في لقلء على احدى الشبكات


في البدايه .. ارحب فيك ابو نوف ..بالنيابه عن اعضاء مجموعه ....
شاكر لك اخوي فهد على الاستضافه .. وانا سعيد بالتواجد بينكم


--------------------------------------------------------------------------------

كيف كان ظهور الشاعر فيصل اليامي في الساحة الشعبية ؟
بكل اختصار بداياتي كانت عبر المجلات الشعبيه كــ نشر قصايد واخبار وبعدها بدأت التعاونات الفنيه مع العديد من الفنانين واصبحت تلك التعاونات تنافس قصايدي المنشوره .. ومن وجهة نظري ان الانتشار بالاغنيه اسرع واقوى من النشر في المجلات وان كنت متواجد في الساحتين ( الشعبيه و الفنيه )


--------------------------------------------------------------------------------

* من ابرز الشعراء الذين تحب متابعتهم ؟
والله الشعراء كثير واخاف اذكر ناس وانسى ناس بس الاقرب لذكرتي اللحين
( نواف الدبل .. فهد المساعد .. سعد علوش .. ومحمد بن الذيب )


--------------------------------------------------------------------------------


* شاعر تتمنى اقامة امسية معه ؟
اتشرف بمشاركة اي شاعر يحترم ذائقة الجمهور ويقدر حضورهم ويكون لديه قصائد تستحق ان يسمعها الجمهور الذي حضر للأمسية .


--------------------------------------------------------------------------------

* هل ارضيت غرور الشاعر بداخلك ؟
اسمحلي اغير صيغة السؤال الى ( هل وصلت الى طموحاتك الشعريه ) بدلا عن الغرور اللي الله يبعدنا عنه .. وبقولك ان الانسان اللي يعتبر نفسه وصل لكل طموحاته يكون بالفعل ( انتهى ) ومازال امامي الكثير لأصل إليه ...


--------------------------------------------------------------------------------



* هل تجد نفسك شاعر يام الأول ؟ ومن هم اشهر شعراء قبيلة يام؟
قبيلة ( يام ) قبيله زاخره بالشعراء واتوقع انه لا يخلو بيت من وجود شاعر .. وهناك في القبيلة شعراء افضل مني بمراحل ولست الشاعر الاول ولكن بعيدين عن الاعلام.. قد اكون اكثرهم وصولاَ للإعلام وان كنت احاول دائما ان امثل قبيلتي بالشكل المشرف في كل محفل


* ماهي القصيدة الأقرب الي نفسك؟
ما اقدر احدد لك الاقرب ولكن اعتبر قصيدة ( عيال حارتنا ) واغنية
( الكبر لله ) منعطفين هامين على مستوى القصائد المنشوره والمغناه .


--------------------------------------------------------------------------------

* يقال ان اجمل الشعر اكذبه هل تنطبق هذه المقوله على شعر فيصل اليامي ؟ ولماذا ؟
مش على كل حال .. هذه ليست قاعده ولايجب تعميمها لأن الشاعر اما ان يكتب قصيدته على موقف او على فكره وفي الحالتين الابداع في السبك هو الاهم .


--------------------------------------------------------------------------------

* من خلال تجربتك الشعرية متى تصبح القصيدة ناجحة جماهيراً ؟
متى ما وصلت لــ قلوب الناس ولامستهم .. ومن وجهة نظري ان القصيده الواقعيه تنجح اكثر من الخيال .


--------------------------------------------------------------------------------




*وماذا عن فيصل اليامي والامسيات الشعريه؟؟
احاول ان اعتذر عن بعض الامسيات نظراً لإرتباطات معينة وحالياً انا متوقف عن الامسيات الا اذا كنت على علم مسبق بالتنظيم او تكون امسية ذات طابع رسمي .


--------------------------------------------------------------------------------

* متى يختلي فيصل اليامي بنفسة لكتابة وجدانياته ؟؟ وهل للمكان والزمان والحدث سبب في سكب مشاعرك؟
ابداً ليس للمكان ولا الزمان علاقة تجدني اكتب قصيدتي في السيارة او في مكان ملخبط يعني متى ما جات تجي ( سوالف الغروب والبحر ذي ) ماتمشي عندي .


