.. الرحيــل ..


صباح الاثنين كل الناس مذعوره = علم لفى كدر القاصي مع الداني
قالوا وطنكم توفى اللي حمى سوره = العاهل اليعربي يالقايد الباني
موكدين الخبر بالصوت والصورة = والله فلاأدري عقب ذا العلم وش جاني
هلت دموع العيون وقلت معذوره = حاولت أكف العباير مير ماأمداني
نبكي وكل العرب يبكون اخو نوره = يبكون عز الديار ونور الأوطاني
من عاليات الحجاز لرأس تنوره = ومن صوب حد اليمن لحدود عماني
وتبكيه مكه وبيت الله وحضوره = والكعبة اللي كساها بأغلى الأثماني
ويبكيه مسجد رسول الله وجسوره = له بصمةٍ باقية مع طول الأزماني
والأسرة المالكة والشعب وقصوره = يبكون فرقا ملكهم سر واعلاني
جونا ملوك الدول من كل معموره = من جاه علم ابوفيصل جاء لنا عالي
كلٍ يعزي نوادر نجد وصقوره = في شيخنا اللي توفى ذرب الأيماني
محدٍ لعب دور في الدنيا مثل دوره = أنا أشهد انه فريد النوع وحداني
له فزعةٍ مع كويت الخير مشهوره = وله وقفةٍ يحترمها كل لبناني
مواقف الفهد تحسب له ومشكوره = ومساهمات الفهد في كل ميداني
شيخٍ مدون له التاريخ في سطوره = سيرة بطل للشرف والمجد عنواني
زعيمنا معجزة .. لاوالله اسطوره = لو جيت أعدد فعوله يعجز لساني
قالوا توفى فهدنا واختفى نوره = قلنا ليا غاب نجمٍ يطلع الثاني
يبقى فهد في قلوب الشعب وجذوره = تروي بغيث الكرامة كل ضمياني
والحمدلله راضين بمقدوره = وحنا عوضنا بعبدالله وسلطاني
وأخوان عبدالله اللي شورهم شوره = نحبهم كلهم من دون نقصاني
وعسى السحايب بنو الخير ممطوره = تمطر على قبرٍ شيخٍ شد الأضعاني
تسقي ثرى العود وتديم على قبوره = آمين ياربنا خلاق الأكواني

.. ياقبــر ..


ياقبر سلم لي على اللي نزل فيـك = مع النبـي الهاشمـي والصحابـه
ياابوي ياللـي طيبـات مماشيـك = اسمع ولدك اليـوم يكتـب جوابـه
بجيرة الرحمـن ياابـوي اهنيـك = الواحد اللي مايخيـب الرجـا بـه
ياابوي جعل الغيث يمطر ويسقيـك = يرش قبـرك ليـن يربـع جنابـه
ماعنك خافي كل ما حـل طاريـك = يهل دمعي مثـل وبـل السحابـه
وتبكي الحنون وتنتخي بك وترجيك = من لامها جعلـه يضيـع صوابـه
وذي بندقك تبكي وبشتـك يناديـك = وعليك راعي الطيب شقـق ثيابـه
ويبكي عليك العود الازرق ويرثيك = المجلـس مابعـد صــك بـابـه
وتبكي عصاك اللي وزانك تباريـك = والدلـه الصفـرا وباقـي زهابـه
ياابوي ليتك تسمع اللـي يشاكيـك = وتشوف عقبك ماجرى له وصابـه
على النعش سجت عيوني تراعيـك = واشوف قبرك يـوم هلـوا ترابـه
وشفت النصايب فوق قبرك تحجيك = ياشين هاك اليوم واللي جرى بـه
اقفوا وانا قلبي من الشوق قافيـك = اقنب مـن الفرقـا قنيـب الذيابـه
ياابوي انا لك برفع الصوت وابكيك = وقـت مضـى وايـاك لاواسفابـه
لوطالـت الايـام مانيـب ناسيـك = وشلون ابنسى من عطاني شبابـه
وياتمير انا عقب احمر العين ماابيك = تمير عقـب العـود وش ينبغابـه
لولا رجال فيـك ماجيـت ناصيـك = اللي لهـم عـز وجـلال ومهابـه
كل يغيـب ورجعتـه لـك تسليـك = الا طريح المـوت يبطـي غيابـه
مرحوم يااللي كل الاجـواد تغليـك = فيك الكرم والجـود كـل درى بـه
سبع سنـوات مالقيينـا مداويـك = عسى لك الجنـه مـن الله وهابـه
في جنـة منزالهـا عنـد واليـك = مع النبـي الهاشمـي والصحابـه

.. العيــون السـود ..


خابرٍ مرباك يازين التثني = ساكنٍ يانور عيني فالبديعة
القصائد والقوافي يوم أغني = فيك يالمجمول صارت لي طبيعة
منك أنا يانور عيني وانت مني = من يفرق بيننا لا مانطيعه
العيون السود في لحظه رمني = صوباً القلب في لحظه سريعه
والخدود اللي عساهن يسلمني = مثل برقٍ لاح بالظلماء لميعه
ليه تاخذ قلبي المجروح مني = رد قلبي لي يامال القطيعة
وكان معزم وقلبك مرجهني = قلبي المجروح يالغالي وديعه
الليالي جعلهن مايربحني = أبعدني عنك ياكبر الفجيعه

.. تبي تحسَّف ..


