علي ذكرى الايام القديمه وعهدن فات = اقوم اتصفح ماطوت صفحه الماضي
واكرر عباره الندم وانثر العبرات = همومن على قلبي طويلات وعراضي
وياونتي ونت تعادل عشر ونات = ويادمعي ياللي من علي وجنتي فاضي
على واحدن لاهو بحي ولاهو مات = ادوره في كل المواطن والاراضي
ولاراحت الدنيا مثله ولاكد جات = ابموت ياابن حسين زعلن ومغتاظ
علي واحدن ماقد جيته بقوله هات = كريم بخيل عنه ماني معتاضي

انا عقبكم لآني ميت ولآني حي = حياتي عقبكم ضايعه مالهاخانه
وفي كل يوم الحال ينقص شوي شوي = ولكن شفا روحي علي الله سبحانه
وانا اللي ربش حالي غزالن بذاك الحي = سيوف المنايا واقفه بين حجانه
غزالن يذكرني زمان الهوى والغي = نطحني مع الشارع بعينين فتانه
ظلمني وعذبني وحالي طواها طي = دخيل الله المعبود والبيت واركانه
دخيلك تعلم كيف ظلم البشر يخي = واعرف طريق الحب واحكم بميزانه

الغدير اللي نوى يصبح بحر = لين جف الما منك ياغدير
ان قصر جهده تحسف وانتحر = وايش جاب القطن يمك يالحرير
طالت المده وانا اكلم حجر = متعب نفسي مع جاه الحقير
الطريق اطول من ايام السفر = والمسافه مايقربها المسير
بس راعي الحقد عمره مانتصر = لا تحاول والكذب عمره قصير
كم مسافه مصر عنك ياقطر = كانها لحظه ذاامر يسير
ياهجرلازلتي انتي ياهجر = من بغا طيرة يوقع او يطير

ياللي مع السوق التجاري نطحني=عقب العصر والسوق مليان جمهور
قالوا لي انك قلت حبك ذبحني =وصدقت من قال انك انسان مغرور
غيرك نصب لي بالهوى ماطرحنب= اللي جبينه مثل نور" على نور
هذاك فعلا" لو بعينه شبحني= اما انت يالمسكين ماغير مقهور
هذاك حبه بين ربعي فضحني= لوشاوروني فيه ماطاوع الشور
دكتور لندن يوم جيته نصحني=قال ابتعد واقسمت ماهوب دكتور
جيته اداوي الجرح لكن جرحني= معقول ابسمع فيه لوكنت مخطور

ياونتي من سمعها قال ياحول=منها نحل جسمي وهدت عظامي
بي علة"بالجسم والقلب معلول=ياونتي من علتي ياسقامي
ياداله" عني وانا منك مشغول=انتا سبب هذا السهر والهيامي
ارسلت لك من فوق عشرين مرسول=واهملتها ماشفت منك اهتمامي
كانك نويت الصد عني على طول=موتي دنا يالله بحسن الختامي
راعي الهوى يموت مقتول مجهول=وانا قتيلك ياظبي العدامي
قتلتني واقول منتا بمسؤل= وياكثر قتلا رادعات الوشامي

بعتنا بالمال والدنيا بخير= ياضعيف النفس حنا في غنا
نيتك شينه وانا ناوي بخير= مادريت ان الوسخ ماهمنا
من غلاتك قلت اباحطك خشير=لين بانت غايتك ياعمنا
بعتنا وصدقت فينا هرج غير= روح عنا لاتقرب يمنا
كيف اصادق شخص ماعنده ضمير= روح لادمك يفسد دمنا
يوم هذي نيتك مافيك خير= واعسى لاعاد يوما" لمنا

ياقرب واشنطن ولندن وباريس=حذفة عصا للي رصيده ملايين
وياعز حالي للرجال المفاليس=اللي تضايقهم وجوه الديايين
واللي قضى عمره وهو خالي الكيس= ماشاف من دنيا الورى الا عمى العين
يسير في عين البشر كنه ابليس= ياكثر زلاته وهو ماعمل شين
يارب ياساتر على اهل النواميس=يامسهل ارزاق الضعاف المساكين
تفرج لمن ضيع جميع المقاييس=ياظيقتي والناس ماهم بدارين

