مشاهدة النسخة كاملة : رواية :: جت جت انحاااشوا


نظرة الحب
05-03-2011, 01:21 AM
( جت جت أنحاشوا )
كانت هذي صفاره أنذار أطلقتها زهره وهي تركض لجهة صديقاتها
وبسرعه البرق دخلت الشله للفصل وبمنظر البراءه جلسوا على الكراسي
كأنهم ماكانوا برى قبل شوي
دخلت المعلمه وسلمت وسألت/ من اللي كان برى الفصل
أنا لمحت بنتين من الشله المصونه بس أفضل انهن يعترفن بأنفسهن عم الهدوء الفصل
قالت المعلمه/ طيب زهره وورده أنا شايفتكم برى
شهقت ورده شهقه واحد مظلوم أما زهره ضربت بيدها على صدرها بمنظر المصدوم
ورده ومازالت تشهق/ هالحين ياأبله عيونك ماتلقط إلا أنا
المعلمه/ يعني شلون أتبلاء عليك
ورده قامت تشرح بيدها/ لابس أنت متعوده تشوفيني برى
فالتبست عندك الصوره وحسبتي أني أنا معهم
مثل اللاعب إذا جاء بيسجل هدف خصوصا إذا جت الكوره من ركنيه من لاعب ثاني
فتلتبس عنده الرؤيه ويتخيل الكوره جت من الجهة اللي هنا
وهي بالأساس جت من الجهة اللي هناك فعشان كذا يضيع الهدف
وكملت بصوت فيه حسره/ وهذا اللي قلعنا بدري من كأس العالم
( كانت ميولها دايم رياضيه خصوصا للمنتخب )
المعلمه بنفاذ صبر لأن المجادله مع ورده ميؤس منها/ خلاص اقعدي حشا معلق
وأنت يازهره كنتي برى
زهره تهز رأسها بحسره/ يعني اللي يتوب دايم مذنوب
أنا أقلعت عن التسدح عند البيبان من يومين
عشان كذا الموضوع فيه أشتباه وتحققي من الأمر
المعلمه/ ماصارت كل وحده عذرها جاهز خلاص أقعدي ببدأ الحصه
قامت فله/ عذرا ياأبلتي حصه سعيدان غايبه مادوامت اليوم
ضحك الفصل وعطتهم المعلمه شوط تهزئ معتبر < كانت شله مكونه من خمس بنات
أربع سعوديات ( زهره_ورده_فله_صباره )
وحده سودانيه ( نرجس ) بس اللي يجلس معها يقول سعوديه أبن عن جد
تلقب الشله بشله ( عطني ريال )
مسوين بالمدرسه هيصه وشطانه
كثير من البنات تمنو ينضمون لهم بس كانوا مايدخلون بينهم أحد
من الأبتدائي الي ثالث ثانوي مع بعض
كل المعلمات يشتكون منهم حتى ( النيو تيتشر ) على طول يعرفون الشله هذي
كانت من قواعدهم عدم منادات اي معلمه بأي لقب سوى أبله لأن معناها عندهم أبله بلهه
واللي تناديها من شلتهم بغير أبله تترتب عليها عقوبه
وفي مباريات المنتخب يسوون رابطه تشجيع
لدرجه أن المديره هزئتهم في الطوابير ونادتهم عندها بالأداره وعطتهم علقه معتبره
بعد ماطلعوا من عند المديره
فله/ ياقهري قهراه هالحين برميل الماء
( المديره وكانت مصريه ) تضربنا عشان منتخبنا
زهره بحقد/ الشرهه مهب عليها على بنات الأكراد
اللي جالسات يتفرجن تقول فاتحين سيرك( تقصد المعلمات )
نرجس/ هذا اللي أستفدته من السعوديه
أشجعهم ويمردغوني < ماقلت لكم سعوديه أبن عن جد
ورده وهي تنفخ أيدينها/ لابصراحه هذا وضع ماينسكت عليه
اللاعبين كل شوي معسكرين بديره وأنا أتكفخ هنا صدق ظلم
على الأقل يأخذوني معهم بالمعسكر لو صبابه
صباره/ بصراحه مالي وجهه أطلع للبنات
عقب ماكنت أكفخهم أتكفخ
فله/ هي صادقه دورولنا صرفه والله فشله
ورده بصوت شرير مع تصغيره عيونها/ وش رأيكم نقول المديره بدال ماتكفخنا كفخناها...أأأأه
أول ماقالت هرجتها كان يقومون يصفقونها ويكفخونها
صباره/ فكينا من أفلام جيمس بوند يافاتن حمامه
سكتت ورده بس أنتبهت لكلام صباره
وقالت بصوت شرير ومازالت متقمصه الدور/ وش دخل فاتن حمامه
صباره/ يوووووه وأنا وش دراني سقطت سهوا
زهره/ خلاص خلونا نواجه الواقع المر
لكن المفاجأه أن بنات المدرسه أعجبوا فيهم زياده بسبب وطنيتهم
عاد شله عطني ريال ماصدقوا كان يبسطون نفذوهم في المدرسه
بعد ماطلعت المعلمه طمرت الشله وطلعوا برى
وراحوا يجلسون بالساحه عشان يأكلون
زهره/ الحصه اللي بتجي حصه جاك شيراك
( معلمه الفيزياء )

نظرة الحب
05-03-2011, 01:21 AM
فله/ يوووه الله يقطعك كان خليتينا نأكل بعدين نكدتي علينا
نرجس/ تكفين عاد اللي يشوفنا يقول نحس بالحصه
بس دورولنا طريقه نرفع فيها ضغطها
ورده/ صدقتي يانرجس هرجس
فعلا لازم ندور خطه جديده
( كانوا يطلقون على نرجس أسم نرجس هرجس عشان مره كانت نرجس تبربر كثير )
قالت زهره/ يوه يانرجس هرجتس كثير
فأعجب نرجس الاسم ومن بعدها اطلقوا عليها اسم نرجس هرجس
/
يتــبع
في حصه الفيزياء بالمعمل جلست الشله بالصف الأخير
وفي نص الدرس قامت كل وحده طلع قصتها
وتلف كل خصله على شكل مسمار
وصارت أشكالهن تقول من زنوج أمريكا
حاولت المعلمه تمسك نفسها وبعد ماخلصت الحصه
نادتهم المعلمه وقالت/ وش معنى تصرفاتكم بالحصه
ناظرن ببعض بمنظر البراءه وسكتن
قالت/ لازم أعرف مبرر للي سويتوه
فله/ وش سوينا يا أبله هذا تسريحه شفناها بالتلفزيون وقلدناها
المعلمه/ تسريحه من إنشاءالله
زهره/ أوبرا
المعلمه/ من أوبرا ؟
زهره/ بنت جيرانا
المعلمه/ تو تقولين بالتلفزيون
زهره/ أيه كانت أوبرا مسويه التسريحه وجالسه فوق التلفزيون
المعلمه بنفاذ صبر / خلاص ماأبي أشوفها ثاني مره
ورده/ مانقدر نوعدك ياأبله لأن التسريحه معجبتنا وبالتالي مانقدر نغيرها
حنا مثل اللاعب يتقيد بالملعب بزي محدد لكن شعره حر بالتصرف فيه
المعلمه بعصبيه/ زين عطوني أرقام تلفونات بيوتكم
صباره/ عطتها الرقم باستسلام
أما فله/ عطتها الرقم ببساطه لأن تلفونهم مقطوع
أما ورده/ عطتها الرقم بس المعلمه سمعت الرقم الأخير غلط
هو كان صفر قالت سته سكتت ورده
بس زهره جتها فزعه وصحوة أدب قالت لا صفر
كان ترفسها ورده على بطنها
وقالت/ يعجبني ذكائك المستفحل بس ليتك منطمه
ونرجس/ عطتها الرقم بس حرفت فيه شوي
أما زهره عطتهم رقم جوال أمها
اللي هو جوالها بالأصح لأن ماعندهم تلفون حسب أقوالها
,
في حصه e‏ جلست كل وحده تأكل بالدرج
والمعلمه تشرح ماتشرح كله واحد
خلصت المعلمه الدرس ووقفت قدام بنت تشرح لها فقره
وفجأه تطمر صباره على فشار زهره وتأخذه
وتجي زهره حاله هستيريا وتقوم ورده تفزع معها
وصارن طردي ورى بعض بالفصل والمعلمه المسكينه تشرح للبنت
وكانت طيبه بالحيل
أمسكت ورده الفشار وحذفته على زهره بس طاح منها
على طاوله البنت اللي المعلمه تشرح لها
وتطمر زهره وصباره على الطاوله وأخذوه وراحو للسبوره
كان تجي ورده تمسك صباره برجولها وتسحبها
وطاحت وقامت تضحك هي وزهره
فطمرت عليهم فله تفزع مع صباره وتناشبت الشله كلن يبي الفشار
ومن كثر تسحيب الفشار انقطع الكيس وتناثر بالأرض
فانصدمن وارجعن لأماكنهن كن ميت لهن واحد
وكل الأحداث صارت والمعلمه تشرح للبنت اللي مافهمت شئ من الأزعاج
في حصه e‏ اليوم الثاني كان موضوع الدرس
كيف تحقق في جريمه كسر شباك القصر
كان غرض المعلمه أنهم يتعلمون التحقيق بالأنقلش
بس شله عطني ريال إلاتطلع الفاعل
وقامن يطلعن المجرم مره الحارس مره الولد مره صاحب القصر
إلى حد ماطفشت المعلمه وطلعت برى الحصه وكان هذا غرضهم
وفي حصه الدين قومت المعلمه البنات يقرؤن من الكتاب
فقومت نرجس وكانت ناسيه كتابها فعطتها صباره كتاب نحو
وسوت نفسها تقرأ منه وقامت الشله تنقلها الكلام
فصارت تكلم مثل المعوق كلمه كلمه
وفي الأخير قالت المعلمه وكانت سودانيه/ عليك الله تقعودي
أنا ماعارفه كيف طلعتي من الأبتدائي داير شنو بالبنات الزمان دا
وفي حصه الكيمياء جلست المعلمه تشرح عن تفاعلات المواد
وكانت صباره مشغوله بالأكل وحلفت ماتعطي صديقاتها
وفجأه قومتها المعلمه تسألها عن تفاعل الأسيتدات
فجلست تدور لها أحد يغششها قالت ورده/ بطه
كان تردد مثل الببغا/ بطه
المعلمه بذهول/ وش دخل البطه
قالت فله/ ياغبيه روث الحيوانات
وعلى طول قالت/ روث الحيوانات
فعصبت المعلمه وعطتها موشح عن الكسلانات
وصديقاتها ماتن من الضحك وخلوه درس لها بسبه النذاله
وفي يوم من الأيام كانت عندهم حصه فراغ
فجتهم معلمه e‏ اللي تدرس أولى فسألت الشله بحكم أنها شله مشهوره
وقالت/ وش بتصرون إذا تخرجتوا
ورده/ أنا عن نفسي بصير مدربه فريق وبدرب بنات حارتنا
ضحكت المعلمه وسألت باقي الشله
فردت زهره/ بصير معلمه طبخ وتدبير منزلي
وفله/ بصير دكتوره بيطريه
صباره/ بصير مساعدة فله يعني نائب دكتور بيطري
نرجس/ يمكن أصير شرطيه بديرتي
ضحكت المعلمه من أحلامهن
وقالت/ طيب وش معنى أنتي ياورده ميولك رياضيه
ورده/ كل شخص له ميوله وإذا كلش كلش ماصرت مدربه
بصير صحفيه رياضيه