*قبل الختام .. هل لنا بمطلع قصيده لم يسبق لها النشر ..؟؟


ياصاحبي ..والشوق فيه وفيه مافي احاسيسـي وخفاقـي
القلب يشكي منـك لاتشكيـه وتثور منك باقـي اعماقـي
تسفّهـه.. ويبادلـك تسفيـه كنكم عراقي يذبـح عراقـي

لعيونك



لعيونك اللي علمت قلبي الطيش
والبسمه اللي نورت لي مكاني
ورموشك اللي كنها للعدو جيش
اني لأخلي الليل له شكل ثاني
دامك وصلتي والحكي صار بشويش
وشلون انا ماأقول شعر وأغاني
طفل المشاعر بيننا عله يعيش
يلقى له ام ٍ تحرسه واب حاني
وشللي دخل بالنوم ووسادة الريش
ما دام حضنك ضمني واحتواني
طيفك يشاركني على لقمة العيش
ان ما لقيته ف المحاني لقاني
والعاذل اللي قال لي قلت له ايش
رح رح ترى مالك لوى ياأناني
تبغاني انساها وانا احبها ليش
من جدك انساها وأضيع زماني






فيصل اليامي

القسوط الحاله



لاابتدى ليل الطرب والدندنات لحونه
وانشغل كلٍ مع المطرب وعود ٍ شالّّه
وقامت الجادل تثني عودها بليونه
واستمرت في جرائتها ولاهي ذالّه
قمت افكر في صديق ٍ غارق ٍ بطعونه
شايل ٍ سيف الكفاح وخابر انه سالّه
وماذبح قلب المكافح غير كثر ديونه
والآجار المنتهي غير القسوط الحالّه
لو جمع كل الحلال وماوراه ودونه
والكلام اللي شبع من زود ماينقالّه
كان لاطروّا الوظايف ماتغير لونه
وكان مارجع شريط ٍ فات قد هو مالّه
وقام يتذكر مشاهد شافهابعيونه
ذكرياته بالدراسه والسنين الزالّه
وكيف كان اللي بجنبه لازم يمشونه
ويكتبون الحل عنه حتى لو هو حالّه
ضيعوا مستقبله واستبشروا بحزونه
نشفوا له ريقه اللي كان توه بالّه
رسبوه ونجحوا غيره وكانوا عونه
زمرة ٍ ماتعرف الرحمن زمره ضالّه
ماقضوا له حاجة ٍ في خاطره مكنونه
واقطعوا دربه مع انه كان درب ٍ دالّه
فوق هذا ماتغير منهجه وظنونه
كل ماضاقت عليه يقول خير انشاءالله





فيصل اليامي

هلا بعمري هلا بروحي



هلا بعمري هلا بروحي هلا باللي تذوبني
""هلا بمن عطرها يملى علي دنياي وايامي

هلا باللي اذا نادت اجيها بلهفه وكني
"" وصلت لآخر الدنيا طويت الارض بأقدامي

اجي ب احساس وانسى الناس اجي مرتاح ومتهني
"" ابي ترويني ب ايديها لأني بدونها ضامي

اجي عطشان اجي ولهان كأني كنت مستني
"" تناديني واجيها بشوق احسه داخل عظامي

هي اطيب قلب واجهته وما قد خيبت ضني
"" هي اجمل وجه قابلته وهي اكبر من احلامي

تقول اني ( احب انسان )وتقول ب اني واني
"" وانا ليمن بدت تمدح ادور اقرب اقلامي

لأني لو عجزت اكتب غلاها وقربها مني
"" اجل وش فايدة شعري اذا ما يوصف الهامي

صدوقه وان نوت تكذب تقول ارجوك سامحني
"" تحس ان الكذب حاجه عظيمه شي اجرامي

بريئه في سوالفها تسولف عنها وعني
"" تذكرني بكل موقف جمعنا وصار قدامي

حنونه صوتها دافي لها نبره تدوخني
"" بنبرتها يجي اسمي ما كنه ( فيصل اليامي )




فيصل اليامي

باين عليك



باين عليك اليوم زعلان مني
حبيب قلبي قلي اشفيك زعلان
لا يكون احد جاك وحكى شي عني
غلطان لوصدقت والله غلطان
مفروض ماتسمح لأحد يتهمني
تعرف غلاك وتعرف القلب ماخان
انا من اول يوم شفتك وكني
غريب لا قاله وطن بين الاوطان
لاينشغل بالك حبيبي لأني
ولهان بغيابك واذا جيت ولهان
لو اخسر العالم ابفرح واغني
رابح انا بحبك ولو كنت خسران
انت الوحيد اللي بحبه شغلني
عجزت توفيك القصايد والألحان
ماأشوف انا غيرك حبك سكني
ما كن ف الدنيا ابد غيرك انسان



