تفصيل ثوبـه مـن قياسـه
وعادة الدنيا على الانسان ماتمشـي بكيفـه
غير خلوها قصايـد فالشجاعـه والحماسـه
يمكن ان تصحي القلوب اللي بعد فينا نظيفه

قال بن جدلان منطـوقٍ عـذوب
ماعمر خربان صلّح لـه خـراب
والحقيقه شاعر اكلب له اسلـوب
يلفت الانظار ويثيـر الاعجـاب
ودي اجاريه في قـص الـدروب
واتبع الاستاذ في شرح الكتـاب
يوم جا فالمجتمع بعض العيـوب
فتنةٍ يندّى لهـا وجـه الصـواب
مسلمٍ يلبس له عمامـه وثـوب
ويتحـزّم بالقنابـل والـحِـراب
ناذرٍ عمره على ذبـح الشعـوب
كن ربي نزّلـه سـوط العـذاب
ينسف الغافل وهو مالـه ذنـوب
ثم يقول ارجي من الله الاحتساب
وين تبغي الخير يالشيخ الكـذوب
وانت تعدم خلق ربـي ماتهـاب
كان ودك بالجهاد ولـه طـروب
فالجهاد اليوم لـه ستيـن بـاب
عان بيت القدس ذلحين مغَصوب
غاصبه شارون زيـزوم الكـلاب
رح وشب النار في بيته شبـوب
خل راس الكفر يدفـن فالتـراب
ويش تبغي بالمشاكل والضـروب
مانت بمسلّط على قطـع الرقـاب
الله سبحانه يسامح مـن يتـوب
وانت عندك من عصى مايستتاب
غيروا فكرك مريضيـن القلـوب
زمرة التكفيـر تبّـاع السـراب
من عقب ماكنت مامون الجنـوب
عايشٍ فالمجتمع وامـن جنـاب
فـي بـلادٍ لافسـاد ولاحـروب
عنـدك الخيـرات مالـذ وطـاب
صار كلٍ يطردك من كل صـوب
لين رحت مشرّدٍ بيـن الشعـاب
واخرة شمسك يوافيها الغـروب
ذابحٍ نفسـك وياشيـن العقـاب
لان دم النـاس مامنّـه هـروب
يلحقك لو كنت من فوق السحاب
يالله انك تجعـل الفتنـه تـذوب
وترحم اللي مات وتعافي المصاب
وتحفظ ارض المملكه من كل نوب
ياكريمٍ بامـرك الدعـوه تجـاب

بعض الكلام يشوّش الراس تشويش
ويفـك للتفكيـر بـاب ودريـشـه
والشاعر اللي حده الكبـر والطيـش
ليـن انتفـخ زوره ونسّـاه بيشـه
مايدري ان الهـرج قافيـه تفتيـش
والناس تدري ويش تحت الحشيشه
هذيـك بيشـه ياقليـل المطاريـش
دار المراجـل يـوم قـل المعيشـه
فيها الرجال اهل الوجيه المباهيـش
وهبّـات ريـحٍ بالكـرم مستجيشـه
وان ثارت العجّه وركبوا على الجيش
مركاضهم سقـم الكبـود الغشيشـه
يوم ان بعض الناس خلف المحاويش
يتبـع وشاوشهـا وتتبـع وشيشـه
واليوم في حكم الشيوخ المداغيـش
اهل الوجيـه المسفـرات البشيشـه
ماطنشوا بيشـه ولاطنشـوا بيـش
كل المـدن فـي ظلهـم مستعيشـه
راعي الخطا نستقبلـه بالشواكيـش
وراعي القدا يلقى السمن في جريشه