نظرة الحب
05-03-2011, 01:22 AM
المعلمه/ طيب بسألك سؤال وأسألك بالله تجاوبيني بصراحه
( وكانت المعلمه معروف أنها ملتزمه )
قالت صباره بصوت واطي/ ياخوفي أنهم لاقطينك مع لاعب
ورده/ أسألي ماعندي شئ أخبيه
المعلمه/ أنتي اللي كاتبه القناص على طاوله بالمدرسه
ورده/ ياحول عشاني أحب الكوره صرت اللي كاتبه القناص
المعلمه/ يعني موب أنتي
ورده/ لو أنه أنا كان قلت ولاعلي بعدين لو بكتب كان كتبت الأخطبوط موب القناص
المعلمه/ من الأخطبوط ؟
ورده/ زعيم حراس آسيا الدعيع
المعلمه/ ماتدرين أن المباراه حرام
ورده/ الله وأكبر ومن اللي حرمها
المعلمه/ المشايخ
ورده/ هاتي دليل
المعلمه/ النظره الأولى لك والثانيه للشيطان
ورده/ والله هذي للرجل
وكانت تدور المناقشه والفصل متابع بأهتمام وشله ورده متشققه من الضحك
لأنهم عارفين ورده ماتسكت عن الملاسن خصوصا إذا الأمر رياضي
المعلمه/ المباراه حرام لأن فيها رياجيل
ورده/ ترى بيني وبينهم شاشه ولا بنقز عليهم
المعلمه/ ولو المباريات فيها رجال والمرآه مايصير تشوف عوره الرجل
ورده/ والله اللي أعرفه ان عوره الرجل من السره إلى الركبه
وهم ساترينها ولا أنتي شايفه غير كذا
المعلمه/ أنتم ماتابعون المباراه إلا إذا كنتو تحبون لاعب
ورده/ ليه حرام نحب لاعب بعدين أحب لاعب ولاأحب فنان
المعلمه/ طيب لو شفتي صديق أخوك راح تقولين ياحلوه قدام أخوك ولاراح تخافين
ورده/ راح أخاف من ربي قبل كل شئ لأن لاديني ولاتربيتي تسمح لي بهالشئ
المعلمه/ شوفي ياورده ياأني أقنعك ياأنك تقنعيني
ورده/ أجل بتطولين لأني ماأقتنع بأفكار مالها معنى
المعلمه/ ليش مالها معنى أنتي لازم يكون لك قدوه أهلك يشوفونك تابعين مباريات
ورده/ أيه أمي نتحدى أنا وياها على المباراه ولو شايفه فيها حرام ولاعيب أمنعتني
المعلمه/ أهلك موب قدوتي
ورده/ ولا أنتي قدوتي
هنا ماتن شلتها من الضحك
ورده/ شوفي ياأبله أنتي ماعندك دليل للتحريم ولافيه دليل
ولا في المباراه غلط ولو فيها كان أنا تركتها بنفسي
المعلمه/ بس أنتم همكم الزين
ورده/ مافيه بنت ماتحب الزين ولازم تقول هذا زين وهذا شين وهذي فطره في المراءه
تحب الزين بعدين عندك المسلسلات وش حكمها بنظرك
المعلمه/ حرام لأن فيها خلوه
ورده/ أشوى أنك عارف السبب لأني ماشفت حريم يلعبون مع اللاعبين
المعلمه/ هالحين البنت ماتابع المباراه للأستمتاع
لا تناظر في لاعبها المفضل حتى تجمع عنه كل المعلومات
ورده/ مو كل البنات سوا بعدين حتى أنتم تجمعون معلومات عن المشايخ
المعلمه/ ذولي مطاوعه
ورده/ ياسلام وش الفرق المطوع يخاف ربه ويحدث على الناس
واللاعب يخاف ربه ويلعب كوره
وكثير من اللاعبين مطاوعه وماظنتي يمنعون أهله مايشجعونهم
ودق الجرس قالت المعلمه/ لنا لقى ثاني إنشاالله
ورده/ حاضرين في أي وقت مع أني :
‏ ‏I'm alawys the
winner
( دائما الفائزه )
وطلعت وقام الفصل يصايح ويصفق لورده تعيش ورده تعيش تعيش تعيش
قالت/ لاداعي لاداعي أنا في خدمه الشعب
كانت كذا حياتهم أحداث مضحكه ولعب ووناسه وحياه عاشوها ببراءه
ومافكروا أنه بيجي يوم نرجس تروح لديرتها وبيفقدون أجتماع شلتهم

يتــبع
بعد التخرج سوت الشله حفله تخرج في بيت فله
وكان الكل حاضرها وكانت حفله من أحلى الحفلات
بعد الأستهبال والوناسه والفرفشه جلست الشله تحكي مواقفها للحاضرين
وحسوا بوحشه لنرجس لأنهم راح يفقدونها لأنها بتروح تدرس بجامعه السودان
نرجس / ليش ماتجوني زياره بالسودان
صباره/ أيه هين بنزورك بالكفن
فله/ والله مايخلونا أهلنا ليه وين عايشين
ورده/ هذا هو الألم بعد العشره
نتفرق مثل اللاعبين إذا أنتهوا من معسكر...أأأه أأأخ أأأه أأوتش ويش فيكم.
كانت الشله تكفخها
زهره/ أرحمينا من لاعبينك أشوي لازم تستشهدين فيهم
نرجس/ إلاصدق ياورده أنا بروح للسودان وللحين ماقابلتي
ياسر القحطاني وحمد المنتشري ومحمد الشلهوب ومن الرابع نسيته
صباره/ محمد نور وهذا وجهي إن شافت زولهم
فله/ والله إن شافوك ليعتزلون عالم الكره بس دخيلك لاتقابلينهم
ورده بكبرياء/ لهم الشرف إذا قابلوني بعدين من قال إني معجبه فيهم
أنا أبي أقابلهم لأني عندي لكل شخص سؤال وبس
نرجس/ بالله وش أسئلتك
ورده/ بخصوص ياسر بسئله ليه مايحلق شوشته
أما حمد المنتشري ليش أربع وعشرين ساعه علكته بفمه أنا ماأدري أمه ولادته وهو يعلك
صباره/ طيب محمد الشلهوب ومحمد نور
ورده/ محمد نور بسئله ليش دايم معصب ونفسه برأس خشمه
وأما الشلهوب بعطيه كرتون حليب نيدو يمكن يكبر شوي
نرجس/ طيب تعالي السودان وبتقابلينهم
زهره/ ليه معسكرين عندكم
ورده/ ليه بيأخذون لياقه في الشمس مع تغير في اللون
فله بصيحه/ أسمعوا جتني فكره
صباره/ وجع فكره تصايحين كذا أجل لو أستفاده وش بتسوين
قامت الشله يطقن بأيدين بعض وماتن من الضحك
حركتهم المعتاده إذا بغوا يرفعون ضغط أحد
فله بحماس/ لا أسمعوا وش رأيكم نقول لأهلنا يودونا للسودان قبل بدايه الكليه
ناظرن الشله ببعض وماتن من الضحك
ورده ومازالت تضحك/ خلاص قومي ألبسي عباتك بس لاتنسين الشنطه
وطقوا أيدينهم بأيدين بعض
صباره/ ولاتنسين تأخذين معك كفن أختصار للوقت
وزادت الشله بالضحك
وزهره وهي منسدحه على الأرض وماسكه بطنها من الضحك/ يعجبني ذكائك المستفحل تبين تروحين للسودان هاه
وزادت بالضحك
فله بعصبيه/ أسمعن ياحواطى أنا عارفه أنهم ماراح يوافقون بس عندي خطه تخليهم يوافقون بسهوله
كان على طول الشله تسكت وتنتبهه للخطه
فله/ أول شئ نطلب منهم يسفرونا للسودان طبعا هم بيكرشونا
زين إذا ماكفخونا بعدين نسوي إضراب ونجلس مهموات ومانكلم أحد
عشان حنا فاقدين نرجس صديقه عمرنا عاد هم أكيد بيرحمونا ويودونا لنرجس
وافقت الشله بسرعه على الخطه
بس زهره قالت بصوت مهموم/ مافيه غير الأضراب يعني مافيه حكم أخف
( كان أمها وأبوها الأكل )
صباره وهي ترفسها/ أنطمي بس
فله/ طبعا كل وحده تشتري لها مؤنه وتحطها بغرفتها وتأكل منها بالدس بس ماأحد يدري
وأنتهت الحفله وقرروا أنهم يوافون بعض بالتفاصيل

