( غــــــــرام أحـــباب )


على ذاك الطريق اللي يسمونـه غـرام أحبـاب
وطت رجلي على دربه و لا أدري وش نوى فيني
تبعته لآخر دروبه أليـن أن القمـر قـد غـاب
تعـب قلبـي و لا تعبـت مسافـاتٍ توديـنـي
لقيت الليلة الجردا هدب ظل و سمـا و اعشـاب
بعـد ذاك الظـلام اللـي يتوهنـي عناويـنـي
صدفتك معجبه فيني و ياليـت الغـرام اعجـاب
و تراك انتي الهنوف اللـي هقيتـك تستحقينـي
عطيتك عشق من قلبي وسلمـت لغـلاك رقـاب
و غيـرك يحتـرق قلبـه و لا يقـدر يحاكينـي
أنا قبلك صدفت عيون لكن ويش جـاب لجـاب؟
ترى كـل العيـون اللـي لقتنـي مـا تكفينـي
رماني حظي العاثر عليك وجيـت لـك طـلاب
و لا أنتي اللي عشقتيني و لا انتي اللي عتقتينـي
تعالي و اعتقي ذاك الخفـوق المولـع المرتـاب
مهب لاجلي عشـان الله يجازيـك و يجازينـي
تعدي في سما عشقي و لو عشقي خراب أصحاب
و صوني بالهوى نفسك قبل لا انتـي تصونينـي
و شيليني على متنـك خفـوقٍ بـاريٍ منصـاب
و من فوق الغـرام العـذب شيلينـي و حطينـي
و لا منك هقيتيني شجـاع و مـا يطيـق يهـاب
أنا لك بالهوى و الله مثـل مـا انتـي هقيتينـي
أنا ما أمشي ورا غيرك و لو أنـه يطـق البـاب
و ترى عيبٍ عليّ أطعن و لو كثـرت سكاكينـي
زهودٍ مـا يطيـق الـدم لا دايـن و لا طـلاب
شجاع و عارفٍ نفسي و أظـن أنـك تعرفينـي
غيورٍ ما عرفت أضحك مع الغدر ببّرود أعصاب
أبيـع عيونـي الثنتيـن قبـل أنـك تخونيـنـي
إذا شد الغرام اترك خفوقي بيـن نـاب و نـاب
لفرقى تكسـر ضلوعـي و لا عشـقٍ يوطّينـي
أنا رجلٍ و لي غيره و إذا شفت الهـوى كـذاب
تثـور بقلبـي الفزعـه و لا تهـدى شياطينـي
سؤالك لو يزعزع بي كياني مـا قبلـت عتـاب
اجي لك و أسالك نفس السـؤال اللـي سألتينـي
عن العشق القديم أبـواب تقفيهـا كثيـر أبـواب
بعد ذاك الحبيب اللي خدعنـي و انخـدع فينـي
أبي عشق تحسب له كل نظرات العيون حسـاب
و ابي قلبٍ علي قلبي و ابى ديـنٍ علـى دينـي
و ابي نظرة عطا توفي و لا تخلف بدون أسبـاب
و ابي منـك قبـل لا نتـي تصدينـي تودينـي
و ابي دربٍ على العذال صعبٍ و متعبٍ و غلاب
و ابي نفس الطريق الصعب يبعدهـم و يدنينـي
ترى لو للقلوب عيون و لدموع العيـون أهـداب
حشى ما تنـزل الدمعـه لغيـرك لـو تركتينـي
أنا أول من عرف قدرك و أنا توي صغير و شاب
و ابي منـك مـا دام أنـك عرفتينـي تحبينـي
ما دام أني لقيتك في طريق أسمه غـرام أحبـاب
دخيـل الله و بعـد الله دخيـلـك لا تخليـنـي
ما دام أن كل من يحيا على وجه التراب تـراب
عسى تنسانـي الدنيـا مـادام أنتـي ذكرتينـي

[ حد علمي ]