هبت رياح الصيف وتغير الجو=وانا وليفي مايداني سمومه
هو يحسب ان شمس الضحا سيدي ضو=ريان عوده زايدا" بالنعومه
فقلت انا والله ياسيدي لو= تسكن بروجا" شيدوها برومه
يمكن تغير طابع الجو بالجو=لكن فؤادي من يغير همومه
ياشمس طلي واختفي من ورا نو=لاتشرقي ياشمس كوني رحومه

ياالله عسى صاروخ يقذف مساميره = علي منطقه مابين حدين خابرها
يشكل سحب فالجو من قو تفجيره = يهز المدينه والمنازل يدمرها
ويسلم من الصاروخ بفعله وتدميره = اخشوفن من الغزلان ماني بذاكرها
سبب علتي واسباب مابي من الحيره = نهار الثلاثا يوم مريت زايرها
بها الجادل اللي ذبحني محاجيره = تصرف بروحي وبيديه يعصرها
بامر الله الوالي وحسنه وتيسيره = عسى عيني اللي تنتظرها تناظرها
( ) رسول النصر وتبدي مباشيره = يجيها رسول الخير عني يبشرها
الا وعذابي قطعت قلبي الحيره = حروف القوافي قطعت قلب شاعرها

رسالة حب اكتبها من دموعي على المنديل= الى حضرة جناب اللي اوده سيدي الغالي
و بعد ازكى تحياتي اليك الشرح و التفصيل =و هذا الخط يا المجمول يشرح لك عن احوالي
انا من يوم فارقتك عيوني ما تنام الليل=ولا ادري ولا اعلم متى الايام تصفى لي
ولا يخفى عليك اليوم انا مشتاق لك بالحيل=ولا تنسى عنا حالي اذا ما جاك مرسالي
ولو تسكن خميس مشيط وانا اسكن ضفاف النيل= ترى غيرك حشى لله ما يطري على بالي
اهوجس يا لطيف الروح و اسهر في ظلام الليل = انا اللي شفت في دنيا الاحبه كل الاهوالي

اخو حمد قال شاب الراس شاب = مما بقلبي هواجيس وهموم
اسباب مابي وقفي عند باب = جيته نهار الثلاثاء في لزوم
ابطيت ادق الجرس ابغى جواب = وقبل شبيه القمر بين النجوم
قلت اعطني ماء بارد للشراب = يطفي لجوفي لهيبات السموم
اعطني الماء وقال ادفع حساب = مزاح هرجة ينسيك الهموم
غرون لك الله في عز الشباب = املبس من خفيفات الهدوم
خل القمر يا علي لما يغاب = والذي في البيت من حولي ينوم
اقبلت بالليل والدنيا ضباب = والجوهادي تغطيه الغيوم
ماهمني لو كثر طعن الحراب = من طح لجله يعله مايقوم
كلمه بكلمه ذوبني وذاب = وهانت الروح وأنويت الهجوم

جادلن مرت مع السوق عصريه = الخلايق كلها ناظرت فيها
كأنها طلعت قمر نصف شهريه = ترمي العالم والآنظار ترميها
قلت أنا ياخوخ رندن وسوريه = أي ديره تسكنوفي ضواحيها
قالت احنافي طريق العزيزيه = والمدينه يبن الجواد ماجيها
بس لي حاجه من السوق مقضيه= ربع ساعه في وسط السوق نقضيها
للروايح جيت واشكال عطريه = بعضها حق الصديقات نهديها
قلت أنا يابنت الآجواد عبريه = وشرت برموشها يم واليها

يا مل قلبٍ فز واهتز وارتج=ياونتي من هزته ورتجاجه
لو كان له من بين الاضلاع مخرج= كان ارتفع بالحوبين العجاجه
كل السبايب صاحب الوجه الابلج= اللي بتعذيبي يريح مزاحه
قصده يمشيني على الدرب الاعوج=والا يعذبني بكثر احتجاجه
لو شافني واقف على الباب عرج=انا معي وحدي يحب العواجه
يبغاني احتاجه وهو مني احوج=عنده دواء روحي وعندي علاجه
لولاه سلطان البنات المتوج= وانا احترم حسنه وعزه وتاجه
ونار المحبه يوم يبعد توهج=والقلب ياناصر يزيد انزعاجه
دورت لي عن قاسي الطبع منهج=وصل علاقتنا لعنق الزجاجه

