ديوان نداوي ناصر المجماج

حفيد فحول الشعراء المجماج وابن سبيل يرحب بكم






ديوان نداوي ناصر المجماج


لكل عشاق الشعر العامي

ولكل من يعشق شعر فهيد المجماج وعبدالله بن سبيل

لأن هذا هو ديوان حفيدهما


ناصر بن فهد بن عبدالله المجماج

قصيدة مهند ونور ويحيى ولميس

والله إن نفوسنـا بأحبابنـا مسـروره
لين جتنا مسلسلات معلـم الشاورمـا
الشباب بشوف نور عيونهـم مبهـوره
وللميس نفوسهم علـى لقاهـا ضرمـا
البنات أصبح مهند عندهـن أسطـوره
وصار يحيى فارس الأحلام وهو القرما
والله إني خابرٍ يحيـى بمامـا نـوره
عامل بقسم المشاوي يضبط البسطرمـا
وشايـفٍ مهنـد بحـلاق يـوم أزوره
في ثلاثيـن النسيـم لواحـدٍ بالخرمـا
أشهد الفن عايش في أخـس عصـوره
من سبايب هالقناة اللي تجـر الجرمـا
ينقلون لمجتمعنا العهر بأبهى صـوره
والشباب بهالدراما داخليـن الفورمـا
لعن أبو هذي القناه وغزوها وشـروره
كيف ترضى ديننا بفكر اليهودي يرمـا
بنت تحمل من صديق بقصة مشهـوره
سدد الغزو اليهودي ضربته بالمرمـى
والله إن نفوسنا من شوفهـا مقهـوره
والعرب محدٍ بينكر وألسنتهـم طرمـا
وصارت نفوس الشباب بتركيا مسحوره
وبعضهم سافر وهو طالب بوسط الترما
والبنات مطيحات عنـد مامـا نـوره
مابقى إلا يبلتثـون معلـم الشاورمـا

قصيدة العيون السود

هذه قصيدة جديده لها مناسبتها

نشرتها مجلة وضوح في عددها الجديد
26/5/2008م

صفحة 66 ولكن للأسف كانت مليئة بالأخطاء المطبعية الكثيرة التي أفسدتها
وأخلت فيها




القصيدة


سلام الله على ذيك العيون الناعسات السـود
كثر ماتحتوي من حزن يكمن في نواظرهـا
عيونٍ من قسى هالوقت فيها للعذاب شهـود
تحاول تخفي الآلام عني .. بس أنا اظهرهـا
يطالع كحلها الجاهل .. يحسبه للهوى مقصود
وهي تخفي إنكساراتٍ بتكحيلـة محاجرهـا
سواد الكحل من سود الليال وظلمها المحشود
ليالٍ ماسلم مخلوق مـن طعنـة خناجرهـا
كفى الله شر ميلات الزمان وغدره المعهـود
زمانٍ ماتشيم عن ضعـوفٍ بـات قاهرهـا
زمانٍ غيب رجال الشهامة والوفـا والجـود
ولابـاقٍ سـوى نـاسٍ دراهمهـا مفاخرهـا
مثل ماغاب عنا العود الأزرق جا بداله عود
صناعي يحرق صدورٍ إلى احرقته مباخرهـا
ولكن لايهمك هالزمن مادمت أنـا موجـود
أبوقف معك والدنيا لأجل عينيـك اسخرهـا
تعزي في وجودي واعتزي بي وارتقي بسنود
ولابه فزعةٍ عن نخـوة الغاليـن أبذخرهـا
معي تنسين أحزانك تعيشين الحيـاة سعـود
تهني بالحيـاة وهاتـي همومـك أساهرهـا
وأبي ضحكة طفوليه على هذي العيون السود
تكون تميزك دايـم وتلمـع فـي نواظرهـا
نـــاصــــر الــمــجــمــاج