الله انـه يلعنـك يادولـة الكفـر البليـده
ياعدويـن السـلام وياعدويـن الرسالـه
كل يومٍ عندكم في حربنـا خطـه جديـده
يازباله مايجي من وسطها غيـر الزبالـه
ياخنازيـر اليهـود وياجواريـه وعبيـده
لعنبوكـم يالحثالـه لعنبوكـم يالحثـالـه
مالقيتوا الا رسول اهل السلف واهل العقيده
ترسمونه بالصـور وتعذربونـه فالمقالـه
كل يومٍ صورته تنشر على وجه الجريـده
يالله انك تنتقم من فعلهـم يـاذا الجلالـه
يادعاة الكفر يـاروس الشياطـن المريـده
يادياجيـر الظـلام ويامزاميـر الجهالـه
ياتماثيلٍ عليهـا الغـرب يفعـل مايريـده
اخسو اخسو لارحمتوا ياطواغيت الظلالـه
ياوجيه الخير هذي حملة الخيـر المفيـده
قاطعوهم فالبيـوت وقاطعوهـم فالبقالـه
عذبوا عبد الدراهم بالعـذاب اللـي يكيـده
كل واحد عن كلاب المحرقه يلـزم ريالـه
خلّو الكافر من الحسره يقرّط فصبع ايـده
لاخسر ماله ودمرتوا حياتـه شـان فالـه
لين يدرون ان ورا ذاك الرسول امه مجيده
يرخصون انفوسهم في حب ابوالقاسم وآله
والله ان الدنمارك الخايبه ماهـي وحيـده
خلفها تاقف طوابيـر الحماقـه والنذالـه
مايبون الدين يبقاله على الدنيـا شريـده
والله اللي حافظٍ الاسـلام ومثبّـت رجالـه
الرجال اللي عزايمهم على الكافـر شديـده
لاتمرّد طمّنوا راسه تَحَت سيـف العدالـه
بإبي انت وأٌمي انـت يـا أغلـى فقيـده
يارسولٍ كلبو الامه تشوف اللـي جرالـه
والله ان قلوبنا يالمصطفى ماهـي سعيـده
يوم تسمع وترى الخنزير يفعـل مابدالـه
حسبنا الله العظيم اللي صدوقٍ في وعيـده
في نهارٍ فيه الانسان يتبـرا مـن عيالـه

شاعر الجوّال شـرّف وكلمنـا
قال ياراعي التلفون وش حالـك
من ميانتنا علـى هاتفـك قلنـا
ياهلا بالصفر في رقـم جوالـك
خطـةٍ مرسومـةٍ لاتجادلـنـا
واستمع في شاعرالهاتف احلالك
قلت ياشيـخ التلفـون متعبنـا
رقم متميّز من اللي على بالـك
مشترينه ياولـد مـن دراهمنـا
شي ماتقدر عليه انت واشكالك
قال هذا الهرج ماهوب يعجبنـا
شكلك تحب المشاكـل تهيالـك
لاتخليـنـا نغـيّـر مذاهبـنـا
نقطع الجوال ونضيّع ارسالـك
قلـت لابالله ذالحيـن هـونـا
واحترينا فـال ربـي ولافالـك
ودنـا نمـزح معـك يامدللنـا
لاتصـدّق كـل علـمٍ يودّالـك
كـل ماتامـر علينـا مناسبنـا
شايبٍ غالي وتامر على عيالـك

الله انه يعين اللي منـاوب خميـس
البشر مستريحينٍ وهو فـي قيـار
لايعين صحيـب ولايعيـن ونيـس
بس يِدرِج عيونه من جدار لجـدار
العرب يفطرون وياكلـون التميـس
عقب فنجـال بـنٍ فايـحٍ بالبهـار
والمعنّى فطـوره شلفتيـنٍ يبيـس
سندوتش الطماط وسندوتش الخيار
مشتريها من اللي قد مرسها مريس
صب فيها الفلافل لين راحت دمـار
حظه اقشر ومثله في الاوادم تعيس
مالقا من كفيله غير شـق الـزرار
يوم جابه وهو ماله سبوعٍ عريـس
بايعٍ كـل مايملـك ولا لـه خيـار
قال خمسة شهورٍ تشتغل ياخسيـس
لين تقضي دراهم فيزتـك ياحمـار
ثم تاخذ ثلاث شهور عندي حبيـس
لين ابيع التريله وانتهـي مالعَمـار
والسنين البواقي تدّهـر فالتبيـس
بين مكه وجـده والبلـد والمطـار
هز راسه وقال(اسفيك بابه منيس)؟
واختلف لون وجهه في سواد وحَمَار
قال انا فيه مسلم وانت والله ابليس
والتفت صوب عودٍ طايـحٍ فالغبـار
واشتبك مع كفيله يوم حمي الوطيس
لين راحت فنايلهـم علـى كـل دار
منظرٍ مايشابه غير يـوم الخميـس
يوم انا فالمعسكـر والاوادم حـرار