البارحـــــه شفتــه وانا مهتال = بالحلم لاقيـــــــــته ولاقاني
قال الموده قلـــــت له غربـال = قال المبــــعد قلت شيطاني
قال الهوى قلت الهــوى قتـال = قال المـــــفارق قلت بكاني
قال الصـــراحه قلت ماتـنقال = مير ادمح الزله على شاني
حبك ذبحـني والحمــول ثقال = وكثر التــــغلي منك عناني
تمرني ماقـلت كـــيف الحـال = وانا على يمناك مـــن داني
تبي تحسف وانــــشد العــقال = واذكرك كان الــله احياني
وان كان من حبك يجيه هبال = شهار مســـــــتشفاه يتناني
ياليتني في الخـــــد حبة خال = حدر المبيسم والـعمر فاني

.. الطيِّب ابمدحه ..


الطيِّب ابمدحه والنذل ابذمه = مادام روحي جليل الملك محييها
ترى الولد لاتردى في ولد عمه = ماينفعك بأول الدنيا وتاليها
والدين يطرد منام العين من همه = والفقر يخلف رجالٍ عن مماشيها
والبخل قالوا عدو المرجلة سمه = راعيه ناقص عقل والرجل مشقيها
مانيب أداني الخطأ ولا أنقل النمة = ولاأسمع السالفة من دون طاريها
ولا أجالس الجاهل اللي يستخف دمه = والكلمه الطايشه مانيب ادانيها
ولاآرد العد لامنه صفى جمه = ولاأشرب الا قراح الماء وصافيها
ولاألبس الثوب لامنه قصر كمه = ولاأنقل البندق اللي تخون راميها
ولاأقرب الداب لجلي خابرٍ سمه = أخاف من نهشةٍ مانيب قاويها
والورد لامن غدى مشموم ماأشمه = أدور الوردة اللي ماعبث فيها
أحب راعي الوفاء والطيب والهمة = وأعز نفسي عن الذلة وراعيها
ومن لايحب المراجل ما التفت يمه = ذي عادتي عادة لله ما اخليها
ولي عهد وافي ولي مبدأ ولي ذمة = ولي عبرةٍ عن جميع الناس مخفيها
ولي نفس منزالها في عالي القمة = وعندي كرامة ماأدنسها وأدنيها
واللي يبي يمسها ماجابته امه = هانت عليه الحياة ورخص باقيها
وان جاء نهارٍ به الغارات ملتمه = أبيع روحي نهار الكون ماأشريها
تلميذ شيخٍ مثيل المقبرة ضمه = الله ينجيه من ناره وصاليها
شاعر وأحب الشعر وأبداه وأتمه = أصخر بيوت الشعر وأفهم معانيها

.. ماوجه سهومه الا لي !! ..


صاحبي ماوجه سهومه الا لي = اكتب اسمي بالقلم تحت توقيعه
كل ماسجيت طروك يالغالي = وانجرح قلبي وزادت مواجيعه
من عذلني في محبة هوى بالي = والله اني ياهوى البال ماأطيعه
بالعيون اللي بكاها برى حالي = أشتري حب أريش العين ماأبيعه
عقب ماني يافهد دالهٍ سالي = صرت والله خاتمٍ بين أصابيعه
من غلاه أرخصت دمعي وهو غالي = ماقويت أجامله وقت توديعه
فضحتني دمعتي بين عذالي = وافترق هاك الشمل عقب تجميعه
دمعي ياللي فوق الأوجان همالي = يسقي الشوكي ويروي ترابيعه
أشهد ان فراق الأحباب قتالي = يذبح العاشق ويحرق مداميعه
كم شجاعٍ يضربون به الأمثالي = صارت الفرقى من أسباب تشييعه

.. ياوجودي عليها ..


ياوجودي عليها وجد ولد العواجي = يوم هلوا وتشدوا عنه بيح سدوده
ماشي في هواه وراجي الوصل راجي = صرت مثل الضرير يدبره من يقوده
يوم أطالع عيونه كنها الليل داجي = أتصبر وصبري زايدٍ عن حدوده
علتي علة اللي مالقى له علاجي = يشكي الحال لله ثم للي يعوده
وأحمد الله مزاجه يتفق مع مزاجي = أكحل الطرف ورد الشام يشبه خدوده
أنت وردك قراح وورد غيرك هماجي = كل وردٍ يذكر غير وردك ماأروده
جرحك اللي جرحته بين الأظلاع ناجي = ماهقيته يطيب وخايف انك تزوده
لاتخون الموده يادقاق الحجاجي = أنت غالي وغيرك ماشكينا صدوده
كم شجاعٍ يضربون به الأمثالي = صارت الفرقى من أسباب تشييعه