فيصل اليامي

سوبر ستار



خلاص انا ناوي على تغيير تفكيري السقيم
عزمت اغير منهجي مادام عندي الاختيار


بفصل الثوب الجديد وبرمي الثوب القديم
واغير اصحابي اذا ما طاوعوني فالخيار


قرار جدآ منطقي وجاي فالوقت السليم
عصر انفتاح وفرصه الواحد يغير فالمسار


اللي يفكر فالغنم والبل ترى عايش جحيم
ان قال اساميها تحس انه طلع معها غبار


حتى قصايد ياوجودي هب ذعذاع النسيم
والجمس الأحمر ماتوفي بالغرض و الفكس آر


ماعاد تنفع وقتنا الحالي وذا منطق حكيم
اللحين صارت شمس روبي واضحه مثل النهار


اقوى مغني فالعرب شعبان ابن عبدالرحيم
و البرتقاله تعتبر فيديو كليب الانبهار


صار اهتمامات البشر دي جي وتشغل حكيم
عمار يامصر القديمه مع جديدتها عمار


اتفه مغني عندنا هو صاحب الفكر القويم
تصريحه الناري مثل يلقى معزه واعتبار


شبابنا شبابنا راحوا ورى ليلن عتيم
باعوا اصالتهم برخص وغيروا نهج الكبار


الوقت ضايع والبطاله فعلها فينا مقيم
اكبر مشاغلنا مسج ونرشح السوبر ستار


هذي حضاره ما تجملنا وذا واقع أليم
وين المبادي والقيم وين المعزه والوقار


في هالزمن ما عاد تعرف من كريم ومن لئيم ؟
في هالزمن كل شي توجه باتجاه الانحدار


عادي اذا شفت المطر في هالزمن من دون غيم
عادي تقبلها ترى النار تبدا من شرار


الله يثبتنا على نهج الصراط المستقيم
والله يحسن خاتمتنا في زمن صاير دمار





فيصل اليامي

الأطلال




على الاطلال لا تبكي كفى تبكي على الاطلال
تناسى الهم ياقلبي كفانا غربله وهموم

تعال احسب معي الايام وكم ليله بليا وصال
خلاص الماضي ما يرجع ترى حنا عيال اليوم

هذاك اول نعيش بحب ونتهنى براحة بال
هذاك اول قبل نكبر وتصبح ف العلوم علوم

ياقلبي هذي الدنيا ودايم تنقلب الاحوال
ترى ماني الوحيد اللي بصدري ضيقه ومكتوم

انا ادري ان الزمن ظالم ولا يحسب عنا الرجال
واعرف الحظ ليمن طاح يبيله وقت لين يقوم

وذي قسمتنا ياقلبي تصبر عالحزن لو طال
امر مكتوب ومقدر وكيف نغير المقسوم

مهو ذنبي ولاذنبك نعاف الحلم والامال
مدام ان السهر فارض علينا ما نذوق النوم

ياقلبي تعبت عيوني وهي تنظريمين شمال
ادور للامل لكن لقيت ان الامل معدوم

ياقلبي لا المطر جانا ولا حتى بعد همال
ما غير تحوفنا الغيمه تمنينا المطر وتحوم

انا احب البحر واعرف هدير الموج واليامال
ولكني معا هذا احس اني مااطيق العوم

اعيش بفقري وراضي ولا ودي يجيني مال
لاني لولقيت المال وجيت اشري عجزت آسوم

ياقلبي مر في سمعي كثير مُن الحكم وامثال
ولكن ما لقيت اصدق من اللي قال بكره يوم

تعال نعيش دنيانا ونتعود على ذا الحال
ويمكن شمسنا تشرق وتصبح ف العلوم علوم



فيصل اليامي

الغيمة




الغيمه اللي تهل بطيبه ورقه
ماهي تدور على منهو يخايلها


والجرح ماله دوى على الاقل وقه
لا تشرح اية مسائل وانت تجهلها


ثوبك اذا ضايقك ياصاحبي شقه
لا تحد نفسك على ناس اتثاقلها

غازي القصيبي عطى حريته شقه
عطها مثل ما عطاها ليش تهملها


وقتك غدر بك وكان بمنتهى الدقه
واقبل زمانك على الناقص وكملها


والصاحب لصاحبه ياخذ معه حقه
وماني بناسي همومك دوم شايلها


كل ما لمحت العباير تسرقك سرقه
احس مالي بذا الدنيا ولا هلها


ويصيح صدري ينادي كفي اتدقه
ابشر وانا محزمك ياخوي وازهلها





فيصل اليامي

ألا ليت الزمن يرجع



ألا ليت الزمن يرجع ورى
وإلا الليالي تدور ...

ويرجع وقتنا الأول وننعم في بساطتنا

زمان أول أحس انه زمان فيه صدق شعور ..

نحب ونخلص النيه وتجمعتا محبتنا

زمن مافيه لاغيبه ولاحتى كلام زور ..

ياليته بس لو يرجع ونسترجع طفولتنا

صغار وقلوبنا بيضا تعيش بعالمٍ محصور ..