نظرة الحب
05-03-2011, 01:22 AM
دايه الخطه نجحت وهي أن أهل كل وحده كرشوها مع تكفيخه بسيطه
ونفذت الشله الجزء الثاني الأضراب وشيله الهم والحزن
كانت ورده و زهره بنات عم
وكان أبو زهره حنين رحم بنته وبنت أخوه خصوصا أنهن ماطلعن من غرفهم مده شهر
فقام عزم أخوه وأبو فله وأبو صباره
وبعد القهوه قال لهم/ ياأخوان الله أمر بمراعاه الأولاد وحنا ماقصرنا ولله الحمد
لكن اللي يشوف حال بناتنا ينكسر قلبه فأنا عندي رأي
وش رأيكم نخلي البنات يروحون لصديقتهم وكل وحده معها أخوها
أبو صباره/ ياأخوي أنت وش تقول من متى بناتنا طلعن من غير أهلن لابعد برى الديره
أبو زهره/ أنت فكر ياأخوي صديقتهم عشره أثنا عشر سنه
صعبه يفقدونها بسهوله وإذا فكرت حنا ماراح نخسر شئ الفلوس وصخ دنيا
أهم شئ سعاده بناتنا ومثل ماقلت أخوانهن بيكونون معهم
بعد معارضه شديده من بعض الأبوان وألحاح شديد من بعض الأبوان وافقوا
وحددوا أنهم يروحون شهر ويرجعون
أول مادرن البنات كان يطيرن من الفرحه ودقوا على نرجس وبشروها
وكل وحده قشت دولابها كله من الفرحه
وكل وحده أخوها الكبير معها إلا ورده وزهره راح أخو زهره
أما أخو ورده قال ان ولد عمه يسد عنه
،
في الطياره جلست صباره جنب فله وكانوا توهم ماأقلعت الطياره
قالت صباره للمضيفه/ عليك الله تديني ع......أأأأي
ضربتها فله بكوعها على بطنها
وقالت/ تونا ماوصلنا السودان فكينا من تقمص الأدوار حقك ترانا بديرتنا لسه أهرجي سعودي
( وكانت زهره جنب ورده )
زهره/ الله شوفي ورده بكرسيهم ألعاب
التفت ورده بسرعه/ فيها كوره
زهره/ لا
ورده/ أجل وش تبين أسوي أقول دورلي المضيفه أبيها
قامت زهره تصفق بيدها وتنادي/ يامضيفه..........
ماحست إلا بالكتاب اللي صكها برأسها
كان من أخوها قال من بين أسنانه وبعصبيه/ خير يالبقره جالسه في مطعم يوم تصفقين
زهره/ ورده تبيها فناديتها
أخوها/ أنطمي لين تمر أجل
جت المضيفه وسألت وش يبون
ورده/ أبي تشغلون لي توم وجيري طفشت
زهره/ حشا تونا ركبنا الطياره ماأمدى تطفشين
ردت عليها المضيفه أن ماعندهم للأسف
ورده/ ياسلام طياره طول بعرض مافيها توم وجيري
أجل هاتي لي عصير داناو ولاتقولين مافيه لأني شايفه أعلان تقدمون فيه عصير داناو
راحت المضيفه وجابتلها العصير وجلست هي وزهره يقلبون جهاز الألعاب
فله جلست تفتش شنطه يدها
صباره/ وش فيك وش دورين
فله/ ياقهري نسيته
صباره/ وش هو
فله/ برقع العزايم لاوالله أكلت تبن
صباره/ لاتخافين أنا جايبه ثلاث براقع بعطيك واحد
فله/ المشكله أن هذاك كان كشخه علي
يخلي السودانين متسدحين وراي
ورده من الطفش قالت/ زهره قول لي قصيده
زهره/ خير قالوا لك الجاحظ قدامك
كان تموت ورده من الضحك وتقول/ أنا أشهد أنك عرفتي وشلون تشبهين نفسك
وثقلت صوتها وكملت ياالجاحظ
وزادت في الضحك
وكان قدامهم أماراتي يسمع سواليفهم
قال قصيده مدح في الورود ورفع صوته عشان يسمعونه
هنا أرتفع ضغط ورده وقالت/ مابال الذبان أصبح لها لسان
ماتت زهره من الضحك
ضحك الأماراتي وقال قصيده معناها مهما تغلطين راح تكونين غاليه وكان واضح أنه شاعر
أنقهرت ورده وطلعت جوالها ودورت مقطع صوت فيه سبه
بس مالقت غير أغاني مدح في المنتخب كان تحط أغنيه ( جاكم الاعصار ولاشئ يرده )
مات الأماراتي من الضحك وقام يطلع جواله
ويسمعها أغنيه عبدالمجيد ( قول آمين عساك تحبني وتموت فيني )
كان يرتفع ضغطها زياده وتحط أغنيه راشد الفارس ( عاشت بلادي )
الرجال مات من الضحك يحسبها تستهبل مادرى أن جوالها كله المنتخب
فقام حط لها أغنيه عيضه ( مهما جرى منك وصار )
قامت تأخذ جوال زهره ودورت فيه ولقت فيه أغنيه خالد عبدالرحمن ( شدو ويمتهم جنوبن عن الديره )
( كان جوال كل وحده ألعن من الثانيه )
فحطتها له
ضحك الأماراتي من أسلوبها العربجي وحاول يلتفت بيشوفها
بس حس أنه لو ألتفت بيشوفه واحد من أهلها
وأول ماأقلعت الطياره صباره تحط رأسها وتأخذها نومه
وفله جالسه تكحل عيونها متحمسه للسفره كأنها رايحه للندن

يتبــع
ورده أول ماشافت ياسرالقحطاني كان جالس على أرضيه الملعب
وأول ماشافها قال/ سمعت أنه مايعجبك شعري
قالت/ موب شعرك وبس
لكن ماعلينا أنت ورى ماتحلقه لو أنه زين قلت ماعليه لكنه يروع وفشلتنا كواجهه سعوديه
بكره الأجانب يشوفونك ويقولون إذا ولد السعوديه كذا أجل وشلون بناتها ياأخي أرحم بنات ديرتك
قام ياسر وقال/ شكلك منقهره من شعري بس ماعليه تبين أسويلك مثله
وطلع مقص من جيبه
قالت ورده وهي تتراجع على وراء/ لاشكرا شعري معجبني ويله عاد ماأبي أطول عليك أستأذن
قال/ لاوين لازم أسويلك مثلي
وتقدم جهتها فقامت ورده تركض وتصيح وهو وراها يلحقها
جلست تصيح تهديه وهي تركض/ ياسر تعوذ من إبليس ترى الشعر وصخ دنيا
لاتروح مستقبلك بسبته أأأأأأأأأأأأأه
بس هو كان ناوي الشر
وصارت تفحط بعبايتها تقول ( باثمان ) وهو ورائها
ومسكها ياسر وحاول يقص شعرها
وهي تحاول تدفه وتصايح/ ألحقوني بيقص شعري من الغيره ألحقوني أخذوا المقص
لالالا لاتخرب قصتي
ألحقوني ياناس
الرجال بيقص حيلتي بالدنيا
أأأأه الحقوني
وحاولت تدفه بس الرجال ناوي الأنتقام
وقالت/ ياسر تكفى توبه والله أني أحب شعرك
الحقوني ياناس
وشافت الموت بعيونها
ورده......ورده.. تسمعيني بسم الله عليك....ورده أصحي
( كان صوت زهره وهي تصحيها من النوم )
فزت ورده وعرفت أنه حلم وأول مافتحت عيونها شافت كل اللي بالطياره قدامها
ومن الفشيله رجعت سكرت عيونها وتدعي/ يارب يروحون يارب وبعد خمس دقايق فتحتها ولقتهم ماتحركوا
قال الأماراتي بأبتسامه سخريه/ حتى في الحلم تمشكلين مع الناس
قامت وحطت يدها على خصرها وقالت/ هذا شئ بيني وبين ولد ديرتي أنت وش دخلك
قال/ ألاصدق من هو بطل الحلم
قالت بلهجه أماراتيه/ سير لكرسيك وخوز عن وجهي أشوف
سكت وراح لكرسيه وراح كل واحد لمكانه
زهره/ أقول ورده من هو اللي كان بيقص شوشتك
ورده/ يوووه يازهره والله أنها توبه أتدخل في اللاعبين هذا هو ياسر
أجل محمد نور وش بيسوي والله ليقصبني خلاص خلاص توبه
وحكت لها الحلم كله
ماتت زهره من الضحك
وقالت/ أحسن يمكن تتوبين من لسانك

