قصيدة / يبه


تمنيتك معي باقي تبدل خوفي اطمئنان
يا أغلى من رحل روحي تعايد بك بوجداني

تطوف الذكرى في قلبي تصحي خافق شفقان
وتصرخ فيني اقداري ماعاد يرجع لكم ثاني

واضيع وتنولد دمعة على خد الرجا حرمان
واصيح ويحترق صوتي (يبه) وتعيد احزاني

يخذلني نهار العيد لا قبل يجرح النسيان
وذكرتك والحزن ينثر دموعه في ارض حرماني

دعيتك طالت الغيبة وفاضت فيني الأشجان
ودعيت الله يساعدني على تخفيف اشجاني

ورجعت اعزف لاعيادي نشيد الارض للانسان
لأن الارض تبقى وعمرنا وحده هو الفاني

تمنيتك معي بالعيد يا قلب يعرف الغفران
لو ان المستحيل اصعب تخطيته على شاني

يا ويل اللي رهن عمره لحلم طاف والوجدان
وانا حلمي رغم صغره من التعذيب اعياني

في يوم العيد زارتني مشاعر ترفض الكتمان
تقيد بداخلي نار الحفها بكتماني

تعيش بداخلي صورة تردد معظم الأحيان
وين اهرب من الامي وانا الالآم عنواني

قصيدة / عز الكلمة


عزت الكلمةعليهم
كنهاشي مو بيديهم

وكل ما ضاقت علينا
عذبونا الله يهديهم

من زمن والقلب صابر
ينتظر لو حلم عابر

ليتنا بس ما شكينا
ليت ظلينا نكابر

ولا خذانا البعد عنهم
وخيبوا الباقين ظنهم

لا تجاهلنا وقسينا
وش يفيد العذر منهم

كنا نغليهم وكنا
ما نطيق البعد حنا

ولما صدونا جفينا
بس والله ما إسترحنا

آه يا دنيا الاماني
لامتى وإحنا نعاني

وكل ما مدينا إيدينا
ضعنا.. ضعنا يازماني

قصيدة / يامعتقد بالضعف


يا معتقد بالضعف خل اعتقادك
بعزيمتك في همتك و الإراده

شارك وشارك في تقدم بلادك
غيرك أبد ما فيه عنك زياده

اعمل و بتحصل ثمار اجتهادك
المجتهد كل يخاطب وداده

افرد يدك للحب وانسى عنادك
خل الأمل يملا حياتك سعاده

عمر الاعاقة ما توقف مدادك
مدام عزمك ما يخونك مداده

لا..لا تفكر عاجز الحيل عادك
الواصل انت وفي اجتهادك شهاده

لابد ما في يوم تبلغ مرادك
مثلك قوي ..لابد يبلغ مراده

قصيدة / يا حياتي


عطشى الرمال .. والخطوة
لعيونك سراب
مد الوصال .. ذا العيد
يا اغلى الصحاب
يكفي عذاب
ياللي .. لونت القوافي
ف .. همسة
جروحي الخوافي
باهدي لك
قلب جديد
يشهد .. ان انت .. الوحيد
تمتلك .. نبضي وحبي
وقلب .. وسط
ضلوعي يهتف
يا حياتي
كل عيد
وانت سعيد
كل عيد
وانا حبيبك
وانت
حرفي والقصيد

قصيدة / وعد الوصل


امانة لو تمكن بي الظما لا تسقي عروقي
وش اللي منك يرجى دام ضاعت فيك هقواتي

سحابك يمطر لغيري وتدري يبست عذوقي
على وعد الوصل منك مشت للدرب خطواتي

امانة لامتلا صدرك هموم اتذكر حقوقي
مصيبة من عرفتك صارت احلامي معاناتي

قدرت اقوى السكوت ولا قدرت اقوى منطوقي
وطويت من العتاب احلى كلامي وانفعالاتي

تموت اللهفه بثغر الجنون وينقتل شوقي
وتضيع أصدق معاني أنتظرها تصدق وتاتي

أمانه لو ذبل حلم الغلا في نبض معلوقي
تجاهل صرختي وأرحل ولا تسمع مناداتي

أمانه يا البعيد أنسى دموع عذبت موقي
نسيتك وأنسكب نسيان طيفك وسط دمعاتي

أمانه لو تمكن بي الظما لا تسقي عروقي
تعودت الغياب وطاب منك جرح مأساتي

قصيدة / هدي سنينك


هدي سنينك اكثر العمر قد راح
يا ما خذا مني سنيني عجاله

باقي سنة والكل منا بيرتاح
باقي سنة ونروح كل لحاله "