ولا نعرف أبد أغراب ماغير عيال حارتنا

صحيح صغار بالتفكير لكن ماعلينا قصور ..

نخطط نكسر اللعبه وتسعدنا شقاوتنا

نروح المدرسه بدري ونضحك داخل الطابور ..

نحاول نزعج العالم بروحتنا وجيتنا

وعشان نأخر الحصه نخبي علبة الطبشور ..

نشاغب بس في الآخر تميزنا براءتنا

نحب الضحك والبهجه نحب ننط فوق السور ..

نفرفش ليه ما نفرفش ؟ مادام الضحك عادتنا

ولكن دارت الأيام وبان الخافي والمستور ..

وصار الهم متعلق على قمة سعادتنا

كبرنا وصارت الدنيا تصف أحزاننا بالدور !!

وتهدينا الألم والهم غصب عن عين رغبتنا

تعبنا من بلاوينا أحد ضايق وأحد مقهور !!

وكلآ غارق بهمه و بالآخر تشتتنا

وأنا ماأقول غير إنه ألا ليت الزمان يدور ..

ويرجع للورى فترة نعدل وضع عيشتنا



فيصل اليامي

الدنيا ماتسوى



ياعمري الدنيا ماتسوى تنام وخاطرك زعلان
ولابه شي يستاهل يخلي قلبك يعاني

طلبتك كان لي خاطر تبعد عنك الأحزان
فديت أعيونك الحلوه تبسم لو على شاني

حبيبي صار لي مدة أشوفك تايه وحيران
وانا والله لا شفتك حزين تزود أحزاني

أنا احبك ولا ودي تعيش بدنيتك ندمان
ترى ألأيام محسوبة وتالي هالعمر فاني

تصدق بسمتك والله تفرح خاطري الولهان
يطير من الفرح قلبي واصير بعالم ثاني

والى من شفتك بضيقة أحس اني انا الغلطان
أعاتب نفسي بنفسي ولو ما كنت أنا الجاني

غلاك بداخل أعروقي ولا يوصل غلاك انسان
يمر الوقت ويثبت لك غلاك ان الله أحياني

أضحي بعمري لعيونك...تنام انته وانا سهران
وانادي جروحك لقلبي تجي واحد ورى الثاني



فيصل اليامي

ما درت



ما درت عن حبها ياليتها تدري
ليتها ياليتها لو قدرت مره


ان قلبي من كثر شوقي ملا صدري
وان صدري من كبر قلبي نفذ صبره


من (صباح الخير) لين الشمس ما تسري
ومن (مساء الخير) لين نصير في بكره


والغلا في داخلي مثل النهر يجري
ليتها تدري بغلاها داخلي شكثره


هي تحسب اني طلبت الشهره بشعري
والله ان حبي لها نساني الشهره


من يقول ان الشعر بيزيد من قدري
بس انا شعري لها بيزيد من قدره


ليتغزلت بحلاها يصطفق بحري
والقصيد يروق لي في عجزه و صدره


وان بديت الوصف دوم احتار في امري
م الجبين او م العيون او أ وصف الغرة


والخدود اللي من الله لونها زهري
وفمها من زود زينه زاد في صغره


مشيها لو هو فتني والله بعذري
قدها المياس يشبه ميلة ألزهره


كل شي فيها من الله خلقته مغري
وقلبها خيره يغطي دايماُ شره


العطر هو يشتريها لو نوت تشري
وردة ٍ والورد دايم يعرف بعطره


هي هواي وهي بعد لي قلبي وعمري
وابتسامة خاطري لو خانت العبرة


ليتها تدري عن اللي يدور في صدري
وليتها تدري بغلاها داخلي شكثره






فيصل اليامي

الأرهاب


وطن ماعاش من هزك ولاتخشى ولاترتاب
عسى الله يحفظك دايم وتبقى عزتك آمين
وطنا لايهمونك ترى ظنك ابد ماخاب
رجالك وايدنا وحده تكاتفنا على الغاوين
فئه ضلت طريق الحق وحطوا للدمار اسباب
يسمون الدمار جهاد وهم لاهدافهم ساعين
فتاوي مابعد مرت ب سنه او باي كتاب
يشرعها لهم ناس ٍ على ذل الوطن ناوين
حسد مدري طمع مدري من اللي فاتح لهم باب
يحسبون الطريق اخضر وهو والله عذاب مهين
تعادينا اليهود اول واثاري لليهود اذناب
من اول خصمنا واحد وصاروا واليهود اثنين
تمادوا في بلاويهم وباعوا ارضهم بتراب
من اموال ٍ تخليهم لجل صبح الخطا غافين
مروه لا.بساله لا.شجاعه لا.اجل ارهاب
لان اللي يسوونه ينافي كل صفات الدين
شياطين ٍ تعايشنا على صورة اهل واصحاب
وفجاه تنكشف لعبه وتبدا هالنفوس تبين
ماهم والله كفو للي يبونه لو تطير رقاب
بعون الله وحفظ الله بننهيهم بغمضة عين
تسير القافله دايم ولا نسمع لنبح كلاب
لانك ياوطن تبقى اسم ((عالي )) وهم ((واطين))