صدمت الرصيف وصدمتي مالها تصليح
ظربني على البابين واخلف دركسونـي
سبايب غريرٍ في بحور الهوى سبّيـح
ولا مرني مثلـه مـع اللـي يمرونـي
خزرني بعيـنٍ كنهـا ركلـة الترجيـح
ليا خلّت الجمهور صاحـي ومجنونـي
سهوم المنايا من ورى نظرة التلميـح
لا عينت قلـب مـع الزيـن مفتونـي
يروح الحشا من فعلها كنـه التشليـح
ولا ينفعه طب البشـر لـو يداوونـي
وانا ما برا حالي وخلا العيون تسيـح
يكون الذي ركّب على القلـب كيلونـي
غزالٍ صغير السن ويموت فالتسديـح
يحب العرب خلفـه وقدمـه يطيحونـي
لا قام يتمأيل ويحَـذف قذلتـه للريـح
طوابير توقف لـه ونـاسٍ يدوخونـي
على زين عمرً ما يبي لجنة التشريـح
ولا هوب يشكي من مـراره وقولونـي
الا منه اقبل واشرق الروح بالتسجيـح
يروح العقل بين الحجاجيـن مقرونـي
والا منه اقفا رحت في عالـم التتنيـح
عليه البدي كلـه رفـارف وطبلونـي
لا شافه حكيم الراي قام يعثر ويطيـح
يجي له وهو مشعان ويروح بسيونـي
حلالاه يامخذٍ على عشرتـه تصريـح
واحطه بكـرت العايلـه لـو يعذلونـي

نهـار العيـد قابلتـه – غـزالٍ زايـفٍ نبتـه – وكلمنـي وكلمتـه
ورحــــنـــــا فـــــــــي خــرايــطــهـــا
***
صغيّر ناعمٍ هرجه – ولامنه درج درْجِه – يحـط القلـب فـي درجـه
عــــــــروق الـــقـــلـــب رابـــطـــهـــا
***
عليه العود دندوني – ياقدامي يامن دوني – يقـول الثـوب هدونـي
تــــقـــــول انـــــــــه مــهــبّــطــهــا
***
وعليه العين هدّاجه – مايقدر يرفع حجاجه – وساع وفيهـن دعاجـه
وبــــعــــد بــالــكــحـــل مــاغــطــهـــا
***
وعليه من الشعر غدرا – ليامنه انحدر حدرا – مقاديمه على الصـدرا
وعــــلــــى الامــــتــــان يـبــســطــهــا
***
وعليه العنـق ممغوطه-وزغـدٍ كنـه القوطه-ودلوعـه وشمحوطـه
يــــاحـــــظ الــــلـــــي يــقــلّــطــهــا
***
وعليه الطول متساوي – لانيجيري ولاجاوي – وعـودٍ بالحـلا راوي
وصــــــــوف الــــزيــــن صــافــطــهـــا
***
وعليه من الدلع غنجه – تتل الروح من طنجه – ولو شافوه الافرنجه
تـــســـلـــم لـــــــــه خــرايــطـــهـــا
***
وعليه من الرخا شلقه – بلا كويـه ولا فلقـه – وفـمٍ كنـه الحِلقـه
هــــنـــــي الــــلـــــي يـمــشّــطــهــا
***
عطيته رقم جوّالي – وقمت اضبّط عقالي – عسـى يطـرب لموالـي
وتــقـــبـــلـــنـــي وســـايـــطــــهــــا
***
لزمني قاوي الهمه – مطوع لابسٍ عمِّـه – ويـوم انـه رفـع كمـه
يــــبـــــي فـــالـــوجـــه يـخْــبــطــهــا
***
مسكت يديـه ياقـوه – اكيـد مطـوع فتـوّه – وتـوه فالغـدا تـوه
قــــــــدور الـــضـــغـــط مــاســطــهـــا
***
طلبته يغّفر الزلّه – وملتنا هـي الملّـه - وكـل انسـان لـه علّـه
تـــعـــابــــطــــه ويــعـــابـــطـــهـــا
***
رحمني جعله الرحمه – عقب ماشافني فحّمه – وقال اشرد مع الزحمه
وجــــيــــت الــــبـــــاب شــاخــطــهـــا
***
لقيت العسكري التالف – يقول الموتر مخالف – وانا في ذمتي حالـف
قــســيــمـــه لـــــــــك بـخــطــطــهــا
***
تغفلته ودقيت سلف – ابيه يبطّل من الحلـف – انانيـه وقلـة ولـف
تــعــبــنـــا مـــــــــن تــســلــطــهــا
***
وفجأه دقت الساعه – صلاة الصبح فزّاعه – تنـادي حـزة الطاعـه
عــــلــــى الـتــنــبــيــه ضــابــطــهـــا
***
وقمت اشوف من حولي – واعس يدَي ورجولي – هذا ماهوب معقولي
انـــــــــا شـــكـــلـــي مـلـخـبــطــهــا
***
وطلعت امثل الجندي-بطل في فلمي الهندي-سوايـا الـرز والمنـدي
لـــيـــا جــــــا الــكــبـــد يـضـغـطــهــا