نظرة الحب
05-03-2011, 01:23 AM
ول مانزلوا من الطياره تقدموا الشباب يدورون تاكسي
وأخذوا فندق في نفس حي نرجس
وبعد مانزلوا الفندق دقوا على نرجس يبشرونها أنهم جو
قالت نرجس أنها بتجيهم بعد خمس دقائق
وجلسن البنات يرتبن أغراضهم
ودق باب الغرفه قالت فله/ وحده تفتح الباب
طنشوها وقامن تسدحن على السراير
فله/ زهره أفتحي الباب
زهره/ ليه بيت أبوي يوم أفتحه
فله/ وجع إن شاالله قومي أجل ياورده أفتحيه
ورده بتعب مصطنع/ يووووه ماتشوفيني لسه متأثره من الحلم بعدين
وش يضمني أنه مايكون واحد من سلاحف النينجا ياسر ولامحمد نور ولا الشلهوب
لالالالا آسفه افتحي أنتي
وكان الباب مازال يدق
فله/ عيب أنا أكبركم قومي ياصباره
صباره بضحكه/ كان غيرك أشطر بعدين أنا أحس بدوار البحر ماأقدر أقوم
قامت فله وجلسن البنات يتضاحكون ويطقون أيدين بعض
يوم سمعت فله ضحكهم أفتحت الباب ورجعت بسرعه تبي تهزأهم وماتدري من فتحت له
فله/ تضحكون بدون سنون يابقر 2007
بعدين........ وسكتت يوم شافت صديقتها طايره عيونهم باللي وراهم التفتت بتشوف وش فيه
آآآآآآآآآآآآآآآآآآآآآآآآآه ( كان صياح الشله كلها )
وكلهن أطمرن على السرير وجلسن خايفات ومازالن يصايحن
زهره/ آآآه شيرخان عندنا ألحقونا
قالت نرجس/ وجع هذا أنا نرجس
كانت الشله فاتحه فمها بتصايح بس أسكتن وجلسوا يقزون الضيفه الغريبه
ورده/ وش يضمنا أنك نرجس قولي كلمه السر
نرجس/ نرجس هرجس
كان يطمرن عليها
فله/ يأخذك شكلك ورى شكلك كذا بلاء بشكلك
نرجس وهي تدور/ وش فيه شكلي
ورده/ وش مافيه لابستلي بنطلون أبيض وجاكيت أبيض
ماناقصك غير الحزام الأسود وتصيرين من أبطال الكاراتيه
نرجس/ هذي الموضه ياغبيه
صباره/ أجل وين عبايتك
نرجس/ مالبست عبايه
فله وهي تضرب بيدها على صدرها/ مالبست عبايه ليه ماعندكم رياجيل بالسودان
نرجس وهي تجلس/ إلا وش كثرهم
ورده وهي تشهق/ طالعه قدامهم كاشفه هو من زين زولك ياكونداليزا رايس
نرجس/ عندنا ماأحد يتغطى
كان تقوم عليها الشله وتكفخها وتهددها أن غصب طيب ماتطلع معهم إلا بعبايه
وبعد التكفيخ راحت نرجس وعزمتهم بكره في بيتهم وبتأخذهم جوله على ديرتها
،
في بيت نرجس تعرفت الشله على أهل نرجس
وجلسوا تقهوا عندها وبعدها طلعوا مع نرجس يتمشون
وركبوا مع سواق نرجس
وفي السياره قالت فله/ نرجس زيني البرقع شكله يضحك
نرجس بطفش/ وأنا وش عرفني وشلون ألبس البراقع
صباره/ أيييييه الله يرحم أيام زمان
وصلوا حديقه الحيوان قالت ورده/ أمحق ترحيب على طول حيوانات
وتفرجوا على الحيوانات ومروا بالفيل كان يقعد يزاعق
قالت زهره/ وخري عنه يانرجس روعتيه
كان تموت الشله من الضحك ويطقون أيدينهم بأيدين بعض
نرجس/ لاوالله أنتم اللي روعتوه بعبايتكن تقول خفافيش
صباره/ أنطمي بس هذا حجابنا عزالله ماينزل عنا إلا في بيوت أهلنا
قامت الشله تصفق وتصفر وتصايح تعيش صباره تعيش تعيش تعيش
عاد تحمست صباره وقالت/ والمؤمن الحق يبتلى من الله والجزاء............
تسحبها ورده برقبتها/ أقول أمشي ماتنعطين وجه
بعد حديقه الحيوانات راحو لمطعم وعصبن البنات إلا يبون مكان معزول ومغطى
وبعد هوشه طويله عريضه مع راعي المحل كرشهم
وراحو أشتروا ساندوتش وعصاير وحلويات
وراحو يأكلون بحديقه هاديه مافيها ناس كثير وجلسوا بين الأشجار
نرجس/ ترى هذي أشهر حديقه عندنا كل السواح فيها
زهره/ أمحق مافيها إلا خمسه ثلاثه نايمين وأثنين يتمشون
نرجس/ تو الليل مابدى عندنا
صباره/ يافرقى عين أبوي حتى هنا تسهرون
وبعد ماأكلوا وخلصوا قاموا يتمشون
شافوا بزر سوداني
قالت ورده بلهجه صعيديه/ بقولك أيه ياواد علامك تسمرع هنيه بلحالك
أجري عند أمك جرت عليك سلق الشوارع
رد عليها بكلمه سودانيه مافهمتها
قالت بنفس لهجتها/ ياباي عليك واد ملسون
زهره/ هالحين أنتي ليش تهرجين لهجه صعيديه
ورده/ والله أسهل عندي من اللهجه السودانيه
وبعد ماتمشوا رجعوا للفندق على أساس نرجس بكره مسويه لهم حفله
بمناسبه زيارتهم للسودان وبتنادي صديقاتها وبنات عمانها وخوالها
وأول مادخلن الفندق كل وحده مسكها أخوها يهزئها عشان راحو وماقالوا لهم
إلاورده مبسوطه عشان أخوها ماجاء بس ولد عمها هزء زهره وقالها توصل الكلام لورده

نظرة الحب
05-03-2011, 01:23 AM
وردهـ / ايه مـنتو فاهمين عـشان الاعبين يركزون في
الملعب لازم يكونون رايقين..
فــله / ياخبله يقول سفير ان عـبود يبي يقراها بروقان
تقولين لاعبين .. !
صــبارهـ / انتبهي لا يجيك ياسر بالمقص الحين
وردهـ / خـله يجي اذا ما قـفلت عليك بالكـالون .. !
صبـارهـ / فاهمتك ياوردهـ تقصدين ماغيره كالون .. هذي
ترى لعبه محبوكه عشان البعبع
..!
نـرجس / عليك الله تقولي .. خوفتيني مين
البعبع .. !
صـبارهـ / هذا رئيس نادي الأتحاد ( رابع العالم ) .. اقالووه
.. بسبب صحافه تـجعر
و نادي يزعق
.. !
وقتـها البنات كـلهم انـصدمو من كلام صبارهـ ..!!
قالت وردهـ / كملي ياصـبارهـ ...
صـبارهـ / ما راح اكمل لأن اذا كملت يمكن سفارتنا الي هنا
تقول اني استرجعت او استسفرت الى السعوديه ! وانا ابغى
اجلس هنا .. بالقوه اهلي رضو وجيت هنا !
نـرجس / دايرهـ تجننيني ياصباره! كلامك كـلو الـغاز .. !
في هذا الوقت زهرهـ ساكته وما قالت اي شي ؟!
وردهـ / زهره ليه ساكته .. ؟!
زهرهـ / تتوقعين ان رئيس الأتـحاد مـظلوم ؟!
في هذي اللحظه دخلت صباره عليهم
صبارهـ / لاتقلبون المواجع وتخلوني اقول انه مظلوم في بـلد
لـم يظلم بـل يستظل العالم تحت ظـله !!
فـله / مين الي سوا كذا؟! .. وايش بيستفيد ؟!
صـبارهـ / تدرين هذولي الأشخاص كـنا نـحبهم ونأمل فيهم
الخـير .. ولكن اكتشفنا بأنهم مايريدون لنا السـعاده ! ويبون
السـرطـان ينتشر في
كـل مـكان !!
نـرجس / وي وي يازولــه ايش هذا الكـلام الكـبير !!
فلـه / الحين عـرفت مين هـم .. ! ولـيش اصدرو قرار
لـرئيس الأتـحاد تكليف وكانت الجمعيه العموميه في اليوم
الثاني وبشكل مأكد بتحسم لـه !!
زهرهـ / من كلامك يا فـله انا بعد عرفت مين السبب !!
وردهـ / انا مـالي فيكم .. بشجع المنتخب .. وتاخذ جوالها
وتشـغل ( ماظـنك نـاسيا البـطل يا اسيا ) .. !
صبارهـ / تشجعين المنتخب !! كيف تبين الله ينصرهم واهم
يظلمون واحد من عيالهم !
نرجـس / بالفعل والله ظـلم .. وهذي مشكله اذا في اطهر بقاع
الدنيا يصير فيها كذا ّ؟!
فـله / والي يعافيك يا نـرجس لا تقولين لـحد !! خلي هذا سر
بيـننـا .. مهما صـار نخاف على سمعة بـلدنـا !
زهرهـ / واهي صادقه فـله .. الي سوو كذا الله بينتقم منهم ..
نرجـس / من عيوني بلدكم بلدي .. وهذي الأشكـال يازولــه
يروحو الى مـزبلة التـاريـخ .. !
صـباره / الى مـزبلة التــاريخ !!
صارو البنات كلهم يرددون .. الى مزبلة التاريخ ! الى مزبلة
التاريخ !
وردهـ / بـعد ما سمعت كـلامكم .. انا اتــحاديه ..
فـله / وانا كـمان اتــحاديه ..
زهرهـ / اتحـاديه .. ولـن انسى مـنصور البـلوي .. !
صبارهـ / انا اتــحاديه من يوم جابني ابـوي .. واليوم اكثر
اتحـاد .. !
نــرجس / ودي اصـير اتـحـاديه ! بس اخاف بـكره يقولو
استقالت السودان من الجامعه العربيه !!
في هذي اللحظه انتاب البنات شـعور قـريب من الحزن والفرح
مايدرون اشلون يعبرون اكـثر
قالت صـبارهـ / انـتو في حـضن نـادي ثـمانيني وقـور
شـامخ مهيب للجميع .. افـرحـوا .. وترى يابخت من نام
مـظلوم !
زهرهـ / بالفعل الظـلم ظـلمات يـوم القـيامه ..
وردهـ / مـنصور ياشـيخاً بالظـلم مـغدور .. الله معك وبأذن الله مــنصور
مرفأ يـقلك ومن وراه جمهور.. نادي الوطـن شامخ ولـو بُـه جــٌـور
فـله / صـح لسـانك .. طـلعتي شـاعره ياورده ..
وردهـ / اذا مـاقلت كـلمتين في منصور تبين اقول لمين .. !
وبعدين قليله في حقه ..