الحلم يجمعني بكم كل ليله =يطوي بساط البعد مابيننا البين
صارت حلوم الليل عندي وسيله = اشوفكم ياحباب وانتم بعيدين
لازلت في ذكري الليالي الجميله = لامن طري لي مامضي هلت العين
حالت مسافات الدروب الطويله = مابيننا وانتوا على القلب غالين
لاهل مزن الغيث وارخي هميله =اقوم اطالع ساري البرق من وين
واقول يابرقٍ عيوني تخيله =لاتمطر إلا يم دارالمحبين

اقبل علينا زعيم الروم = يسوق ساقين مبرومه
خصره بسلس الذهب محزوم= ضاقت على اردوفه اهدومه
كنه دفع للطريق ارسوم = يطاه بشويش ما الومه
لولا الكعب كان حط اختوم = بصابع بيض منظومه
واقدام فيها رسوم اسهوم= فيها ترف حيل ونعومه
يصير راعي الهوى مهزوم= من هيبته ساعة اقدومه
يشوف نفسه كما الابهوم= والناس ماهم من انعومه
هو خير من فاتنات القوم= وابوه خير من اعمومه
قال التقاليد قلت اسلوم= قال اللغه غير مفهومه
يومه بليله وليله يوم = محدً يصحيه من نومه
الصبح يرقد وعصر يقوم= دنياه ما عضة ابهومه
ناس كثيره تصير انجوم = وناس على القاع مرجومه
الي بنا قصره المحكموم = هو نفسه الي بنا رومه
الحب ما هو بحب اخشوم = قسمه من الله مقسومه
تشوف قرم وشيخ اقروم= بلاه ربي بجرثومه
وواحد منظره مذموم = وبنت القمر فيه مغرومه
محدً خلق في البشر معصوم = الا انبياء الله معصومه

يا هل الهوى حذرا تمرون خيطان=المـوت فيـه مركـزات خيامـه
فيه المهار اللي بلا سرج وعنـان=بنحورهن لاهل المـودة علامـة
نهود جلاس تقـل طلـع رمـان=عفر يشادن البـدر فـي تمامـه
يمشون ممشى اللي مخيف ومشتان=ماهمهم بالسوق كثـر ازدحامـه
بغيت اطيح بدربهم يا ابن رجعان=لولا الله ابرك جارني بالسلامـة
لولاي صايم والعرب في امسيـان=واخشى تقول الناس : فسد صيامه
لا هد فيهم هدة الذيـب سرحـان=واطفي لهيب الجاش وابري غرامه
لاشك اداري قولة فـلان وفـلان=اهـل الحكايـا بالقفا والنمامـة

يا حمود تسأل كيف حال ابن قحطان = لايختلف عن حال شاعر قصيده
حروفها متناثره عبر الاوطان = واهاتها في بطن وادي عبيده
شاعر رمى اللي راح في حلق شيطان =وكم في ملفه من قصيده شهيده
احيان صايب راي واحيان غلطان= يرحل وينزل في مواني جديده
راكب سفينه نوح من غير قبطان = والموج عاتي والسفينه عنيده
يا حمود هل لازال خيطان خيطان =وش اخر اخبار العنود العنيده
اتباعدت بين المحبين الاوطان =جينا وخيطان القديمه جديده
نام الهوى يا حمود والنوم سلطان = على بساط الذكريات الحميده

يا خشوفن ليله الجمعه تعدن= يوم نادى للعشا صوت المنادي
طولن مشوار ساعه ثم ردن= والشوارع خاليه والجو هادي
صابني بالعين غروٍ ما تمدن=ابدوٍ حير عقول العبادي
ابتسم لي قال معجب قلت جداً=هز راسه قال يا مسكين غادي
قلت له ما فيك رحمه قال لابداً= قلت طبعاً لا حياة لمن تنادي
اخذن مني طلبهن ثم صدن = واشعلن نار الهوى داخل فؤادي
لو يودوني على دكتور لندن= ما يداوي جرح غزلان البوادي
ليتهن من منطقه خيطان شدّن=وانتهى موضوعنا والامر عادي
لكن الغزلان لا مرن تحدن= وابتلى في حبهم شاعر وشادي
قال عيسى ما تشوف الامر عمداّ= قلت ياابونايف الموضوع عادي
اهد خل الجو للغزلان يهدن = لا تثير النار من تحت الرمادي