حد علمي بالغلا يوم كنـت أسـوى كثيـر
يوم كانت ضحكتي طبـع وعنـادي سمـه
وحد علمي بالغلا يـوم خفاقـي ضريـر
قبل أهدم العشق وأبنيـه وأرجـع وهدمـه
وحد علمي بالبكاء يوم لي قلـب وضميـر
قبل أشوف المسلم يمـوت بيـد المسلمـه
إيه عدّت من يدي بـس ماعـدّت بخيـر
ليلـةٍ عيّـت تجينـي وجتنـي مظلـمـه
من عرفت إحساسها كن في قلبـي نذيـر
والنهـار المكتئـب بايـن ٍ مـن مقدمـه
ليلـةٍ حسيتـهـا لاتـجـور ولاتجـيـر
مثل طفـل ٍ ماحقرتـه وعيّـت إحشمـه
وأصبحت مثل شعره وأقصمت ظهر البعير
وأبتدى في موته الجرح من حيث إختمـه
صارلي بالعشق مالا هقيـت أنـه يصيـر
أنظلمت بعشرت أنسـان ماكنـت إظلمـه
العشير اللي تبرى مـن ضلـوع العشيـر
الحـلا عـزّز خطايـاه والحـظ إخدمـه
لاتبسّم يكسـر النـور بعيـون البصيـر
وكن شمـس المغربيـه تبـات إبمبسمـه
معتدل فـي قامتـه لاطويـل ولا قصيـر
ممتلي بالزين من معصمه لـي معصمـه
فيه بلوان الهدب لون غيـر ولـون غيـر
مثل ما للرمـش بالعيـن قصـه مبهمـه
كنها نكس البيـارق علـى شـط وغديـر
ومثل لملمـت الشتـات بشتـات اللملمـه
مـع سـواد مجـدّل ٍ مايثـور إلا يثيـر
كنـه اللـي ينهـم الريـح ثـم ٍ تنهمـه
ماتجمع ليـن قيّـد حريـر ٍ مـع حريـر
فـي ضـلام ٍ علّـم الليـل مالـم يعلمـه
ماهقيت إن الهدب صلف وأجفانـه تغيـر
لين سلهـم لعنبـوا جـد ذيـك السلّهمـه
ماعتقنـي ليـن سـاق البشايـر للبشيـر
يوم صد وجـاه قلبـي بشحمـه ولحمـه
والله إنه حط قلبي تحت رحمـت شطيـر
في يديـه وكـل مـاراد يقسمـه قسمـه
ياعساني ماعدم إرضاه في بـرد وهجيـر
ولوعدمـت مروّتـه ياعسانـي معـدمـه
إن طلب عيني رضا قلت ماغيـره نظيـر
وأنشرب دمي غضب قلت يستاهـل فمـه
واهنيّـه يرقـد الليـل مرقـاد الغـريـر
كن نومه لابغـى يهـزم الجفـن إهزمـه
وإلنا من صفرة عصير الى صفرة عصير
والسّهـر يايلـزم العـيـن وإلا تلـزمـه
لو صحيح إن الحبيبيـن يجمعـه مصيـر
كان نفس اللي حرمني من النـوم إحرمـه
والله إن مروّتـي ولّعـت فينـي سعيـر
يـوم شفتـه تـل قلبـي وداسـه بقدمـه
مارحم زهرة شبابي وأنـا تـوّي صغيـر
لين ضيّـق خاطـري ضيّـق الله إنسمـه
إيه عدّت من يدي بـس ماعـدّت بخيـر
ليلةٍ عيّـت تجـي بـس جتنـي مضلمـه
حد علمي في عناهـا عـذاب وزمهريـر
يوم قمت أوحي بالاضلاع صوت وهمهمه
وحد علمي بالرجا من نصير اليـا نصيـر
يوم شفت النّفس تذبـح وهـي مستسلمـه
وحد علمي بالبكا يوم لي قلـب وضميـر
قبل أشوف المسلم يمـوت بيـد المسلمـه

( عـــاتـــبوهـــا )



بعـد مـا قابلتنـي عاتبـوهـا
على شوف الحبايب حاسبوهـا
خذوها و ابعدوها غصب عنـي
و عن وجهة طريقـي جنبوهـا
و شالوها عن عيوني غصيبـة
عواذل و اغصبوني و اغصبوها
خذوها من يديني شوف عينـي
و عن عيني تعدوا و احجبوهـا
كلام و صدقـوا بالبنـت كذبـة
و هم اللـي مـن أول كذبوهـا
و هم وش دخلهم في مال بيـن
لابوهـا و الخلايـق طالبوهـا
وفية مـا تخـون و لا تعانـد
جسورة و المواعيـد ارعبوهـا
مـلاكٍ كاملـة و الكـامـل الله
و لكـن العـواذل عذربـوهـا
و هي كل ما دعتني تشتكي لي
عـن اللـي سالفتنـا سربوهـا
تخاف و تلتفت مع كـل كلمـة
تظـن أن العـواذل راقبـوهـا
تلفت من عقب ما هي جريئـة
شجاعة مـا تهـاب و هيبوهـا
و اهديها و انا حايـر و ثايـر
مصيبـة يـا عـذابٍ عذبوهـا
و هم كل ما خذوها عن طريقي
تراهم صـوب قلبـي قربوهـا
و أنا ما تعبـت قلبـي خيانـة
خيانـة رتبوهـا و حسبـوهـا
و لا يعجز خفوقـي لا يقابـل
جفا من حاربـوه و حاربوهـا
و أنا لي عـزةٍ تفـرض علـي
أخاطب بالجفا مـن خاطبوهـا
و أكسر لوحة الماضي و أزيله
و أخربها مثـل مـا خربوهـا
و أذوقهم ندم مـا صـار فيهـا
و أشربهم من اللـي شربوهـا
و أدلعهـا و أولعهـا بنفـسـي
و أشرقها بعـد مـا غربوهـا
و أعوضها عن اللي راح كلـه
و عن ذيك الليالي كـل ابوهـا
غلاها بالحشـا لا زال ثابـت
و لو حتـى بغيـري حببوهـا
و غلاي بقلبهـا مـر و تعـدى
غلاهـا لأمهـا و الا لأبوهـا