قصيدة لله در القصـيـد الـلـي يسليـنـي

لـلــه در الـقـصـيــد الـلــي يـسـلـيــنــي
الـلــي إلـيــا ضـقــت غـنـيـتــه وسـلانــي
شــيٍ كـتـبـتــه وشــي مــن الـدواويــنــي
أقـرى ؛ وشـي أسـمـعـه مـن حـفـظ شـيـبـانــي
مـن يـوم أنـا طـفـل حـب الـشـعـر مـغـويـنـي
وحـفـظـت جـزل الـقـصـيـد وعـذبـه أغـنـانـي
الـجـزل حـفـظـه بـسـيــطٍ مــا يـعـنـيـنــي
والـغــث مـايــوم جــاوز سـمـعــه آذانـــي
فـطــره مــن الله عـلـيـهــا الله مـنـشـيـنــي
ودرســـت فــنــه لأنــــه ورث جــدانـــي
والـشـعـر وافـي ومـن صـغــري مـخـاويـنــي
مـاضـاق صـدري مـنــه مــن يــوم خـاوانــي
حـتــى هـمــومٍ مــن رقــادي تـصـحـيـنــي
أفـتــك مـنـهــا إلــى غـنـيــت قـيـفـانــي
وكـم مـن خـلـيـلٍ إلـيـا فـكــر يـخـلـيـنــي
وادعـتــه بـبـيــت شـعــرٍ فـيــه عــزانــي
وكـم مـن حـبـيـبٍ مـعـانـدنــي وجـافـيـنــي
بـالـشـعـر لـيـنـت قـلـبـه لـيــن مـاجـانــي
إلا أنـت يـالـلـي عـلـيــك الـهــم طـاويـنــي
وطـبـيـبـي الـشـعـر عـجـز يـخـفـف أحـزانـي
أحــاول إن الـقـصـايــد مـنــك تـدنـيــنــي
وأشــــوف مــازادتـــك إلا بـهــجــرانــي
وإلـى بـغـيـت الـقـصـايـد عـنـك تـنـسـيـنـي
أشـوفــك بـكــل شـعــري نـغـمــة أوزانــي
عـجـز الـشـعـر يـجـذبـك لـي أو يـعـزيـنــي
رغـم إنـي أكـتـب غــزل وأبـكــي بـوجـدانــي
وغـم إنـك ألـطـف وأرق إنـسـان فــي عـيـنــي
إلا أنــك أسـبــاب دمـــعٍ حـــرق أوجــانــي
مـافـادنــي شـعــر .. كــان أول مـسـلـيـنــي
قــد كـنــت لاضـقــت غـنـيـتــه وسـلانــي
لـكـن عـسـى الـلـي بـحـبـك دوم مـشـقـيـنـي
يـفـتـنـك فـيـنـي عـشـان الـنـوم يـهـنـانــي




نـــــاصــــــر الـــمـــجـــمــــاج

قصيدة يعز القوم واحد

عندما يتحمل شخص ليس بأكثر القبيلة مالا ولكنه من أكثرهم سخاءً

عندما يتحمل مكافأة من مدحها سيارة وعلى قصيدة مدح الرسول صلى الله عليه وسلم سيارة

فإنه يستحق منا نحن أبناء القبيلة الثناء
لأنه كافأ من مدح القبيلة بقصيدة عامة ولم تكن القصيدة مخصصة لأحد


إنه الشيخ مساعد بن ناصر آل حسين التميمي



قلت فيه هذه القصيدة :