ذاغديرالحب و اشرب واسقني=شوف كبدي من عطشها تحترق
لويجوزاسقيك مديته هني=خاف نتوالف وبكره نفترق
نختلف يصاحب الخدالسني=اسقني عجل(ن)ترى وجهي عرق
الوعودعهودوانت ارثيتني=والهوى من لاعرف بحره غرق
ياذهب مضمون من صرف الجني=اخذك مشوار يالله ننطلق
وين مشوارك وقدشوقتني=قوم قبل الوقت منا ينسرق
اخذك في بنز صنع الجرمني=الطرق قدام وجه تفترق
لاتسرع فالطريق المنحني=في جبال الغيم والجوالطلق
لابردت انقض جعودك و دفني=خل معروفك لمن هويستحق
لوتبي جسرالمحبه ينبني=كن معي صادق حسب مانتفق

يا مرهف الاحساس نوم العوافي=خله على الصامت وتصبح على خير
ثلاث مرات اتصلنا وكافي=ليه ازعجك ياللي كلامك دنانير
يا ابو ثمانٍ كنها ثلج صافي=الشاهد الله ما حصل منك تقصير
لو يوصفك الشعر صقر النصافي=مااوفاك حقك ياابيض البيض تعبير
اصارحك ما بيننا شي خافي=ما شفت زينك بين كل الغنادير
وانا على شانك كتبت القوافي= واقول احبك ما عليّه من الغير
بعض العرب نــغــليه لو ما يشافي=له عندنا ميزة كبيره وتقدير

قالت تخاف وقلت وشلون ماخاف= واخاف لا خوفي يسبب جنوني
كيف اوصفك يافايقه كل الأوصاف= واقول لاصحاب العذل يعذروني
مافيه زيك بالمدينة والأرياف= لوجبت وصفك يعرفوا من تكوني
قد تاب قلب كان للسمر ميلاف= واعفيت حواءمن بقايا ديوني
لكن قلوب الحب يافتنه اضعاف=قلبي على ماتصنعي به تموني
ياخالد الحيان عجل بالاسعاف= نجلا النواعس بالغت في طعوني
من ظبية المطلاع وابرق الاطراف= اشكي عليكم يالربوع انصفوني
ولايصدق قصتي كود من شاف= غصن القوام اللي تغير الغصوني
ولا رفعت الصوت من كل مشراف=وابكي ونار خدودها في عيوني
وانثر دموعي دم زاف على زاف= وامزج بتيار الهبايب لحوني

انا كل ما يقبل عليّ سواد الليل = يجيني بلاي اللي من العام معتاده
ويا وجد حالي وجد مرضان شاف الويل= يراجع طبيبه كل يوم ولا فاده
مرض ما تبين با الاشاعات والتحليل= سقيم عليل زود الباري انكاده
على اللي الضحى مرت مع الدرب يا بن عجيل= وقامت تمره كل يوم على العاده
فتاة بنظرتها تحدى شباب الجيل= تصيد القلوب وقلبها ما جدٍ صاده
ربت في ديار ابها الجميله سقاها السيل= صباح ومساء وليل والناس رقاده
عسى مزنةٍ ليلية مع طلوع سهيل= تكاشف بوارقها ولا هيب رعاده
تسابق سحايبها الغزيره بشكل مهيل= تسقي وطن مربى الحبايب وميلاده

كل ماالعين تذرف دمعاً بسيل=قلت هاتي دمع ثاني يغسله
مابكى يوم المفارق الاألأصيل=دمعة المخلص تجي مستعجله
لاطراله صاحبه يوم الرحيل=هلت عيونه دمعها ما تمهله
ياحديد الصلب لامانتى ثقيل=الثقيل الهم الي بقلبي احمله
يابخيل المال لا مانتى بخيل=البخيل الي جوابه ماارسله
وقفتي في دجى الليل الطويل=انتظرشمس الشموس المقبله

رسـالـة حـب اكـتـبها من دمـوعي على المنديل
الي حضرة جناب اللي اوده سيـدي الغالي
وبعـد ازكي تـحـيـاتي اليـك الشـرح والتفـصيل
وهذا الخط يالمجمول يشرح لك عن احوالي
انا مـن يـوم فـارقـتـك عـيـوني مـا تـنـام اللـيــل
ولا أدري ولا أعـلـم مـتـى الايــام تـصفـالي
ولايـخـفى عـليـك اليـوم انـا مـشتـاق لك بالحـيل
ولا تـنـسى عـنى حـالي اذا مـاجاك مرسالي
ولو تسكن خميس مشيط وأنا اسكن ضفاف النيل
تـرى غـيـرك حـشى لله مايطري على بالي
اهـوجـس يالطيف الروح واسهر في ظلام الليل
انا اللي شفـت في دنيا الاحبه كل الاهـوالي