فيصل اليامي

الكبر لله




الكبر لله ودوم ابن آدم صغير
مهما تعلى مكانه يرجع لأصله
من طين ربي خلقنا كيف نتغير
دام الخطايا تزود طيننا بله
انسان مخلوق دايم طبعه يحير
تتبع خطاويه تلقى شغلته شغله
احيان تلقى ضميره صاحي وخير
واحيان من قسوته مايعترف ب أهله
ياأبن آدم احذر زمانك دامك مخير
لو ترجع احسن مدامك ب أول الزله
سهله تخون الغرايز قلبك النير
لكن عقلك يوافق ما هي بسهله






فيصل اليامي

رجال يام




ليه اطلب الما من اللي خابره ضامي
ليه اقبل الظلم وارضى خافقي يضهد
بعض الرجاجيل ماله موقف ٍ سامي
حبلِ ٍ وما يرتكز حتى ولو يسند
قولوا لمنهو تمنى يكسر عظامي
ماهو كفو وامنياته م السما ابعد
الطيب نبعِ ٍ شربته بأول ايامي
شّبري طويلِ ٍ وقولي تثبته ذا اليد
شيخٍ ابن شيخ وخوالي حسبة اعمامي
تنبيه رووس العرب كانه بغى يجحد
ايه افتخر لاعتزيت وقلت انا يامي
ويحق للي مكاني يفتخر وازود
رجال يام ان تعازوا ناض قدامي
برقِ ٍ تلالا وصوت ٍ ف السما يرعد
هم درعي اللي يصد الرمح وحزامي
هم فزعة اللي من ايامه غدا منحد
هم طب جرحي ملاذي سلوة الامي
يكفيني منهم في ضيقي ( ياصبي اشتد)
يامنكر الحق رايك ماهو الزامي
لا يوخذ براي مقرود ٍولا يعتد






فيصل اليامي

من يبشرني



من يبشرني ويبشر بالبشاره = ومن تحداني بيتذكر كلامي
قصة المليون مافيها شطاره = يالمري يا لعجمي ياليامي
لاننا من جد عايش في الصداره = وزع عياله على الصف الامامي
نحترم الاصوات في عصر الحضاره = للمطيري والسكيبي والقثامي
بس ليذاب الحديد من الحراره = واعتلوا باسمي على كل الاسامي
اعرف ان لي لابة ٍ فيها نعاره = ماتحقر قعدتي ولا مقامي
من ثمان سنين حافظ لي عباره = في زمان الواسطه خلك عصامي
ودام فكري سيل واوراقي زباره = ماتلاقيني على الميراد ظامي
مامدحت الا رجل حافظ وقاره = وماهجيت الا من يجرح مقامي
وشاعر المليون برنامج شعاره = جرب ونافس ..ولاتكون انهزامي
واجب انا مانحيده عن مساره = ونخدم الموروث في قالب نظامي
ياعلي سلم على اعضاء الاداره = وان لقيت ابن السعيد ارسل سلامي
وان لمحت الضي في عالي المناره = بلغه تقديري وكل احترامي
وقله ان لك في حشى فيصل اماره = برجه ظلوعي وحارسها عظامي
واسمع اللي وده يفوز بجداره = وخل من طبل مع فرقة ميامي
ماحضرنا للتصنع والاثاره = كود للي عينها سبة هيامي
اللي اذكرها وانا في كل حاره = وآتخيلها وانا سارح دوامي
والثلوث اللي غدا كرت الزياره = للبعيده والقريبه في منامي
خلني اعدي ابواب الخفاره = واتسلل بيتها مثل الحرامي
وكل ماآشر لها تفهم الاشاره = وتحضن الشاشه وتتربع امامي
نوف وانا ابوك يارمز الطهاره = احضني الجوال لاجيتي تنامي
ولاصحيتي صوتي تاره وتاره = لين اوصل معك للحفل الختامي
وسولفي بي عند بدريه وساره = واكتمي الاسرار بالفلم الدرامي
وان خسرنا جعل تفداك الخساره = يكفي اني في عيونك نجم سامي
وان ربحنا ذكري راعي البشاره = واثبتي للي تحداني كلامي






فيصل اليامي

(اوبريت مشرق الشمس)