يامساعد آل حسين مجـد التمايمـه
والنفس لمصافح مراجلـك هايمـه
أنته شـرف للعمرويـة جميعهـا
وشرف تميم اللي بسما المجد حايمه
بذلت مالك لأجل رفعـت قبيلتـك
يوم الردي بالمال يحسب غنايمـه
وطيت خشم القرش ماهـو يهمـك
لأن نفسـك للعـلا دوم شايـمـه
يقولون بأمثـال الرجـال القديمـه
ولو هو هي قديمة بس بالذكر دايمه
يقولون إيعز القوم واحد ويرتكـي
للحمل عن ربعه وتنهض قوايمـه
وأنا أشهد إنك شلت عنـا حمولنـا
تنبهـت للعليـا والأنـذال نايمـه
الأجـواد مثلـك عـزٍّ لمجتمعهـم
وعزٍّ لمنهو ظلـم الأيـام ظايمـه
الأجـواد ماهمـه تمتـاع دنـيـا
ولاسمعة تسعى لها فـي عزايمـه
يهمه فقط شـأن القبيلـه ورفعتـه
ودون الخوي ما تستمع في لوايمه
أبهني آل حسيـن مادمـت منهـم
وأهني بكم نجد وجميـع التمايمـه


نـــــاصــــــر الـــمـــجـــمــــاج

قصيدة قصيدة حربية في سلمان بن عبدالعزيز
قصيدة حربية أدتها فرقة عنيزة للفنون الشعبية على لون العرضة النجدية وشارك في العرضة صاحب السمو الملكي الأمير سلمان بن عبدالعزيز حفظه الله

تقول القصيدة


مرحبا يـاذرا نجـدٍ وأهاليهـا
ياحمى نجد عن طامع وعيالـي
الحرايب إلى من زاد صاليهـا
أنت زيزومها يانسل الأبطالـي
المراجل مـن أولهـا لتاليهـا
ملك يمناك ورث أعمام وأخوالي
عاش سلمان حاكم نجد واليهـا
درعها عن مخاطرها والأهوالي
وعاشت المملكة في ظل راعيها
أبو متعب لشعبه درع وظلالـي
وأبو خالد ولي العهـد حاميهـا
حامي المملكة هو سورها العالي
وكلنـا حظرهـا وإلا بواديهـا
مفتدين الوطن بأرواح وأموالي
لأجله أرواحنا للمـوت نهديهـا
الوطن الملك نرخص لها الغالي



نـــــاصــــــر الـــمـــجـــمــــاج

قصيدة سلمان بن عبدالعزيز


قصيدة ألقيتها أمام صاحب السمو الملكي الأمير سلمان بن عبدالعزيز يوم الخميس 8-11-2007م

أستأذنـك ياسيـدي سلمـان أببـدأ بالقصيـد
قصيدة لـي الشـرف لا مـن وقفـت أقولهـا
قصيدةٍ فيها السمو ، وتحوي المعنـى الفريـد
سموهـا فـي منهـي بمدحـه تجـر ذيولهـا
تختال فيكم -طال عمرك - يوم ترديد النشيـد
ذكرك كساها أبهى الحلل من بعد جرد سمولها
سلام ياسلطان نجد ، ومجد أهل نجـد التليـد
يافخـر سـادات العروبـة يابيـاض فعولهـا
يامنتهى مجـد السمـو وقمـة العـز المجيـد
ياكـل هيبـات الملـوك بجيشهـا وخيولهـا
ويامنتهى حكمة ملوك الأرض والراي السديـد
ورجاحة أحـلام الملـوك بفكرهـا وعقولهـا
ياصامل الهدات باللقـوات فـي بـاسٍ شديـد
ياسلطنة شيخـات نجـد بعرضهـا وبطولهـا
حلم وتواضع والورع والزهد هذي لك رصيـد
ومحبتـك بقلوبنـا مافيـه شــي يزولـهـا
وش عاد أبذكر ياسمو المجد في مدحك وأزيد؟!
ومدايحك قبل أنخلق ينـدى الزهـر بطلولهـا
لكن عسى الله يحفظك بالعز والعمـر المديـد
ويحفظ شجرةٍ ظللتنـا وأذرت اللـي حولهـا
ويحفظ ملكنا اللي بظله عايـشٍ شعبـه سعيـد
اللـي غلاتـه بالضمايـر ثابتـات أصولهـا
وولي عهده نايبه نعـم الأخـو نعـم العضيـد
هو ظلنا يـوم الحرايـب يقرعـون طبولهـا
وحنا ترانا درعكم ثوار فـي وجـه الضديـد
علـى عهـد جداننـا بفعولـهـا وبقولـهـا
اللي شروا في دمهم أمن الوطن لأجل الحفيـد
هم جيش أخو نوره كعـام المعتديـن وهولهـا
يوم إن نجدٍ واسمها أم القد مـا تغـذى الوليـد
ما أرخصوها ، والعمار الغاليـة ساقـوا لهـا
وشلون حنا اللي ربينا بأمنها وعيـشٍ رغيـد
أبيع عمري لأجل حبة رمل ما أحـد ينولهـا
هذا كلامي سيـدي وأستأذنـك ختـم القصيـد
قصيدةٍ لـي الشـرف يومـي وقفـت أقولهـا