البارحـه ساهـرٍ والكبـد محتـرّه
كنه يوقّـد علـى قلبـي دوافيـرا
هـمٍ يمـزّع جنوبـي يالله تطـرّه
تقول في وسط جوفي لعب فرفيـرا
حظي وقف لي وخلاني على الجـرّه
يوم العرب عيّنوا من حظهم خيـرا
الترقيـه للموظـف حاجـه تسـرّه
وتـزوده فالعمـل حـبٍ وتقديـرا
وانا لي اليوم خمس سنين منجـرّه
والحال يا ناس من جرفٍ لدحديـرا
دخلت فالعسكريّـه باصنـع الـذرّه
من كثر ما شفت من هرج وتصويرا
عينتهـا تعـدم الرجـال وتـظـرّه
ماغير يخـدم بـلا رايٍ وتفكيـرا
وظيفة اهل الشقى والعيشة المـرّه
والطاعة الي تحفر الكبـد تحفيـرا
اول دخولي نسيـت احلّـق الغـرّه
واثره خطا مـا تكفّيـه المعاذيـرا
استقبلوني تقول مصارعـه حـرّه
اعلام تِرفـع وتصفيـقٍ وتصفيـرا
قالوا هلابك عسى دنياك مخضـرّه
وما شفت منّا يابن الاجواد تقصيرا
حضرة جنابك تبي دورتـك فالـدرّه
والا تبي صوب امستردام تاشيـرا
صدقتهم يـوم عقلـي ماخـذٍ فـرّه
في عالمٍ ما عرف كـذبٍ وتزويـرا
ظهر علـي المـدرّب بايـنٍ شـرّه
كنه مركّب علـى حلقـه مواطيـرا
اشعث غبر والطريق الشين ما غرّه
نمسٍ يدوّر على الـزلات تدويـرا
قال استعد استعدّت فوقـك الحـرّه
والله لا اخلّيـك عبـره للطوابيـرا
عكّر مزاجي عسى المسعور يجترّه
ذيخٍ من الجوع في بطنه صفافيـرا
واركى على الراس شيٍ ما بعد مرّه
تفوح منه المسامـع فـوح كفتيـرا
هذا زمانٍ لوى راسه علـى خـرّة
فيه القوي يفرس اللي توه صغيـرا
احدٍ نجومه علـى الامتـان منثـرّه
من بين تاج ومقـصٍ فيـه دوّيـرا
جته وهو ما سعى فيهـا ولا مـرّه
محفوظ حقه بـلا هـم ومشاويـرا
واحدٍ حياته على الصلفـات معتـرّه
مليانـةٍ بالمصايـب والخوابـيـرا
كل القرارات تكتـب فيـه وتـزرّه
محكوم بالموت حكـمٍ فيـه تعزيـرا
يا اللي تبي كلمةٍ قيلت علـى قـرّه
نصيحـةٍ مـا تقـدّر بالدنانـيـرا
ابعد عن العسكريّه كان لـك كـرّه
يرزقك يا صاحبي من يرزق الطيرا