بيحت لك مكنون ياعين يانون00 وافصحت لك يامن سحرني كلامك
من الخطا تحسبني انسان مجنون00 ظلمتني يافاتني بأتهامك
القلب عندك مدةأيام مرهون00 ولاعاد لي حيله وهو باستلامك
واليوم منته لي من الناس مظنون00أيضاوقلت قيمتك واحترامك
رفعت نفسك تحسب الناس من دون00تبي لي الحقران هذا مرامك
رح روحة اللي قبل عامين مدفون00الله لايرحم بقايا عظامك
غيرك لقيته ينعش الروح مزيون00لوشفت زوله ماتهنى منامك
ان جيتك أترجاك انا اصبحت ملعون00هذا جزاء لك ياقليل اهتمامك
وشلون مثلي يحني الراس و شلون00 ماتعرف التقدير مدرى علامك

الله من ليل سهرته لحالي00 يوم السما غيمه يغطي نجومه
نامت عيون اللي من الهم خالي 00ماهو بمثلي يحترق في همومه
هم يهدم نايفات الجبالي00 والليل طول وأزعجتني حلومه
اي والله أمشي خايف من خيالي00كني مشرد يطلبونه خصومه
مايسهرالامن فقد شوف غالي00يرعىخياله طول ليه ويومه
أثر على يابوي سهر الليالي00 والمبتلي غلطان يللي تلومه
فضلت عيشي فى الخلا وانعزالي00مجنون ليلى شق قبلي هدومه
لانه تنكر من بعد ماصفالي00 ماعاد واجهته ولاجت علومه

لاتجاملني وتبدي لي سرورك=اعرفك خوان معدوم الضمير
درات الايام وتحطم غرورك=عقبما غشيت خلق الله كثير
وانتهى في عالم التمثيل دورك=تستريح الناس منك ياخطير
دارت الايام وتحطم شعورك=مثلما حطمت يالمغرورغير
صرت ماميز غيابك من حضورك=ابحث الارقام دورلك عشير

ياقبر اعز انسان غالي رقد فيك=خفف عليه من التراب الثقيلي
ياقبر ماني طيب عقب راعيك=اللي راعني وصار عندك نزيلي
اغليك انا ياقبر من حب غاليك=مرحوم ياراعي الوفى والجميلي
يلي سكنت القبر صوتي يناديك=موتك جرح قلبي وهديت حيلي
ماانساك والله لين قبري يوازيك=واعلن من الدنيا العريضه رحيلي
واشق جيبي كلما حل طاريك=كنت افتكر عمرك معانا طويلي
يبكي عليك البيت من عرض اهاليك=ليا دخلت البيت دمعي يسيلي

البارحه في لذيذ النوم لاقيته=حلوم جابت لطيف الروح خداعه
فزيت ارحب ودمع العين هليته=رميت نفسي وجا راسي على ذراعه
ضميت خلي وفوق الصدر لميته=والروح من شدة الهجران ملتاعه
احسب وليفي يناديني ولبيته=سمعت صوته وقلت السمع والطاعه
يشكي وانا اشكي وابكاني وبكيته=وانا احسبه علم قضينا ربع ساعه
كذاب يالحلم ان ماكان فكيته=افك سارق فؤادي من ورا اضلاعه
اذا مسكته وصافحته وهديته=القلب عنده ولا اطالبه بارجاعه
وليته تركني وخلاني وخليته‌‌‌‌=لكن خذا قلب من مخلوق ماباعه

ياحمام على عالى غصونه ذكرتني لحونه عهد غالي
كان روحي وكنت اسوىىاعيونه فرقت بيننا سود الليالي
جيت بيته عقب ماقفت ضعونه ساحة البيت غطتها الرمالي
قال خاين وقلت الله يصونه ماخدعني ولا غيره صفالي
لكن اليوم حال البعد دونه عزتاله وانا عزي لحالي
افترقنا وكان الله بعونه ادري انه يفكر في وصالي