نـــــاصــــــر الـــمـــجـــمــــاج

قصيدة الأمير خالد بن سلمان بن محمد

هذه أبيات في صاحب السمو الأمير خالد بن سلمان بن محمد بن سعود حفظه الله
فهو من المولعين بالطير والإبل والمقناص وأرسلت له هذه الأبيات أهنئه بطلوع سهيل

عدد ما نشى سحبٍ وهل المطر همـال
وعدد كل حبة رمل بله حقـوق السيـل
وعدد ما نبت من عشب في سهلة وجبال
وعدد ما تشد أهل الإبل بالإبل وتحيـل
سلامٍ يشادي طعم ذوب العسـل لاسـال
يثّوع بريح العود الأزرق وخنـة هيـل
سلامٍ خضع لك سيدي هيبـة وإجـلال
ويقلط عليك وتنحنـي جبهتـه وتميـل
يقبل لنا كفٍ يعدل صغـى مـن عـال
كف الندى اللي جعل يفداه كـل إبخيـل
ويقبل لنا كتفٍ بـرك للحمـول وشـال
وراس الشجاع القرم والساطي الحلحيل
راسٍ لبس عزة غزالان لبـس عقـال
غزالان فارس نجد متعب ظهور الخيل
وسلامي بدافع حب لأهل الوفا مـازال
لخالد بن سلمان أكيل الثنـا لـه كيـل
سلام نزيه من الطمع وأنت راس المال
علي الطلاق إني ما أدور جزا بالقيـل
أنا جيت أسلم وأتطمن علـى الأحـوال
وأبارك على طلعة أخوك الصغير سهيل


نـــــاصــــــر الـــمـــجـــمــــاج

قصيدة أولاد وايل

هذه القصيدة ألقيتها في زواج الشاعر الأعلامي صبار العنزي
في الرياض يوم الأحد 6/8 / 1428هـ
آمل أن تنال اعجابكم


سـلام يالباسـة الخـز والجـوخ
اللي إليا حمي الوغى طعنهم كـز
قادة وحكـامٍ وسـادات وشيـوخ
قبيلة بالمجد رفـرف لهـا العـز
للمجد ترقى للسما رقي صـاروخ
والعز عاشقها وإلـى شافهـا فـز
مجدٍ ثبت ماهو مع الوقت منسوخ
مجد عنزة ثابت ولاهـوب يهتـز
تسابقوا بالطيب والكـل مطنـوخ
حصنٍ تسابق بالبطـولات وتلـز
بأيمانهم ماهي حيـالات وفخـوخ
أيمان تسخى وفيها الأرقاب تجتز
مثل الحرار اللي قرانيس وفروخ
الماكر اللي شامخٍ فـوق مرتـز
يا أولاد وايل يتعب الشعر ويدوخ
ما أحصى خصايل طيبكم لو بتفرز
قلته وأنا لي هامة العـزة تنـوخ
تميمـيٍ فينـا البطـولات تعتـز
في مدح قوم تلبس الخز والجـوخ
اللي إليا حمي الوغى طعنهم كـز
نـــــاصــــــر الـــمـــجـــمــــاج