صبارهـ / صاادقه يا ورده .. لكن وش نقول في ناس ماتقـدر
الي يخدمون الوطن !
زهرهـ / خلاااص ترى انفقعت مرارتي .. ما احب الظلم
واجحافه .. قفلو السالفه
وردهـ / ايه اذا تبين تفقعين مرارة اي لاعب ضحكي عليه الجمهور وكثري الكباريات فيه والتسحيب مثل ياسر
فله / خايفه من المقص عشا كذا قلتي ياسر
ورده / يمكن بس ترى من جد اهو فنان
صبارهـ / الا صح تبون اقلكم كيف انتقل ياسر لنادي هلال موبايلي !
نرجس / عليك الله تفكينا من سيرة الكوره .. ومصايبها !
صبارهـ / اقلكم وش يسوون بمعسكرات ناشئين وشباب المنتخب ؟!
زهرهـ / خلاااااااص تعبنااااا .. يكفي الي سووه في منصور .!
ورده / صباره والله حاسه فيك .. بس سـلمي أمرك لله ..
صبارهـ / ونـعم بالله .. اللهم من ارادني واراد غيري بسوء فشغله بنفسه ..
كل البنات بصوت واحد ,, آآآآآآآآآآآآآمين
/

نظرة الحب
05-03-2011, 01:23 AM
في بيت نرجس أجتمعت عائله نرجس كلها
وانبسطوا البنات معهم
صباره/ عليك الله يادمارا تديني ع..........
انفجرن صديقاتها من الضحك يوم قالت دمارا
نرجس/ أسمها تمارا بس خففي نطقه التاء
فله/ الله يرحم والدينك فكينا من لهجتك اللي حادرتلها وادي
ورده ومازالت بلهجتها الصعيديه/ شابوش عليك ياصباره أيوه كده أقهريهم
زهره/ الله يخلف وحده تهرج سوداني أوروبي والثانيه تهرج صعيدي متخليج
وقامت نرجس وجابت المسجل عشان يرقصون وكانت أغانيها سودانيه ومصريه
قالت فله/ وجع هالحين مافيه أغنيه خليجه
نرجس/ كانت عندي بس ضاعوا
زهره/ لو أنك حرمه طيبه كان فتحتي أستديو لأغاني الديره اللي لحم كتافك من خيرها ياناكره المعروف
صباره بلهجتها السودانيه/ آآي داير الأهمال ماعوزنيه
ورده بلهجتها الصعيديه/ ياباي عليك أطمري قوام وجيبلينا أغنيه من أغاني بلدي وججججع بصحيح
وراحت نرجس دور مالقت قامت زهره وطلعت جوالها ودورت أغنيه يرقصون عليها
وفي الأخير حطت أغنيه راشد الماجد ( المسافر راح )
فطمرت الشله تصايح من الوناسه ويرقصون وكان كل اللي حاضرين فاتحين فمهم
مايدرون وشلون يرقصن على أغنيه من عصر جدي ولابعد حزينه
وبعد مافرفشوا الشله رجعوا الفندق
،
( يوه هذي كليتكم شكلها يروع )
قالتها زهره لنرجس في اليوم الثاني يوم أخذتهم نرجس توريهم جامعتها
نرجس/ أسمها جامعه يابقره
فله/ أمحق جامعه
ورده/ ياباي أيه ده جامعتكم باين عليها جامعه للترعيب وإظهار قلب الطالب
صباره/ آآي عليك الله يانرجس هرجس جامعتك فيها عيال ؟
نرجس/ أييييه فيها بنات وعيال ومن جميع الجنسيات حتى السعوديه
زهره وهي تشهق/ عيال ديرتنا عندكم
نرجس/ أيه ولاشايفتني ألعب عليك أنتي وجهك
فله/ قلت جامعاتنا عشان يدرسون برى ولابعد بالسودان
نرجس/ ليه ياحبيبتي وش فيها السودان
فله/ بصراحه بصراحه هم يدرسون ولا يحترقون
زهره/ صادقه السودان خط الأستواء فوق رأسها الله يعين عيالنا بس
وبعد ماتفرجوا على الجامعه راحو للحديقه اللي تعشو فيها ذيك المره
وأشتروا آيس كريم وجلسن على الكراسي
ومروا من عندهم شابين سعودين
وأول ماشافوا أشكالهن بالعبايات ماتوا من الضحك
قال واحد/ شدعوه باثمان بالنهار
قال خويه/ لا موب باثمان واحد إلا درزن
وزادو في الضحك
أرتفع ضغط البنات قالت فله/ درزن سيارات تلقطك أنت وياه
قال الأول بأستغراب/ هاه تكلمون مثلنا
ومات خويه من الضحك
وقفت زهره من العصبيه وحطت يدها على خصرها
وقالت/ أقول ورى ماتنقلعون ياجوج ومأجوج
كان الشباب يموتون من الضحك
صباره/ أمشوا يابنات ذولي سكارى موب كفؤ نكلمهم
قامن البنات قال الأول/ بدري ماقعدنا معاكم
ورده/ تقعد معك أم أربعه وأربعين ياالسخله
قال خويه/ طيب بأخذ معك صوره كذكرى
ورده وهي ميته من الضحك/ ليه من زمان ماأخذت صوره مع بشر
قام خويه يضحك عليه قال/ وش قصدك
ورده ومازالت تضحك/ شوف شكلك بالمنظره وتعرف
حمد الله والشكر قرد مقعد
قامت نرجس تسحب البنات وتبعدهم عن المشاكل
ورجعوا الفندق قالت نرجس/ شفتوا أشكالنا تضحك قلت لكن بس ماتفهمن
زهره/ ياسلام وش تبينا نسوي نزل عبايتنا ونطلع كذا ؟
نرجس/ على الأقل لثمه موب لازم تكشفون
فله/ أفاااااا يانرجس نلبس لثمه ونصير مثل غيرنا أول مايطلعون من ديرتهم نسوا أنفسهن
نرجس/ بس أنتم مضطرات غصبن عليكم
صباره/ ليه مضطرات شايفتهم حاطين على أرقبتنا السيف
نرجس/ أنتي شفتي تعليقاتهم على أشكالنا والله قهر
زهره/ عادي خليهم يتكلمون الكلام بلاش
نرجس/ كيفكن أنتن أحرار
وبعد ماجلسوا شوي يسولفون راحت نرجس بعد ماأتفقوا أنهن بكره يروحون السوق
وبعد ماطلعت نرجس رجعوا أخوانهم وكان واضح عليهم الطفش

نظرة الحب
05-03-2011, 01:24 AM
نرجس هذا محل ولامغاره )
قالتها ورده أول مادخلت محل ألعاب
نرجس/ مغاره!!!! ليش وش فيه
ورده/ بابه كل ماقربت منه فتح روعني بصراحه
نرجس وهي ميته من الضحك/ ياغبيه هذا باب أوتوماتيكي أول ماتدوسين على الحديده ذي يفتح تلقائي
عاد ورده ماصدقت على الله جلست تلعب في الباب مره تدخل مره تطلع
سحبتها صباره بعبايتها/ وجع فشلتينا
صدق هذا الورع لايعطى سلاح ولايأخذونه للأسواق ورفستها ودخلتها معهم بالمحل
جلست زهره تفرج على الملابس وكان المحل كبير
وشافت لها كرسي متحرك فقامت جلست فوقه ولاحظت أن الشله ملتهيه بالملابس
فطفشت ونادت فله هيي فله
جتها فله/ هاااااه وش تبين ماتشوفيني في خوض شراء بلوزه
زهره/ خليك من البلوزه الحين وأسمعيني
بأعرض عليك صفقه
فله/ ماعندي رأس مال دوري غيري
زهره/ مايحتاج رأس مال كل الموضوع أني أبيك تدفيني بالكرسي
ويصير دوره لك ودوره لي
وش قلتي ؟؟
فله بحماس/ أوكي أربطي حزام الأمان
ورده ورجعت لها لهجتها/ ياباي عليك لالالامايصوحش كده السعر نار
ارفق فينا شوي ياعم الحاج صحيح أن........( هيييييييييييييييييييييييييه )
التفت على الصياح لقت فله تدف زهره وزهره مبسوطه
وراعي المحل منهبل قامت راحتلهم مفحطه وهي معصبه
وأنبسط راعي المحل لأنها بتفكه من الأزعاج وراح مع ورده
قالت ورده بعصبيه/ وش قلت الأدب ذي
كان توسع كشره راعي المحل
كملت ورده/ خلاص الواحد مايستحي هالأيام ومايفكر غير بنفسه
قال راعي المحل وهو يهديها/ خلاص يابتي ماحصل حاجه
البنات عاغلات وماراح يتكرر دا تاني
ورده ومازالت معصبه/ لاياعم هذي أنانيه على الأقل ينادوني ألعب معهم
أنهبل راعي المحل وعيونه نقزت من وجهه
كان يبيها عون طلعت فرعون فعصب وقام وكرشهن
بعد الفشيله جلسن البنات على الكراسي
وفجأه صايحت صباره بصوت عالي/ وردااااااااااااااااااااااااااااه
كان ورده المسيكينه تنتفض وتطيح بالأرض من الروعه
قالت فله/ طاعون يشف بطنك وش فيك ياصفيره الأنذار
قالت صباره بحماس/ ورده شوفي هذاك موب رونالدينو
كان تطمر ورده ووقفت تناظر في اللي تأشرله صباره
قالت بصيحه فرح/ ألا هو تعالي نروح له نخليه يوقعلنا
صباره/ بس مامعنا أوراق
ورده/ عادي يوقع على برقعي
وتحمسن وراحن يفحطن بيلحقنه
ومادروا إلا باللي يسحبهن برقابهن
إلا هي فله/ خير يالبقر عشان اللون واحد صار رونالدينو أمشن بس بلافضايح
صباره/ يمكن هو طيب
فله/ لا ياشيخه وش يجيبه بالسودان
ورده/ يمكن جاي لأهله
فله/ بلا غباء أفريقي وأهله بالسودان وشلون تجي ذي
يله عاد أمشن بلا فضايح وقامت ترفسهن وجلستهن
( الله الباثمنات هنا )
التفتن لقوهم نفس الشابين اللي بالحديقه
فله/ يوووووه صدق ماينعطون وجه
الشاب/ نفسي أعرف أنتم ليش متكبرات
زهره/ كبروك في مجهر وأن شاالله مالقوك
ضحكوا الشباب
قال خويه/ عطونا وجه والله ظلم
طفشن البنات من هرجهم نزلوا تحت وهم لحقوهم
عصبن البنات والتفتوا بيهزؤنهم
ورده/ ولله في خلقه شئون أنتم ورى ماطسون
قال الشاب/ نطس وش معناها
ورده/ هذي كلمه فارسيه معناها ثكلتك أمك
وماتوا الشباب من الضحك وفجأه تصلبت عظام البنات أول ماشافوا أخوانهم داخلين
وانتبهوا للشباب اللي معهن وجلسوايناظرون فيهن والشر يتطاير من عيونهم