ياما تحملنا من احزان وافراح
وياما مشينا الدرب صعب وسهاله

ياما خفينا من عظيمات الجراح
نضحك مثل منهو زمانه صفى له

لا تساليني واكثر الدمع فضاح
لا تساليني عنه ليه انهماله

تحمليني يوم العزم مني طاح
تدرين هم الجرح صعب احتماله

باقي سنه والهم عنا بينزاح
وييغيب صوتي والقلم وانفعاله

قصيدة / ما أفظع الخوف


ما أفظع الخوف و الشوق الذي فيني
من يوم غبت اسكنوا في داخل عظامي

و الصورة اللي في ذاكرتي تناديني
و الوردة اللي تنام ف دفتر أحلامي

أتعب أنا حيل و تتعب مني سنيني
و اركاب عمري تلملم باقي أيامي

يا مضيع العمر .. للذكرى مخليني
يستاحش العمر لا من غاب إلهامي

أروي جفاف .. و جفاف الدهر يظميني
و أدوس وجه الحزن و أسابق أعوامي

ما خاب ظني و حلم الغيث يدعيني
أمشي لو الشوك يجرح ناعم أقدامي

و أواصل الدرب و كل خطوه تبكيني
و يعز دمعي و أنا الموعوده بالامي

و ما أفظع الخوف و الشوق الذي فيني
من يوم غبت اسكنوا في داخل عظامي

قصيدة / صديقتي


صديقتي..ماقلت لك
ان الليالي مظلمه
تضحك على جرح الصدى
وانت في عالمك البعيد
صديقتي..ماقلت لك
من يوم أخلفتي الوعد
رجعت لاحزاني
وأنا والوقت جلاد وعبيد
صديقتي..ماقلت لك
اني أحس وأفتهم
وأشعر بكل كلمه تمر
تبقى مثل وهج الجمر
تحت الرماد..
لاهبت النسمه تقيد
صديقتي..ماقلت
صديقتي ..ماقلت لك
تصرفاتك مؤلمه
والقسوة في..بعد الصدى
صارت..في كل لحظه تزيد
صديقتي ردي علي
صديقتي..صديقتي
أكيد ماعندك عذر
والصمت ..
تعذيب جديد

قصيدة / سؤال غبي


سألني من..أحب أكثر؟؟
و من في صوته أتأثر؟
و من هو ..فارس أحلامي ؟
و لمين أتعذب و أسهر؟
بغيت أجاوب عيونه..
و اقول بكل صراحه وحب ..
اني فيه..(( مفتونه ))
و انه ساكن أهدابي
وأول وآخر أحبابي
صرخ بي ..
قال لي : .. قولي
كفايه لعب باعصابي
سرحت .. وقلت له: ..تصور!
اهو اسمه.. مثل اسمك
ورسمه .. يشبه لرسمك
وله نفس ابتساماتك ..
ونظرة عينه مثلاتك
لأني كلما طالعتك ..
أهيم ..بليل نظراتك!
وتقريبا مثل طولك!!
وصوته.. فيه من صوتك!
يداعب مسمعي..
وارحل ..
في دنيا مالها آخر
ويستعمل نفس عطرك !
والمسباح والساعة !
وسألته..في خجل ظاهر..
عرفت ألحين؟؟
و صار يتلعثم المسكين..
وقال لي : ..
للأسف لحظه ..
تخيلت اني المقصود
بس اليوم..
بالصدفه..
غيرت العطر..
وحطيت بداله اليوم..
دهن العود!!!!