قصيدة الأمير فيصل بن خالد بن عبدالعزيز

قصيدة ألقيتها في حفل العشاء الذي أقامة صاحب السمو الملكي الأمير فيصل بن خالد بن عبدالعزيز حفظه الله
يوم الجمعة 1/5/1428هـ في قصره بالمعذر (الرياض) بمناسبة تعيينه أميرًا لمنطقة عسير

أناالبـارح جلسـت الليـل صاحـي
رهينٍ للسهر مـا أطلـق سراحـي
جلسـت أرتـب بيـوت القصـيـدة
لأجل تلبـس مـن الهيبـة وشاحـي
أبيهـا لاصـدرت مـنـي تخـلـد
طـوال الدهـر مـا يمحـاه ماحـي
يخلدهـا الجمـال الـلـي كسـاهـا
وشرف موضوعها اللـي مايلاحـي
شرفها من شرف من هـي بمدحـه
صداهـا ياصـل لكـل النـواحـي
ســلام الله ســلام الله ســـلامٍ
عبيـر العـود الأزرق فيـه فاحـي
علـى فيصـل زعيـم المجـد كلـه
ولـد خالـد وهـو طيـر الفلاحـي
هـو اللـي تفتخـر فيـه القصايـد
وعن مدحـه فـلا يكبـح جماحـي
عسـى الله يحفظـه ويديـم عــزه
ويجعـل مـن يعـادي لـه يناحـي
أبمـدح ثـم أهنـي بــه عسـيـرٍ
هنـي المنطقـة هــذا النجـاحـي
حكمهـا شيـخٍ أكـرم بالجـزالـة
مـن مـزونٍ تراكمهـا الريـاحـي
هـو اللـي يحتميهـا بعـد ربــي
وتأمن بـه إلـى صـاح الصياحـي
إلى فكرت فـي فعلـه طـرى لـي
طرف بيـتٍ بقامـوس الصحاحـي
بـدع طـرقـه بناخيـنـا جـريـرٍ
بفكـرٍ واعـي والـراس صـاحـي
((ألستم خير مـن ركـب المطايـا
وأنـدى العالميـن بـطـون راحِ))
وقـالـوا عـنـه نـقـادٍ بـأنــه
هو أقـوى بيـت جـا فالامتداحـي
وأنا أقـول إن هـذا البيـت إذا جـا
بغيـرك يعتبـر مالـه صـلاحـي
أقولـه قـول ناقـد باخـصٍ بــه
درسـت النقـد فـي جـد وكفاحـي
بنقـد الشعـر ماجستيـر عـنـدي
وفـي نظمـه لنـا عـدة منـاحـي
فـشـيٍ موهـبـة والـواهـب الله
ووراثه مـن زمـن ولـى وراحـي
عن المجمـاج الأول ورث عصبـه
وعن ابـن سبيـلٍ سيـد الفصاحـي
فهـذا عـم أبــوي وذاك جــدي
ومـع هالموهبـة علمـي سلاحـي
وإلى من قلت ؛ قولـي يستمـع لـه
ونجمي فـي سمـا الإبـداع لاحـي
فانا اْصْل الشعر؛ وأنت أصل المروءة
وأصل العـز وآسـاس الصلاحـي
وأنتـه والـوفـا إخــوان تــوأم
وأبوك الطيب تنهـل مـن قراحـي
وأنتـه خيـر مـن ركـب المطايـا
وأنـدى العالمـيـن بـطـون راحِ
وهـذا مابغيـتـه فــي بـيـوتٍ
جلست أنظـم بهـا ليـن الصباحـي
سهرت الليـل ليـن ألقـي عليكـم
بيوتـي ؛ بعدهـا برقـد سطاحـي