يتبع
أول ماأرجعن للفندق كل وحده أخذت تكفيخه حتى ورده اللي كانت مبسوطه أن أخوها ماجاء
قام ولد عمها باللازم وحلفوا أنهم بيرجعون للسعوديه قامت كل وحده تفهم أخوها السالفه
بس كانوا ناوين الرجعه عشانهم طفشانين وماصدقوا لقوا شئ
وبعد العلقه جلست كل وحده بسريرها منهده مالها حيل تقوم
فله/ ياسلام عشان السلاتيح اللي بالسوق ننحرم من إجازتنا
صباره وهي تفرك رأسها/ أأأخ مع التكفيخ تسفير
ورده وهي تهمز يدينها من الوجع/ والله صرنا مثل الهندي اللي بدون كفيل أول مايمسكونه يسفرونه
ليش مافيه أحترام بين الناس بسم الله عليهم اللاعبين أحترامهم بين بعض يش.......
وسكتت من سيل المخدات اللي صكتها بوجهها
زهره بتعب/ والله لوفينا حيل كان قمنا وصفقناك ياأخي أرحمينا من لاعبينك شوي
فله/ هذا وهم بغوا يقصون شوشتها بالحلم
ورده/ موب كل اللاعبين سوا بعدين أحترموا ميولي الرياضيه
ولو كل يوم على هالتكفخ عزالله مادربت لاعبينا ولا........
سكتت لأنها خافت يحذفونها بالسرير
واليوم الثاني جاء أخو فله وقال لها/ كان ماتبون ترجعون الديره بنروح لسوريا بس ماتقولون لأهلنا
رجعت فله وقالت للبنات انبسطوا أخيرا بيروحون سوريا بس شالوا هم نرجس وش بيقولون لها لأنهم جحدوها
وبعد تفكير طويل قرروا يقولون لها عن الهوشه اللي صارت وأن أخوانهم تنذلوا فيهم وبيرجعون الديره
،
أول ماوصلوا سوريا أحجزوا بالفندق وقاموا أخوانهم يهددونهم إذا طلعن برى الفندق والله ليشنقونهن
وأول مادخلوا غرفهم كان كل وحده تطمر على السرير وتنام كأنهن جايات مشي
( هي صباره قومي هي )
كانت زهره ترفس البنات تصحيهن
صباره فزت على طول من الخوف وجلست بالسرير تحك شعرها وتنعس
وراحت زهره تصحي فله و ورده
فله بدال ماترفسها زهره هي رفستها وقالت/ أنقلعي زين ورجعت نامت
أما ورده أول مارفستها زهره فزت واقفه على السرير
وحاطه يدها على خصرها وقالت/ جعلهم يرفسونك بقدر أبو حلق هذا اللي أستفدته منك
كنت في خوض أعلان صلح بيني وبين ياسر
وعزمني على عشاء بين الشوطين بس حضرتك خربتي علي
زهره/ الله وأكبر عقب ماكان بيقص شوشتك صار يعزمك على العشاء
قامت ورده تطمر عليها وقالت/ فضحتيني في الله وخلقه الشرهه مب عليك على اللي يفضفض لك أحلامه
بعدين كيفي أنا واللاعبين إن شاءالله يحرقون شعري أنتي وش دخلك
زهره/ بلا والله من الرخامه خايفه يطبون عليك بالحلم ويكفخونك
قامت ورده تناشب مع زهره وكل وحده تلعب بخشة الثانيه
بعد العشاء جلسن البنات يفكرن وش يسووون هنا لأن الشباب متهددينهم مايطلعون
صباره/ ياسلام سلم هالحين هم يتمشون وحنا محبوسين
فله/ وش رأيكم ننزل تحت ونجلس نتقهوى
ورده/ لاياشيخه مافيه قهوه غير تحت
فله/ لابس نغير جو
زهره/ وإذا لقطونا العيال
فله/ صح مشكله
بس وش رأيكم نغير بأشكالنا
صباره/ كيف نطلع لنا رجل ثالثه
فله/ يابقره قصدي نلبس عبايتنا الكتف ولثمه وبكذا ماراح يعرفونا لو لقطونا فجأه
صباره وهي تضرب بيدها على صدرها/ هالحين ماسويناه بالسودان بنسويها هنا
فله/ حنا ماراح نقل أدبنا بنجلس نتقهوى وبس
وبعد تفكير طويل ومناقشه طويله نزلت البنات تحت بلوك جديد
( يازين قهوتهم )
قالت فله وهي تلذذ بالقهوه
صباره/ أنا ماأدري شلون تشربين براحه
زهره/ أنا أدري لثمتي تقولين مغمستها بالقهوه عزاه يابرقعي لو أكل ذبيحه ماتوصخ
ورده/ يووووه والله أني جوعانه خلهم يجيبولي أكل مت من الجوع
فله/ حشا تونا متعشين بعدين تبين أكل خشي المطعم موب هنا شايفته بيتنا
ورده/ وجع والله جوعانه من تروح معي
كلهن قالوا مايبون
ورده/ أحسن أنتن مو كفؤ تروحن معي
بعدين أعزم اللاعبين أبرك منكم ع.........
ماحست إلا بجزمه تصك فمها وتسكتها وكانت جزمه صباره
راحت ورده وهي زعلانه
زهره/ ليش ياصباره بغيتي تقضين على فم البنت
صباره/ دبلت كبدي باللاعبين وليتهم حاسين فيها
فله/ ولو ماكان لازم تصكين خشتها بغيتي تصيبينها بتشوه
صباره/ لاتخافون جزمتي خفيفه
ورفعتها لهم لقوها جزمه بيضاء وعرفوا أنها طقم الروب حق الفندق
وكل وحده حطت يدها على رأسها من الفشيله

نظرة الحب
05-03-2011, 01:24 AM
مشت ورده مسرعه وهي تحلطم وتكلم نفسها من القهر
ياسلام كل شوي والثاني صاكيني بشئ شوي شوي ويشيلون الفندق ويصكونه برأسه
ياربي أنا وش أسوي أعتزل الرياضه ولاأهاجر لمانشستر يونايتد يمكن يقدروني هناك ولا.........
مادرت إلا بواحد صاكها بكوعه على رأسها
ورده بصوت حاد/ جعلهم بحديده صكوك وبونش أسحبوك
وبديرل أدفنوك ولمقبره العود أرسلوك
ماأسمعت إلا واحد مات من الضحك ألتفت لمه وهي ناويه الشر
قال بفرحه/ ورده
ناظرت فيه وقعدت تقزه وعرفته طلع الأماراتي اللي كان معهم بالطياره وتلاسنت معه
قالت/ خير أنت يوم تقول( وقلدته بصوت بشع يضحك ) ورده
مات من الضحك
قال/ ماعرفتيني
قالت/ والله الوقاحه من أنت عشان أعرفك واحد من الأهل
قال/ لا بس توقعتك عرفتيني خصوصا........
قاطعته/ ليه أنت لاعب أنت وجهك
( خربتها )
قال باستغراب/ لاعب!!!!
قالت/ يووووه روح زين
ومشت وخلته لأنها كانت جوعانه
وقعدت على طاوله فاضيه وجلس قبالها شباب وقاموا يناظرونها نظرات غزل
وأرتفع ضغطها/ الله يأخذك يافله كان الحين جالسه بعباية الوطواط وأبن امه اللي يناظرني
وأسفهتم وطلبت لها عشاء وناظروها منهبلين من عشائها اللي يعشي عشره
وفجأه غصت بالأكل يوم شافت الأماراتي جاء وجلس معها
قامت تكح وتكح وعطاها كأس ماء بكل براءه
قالت/ هي أنت وش عندك مرتز عندي قم ظف وجهك
قال/ ياحووول شو هالرمسه بدال ماتعزميني تعصبين علي
قالت بعصبيه/ والله لو أعزم كلاب الشارع ماعزمتك
جلس يضحك بكل برود
وهي تنرفزت وصاحت فيه/ أنقلع عن وجهي لأسوي بوجهك شوارع
وهو مات من الضحك
هنا أرتفع ضغطها ومسكت رأسها كأنها تجر شعرها
قالت/ يووووووووووه وش أسوي ياناس أنتف شعري عشان يفهم
وكان الرجال يزيد ضحك
ويوم شافها عصبت
قال/ خلاص خلاص بروح بس بتحتاجيني قريب
وقام وجلس بطاوله ثانيه وهي أرتاحت شوي ثم كملت أكلها
وبعد ماخلصت طلبت الفاتوره وبغت تصيبها سكته لأن الفاتوره كانت غاليه
قالت/ خير إن شاالله معشيني مفطح
قال السوري/ شو
قالت/ يله عاد بلا عباطه وجب الفاتوره الحقيقيه
قال/ بردون يامدام بس هيدي أسعارنا
قالت وهي تشر بأصبعها بوجهه/ هي وش مدام شايفني ساحبتلي درزن عيال وراي أنا آنسه
قال/ سوري ياآنسه
قالت/ أيه كذا خلك منضبط لاأشكيك بسفارتنا
بعدين الفاتوره فيها خطأ
قال/ لاخطأ ولا شئ أنت هيك طالبه
قالت/ خلاص خلاص أنا بد...............
سكتت وأنتبهت أن الأماراتي يناظر فيها ويضحك
كان يرتفع ضغطها وقالت/ طيب يصير خير يالبقره الضاحكه
قال السوري/ شو
قالت بأبتسامه مصطنعه/ لالالا ولاشئ بس الفاتوره عطها زوجي هناك وهو بيوقع أو يدفعها
قال/ قبل شوي قلتي لي أنك آنسه
قالت/ هونت
قال/ شو معناها
قالت/ يعني هذا زوجي وأنا جايه معه بس متزاعلين أنت عطه وهو بيدفع
قال/ زوجك وجالس بطاوله ثانيه ليش ؟
قالت بعصبيه/ أنت وش دخلك كنا متزاعلين بس رضيت
عطه الفاتوره وانت منطم
قام وراح عطى الأماراتي الفاتوره
كان تفحط ورده لصديقتها
وأول ماجتهم جلست تعبانه من الركض
قالت بصوت متقطع من الركض/ فاتكم... لعبت... على واحد
صباره/ خبريبك رايحه تعشين مسرع لعبت على واحد
حكت لهم ورده السالفه وجلست الشله تضحك عليه