[ أهل الجنوب ]



وعيني اللي كل ما ذعـذع مـن الغـرب هبـوب
يحلا لهـا لـون الغـروب اللـي يـذوب قبالهـا
ويا ويل حالي كل مـا يحلالهـا لـون الغـروب
تطـري لـي الريـم اللعـوب وسالفـة ترحالهـا
وعز الله اني كل ما تطري لـي الريـم اللعـوب
حرمت امد ايدي على حاجـة وانـا مـا اقوالهـا
من سافرت ريم الفلا صديت عـن كـل الـدروب
ما هـو قصـور بالعـذارى بـس ذيـك لحالهـا
من فارقتني ما خطف قلبي من الحـور محبـوب
ولا لقيـت الجـادل اللـي تستـحـق احيالـهـا
لأن القلوب ان ما وفت لأحبابها مـا هـي قلـوب
والعشره اللي ما تـرد الـروح مـا نسعـى لهـا
إما الوفى اللي يستر الرجّال مـن كـل العيـوب
والا الجفى اللي يستر عيوب العرب فـي رجالهـا
ما اقسى من فراق الجنوب الا فراق اهل الجنـوب
ويلي على اللي كـل مـا تزعـل تشـد رحالهـا
اللي مذيره العتـب لا شبـت بصـدري شبـوب
عييـت اراضيهـا وهـي عيـت تطـول بالهـا
كانت معي مثل النصيب يحدني من كـل صـوب
كانـت دروبـي مـن متاهـات الظلـل لظلالهـا
كانت هروبي لا شعـرت انـي بحاجـه للهروب
كانت سماي اللـي ليـا ضاقـت علـي ألجالهـا
ليه اتحداني وانـا فـي كـل الاحـوال مغلـوب
ليـه حرمتنـي مـن قهـر عذالـي وعذالـهـا
ليـه اتجاهلنـي وانـا لانـي جبـان ولا كـذوب
ليه ارخصت دمعي وانا اللي مـا بكيـت الا لهـا
ما ترحم اللي له سنه كأنه علـى النـار محطـوب
مـا هزهـا دمـع الفقيـد اللـي بكتـه أطلالهـا
ما خافت تهدم السنين اللـي بنتنـا طوب..طـوب
ما فكرت تشفـق علـى حالـي وترحـم حالهـا
قولوا لها لـو مـا تـذوب انـا بخليهـا تـذوب
قولوا لها لـو مـا عنـت لـي مستعـد اعنالهـا
إليا ادمحت لي هالخطا بدمـح لهـا كـل الذنـوب
وإن جابت الحسنى معـي تبشـر بعشـر أمثالهـا
أفرش لها صدري وطن وأجمع لها ضلوعي شعوب
وأرقى لها المكانه اللي مـا حـد(ن) يرقـى لهـا
إن كاني مخطي فأنا مانـي خلـيّ مـن العيـوب
الذنـب يغفـر والبشـر تجـزى بقـدر أعمالهـا
البعد قاسي والفـراق يضيـق الصـدر الرحـوب
وانــا تعـبـت ادور الحيـلـه وارد احتالـهـا
قولولها ترجع ترا ماني علـى الحـزن مغصـوب
وإلا ترا نذر(ن) علـي انـه ماهـو ب أشوالهـا
إمـا تجنـب هالهبـال وتتـرك البعـد وتتـوب
والا بتبشـر بالهبـال اللـي مـا هـو بهبالـهـا
كافي زعل ترا الظروف مقفله مـن كـل صـوب
وأنـا حملـت مـن الهمـوم انواعهـا واشكالهـا
يكفيني اني كل ما هبـت علـى صـدري هبـوب
تحـن عينـي للجـنـوب وتلتـفـت بلحالـهـا
والمشكلة اني كل مـا حنـت عيونـي للجنـوب
تطـري لـي الريـم اللعـوب وسالفـة ترحالهـا
وعز الله اني كل ما تطري لـي الريـم اللعـوب
حرمت امد ايدي على حاجـة وانـا مـا اقوالهـا