من يشوفك يابومقبل داخلٍ فالصالـه
قدمك الشاشات تشّر والعرب مبسوطه
قال سوق المال عندك راح شرب بياله
كنك تبيع العنب والا تبيـع القوطـه
ونا في الاسهم تقول اني على المحّاله
تقبل وتقفي وهي في عودها مربوطه
مرةٍ اطلع ونـا اغنـي يـالا لا لالـه
بايعٍ لي بيعـةٍ وارباحهـا مضبوطـه
ومرةٍ اطلع من الصاله علـى النقالـه
طايحٍ فوق البلاط وجبهتي مخبوطـه
لاتديّنـا نبـي نرحـل مـع الرحّالـه
ونْتجوّل فالمداين مثل ابـن بطوطـه
هم دخلنا السوق كلٍ يعتـزي بريالـه
اشتري سهم النقيّه واترك المخلوطـه
كلّه من شان الحرام الله يشيّن فالـه
من دخل في مرزقه لوّى عليه خيوطه
غير ذالتجار ماخلّوا حـدٍ فـي حالـه
كل دربٍ يوصلونه يعدمون خطوطـه
يرفعون السوق ونحمّل مـع الحمّالـه
والمؤشر عندنا مانعتـرف بشروطـه
ولاوصلنا منتهانـا يربطـون حبالـه
ونْتعلق فالهـوا وحلوقنـا مزقوطـه
ثم تعال تشوفنا فـي منظـرٍ يرثالـه
قدمنا الشاشات تشّر والعرب مضغوطه
احـدٍ يقـدر يقـوم وعلّتـه تبرالـه
واحدٍ تحت الكراسي قام يظرب شوطه

راكب اللي تـو ماطلّعـوه مـن القـراج
مـرسـدس 600 لقـبـوه فـيـاقـرا
اسودٍ لونه تقول ان جنبه جنـب صـاج
والمقاعـد بيـج والجلـد نـوعٍ فاخـرا
صمموه مهندسينه على كيـف المـزاج
لادخـل غمارتـه راعـي الموتـر درا
لبّسوا طبلونه الزين كلـه لـون عـاج
وقرّبوا لـه كـل زرٍ يبـي يرجـع ورا
لاتحرك شفت في الارض من تحته عجاج
قـوة الماطـور تقلـب موازيـن الثـرا
لامسك خط المدينه تقـول انـه ميـراج
المواتـر كلبـوهـا تــذرّي فـالـذرا
لاخذو شوي شافوا لهـم مثـل السـراج
ذيك لنباتـه مـع الليـل لامنـه سـرا
صاحبه ماهوب لاضاق هبّطـه الحـراج
الرصيد معانـزٍ فـي بنـوك سويسـرا
لاوصل متعب وسلّم على سمح الحجـاج
عيّن الترحيبة اللـي عليهـا قـد ضـرا
وباشره بالدلّة اللي ماهيب مـن الهمـاج
دلّـةٍ بالهيـل والزعـفـران تبـهّـرا
نادرٍ لاجـوه الاجنـاب ماحـط الدجـاج
من كثر مايذبـح الضـان قالـوا افتـرا
لانصاه اللي تعومـس يعيّـن الانفـراج
والصعايب عنـد ابـو صالـحٍ ماتذكـرا
وقفته في لازمـي كنهـا طـب العـلاج
وكـل واحـد يذكـر دواه لامنـه بـرا
جعل يفداه الردي راعي الهرج السمـاج
الذي مالـه مـع النـاس فعـلٍ ينطـرا
والله لوهي بالرتب لاامنحه نجمه وتـاج
غير فعل الطيـب ماهـو حديـثٍ يفتـرا

يا كثر الاصحاب يوم اللعب والدشره
يوم الملاهـي تـدوّر مـن يلهيهـا
من اولٍ شقتـي بالنـاس محتشـره
يوم العزوبية الـي كنـت هاويهـا
واليوم لا عاد لا خـوه ولا عشـره
الله ولا رفـقـة هــذي تواليـهـا
ناس مع المصلحه عشره على عشره
وان حدك الوقت حدة لـك جنابيهـا
اللي حياته مع البيلـوت والنشـره
واللي يحب الدشوش ولاهـيٍ فيهـا
واللي على الخط دايم فاغر الكشـره
سمّاعته طـول ليلـه مـا يوطّيهـا
واللي مزاجه مع القصات والبشـره
ماله هدف والنصايـح مـا يدانيهـا
واللي مع الناس لا يفقه ولا يشـره
شقراً مع الخيل لا هجّـت تباريهـا
ذي عيّنه في شباب اليوم منتشـره
عسى الذي جابها في الارض يهديها
اهل المصالح معرّفتهم كما القشـره
لانظّف الراس بالصابـون ينهيهـا
وهذا كـلامٍ علينـا واجـبٍ نشـره
وما تحرق الجمره الا رجل واطيهـا