نـــــاصــــــر الـــمـــجـــمــــاج

قصيدة موقف وأبيات

أعزائي
لا تقرؤون الأبيات قبل ما تقرؤن سبب كتابتها

هذي القصيدة مناسبتها إن واحد من ربعي الطيبين شرواكم وغالي علي جدا
كريم جدا جدا جدا ومنفد حلاله للبشر كفالات وأسلاف وعزايم
وهاليومين مر بأزمة وفيه شخص من اللي منتفعين منه جدا جا يبي منه كفالة يبي يأخذ سيارة
قال والله ما أقدر أكفلك لأن ظروفي سيئة جدا هاليومين لكن خذ هذي 2000 ريال عونية مني لك
قام الرجال اللي يبي كفالة وزعل وصار يسبه بكل مجلس
ويوم قال لي صاحبي عن هالقصة كتبت له هالأبيات وأرسلتها على جواله

طبعا ما نعمم الحكم على كل الناس لأن الطيب باقي وأهله موجودين
بس كانت مداعبة لصاحبي

وإليكم الأبيات :

كانك تبـي خاطـرك يالذيـب ينسـاح
إنسـف دروب المرجلـة فـي شمالـك
خلك (ن ذ ل )تسلم من النـاس ياصـاح
وإلى سلمت مـن البشـر طـاب فالـك
ماراح مـن هـرج المخاليـق ترتـاح
لـو إنـك تنفـد لـهـم رأس مـالـك
الطيبين من البشـر صـاروا صحـاح
وال(ن ذ ل )هو بس اللي مع الناس سالك
لايلحقـه شرهـة ولا هـوش وصيـاح
وأنـت إسهـج العالـم ويرتـاح بالـك
الـذم حاصـل للكريمـيـن وشـحـاح
إذًا ت(ن ذ ل ) وأحتفـظ فـي حلالـك

نـــــاصــــــر الـــمـــجـــمــــاج

قصيدة ماكل طيبْ من الزمان يدوم

هلالية


يقـول المشقـى والهمـوم نـجـوم
معا طلعـت نجـوم الظـلام تحـوم
تلافى إلى أقبل كل ليل(ن) ، ويتقـن
إلـى بـان صبـحٍ للنجـوم هـزوم
إلى أقبلْ ظلام الليل .. وأرخى سدوله
تعادت علـى قلبـي تحـط رجـوم
رجوم : من صافـي غرابيـل بقعـا
اللـي تحـرم عينـي لذيـذ النـوم
وترى الهموم لكـل عاشـق علامـة
تقـول إنهـا للعاشقـيـن سـلـوم
وأنا سبايب جـرح روحـي وهمهـا
خليل(ن) على قطع الوصال عـزوم
نسى ما مضى من صادق الود بيننـا
من طيب وصل ومن طريف علـوم
بعد كان كلن صايـن الـود والعهـد
راحـت تبيـع الـود بـأول سـوم
وتقول ماقالـت لأبـا زيـد (عليـا)
يـوم إنهـا لـه بالمـقـام تـلـوم:
((أبا زيد مـا ينفعـك يوم(ن)تقيمـه
إلى صارت الفرقى عليـك لـزوم))
وأنا أقول : دام الوقت يسعف تغانمي
وصلي قبـل نـاع الرحيـل يقـوم
تغانمي دام الزمـن طايـب(ن) لنـا
ماكـل طيـبْ مـن الزمـان يـدوم
تداركـي بالوصـل روحٍ خطـيـره
بها خاشري موتـه ببعـض سهـوم
الروح مـن فرقـاك قـرب نفادهـا
وبانـت عليهـا للهـلاك وســوم
أبي تدركين الـروح بآخـر حياتهـا
بالوصل لو مـا بـاقٍ بهـا إلا يـوم
عسى من جعل بيديك حزني وفرحتي
يسخـرك حيثـه بالعبـاد رحــوم