قصيدة / دموعي سؤال


جيتك أمس
في ملامح . . وجهك
أبحث عن ظلال
عن بقايا عاطفه
عن قصاصات . . الجرايد
اللي تحضن بالأمل
روح القصايد
جيتك أمس
و كان حرفي
يلعن سطور . . الدفاتر
يمتزج . حب و كآبه
في زوايا . . قلب شاعر
لون الكون . . بعذابه
يكتب أكثر . . يبكي أكثر
تلتهب فيه الخواطر
جيتك أمس . . و بقلبي كلمه
كلمه ماتت . . لما فاجأني برودك
لما كلي صرت ذكرى
تلتمس روعة وعودك
جيتك أمس
و رحت أمس
بعد ردك
أشرب دموعي
سؤال .

قصيدة / خيانة عكازة


ابد لا تحزني يمه اذا خانتني رجليني
واذا كل شكى همه وانا همي بقى فيني

واذا خنجر صداقتهن غرس حده وسط قلبي
واذا عكازتي خافت من انها تسند ايديني

ولا تبكين يا "يمه" اذا عمري غدى دفتر
وكل يمزع اوراقه ولا ظنه يكفيني

ابد لا يجزع احساسك لا شفتي البعض يجرحني
واذا ضاع الوفا فيهن وضاعت معهن سنيني

على ضيم الجفا ابقى تنازع روحي الحسرة
واحس الظلم يا امي يقطع من شراييني

بسيطة كل الم جسمي تحملته وانا اضحك لك
لكن الخوف يا يمه من احساس سكن فيني

يا حيف الطيب بالدنيا يضيع وينتهي عمره
يموت الطيب يا يمه وانا فقري يبكيني

شيهم ان خانت الدنيا اذا ارجع لك مثل اول
احط راسي على صدرك واعرفك ما تخونيني

قصيدة / خطوة أقداري


تذكرني . .
تذكرني إذا تسمع
بليل الشوق أشعاري . .
و إذا دمعة طفل سالت . .
أو أشجار الصبر مالت . .
و شفت الناس تتغير . .
و مأساة الغدر تكبر . .
تذكرني . .
و تذكر صمتي اللي كان
و اعذرني على اصراري . .
تذكرني إذا صار الألم أكبر
من القدرة على النسيان . .
و أحلام الفرح صارت
مجرد وهم للإنسان . .
و كل الكون يخدعنا
و ضاع عنا الوفا و ضعنا
مجال اللي مضى يرجع
أو خيوط الفجر تتطلع
على داري . .
و خل الصمت يتبعني
يسابقني بمشواري
تذكرني . .
يا أبعد من سراب الشمس
تذكر أمسنا و بكره
و لا تعتب و لا تشره . .
إذا الحب ابتدا فينا
و فينا انتهى عمره
تذكرني . .
لأنك أنت . .
تعيش بداخل أفكاري . .
و لأني بعد ما شفتك . .
و عاد الحزن . .
يرسم خطوة أقداري . .
تذكرني . . تذكرني . .