كل ٍ يحب ارضه وذا حق مشروع ***** وحب الوطن مخلوق فينا طبيعه

عشق ٍ طبيعي ماهو بعشق مصنوع ***** بالعكس يامرنا وحنا نطيعه

وانا دياري من لفاها نسى الجوع ***** الخير فيها صار نهج وشريعه

اقول انا سعودي ولي راس مرفوع ***** والقى مكاني دايما بالطليعه







حكامنا شالوا جميع الفوارق ***** شعب ونحس انا نمثل حكومات

لا صار بعض الناس بالهم غارق***** تلقى الفرح فينا يغطي المساحات

في ضل ابو متعب رفعنا البيارق***** قايد ويفرق عن جميع القيادات

ونشوف سلطان العطا صبح شارق***** مايعرف الا خذ .. ما قد نطق هات



لي حبيبيه لو بسولف عنها واسهرها ***** وش بقول ووش بخلي .. ياهي احلى بنيه

وان بديت اول غلاها ماادري وين اخرها***** اول الاحساس منها وهي بعد تاليه

كل ما سافرت عنها دايم اتذكرها ***** وروحي تغني لقلبي : آه يالشرقيه






لا جابك الحظ للدمام ***** انسى متاعبك وهمومك

فيها اتحقق لك الاحلام ***** غازل بحرها وعش يومك

ماانلام في حبها ماانلام ***** اعشق هواها ولا الومك



* * *



ومن الخبر اقطف افراحك ***** خل آخر البسمه اولها

وفي جوها ضمد جراحك***** تلقى العسل في مناحلها

من طيبها ثغرها ضاحك ***** تعال بس انت وازهلها




* * *



ارض الحسا من يساويها ***** تمرها والعقل مذهول

التمر عاشق لأراضيها ***** والغيم فعيونها مشغول

الله ياطيب اهاليها ***** الفعل منهم يساوي القول



* * *



تاريخها مثل حاضرها ***** متسيده بأول وتالي

ام الصناعات سخرها ***** للدار رب السما العالي

تسبي عقل من يناظرها ***** ياجبيلنا يالغلا الغالي



* * *


على صدى نهمة اليامال ***** يمرها الشوق ساريها

تاريخها مدرسة اجيال ***** والطيب يملى حواريها

الضيق لو صال فيك وجال ***** مر القطيف ونواحيها


* * *



حورية ٍ جات تتثنى ***** منها الغنادير مقهوره

للخير فيها كذا معنى ***** خيرات ماهي بمحصوره

مجبور في حبها اتغنى ***** ياروحي يا راس تنوره




قد قالها الراحل .. زعيم المهمات
ثم رددوها الناس جيل ٍ ورى جيل

(حنا هل العوجا ولابه مراوات
شرب المصايب مثل شرب الفناجيل )