الا يالله عفـوك لامعـي بيـجـر ولاجــوال
ولا عنـدي وظيفـه والتجـاره فاشـلٍ فيهـا
ولاعنـدي شهـاداتٍ ولاحرفـه تسـد الحـال
ولا حـظٍ كبيـر لا اخطـت الجـره يقديـهـا
مخابي الثوب تومي مادخلها من زمان ريـال
بها فاتـورة الكهـرب ولا يمدينـي اقضيهـا
على ذيك العراوي تتعب الحادي مـع الجمّـال
ثلاث اشهـور فالورشـه وشهريـنٍ مغطيهـا
ابيها لو تجمّل يـوم واجلبهـا علـى الـدلاّل
يجيها واحـدٍ حظـه مثـل حظـي ويشريهـا
نصيت العسكريّه يـوم قالـوا للنظـام رجـال
وقدّمـت الملـف وصـورةٍ متشخـصٍ فيهـا
خذا الاوراق مني واحدٍ مـا عنـد ابـوه دلال
سلوم الناس واهل المعرفه والطيـب مخطيهـا
قراها في دقيقه والتفـت عجـلٍ علـي وقـال
شهادتك العظيمه يا ولد ويـن انـت مخفيهـا
هزّيت الراس ماعندي تقول اني مـن البنقـال
وقمت احـب خشمـه واطلبـه بالله تمشّيهـا
حذفها من يده شين الطبيعـه والنبـا والفـال
وقال ازين تعـوّد صـوب نوقاتـك تعشّيهـا
تناوشته من الكرسي وعفت الحـل والترحـال
وضربته بالبياله عقب مـا بيّحـت شاهيهـا
خذوني للسجن لا نيـب لا ظالـم ولا محتـال
مجرّد واحـدٍ جـا يكحـل عيونـه فيعميهـا
ويوم اني خرجت اقفيت لارض الله وسيع الجال
علـى بـرٍ هـواه يـداوي العلّـه ويبريـهـا
ادوّر قصعة الجربوع والضـب الفتـي يختـال
والارنب يا شفاة الروح ما احلاهـا وطاريهـا
بـلا كهـرب ولابيجـر ولاغــازٍ ولانـقّـال
قوانين الحضـاره ماتبـي شوفـي ولا ابيهـا

ارسلت لك ياصاحبي كم صحن فول
وابطـى تميسـك ياوليفـي عليّـه
ان كان جحدانٍ فلاهـوب معقـول
وان كنت متغلّـي ونفسـك هويّـه
فنا تراني كبر خفرع وابـا الهـول
وطويـق والصمـان والحنثـريّـه
لاكن لاشفتك اجـي مثـل بهلـول
وتروح شرهـات الليالـي عطيّـه
كنك تصبْ بقاعة القلـب محلـول
يمشي معا دمـي وتطفـي ضويّـه
راعي الهوى حظه مريضٍ ومسلول
وان فات من قومٍ وطتـه السريّـه
لو حِذْف حيدٍ من مدينة اسطنبـول
وقّع علـى راسـه وفـرّق لحيّـه
ان راح في حاله يقولـون مهْبـول
ويصير علك فـي حلـوق البريّـه
وان جا يبي عرسٍ وحفلات وطبول
حطوا علـى راسـه ثمانيـن كيّـه
قالوا مهرنا يابن الاجـواد مدبـول
ويقدر عليه اللـي عزومـه قويّـه
عطنا الدراهم والجنيهـات واللـول
وعطنا الذهب كانك تحـب البنيّـه
فتح فمه من شـدة العلـم ياحـول
وين الحكيم اللـي يحـل القضيّـه
مابه رصيدٍ يبـرد الكبـد ويحـول
دون السلف يوم الظـروف الرديّـه
ولامـعـاشٍ للديايـيـن مقـبـول
ولا حدٍ مات وكتـب لـه وصيّـه
لاكن من يبخصك ياناعـم الطـول
يروح قلبـه مثـل قلـب المطيّـه
ياصلك لو دونك معاصير وسيـول
ويجيك لـو دونـك حدتـه المنيّـه
ابرك من اللي كل مازيّـن الحـول
يحط فـي جـوف المولّـع دريّـه
مابه مقامٍ يجبـر النقـص فالـزول
ولا حيـاةٍ فـي وجـوده هنـيّـه
هذاك عن الامراض والهم مسؤول
والضغط والسكـر وفقـد الشهيّـه
اعيش فالدنيا عزوبي علـى طـول
ولا يناحـر لـي صبـاح وعشيّـه