يتبع

نظرة الحب
05-03-2011, 01:24 AM
وبعد ماقعدوا شوي رجعوا لغرفهم وأعجبهم الوضع أن ماأحد من أخوانهم درى عنهن
وبعد ثلاثه أيام نزلوا تحت بنفس اللوك
زهره/ أقول بنات وش رأيكم نطلع برى ترى طفشنا هنا
ورده/ وأفرضي درو العيال تخيلي وش بيسوبنا
زهره/ هم وش دراهم أصلا هم أربع وعشرين برى الفندق ومادروى عنا
فله/ طيب وين تبينا نروح أصلا حنا مانعرف بسوريا شئ
زهره/ نروح السوق ونسأل التاكسي عن أفخم سوق عندهم ونروح له
وافقوا البنات وطلعوا عند باب الفندق
قال الحارس/ بدكن تاكسي
صباره/ يعني طالعين برى ناظر بخشتك
قال/ بردون ماعم بفهمك عليكي
ورده بلهجه سوريه/ وأحنا شودخلنا بدكيانا نقعد ندرسك لغات شئ حلو والله
قامن صديقاتها يصفرن ويصفقن
فله/ أقعد تهرجين زيهم
ورده/ لكن شو مفكرتني دلخه
زهره/ لا خربتيها
ووقف لهم تاكسي وركبوا وقالوا له يوديهم أفخم سوق عندهم
ونزلوا للسوق قالت فله/ تعالوا نلف على المحلات نتفرج
وقامن يتمشن
صباره/ هي أنتن تعبت خل نقعد شوي
فجلسوا على الكرسي ومر من عندهم شاب سوري معه مايك وواحد ثاني وراه ومعه كاميرا
ووقفوا شاب خليجي وأسالوه عن عدد أهداف المجموعه الأولى بخليجي 18
جلس الشاب يفكر وطمرت ورده وقامت تشرله بيدها 11
قالت صباره/ خير أنتي يوم أنك فازعه
فله/ وليت الجواب صح
ورده/ صح ولا غلط المهم أفزع معه
زهره/ ليه من العائله
ورده/ لابس أنه من خليجنا وشوفي لبسه
وقعدت تطامر وتغششه وأنتبه لها الرجال وجلس يضحك وأنتبه له المذيع والتفت وشاف ورده
قامت تناظر بكل براءه في السماء وتسوي نفسها تعد النجوم
ضحك المذيع وقال/ شرفي لعنا إذا بدك تشاركي
تحمست ورده وراحت له
مادرت إلا باللي ناشبين بظهرها وماسكينها
قالت/ وجع فكوني بروح أشارك
فله/ يله عاد مابقى إلا هي ولابعد بالتلفزيون
وقاموا أسحبوها وغيروا المكان
،
( ياسلام هذا ظلم أنتم مواعدين نروح لأماكن الرياضه اللي هنا )
قالتها ورده لشلتها وهم بالغرفه
صباره/ يابقره حنا وش عرفنا بسوريا أفرضي ضعنا
ورده وهي تضرب برجلها بالأرض/ مالي شغل مالي شغل نروح يعني نروح
زهره/ أقول خلونا نروح ونفتك منها
أركبوا التاكسي وقالوا له يوديهم لأي مكان رياضي قام ووداهم للنادي
وأول مادخلوه قالت ورده/ تلعبون علي موديني حديقه
صباره/ بلاغباء هذا نادي يعني الناس يتمشون فيه يلعبون فيه وفيه أماكن للألعاب وأماكن للراحه
ورده/ أيه العبوا علي مافيه أحد رياضي هنا
زهره/ أقول وش رأيك نوديك لمعسكر منتخب سوريا
ورده متحمسه/ يله يله يله
كان ترفسها زهره وقالت/ أمشي بس أمشي
ودخلوا لصاله الألعاب وشافوا أشكال وألوان من بنات وعيال
أما هم ناظروا فيهن ثم كملوا لعبهم
صباره بصياح/ الله بولينق تعالوا نلعب
ومسكت الكوره وياالله يالله مسكتها زين وجت تركض ورمتها بحماس إلا الكوره تلف بعيد
ماتن شلتها من الضحك
وجاء دور زهره كان تمسك الكوره وتحذفها إلا أصبعها الكبير ماطلع
كان تقعد تصيح وتطامر وقامت الشله تفزع معها اللي تجر الكوره واللي تجر زهره
لحد ماطلع أصبعها عقب فضيحه جمعت خلق الله
وجاء دور ورده كان تقوم بغرور ياأرض أشتدي ماحدى قدي
وتمسك الكوره بشموخ وتسرع وترمي الكوره
مادرو صديقاتها إلا بوحده منسدحه بالأرض تسحبها الكوره
ومات من الضحك كل اللي بالصاله
وجاء دور فله بس خافت من الفشيله كان تنادي صديقاتها يشتركون معها بالرميه
وأجتمعت الشله تحت قاعده قوم تعاونوا ماذلوا
ورموا الكوره وصاب الهدف
وجلسوا يصايحون ويطامرن من الفرحه
وطلعوا وجلسوا يشربون عصير ومروا من عندهن بنات لابسات تيشرتات
كل وحده حاطه صوره لاعب وحده سامي الجابر ووحده نواف التمياط
ووحده لاعب الكويت بدر المطيويع ووحده بشار عبدالله
قالت صباره/ قومي بنات خلنا نتعبط عليهن
فله/ يله بس بهدوء
وقامن يمشن ويوم مرو من عندهن وقفن
قالت صباره ببرأه مصطنعه/ يوووووه أنتم تحبون سامي ونواف
قالت وحده/ ليه حاطين صورتهم عباطه
قالت زهره/ سبحان الله أنتم خليجيات
قالت الثانيه/ ليش سبحان الله
زهره/ لأن أول مره أشوف خليجيه بجحات وكاشفات بعين قويه
أرتبكت وقالت/ وإذا كشفت صار شئ
ورده/ أنتي ....
قالت/ أيه
ورده باستهتار/ قولي كذا
وجلست تضحك هي وشلتها ويطقون أيدينهن بأيدين بعض ورجعوا يستخدمون أسلوبهم لرفعه الضغط
قالت اللي حاطه صوره بدر/ وش فيهم .....
ورده/ مافيهم شئ بس كنت شايل هم أنكن حاطات صوره سامي ونواف وأنتن موب سعوديات
قالت اللي حاطه صوره سامي/ أنا سعوديه
زهره باستخفاف/ وشلون عطوك الجنسيه
ماتن صديقاتها من الضحك
قالت بعصبيه/ أنا سعوديه وأتشرف بالسعوديه
ورده/ بس السعوديه مايشرف تكونين منها
قالت اللي حاطه صوره نواف/ وأنت وش دخلك لاتكونين سفيره السعوديه
ورده/ أحمدي ربك أني موب السفيره ولا كان تلقين نفسك بجنسيه سيلانيه وتخب عليك
لأنك مو كفؤ تشيلين جنسية سعوديه ولاتحطين صوره عيالها
قالت اللي حاطه صوره بشار/ وش دعوه كل هذا عشان حاطين صور لاعبين
ورده باستحقار/ أولا ماكلمتك ثانيا من ذولي الصور اللي أنتي حاطتهم
لايكون بياعين الحليب اللي بديرتكم
قالت/ أحترم نفسك ماتعرفين بشار وبدر
صباره/ اللي بأفلام كرتون
وماتن صديقاتها من الضحك
قالت/ أحسن مايشرفنا أنكم تعرفونهم
ورده/ أصلا أنتي خاشه عرض أنا أتكلم عن لاعبين ديرتي ولا لاعبينكم المنقرضين مالي شغل فيهم
وتكفون لايشوفكم سامي ونواف حاطين صورتهم كان ينتحرون لاشافوا صورهم مع بهايم مثلكن
وراحوا وخلوهم وأرجعوا الفندق وهن مبسوطات من الهوشه اللي شرشحوهم فيها