مظلوم من مثلي من الناس مظلوم ظلمت لومالى رضا بالظليمه
وانا عتقد ذا الظلم قد كان مقسوم من قبل نخلق في الليال القديمه
ياحظى اللي بين كل الملا شوم وليت ياذا الحظ مافيك شيمه
وراك واهي دايم الدوم مهموم مافيك ياحظ الشقاوى عزيمه
رمتني الايام ياحظ باسهوم ايام والله مارعت لك حشيمه
لاوالذي له ليل ونهار ونجوم تمش بتقديره بصوره حكيمه
ان الدواء فى كل الاوطان معدوم دواء المريض اللي حبيبه خصيمه

دلعوك اهلك وتوك صغير واكتمل عمرك وصارت طبيعه
والجعود السود والوجه نير لو كلامك بالذهب ماتبيعه
ماتغير لاتحاول تغير امر ياذا الحلو ماتستطيعه
وانت ماتعرف رجب من قصير والعمر توك على اول ربيعه
ماربيت الاوسط بيت خير عايشين اهلك بدنيا فظيعه
كل ماشفتك علينا تسير ودي اسكن قصر والبيت ابيعه
مستواك اعلى وحسنك يحير والحلا والدل خذيته جميعه

ياظالم جمالك وراء برقعك ياويلك من الله ضيعت الجمال
انته حر نفسك وماحد يمنعك ياسيد العذارى عهد الجهل زال
شعره من جديلك واحملني معك او كحله بعينك ورموشك طوال
ليت اني خيالك اللي يتبعك حير ني جمالك ياهذا الغزال
اوخاتم بيدك يوضع باصبعك اما في يمينك ولا فى الشمال
بن قحطان حاضر بللي ينفعك لوتطلب عيونه اخذها حلال
امرني واطيعك اهرج واسمعك انا عمري بدونك مايسوى ريال
ماادهش جمالك وما أروعك صابتني عيونك باسهام النبال

كنت اقول ان الزمن مايفرقنا طال ماحنا علىالارض ماشيني
كانت آمال السعادة تعانقنا وانت صافي لي ودينك علىديني
كل مايضحك لنا الوقت صدقنا مادريت ان الليالي تمنيني
نرسم الخطه والاقدار تسبقنا مثلما ترميك بالنار ترميني
اعتقد ماذاق مخلوق ماذقنا يحسبونا بالمحبه مجانيني
خل نار الحب ياحلو تحرقنا قبلنا كم طاح فيها ملاييني
فى حلوم الليل عشنا وبرقنا تدرى ان اهل المحبه مساكيني
وفقك ربي وحنا يوفقنا حاكم فينا الزمن يانظر عيني

ماجيتني زاير مع الناس اللي يجوايمي زياره
واقول معروفك على الراس ساعة زمن ماهي خساره
اوخط مكتوب بقرطاس بالعيد استبشرك بشاره
خليتني حاير ومحتاس أثريك تحسبها شطاره
مغرور بالفضه وبالماس وبالكدالك والتجاره
واللي بنى لك بالحشا ساس ماهمك الامه وناره
ياقلبى المجروح لاباس عليك يالابس سواره
بين الترجي فيك والياس يللي بنى فى القلب داره
عذبتني يازين الاجناس في عشرتك ذقت المراره

ابطى جوابك ليه ياسلوة الروح ماذى بحاله ياحلو لاعدمناك
وان طعتني مالك من الهجر مصلوح خايف يطول الوقت والقلب ينساك
لاشك يالي ماليا قلبي اجروح خله يفيدك من طمع فيك واغراك
تبغالي اكتب لك بخطي على اللوح انك تعلمت الخيانة وعفناك
عيني على الخوان ماتعرف النوح والقلب عافك يوم غيرت ممشاك
عند الجميع اصبحت ياذاك مفضوح مرات نسمع واكثر امرار شفناك

صارحتها عن كل مكنون مخفي يوم الخميس الساعة الواحده ليل
وفصحت فيما قلت عنها بوصفي شاعر تناول كل معنى بتحليل
وشعاد لونجحد ونكتم ونخفي حب الذي حول حياتي غرابيل
ياغاية المطلوب ياشف شفي هذي سنه مرت وأنا اقاسي الويل
نيران قلبي ظن ماعاد تطفي وأنا غديت من التعب منهك الحيل
هذه سن والقلب يقبل ويقفي وحاشور في صدري يجبيني مع الليل
أخاف ون طال الهيام استخفي ويبهدولوني بالدواء والتحاليل
المصحف الطاهر حملته بكفي واقسمت بللي ساق وبل المخاييل
اني فلا أخضع لويقولوا توفى من سبتك ياداعج العين بالميل
أنا وضعتك موضع العز يكفي والصبر مفتاح الفرج مثلما قيل