قصيدة / جسد وقبر


تهاوت رحلة ايامي في ركن الخوف والحسرة
وبديت اضعف مثل ظلي وارمي بالعمر خلفي

تصورت القدر حاجز زجاج من السهل كسرة
ولكني جرحت اناملي حتى دمع طرفي

وعشت الياس والحيرة بشوق ينتظر بكرة
ولا الألم عندي ونصفي مل من نصفي

يميني خانت حروفي وهانت عندها العشرة
ومن يكتب لي اشعاري اذا ما خانني كفي

وهل ارتاح واحساسي مجرد حلم او فكرة
او احذف باقي اوراقي واودع فكري المنفي

تمنيت ارحل لعالم علية الفاتحه تقرا
ورفض موتي يواجهني بوجه القادم المخفي

فهل شفتوا جسد ميت ورفض يستقبله قبرة
انا هذي معاناتي واظن اللي مضى يكفي

ابترجى الزمن واحمل على كتفي عنا دهرة
ما عادت فيني القوة على اقناعة يجي صفي

انا من يوم ميلادي محني راسي بالمرة
ولكن ما تحملته عجز لا يشمله وصفي

وانا اللي كنت بالاول عنيدة قاسية حرة
وبديت اضعف وانا اكره مجرد ضعفي لضعفي

قصيدة / بذرة النسيان


تعال ازرع بقلبي بذرة النسيان وانساني
وابا اوعد ما يثور الشعر لا مرت بي الذكرا

دخيلك ما يصير الجرح وانت وظلم حرماني
وتعب عمر تخاوى مع ركاب اتعبهم المسرا

تريث ودع عروق الظما هاجت بشرياني
وخذ طيف عليه امن التعب روح العزا تقرا

والى من ظامك الواقع تعزوا بي وتلقاني
على خبرك وفي وصلك عظيم الجرح بي يبرا

كستر ضلع الصبر صوت من الخفاق ناداني
صرخ بي في غياب الناس هد الدمعة القشرا

حبيبي لك معي اسوارة في جيد وجداني
ولك صورة قديمة ما تعرف الضحكة الصفرا

دخيلك خذ بقيا عشرتك يا قلب اظناني
وخل الدار من عقب ارتحالك مظلمة قمرا

قصيدة / انكسارات النخيل


عز الكلام بخاطري بعض الحروف السائلة
و أنا افترشت الصبح و أبحث للقصائد عن مقيل

و رحمة باللي بقى من بعض عذرا ذابله
و مالها غير الشعر رفقه لها الدرب الطويل

تقرأ بياض إحساسها بعض العقول الكامله
و تبكي مشاعرها مع صوت انكسارات النخيل

عكازتي ضاع الوعد و سود الليالي عايله
و ما ظن في يوم الأمل يلقى لخاطرنا سبيل

شوفي معي يمه بعض ذيك النوايا القاتله
ضاقت على ذيك الجراح الداميه . . جرح يسيل

جف الكلام و ماتت أطراف الحروف السائله
و أجمل " مشاويري " غدت هم ثقيل

عكازتي ما عادت ايديني لمثلك حامله
و صوت " العجل " في داخلي يصم إذن المستحيل

كنت انتظر تمر بي قبل الرحيل القافله
حتى تعبت و مر بي ليل الألم خوف و رحيل

من يومها و روحي مع ذيك المخاوف راحله
استعطفت كل القلوب و لا لقت حلم بديل

يا خطوة تجرحني بها بعض العيون الجاهله
لو أثرت في داخلي ما شفت لي شيء جميل

قصيدة / أعتذار


لا تأثر . . من كلامي
و لا تضايق . . لاهتمامي
اعتذر . . ما بيدي حيله
ما قدر أني . . ما أسألك
أو . . في لحظه . أتجاهلك
اعتذر . . ما بيدي حيله
تدري أنك
ساكن نبض الوريد
و إن حبك
باقي . . بقلبي أكيد
و أني لك . . مثل السحابه
من تشوف . . الوجد ظامي
تمطر . . أشواق و قصيد
اعتذر . . ما بيدي حيله
كانت الصوره . . تعاتب
كل صفحات . . الكتاب
و كانت آمالي . . الحزينه
تشتكي . . ظلم الغياب
و أنت تتلذذ . بآلامي
و تضايق . لاهتمامي
شكثر . لك ذكريات
و شكثر لي أمنيات
تنتظر
صوت الوفا
يا حبيبي . . في وصالك
تبتعد . . و بكل طيبه
أحسب القسوه
ظلالك
اعتذر ما بيدي حيله
و اعتذر أيضا . . لقلبي
اللي حبك
و اعتذر حق الخطاوي
اللي سارت بي . لدربك
و اعتذر . . لأيام عمري
اللي خانتها
السعاده .. أمس قربك
و حتى و أنا ابتعد
منك أتألم
و اعتدر منك
و أقول
لا تأثر . . من كلامي
و لا تضايق . . لاهتمامي
ما بقت باليد . حيله
ما بقت باليد . . حيله . .