يتبع

نظرة الحب
05-03-2011, 01:25 AM
نزلن اليوم الثاني يتقهون تحت
( ماأحد شاف زوجتي لأنها مختفيه في ظروف غامضه )
التفتن البنات على الصوت وأول ماشافت ورده الأماراتي كان تبخ القهوه بوجهه صباره
ضحك وقال/ أشوفها قاعده معاكم
من زمان ماتعشيتي هنيه
قامت ورده وقالت بصوت مرتبك/ أسمع ياأخ أنا عارفه أني غلطت بس تستاهل
أنت كنت تضحك علي وحبيت أعطيك درس
قال/ أنتي ماعطيتني درس لازوجتيني ويمكن بكره تجيبين عيال وتقولين عيالي
عاد ورده مامسكت نفسها كان تقول بعصبيه/ يله عاد والله واثق من نفسك
ترى موضوع وراح لاتقعد تنشب بحلقي
تدخلت صباره/ طلقها وأرتاح
ناظروا فيها كلهم منهبلين
قالت صباره/ قصدي طلقها شفهي يعني أنت خايف تلزقك بعيال
طلقها قبل أي شئ عشان ترتاح من التفكير
قالت فله بحزن/ وتصير صديقتنا من المطلقات
زهره/ يعني وش تبينها تصير أرمله هذا نتيجه الزواج السريع
كان الرجال يناظرهن وهو منقز عيونه من كلام الخبول ذلي
قالت ورده/ شوف ياأخ موب كل مره والثانيه ألقاك بخشتي ترى ال....
وسكتت من الخوف أول ماشافت الأخوان داخلين مع الباب
كان تصيح وتلتفت لصديقاتها وقالت/ جو جو بسرعه خلونا نوطي رجولنا
كان تطمر الشله كلها من الخوف وتفحط للغرفه
وماحسوا إلا بصباره متزحلقه من السرعه كان يسحبونها برجولها ويدخلونها اللفت
وتركوا الرجال منهبل من تصرفاتها وبالأخير هز رأسه مثل المسبوه وطلع
،
( أنتن مجنه ولاناويات تذبحنا وشلون نطلع وحنا قبل يومين بغينا نروح فيها )
قالتها صباره لشلتها أول ماأقترحوا يروحون للديسكو
فله/ مابغينا ننكشف أصلن هم ماعرفونا وكانوا جايين بيغيرون وبيطلعون
صباره/ ولو موب كل مره تسلم الجره
زهره/ يله عاد مابقى لنا غير يومين خل نستانس
صباره/ وإذا أكشفونا ولابعد ديسكو يعني بتصير مجزره
ماتكلمين ياورده
ورده/ والله كيفكم بتروحون رحت بتقعدون قعدت
صباره/ يعني مع الخيل ياشقراء
ورده/ بالضبط
وفي النهاية أقتنعت صباره وراحو للديسكو
وأول مادخلو حطو أيدينهم على رؤؤسهن من البلاوي اللي شافنها
وأستقبلهم شاب سوري وجلسهن على طاوله مواجهه للمرقص
وجاء شاب وقال/ شو بتشروبوا
قالت فله/ ماندري جب على ذوقك
قال/ بجيبلكن صودا ولا........
سكت من شهقه ورده اللي شهقت شهقه تشفط بها الديسكو من قوها
ووقفت ورده وحطت يدها على خصرها وقالت بعصبيه/ بالله شو صودا هذا اللي ناقص ياقليل الحياء تشربنا خمر
مادرت إلا باللي سحبها وجلسها على الكرسي وكانت صباره
قالت صباره/ صودا خمر هاه جعلهم يخمرونكم في قدر قولي آمين صودا يعني بيبسي
ورده/ وأنتي مصدقتهم ذولي يلعبون علينا
صباره/ أنطمي بس
والتفت للشاب وقالت/ أربع صودا لو سمحت
وراح الشاب قالت ورده/ أشربوها أنتم أنا ماني بايعه نفسي
وبدأ الرقص كان ينهبلن البنات من الأشكال وكانن فاتحات فمهن من المناظر اللي يشوفنها
قالت صباره/ ياويل حالي الرجال يرقص مع الحرمه وهم ساكتين
وقف قدامهم شاب سعودي وقال/ تأخذون رقصه
قالت فله وهي منهبله من المناظر اللي قدامها/ رقصوك بنار جهنم أن شاالله
ضحك الرجال ونادي أخوياه وقال/ بالله شوفوا تحفت الموسم يعرفون النار وداخلات ديسكو
قامت ورده وقالت/ والله لو ندري أن فيه الفساد ذا كله ماندخله
( وكانت الشله أول مره في حياتها يتكلمون بعقل ورزانه لأنهم ماعمرهم شافوا فساد على الطبيعه )
قال خويه/ كثري منها ماتدرين أجل وشلون جيتوا هنا شايفتنا خبول
قامت الشله ووقفت
قالت زهره/ فعلا خبول لأن أشكالكم أشكال خبول
قال/ بنت أحترمي نفسك تراني رجال و.............
قاطعته زهره وقالت/ بدري عليك تصير رجال
قال بعصبيه/ والله لو أنك موب بنت ديرتي كان عرفت وشلون أرد عليك
قالت فله/ ياكبر عار الديره اللي أنت منها حتى أسم ديرتك ماصنته
قاعد بين البنات وتوزع فلوس لكن الشرهه مو عليك على اللي جالسات معك وماخافن ربهن
قال وهو يضحك/ يعني أنتم تخافون ربكم وشلون تجي ذي
جايات لديسكو وتحدثون على الناس
قالت ورده/ هذا إذا كنت من الناس أنت من حثاله الديسكو هذا
يستفيدون منك بالفلوس وبالأخير يكرشونك برى
قال/ نصيحه أخيره أحفظوا لسانكن
قالت صباره/ والله أني أشفق عليكم حالتكم تكسر الخاطر
قال خويه وهو يضحك/ ليه نكسر الخاطر
قالت صباره/ لأنكم من برى سعداء ومن جو تعساء وأكبر دليل أنك تدفع فلوس
عشان تصير سعيد لكن السعاده الصدق أنك تستحي من ربك
لأنه هو اللي عطاك النعم هذي وأنت تعصيه قدامه وبعين قويه بعد
حسوا البنات أنهم صابوا وتر حساس لأن الشباب ناظروا فيهم وراحوا وخلوهم
وراحت فتره العقل اللي مرت بالشله وجلسوا بالكراسي يضحكون على أشكال اللي يرقصون
وفجأه دق أخو فله وصارت الشله تقوم وتقعد وكان لازم فله ترد ولا كشفوهم
وكان المكان يهتز من الموسيقى وقاموا يطامرون عشان يسكتونهم بس مافيه فايده
وبالأخير قاموا وجمعوا كل كاسات العصير اللي على الطاولات
وقاموا ووقفوا بنص المرقص ورموها بدفعه وحده
وخافوا الناس وأنتبهوا بخوف على بالهم صاير شئ حتى الموسيقى وقفت
قالت زهره بصوت واطي/ أوووووووش خلونا نرد عليهم لايلعنونا
فردت فله وكان أخوها يقولها أنهم بيسافرون بكره الصبح بدري وعقب ماسكرت
قالت/ يقول بكره بنسافر الصبح يعني لازم نرجع بسرعه قبل مايجون
راح تركض الشله وقالت زهره للناس/ آسفين للمقاطعه بس عادي عادي كملوا
وراحو وخلوهم مازالوا منهبلين من تصرفاتهم
ورجعوا بيرقصون مادروا إلا ورده رجعت ورمت كأس
وقالت/ عفوا بس نسيت أرميه
وراحت تركض للشله
،
( أي أستاذه دي أنا أسمي دكتوره فاهمه )
قالتها الدكتوره المصريه اللي بالكليه لبنت كانت تسألها
وكان هذا أول يوم للشله بالكليه
قالت زهره بصوت واطي للشله/ مهب سهله دكتوره على طول تحمد ربها ماقلنا لها أبله
وبعد المحاضره جلست الشله بالساحه ضايقن صدرها مشتاقات للثانوي وأيامه
قالت فله/ ياحول يابنات أحس بضيقه وماعرف ليش تد..........
وسكتت يوم شافت عيون صديقاتها ناقزات ومنهبلات
والتفت تناظر في اللي هبلهم بهالشكل وانهبلت معهم
كان ثلاث بنات عربجيات بمعنى الكلمه
قالت صباره وهي منهبله/ تشوفون اللي أشوفه
قالت زهره بنفس النبره/ لا بعد نقول حنا عربجيات إلا طلعنا ناعمات ناعمات
قالت فله/ ناعمات وبس إلا أنعم بنات الكليه
قالت ورده/ صادقات ذولي حتى اللاعبين أنعم منهم
يعني لو.............
ومامدها تكمل لأن الشله قامت تكفخها وتلعنها
وبالمشهد هذا أثبتوا من العرابجه الحقيقين بالكليه.
/
The End

جنــــون
05-03-2011, 04:55 AM
http://www.kuwait44.com/files/gallery/pic/gallery_91977.gif

نظرة الحب
05-03-2011, 01:14 PM
شاكره مرورك العطر

عـــودالليل
05-03-2011, 01:53 PM
300


جميل هذا الموضوع
والاجمل انه منك





احتوى على كل معاني الابداع
فزادني تشوقا للرد عليه




الف شكر



http://www.mwadah.com/mwaextraedit5/extra/11.gif

نداوي
05-03-2011, 02:08 PM
الله

لي باااك لقراءتها برواقه

نظرة الحب
05-03-2011, 04:21 PM
شاكره مروركم العطر

اخـــراحساس
05-15-2011, 10:32 PM
الله يعطيك العافيه
اختيار راائع وموفق
ماننحرم من جديدك المميز
http://up.7cc.com/upfiles/KON92568.gif

نظرة الحب
05-16-2011, 01:53 AM
شاكره مرورك العطر

حـــ الكون ـــلآ
06-01-2011, 05:18 AM
http://www.gsaidlil.com/vb/mwaextraedit4/extra/97.gif

نظرة الحب
06-01-2011, 02:15 PM
شاكره مروركم العطر