وحسايف صدتك عني ماهقيت انك تناساني
الليالي أخلفن ظني بينت لي وجهك الثاني
أنت ظالم والخطاء من تتصل ودناة مارضاني
كلمة منك تخدرني اثرت في قلب ولهاني
وان طرالك يوم تهجرني خايف ماعاد تلقاني
لكن احساسي يعلمني ماحكوا لك كل عدواني
قبل ماهجرك يعذبني انس يالمجمول عنواني
وانت مرخوص وسامحني وانتهينا قبل تجفاني

الله يذكر ( منى) بالخير = ويسقيك يا ذيك الايامي
هذيك الايام طبعا غير= متصوره دوم قدامي
يطري علي يوم اروح اعصير = وازور انا ترف الاقدامي





هذا الوفى وانته تشوفه بعينك = ضحيت من شانك وحاربت الادنين
سلوا سيوف الهجر بيني وبينك =لكن سيوف الحب تضرب بحدين
الله على ما جاك منهم يعينك = وانا معك صابر على الزين والشين





يا مسافر نجد واطراف الحجازي = من بلدنا الكويت احمل رساله
وصل المكتوب للناس العزازي = ساكين الحي الاقصا من شماله
ودي امشي يا حمد حضّر جوازي = عايشٍ من عقبهم في خس حاله





فوق بحر الهوى تجري مراكبنا = نقضي الليل كله فوق موجاته
نرضي احبابنا نوفي بواجبنا = من نقض عهدنا نقطع علاقاته
ما لنا غير خالقنا يحاسبنا =نبلغ اهدافنا والنفس مواته
والردي لا حشا ماهوب صاحبنا = حيث عاداتنا ما هيب عاداته





ان كان ما عزيت نفسي فلا خير = فـــــّيـه ولا في من يسوي سواتي
ايام مرت واعتبرها مقادير =وصارت دروس ايامنا المقبلاتي
حسبي عليك الله عظيم التدابير = ابغى حياتك وانت تبغى مماتي
نسيت ذيك البهذله والمشاوير = نسيت اعز ايامنا الماضياتي




ميشنا بدنيا واخذنا وخلينا = طويله عريضه مالها أول ولا تالي
نسافر لمستقبل جهولي ويمنينا = وماضي تشد القلب ذكراه بحبالي
ولا يندرا يد القدر وين ترمينا = على جرهدٍ وإلا على النايف العالي
ولا فيه يا عالم بشر واحدٍ فينا = قضى العمر كله مهتني دالهٍ سالي
نبي ننهي الدنيا والاقدار تنهينا = والاعمار رهن الموت قصاف الأجالي





هلال شوال اتضح واعلنو عيد= وانا من عادتي في العيد اسير على ناس
واللي يسوي قهوتي تالع الجيد= ما للسعاده بين الاحباب مقياس
عيدت عنكم يا نظر عيني ابعيد = وانشد عليكم في ربى نجد نسناس
قريب واصلكم بليا مواعيد = واخذ معك واعطي من الراس للراس







وختامها
مسك وعنبر .... وريــحــة طــيــب



ريحة الطيب هي سبة جروحي =كل ما جيت ابدله ذكرتني
غرفتي من روايحها تفوحي =لو لمست المخده عطرتني
زاكيه في هدومي ما تروحي= كل ما هب نسناس انعشتني
لـــتني لو شكـــيت الزين يــوحي = كان والله لأقول انها سحرتني
ساع اهوجس وساع ابكي وانوحي = والسبب من هنوف حيرتني
ابتدينا بضحكات ومزوحي= واستمريت معها واخلفتني
ان صديت ما ادري وين اروحي =وان طولت بالعون اذبحتني
لو بيدي الدواء داويت روحي = ويـــش اسوي مع اللي غربلتني









تحياتي واشواقي لكم


واسمحولي على القصور وهذه بعض من قصائد الشاعر العملاق علي محمد القحطاني

http://www.gsaidlil.com/vb/mwaextraedit4/extra/17.gif

شاكره مرورك العطر