يادار يادار الكرم والمروات
ما بعد صبح المجد يالمملكه ليل

ارقي بنا يادار روس الطويلات
وارقي بقايدنا على قمة سهيل

دونك نبيع الروح شعب وقيادات
دونك يادار اخوان نوره رجاجيل

لجلك تموت ارواح .. وترز رايات
والويل للخاين وللطامع الويل

ولجلك ياابوتركي تهون الصعيبات
مسطرين المجد بالسيف والخيل

يامحمد اللي فعلك اسس روايات
عن مجدك الماضي ومجد المقابيل









فيصل اليامي

لاتكابر ولا اكابر



قصيده مهداه من فيصل اليامي الى نجم الملاعب السعوديه


ســـــــــــــــامي الجابر



لاتكابــــر ولا اكــابــر
............ مهــو اسمٍ مضى عابــر

من اللي فيـنا يتنـاسى
............... مكانة سامـي الجابــر

نعـزه والله نعــزه
............... تربى الفــوز في عـزه

تسمى للشبـاك مدمي
.............. لأنــه شقــه وهــزه

يغيب وحاضر بذكـره
................ يحب ولايعــرف يكره

صحيح اسم على مسمى
.............. لأنه سامي بـ فكـره





فيصل اليامي

ودي تروحين





ما هي بـ لله جيتك يوم جيتي
اكيد قصدك تجرحين وتروحين

ياما جرحتيني يااااما قسيتي
ياما صبرت وقلت يمكن تحسين

كنت افرح بحكيك الا من حكيتي
واقول في نفسي سوالف محبين

يفز لك قلبي متى ما شكيتي
من طيبتي اصدق انك تعانين

شريت حبك واحسب انك شريتي
ولقيتك لصدق المشاعر تبيعين

كنت احسب انك كثر حبي هويتي
الضاهر انك ما عرفتي تحبين

والحين قوليلي وش اللي بغيتي
ما يكفي انك خادعتني من سنين

قولي وش اللي ناقصك ما خذيتي
خذتي الكثير وما قدرتي تردين

وان كان حكيي ضايقك واستحيتي
لو تسمحين الحين ودي تروحين





فيصل اليامي

بص شوف





ياللي تتحدي لا تعب نفسك بطول انتظار

تبطي وانا في مركب عالي ولا يعلي عليه

الشعر ماهو معضلة ولا تجمد وانصهار

الشعر ذا يا صاحبي هو يعتبرني مثل ابيه

متعود القي هالشعر والناس تسمع بانبهار

وتقول عني بص شوف الاخ فيصل يعمل ايه

عشاق عرفني بهم شعراً كتبته باقتدار

لكن محبة هالبشر ماهي كتاب ومشتريه

صيتي انا مبني علي عزة ونابة وافتخار

اما القوافي والوزن صيتاً يزول وما أبيه

والحمد لله ما علي القاصر وانا صاحب قرار

من صغر سني والقدي يمشي معي كاني اخيه

عندي طموح وما انتهي عايش معي ليل ونهار

وان عاند الوقت الغبي وجهت للوقت النبيه

واعرف كثير قلوبهم مثلك ولا منهن فرار

نشبة ولا فيهم رجاء و وجيهم ماهي وجيه

والظاهر انك ما مسكت الطار لكن فيك زار

دقوا لك طبول الحكي عندك وخلوك تحكيه

غشيم واسلوبك قديم ولعبتك فيها غبار

لعبك علي المكشوف يا شاطر وبان الكذب فيه

لكن علي مين التغيشم يا ولد حنا كبار

خلك علي قدك وصدقني بتلقي لك شبيه

اسمع كلامي واحفظه , حطه بعين الاعتبار

دربا مشينا به تري ماهو لزوم انك تجيه

وان ما اعجبك حكي ابد , دور علي اقرب جدار

يمكن يوفي بالغرض , رائي واظن انه وجيه .






فيصل اليامي

تغلا




تغـــلا يا بعد عمري تغــلا

تغـــلا أنا عنك حبيبـــي ما أتخلـــى

إذا كان التغلــي سر جمالـــكـ

علــى كيفكـ وسوى اللي في بالكـــ

حبيبــي وش تبـــي قلــي وآمــر

تدلــل وأطلب الغالي وحاضـــــر

أنا عمـــري ترى كله حلالكــــ

على كيفكـ وسوى اللي في بالكـــ

عطيتكــ في الهوى صدق المشاعــر

ضنيتـــكـ تحس مثلي وشاعــــر

مع هــذا أنا راضـــي بحالكــ

على كيفكــ وسوى اللي في بالكـــ








فيصل اليامي

][®][^][®][فقدتك][®][^][®][

فقدتك يا اعز الناس فقدت الحب و الطيبه
وانا من لي في هالدنيا سواك ان طالت الغيبة

رحت ومن بقى وياي يحس بضحكتي وبكاي
وحتى الجرح في بعدك يغزيني وأهليبه

تصدق قد من حنيت اشوفك في زوايا البيت
واسولف معك عن حزني واحس ان انت تدري به

شسوي بالألم والآه ولكن البقى لله
يصبرني على بعادك وذا حضي وراضيبه





فيصل اليامي

][®][^][®][دعوة المظلوم][®][^][®][

لا تغرك الدنيا وتصبح عديم أحساس
لا تحس يوم أنك أصبحت فوق الناس
حاسب من أفعالك من دعوة المظلوم
اللي بنيـته سنين مـمكن يضيع بيوم
الوقت مايصفى والدنيا دوم أتـدور
اليـوم مع غـيرك بكره يـجيـك الـدور
هذي عوايدها من طبعها ماتــدوم
اللـي بنيـته سـنين مـمكن يضيع بيوم
أصحى من أحلامك وأسمع كلامي زين
لو دامت لغيرك ما وصلتك ألحيـــن
ماحد ترى يـاخذ إلا اللي له مقسـوم
اللـي بنيته سنين ممكن يضيع بيـوم