( أربــــــــــع خـــــــناجـــــر )



مشكله لا جات حاجتك بيديـن البخيـل
مايفكـك ليـن تدفـع كثـر مايدفـعـه
ومشكله لا صرت مطعون بكفوف الدخيل
في ظهرك اربع خناجر وبالصدر اربعه
ومشكله لا ضاق بالوقت رجـالً ثقيـل
يطلـب احبابـه وعيـا زمانـه ينفعـه
ليت ربي مايحاسب خليـلً مـن خليـل
دام مال الحظ فزعـه وللوجـه اقنعـه
ودام مال العذل تالي ومابالحيـل حيـل
الغـلا سمـاً نذوقـه ومـرً نجـرعـه
نحتري فيه القا والحصيل هو الحصيـل
مثـل حلمـاً ماتحقـق وعيـت اقطعـه
كني اللي حط بشفاه من جمـر المليـل
لا قـدر يرميـه للنـاس وزرا يبلعـه
والظروف اللي حدتني لنيـران وفتيـل
عرضت دمع المحاجر لشـيً يجزعـه
والمدامع بالغـلا لا تحـال ولا تحيـل
والمشاكل كل ماجـات جـات مجمعـه
اعذلوني عن هوى النفس وعيوني تخيل
في حبيـب ٍ ماتركتـه ولازلـت اتبعـه
مغرم في حب مثله ولا ارضى له بديـل
عيني تشوفـه وقلبـي يجـوع ويشبعـه
ذاك كل مازان بالي وطالعـت النخيـل
ماذكرت الا ثباتـه بوقـت الزعزعـه
ماهو الاقطعة مـن حشـا قلبـاً عليـل
وماني الا قطعـة منـه مخلـوقً معـه
لا جميل شفت قبلـه ولا بعـده جميـل
العذارا رهن رمشه وانا رهـن اصبعـه
والله انه لو طلبنـي اطلـوع المستحيـل
لا اطلعه مني منـاك يعنـي لا اطلعـه
ماعلي مـن الملامـه وهـرج الهبيـل
مشجع الرجال لا ثار غيـره مشجعـه
في عيون اللي عشقني ولا جاني هزيـل
الله اللي حـط عشقـه بقلبـي وزرعـه
لو سكت ينطق له الصم والدنيـا تسيـل
وان حكى لو يمشي المزن ياقف يسمعـه
سلسبيل مـن شفاتـه يخالـط سلسبيـل
معمعه بسكات واحـلا سكـات بمعمعـه
ماهقيت ان اكثر الليل يمـرح بالجديـل
لين شفته شـوف عينـي بكفـه يرفعـه
وان حيت ومابقالي معـه ياكـود ليـل
لا اسهره بأول غروبه ومـوت بمطلعـه
والله ان العشق جمره وطاحت بالشليـل
وان حصل ماطاعك الوقت بحبابك طعه
من هو اللي علم عداي نكران الجميـل
ومن هو اللي خان خلي وحـاول يقنعـه
كل عاذل ردني عنك يالطرف الكحيـل
ياعسى الله يقلعـه ياعسـى الله يقلعـه
يامعرض قلب الاحباب للدرب الطويـل
السعـه لا بـارك الله بالضيـق السعـه
والله ان الوقت قاسي وانا مانـي ذليـل
واشهد ان الرجل مرات ظنـه يخدعـه
وانتم اتعذلـون خفـاق بعيـون العديـل
مارحمتم نار جرحـه وحيـرة مدمعـه
والسوالف ليلها ليـل والحايـل يحيـل
والمشاكـل مشكلـه بمشكلـه متجمعـه
مشكله لا خانك الوقت بالحمـل الثقيـل
لو زرعت الزرع هوج العواصف يشلعه
ومشكله لاصار عاذلك مايبـرد غليـل
لا تـرده طيـب كلمـه ولحـدً يمنعـه
ومشكله لا صرت مطعون بكفوف الدخيل
في ظهرك اربع خناجر وبالصدر اربعه