نـــــاصــــــر الـــمـــجـــمــــاج

قصيدة اللحظة اللي حزنها قطع معاليق الخفوق

اللحظة اللي حزنها قطـع معاليـق الخفـوق
وخلى العيون تهـل بدمـوعٍ خزنهـا موقهـا
من يوم شفت اللي على تقبيلت إيديها شفـوق
على السرير تعانـي آلام المـرض وتذوقهـا
والوجه شاحب والجسمْ ناحل ولا تقوى تـذوق
الزاد ... ماغير المغذي عن ذبـول عروقهـا
ودي أنشّدها وأسولف ميـر ببكـاي مخنـوق
وهي لاقالت كلمتيـنٍ تتعـب إمـن نطوقهـا
والبسمة اللي دايمًا علـى محاياهـا شـروق
غابت وأنا حسرت مرضها بالفـؤاد حروقهـا
نزلت راسي لاتشوف دموعي اللي جت حقوق
من ونة أغلى من وطت بالأرض تمشي فوقها
ونفوسنا من ضيقها تبي تفيض مـع الحلـوق
ولا جدانـا إلا الدعـا يالله عليـك وفوقـهـا
ليت العلاج بجـاه أو بفلـوس للدنيـا نسـوق
أو تنفـدي والله روحـي لأجلهـا لآسوقـهـا
ياربي أدعيك بضميرٍ مخلص وقلب صـدوق
يامعافيٍ في رحمتـك أيـوب تطلـق عوقهـا
من طيحة أم أمي مرضت وقلبي اليوم محروق
وجروح روحـي ياخوالـي بينـات فتوقهـا
واللحظة اللي حزنها قطـع معاليـق الخفـوق
بأسباب وجعت جدتي وآلامها اللـي تذوقهـا

نـــــاصــــــر الـــمـــجـــمــــاج

قصيدة مصير الحي يتلاقى

مصير الحي يتلاقى) عبـارة تعمـي العشـاق
بها العاشق يصدق لاغدى وسط الوهـم غـارق
عبارة كذب ... أما الصدق : أصلاً هالحياة فراق
إذا : أفضل كذا نكتب : (مصير الحي يتفـارق)
تعب كـل الحيـاة .. وكلهـا هـمٍّ ولا تنطـاق
ودايم في سمـا نفـس المتيـم حزنهـا شـارق
تسابقنا ظروف الوقت لوصـال الحبيـب سبـاق
وتسبقنا على وصلـه وترسـل للفـرح سـارق
وكم من عاشقٍ كـان يترقـب للوصـال وتـاق
وصادم واقـعٍ أخفـى وميـضٍ للأمـل بـارق
حبيبي لا استحال الوصل كيف نترجم الأشواق؟!
زمـان يتعـب التفكيـر لوكـان الذكـا خـارق
حبيبي كنت أبي أمدحك وأذكر وش كثر مشتـاق
ولكنـي شغلـت بـذم دنيًـا همـهـا حــارق
لذلك قلت بالمبـدأ تـرى الدنيـا ألـم وفـراق
وترى أفضل كذا نكتب : (مصير الحي يتفارق)

نـــــاصــــــر الـــمـــجـــمــــاج

قصيدة يازين ماترحم اللي خانته دمعه

يازين ماترحم اللي خانتـه دمعـه
هلت لذ**** وانتبهوا لـه ربوعـه
شافوا على الخد من دمع الشقى لمعه
وتهامسوا بينهم وش سبة دموعـه؟!
تعززوا له بهمس(ن) بينهم سمعـه
وصد وكأن الحكي ماداخل سموعـه
أول كتوم ويدرى الهرج والسمعـه
لكن فضحته دموعٍ جت بلا طوعـه
وأول كتومٍ ولا للدمـع بـه طمعـه
لكن قلبه ببعـدك بيـن خضوعـه
كل الهموم بسبب فرقـاك مجتمعـه
في قلبه اللي مصيبة هجرك تلوعـه
يانور روحي وأنتي بقلبي الشمعـه
طرق الوصل بيننا هي ليه مقطوعه؟
من ليلة السبت ليما ليلـة الجمعـه
والعين عن نو مها يازين ممنوعـه

نـــــاصــــــر الـــمـــجـــمــــاج