فيصل اليامي

][®][^][®][من وين جيت][®][^][®][

من وين جيت وين صرت وكيف قلبي فيك ذاب
فجأه لقيتك داخلي بالله قل من وين جيت
معروف قلبي عادته يلعب ولكن معك تاب
مافيه داعي للعب ما دام للقمه رقيت
يالي مرشح يالغلاء في داخلي دون انتخاب
الصيت صيتك ياغلاي وما بعد هصيت صيت
الظاهر أنك لو طرحت أسهم لحبك بكتتاب
تداولو هناس عشقك ثم بنو بالبنك بيت
وانتظرو الفايض يجيهم لكتمل حد النصاب
تقول كنه بيتكم صاير علىاول ستريت
تذكر سعد علوش يومنه قصد بالانسكاب
كل ما ذكرتك قمت أردد هلقصيده بيت بيت
مقارنة غير معك تعرف لظلم المهاب
الظلم اني ألتفت للغير ما دامك لفيت
تتوقع أن المرسدس ممكن نقارنها بساب
بعني على ذا الحال ممكن نقلب الكزز ونايت
أدوخ لا شفتك وكني في المشي لاعب مصاب
تتلخبط الخطوه معي احس كني ما مشيت
وإن شفت زولك فرحتي توصل الا حد السحاب
كنك هدف من راس ماجد وداخل بمرمى الكويت
ما اعرف أنا تموز أو تشرين ومدري ويش أب
أعرف أني سادس العيد التقيتك ثم بديت
بديت مشوار المحبه والسعاده والعذاب
تخالطة عندي المشاعر في غرامك وأهتنيت
حسستني طعم انتصاري بالذهاب وبالأياب
علمتني أجمع نقاط الفوز وأوصل استريت
ياتوبت(ن) بكل محطه من محطات الشباب
ياذوق يارقه يراقي يامعاني الاتكيت
أصيل والجسمي ورابح ودندنة وشعري مجاب
أحلى أغاني غنيت لجلك وأنا لجلك هويت
اسست في بالي دفاتر شعر وبقلبي كتاب
لولاك بعد الله نساني الشعر والا أنا نسيت





فيصل اليامي

][®][^][®][العدالـــــــــــــه][®][^][®][

الظلم في الدنيا عدو العداله
والخير يسأل دايم الشر وش فيه
الانسان بأفعاله ولا هو بماله
وش فايدة ماله اذا الكل جافيه
هذا الزمن مايعرف اللي قباله
وما في احد يدري وش اللي مخبيه
كل شخص يحمل في حياته رساله
يا تعتلي به فوق وإلا توطيه
الله خلق هالكون اكبر دلاله
ان القوي الله ولا احد يساويه
ياضعفنا قدام رب الجلاله
اذا انسأل كلٍ عن اللي يسويه




فيصل اليامي

][®][^][®][لك عين][®][^][®][

لك عين تتكلم بعد ما تسببت
بجروحي وتسأل بعد ويش سويت
اخطيت في حقي ولا كنك اذنبت
اللي يشوفك ما يقول انك اخطيت
انا احسب ان عقلك تعافى وقد طبت
اثرك على نفس العقل ما تعافيت
ياثقل دم اليوم ليسمي السبت
وياثقل دمك كل ما اصبحت وامسيت
انت اتحرى جيتي كل ما غبت
وانا اتحرى غيبتك كل ما جيت
اذنبت في عرفك ولكنني تبت
الله يسامح زلتي يوم زليت
الصدر يتفجر بعد حالة الكبت
انا اشهد ان صدري تفجر ومليت
اغسل يدينك اني اجيك لو شبت
معروف عني دام صديت صديت





فيصل اليامي

][®][^][®][مسكين][®][^][®][

مسكين ماتلقى مشخص لحالتك
ظنك جميع الناس ترخص ثمنها
اعقل ترا مانيب ناقص جهالتك
ان طعتني شف ناس غيري وخنها
مانيب عامل جاي ادور كفالتك
محبتك ذله وانا اشوف عنها
ظلمك على نفسك تعدى عدالتك
نفسك بتزعل منك صحصح وصنها
مادري احس انك منبسط من هبالتك
خيول عقلك ليه تفرد رسنها
نقص في عقلك يشابه رسالتك
فيها جزء من النص مفقود منها
اكتب علي منشيت وامحي مقالتك
فاهم حيلك بسرها وعلنها
لا تذلني للحب مابغى ذلالتك دولتك
باخصها وباخص مدنهاا
لوك وكيل الشوق باللغي وكالتك
راحت سنين الشوق وروح زمنها
صعوبتك عندي تساوي سهالتك
لانك عجينه في يدي واعجنها
الي صدمني فيك قلت اصالتك
ناس مثل شرواك مااحد ضمنها
ماني مطولها ولا ابغى إطالتك
قلبي لامن عاف حاجه ركنها





فيصل اليامي

][®][^][®][غلطه][®][^][®][

غلطة وحده ولايهمك واعتبرني ما احس
انت قلبك دوم يغلط جت على هذي وبــــــس
مافي داعي لاعتذارك هذا جرحي وفك بابه
يكفي اني من عذابك صارت اجروحي تشابه
تغلط ابحقي واسامح وانت ماهمك رضــــاي
مدري اخطيت بشعوري ولا انا اخطيت ابغلاك
دلعك قلبي ش سوي مابي الارضــــــــاكـــ






فيصل اليامي